म. टा. प्रतिनिधी, औरंगाबाद

गणपती बाप्पा मोरया... मंगल मूर्ती मोरया... असा जयघोष करत गणेशभक्तांनी मोठ्या उत्साहात गुरुवारी आपल्या लाडक्या गणरायाचे स्वागत केले. गजानन महाराज मंदिर चौक, गारखेडा, शिवाजीनगर आदी परिसरात रात्री उशिरापर्यंत श्रींची मूर्तीसह अन्य साहित्य खरेदीसाठी गणेशभक्तीची मोठी गर्दी होती. दरम्यान, येथील नवीन औरंगाबाद गणेश महासंघाचे उद्घाटन व श्रींची स्थापना विधानसभा अध्यक्ष हरिभाऊ बागडे यांच्या हस्ते करण्यात आली.

गणरायाच्या आगमनामुळे सर्वत्र मांगल्य, चैतन्य आणि प्रसन्नतेचे वातावरण तयार झाले आहे. सेव्हन हिल उड्डाणपुलापासून ते गजानन महाराज मंदिर चौकापर्यंत रस्त्याच्या दुतर्फा गणेश मूर्ती, ढोल विक्रेते, सजावट साहित्य यासह विविध प्रकारचे दुकाने थाटण्यात आली होती. गणेशमूर्ती, पूजेच्या साहित्य खरेदीच्या निमित्ताने हा परिसर सकाळपासून गणेश भक्तांच्या गर्दीने फुलून गेला होता. दुपारपर्यंत नागरिकांनी घरगुती गणरायाची मूर्ती खरेदी केली तर त्यानंतर गणेश मंडळांनी मोठ्या मूर्ती घेण्यासाठी या भागात एकच गर्दी केली. गणपती बाप्पा मोरयाचा जयघोष, ढोलताशाचा गजर गणेश भक्तानी आपल्या लाडक्या गणरायाचे स्वागत करत होते. त्यामुळे परिसरात एकच जल्लोष दिसून येत होता. रात्री उशिरापर्यंत भक्ताची गर्दी या भागात होती.

महासंघाचे उद्घाटन

नवीन औरंगाबाद श्री गणेश महासंघ स्थापनेला यंदा १४ वर्ष पूर्ण झाले आहे. या महासंघाच्या कार्यालयाचे उद्घाटन व श्रींची प्रतिष्ठापना विधानसभा अध्यक्ष हरिभाऊ बागडे यांच्या हस्ते सायंकाळी करण्यात आले. आमदार सतीश चव्हाण, अतुल सावे, माजी आमदार डॉ. कल्याण काळे, प्रदीप जैस्वाल, नामदेव पवार, अभिजित देशमुख, जिल्हा व्यापारी महासंघाचे अध्यक्ष जगन्नाथ काळे, स्थायी समिती सभापती राजू वैद्य, महासंघाचे संस्थापक अध्यक्ष बबन डिडोरे, अध्यक्ष मोहनराव आहेर, मनोज चोपडा, कार्याध्यक्ष बाळासाहेब गायकवाड आदी उपस्थित होते.

म. टा. प्रतिनिधी, औरंगाबाद

उपमहापौर विजय औताडे आणि पाणीपुरवठा विभागाचे उपअभियंता सरताजसिंग चहेल यांच्यात कुठलाही वाद झाला नाही, धक्काबुक्कीची घटना देखील घडली नाही, अशी माहती देणारे पत्र महापौर नंदकुमार घोडेले यांनी पोलिस आयुक्तांना दिले आहे.

सरताजसिंग चहेल यांनी गुरुवारी उपमहापौर विजय औताडे यांच्याविरुद्ध सिटीचौक पोलिस ठाण्यात तक्रार दिली आहे व त्यांच्यावर कारवाई करण्याची मागणी केली आहे. त्या पार्श्वभूमीवर पोलिस आयुक्तांना दिलेल्या पत्रात महापौरांनी म्हटले आहे की, महापालिकेची सर्वसाधारण सभा ११ सप्टेबर रोजी झाली. नगरसेवकांच्या वॉर्डातील जलवाहिनी टाकण्याच्या कामाच्या फाइल चहल यांच्याकडे प्रलंबित असल्यामुळे सर्वसाधारण सभेत नगरसेवकांनी तीव्र असंतोष व्यक्त केला. नगरसेवकांच्या मागणीवरून सर्व फाइल सभागृहात मागवून त्या निकाली काढण्याबाबत चहल यांना सूचना करण्यात आली व फाइल निकाली काढण्याचे काम करण्यात आले. अधिकाऱ्यांचा अपमान व्हावा अशी कोणत्याही पदाधिकाऱ्याची मानसिकता नसते. यावेळी उपमहापौर औताडे व उपअभियंता चहेल यांच्यात कुठलाही वाद झाला नाही. धक्काबुक्कीची घटना देखील घडली नाही. उपमहापौरांनी शांतपणे कामकाज करून घेतले.

म. टा. प्रतिनिधी, औरंगाबाद

सिडको एन ७ येथील मुकुल मंदिर या शाळेचे संस्थापक निर्मलदादा ठाकूरदास ग्यानाणी (वय ८४) यांचे शुक्रवारी (१४ सप्टेबर) रात्री आठच्या सुमारास निधन झाले. ते निर्मलदादा या नावाने ते परिचित होते. त्यांनी देहदान केले आहे, त्यांचे पार्थिव शनिवारी सकाळी आठ ते नऊ या वेळात मुकुल मंदिर शाळेत अंत्यदर्शनासाठी ठेवले जाणार आहे. ते अविवाहित होते.

निर्मलदादा काही महिन्यांपासून आजारी होते. ते शुक्रवारी सायंकाळी साडेसहापर्यंत सर्वांसोबत बोलत होते. परंतु, रात्री आठ वाजता अचानक त्यांची प्राणज्योत मालवली. त्यांच्या पश्चात भाऊ उत्तमभाई ग्यानाणी व भावयजय असा परिवार आहे. अंतिम दर्शनानंतर त्यांचे पार्थिव शासकीय वैद्यकीय रुग्णालयाच्या ताब्यात दिले जाणार आहे. निधन झाल्याचे कळताच शाळेचे विश्वस्त अनिल सावे, आमदार अतुल सावे, चंद्रकांत न्यायाधीश, राष्ट्रवादी काँग्रेसचे नेते काशिनाथ कोकाटे यांच्यासह शिक्षक, विद्यार्थ्यांनी शाळेत धाव घेतली.

त्यांना पद्मविभुषण गोविंदभाई श्रॉफ स्मृती पुरस्कार, महाराष्ट्र शासनाचा स्काउट जीवन गौरव पुरस्कार, मुंबईच्या भारतीय शिक्षण मंडळाचा जीवन गौरव पुरस्कार देवून गौरविण्यात आले होते. निर्मलदादांची आई कृष्णाबाई ग्यानाणी यांनी १९७१ मध्ये नागेश्वरवाडीत 'मुकुलहार' या नावाने विद्यार्थी मंडळाची स्थापना केली. मंडळाचे १९७६ मध्ये सिडको एन ७ येथे स्थलांतर होऊन 'मुकुल मंदिर' या नावाने शाळा सुरू करण्यात आली. या शाळेचा लौकिक निर्मलदादा यांनी वाढवला.

अल्पपरिचय

२७ ऑक्टोबर १९३४ रोजी कराची येथे जन्म

दोन वर्षांचे असताना वडिलांचे छत्र हरपले.

देशाच्या फाळणीनंतर दोन ऑक्टोबर १९४७ रोजी आईसोबत पुण्यात आगमन

प्राचार्य राजाराम सबनीस यांच्यामुळे नारायणगाव येथील शाळेत प्रवेश

उरळीकांचन येथे शिक्षक

१९७१ मध्ये स्काउट-गाइड चळवळीच्या माध्यमातून मराठवाड्यात आगमन

सात वर्षे स्काउट-गाइडमध्ये कार्य

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या वसतिगृहातील विद्यार्थ्यांना चक्क शेवाळ मिश्रित पाणी प्यावे लागत आहे. त्यामुळे गुरुवारी रात्री संतापलेल्या विद्यार्थिनींनी ठिय्या आंदोलन पुकारले. त्यानंतर खडबडून जागे झालेल्या प्रशासनाने मध्यरात्री पाणीपुरवठा सुरळीत केला आणि दोन दिवसांत वॉटर प्युरिफायर कार्यान्वित करण्याचे आश्वासन दिले.

विद्यापीठात महापालिकेचा नियमित पाणी पुरवठा सुरू आहे. पाण्याचे पंप स्टेशन विद्यापीठाच्या आवारात आहे. मात्र, बेगमपुरा परिसरातील रहिवासी अतिरिक्त पाणी घेत असल्यामुळे विद्यापीठात अपुरा पाणी पुरवठा होत असल्याचे उघड झाले. तरीसुद्धा प्रशासनाने खबरदारी घेतली नाही. या पाण्याशिवाय विद्यापीठाच्या मालकीच्या विहिरी, तलाव आणि कूपनलिका आहेत. सध्या पाणीसाठा असल्यामुळे वसतिगृहाला पाणी पुरवणे शक्य आहे. मात्र, स्थावर विभागाचे कर्मचारी पुरवठ्याचे नियोजन करीत नसल्यामुळे पाणी टंचाई भेडसावत आहे. एक आणि चार क्रमांकाच्या वसतिगृहात सुरळीत पाणी पुरवठा आहे. तर विद्यार्थिनींच्या वसतिगृहात पाण्याचा ठणठणाट आहे. तसेच वॉटर प्युरिफायर नसल्यामुळे दररोज शेवाळलेले पाणी येत आहे. दूषित पाणी प्यायल्याने विद्यार्थिनींच्या आरोग्याचा प्रश्न निर्माण झाला आहे. पोटदुखीने अनेक विद्यार्थिनी त्रस्त आहेत. वारंवार मागणी करुनही वॉटर प्युरिफायर कार्यान्वित करण्यात आले नाही. शेवाळलेले व दुर्गंधीयुक्त पाणी येत असल्यामुळे गुरुवारी रात्री विद्यार्थिनी रस्त्यावर उतरल्या. वसतिगृहासमोर ठिय्या आंदोलन करण्यात आले. रात्री नऊ वाजता सुरू झालेले आंदोलन रात्री साडेदहा वाजेपर्यंत सुरू होते. यावेळी प्रशासनाच्या विरोधात जोरदार घोषणा देण्यात आल्या. पाणीपुरवठा सुरळीत करा आणि पुरेसे स्वच्छ पाणी द्या अशी मागणी करण्यात आली. आंदोलन कायम असल्यामुळे सुरक्षा विभागप्रमुख सुरेश परदेशी यांनी विद्यार्थ्यांची समजूत घातली. तर स्थावर विभागाचे अधिकारी व कर्मचाऱ्यांनी मध्यरात्री पाणीपुरवठा सुरळीत केला. कुलगुरू, प्र-कुलगुरू, कुलसचिव, विद्यार्थी कल्याण संचालक यांना वारंवार निवेदने देऊनही पाणी मिळत नाही. विद्यापीठ प्रशासन विद्यार्थ्यांकडे दुर्लक्ष करुन कुणाच्या हिताचे काम करीत आहे असे सवाल विद्यार्थ्यांनी केला. दरम्यान, प्रशासनाने दूषित पाण्याचे नमुने घेतले असून, पर्यावरणशास्त्र विभागाला तपासणीसाठी दिले आहेत. पुढील काळात स्वच्छ पाणी पुरवठा करण्यात येईल असे आश्वासन देण्यात आले.

\Bकुलगुरूंच्या कक्षात पाणी नाही

\Bवसतिगृहांसह विविध विभागात पाण्याचा ठणठणाट आहे. विशेष म्हणजे मागील आठवड्यात कुलगुरूंच्या कक्षातही पाणी नव्हते. अभ्यागतांना पाणी मिळाले नसल्यामुळे ही परिस्थिती समोर आली. परीक्षा विभाग, प्रशासकीय इमारत या ठिकाणी जारने पाणी पुरवठा सुरू आहे. विभागात विद्यार्थी घरून पाणी आणतात. मात्र, वसतिगृहातील विद्यार्थ्यांना ते शक्य नसल्यामुळे संताप वाढला आहे.

पाण्याच्या हौदावरील टायमर वाढवण्यची गरज आहे. कारण विद्यार्थिनींच्या संख्येच्या तुलनेत पाणी पुरत नाही. घाण पाणी पुर‌वठा थांबवण्यात यावा. वॉटर प्युरिफायर लावल्यास पिण्यासाठी स्वच्छ पाणी मिळेल.

- प्राजक्ता शेटे, विद्यार्थिनी

म. टा. प्रतिनिधी, औरंगाबाद

पहिल्या उत्तरपत्रिका तपासणीत पाच विद्यार्थी उत्तीर्ण झाले. दुसऱ्यांदा तपासणी केल्यानंतर १७ विद्यार्थी उत्तीर्ण झाले. तरीही अनुत्तीर्ण विद्यार्थ्यांचा आक्षेप कायम असल्यामुळे तिसऱ्यांदा उत्तरपत्रिका तपासणीचा नवा प्रयोग नाट्यशास्त्र विभाग करणार आहे. स्वायत्त विभागाच्या अधिकारात घडत असलेला बेजबाबदारपणा विद्यार्थ्यांना जेरीस आणणारा ठरला आहे.

डॉ. बाबासाहेब आंबेडकर मराठवाडा विद्यापीठातील नाट्यशास्त्र विभाग नियोजनशून्य परीक्षेमुळे वादात आहे. बॅचलर ऑफ परफॉर्मिंग आर्ट्स (बीपीए) प्रथम वर्षाच्या निकालावरून वाद सुरू आहे. एकूण ३१ विद्यार्थ्यांनी द्वितीय सत्राची परीक्षा दिली होती. 'नाट्यशास्त्र' विषयात पहिल्या निकालात फक्त पाच विद्यार्थी उत्तीर्ण झाले. मुद्देसूद उत्तरे लिहूनही कमी गुण दिल्याचा ठपका विद्यार्थ्यांनी ठेवला. शिवाय विभागाचा परफॉर्मन्स घसरल्यामुळे पुन्हा उत्तरपत्रिका तपासण्यात आल्या. या निकालात १७ विद्यार्थी उत्तीर्ण झाले. उरलेल्या १४ अनुत्तीर्ण विद्यार्थ्यांनी प्रक्रियेवर आक्षेप कायम ठेवल्यामुळे विभाग तिसऱ्यांदा पेपर तपासणार आहे. प्रा. डॉ. अशोक बंडगर 'नाट्यशास्त्र' विषय शिकवतात. प्रश्नपत्रिकासुद्धा बंडकर यांनी तयार केली होती. नियमानुसार उत्तरपत्रिका तपासण्याचे काम त्यांना देणे आवश्यक होते, मात्र ऐनवेळी विभागप्रमुख डॉ. जयंत शेवतेकर यांनी हे काम तासिका तत्त्वावर कार्यरत असलेल्या प्रा. सुरेखा मसाळ यांच्याकडे सोपवले. पहिल्या निकालात फक्त पाच विद्यार्थी उत्तीर्ण झाल्यामुळे वाद झाला. विद्यार्थ्यांनी बंडगर यांच्यावर आक्षेप घेतला. आपण उत्तरपत्रिका तपासल्या नसल्याचे त्यांनी स्पष्ट केले. 'नियमानुसार उत्तरपत्रिका मला तपासणीसाठी का दिल्या नाहीत,' अशी विचारणा त्यांनी विभागप्रमुखांना केली. या मुद्द्यावर बंडगर आणि शेवतेकर यांच्या खडाजंगी झाली, असे प्रत्यक्षदर्शींनी सांगितले. विद्यार्थ्यांनी पुरेशी उत्तरे लिहिली नसल्यामुळे जास्तीचे गुण कसे देणार असा सवाल शेवतेकर यांनी केला, पण बंडगर यांनी नमुन्यादाखल काही उत्तरपत्रिका दाखवल्या. अपेक्षित उत्तरे असूनही विद्यार्थी नापास झाल्याचे त्यांनी निदर्शनास आणून दिले. विद्यार्थ्यांना उत्तीर्ण करण्यासाठी प्रा. मसाळ यांनी पेपर तपासले. या तपासणीत प्रचंड खाडाखोड करुन गुण वाढवण्यात आले. दुसऱ्या तपासणीत विद्यार्थी उत्तीर्ण झाले. मग पहिल्या तपासणीत अनुत्तीर्ण कसे झाले यावरून विद्यार्थी, प्राध्यापक व विभागप्रमुख यांच्यात मतभेद झाले आहेत.

दरम्यान, उत्तरपत्रिकांचा गठ्ठा डॉ. अशोक बंडगर यांच्याकडे देण्यात आला आहे. मात्र, विभागप्रमुखांनी उत्तरपत्रिका तपासणीसाठी नियमानुसार पत्र दिले नसल्यामुळे गठ्ठा पडून आहे. तिसऱ्यांदा तपासणी केल्यानंतर अधिक विद्यार्थी उत्तीर्ण होण्याची शक्यता आहे. या प्रकारात 'सीएचबी' प्राध्यापकांचा ढिसाळपणा आणि विभागाचा बेजबाबदारपणा पुन्हा चव्हाट्यावर आला आहे.

\Bएकांकिका म्हणजे काय?

\Bया परीक्षेत एकांकिका म्हणजे काय, असा प्रश्न होता. या प्रश्नाचे योग्य उत्तर लिहूनही आठपैकी फक्त अर्धा गुण बहुतांश विद्यार्थ्यांना देण्यात आला. हा प्रश्न आणि उत्तर बंडगर यांनी जाहीरपणे वाचून दाखवले. कोणत्या नियमानुसार अर्धा गुण दिला, असे त्यांनी विचारले. तर मर्जीतील विद्यार्थ्यांना जास्तीचे गुण आणि सरस उत्तर लिहूनही इतरांना कमी गुण दिल्याचा आक्षेप विद्यार्थ्यांनी घेतला. जुलै महिन्यात पहिला निकाल, ऑगस्ट महिन्यात दुसरा निकाल आणि आता सप्टेंबर महिन्यात तिसरा निकाल जाहीर करण्याची किमया विभाग करणार आहे.

लेखन क्षमता नसलेल्या विद्यार्थ्यांना कमी गुण देण्यात आले. नाट्यशास्त्राचे विद्यार्थी प्रात्यक्षिकात वरचढ असतात. मात्र, लेखी परीक्षेकडे दुर्लक्ष करतात. एकही विद्यार्थी नापास झाला नसून 'एटीकेटी'मुळे त्यांना पुढील वर्गात प्रवेश मिळाला आहे.

- डॉ. जयंत शेवतेकर, विभागप्रमुख

औरंगाबाद: लाडक्या गणरायाचे गुरुवारी उत्साहात आगमन झाले. साता समुद्रापार राहणाऱ्या भारतीयांनीही बाप्पाचे मोठ्या जल्लोषात स्वागत केले. मूळ औरंगाबाद येथील रहिवासी व सध्या अमेरिकेतील दलासमध्ये स्थयिक झालेल्या मोहित पाडळकर यांच्या घरी गणेशाचे वाजत गाजत आगमन झाले.

म. टा. प्रतिनिधी, औरंगाबाद

चर्मकार समाजाच्या उन्नतीसाठी केंद्रस्तरावर चर्मकार आयोगाची स्थापना करा यासह अन्य मागण्यासाठी चर्मकार महासंघातर्फे शुक्रवारी विभागीय आयुक्तालयावर रापी मोर्चा काढण्यात आला.

राष्ट्रीय चर्मकार महासंघाने या मोर्चाचे आयोजन केले होते. पैठण गेट येथून दुपारी दोनच्या सुमारास मोर्चाला सुरुवात झाली. चर्मकार समाज हा आजही राजकीय, सामाजिक, शैक्षणिकदृष्ट्या मागास आहे. त्यामुळे समाजाच्या उत्थानासाठी केंद्र पातळीवर चर्मकार आयोगाची स्थापना करा अशी मागणी करत गुलमंडी, सिटीचौक, शहागंज मार्गे हा मोर्चा विभागीय आयुक्तालयावर धडकला. समाजाच्या प्रश्नांकडे केंद्र व राज्य सरकारचे लक्ष वेधण्यासाठी आंदोलनाचे हत्यार उपसण्यात आले असून, मागण्या पूर्ण न झाल्यास तीव्र आंदोलनाशिवाय पर्याय राहणार नाही, असा इशाराही महासंघाने दिला आहे. यावेळी महासंघाचे मराठवाडा प्रदेशाध्यक्ष प्रा. डॉ. गोपाल बच्छिरे, राष्ट्रीय उपाध्यक्ष भरत बरथुने, प्रदेश उपाध्यक्ष मोहनलाल गोरमे, गजानन जोहरे, मोहन पठ्ठे, संजय जाटवे, संतोष जाटवे, सुशीला मेहरा, रंजना बच्छिरे, सुनीता बरथुने यांच्यासह मोठ्या संख्येने समाजबांधव उपस्थित होता.

\Bआंदोलकांच्या प्रमुख मागण्या

\B- संत रविदास आर्थिक विकास महामंडळाच्या लाभार्थ्यांचे कर्ज माफ करा.

- चर्मकार बांधवावरील अत्याचार प्रकरणाची 'सीबीआय'मार्फत चौकशी करा.

- खटले जलदगती न्यायालयात चालवा, सर्व जिल्ह्यात रविदास भवन उभारा.

- इतर राज्यांप्रमाणे महाराष्ट्रात संत रविदास महाराज जयंतीला सुट्टी जाहीर करावी

शोभा दांडगे

...

गणपती बाप्पा मूळातच बुद्धी आणि कलेची देवता, श्रींचे आगमन म्हणजे वर्षभरासाठीची ऊर्जा आपल्याला मिळते. श्रींचे आगमन म्हणजे आनंदोत्सव. बाप्पा येणार म्हटल्यावर श्रावणाच्या शेवटी शेवटीच श्रींच्या आगमनाची तयारी सुरू होते. प्रथम रंगरंगोटी, मग मखर तयार करणे इथपासून सुरुवात होते. घरातल्या घरात गणपतीसमोर नवीन आरास केली जाते. मोदक, लाडू, पेढे आणि खिरापतीचा प्रसाद. धूप, उदबत्ती आणि फुलांच्या सुगंधाने घरातील वातावरण अगदी सुगंधी, उत्साहित होते. मुलांच्या उत्साहाला, तर उधाणं आलेलं असतं. या वर्षीचा गणपती गेल्या वर्षीपेक्षा आणखी मोठा पाहिजे, अशी चढाओढ असते. त्यातल्या त्यात सुबक श्रींची मूर्ती आणली जाते. ढोल-ताशांच्या गजरात श्रींचे आगमन होते. टाळ, मृदंगाचा गजर होतो. आरती आणि मंत्रपुष्पांजलीचा आवाज टिपेला जातो, याची चढाओढ लागते. मस्त मजा येते.

माझ्या घरात मूळातच संगीत-भक्तीमय वातावरण आहे. भाऊ शरद दांडगे प्रसिद्ध तबला वादक आहे. तबला वादनाचे त्याचे शिष्य आणि भावजय सुवर्णा दांडगे हिचे गायनाचे शिष्य; या सर्वांमुळे गणपतीसमोर दहा दिवस कार्यक्रमांची रेलचेल असते. रोज वेगवेगळे कार्यक्रम; कधी तबलावादन, कधी गायन, तर कधी मिमिक्री. अलिकडे मालिकांचे चित्रीकरण किंवा इतर कार्यक्रमामुळे घरात वेळ कमी दिला जातो. पण गणेशोत्सवाच्या दहा दिवसांत मिळेल तसा वेळ काढून आरती आणि इतर कार्यक्रमात सामील होण्याचा प्रयत्न करते. यावर्षी आमच्याकडे बाप्पाची सुंदर आरास केली आहे. महादेवाच्या पिंडीत मूर्ती विराजमान आहे. रंगीत फुले आणि वेलींनी पिंड सजवली आहे. तुम्हा सर्वांना आग्रहाचं निमंत्रण. या आमच्या गणपती बाप्पाच्या दर्शनाला. 'गणपती बाप्पा मोरया...'

म. टा. प्रतिनिधी, औरंगाबाद

शहरात घरफोडे, दुचाकीचोर, मोबाइल चोरट्यांनी उच्छाद मांडला असून, त्यामुळे ऐन सुणासुदीत शहरवासीयांचे धाबे दणाणले आहे. यात दिलासा देणारी गोष्टी म्हणजे पोलिसांनी एका घरफोड्यांच्या टोळीला जेरबंद केले. सोबतच अट्टल दुचाकी चोराकडून आठ दुचाकी जप्त केल्या आहेत.

गुन्हे प्रकटीकरण पथकाचे पीएसआय बनसोड यांना एक संशयित आरोपी झेंडा चौकात चोरीची दुचाकी विकायला येणार असल्याची माहिती मिळाली होती. या माहितीवरून पोलिसांनी सापळा रचून अट्टल दुचाकी चोर लहू रमेश चव्हाण (वय २५, रा. मुकुंदनगर) याला दुचाकीसह ताब्यात घेतले. चौकशीमध्ये लहूने ही दुचाकी आपण आपला साथीदार राहुल एकनाथ पवार (वय २३, रा. मुकुंदनगर) याच्या मदतीने चोरल्याची कबुली दिली. पोलिसांनी राहुलला देखील ताब्यात घेतले. यावेळी या दोघांनी विविध ठिकाणावरून दुचाकी चोरल्याची कबुली देत आठ दुचाकी पोलिसांच्या स्वाधीन केल्या. ही कामगिरी पीएसआय बनसोड, सहायक फौजदार शेख हारुण, कौतिक गोरे, अस्लम शेख, प्रकाश सोनवणे, विजय चौधरी, कैलास काकड, सोमकांत भालेराव व सुनील पवार यांनी केली.

…

\Bचैनीसाठी गुन्हे

\Bदोघेही आरोपी सेंट्रिंग काम करणारे मजूर आहेत. लहू चव्हाणवर यापूर्वीचे दुचाकीचोरीचे गुन्हे दाखल आहेत. या दुचाकी चोरल्यानंतर कवडीमोल भावात त्याची विक्री करून या पैशातून हे आरोपी मौजमजा करीत असल्याची माहिती मुकुंदवाडी पोलिसांनी दिली.

म. टा. प्रतिनिधी, औरंगाबाद

जिल्हा गणेश महासंघ, महानगरपालिका, तसेच युवामित्र फाउंडेशनच्या वतीने मंगळवारी गणेशोत्सवानिमित्त 'देवा श्री गणेशा नृत्य, गायन स्पर्धे'चे आयोजन करण्यात आले आहे. ही स्पर्धा मंगळवारी सकाळी अकरा वाजता सिडको संत तुकाराम नाट्यगृहात आयोजित केली आहे. पूर्वी गणेशोत्सवात पारंपारिक कला व गणेश मेळे मोठ्या प्रमाणावर सादर होत असत. ही कला आता लोप पावत असल्याने ती परंपरा जोपासण्याकरिता या स्पर्धेचे आयोजन केले आहे. या स्पर्धेत शहरातील विविध शाळा, महाविद्यालय, डान्स ग्रुपतर्फे कलावतांनी सहभागी होण्याचे आवाहन करण्यात आले आहे. या स्पर्धेसाठी वैयक्तिक नृत्यासाठी तीनशे रुपये, तर समूह नृत्यासाठी पाचशे रुपये प्रवेश शुल्क भरावे लागणार आहे. गुणानुक्रमे प्रथम तीन विजेत्यांना बक्षीसे, स्मृतीचिन्ह व सहभाग प्रमाणपत्र, उत्तेजनार्थ संघांना प्रमाणपत्र देण्यात येणार आहे. स्पर्धेत सामील होण्यासाठी युवामित्र फाउंडेशनचे सचिन अंभोरे यांच्याशी संपर्क साधावा, असे आवाहन करण्यात आले आहे.

वाळूज महानगर : वाळूज महानगर परिसरातील गणेश उत्सव शांततेत पार पडावा यासाठी कोंम्बिग ऑपरेशन राबवून वाळूज एमआयडीसी पोलिसानी ५८२ गुन्हेगारांवर प्रतिबंधात्मक कारवाई केली आहे़ गणेश उत्सवात गुन्हे घडू नयेत; तसेच गुन्हेगारांवर अंकुश राहावा यासाठी ही कारवाई करण्यात आली असल्याची माहिती पोलिसांनी दिली़

वाळूज महानगरात मागील काही घटनांचा आलेख बघता गणेश उत्सव शांतेत पार पडावा यासाठी पोलिस गुन्हेगारावर नजर ठेवून आहेत. यापूर्वी भीमा कोरेगाव; तसेच नऊ ऑगस्टच्या उपद्रवी घटनांचा सामान्यांसह पोलिसांनाही त्रास झाला होता़ गणेशोत्सवानिमित्त गणपती बघण्यासाठी येणाऱ्या गर्दीत महिलांची मुलींची छेड काढू नये, या गर्दीत उपद्रवी किंवा गुन्हेगारांचा शिरकाव होऊ नये; तसेच या उत्सवाला अशांततेचे गालबोट लागू नये यासाठी गर्दीत साध्या वेषात पोलिस असणार आहेत़ महोत्सवादरम्यान मोठा पोलिस बंदोबस्त ठेवण्यात येणार आहे. त्यांच्या मदतीसाठी होमगार्ड, विशेष पोलिस अधिकारी; तसेच गणेश मंडळाचे स्वयंसेवक असतील.

या कोंम्बिग ऑपरेशनदरम्यान गुन्हेगारी वृत्तीच्या ५८२ जणांना पकडण्यात आले असून, त्यांच्यावर प्रतिबंधात्मक कारवाई करण्यात आली आहे. या गुन्हेगारांवर विविध स्वरुपाचे गंभीर गुन्हे दाखल आहेत़ ही कारवाई सहायक पोलिस आयुक्त ज्ञानोबा मुंडे यांच्या मार्गदर्शनाखाली वाळूज एमआयडीसी ठाण्याचे पोलिस निरीक्षक ज्ञानेश्वर साबळे, पोलिस उप निरीक्षक लक्ष्मण उंबरे, सविता तांबे, राजू मोरे, राजेश वाघ, वसंत शेळके, रामदास गाडेकर, प्रकाश गायकवाड, मुरलीमनोहर कोलिमी, शैलेंद्र अडियाल, बंडू गोरे, बाळासाहेब आंधळे आदींच्या पथकाने केली.

म. टा. प्रतिनिधी, वैजापूर

पोलिस व महसूल प्रशासनाने जप्त केलेल्या ३०० ब्रास वाळुचा लिलाव करण्यासाठी प्रशासनाने जाहीर प्रकटनाद्वारे १४ सप्टेंबरची तारीख दिली होती, पण याबाबत उपविभागिय अधिकारी डॉ. संदिपान सानप यांनाच माहिती नसल्याने लिलाव एक दिवस पुढे ढकलण्यात आला. आता १५ सप्टेंबर (शुक्रवारी) रोजी सकाळी अकरा वाजता हा लिलाव करण्यात येणार आहे. त्यामुळे लिलावासाठी उपविभागिय अधिकारी कार्यालयात आलेल्या वाळू ठेकेदारांना परत जावे लागले.

पोलिस व महसूल प्रशासनाने तालुक्यातील बाभुळगावगंगा येथून १६० ब्रास, लाखगंगा व पुरणगाव येथून प्रत्येकी ६० ब्रास व शिऊर येथून २० ब्रास असा ३०० ब्रास वाळूसाठा जप्त केला असून, हा वाळूसाठा संबंधित पोलिस पाटलाच्या ताब्यात देण्यात आला आहे. यापूर्वी १८ जुलै रोजी ३०० ब्रास वाळुचा लिलाव ठेवण्यात आला होता. त्यावेळी जवळपास ५० ठेकेदार वाळूचा घेण्यासाठी आले होते, पण चारही गावांतून जप्त करण्यात आलेल्या वाळूचा एकत्रित लिलाव न करता स्वतंत्रपणे लिलाव करण्याची मागणी करून वाळू ठेकेदारांनी लिलावास खो घातल्याने लिलाव होऊ शकला नव्हता. त्यानंतर प्रशासनाने स्वतंत्ररित्या वाळूचा लिलाव करण्याचा प्रस्ताव जिल्हाधिकाऱ्यांना पाठवला, पण याबाबत जिल्हाधिकाऱ्यांनी अद्याप मान्यता दिली नसल्याचे प्रशासनाकडून सांगण्यात आले.

अखेर १४ सप्टेंबर रोजी लिलाव करण्याचे निश्चित करण्यात येऊन त्याबाबत प्रकटन तहसील कार्यालयात लावण्यात आले, पण याबाबत उपविभागिय अधिकारी डॉ. सानप यांना माहिती नसल्याने लिलाव गुरुवारऐवजी शुक्रवारी सकाळी ११ वाजता ठेवण्यात आला. दरम्यान, वाळूची सरकारी किंमत बाजारभावापेक्षा खुपच कमी असल्याने ही वाळू घेण्यासाठी वाळू ठेकेदार पुढे सरसावले असून, यातील एक गट वाळू घेण्यासाठी सक्रिय झाला आहे.

म. टा. प्रतिनिधी, औरंगाबाद

ताप आणि डेंगीचे रुग्ण वाढू लागल्यामुळे आरोग्य उपसंचालकांच्या कार्यालयात शनिवारी बैठक घेण्याचे ठरविण्यात आले आहे. या बैठकीला महापालिकेच्या आरोग्य विभागाचे अधिकारी देखील उपस्थित राहतील. घाटी रुग्णालयात तापाचे २३० रुग्ण दाखल झाले आहेत, तर डेंगीचे संशयित सहा रुग्ण आणि स्वाइन फ्ल्यूचे दोन रुग्ण दाखल झाले आहेत. या माहितीच्या आधारावर महापौर नंदकुमार घोडेले यांनी शुक्रवारी आरोग्य विभागाची बैठक घेतली. त्यांनी उपसंचालकांशी देखील चर्चा केली. सिव्हिल हॉस्पिटलमध्ये अशा रुग्णांसाठी दहा खाटा आरक्षित ठेवाव्यात, असे त्यांनी उपसंचालकांना सांगितले. यासंदर्भात शनिवारी बैठक घेऊन आवश्यक त्या उपाययोजना करण्याची सूचनी देखील त्यांनी केली.

म. टा. प्रतिनिधी, औरंगाबाद

महापालिकेच्या मुख्य प्रशासकीय इमारतींवर सोलार पॅनल बसविल्यानंतर आता जायकवाडी आणि फारोळा येथेही सोलार प्रकल्प आकाराला येणार असून, यासाठी स्मार्टसिटी प्रकल्पाचा आधार घेतला जाणार आहे. या प्रकल्पांमुळे पालिकेची मोठी आर्थिक बचत होणार आहे.

स्मार्टसिटी प्रकल्पासाठी औरंगाबाद स्मार्टसिटी डेव्हलपमेंट कॉर्पोरेशन ही कंपनी स्पेशल पर्पज व्हेकल (एसपीव्ही) म्हणून स्थापन करण्यात आली आहे. 'एसपीव्ही'ची पाचवी बैठक नुकतीच झाली. याबैठकीत स्मार्टसिटी प्रकल्पांतर्गत केल्या जाणाऱ्या विविध कामांचा आढावा घेण्यात आला व काही नवीन कामे करता येतील का, या बद्दलही चर्चा झाली. सूत्रांनी दिलेल्या माहितीनुसार, जायकवाडी आणि फारोळा येथे स्मार्टसिटीच्या माध्यमातून सोलार पॅनल बसविण्याबद्दल चर्चा झाली व या कामाला तत्वत: मान्यता देखील मिळाली. औरंगाबादला जायकवाडी धरणातून पाणी पुरवठा केला जातो. त्यासाठी जायकवाडी धरणावर पंपहाउस बांधले आहे. धरणातील पाण्याचा उपसा करून पाणी शहरात पाठवण्यात येते. जायकवाडी ते नक्षत्रवाडी दरम्यान ढोरकीन व फारोळा येथेही पाण्याचा उपसा करावा लागतो. त्यात जायकवाडी आणि फारोळा येथे मोठ्या प्रमाणावर उपसा होतो. पाण्याचा उपसा करण्यासाठी वीजेचा वापर होतो. वीजपुरवठा खंडित झाला तर पाण्याचा उपसा थांबतो आणि पाणी पुरवठ्याचे वेळापत्रक बिघडते. वीजपुरवठ्यात वारंवार तांत्रिक बिघाड होतो. त्यामुळे पालिकेची पाणीपुरवठा यंत्रणा देखील हतबल होते. यावर कायमस्वरुपी उपाय शोधण्यासाठी स्मार्टसिटी प्रकल्पाच्या माध्यमातून जायकवाडी आणि फारोळा येथे सोलार पॅनल बसवण्याची कल्पना पुढे आली. 'एसपीव्ही'च्या पहिल्या बैठकीत पालिकेच्या प्रशासकीय इमारतीवर सोलार पॅनल लावण्याचा निर्णय घेण्यात आला. त्यानुसार एका इमारतीवर सोलार पॅनल लावले. 'एसपीव्ही'च्या १२ सप्टेंबर रोजी झालेल्या बैठकीत पुन्हा एकदा जायकवाडी आणि फारोळा येथे सोलार पॅनल्स लावण्याबद्दल चर्चा झाली. ग्रीनफिल्ड प्रकल्पाची सुमारे १०३४ कोटी रुपयांची रक्कम जुन्या शहराला स्मार्ट करण्यासाठी वळती करण्याचा प्रस्ताव या बैठकीत मंजूर करण्यात आला. त्यात पाणीपुरवठ्यासाठी शंभर कोटींची तरतूद करण्याची शिफारस आहे. या तरतूदीमधून जायकवाडी व फारोळा येथे सोलार पॅनल लावता येणे शक्य आहे, अशी भूमिका एसपीव्हीचे मुख्याधिकारी तथा पालिकेचे आयुक्त डॉ. निपुण विनायक यांनी मांडली. त्याला एसपीव्हीचे मेंटॉर सुनील पोरवाल यांनी तत्वत: मान्यता दिली. या कामाचा प्रस्ताव तयार करून पाठवा, त्याला मंजुरी देऊ असे ते म्हणाले. त्यामुळे येत्या काही दिवसात पोरवाल यांच्याकडे प्रस्ताव पाठवला जाण्याची शक्यता आहे.

\Bमहिन्याला चार कोटी वाचणार\B

महापालिकेच्या पाणीपुरवठा योजनेवर दर महिन्याला वीज बिलापोटी चार कोटी रुपये खर्च केले जातात. यातील ७५ टक्के खर्च जायकवाडीतून पाणी उपसून आणण्याच्या प्रक्रियेवर होतो. त्यामुळे जायकवाडी व फारोळा येथे सोलार पॅनल बसवल्यास पालिकेचा दर महिन्याचा चार कोटींचा खर्च वाचेल असे मानले जात आहे. खर्च वाचण्याबरोबरच वीज पुरवठा खंडित झाल्यामुळे किंवा त्यात तांत्रिक बिघाड झाल्यामुळे विस्कळीत होणारा पाणी पुरवठा विस्कळीत होणार नाही. अखंड सौरउर्जा पाणी पुरवठा यंत्रणेसाठी उपलब्ध होईल.

म. टा. प्रतिनिधी, औरंगाबाद

शहरात पुन्हा कचराकोंडी निर्माण झाली असून संनियंत्रण समितीने ठरवलेल्या जागांवर कचरा टाकण्यास नागरिकांनी विरोध सुरू केला आहे. त्यामुळे ऐन गणेशोत्सवात आणीबाणीची स्थिती निर्माण होण्याची शक्यता आहे. यातून मार्ग काढण्यासाठी तातडीने बैठक घ्या, असे पत्र महापौरांनी विभागीय आयुक्तांना दिले आहे. दरम्यान, संनियंत्रण समितीने निश्चित केलेल्या जागांवर सुमारे तीस हजार टन कचरा पडून आहे.

शासनाने विभागीय आयुक्तांच्या अध्यक्षतेखाली स्थापन केलेल्या संनियंत्रण समितीने चिकलठाणा, पडेगाव, हर्सूल आणि कांचनवाडी येथे कचरा प्रक्रियेच्या जागा निश्चित केल्या आहेत. या जागांवर महापालिकेने प्रक्रिया प्रकल्प न उभारता कचरा आणून टाकणे सुरू केले. शिवाय कचऱ्याचे वर्गीकरणही पालिकेकडून केले जात नसल्याने ओला आणि सुका कचरा एकत्र टाकण्यात येत आहे. परिणामी, या भागात दुर्गंधी सुटली आहे. पालिकेच्या या कारभाराविरुद्ध हर्सूल, पडेगाव, चिकलठाणा येथील नागरिकांनी वेळोवेळी आंदोलन करून कचरा टाकण्यास विरोध केला.

चिकलठाणा, हर्सूल, पडेगाव येथे कचरा टाकण्यास नागरिकांनी दोन दिवसांपासून पुन्हा एकदा विरोध सुरू केला आहे. त्यामुळे कांचनवाडी येथे आठ हजार टन, हर्सूल येथे तीन हजार टन, कांचनवाडी येथे चार हजार टन, तर चिकलठाणा येथे दहा हजार टन कचरा पडून आहे. कचऱ्यावर प्रक्रिया होत नसल्याने येथे दुसरा कचरा टाकण्यात अडचणी येत आहेत. त्यामुळे नागरिकांच्या विरोधामुळे निर्माण झालेला जागेचा वाद सोडवण्याकरिता तातडीने संनियंत्रण समितीची बैठक घ्यावी, अशी विनंती करणारे पत्र महापौर नंदकुमार घोडेले यांनी विभागीय आयुक्त डॉ. पुरुषोत्तम भापकर यांना पाठवले आहे. या जागांची मोजणी करून त्या अधिकृतपणे पालिकेच्या ताब्यात द्या, असे या पत्रात नमूद केले आहे.

\Bड्रोनद्वारे सर्वेक्षण\B

कांचनवाडी आणि हर्सूल येथील कचऱ्यावर 'एमजीएम'च्या मदतीने प्रक्रिया केली जाणार आहे. त्यासाठी अगोदर ड्रोनद्वारे सर्वेक्षण केले जाणार आहे. मध्यवर्ती जकात नाका, रमानगर येथे पालिकेकडून बेलिंग मशीन बसवण्यात येत आहे.

\Bसाचलेला कचरा \B

कांचनवाडी ८ हजार टन

हर्सूल ३ हजार टन

कांचनवाडी ४ हजार टन

चिकलठाणा १० हजार टन

म. टा. प्रतिनिधी, औरंगाबाद

पडेगाव येथे रोज दीडशे टन कचऱ्यावर प्रक्रिया प्रकल्प उभारण्यास त्या भागातील मांस विक्रेत्यांनी आक्षेप घेतला व महापालिकेच्या न्यायालयात धाव घेतली. न्यायालयाने प्रक्रिया केंद्राच्या कामाला स्थगिती दिली आहे.

पडेगाव येथे महापालिकेची ३६ एकर जागा आहे, त्यापैकी १८ एकर जागेवर कत्तलखाना आहे. कत्तलखान्याच्या शेजारच्या जागा मांसविक्रीचा व्यवसाय करणाऱ्यांना देण्यात आली आहे. याच परिसरात कचरा प्रक्रिया प्रकल्प सुरू करण्याचा निर्णय महापालिकेने घेतला आहे. त्यासाठी पत्र्याचे शेड उभारण्यात येत आहे. या सर्व कामांना मांस विक्रेत्यांनी विरोध करीत महापालिकेच्या न्यायालयात धाव घेतली. न्यायालयाने कामाला स्थगिती दिली आहे अशी माहिती अतिरिक्त आयुक्त श्रीकृष्ण भालसिंग यांनी दिली.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या परीक्षा विभागाच्या प्रभारी संचालकपदी डॉ. जयश्री सूर्यवंशी यांची नियुक्ती करण्यात आली. मागील एक महिन्यापासून पद रिक्त होते. परीक्षेचे नियोजन आणि निकालाची समस्या निर्माण झाल्यामुळे प्रशासनाने तातडीने सूर्यवंशी यांची नियुक्ती केली.

विद्यापीठातील परीक्षा विभाग एक महिन्यापासून वाऱ्यावर होता. पदवी प्रमाणपत्र प्रकरणात डॉ. दिगंबर नेटके यांना पदमुक्त केल्यानंतर पदभार डॉ. साधना पांडे यांना सोपविण्यात आला होता, मात्र प्रभारी कुलसचिव असलेल्या पांडे यांनी १५ दिवसांसाठी पदभार घेत असल्याचे सांगितले होते. प्रशासनाने शोध घेऊनही पात्र अधिकारी मिळत नव्हता. आतापर्यंत परीक्षा विभागाचा कारभार व अधिकाऱ्यांवरील कारवाई लक्षात घेऊन प्राध्यापक व अधिकाऱ्यांनी पद स्वीकारले नाही. अधिसभा सदस्यांनीही ज्येष्ठ प्राध्यापकांना परीक्षा संचालक पद घेण्याची गळ घातली होती. सध्या अभियांत्रिकी आणि फार्मसीच्या विद्यार्थ्यांच्या कॅरिऑनचा मुद्दा गाजत आहे; तसेच ऑक्टोबर महिन्यात सत्र परीक्षा असल्यामुळे पूर्वनियोजन सुरू करण्यात आले. मुख्य अधिकारी नसल्यामुळे नियोजनात तांत्रिक अडचणी निर्माण झाल्या होत्या. अखेरीस वाणिज्य विभागाच्या डॉ. जयश्री राजेंद्र सूर्यवंशी यांची परीक्षा विभागाच्या संचालकपदी नियुक्ती करण्यात आली. या नियुक्तीमुळे परीक्षा विभागाचे प्रश्न मार्गी लागण्याची शक्यता आहे.

म. टा. प्रतिनिधी, औरंगाबाद

विघ्नहर्त्या बाप्पांचे घरोघरी आगमन झाले आहे. या सुखकर्त्याच्या स्वागतासाठी कुठे ढोलताशे वाजत आहेत, तर कुठे भव्य-दिव्य देखाव्यांचे आयोजन करण्यात आले आहे. आम्हीही गणरायाच्या स्वागतात मागे नाहीत. त्यात तुम्हालाही सहभागी करून घेणार आहोत. त्याचसाठी 'गणपती मोदक स्पर्धा' आयोजित करण्यात आली आहे. 'महाराष्ट्र टाइम्स' व श्री जय चतुर्थी प्रतिष्ठाणचे संस्थापक अध्यक्ष सचिन खैरे यांच्यातर्फे या स्पर्धेचे आयोजन करण्यात आले आहे.

बक्षिस विजेत्यांना आकर्षक भेटवस्तू मिळतील. त्यासाठी फक्त इतकेच करायचे आहे. मोदकाची छानशी रेसिपी तुम्हाला घरीच बनवून आणि आकर्षक सजावट करून स्पर्धेच्या दिवशी आणावी. स्पर्धेची तारीख आणि ठिकाण उद्याच्या (रविवार) अंकात प्रसिद्ध करण्यात येणार आहे. स्पर्धकांनी येताना रेसिपी एका कागदावर सुवाच्च अक्षरात लिहून सोबत आणावी. त्यावर स्वतःचे नाव, पूर्ण पत्ता, दूरध्वनी क्रमांक आवश्य लिहावा. स्पर्धेच्या निकालाबाबत परीक्षकांचा निर्णय अंतिम राहिल. या स्पर्धेसाठी प्रवेश मर्यादित आहेत. स्पर्धेत सहभागी होण्यासाठी तुम्हाला ९८२२६३०५५५ या क्रमांकावर संपर्क साधून नोंदणी करावी लागेल.