म.टा. प्रतिनिधी, औरंगाबाद

गणेशोत्सव विसर्जन मिरवणुकीच्या पार्श्वभूमीवर शहरातील डिजे चालक मालकांची बैठक पोलिस आयुक्तालयात घेण्यात आली. या बैठकीमध्ये डिजे चालकांना टु वे स्पिकरवर डिजे वाजवण्याची परवानगी देण्यात आली. या नियमांचे उल्लंघन करणाऱ्यांवर कडक कारवाईचा इशारा या बैठकीत देण्यात आला. शहरातील सुमारे ३०० डिजे चालक मालकांची या बैठकीला उपस्थिती होती.

मुंबई उच्च न्यायालयाने डिजे वापराबाबत मनाई आणली आहे. येत्या रविवारी शहरात गणरायाचे विसर्जन होणार आहे. विसर्जन मिरवणुकीत अनेक मंडळाच्या वतीने डिजे लावण्यात येतो. यंदाच्या मनाई आदेशामुळे डिजे चालकात संभ्रम निर्माण झाला आहे. या अनुषंगाने पोलिस आयुक्तालयात शहरातील डिजे चालक मालकांची बैठक बोलावण्यात आली होती. या बैठकीला आयुक्त चिरंजीवप्रसाद यांनी मार्गदर्शन केले. यावेळी कोर्टाच्या आदेशानुसार डिजेच्या स्पिकरची भिंत आता उभारता येणार नसल्याचे स्पष्ट करण्यात आले. तसेच डिजे वाजवायाचा जरी असल्यास त्याची ७५ डेसीबल आवाजाच्या पातळीखाली टु वे स्पिकरवर वाजवता येईल अशा सूचना देण्यात आल्या. या सूचनांचे उल्लंघन झाल्याचे आढळल्यास सबंधित डिजे चालक मालक व मंडळाविरुद्ध गुन्हे दाखल होणार असल्याची माहिती एसीपी डॉ. नाथनाथ कोडे यांनी दिली.

…

विविध कलमाखाली गुन्हे दाखल

कोर्टाच्या आदेशाचे उल्लंघन करीत डिजे वाजवल्यास पुढील कलमानुसार गुन्हे दाखल करण्यात येणार आहे. यामध्ये मुंबई पोलिस अॅक्ट कलम १३२ नुसार आवाज मोठा ठेवणे, भादवी कलम २९०, २९१ सार्वजनिक ठिकाणी उपद्रव करणे, या कलमामध्ये सहा महिने शिक्षा व दंड अशी तरतूद आहे तसेच पर्यावरण अॅक्ट नुसार गुन्हा दाखल केल्याच पाच वर्ष शिक्षा व एक लाख रुपये दंडाची तरतूद असल्याची माहिती एसीपी डॉ. कोडे यांनी दिली.

म. टा. प्रतिनिधी, औरंगाबाद -

मेरा शहर साफ हो, उसमे मेरा हाथ हो अशा घोषणा देत नागरिकांनी रोजाबाग वॉर्ड कचरामुक्त केला. महापालिकेने देखील हा वॉर्ड कचरामुक्त झाल्याचे घोषित केले. या संदर्भात झालेल्या कार्यक्रमात नागरिक मोठ्या संख्येने सहभागी झाले होते.

रोजाबाग वॉर्ड कचरामुक्त व्हावा यासाठी वॉर्डाचे नगरसेवक मोहन मेघावाले यांनी विशेष पुढाकार घेतला होता. त्यांना नागरिकांनी साथ दिली. 'माझा कचरा, माझी जबाबदारी' असे म्हणत कचरामुक्तीच्या अभियानात नागरिक सहभागी झाले. महापालिकेवर अवलंबून न राहता लोकसहभागातून कचऱ्याची समस्या सोडवायची असा निश्चय नागरिकांनी केला होता. कचरामुक्त वॉर्ड घोषित करण्याच्या कार्यक्रमाला नगरसेवक मेघावाले यांच्यासह पालिकेचे अतिरिक्त आयुक्त श्रीकृष्ण भालसिंग यांची विशेष उपस्थिती होती.

वॉर्डातील ओला कचरा, सुका कचरा, हानीकारक कचरा याचे वर्गीकरण करून त्याचे व्यवस्थापन करण्यात येत आहे. ओल्या कचऱ्यापासून खत निर्मिती केली जात आहे. वॉर्ड कचरामुक्त करण्यासाठी येथील नागरिक ज्योती पांडे यांच्या पुढाकाराने 'होम मिनिस्टर' सारख्या स्पर्धा वॉर्डात घेण्यात आल्या. ओल्या कचऱ्यापासून खत निर्मिती कशी करावी याचे प्रात्यक्षिक देखील या कार्यक्रमात दाखवण्यात आले. कार्यक्रमाच्या नंतर पाहुण्यांच्या उपस्थितीत संपूर्ण वॉर्डात 'गर्व की यात्रा' काढण्यात आली. पाहुण्यांनी जयहिंद गणेश मंडळ, अश्विनी काथार, प्रियंता अंबाडे, सुचीता बारी, अनुराधा ढोके यांच्या घरी भेट देवून तेथील कचरा व्यवस्थापनाची पध्दत पाहिली.शिवेश्वर मंदिराला देखील भेट देण्यात आली. यावेळी वॉर्ड अभियंता नितीन गायकवाड, वॉर्ड अधिकारी अजमत खआन, स्वच्छता निरिक्षक बी.जी. पाटील, जवान कडुबा वाघमारे आदी उपस्थित होते.

औरंगाबाद शहरातील वारसास्थळांच्या संवर्धनाची मोहीम महापालिकेतर्फे हाती घेण्यात आली आहे. त्यानिमित्ताने शुक्रवार, शनिवार असे दोन दिवस मोठे अभियान राबविले जाणार आहे. या अभियानाच्या पार्श्वभूमीवर काही वासरास्थळांचा घेतलेला हा चित्रवृत्तांत. (सर्व छायाचित्र - चंद्रकांत थोटे)

पूल धोकादायक बनला - ऐतिहासिक बारापुल्ला गेटच्या पुलावर उगवलेली झाडे वारसासंवर्धन मोहिमेच्या निमित्ताने गुरुवारीच काढून टाकण्यात आली. त्यामुळे पुलाचे काही दगड खिळखिळे झाले. त्याचा परिणाम पुलाला अधिक धोका निर्माण होण्यावर होऊ शकतो.

नोजल्सची चोरी - लेबर कॉलनी येथील रंगीनगेट आकर्षणाचा विषय ठरले आहे. या गेटच्या परिसरात पुरातन हौद आहे. या हौदातील कारंजे महापालिकेने सुरू केले, पण नागरिकांनी कारंजांसाठीचे नोजल्स चोरून नेले. या ठिकाणी सुरक्षारक्षकाची गरज आहे.

पायथ्याशी कचरा - किलेअर्क येथील काळा दरवाजा शहरातील वारसास्थळांपैकी एक स्थळ आहे, परंतु नागरिकांनी या दरवाजाच्या पायथ्याशीच कचरा आणून टाकला आहे. त्यामुळे मोकाट जनावरांचा वावर या परिसरात सतत असतो.

विळखा अतिक्रमणाचा - शहरात सध्या अस्तित्वात असलेल्या ऐतिहासिक दरवाजांपैकी भडकलगेट हा दरवाजा महत्त्वाचा मानला जातो, परंतु या दरवाजाला अतिक्रमणांचा विळखा पडला आहे.

-

म. टा. विशेष प्रतिनिधी, औरंगाबाद

सर्वोच्च न्यायालयाने वकिलांच्या अधिकारासंबंधी दिलेल्या निकालासंदर्भात बार कौन्सिल ऑफ इंडियाने केलेल्या ठरावास मुंबई उच्च न्यायालयाच्या औरंगाबाद खंडपीठ वकील संघाने पाठिंबा दर्शविला आहे.

वकिलांना त्यांच्या हक्कासाठी कोणत्याही प्रकारचे आंदोलन करता येणार नसल्याचे सर्वोच्च न्यायालयाने आपल्या निकालात म्हटले आहे. असे करणाऱ्यास वकिली व्यवसाय करण्यास मज्जाव करण्यात येईल, असे म्हटले आहे. याविरुद्ध केलेल्या ठरावास पाठिंबा देत याविरोधात सर्वोच्च न्यायालयात आव्हान देण्यासाठी खंडपीठ वकील संघाने विशेष सभा घेऊन पाठिंबा दिला आहे. कलम ३४ अॅडव्होकेट अॅक्ट १९६१ रद्दबातल ठरविण्यात यावे. हायर एज्युकेशन कमिशन बिल मागे घेण्यात यावे. सर्वोच्च, उच्च व जिल्हा न्यायाधीशांची नियुक्ती करताना राज्य वकील परिषदेचा सल्ला घेण्यात यावा. सर्वोच्च व उच्च न्यायालयाचे न्यायाधीश यांना निवृत्त झाल्यानंतर कोणतेही शासकीय पद देण्यात येऊ नये. वकील बंधू भगिनींच्या हितासाठी वकील सुरक्षा कायदा मंजूर करावा तसेच त्यामध्ये वकिलांच्या कल्याणकारी योजनेचा समावेश करण्यात यावा असाही ठराव विशेष सभेत घेण्यात आला. विशेष सभेत खंडपीठ वकील संघाचे अध्यक्ष अतुल कराड, व्ही. डी. साळुंके, अभय राठोड, अमोल सावंत, एन. एल. जाधव, प्रल्हाद खंडागळे, तात्यासाहेब भोसले, उत्तम बोंदर, सतीश गोडसे आदींची भाषणे झाली.

म. टा. प्रतिनिधी, औरंगाबाद

वॉलमार्ट व फ्लिपकार्ड या दोन कंपन्याच्या करारास तसेच १०० टक्के विदेशी गुंतवणुकीला (एफडीआय)ला दिलेली परवानगी या विरोधात व्यापारी एकवटले आहेत. या प्रश्नी २८ सप्टेंबरला देशव्यापी बंद पुकारण्यात आला आहे. या बंदला जिल्हा व्यापारी महासंघ व त्यांच्याशी संलग्न ७२ संघटनांचा सक्रीय पाठिंबा आहे, अशी माहिती महासंघाचे अध्यक्ष जगन्नाथ काळे यांनी दिली.

बंदची हाक कॉन्फडरेशन ऑफ ऑल इंडिया ट्रेडर्सने (कॅट) दिली आहे. वॉलमार्ट व फ्लिपकार्ड या दोन कंपन्यामधील करार तसेच शासनाने १०० टक्के विदेशी गुंतवणुकीला (एफडीआय) दिलेली परवानगी हा व्यवहार स्थानिक व्यापाऱ्यांना एक अभिशाप ठरणार आहे. अस्तित्वाचा प्रश्न निर्माण झाल्याने आंदोलनाचे हत्यार उपसण्यात आल्याचे काळे यांनी सांगितले.

देशात साडेआठ कोटी व्यापारी देशातील ८५ टक्के बाजार चालवितात. देशाच्या जीडीपीमध्ये त्यांचे ४५ टक्के योगदान आहे. तर प्रत्यक्ष अप्रत्यक्ष ४० कोटी लोकांना रोजगार यामुळे उपलब्ध होतो. भारत हा मोठा उपभोक्ता देश असल्याने जगाचे लक्ष त्याकडे आहे. त्यात विदेशी कंपन्या या बाजारपेठेवर कब्जा करण्याच्या दृष्टीने मोठी दुकाने, ई कॉर्मस कंपन्यांना जास्त भाव देऊन खरेदी करत आहे, असा आरोपही त्यांनी केला. या कंपन्या आल्यावर रोजगार वाढले, असे सरकार सांगते, परंतु, या कंपन्या ९० टक्के रोबोटिक अॅटोमिशनद्वारे कामे करतात. अशा परदेशी कंपन्यांच्या आगमनामुळे भारतीय बाजारावर विपरित परिणाम होईल, अशी भीती काळे यांनी व्यक्त केली. दरम्यान, बंदला व्यापारी महासंघ व संलग्न सर्व संघटनांनी पाठिंबा दिला असून ठिकठिकाणी बैठक घेत आंदोलनाचे नियोजन केले जात असल्याचे त्यांनी नमूद केले.

म. टा. प्रतिनिधी, औरंगाबाद

बनावट कागदपत्रे व सहजामीनदार सादर करून कारसाठी कर्ज घेत इंडसइंड बँकेला नऊ लाखांचा गंडा घातल्याचा प्रकार उघड झाला असून, या प्रकरणी कर्जदारासह चार आरोपींवर क्रांती चौक पोलिस ठाण्यात फसवणुकीचा गुन्हा दाखल करण्यात आला आहे.

बँकेचे व्यवस्थापक भागवत प्रभाकर दसपुते (वय ३५, रा. गारखेडा परिसर) यांनी तक्रार दिली आहे. इंडसइंड बँकेच्या अदालत रोडवरील शाखेत कर्जदार कृष्णा धनसिंग ठाकूर (रा. सातारा परिसर) आणि सुजित सुनील देशमुख (रा. नवीन उस्मानपुरा) यांनी फोर्ड फिगो कार घेण्यासाठी आवश्यक ती कागदपत्रे सादर केली. या कागदपत्राची पूर्तता त्यांनी सेनरजी डिपार्टमेंटचे जनार्धन सानप व सचिन बेले यांच्याकडे केली. सानप यांनी सदर कागदपत्राची पूर्तता कर्ज शाखेकडे केली. तेथून कागदपत्रे पडताळणीसाठी त्रयस्थ तपासणी संस्थेकडे पाठवली. या संस्थेने कागदपत्रे योग्य असल्याचा निर्वाळा देत कर्ज देण्यासाठी सकारात्मकता दर्शवली. यामुळे बँकेने ११ जून २०१८ रोजी कर्जदार कृष्णा ठाकूर यांना सहा लाख ९७ हजार मंजूर केल्याने कर्जदाराने कार खरेदी केली. कारचा दुसरा हप्ता थकल्यामुळे बँकेने चौकशी केली. यावेळी ठाकूर याने दिलेल्या पत्ता बनावट असल्याचे निष्पन्न झाले. तसेच सहकर्जदार सुजित देशमुख यांनी आपण कोठल्याही प्रकरणात सहकर्जदार झाले नसल्याचे सांगत आपल्या कागदपत्राचा वापर केल्याचे स्पष्ट केले. आरोपींनी ही कार वैयक्तिक वापरासाठी घेतल्याचे सांगितले होते. मात्र, त्यांनी 'आरटीओ'मधून या कारवर टॅक्सी परमीट करवून घेतले. याप्रकरणी दसपुते यांच्या तक्रारीवरून बँकेची फसवणूक करणारे कर्जदार कृष्णा धनसिंग ठाकूर, सुजित सुनिल देशमुख यांच्यासह त्यांना मदत करणारे सचिन बेले व जनार्धन सानप यांच्यावर बँकेची नऊ लाख दोन हजार रुपयांची फसवणूक केल्याप्रकरणी गुन्हा दाखल करण्यात आला आहे. पीएसआय सोनटक्के याप्रकरणी तपास करीत आहेत.

औरंगाबाद : चोरीची दुचाकी विकण्याच्या प्रयत्नात असलेल्या आरोपीला गुन्हे शाखेने बुधवारी महावीर चौकात बेड्या ठोकल्या. चोरलेली दुचाकी करमाड हद्दीतील असल्याने आरोपीला दुचाकीसहीत करमाड पोलिसांच्या ताब्यात दिले. कादर बेग सलीम बेग (वय २५, रा. कागजीपुरा, खुलताबाद) असे आरोपीचे नाव आहे. त्याने ही दुचाकी करमाड येथून साथीदाराच्या मदतीने चोरल्याची कबुली दिली. याप्रकरणी करमाड पोलिस ठाण्यात गुन्हा दाखल आहे. गुन्हे शाखेने आरोपी कदीर बेगला दुचाकीसह करमाड पोलिसांच्या स्वाधीन केले.

म. टा. प्रतिनिधी, वैजापूर

करजंगाव शिवारात (ता. वैजापूर) दुर्मिळ जातीच्या कासवाची तस्करी करताना वैजापूर पोलिसांनी बुधवारी रात्री एकास अटक केली. यावेळी एकाने अंधाराचा फायदा घेत पळ काढला. याप्रकरणी दोघांविरुद्ध गुन्हा नोंदवण्यात आला आहे.

राजू गोविंद म्हस्के (कोतवालपुरा, औरंगाबाद) व रामभाऊ (छावणी, औरंगाबाद) अशी त्यांची नावे आहेत. यातील रामभाऊ पोलिसांना चकवा देऊन पळून गेला. हे दोघे बुधवारी रात्री आठच्या सुमारास दुर्मिळ जातीच्या कासवाची विक्री करण्यासाठी करजंगाव शिवारात येणार असल्याची माहिती पोलिसांना मिळाली. त्यावरून उपविभागीय पोलिस अधिकारी सुनील लांजेवार व पोलिस निरीक्षक अनंत कुलकर्णी यांच्या मार्गदर्शनाखाली पोलिस नाईक मोईस बेग, संजय घुगे आणि पोलीस शिपाई पंकज गाभुडे यांच्या पथकाने शिवारातील मुंबई - नागपूर हायवेवरील एका हॉटेलवर छापा टाकला. यावेळी रामभाऊ हा अंधाराचा फायदा घेऊन पळून गेला, तर राजू पोलिसांच्या हाती लागला. त्याच्या जवळील पोत्याची पाहणी केली असता त्यात एक दुर्मिळ 'ग्रीन बॅक' जातीचे कासव आढळून आले. या कासवास आंतरराष्ट्रीय बाजारपेठेत मोठी मागणी आहे. यानंतर वनपरिक्षेत्र अधिकारी एस. एन. आमले यांच्या ताब्यात कासव देण्यात आले.

म. टा. प्रतिनिधी, औरंगाबाद

व्यापाऱ्यास सात लाख १६ हजारांचा गंडा घालणारा परप्रांतीय आरोपी जितेंद्रसिंग मिना याच्या पोलिस कोठडीमध्ये शुक्रवारपर्यंत वाढ करण्याचे आदेश प्रथम वर्ग न्यायदंडाधिकरी आर. ए. ए. खातीब यांनी दिले. या प्रकरणी दलपतभाई दामजीभाई पटेल (४२, रा. कीर्ती हौसिंग सोसायटी, सिडको एन-८, औरंगाबाद) यांनी फिर्याद दिली होती. फिर्यादीनुसार, फिर्यादीचा नारेगाव येथे टाईल्सचे गोदाम आहे. त्यांना २० सप्टेंबर २०१७ रोजी 'तुम्हाला कर्ज हवे असेल तर आमच्या मेलवर आपली केवायसी कागदपत्रे पाठवा' असे सांगण्यात आले. त्यानंतर फिर्यादीकडून २० लाखांच्या एनओसी चार्जेस म्हणून एकूण सात लाख १६ हजार २०० रुपये बँकेत जमा करायला लावले होते. या प्रकरणी सायबर गुन्हे शाखेच्या पथकाने जितेंद्रसिंग गजेंद्रसिंग मिना (२६, हरी नगर, मायपुरी दिल्ली) याला दिल्लीतून अटक केली. त्याला सोमवारी कोर्टात हजर केले असता, आरोपीला बुधवारपर्यंत (१९ सप्टेंबर) पोलिस कोठडी सुनावली होती. कोठडीची मुदत संपल्यामुळे त्याला कोर्टात हजर केले असता, आरोपीच्या ताब्यातून रोख रक्कम हस्तगत करावयाची आहे, अन्य साथीदार संदर्भात चौकशी करून त्यांना अटक करावयाची असल्यामुळे आरोपीस पोलिस कोठडी देण्याची विनंती सहाय्यक सरकारी वकील सूर्यकांत सोनटक्के यांनी कोर्टात केली.

म. टा. प्रतिनिधी, औरंगाबाद

एमआयटी कॉलेज ते खंडोबा मंदिर या रस्त्याचे बंद पडलेले काम सुरू करण्याच्या मागणीसाठी सादारा देवळाई संघर्ष समितीने गुरुवारी रस्त्यावर बेशरमाची झाडे लावून निदर्शने केली.

महापालिकेने एमआयटी कॉलेज ते सातारा खंडोबा मंदिर या रस्त्याचे काम सुरू केले होते. हा रस्ता १८ फूट रुंदीचा आहे. रस्त्याच्या एका बाजूचे काम करण्यात आले. नऊ फूट रस्त्याचे काँक्रिटिकरण केल्यानंतर सुमारे सहा महिन्यांपासून हे काम बंद आहे. मंदिरात येणाऱ्या भाविकांना रस्त्याचे काम बंद असल्याचा अंदाज नसतो. त्यामुळे येथे अपघात होत आहेत. या परिसरात श्रेयस इंजिनीअरिंग कॉलेज, एसआरपीएफ येथे ये-जा करणाऱ्यांची संख्या मोठी आहे. त्यांच्या वाहनांचेही अपघात झाले आहेत.

महापालिकेने बंद पडलेले काम त्वरित सुरू करण्याच्या मागणीसाठी सातारा, देवळाई संघर्ष समितीने गुरुवारी या रस्त्यावर आंदोलन केले. आंदोलकांनी रस्त्याचे काम अपूर्ण असलेल्या ठिकाणी बेशरमाची झाडे लावून निषेध व्यक्त केला. या वेळेस संघर्ष समितीचे सोमिनाथ शिराणे, पद्मसिंह राजपूत, राहुल शिरसाट, रणजित ढेपे, संजय कुलकर्णी, निलेश चाबुकस्वार, दीपक रोकडे, उत्तम बरंडवाल, अशोक भवर, सचिन सातपुते, रामचंद्र कोर्डिवाल, बाळू गायकवाड, प्रदीप पळसकर, बाळू होणवने, बाजीराव महारणोर, प्रशांत वारभुवन, प्रकाश कावळे, विठ्ठल गायकवाड, रामभाऊ वाघमारे, रामराव पळसकर, संजय काकडे, राम पारखे, अमोल गायकवाड, शेख फइमोद्दिन, रमेश नरोटे, विक्की होणवने, मुक्तार पटेल, सुहास जोशी व सातारा परिसरातील नागरिक उपस्थित होते.

म. टा. प्रतिनिधी, औरंगाबाद

पुनर्नियुक्त माजी सैनिक संघटनेच्या औरंगाबाद जिल्ह्याच्या बैठकीत सैनिकांच्या समस्या जाणून घेत त्यांच्या निवारण करण्यासंबंधी चर्चा करण्यात आली. जिल्हाधिकारी कार्यालयाच्या सभागृहामध्ये शासकीय पुनर्नियुक्त माजी सैनिक संघटनेचे उपाध्यक्ष रुस्तुम घुले यांच्या अध्यक्षतेखाली ही बैठक घेण्यात आली.

या बैठकीमध्ये जुनी पेन्‍शन योजना लागू करणे, शासन सेवेतील माजी सैनिकांना सेवा ज्येष्ठता, वर्ग १ व वर्ग २ मध्ये आरक्षण, माजी सैनिकांच्या पाल्यांना उच्च शिक्षणामध्ये फी माफी संबंधीचा शासन निर्णय अंमलात आणणे याबाबत शासनस्तरावर पाठपुरावा करणे तसेच इतर महत्वाच्या मुद्यांवर चर्चा करण्यात आली. या बैठकीचे सूत्रसंचलन रमेश तांबे यांनी केले. या बैठकीत विजय गोरे, गजानन कुंटे यांनीही मार्गदर्शन केले. या बैठकीसाठी विष्‍णु गोराडे, उत्तम चिकटे, उदय नारकर, कैलाश शर्मा, किशोर जाधव, गोपीनाथ जयवळ, एल.के. गाडेकर, श्री. लाड, श्री. भगत आदींची उपस्थिती होती.

म. टा. प्रतिनिधी, औरंगाबाद

राज्यातील सर्व शासकीय वैद्यकीय महाविद्यालयांमध्ये वार्धक्यशास्त्र (जेरियाट्रिक्स) हा स्वतंत्र विभाग नुकताच घाटीमध्ये सर्वप्रथम सुरू झाला आणि विभागाअंतर्गत या वर्षीपासून 'एमडी-जेरियाट्रिक्स' हा पदव्युत्तर अभ्यासक्रमही सुरू झाला आहे. आता याच विभागाअंतर्गत 'मेमरी क्लिनिक' सुरू होत असून, स्मृतीभ्रंशाच्या रुग्णांचे निदान-उपचार या क्लिनिकमध्ये होणार आहेत. या क्लिनिकचे उद्घाटन शुक्रवारी (२१ सप्टेंबर) सकाळी ११ वाजता विभागामध्ये होणार आहे.

आरोग्य उपसंचालक डॉ. स्वप्नील लाळे, जिल्हा शल्यचिकित्सक डॉ. सुंदर कुलकर्णी, घाटीच्या अधिष्ठाता डॉ. कानन येळीकर, जेरियाट्रिक्स विभागप्रमुख डॉ. मंगला बोरकर आदींच्या उपस्थितीत क्लिनिकचे उद्घाटन होणार आहे. साठ वयोवर्षांवरील रुग्णांवर जेरियाट्रिक्स विभागामध्ये उपचार होतात आणि याच विभागाअंतर्गत 'मेमरी क्लिनिक' सुरू होत आहे. या क्लिनिकमध्ये स्मृतीभ्रंशाची लक्षणे असणाऱ्या रुग्णांची तपासणी होऊन संबंधित रुग्ण हा आजाराच्या पूर्वस्थितीत आहे का रुग्णामध्ये आजार पूर्णपणे विकसित झाला आहे. आजार होण्यामागची नेमकी संभाव्य कारणे कोणती, आणखी काही तपासण्यांची गरज आहे का आदींचा अभ्यास करून रुग्णाला औषधोपचारांबरोबरच उपयुक्त जीवनशैलीविषयी सल्ला देण्यात येणार आहे. अशा रुग्ण स्मृतीभ्रंश आजाराच्या पूर्वस्थितीत असेल तर आजार नियंत्रणात ठेवण्यासाठी कोणकोणते महत्वपूर्ण बदल व औषधोपचार उपयुक्त ठरू शकतात, याविषयीदेखील मार्गदर्शन करण्यात येणार आहे. अशा रुग्णांना गरजेनुसार मनोविकारतज्ज्ञांचा सल्ला व औषधोपचार देण्याचीही सोय विभागामध्ये असणार आहे. स्मृतीभ्रंशाच्या रुग्णांना पुरेशी झोप गरजेची असतेच; शिवाय योग-प्राणायाम-हलका व्यायामदेखील या रुग्णांना खूप उपयुक्त ठरू शकतो. त्यामुळे या बाबतही रुग्णांना मार्गदर्शन केले जाणार आहे. हा आजार पूर्णपणे बरा होत नसला तरी तो नक्कीच नियंत्रणात ठेवला जाऊ शकतो आणि अशा रुग्णांना चांगला आधार देण्याचे काम विभाग नक्कीच करेन, असेही विभागप्रमुख डॉ. मंगला बोरकर म्हणाल्या.

दररोज एक तास ओपीडी

घाटीचे मेमरी क्लिनिक हे दर बुधवारी सका‍ळी ९ ते दुपारी १२ या वेळेत, तर एरवी दररोज दुपारी १२ ते १ या वेळेत बाह्य रुग्ण विभागाच्या कक्ष क्रमांक १४२ येथे सुरू राहणार आहे. या क्लिनिकमध्ये डॉ. बोरकर यांच्यासह सहयोगी प्रा. डॉ. शैलजा राव, आरोग्य विभागाचे मानसोपचारतज्ज्ञ डॉ. अमित टाक व मानसोपचार विभागाचे प्रमुख डॉ. संजय घुगे हे रुग्णांचे निदान तसेच उपचार करणार आहेत.

म.टा. प्रतिनिधी, औरंगाबाद

'देवा श्री गणेशा' या आगळ्या वेगळ्या कार्यक्रमात मराठमोळा पेहराव, ढोल-ताशा व लेझीमचा नाद; तसेच लोककलेच्या पारंपारिक अस्सल मराठी गीतांनी रंगत आणली.संत तुकाराम नाट्यगृहात ही स्पर्धा पार पडली. औरंगाबाद जिल्हा गणेश महासंघ, महापालिका यांच्या सहकार्याने; तसेच युवामित्र फाउंडेशन निर्मित या देवा श्री गणेशा कार्यक्रमाचे उद्घाटन महापौर नंदकुमार घोडेले यांच्या हस्ते करण्यात आले.

महापौर नंदकुमार घोडेले यांनी स्थानिक कलावंताना व्यासपीठ मिळवूण देणाऱ्या या उपक्रमाचे कौतुक केले. याप्रसंगी जिल्हा गणेश महासंघाचे संस्थापक अध्यक्ष पृथ्वीराज पवार, उत्सव समितीचे अध्यक्ष डी. एन. पाटील, कार्याध्यक्ष अनिल मानकापे, संदीप शेळके, धीरज पाटील, अनिकेत पवार, दिग्विजय पाटील, राजेंद्र दाते, हरीश शिंदे यांची प्रमुख उपस्थीती होती. कार्यक्रमाच्या समारोपप्रसंगी नितीन शेळके, संदीप सपकाळ, रवीराज पाटील, रवी जाधव, सतीश देवखळे यांच्या हस्ते विजेत्या स्पर्धकांना पारितोषिक देऊन गौरवण्यात आले.

कार्यक्रमाच्या यशस्वीतेसाठी युवा मित्र फाउंडेशनचे अध्यक्ष सचिन अंभोरे, उपाध्यक्ष किशोर गिरी, भास्कर निकाळजे, राहुल काकडे, कुणाल भिसे, संतोष मोरे, गणेश गिरी, नितीन अंभोरे, सोनाजी गिरी, जया दणके, आनंद अंभोरे, आदींनी परिश्रम घेतले. प्रा. महेश अचिंतलवार यांनी सूत्रसंचालन केले. जिल्हा गणेश महासंघ उत्सव समितीचे अध्यक्ष डी. एन. पाटील यांनी आभार मानले. या कार्यक्रमासाठी संदीप साउंडचे संदीप काळे, अजिंठा लाइव्हचे शिवाजी जंजाळ, श्री संजय, लक्ष्मी साउंड व लाइट्सचे वाल्मिक जाधव, गौतम सोनवणे यांचे विशेष सहकार्य लाभले.

\Bस्पर्धेतील विजेते स्पर्धक\B

शालेय ज्युनियर गटात प्रथम पारितोषिक विश्वेश्वरैया इंटरनॅशनल स्कूल, द्वितीय संत मीरा स्कूल, तर तृतीय पारितोषिक ज्ञानेश विद्या मंदिर पटकावले. सिनियर ग्रुपमध्ये प्रथम पारितोषिक दहेगाव बंगला येथील तानाबाई झिंजुर्डे पाटील स्कूल, द्वितीय श्रीराम प्राथमिक विद्यालयाने पारितोषिक पटकावले, वैयक्तिक नृत्यातील ज्युनियर ग्रुपमध्ये प्रथम विशाल तांबे, द्वितीय भूमित भोंडे, तर तृतिय पारितोषिक ओम भवर याने पटकावले. सिनियर ग्रुपमध्ये दहेगाव बंगला येथील तानाबाई झिंजुर्डे पाटील स्कूलच्या संघाने प्रथम, विश्‍वेश्‍वरैय्या इंटरनॅश्‍नल स्कूलने द्वितीय, तर श्रीराम विद्यालयाने तृतिय पारितोषिक पटकाविले. मराठमोळ्या पेहरावातील ब्रह्मनंद लोकरंग ग्रुपने आपल्या पोवाडा सादरीकरणातून प्रथम पारितोषीक पटकावत या स्पर्धेत उपस्थितांचे लक्ष वेधले. यासाठी अजिंक्य लिंगायत किशोर धारासुरे, वैष्णवी गीते, प्रचिती हासेगावकर यांनी पुढाकार घेतला. या स्पर्धेचे परीक्षण प्रसिद्ध नृत्य दिग्दर्शक संजय जाधव, उमेश चाबुकस्वार आणि टी. श्यामसुंदर यांनी केले.

म. टा. प्रतिनिधी, औरंगाबाद

औरंगपुरा जिल्हा परिषदेच्या मैदानावर बुधवारी धुरंधर अविस्मरणीय ढोल ताशा स्पर्धेचे आयोजन करण्यात आले होते. पारंपारिक पेहरावात सहभागी झालेल्या वाद्यपथकांनी सादर केलेल्या आकर्षक चालीमुळे प्रेषक भारावून गेले होते. माजी आमदार प्रदीप जैस्वाल व ऋषिकेश जैस्वाल मित्र मंडळातर्फे आयोजित करण्यात आलेल्या या स्पर्धेमध्ये शहर व जिल्ह्यातील एकूण २६ संघांनी सहभाग घेतला होता.

या स्पर्धेमध्ये सिल्लोड येथील युवा व्यापारी ढोल ताशा पथक, शहरातील मोरया प्रतिष्ठान, शिवशक्ती प्रतिष्ठान, जय हनुमान मित्र मंडळ,मराठी वादन प्रतिष्ठान, पंचमुखी गणेश मंडळ, नवयुग क्रीडा मंडळ, साईकृपा क्रीडा मंडळ, श्री पावन गणेश क्रीडा मंडळ, श्री सुखकर्ता गणेश मंडळ, ब्रम्हगर्जना वाद्य पथक, शहीद भगतसिंग मित्र मंडळ, शिवपूत्र प्रतिष्ठान, महाकाल वाद्य पथक, अनिरुद्ध गणेश मंडळ, विघ्नहर्ता गणेश मंडळ, श्री नादब्रम्ह गणेश मंडळ, हितोपदेश क्रीडा मंडळ, मोरया वाद्य पथक, पतित पावन संघटना, आपलच वाद्य पथक, छत्रपती शाहू गर्जना, मृत्युंजय गणेश मंडळ, श्री संगम नवयुवक क्रीडा मंडळ, दुर्गाज वाद्य पथक व पावन गणेश मंडळ आदी ढोल पथकांनी सहभाग घेतला होता. रात्री उशिरापर्यंत या स्पर्धा सुरू होती. या स्पर्धेसाठी आयोजक ऋषिकेश जैस्वाल, अध्यक्ष परेश झिरपे, शगून पाटणी; तसेच आयोजन समितीमधील कुणाल तायल, रुचित जैन, शुभम अग्रवाल, हर्षवर्धन झव्हेरी, धीरज पवार, संदीप लिंगायत, गणेश गावंडे पाटील, रोहित फुलवाणी, संजय राखुंडे पाटील, निखिल चव्हाण आदींनी परिश्रम घेतले.

सिंगल

म. टा. प्रतिनिधी,औरंगाबाद

अहमदनगर येथील एका दहा वर्षांच्या मुलीवर अमानुष अत्याचार करणाऱ्या व त्यांना पाठिंशी घालणाऱ्या दोषींना फासावर द्या, अशी मागणी पद्मशाली समाज संघटनेने बुधवारी येथील जिल्हाधिकाऱ्यांकडे निवेदनाद्वारे केली आहे. खटला जदलगती न्यायालयात चालविण्यात यावा, पीडित मुलीला सर्व वैद्यकीय मदत मिळावी तसेच नामांकित सरकारी वकील नेमण्यात यावा. पीडित कुटुंबाला तातडीने २५ लाख रुपयांची मदत करण्यात यावी, कुटुंबाला संरक्षण द्यावे तसेच पीडित मुलीच्या शिक्षणाचा खर्च शासनाने करावा व भविष्यात तिला सरकारी नोकरी द्यावी, अशी मागणी संघटनेने केली आहे. अध्यक्ष अंजय्या अडलाकोंडा, सचिव नागेश चरपेलवार, प्रकाश तलोड, नरेंद्र सुरकुटवार, गणेश दुर्गम यांच्यासह संघटनेचे अन्य सदस्य उपस्थित होते.

म. टा. प्रति‌निधी, औरंगाबाद

गणेशोत्सवासोबतच सामाजिक संदेश; तसेच सामाजिक उपक्रमाचा वारसा जपणाऱ्यांपैकी एक असलेल्या सिडको- कॅनॉट येथील 'कॅनॉटचा राजा' व्यापारी गणेश मित्रमंडळाने यंदाही आपली परंपरा सुरू ठेवली आहे. यंदा मंडळाकडून वृद्ध, अंध, अपंगांना मंडळामध्ये दररोज निमंत्रित करून त्यांच्या हस्ते गणरायाची आरती करण्यात येत आहे. समाजातील लोकांपेक्षा आपण वेगळे नाही अशी भावना अंध, अपंगांमध्ये रुजावी या भावनेतून मंडळाने हा उपक्रम सुरू केला आहे. यंदा मंडळाचे २२वे वर्ष आहे.

कॅनॉटचा राजा व्यापारी गणेश मित्र मंडळाची स्थापना १९९८मध्ये कॅनॉट गार्डन परिसरात करण्यात आली, सुमारे २०० व्यापारी या मंडळाचे सदस्य आहेत, गणेशोत्सवात अवांतर खर्च करण्याऐवजी समाजातील गरीब, गरजू, अंध, अपंग, वृद्धांना आवश्यक असलेल्या वस्तू देऊन त्यांना मिष्ठान्न भोजन देण्याचा उपक्रम सुरू करण्यात आला, यंदाही मंडळाकडून मातोश्री वृद्धाश्रमातील आजी, आजोबा; तसेच शहरातील दीर्घ आजाराने पीडित मुले, अंध, अपंग व अनाथाश्रमातील मुले यांच्या हस्ते आरती केली. यावेळी प्रत्येकाला दैनंदिन वापराच्या असलेल्या वस्तूचा संपूर्ण सेट भेट म्हणून देण्यात आला. दररोज मंडळात दहा सदस्यांच्या हस्ते आरती करण्यात येते यापैकी पाच निमंत्रित पाहुणे तर पाच व्यक्ती अंध, अपंग, वृद्ध यापैकी असतात.

मंडळातर्फे दरवर्षीच रक्तदान शिबिर, गोशाळेमध्ये चारा वाटप आदी उपक्रमही करण्यात येतात. या शिवाय प्रत्येक वर्षी गणेश मंडळातर्फे आयोजित करण्यात आलेल्या महाप्रसादाचा सुमारे साडेतीन हजार भाविक लाभ घेतात. या उपक्रमामध्ये कॅनॉटमधील सर्व व्यापारी अत्यंत मनोभावे सेवा देतात.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील नाट्यशास्त्र विभागाच्या 'बॅचलर ऑफ परफॉर्मिंग आर्टस' वर्गाच्या द्वितीय सत्राच्या निकालातील गैरप्रकाराची सखोल चौकशी करावी, अशी मागणी राष्ट्रवादी विद्यार्थी काँग्रेसने केली. या प्रकरणाची नियमानुसार चौकशी होईल असे आश्वासन प्र-कुलगुरू डॉ. अशोक तेजनकर यांनी शिष्टमंडळाला दिले.

विद्यापीठातील नाट्यशास्त्र विभागाचा निकाल वादग्रस्त ठरला आहे. 'बॅचलर ऑफ परफॉर्मिंग आर्टस' वर्गाच्या द्वितीय सत्राच्या परीक्षेच्या निकालात गलथानपणा घडल्याचे उघडकीस आले. 'नाट्यशास्त्र' विषयात पहिल्या निकालात पाच विद्यार्थी उत्तीर्ण झाले. विषय सोपा असून मुद्देसूद उत्तरे लिहूनही नापास कसे केले, असा प्रश्न विद्यार्थ्यांनी उपस्थित केला. त्यामुळे दुसऱ्यांदा पेपर तपासणी करून १७ विद्यार्थ्यांना उत्तीर्ण करण्यात आले. विशेष म्हणजे निकालात कमाल गुणवाढ करण्यात आली. आता उरलेल्या नापास विद्यार्थ्यांनीही पुन्हा पेपर तपासण्याची मागणी केली आहे. सलग तीन वेळेस पेपर तपासणी करून नाट्यशास्त्र विभागाने पारदर्शी परीक्षा प्रक्रियेवर प्रश्नचिन्ह उपस्थित केले आहे. संबंधित विषयाच्या प्राध्यापकाऐवजी तासिका तत्त्वावरील एका प्राध्यापिकेने पेपर तपासले आहेत. या ढिसाळ कारभाराच्या विरोधात राष्ट्रवादी विद्यार्थी काँग्रेसने बुधवारी प्र-कुलगुरू डॉ. अशोक तेजनकर यांची भेट घेऊन निवेदन दिले. परीक्षेच्या निकालातील गैरप्रकार विद्यापीठाची बदनामी करणारा आणि लाजिरवाणा आहे. विभागातील अंतर्गत वादात विद्यार्थ्यांना वेठीस धरले आहे. या प्रकाराची चौकशी करून इतर विद्यापीठाच्या तज्ज्ञाकडून पेपर तपासून घेण्यात यावे अशी मागणी 'राविकाँ'ने केली. यावेळी विकास थाले, दीपक बहिर, दादाराव कांबळे, रवी माने, हरिभाऊ विटोरे आदी उपस्थित होते. निकालाच्या प्रक्रियेची चौकशी करून खुलासा मागवण्यात येईल असे डॉ. तेजनकर यांनी शिष्टमंडळाला सांगितले.

\Bविद्यार्थी विभागप्रमुख

\Bदरम्यान, नाट्यशास्त्र विभागप्रमुख डॉ. जयंत शेवतेकर हे योगशास्त्र विभागप्रमुखही आहेत. तसेच योगशास्त्राच्या पदव्युत्तर वर्गाच्या द्वितीय वर्षाचे विद्यार्थी आहेत. विद्यार्थी हा विभागप्रमुख कसा असू शकतो, असा सवाल विद्यार्थी संघटनेने उपस्थित केला. योगशास्त्र विषयाची पदवी नसताना त्या विषयाचे विभागप्रमुख म्हणून काम करण्याचा नियम विद्यापीठ कायद्यात आहे का, अशी विचारणा संघटनेने केली. या प्रकरणाची नियमानुसार चौकशी करुन योग्य निर्णय घेतला जाईल असे आश्वासन डॉ. अशोक तेजनकर यांनी दिले.

\Bपेपर तपासणीचे गौडबंगाल\B

'नाट्यशास्त्र' विषयाचे पेपर तिसऱ्यांदा तपासण्याची तयारी विभागप्रमुखांनी केली आहे. मात्र, हा प्रकार उघड झाल्यामुळे प्रक्रिया थांबवली. पहिल्या निकालात फक्त चार गुण मिळालेल्या विद्यार्थ्याला दुसऱ्या तपासणीत चक्क ३१ गुण दिले. तर २२ गुण असलेल्या विद्यार्थ्याला ६४ गुण दिले आहेत. विद्यार्थ्यांनी योग्य उत्तरे लिहिली नव्हती, अशी भूमिका सुरुवातीला विभागाने घेतली होती. उत्तरे योग्य लिहिलेली नसताना दुसऱ्या तपासणीत १७ विद्यार्थी भरमसाठ गुण घेऊन उत्तीर्ण कसे झाले, असा प्रश्न उपस्थित झाला आहे. त्यामुळे दुसऱ्या विद्यापीठाच्या तज्ज्ञ प्राध्यापकांकडून पेपर तपासण्याची मागणी विद्यार्थी करीत आहेत.

म. टा. प्रतिनिधी, औरंगाबाद

चिकलठाणा परिसरातील गणेश मंडळांनी यंदाही लक्षवेधक सजीव देखावे सादर केले आहेत. या देखाव्यांना बुधवारी सुरुवात झाली. पहिल्याच दिवशी देखावे पाहण्यासाठी भाविकांनी मोठी गर्दी केली होती.

महालक्ष्मीला निरोप दिल्यानंतर गणेशोत्सवातील देखाव्यांकडे भाविकांची पावले वळतात. देखावे पाहण्यासाठी जुन्या औरंगाबादमध्ये गर्दी होते. आकर्षक देखाव्यांसाठी जुन्या औरंगाबादमधील मंडळे प्रसिद्ध आहेत. त्याचप्रमाणे सजीव देखाव्यांसाठी चिकलठाणा परिसरातील गणेश मंडळांची ओळख आहे. चिकलठाणा परिसरातील गणेश मंडळांचे सजीव देखावे बुधवारपासून सुरू करण्यात आले. पहिल्याच दिवशी देखावे पाहण्यासाठी भाविकांची गर्दी होती.

\B'स्वराज्य तेव्हाचे आणि आताचे...'\B

गेल्या २६ वर्षांपूर्वी चिकलठाणा गावात जय मराठा गणेश मंडळ स्थापन करण्यात आली. सजीव देखाव्यासाठी हे मंडळ प्रसिद्ध आहे. या मंडळाचे अध्यक्ष बालाजी पाटील बकाल, उपाध्यक्ष बंडू पाटील दहिहंडे यांनी यंदा 'शिवाजी महाराजांच्या काळातील स्वराज आणि सध्याचे स्वराज्य' या विषयावर सजीव देखावा सादर केला आहे. या सजीव देखाव्यात ४६ कलाकारांनी भाग घेतला आहे. या देखाव्यातील सर्वच कलाकार स्थानिक असून, ते गेल्या दोन महिन्यांपासून सराव करीत आहेत. महिलांवर होत असलेले अत्याचार, जाती-धर्माच्या नावाखाली होत असलेल्या दंगली, आधुनिकतेच्या आहारी जाऊन आपली संस्कृती विसरणाऱ्यांवर या सजीव देखाव्यातून चांगली मांडणी स्थानिक कलाकारांनी केली.

व्हॉट्स अॅपच्या जमान्यात खोट्या बातम्यांच्या आधारे होत असलेल्या घटना घडोमोंडीकडेही या देखाव्यात लक्ष वेधले आहे. महिलांवर अत्याचार करणाऱ्याला महाराजांनी दिलेली शिक्षाचा प्रसंग देखाव्यातून साकारला आहे. सुमारे १५ मिनिटांच्या सजीव देखावा पाहण्यासाठी चिकलठाण्यासह अन्य भागातून मोठ्या संख्येने नागरिक येत आहेत.

……

\B'एक पाऊल स्वच्छतेकडे'\B

चिकलठाण्यातील सावित्रीबाई फुले चौकात अचानक गणेश मंडळाने 'एक पाऊल स्वच्छतेच्या दिशेने' असा समाजात स्वच्छतेचा संदेश देणारा सजीव देखावा सादर केला आहे. अचानक गणेश मंडळाचे अध्यक्ष सुभाष राठोड आणि उपाध्यक्ष संजय जाधव यांच्या मार्गदर्शनाखाली गणेश मंडळाच्या सदस्यांनी हा सजीव देखावा साकारला. मागील वर्षी अचानक गणेश मंडळाने अवयव दानाबाबत सजीव देखावाही सादर केला होता. याशिवाय यापूर्वी बेटी बचाव बेटी बढाव असा संदेश देणारा सजीव देखावाही सादर करण्यात आला होता. यंदाचया वर्षी स्वच्छतेचा संदेश देण्यासाठी सजीव देखाव्यांच्या सादरीकरणात १६ जणांनी सहभाग घेतला. परिसराची स्वच्छत न राखल्यास होणारा आजार आणि यामुळे समाजामध्ये पसरणारी रोगराई याबाबतची माहिती या गणेश मंडळाच्या सदस्यांनी सजीव देखाव्याच्या माध्यमातून दिली.

\Bस्वराज्य अन सुराज्याचा संदेश\B

चिकलठाणा गावात असलेल्या श्री स्वतंत्र गणेश मंडळाची स्थापना १९८३मध्ये स्व. शफिकोद्दिन इनामदार यांनी केली होती. तेव्हापासून हा गणेश मंडळ कायम आहे. प्रत्येक वर्षी नवीन संकल्पना घेऊन हा गणेश मंडळ सजीव देखावा सादर करते. यंदा मंडळाचे अध्यक्ष विशाल गाजरे, उपाध्यक्ष आकाश वाघ यांच्या संकल्पनेतून स्वराज्य ते सुराज्य असा सजीव देखावा सादर केला आहे. शाहीर शिवाजी महाराजांचे स्वराज्य सांगत सध्याच्या काळातील सुराज्यातील परिस्थितीबाबत माहिती देतात. हा सजीव देखावा नऊ ते दहा जण सादर करतात. यापूर्वी एकनाथ महाराज यांचे जीवन चरित्र, करवीर निवासनी महालक्ष्मी यांच्या जीवनार आधारित सजीव देखाव्याचे सादरीकरण करण्यात आले आहे.

\Bविठ्ठल धावला शेतकऱ्यासाठी

\Bचिकलठाण्याच्या सावित्रीबाई फुले चौकात जय मल्हार गणेश मंडळात यावर्षी मंडळाचे अध्यक्ष जगनाथ रिठे आणि उपाध्यक्ष रामेश्वर कोरडे यांनी शेतकरी आत्महत्या विषयावर सजीव देखावा सादर केला आहे. निसर्गाच्या खेळीने हैराण झालेला शेतकरी आणि त्याच्या कुटुंबाची कहाणी यावेळी सजीव देखाव्यातून सादर केली. शेतकरी हताश होऊन कसा कर्जबाजारी होतो. कर्जाच्या गर्तेत सापडलेला शेतकरी शेवटी आत्महत्या करण्यासाठी निघतो. आत्महत्या करण्यासाठी गेलेल्या शेतकऱ्यासाठी स्वत: पांडुरंग उभा राहतो. भगवान पांडुरंग हा शेतकऱ्याला समजावून सांगतो. तुझ्यापेक्षा हालाखीची परिस्थितीत जगणारे अनेक जण असल्याचे सत्य समजावून सांगतो. विठ्ठलाकडून मिळालेल्या संदेशानंतर शेतकरी आत्महत्या करण्याचा विचार सोडून कुटुंबाच्या उभारणीला लागतो, हा प्रसंग दहा कलाकारांनी सादर केला आहे.

………

\Bसजीव देखाव्यांची परंपरा आजही कायम \B

चिकलठाणा गावाचा औरंगाबाद महापालिकेत समावेश केला असला, तरी गावाचे गावपण कायम आहे. विविध जाती-धर्माचे नागरिक एकत्र येऊन सण साजरा करण्याची परंपरेला आजपर्यंत तडा गेलेला नाही. चिकलठाणा भागात गणेशोत्सवात सजीव देखावा सादर करण्याची आजही परंपरा कायम आहे. संध्याकाळी सजीव देखावे पाहण्यासाठी चिकलठाण्यासह आसपास असलेल्या गावांतील अनेक महिला, लहान मुले येतात. सजीव देखावा सुरू होण्यापूर्वी अनेक जण जमा होत असतात. दहा ते पंधरा मिनिटांत सादरीकरण झाल्यानंतर पुन्हा नवीन प्रेक्षकांच्या उपस्थितीत देखाव्यांचा प्रयोग सादर केला जातो. गणेशोत्सावाच्या शेवटच्या तीन दिवसांत हे सादरीकरण होत असल्याने, अनेक जण देखावे पाहण्यासाठी शहरातून येतात. सजीव देखाव्यातून सामाजिक संदेश देण्यासाठी चिकलठाणा भागातील सजीव देखाव्यांची परंपरा आजही कायम आहे.

म. टा. प्रतिनिधी, औरंगाबाद

मराठवाड्यातील एकमेव केंद्र असलेल्या शहरातील कमलनयन बजाज रुग्णालयात 'बोन मॅरो ट्रान्स्प्लान्ट'च्या अवघ्या दोन वर्षांत २३ केसेस यशस्वी झाल्या असून, रुग्णांना 'बोन मॅरो स्टेम सेल्स' देऊन नवीन जीवन देणाऱ्या दात्यांचा प्रातिनिधिक सत्कार बुधवारी (१९ सप्टेंबर) 'कमलनयन'मधील नर्सिंग कॉलेजच्या सभागृहात झाला.

गेल्या शनिवारी (१५ सप्टेंबर) जगभरात साजरा झालेल्या 'वर्ल्ड बोन मॅरो डोनर डे'निमित्त हा दात्यांचा सत्कार करण्यात आला. या छोटेखानी कार्यक्रमाप्रसंगी जिल्हा शल्यचिकित्सक डॉ. सुंदर कुलकर्णी, दत्ताजी भाले रक्तपेढीच्या प्रमुख डॉ. मंजुषा कुलकर्णी, कमलनयन बजाज रुग्णालयाचे मुख्य कार्यकारी अधिकारी डॉ. आलोक श्रीवास्तव, हिमॅटोलॉजी विभागाचे डॉ. व्यंकटेश एकबोटे, डॉ. अलका एकबोटे, डॉ. प्रांजळ कुलकर्णी, डॉ. गजानन पदमवार आदींची प्रमुख उपस्थिती होती. याच कार्यक्रमात आपल्या भावाला 'बोन मॅरो स्टेम सेल्स' प्रदान करणाऱ्या संध्या क्षीरसागर व रोहिणी पांडे, आपल्या लहानग्या बहिणीला नवीन आयुष्य देणारा तिचा तरुण भाऊ सूरज मेश्राम, तर आपल्या भावासाठी अमेरिकेतून भारतात खास दाता म्हणून आलेल्या समीर परळकर याचाही विशेष उल्लेख करीत शब्द सुमनांनी गौरव करण्यात आला व त्याचा सत्कार त्याचे वडील नरसिंह परळकर यांनी स्वीकारला. या प्रसंगी जिल्हा शल्यचिकित्सक डॉ. कुलकर्णी म्हणाले, नेत्रदान-देहदान-अवयवदानाप्रमाणेत 'बोन मॅरो'चे दान वाढण्याची गरज आहे. या संदर्भात अधिकाधिक जनजागृती व्हायला पाहिजे. सुमारे २५-३० वर्षांपूर्वी रक्तदानाविषयी फार कमी जनजागृती होती व रक्तदान करण्यासाठी फार कुणी तयार होत नसे. आज मात्र पूर्वीच्या तुलनेत रक्तदान नक्कीच वाढले आहे, तसेच पुढच्या २०-१५ वर्षांत बोन मॅरो दाते वाढतील व हळूहळू 'बोन मॅरो डिरेक्टरी'देखील तयार होईल, अशी अपेक्षा डॉ. मंजुषा कुलकर्णी यांनी व्यक्त केली. उमेश धावणे यांनी कार्यक्रमाचे सूत्रसंचालन केले.

७० दुर्धर आजारांसाठी जीवनदायी

रक्ताचा कर्करोग (ल्युकेमिया), थॅलेसेमिया, सिकल सेल, मुलांसह प्रौढांमधील अप्लास्टिक अॅनेमिया, न्युरोजेनेटिक आजारासह सुमारे ७० प्रकारच्या दुर्धर आजारग्रस्त रुग्णांमध्ये बोन मॅरो ट्रान्स्प्लान्ट (बीएमटी) होऊ शकते. आतापर्यंत 'कमलनयन'मध्ये 'ल्युकेमिया', 'अप्लास्टिक अॅनेमिया'सह इतरही दुर्धर आजारग्रस्त रुग्णांवर 'बीएमटी' केले आहे. 'बीएमटी'नंतर ८० टक्के रुग्ण दुर्धर आजारमुक्त होतात, हे सिद्ध झाले असून, भाऊ-बहीण, आई-वडील हे आपल्या रुग्णाला बोन मॅरो देऊ शकतात. अर्थात, एचएलए मॅचिंग झाल्यानंतर व संबंधित रुग्णावर किमोथेरपी किंवा इतर अनुषंगिक उपचार करुन रुग्णाची प्रकृती चांगल्या स्थितीत असताना हे प्रत्यारोपण केले जाते. मात्र केवळ ३० टक्के दात्यांचे एचएलए मॅच होते, तर ७० टक्के दात्यांचे एचएलए मॅच होत नाही. अशा वेळी 'हाफ मॅच ट्रान्स्प्लान्ट' (हॅप्लो आयडेन्टिकल) होऊ शकते. पूर्वी हाडांमधून बोन मॅरो काढून त्याचे प्रत्यारोपण होत शकते, जी वेदनादायी पद्धत होती. आता मात्र दात्याला सलग पाच दिवस इंजेक्शन देऊन रक्ताद्वारे 'बोन मॅरो स्टेम सेल्स' काढल्या जातात व पुन्हा रक्त त्याच दात्याच्या शरीरामध्ये सोडले जाते; म्हणजेच रक्तदानाप्रमाणेच ही सुलभ क्रिया होते, असेही डॉ. एकबोटे म्हणाले.

पाच ते सात लाखांचा खर्च

'फुल मॅच ट्रान्स्प्लान्ट'साठी पाच ते सात लाखांचा खर्च येतो, तर 'हाफ मॅच ट्रान्स्प्लान्ट'साठी ७ ते ८ लाखांचा खर्च येतो. शासकीय योजनेत 'बीएमटी'चा समावेश नसला तरी सीएम फंड, पीएम फंडातून या प्रत्यारोपणासाठी निधी मिळू शकतो आणि ९० टक्के रुग्णांमध्ये एकदाच प्रत्यारोपण पुरेसे ठरते, तर केवळ १० टक्के रुग्णांना पुन्हा स्टेम सेल्सची गरज पडू शकते. त्याचवेळी कोणताही दाता कितीही वेळा स्टेम सेल्स देऊ शकतो, त्याचा त्याच्या शरीरावर कोणताही प्रतिकुल परिणाम होत नाही, असेही डॉ. एकबोटे म्हणाले.