म. टा. प्रतिनिधी, औरंगाबाद :

इंधन दरवाढीचा चटका सोसवेना अशी अवस्था सर्वसामान्यांची आता झाली आहे. संपूर्ण मराठवाड्यात ९० चा आकडा पार केलेले पेट्रोलचे सर्वसामान्यांच्या डोळ्यात पाणी आणू लागले आहेत. मागील पंधरा-वीस दिवसांपासून सातत्याने वाढणाऱ्या पेट्रोलच्या दराने संपूर्ण मराठवाड्यात ९० चा आकडा पार केला आहे. तर दुसरीकडे डिझेलचे दरही ८० ला टेकले आहेत. इंधनाचे दर आकाशाला भिडू लागले असले तर सरकारकडून त्यांना दिलासा दिला जाण्याची कोणतीही चिन्हे सध्यातरी दिसत नाहीत.

मराठवाड्यात पेट्रोलचे सर्वाधिक दर परभणीत (९१.९१ रु. लिटर) असून त्यापाठोपाठ नांदेड (९१.७२ रु. लिटर) व औरंगाबादचा (९१.२१ रु. लिटर) नंबर लागला आहे. तर डिझेल मराठवाड्यात औरंगाबादमध्ये (७९.७३ रु. लिटर) सर्वाधिक किमतीला विक्री होत आहे. औरंगाबाद, परभणी, नांदेडमध्ये पेट्रोलच्या दरांनी ९१ चा आकडा ओलांडला असून आता तो शंभरी गाठण्याच्या भीतीने सर्वसामान्यांचा उरात धडकी भरली आहे. सप्टेंबरमध्ये पेट्रोल-डिझेलचे दर सातत्याने वाढत असून यामागे रुपयाचे डॉलरच्या तुलनेत होत असलेले अवमूल्यन हे कारण सांगितले जात आहे. मराठवाड्यातील लातूर, बीड, उस्मानाबाद आणि जालना ही शहरेही पेट्रोल दराच्या ९१ रुपयांच्या उंबरठ्यावर येऊन ठेपली आहेत. ९१ रुपयांपेक्षा जास्त किंमत असलेल्या शहरांमध्ये अमरावती, बुलढाणा, गोंदिया, जळगाव, रत्नागिरी या शहरांचाही समावेश आहे.

राज्यात सर्वात महागात अमरावती येथे डिझेलची विक्री होत आहे. या ठिकाणी ७९.९६ रुपये प्रतिलिटर दराने डिझेल विकण्यात येत आहे. तर विदर्भातील नंदूरबारमध्ये ७९ रुपये ८५ पैसे या दराने विक्री होत आहे. राज्यात डिझेलच्या सर्वाधिक दरात औरंगाबादचा तिसरा क्रमांक आहे.

मराठवाड्यातील प्रमुख शहरांचे दर

शहर पेट्रोल डिझेल

औरंगाबाद - ९१.२१ ७९.७३

नांदेड - ९१.७२ ७८.९९

परभणी - ९१.९१ ७९.१५

उस्मानाबाद - ९०.४९ ७७.८०

जालना - ९०.९८ ७८.२५

लातूर - ९०.९३ ७८.२२

हिंगोली - ९०.९३ ७८.२४

बीड - ९०.९१ ७८.१९

……………

औरंगाबाद : गजानन महाराज मंदिराजवलील कडा ऑफिस शेजारी असलेल्या प्लॉटवर २२ सप्टेंबर रोजी रात्री अकरा वाजता वसीम, एक व्यक्ती आणि एका महिलेने अवैधरित्या कब्जा केल्याची तक्रार सुनील प्रेमसुख संचेती (रा. कासारी बाजार) यांनी दाखल केली. या तिघांनी संचेती यांच्या नावाची पाटी काढून फेकून देत प्लॉटवर अवैधरित्या कब्जा केला असल्याची तक्रार जवाहरनगर पोलिस ठाण्यात देण्यात आली आहे. याप्रकरणी गुन्हा दाखल करण्यात आला आहे.

फर्दापूर: सोयगाव तालुक्यातील फर्दापूर येथे रविवारी नवतरूण गणेश मित्र मंडळासह इतर मंडळे व घरगुती गणेशाला भावपूर्ण निरोप देण्यात आला. यावेळी ढोल-ताशे, पारंपरिक वाद्यांचा गजर करण्यात आला. विसर्जन मिरवणुकीत फुलांची उधळण करण्यात आली.

यावेळी उपविभागीय पोलिस अधिकारी गणेश बिरजदार यांच्या नेतृत्वाखाली फर्दापूर पोलिस ठाण्याचे सहाय्यक पोलिस निरीक्षक शरद जऱ्हाड, पोलिस उपनिरीक्षक निलेश घोरपडे, पोलिस जमादार सुनील भिवसने, राजू काकडे, खोडे आदी पोलिसांनी चोख बंदोबस्त ठेवला होता.

म. टा. प्रतिनिधी, कन्नड

कन्नड शहरासह तालुक्यात गणेशाला रविवारी मोठ्या भक्तीभावाने निरोप देण्यात आला. कन्नड शहरातील मिरवणुकीत ढोल-ताशांचा गजर, तर ग्रामीण भागात काही ठिकाणी डीजेचा दणदणाट ऐकावयास मिळाला.

शहरातील श्रीं चे विसर्जन अंबाडी प्रकल्पात रात्री बाराच्या सुमारास शांततेत पूर्ण झाले. या ठिकाणी कन्नड नगर पालिकेतर्फे निर्माल्य जमा करण्यासाठी व मूर्तींच्या विसर्जनाची व्यवस्था करण्यात आली होती. गणेश महासंघाच्या वतीने देखावे व ढोल पथकांसाठी दरवर्षीप्रमाणे यंदाही शासकीय विश्रामगृहाजवळ स्पर्धांचे आयोजन करण्यात आले. यामध्ये जागृती प्रतिष्ठान मंडळ, शनी मंदिर मंडळ, समर्थनगर मंडळ आदींसह शिवछत्रपती युवक मंडळाच्या मुलींच्या ढोल पथकाने सर्वांचे लक्ष वेधून घेतले. महासंघाचे अध्यक्ष धनराज बेडवाल, संस्थापक अध्यक्ष पवन सोनवणे यांच्यासह माजी नगराध्यक्ष तथा गटनेते संतोष कोल्हे, उपविभागीय अधिकारी डॉ. श्रीमंत हारकर, तहसीलदार महेश सुधळकर आदींची प्रमुख उपस्थिती होती.

कन्नड : तालुक्यातील जैतापूर येथील राहिवासी अनुसयाबाई अंबादास संपाळ (वय ८५) यांचे रविवारी वृद्धपकाळाने निधन झाले. त्यांच्या पार्थिवावर औरंगाबाद येथील मुकुंदवाडी स्मशानभूमीत रविवारी दुपारी अंत्यसंस्कार करण्यात आले. त्यांच्या मागे तीन मुले, दोन मुली, सुना, नातवंडे, असा परिवार आहे.

म. टा. प्रतिनिधी, औरंगाबाद

कच्चीघाटी येथे मेंढपाळांवर झालेल्या हल्ल्याच्या ‌निषेधार्थ सकल धनगर समाजाने सोमवारी जिल्हाधिकारी कार्यालयासमोर धरणे आंदोलन केले.

आरोपींना त्वरीत अटक करा, महिलांवर झालेल्या अत्याचाराबाबत विनयभंगाचा गुन्हा दाखल करा, कच्चीघाटी येथे मेंढपाळांना मारहाण करणाऱ्या उर्वरित २५ जणांना अटक करा, सरकारने वनजमिनी, गायरान कुरणे यावरील बंदी उठवावी. मेंढपाळांवर वारंवार हल्ले होत असल्यामुळे असे हल्ले होऊ नये म्हणून अॅट्रॉसिटी सारखा कडक कायदा हिवाळी अधिवेशनात पारित करावा तसेच धनगर समाजाच्या अनुसूचित जमातीच्या आरक्षणासाठी अंमलबजावणी करावी, अशा मागण्या यावेळी करण्यात आल्या. सकल धनगर समाजाने जिल्हा प्रशासनाला निवेदन दिले. यावेळी अरुण रोडगे, अशोक गीते, रंगनाथ राठोड, धरम पवार, संतोष सुरे, नवनाथ राठोड, सुरेश पचलौरे आदींसह इतरांची उपस्थिती होती.

म. टा. प्रतिनिधी, औरंगाबाद

महापालिकेच्या स्थायी समितीची बैठक कचऱ्यात अडकली आहे. कचऱ्यावर प्रक्रिया करणाऱ्या यंत्र खरेदी संदर्भात स्थायी समितीच्या तेरा सदस्यांनी आक्षेप घेतला. या सदस्यांचे 'समाधान' न झाल्यामुळे त्यांनी मंगळवारी होणाऱ्या स्थायी समितीच्या बैठकीवर बहिष्कार टाकण्याचा पवित्रा घेतला. त्यामुळे सभापतींना ही बैठक रद्द करावी लागली. रद्द करावी लागलेली बैठक यापूर्वी तहकूब केली होती.

चिकलठाणा आणि पडेगाव येथील साइटवर कचऱ्यावर प्रक्रिया करण्यासाठी १५० मेट्रिकटन प्रतिदिवस प्रक्रिया करू शकतील अशा क्षमतेची यंत्र खरेदी करण्याचा प्रस्ताव पालिका प्रशासनाने स्थायी समितीच्या बैठकीत मांडला होता. मायो वेसल्स कंपनीला हे काम देण्याचा उल्लेख प्रस्तावात होता. स्थायी समितीच्या सदस्यांनी या प्रस्तावाला मंजुरी दिली. 'मायो वेसल्स'ला यंत्रांचा पुरवठा करणे व पुढील पाचवर्ष देखभाल दुरुस्ती करून प्रकल्प चालवणे असे कंत्राट देण्याचा उल्लेख प्रस्तावात होता. पाच वर्षांत ३६ कोटींचे पमेंट पालिका कंपनीला करणार होती.

या प्रस्तावाला मान्यता दिल्यावर आठच दिवसात स्थायी समितीच्या सोळा पैकी तेरा सदस्यांनी बंड पुकारून मंजूर केलेला प्रस्ताव फेर विचार करण्यासाठी 'स्थायी'च्या बैठकीत ठेवण्याची मागणी केली. मात्र, सभापतींनी ही मागणी मान्य केली नाही. त्यामुळे या सदस्यांनी महापौरांकडे विशेष सर्वसाधारण सभा आयोजित करण्याची मागणी केली. महापौरांनी देखील या मागणीवर अद्याप विचार केला नाही.

\B'अर्थ' झाला उघड

\Bमंजूर केलेला प्रस्ताव फेर विचारासाठी पुन्हा स्थायी समितीच्या बैठकीसमोर आणा किंवा यासाठी विशेष सर्वसाधारण सभा बोलवा, अशी मागणी करण्यामागचा 'अर्थ' आता उघड झाला आहे. स्थायी समितीचे ते तेरा सदस्य आपल्या मागणीवर ठाम आहेत, त्यांचे अद्याप 'समाधान' झाले नाही, त्यामुळे सभापती रेणुकादास (राजू) वैद्य यांना मंगळवारी आयोजित केलेली स्थायी समितीची बैठक रद्द करावी लागली आहे. रद्द केलेली बैठक तीन सप्टेंबर रोजी तहकूब केली होती. या बैठकीबरोबरच नियमित बैठकीची विषयपत्रिका देखील सभापतींनी काढली होती. नियमित बैठकीच्या विषयपत्रिकेवर सुमारे दोन कोटींच्या कामांचे प्रस्ताव आहेत.

म. टा. प्रतिनिधी, फुलंब्री

येथील गणपती विसर्जन मिरवणुकीस रविवारी दुपारी तीन वाजता प्रारंभ होऊन रात्री दहा वाजता शेवटच्या गणपतीचे विसर्जन झाले. संत सावता मंदिरापासून या मिरवणुकीस सुरुवात झाली. 'इफको'चे केंद्रीय संचालक अॅड. त्रिंबकराव शिरसाठ यांच्या हस्ते आरती झाली, तर नगराध्यक्ष सुहास शिरसाठ यांच्या हस्ते पूजन होऊन मिरवणुकीस प्रारंभ झाला.

पहिल्या गणपतीचा मान संस्थान दत्त मंदिर, संस्थान विठ्ठल मंदिर व संस्थान राम मंदिर या तीन गणपतीचा असतो. हे तीनही गणपती पहिल्या क्रमांकाच्या वाहनात असतात. यानंतर दुसरा क्रमाक संत सावता मंदिर, तिसरा क्रमांक मंगल गणेश मंडळ तर चौथा क्रमांक सरस्वती गणेश मंडळ यानंतर क्रमवारीने सर्व मंडळाचे वाहने असतात. डीजे नसल्याने मिरवणूक ही ढोल-ताशे, बँड व भजनी मंडळ माध्यामातून मिरवणूक काढण्यात आली. डॉ. हेडगेवार चोकातील मंगल गणेश मंडळाच्या मंगलमूर्ती ढोल पथकाने आपल्या प्रदर्शनाने सर्वांचे लक्ष वेधले होते. येथील वीर सावरकर चौकात गणेश महासंघातर्फे व्यासपीठ उभे करून सर्व मंडळाचे अध्यक्ष व गावातील मान्यवरांचे महासंघाचे अध्यक्ष विकास ढोके यांनी स्वागत केले. या चौकात प्रत्येक मंडळास कवायती व ढोल-ताशाची झलक दाखविण्यास वेळ दिला जात होता. एकूण ३५ मंडळाची वाहने या मिरवणुकीत होती. चंद्रकांत राऊत यांनी संचालन केले. यावेळी शिवसेना तालुका प्रमुख राजेंद्र ठोंबरे, मेघ:शाम जैस्वाल, राम बनसोड, राजू प्रधान, राष्ट्रवादी काँग्रेस अल्पसंख्यांक प्रदेश सचिव तय्यब शहा, संजय जैस्वाल, सतीष सोनवणे, दिलीप गायकवाड, अनिल दुतोंडे, गंगाधर दुतोंडे, रवींद्र बळी, सचिन शेरकर आदींची उपस्थिती होती. यावर्षी डीजेमुक्त विसर्जन झाल्याने नशेत झुलणाऱ्यांची संख्या नव्हती. पोलिस निरीक्षक संग्रामसिंग राजपूत यांनी चोख बंदोबस्त ठेवला.

सिल्लोड: तालुक्यातील भराडी येथील सरस्वती भुवन प्रशाला, ज्ञानविकास प्राथमिक व माध्यमिक विद्यालय, होलिफेथ इंग्लीश स्कूल येथे स्नेह फाउंडेशनतर्फे किशोरवयीन मुली व महिलांसाठी आरोग्य कार्यशाळा घेण्यात आली. या कार्यशाळेत डॉ. रेणुका खर्डे, यांनी समुपदेशन केले. विठ्ठल पडूळ यांच्यासह शिक्षकांची उपस्थिती होती.

म. टा. प्रतिनिधी, सिल्लोड

समाजात वैज्ञानिक जाणीव जागृती निर्माण व्हावी या हेतुने महाराष्ट्र अंधश्रद्धा निर्मूलन समितीतर्फे स्पार्कल इंग्लिश स्कूल येथे जाणीव जागृती कार्यशाळा घेण्यात आली. यावेळी सेवानिवृत्त प्राचार्य नामदेव चापे, सेवानिवृत्त गट शिक्षणाधिकारी नारायण फाळके यांची प्रमुख उपस्थिती होती. या कार्यशाळेत डॉ. नरेंद्र दाभोळकर यांची 'प्रश्न तुमचा उत्तर दाभोळकरांचे' ही चित्रफित दाखविण्यात आली. 'अंनिस'चे औरंगाबाद जिल्हा उपाध्यक्ष प्रा. शिवाजी वाठोरे यांनी प्रास्ताविक केले. प्राचार्या अर्चना अहिरे यांनी आभार मानले. यावेळी अॅड. संतोष झाल्टे, एस. बी. देवरे, 'अंनिस'चे तालुका अध्यक्ष डॉ. अनिरुद्ध मोरे, कार्याध्यक्ष अनिल तायडे, प्रा. चंद्रमुनी भद्रे, प्रा. एन. एस. गेडाम, डॉ. प्रकाश बिरारे, प्रा. मनोज पालवे, सय्यद तौसिफ, काशीनाथ देवकर, सुभाष घोडके, एल. आर. कोलोड यांच्यासह तालुक्यातील कार्यकर्ते उपस्थित होते.

म. टा. प्रतिनिधी, औरंगाबाद

समांतर जलवाहिनीबद्दल सर्वसाधारण सभेने मंजूर केलेला प्रस्ताव पालिकेने शासनासोबतच कंपनीकडेही पाठवला आहे. शासन आणि कंपनीकडून मिळणाऱ्या अभिप्रायानुसार पुढील कार्यवाही केली जाणार आहे.

समांतर जलवाहिनीच्या कराराचे पुनरुज्जीवन करण्याचा निर्णय चार सप्टेबर रोजीच्या सर्वसाधारण सभेत घेण्यात आला आहे. कराराचे पुनरुज्जीवन करून काम सुरू करण्यासाठी जास्तीचे २८९ कोटी रुपये लागणार आहेत. शासनाने ही रक्कम अनुदान स्वरुपात द्यावी अशी अट प्रस्ताव मंजूर करताना घातली आहे. त्याशिवाय सध्याची चार हजार ५० रुपयांची पाणीपट्टी २०२२ या वर्षापर्यंत कायम ठेवण्याचा उल्लेख मंजूर प्रस्तावात आहे. काम सुरू झाल्यानंतर सहा महिन्यात पाणीपट्टीचे दर कमी करण्याचा निर्णय घेण्याचे महापौरांनी मंजूर प्रस्तावात नमूद केले आहे. कंपनीच्या कर्जाला महापालिका जबाबदार राहणार नाही आणि कोणतीही मालमत्ता तारण ठेवता येणार नाही, असेही स्पष्ट केले आहे. हा प्रस्ताव राज्य शासन व औरंगाबाद सिटी वॉटर युटिलिटी कंपनीकडे पाठवला आहे, अशी माहिती सूत्रांनी दिली. शासनाची भूमिका आणि कंपनीचा अभिप्राय लवाद व सर्वोच्च न्यायालयात मांडण्यात येणार आहे. शासन व कंपनीकडून अभिप्राय लवकर मिळवण्यासाठी प्रयत्न केले जात आहेत.

\Bउत्तराची प्रतीक्षा

\B

प्रस्तावाच्या अनुशंगाने कंपनीने अद्याप उत्तर दिलेले नाही. महापालिका कंपनीच्या उत्तराची वाट पहात आहे. कंपनीचे उत्तर प्राप्त झाल्यानंतर पुढील कार्यवाही केली जाईल, असे पालिका आयुक्त डॉ. निपुण विनायक यांनी सांगितले.

आयसा इंजिनीअरिंग एक्स्पो

डिसेंबरमध्ये औरंगाबादेत

म. टा. प्रतिनिधी, औरंगाबाद

औरंगाबाद इंडस्ट्रिअल सप्लायर्स असोसिएशन (आयसा) च्या वतीने राष्ट्रीय स्तरावरील इंजिनीअरिंग एक्स्पोचे आयोजन १४ ते १७ डिसेंबरदरम्यान औरंगाबादेत करण्यात आले आहे. या एक्स्पोमध्ये देशभरातून राष्ट्रीय, बहुराष्ट्रीय कंपन्या सहभागी होणार आहेत, अशी माहिती आयसाचे अध्यक्ष समीर कानडखेडकर, प्रकल्प प्रमुख सतीश लोणीकर यांनी मंगळवारी पत्रकारांना दिली.

कानडखेडकर म्हणाले," आयसाची स्थापना १९९१ मध्ये झाली. २७ वर्षांत शहराच्या औद्योगिक जडणघडणीत मोठे योगदान दिले आहे. त्याचाच एक भाग म्हणून अशा प्रकारचे राष्ट्रीय स्तरावरील प्रदर्शन आयोजित करण्यात आले आहे. प्रदर्शनात इंजिनीअरिंग मशीनरी, मशीन टूल्स, अॅटोमेशन, रोबोटिक्स, इंस्ट्रुमेंटेशन कंट्रोल्स, केमिकल प्रोसेस मशीनरी, इंडस्ट्रिअल सेफ्टी, सिक्युरिटी आदीशी संबंधित देशभरातून २०० हून अधिक उद्योगांचा सहभाग असेल. अयोध्यानगरी येथील प्रांगणात २४०० चौरसमीटर जागेवर ६ प्रदर्शन हॉल उभारले जातील."

" एक्स्पोच्या आयोजनात केंद्र सरकारच्या एमएसएमई व एनएसआयसी सोबत महाराष्ट्र चेंबर्स(माकिआ), मराठवाडा चेंबर्स (मासिआ), महाराष्ट्र स्मॉल स्केल (एमसीटीसी), जिल्हा व्यापारी महासंघ, इन्स्टिट्यूट ऑफ मटेरिअल मॅनेजमेंट, बुद्धिस्ट असोसिएशन या औद्योगिक संघटनांचे तसेच एमआयडीसी व महापालिका यांचा सहकार्य लाभणार आहे. प्रदर्शनात लुधियाना, बेंगलुरु, हैदराबाद, राजकोट, अहमदाबाद, पुणे, मुंबई आदी शहरातून प्रदर्शक सहभागी होणार आहेत," असे लोणीकर यांनी स्पष्ट केले. याप्रसंगी विजय जैस्वाल, मनीष पाटील, जयराज पाटील यांची उपस्थिती होती.

म. टा. प्रतिनिधी, औरंगाबाद

वृत्तपत्र विक्रेत्यांसाठी कल्याणकारी मंडळाचे कामकाज सुरू करावे यासह इतर मागण्यांसाठी वृत्तपत्र विक्रेता संघटनेने मंगळवारी जिल्हाधिकारी कार्यालयासमोर धरणे आंदोलन केले. यावेळी जिल्हाधिकाऱ्यांना निवेदन देण्यात आले.

राज्यव्यापी धरणे आंदोलनाचा भाग असलेल्या या आंदोलनात शहर परिसरातील सुमारे दोनशे वर्तमानपत्र विक्रेत्यांनी सहभाग घेतल्याचे संघटनेचे अध्‍यक्ष अण्णासाहेब जगताप यांनी सांगितले. वृत्तपत्र विक्रेत्यांना असंघटित कामगार म्हणून राज्यात तत्काळ नोंदणी सुरू करा, सुरक्षा मंडळाच्या कामाकाजासाठी आवश्यक त्या प्रशासकीय सेवा-सुविधा तत्काळ देण्यात येऊन मंडळ प्रत्यक्षात कार्यरत करावे, असंघटित कामगार वृत्तपत्र विक्रेता कल्याणकारी मंडळासाठी तातडीने भरीव आर्थिक तरतूद करावी, महाराष्ट्र राज्य असंघटित सुरक्षा मंडळात वृत्तपत्र विक्रेत्यांसाठी स्वतंत्र सल्लागार मंडळ गठीत करावे, गटई कामगाराप्रमाणे मोक्याच्या ठिकाणी स्टॉलसाठी जागा उपलब्‍ध करून द्यावी तसेच सध्या अस्तित्वात असलेले स्टॉल अतिक्रमणात धरू नये, शासकीय घरकुल योजनेमध्ये वृत्तपत्र विक्रेत्यांसाठी राखीव कोटा ठेवावा, आदी मागण्या यावेळी निवेदनाद्वारे करण्यात आल्या. आंदोलकांनी यावेळी जोरदार घोषणाबाजी केली. आंदोलनामध्ये अध्यक्ष अण्णासाहेब जगताप यांच्यासह नीलेश फाटके, आसाराम कुलकर्णी, माणिक कदम, भीमराव वायभट, राजू जगताप, प्रभाकर बनसोडे, गोपिनाथ माळी, ‌विष्‍णू ढाकणे, नितीन दहाड, रामकृष्‍ण राऊत यांच्यासह इतरांनी सहभाग घेतला. या आंदोलनाला औरंगाबाद जिल्हा पत्रकार संघाने आपला पाठिंबा दिला आहे. वृत्तपत्र विक्रेत्यांच्या समस्या प्राधान्याने सोडवाव्यात अशी मागणी मराठी पत्रकार परिषदेचे विभागीय प्रतिनिधी, औरंगाबाद जिल्हा पत्रकार संघाचे अध्यक्ष बालाजी सूर्यवंशी, सरचिटणीस संजय वरकड, मुंबई प्रतिनिधी सुनीलचंद्र वाघमारे यांनी केली आहे.

म. टा. प्रतिनिधी, औरंगाबाद

छावणीवासियांसाठी कर्णपुरा नाका ते छावणीपर्यंत तयार करण्यात आलेला नवीन जलवाहिनी चाचपणी सुरू असतानाच मंगळवारी (२५ सप्टेंबर) जेसीबीमुळे फुटली. त्यामुळे पाइप बदलून तसेच चाचपणी पूर्ण होऊन जलवाहिनी पूर्णपणे कार्यान्वित होण्यासाठी निदान काही दिवसांची प्रतीक्षा करावी लागणार असल्याचे स्पष्ट झाले आहे.

छावणी परिसरात गेल्या नोव्हेंबर महिन्यात खाम नदीतून आलेल्या जुन्या जलवाहिनीतून दूषित पाण्याचा पुरवठा होऊन गॅस्ट्रोचा उद्रेक झाला होता आणि त्यात दहा हजारांपेक्षा जास्त नागरिकांना गॅस्ट्रोचा फटका बसला होता. एकट्या छावणी परिषदेच्या रुग्णालयात साडेसात हजार गॅस्ट्रो रुग्णांवर उपचार केल्याची नोंद झाली होती. त्यामुळे २४ नोव्हेंबर रोजी झालेल्या छावणीच्या सर्वसाधारण सभेत नगरसेवकांनी खाम नदीवरून आणि पुलाला समांतर नवीन जलवाहिनी टाकण्याची मागणी केली होती. जेणेकरून जलवाहिनीतील पाणी दूषित होणार नाही. विशेष म्हणजे तत्कालिन अध्यक्षांनी नव्या जलवाहिनीच्या कामाला मंजुरी देऊन ४५ लाखांचा निधीदेखील त्याच बैठकीत मंजूर केला होता. तसेच डिसेंबरपर्यंत नवीन जलवाहिनीचे काम पूर्ण करण्याचे आदेशही तत्कालीन अध्यक्षांनी दिले होते. मात्र हे काम रखडले आणि तब्बल दहा महिन्यानंतर हे काम आता पूर्णत्वाकडे आहे. सद्यस्थितीत पुलावरील कॉलम व कॉलमवरील लोखंडी बांधकाम पूर्ण होऊन या बांधकामावर पाइप बसविण्यात आले आहेत. तसेच पाइप जोडण्याचे कामही पूर्णत्वाच्या दिशेने असतानाच मंगळवारी काम सुरू असताना जेसीबीचा धक्का लागून एक पाइप फुटला व मोठ्या प्रमाणात पाणी वाया गेल्याचेही सूत्रांनी सांगितले. त्यामुळे आता फुटलेल्या पाइपची जोडणी करून आणि संपूर्ण जलवाहिनीची पुन्हा एकदा चाचपणी होऊन नवीन जलवाहिनी कार्यान्वित होणार आहे.

\B

पाणी पोहोचले छावणीपर्यंत

\B

नव्या जलवाहिनीचा पाईप फुटण्याअगोदर याच जलवाहिनीचे पाणी थेट छावणीपर्यंत पोहोचल्याचेही परिषदेच्या अधिकाऱ्यांनी सांगितले. त्यामुळे फुटलेला पाईप जोडल्यानंतर नवीन प्रश्न उपस्थित न झाल्यास पाणी पुरवठा सुरळीपणे सुरू होईल, अशी आशा व्यक्त केली जात आहे. मात्र जायकवाडीतून कर्णपुऱ्यापर्यंत आलेल्या मुख्य जलवाहिनीच्या वेगवेगळ्या प्रेशरमध्येही नवीन जलवाहिनीतील पाणी कुठल्याही अडथळ्याशिवाय येते की नाही, यासाठी किमान काही दिवस चाचपणी करावी लागणार असल्याचेही अधिकाऱ्यांकडून सांगण्यात आले.

शिवा ट्रस्टच्या संस्थांची

प्राप्तिकर विभागाकडून तपासणी

२० कोटींच्या गैरव्यवहाराचा संशय

म. टा. प्रतिनिधी, औरंगाबाद

विविध शैक्षणिक संस्था चालवित असलेल्या शिवा ट्रस्टच्या कार्यालय,महाविद्यालयांची मंगळवारी सकाळी प्राप्तिकर विभागाने तपासणी केली. एकाच वेळी औरंगाबाद आणि नगर जिल्ह्यातील संस्थांची तपासणी करण्यात आली. ४० अधिकाऱ्यांच्या ताफ्याने सुरू केलेली ही तपासणी बुधवारीही सुरू राहणार आहे. या तपासणीतून २० कोटींहून अधिक रुपयांचा गैरव्यवहार झाल्याचा संशय प्राप्तिकर विभागाच्या वरिष्ठ अधिकाऱ्यांनी व्यक्त केला.

मंगळवारी सकाळी दहा वाजता ४० अधिकारी आणि ४० पोलिस अधिकारी, कर्मचाऱ्यांना मदतीने हे तपासणी सत्र सुरू झाले. शिवा ट्रस्टच्या सेव्हन हिल, निपाणी-भालगाव, शिवाजीनगर तसेच नगर जिल्ह्यातील नेवासा, श्रीरामपूर येथील महाविद्यालयांची तपासणी करण्यात आली. प्राप्तिकर खात्याकडून सुरवातीला संस्थेच्या सर्व ठिकाणी सर्वे करण्यात आला. त्यानंतर तपासणी करण्यात आली. प्राप्तिकर विभागातील सूत्रांनी दिलेल्या माहितीनुसार संस्थेने विद्यार्थ्यांकडून घेतलेले डोनेशन, शासकीय मदत,कर्मचाऱ्यांचा पगारासह अन्य गोष्टींची तपासणी करण्यात येत आहे. संस्थेची बुधवारीही तपासणी केली जाणार असल्याचे सूत्रांनी स्पष्ट केले.

म. टा. प्रतिनिधी, औरंगाबाद

गणेश विसर्जनावेळी पोलिसांनी दिलेला मिरवणूक मार्ग बदलणारे बाल गजानन गणेश मंडळ, हरहर महादेव गणेश मंडळ आणि पद्‌मपुरा गणेश मंडळावर वेदांतनगर पोलिस ठाण्यात गुन्हा दाखल करण्यात आला आहे. ही फिर्याद पोलिस कर्मचारी सुनील शामलाल पांडे यांनी दिली आहे.

पद्‌मपुऱ्यातील गणेश मंडळांनी विसर्जनापूर्वीच्या चर्चेत पारंपरिक मार्गावरून मिरवणुकीत सामील होणार असल्याचे म्हटले होते. त्यानुसार या तीन मंडळाच्या पदाधिकाऱ्यांनी रविवारी (२३ सप्टेंबर) दुपारी सव्वा ते पावणे दिन दरम्यान विसर्जन मिरवणूक काढली. मात्र, वेदांतनगर पोलिस ठाण्याने परवानगी दिलेल्या मार्गाने न जाता, अचानक क्रांतीचौक मार्गे नेण्याचा निर्णय घेण्यात आला. त्यावरून मंडळाचे पदाधिकारी आणि पोलिसांत वादही झाला होता. काही वरिष्ठ पदाधिकाऱ्यांनी हस्तक्षेप केल्यानंतर या मंडळांना क्रांतीचौक, पैठण गेट, टिळकपथ मार्गे औरंगपुऱ्याकडे पाठवण्यात आले.

……………

\Bमिरवणुकीत धक्काबुक्की \B

सिडकोतील विसर्जन मिरवणूक पाहण्यासाठी सहकाऱ्यांसह जाणारे संदीप शशीकांत कुलकर्णी (रा. एन ९ शिवम कॉर्नर) यांना साई जाधव, गौरव वानखेडे, धम्मा खेतरे या तिघांनी धक्काबुक्की करून मारहाण केली. याप्रकरणी सिडको पोलिस ठाण्यात गुन्हा दाखल झाला आहे.

म. टा. प्रतिनिधी, फुलंब्री

तालुक्यातील पाथ्री जवळ ट्रॅव्हल्स बस व हायवा ट्रक यांच्यात झालेल्या अपघातात आठ जण जखमी झाले. हा अपघात मंगळवारी (२५ सप्टेंबर) पहाटे पाच वाजता झाला.

अपघातग्रस्त बस पुणे येथून जळगावकडे जात होती. ती पाथ्री गावाजवळ आली असता समोरून येणारा हायवा ट्रकसोबत धडक बसली. या धडकेत ट्रॅव्हल्स मधील योगेश रमेश मंदावने (वय २२), प्रमोद वसंत मंदावने (वय २७), आकाश निवृत्ती सोनवणे (वय २०), प्रदीप पांडुरंग बाविस्कर (वय २२), रामकृष्ण तोताराम चौधरी (वय ५०), गजानन गोपीचंद पाटील (वय ५०), जगदीश राजेंद्र नंदावने (सर्व रा. जळगाव) हे जखमी झाले. सर्व जखमीना औरंगाबाद येथील घाटी हॉस्पिटलमध्ये दाखल करण्यात आले आहे.

म. टा. प्रतिनिधी, औरंगाबाद

शासकीय वैद्यकीय महाविद्यालय व रुग्णालयात (घाटी) 'सेन्सिटायझेशन ऑफ अॅक्शन मोड्यूल' (एमई युनिट) या विषयावर मंगळवारी (२५ सप्टेंबर) तीन दिवसीय कार्यशाळेला प्रारंभ झाला. कार्यशाळेचे उद्घाटन अधिष्ठाता डॉ. कानन येळीकर, उपअधिष्ठाता डॉ. शिवाजी सुक्रे, एमई युनिट समिती समन्वयक. डॉ. सरोजिनी जाधव, डॉ. अंजली शेटे, इतर समिती सदस्य यांच्यासह महाविद्यालयातील विविध विषयांचे अध्यापक व शासकीय कर्करुग्णालयातील अध्यापकांची उपस्थिती होती.

सिंगल

म. टा. प्रतिनिधी, औरंगाबाद

शहरासह नांदेड, लातूर, अंबाजोगाई, धुळे आदी ठिकाणची शासकीय वैद्यकीय महाविद्यालये, शासकीय दंत महाविद्यालये तसेच शासकीय कर्करुग्णालयातील वेगवेगळी न्यायालयीन प्रकरणे कशा पद्धतीने वेळेत व यशस्वीपणे हाताळण्यात यावीत, याबाबत 'वैद्यकीय शिक्षण व संशोधन संचालनालया'मार्फत (डीएमईआर) मंगळवारी (२५ सप्टेंबर) सूक्ष्मजीवशास्त्र विषयाच्या सभागृहात आयोजित कार्यशाळेत सविस्तर मार्गदर्शन करण्यात आले. या कार्यशाळेचे उद्घाटन अधिष्ठाता डॉ. कानन येळीकर, सूक्ष्मजी‍वशास्त्र विभागप्रमुख डॉ. अजित दामले, मागदर्शक व प्रशासकीय अधिकारी संजय वाघमारे (न्यायालयीन प्रकरण), मार्गदर्शक व विधी सल्लागार सरिता भागवत आदींच्या उपस्थितीत कार्यशाळेचे उद्घाटन झाले. या कार्यशाळेला विविध ठिकाणचे प्रशासकीय अधिकारी, कार्यालयीन अधीक्षक, आस्थापना हाताळणारे कर्मचारी, न्यायालयीन प्रकरण हाताळणारे कर्मचारी यांची उपस्थिती होती.