म. टा. प्रतिनिधी, औरंगाबाद

आधीच गंगाजळीत खुडक नाही आणि त्यात मालमत्ता कर वसुलीत केलेल्या अक्षम्य दुर्लक्षामुळे महापालिकेची आर्थिक परिस्थिती तोळा मासा झाली आहे. कंत्राटदारांची दीडशे कोटींची देणी असतानाच सुमारे अडीचशे कोटींच्या कामांची फाइल मंजूर झाली आहे. त्यामुळे चारशे कोटींची जमवाजमव करताना पालिका प्रशासनाच्या नाकातोंडात पाणी जाणार आहे. मग विकासकामांना पैसा कुठून उभा करायाचा, हा प्रश्न निर्माण झाला आहे.

महापालिकेच्या तिजोरीची स्थिती खालावली आहे. मिळालेल्या माहितीनुसार किमान अडीचशे कोटी रुपये किमतीच्या कामांना प्रशासकीय मंजुरी मिळाली असून, यापैकी काही कामे वर्कऑर्डरच्या उंबरठ्यावर आहेत. मात्र, पालिकेकडून केलेल्या कामाचे बिल मिळण्याची शक्यता नाही. त्यामुळे कंत्राटदार काम करण्यासाठी पुढे येताना दिसत नाही. कंत्राटदारांनी केलेल्या कामाची सुमारे दीडशे कोटींची बिले लेखा विभागात प्रलंबित आहेत. सात महिन्यांपासून कंत्राटदारांचे पेमेंट काढण्यात आले नाही. त्यामुळे कंत्राटदारही त्रस्त आहेत. नवीन काम करण्यास त्यांनी नकार दिला आहे. असे असताना नवीन अडिचशे कोटींची कामे प्रशासनाने कशा काय मंजूर केली, असा सवाल विचारला जात आहे. त्यामुळे पुन्हा नव्याने कामे मंजूर करताना प्रशासनासमोर प्रश्न निर्माण होत आहेत. या पार्श्वभमीवर मत व्यक्त करताना आयुक्त डॉ. निपुण विनायक यांनी सध्या कंत्राटदारांचे दीडशे कोटींचे देणे असल्याचे मान्य केले.

\Bकंत्राटदारांचा घेराव

\Bश्रीमंत छत्रपती शिवाजी महाराज पुराणवस्तू संग्रहालयात आयुक्त आणि महापौर पत्रकारांशी संवाद साधणार असल्याचे कंत्राटदारांना कळाल्यावर त्यांनी संग्रहालयाकडे धाव घेतली. थकित बिलांच्या संदर्भात त्यांनी आयुक्तांना घेराव घातला. बिल मिळाले नाही, तर काम करता येणार नाही. काम बंद करू, असा इशारा त्यांनी दिला. दोन दिवसात पेमेंट देण्याची व्यवस्था करतो असे आश्वासन आयुक्तांनी दिले.

आर्थिक घडी बसवण्यासाठी अनावश्यक खर्च टाळला पाहिजे. काटकसर केली पाहिजे. मालमत्ता कराच्या वसुलीकडे दुर्लक्ष झाले आहे. उत्पन्न वाढीसाठी केंद्रीय पथक स्थापन केले आहे. त्याशिवाय झोन कार्यालय निहाय देखील पथकांची स्थापना करण्यात आली आहे. या पथकांना कर वसुलीचे उद्दीष्ट वाढवून दिले आहे. पथकांकडून वसुलीच्या कामाचा अहवाल रोज घेतला जाणार आहे. वसुलीसाठी सक्षमपणे काम करण्यास अधिकारी - कर्मचाऱ्यांना भाग पाडू.

- डॉ. विनायक निपुण, आयुक्त, महापालिका

\Bविकासाच्या नावानं...

\B- २५० कोटींची कामे मंजूर

- १५० कोटींची देणी पडून

- ७ महिन्यांपासून ठणठणाट

म. टा. प्रतिनिधी, औरंगाबाद

स्मार्टसिटी योजनेतून शहर बस चालण्यासाठी एसटी महामंडळाची मदत मिळावी, यासाठी परिवहनमंत्री दिवाकर रावते यांच्याशी चर्चा सुरू असल्याची माहिती आयुक्त डॉ. निपुण विनायक यांनी दिली.

स्मार्टसिटी योजनेच्या माध्यमातून शंभर शहर बस सुरु केल्या जाणार आहेत. त्यासाठीची यंत्रणा महापालिका किंवा स्मार्टसिटी योजनेच्या एसपीव्हीकडे नसल्यामुळे पहिले पाच वर्ष एसटी महामंडळाच्या मदतीने शहर बस सेवा चालवण्याचा निर्णय एसपीव्हीच्या बैठकीत घेण्यात आला आहे. एसटी महामंडळाच्या अधिकाऱ्यांशी याबाबत चर्चा करण्याची जबाबदारी एसपीव्हीच्या संचालकांनी आयुक्तांवर टाकली आहे. या संदर्भात माहिती देताना आयुक्त म्हणाले, 'एसटी महामंडळाच्या अधिकाऱ्यांबरोबर अंतिम चर्चा सुरू आहे. परिवहनमंत्री दिवाकर रावते यांच्याबरोबर देखील चर्चा सुरू आहे. स्मार्टसिटी योजनेतील ग्रीनफिल्ड प्रकल्पाची फेररचना केली आहे. या प्रकल्पाचा निधी अन्य योजनांसाठी वळविण्याबाबतचा प्रस्ताव शासनाला सादर केला आहे. शासनाकडून या प्रस्तावाला मान्यता मिळाल्यावर प्रत्येक कामाचा सविस्तर प्रकल्प अहवाल तयार करावा लागेल. शहरात पालिकेची १२० उद्याने असून त्यापैकी तीस उद्याने मोठी आहेत. मोठ्या उद्यानांच्या विकासासाठीचे अंदाजपत्रक तयार करण्याच्या सूचना दिल्या आहेत. तीस पैकी अठरा ठिकाणी थीमपार्क तयार केले जाणार आहे. सिद्धार्थ उद्यानाच्या पोहण्याच्या तलावाच्या दुरुस्तीसाठीचे अंदाजपत्रक तयार करण्यास सांगितले असून सिडको एन तीन येथेही पोहण्याचा तलाव बांधायचा आहे. त्याचेही अंदाजपत्रक तयार करण्याची सूचना केली आहे.

म. टा. प्रतिनिधी, औरंगाबाद

तरुणीवर लैंगिक अत्याचाराचा आरोप असलेले तत्कालीन पोलिस उपायुक्त राहूल श्रीरामे यांना मंजूर करण्यात आलेला अटकपूर्व जामीन जिल्हा व अतिरिक्त सत्र न्यायधीश अंजली खडसे यांनी रद्द केला. त्याचवेळी श्रीरामेंचा अटी शिथील करण्याचा अर्जही फेटाळला.

पोलिस भरतीची तयारी करून घेण्याचे आमीष दाखवत श्रीरामे यांनी वेळोवेळी लैंगिक अत्याचार केल्याची तक्रार संबंधित तरुणीने पोलिस आयुक्तांना व्हाटस्अ‍ॅपवर केली होती. त्यावरुन श्रीरामेंविरुद्ध गुन्हा दाखल करण्यात आला होता. या गुन्ह्यात अटक होऊ नये म्हणून त्यांनी अटकपूर्व जामिनासाठी मुंबई हायकोर्टाच्या औरंगाबाद खंडपीठात धाव घेतली असता, त्या जामीन अर्जावरील सुनावणीदरम्यान त्यांनी अर्ज मागे घेतला आणि जिल्हा कोर्टात अटकपूर्व जामिनासाठी अर्ज दाखल केला होता. जिल्हा व अतिरिक्त सत्र न्यायाधीश एस. एस. भिष्मा यांनी श्रीरामे यांना सर्शत जामीन मंजूर केला होता. जामीन मंजूर झाल्यानंतर शहर सोडून जाण्याची परवानगी द्यावी आणि मंगळवार व शनिवारी पोलिस ठाण्यातील हजेरीची अट रद्द करावी, असा अर्ज श्रीरामेंनी दाखल केला होता. दरम्यान, श्रीरामेंचा अटकपूर्व जामीन रद्द करण्यात यावा, असा विनंती अर्ज पीडितेने अ‍ॅड. राजेश काळे यांच्यामार्फत दाखल केला होता. श्रीरामेंनी पदाचा दुरुपयोग करुन व कोर्टाची दिशाभूल करीत जामीन मंजूर करून घेतला. तत्कालीन तपास अधिकारी पोलिस उपायुक्त विनायक ढाकणे, पोलिस निरीक्षक शिवाजी कांबळे व कैâलास प्रजापती यांनी कोर्टासमोर वस्तुस्थिती निदर्शनास आणून दिली नाही. त्यांच्या धमक्यामुळे पीडिता व तिच्या आईला पोलिसांना समोरे जाता आले नाही व त्या लपून राहिल्या, असे पीडितेने अर्जात म्हटले होते. सरकार पक्षाच्या वतीने सहायक सरकारी वकील बाळासाहेब महेर यांनी काम पाहिले. अ‍ॅड. काळे यांना अ‍ॅड. शिवकुमार साबळे यांनी सहकार्य केले.

१५ दिवसांची अंतरिम स्थगिती

दोन्ही अर्जावर अंतिम सुनावणी झाली असता, श्रीरामेंचा अटकपूर्व जामीन रद्द करण्यात यावा, असा पीडितेचा अर्ज कोर्टाने मंजूर केल्यामुळे श्रीरामेंचा अटकपूर्व जामीन अर्ज आपोआप रद्द झाला. या निर्णयाला खंडपीठात आव्हान देण्यासाठी कोर्टाने आदेशाला १५ दिवसांची अंतरिम स्थगिती दिली. तसेच श्रीरामेंचा अटी शिथील करण्याचा अर्जही कोर्टाने फेटाळला.

म. टा. प्रतिनिधी, औरंगाबाद

श्रीमंत छत्रपती शिवाजी महाराज पुराणवस्तू संग्रहालयाच्या नूतनीकरणाच्या कामाचे उद्घाटन तीन ऑक्टोबर रोजी होणार आहे. संग्रहालयाच्या आवारात छत्रपती शिवाजी महाराज संशोधन केंद्र आणि मिनी थिएटर बांधण्यात येणार आहे.या कामांवर एक कोटी ६० लाख रुपये खर्च करण्यात येणार आहेत. नूतनीकरणाचा प्रस्ताव तत्कालीन महापौर त्र्यंबक तुपे यांच्या कार्यकाळात सुमारे दोन वर्षांपूर्वी मंजूर झाला होता. नूतनीकरण उच्चस्तरीय समितीच्या मंगळवारी झालेल्या बैठकीला महापौर नंदकुमार घोडेले, उपमहापौर विजय औताडे, सभापती राजू वैद्य, सभागृहनेता विकास जैन, माजी खासदार प्रदीप जैस्वाल, महापालिकेचे आयुक्त डॉ. निपुण विनायक उपस्थित होते.

म. टा. प्रतिनिधी, औरंगाबाद

अखिल भारतीय विद्यार्थी परिषद आणि आंबेडकरी विद्यार्थी संघटनांचा वाद धूमसत आहे. कुलगुरुंच्या दालनात प्रतिकात्मक आंदोलन करणाऱ्या 'अभाविप'च्या कार्यकर्त्यांवर गुन्हे दाखल करण्याच्या मागणीसाठी आंबेडकरी संघटनांनी मंगळवारी विद्यापीठ बंद केले. तसेच केंद्रीय युवक महोत्सव सुरळीत पार पाडण्याची सामंजस्याची भूमिका जाहीर केली. वसतिगृहाच्या समस्या आणि घुसखोरीच्या प्रश्नाकडे प्रशासनाने डोळेझाक केल्यामुळे वाद चिघळल्याचे विद्यार्थ्यांनी सांगितले.

डॉ. बाबासाहेब आंबेडकर मराठवाडा विद्यापीठातील वसतीगृह प्रवेशाचा वाद चव्हाट्यावर आला. मागील सहा महिन्यांपासून अखिल भारतीय विद्यार्थी परिषद वसतीगृह प्रवेश आणि समस्यांबाबत प्रशासनाकडे पाठपुरावा करीत आहे. काही विद्यार्थी दहा वर्षांपासून वसतिगृहात ठाण मांडून बसल्यामुळे नवीन विद्यार्थ्यांना प्रवेश मिळत नसल्याची वस्तुस्थिती प्रशासनाला सांगितली. कुलगुरु, प्र-कुलगुरु आणि कुलसचिव यांना वेळोवेळी निवेदने देऊनही त्यांनी परिस्थितीचे गांभीर्य ओळखले नाही. या वेळकाढूपणाने संतापलेल्या 'अभाविप'च्या विद्यार्थ्यांनी कुलगुरू डॉ. बी. ए. चोपडे यांच्या दालनात प्रतिकात्मक आंदोलन केले. या आंदोलनात कुलगुरुंचा अवमान झाल्याचा आक्षेप घेत सम्यक आंदोलन, रिपब्लिकन विद्यार्थी आघाडी आणि युवक काँग्रेसने विरोध केला. संघटनाच्या वादात धक्काबुक्की झाल्याने वाद चिघळला. अखिल भारतीय विद्यार्थी परिषदेच्या एका कार्यकर्त्याला बेदम मारहाण करण्यात आल्याचे संघटनेच्या पदाधिकाऱ्याने सांगितले. दुसरीकडे 'अभाविप'च्या कार्यकर्त्यांवर गुन्हे दाखल करण्याच्या मागणीवर आंबेडकरी विद्यार्थी संघटना ठाम आहेत. या मागणीसाठी मंगळवारी विद्यापीठ बंद ठेवण्यात आले. अभ्यासिका, वर्ग आणि कँटीन परिसरात शुकशुकाट होता. प्रशासकीय इमारतीत कामकाज झाले. विद्यापीठाने गुन्हे दाखल न केल्यास केंद्रीय युवक महोत्सव उधळून लावण्याचा इशारा संघटनांनी दिला होता. पण, वरिष्ठ अधिकाऱ्यांसोबत झालेल्या बैठकीनंतर हा इशारा मागे घेण्यात आला.

दरम्यान, बेगमपुरा पोलिस ठाण्याने आंबेडकरी विद्यार्थी संघटनांना जमावबंदीची नोटीस बजावली. त्यामुळे संतप्त कार्यकर्त्यांनी पोलिस आयुक्तांना निवेदन देऊन अभाविपच्या कार्यकर्त्यांवर गुन्हे दाखल करण्याच्या मागणीसाठी निवेदन दिले.

---'अभाविप' भूमिकेवर ठाम

विद्यापीठातील वसतिगृहात विद्यार्थ्यांना सुविधा देणे प्रशासनाचे कर्तव्य आहे. या मुद्द्यावर अभाविप मागील सहा महिन्यांपासून निवेदन देत आहे. विद्यार्थ्यांच्या हितासाठी लढा सुरूच राहील असे प्रदेशमंत्री अभिजीत पाटील यांनी सांगितले. विद्यापीठात प्रवेश घेतलेल्या विद्यार्थ्यांना वसतिगृहात प्रवेश द्यावा. तसेच एक हजार क्षमतेचे नवीन वसतीगृह उभारावे, 'आरआरसी' झालेल्या संशोधक विद्यार्थ्यांना तात्काळ वसतीगृह द्यावे, मोडकळीस आलेल्या वसतिगृहांचे स्ट्रक्चरल ऑॉडिट करावे, मुलींच्या वसतिगृहाची सुरक्षाव्यवस्था कडक करावी, पिण्याच्या पाण्यासाठी 'आरओ' व्यवस्था करावी अशा मागण्या संघटनेने केल्या आहेत. या मागण्यांसाठी दमदाटीला न जुमानता लढा कायम राहील असे निवेदनाद्वारे कळवण्यात आले आहे.

------नोटीस बजावली पुढे काय ?

जुन्या विद्यार्थ्यांनी वसतिगृहातील खोल्यांचा ताबा घेतल्यामुळे विद्यार्थी कल्याण संचालक डॉ. मुस्तजिब खान यांच्याकडे तक्रार करण्यात आली होती. यावर खान यांनी नोटीस बजावून संबंधित विद्यार्थ्यांना खोली सोडण्याचे आवाहन केले. अन्यथा, पोलिस कारवाई करुन खोली रिकामी करण्यात येईल असा इशारा दिला होता. त्यानंतरही 'ज्येष्ठ' विद्यार्थ्यांनी खोल्या सोडल्या नाहीत आणि प्रशासनाने चालढकल केली. या प्रकारात नवीन संशोधक विद्यार्थी संतापले आणि आंदोलन उग्र झाले. संत तुकडोजी महाराज विद्यापीठ, नागपूर येथे पोलिस बळाचा वापर करुन वसतिगृहे रिकामी करण्यात आली होती. मात्र, 'बामु'त संघटनांच्या नेत्यांच्या पाठिंब्यावर जुने विद्यार्थी ठाण मांडून आहेत.

कारवाईच्या आधी व्यवस्थापन, शिक्षकांची बाजू घ्या, खंडपीठाचे आदेश

म. टा. विशेष प्रतिनिधी ,औरंगाबाद

विद्यार्थ्यांची ५० टक्यांपेक्षा कमी उपस्थिती असलेल्या शाळांविरोधात दाखल जनहित याचिकेत शिक्षण खात्याने केलेल्या फौजदारी व इतर कारवाईबाबत कारणे दाखवा नोटीस आधारे शाळा व्यवस्थापन, शिक्षक, कर्मचारी यांचे म्हणणे विचारात घ्यावे. संबंधित शाळांच्या अभिलेखाची तपासणी करावी. कार्यवाहीसाठीचे वेळोवेळी दिलेले आदेश विचारात घ्यावे. प्रत्येक प्रकरणात योग्य तो निर्णय घ्यावा व त्यानंतर कारवाई करावी, असे आदेश मुंबई उच्च न्यायालयाच्या औरंगाबाद खंडपीठाचे न्या. संजय गंगापूरवाला व न्या. एस. एम. गव्हाणे यांनी दिले. तसेच या फौजदारी कारवाईविरोधात शाळा व्यवस्थापन, शिक्षक, कर्मचारी यांना न्यायालयात दाद मागण्याचा मुभा दिली.

महसूल विभागाने ३ ते ५ ऑक्टोंबर २०११ रोजी पटपडताळणी मोहीम राज्यभर राबविली होती. ५० टक्के विद्याथी र्संख्या १४०४ शाळांवर आढळळी होती. अशा शाळांवर कारवाई करण्याची विनंती ब्रिजमोहन धीरजप्रसाद मिश्रा यांनी जनहित याचिका दाखल करून केली होती. या याचिकेच्या अनुषंगाने खंडपीठाने अशा शाळांवर कारवाई करण्याचे आदेश दिले होते. जनहित याचिकेच्या निकालाआधारे शिक्षण संचालक पुणे यांनी पटपडताळणीत दोषी आढळळेल्या शाळांवर कारवाईचे करण्याचे आदेश प्रत्येक जिल्ह्याच्या शिक्षणाधिकाऱ्यांना दिले होते. यानुसार शासनाचे अनुदान घेणाऱ्या खासगी अनुदानित दोषी शाळा, शिक्षण संस्था, व्यवस्थापने यांच्यावर फौजदारी कारवाई प्रस्तावित केली होती. यासंबंधी शासनाने खंडपीठात शपथपत्रही दाखल केले होते. या प्रकरणी सरकारी वकील अमरजितसिंह गिरासे यांनी ११ संस्थांवर गुन्हे दाखल करण्यात आल्याचे खंडपीठात सांगितले. शिक्षण संचालक धनराज माने निवृत्त झाले असून, शिक्षण विभागाचे तत्कालिन प्रधान सचिव नंदलाल आता इतर विभागात गेल्याने त्यांना उपस्थित राहण्यापासून सूट देण्याची विनंती करण्यात आली. या जनहित याचिकेत फौजदारी कारवाईस विरोध करणारे अनेक हस्तक्षेप अर्ज सादर करण्यात आले. महाराष्ट्र राज्य खासगी शिक्षक व शिक्षकेत्तर महासंघाने हस्तक्षेप अर्ज सादर केला. यासंबंधीच्या शासन निर्णयाचे कलम १.२ ते १.७ खंडपीठाने रद्द केल्यामुळे कार्यवाही रद्द केली होती, असे हस्तक्षेपकांतर्फे सांगण्यात आले. सदर बाब खंडपीठाच्या निदर्शनास आणून न दिल्यामुळे फौजदारी कार्यवाहीचे सत्र सुरू आहे. त्यास स्थगित देण्याची विनंती करण्यात आली होती. मिश्रा यांच्यातर्फे सचिन देशमुख, शाळा व्यवस्थापन, शिक्षक व शिक्षकेत्तर कर्मचारी यांच्यातर्फे विजयकुमार सपकाळ, प्रशांत कातनेश्वरकर, शहाजी घाटोळ पाटील, विलास पानपट्टे, डी. आर. इराळे पाटील, ए. एन. इरपतगीरे तर शासनातर्फे अमरजितसिंह गिरासे यांनी काम पाहिले.

म. टा. प्रतिनिधी, औरंगाबाद

शेतीच्या वादातून शिविगाळ करीत प्राणघातक हल्ला करणारे औरंगाबाद तालुक्यातील पेâरनजळगाव येथील आरोपी अशोक लक्ष्मण पवार व सुरेश लक्ष्मण पवार यांना तीन महिन्यांच्या कारावासाची शिक्षा प्रथम वर्ग न्यायदंडाधिकारी आर. एम. चव्हाण यांनी ठोठावली.

पेâरनजळगाव येथील लिंबाजी हिवराळे हे पाच जून २०१३ रोजी धम्मपाल व संघपाल यांच्यासोबत गट क्रमांक २९ मधील शेतीची मशागत करण्यासाठी गेले होते. त्यावेळी गावातील अशोक लक्ष्मण पवार (वय ५९), सुरेश लक्ष्मण पवार (वय ३९) व सांडू बंडू पवार (वय ६९, सर्व रा. पेâरनजळगाव) हे तिथे आले आणि 'ही आमची जमीन आहे, तुम्ही कशी काय मशागत करता' असा जाब विचारत तिघांनी शिविगाळ केली. त्यांच्यात कडक्याचे भांडण होऊन संतापलेल्या अशोकने धम्मपालच्या डोक्यात सब्बल मारली. यामध्ये त्याचे डोके पुâटले, तर सुरेशने संघपालच्या डोक्यात सब्बल मारल्यामुळे त्याचेही डोके पुâटले. दोन्ही मुले जखमी झाल्यामुळे त्यांना सोडविण्यासाठी गेलेल्या लिंबाजी हिवराळे यांना लाकडी दांड्याने मारहाण करून जखमी करण्यात आल्याचे तक्रारीत म्हटले होते. त्यावरुन तिघांविरुद्ध करमाड पोलिस ठाण्यात गुन्हा दाखल करण्यात आला होता. खटल्यावेळी, सहाय्यक सरकारी वकील शोभा विजयसेनानी यांनी ६ साक्षीदारांचे जबाब नोंदविले. दोन्ही बाजुंच्या युक्तिवादजानंतर व साक्ष-पुराव्यांवरून कोर्टाने आरोपी अशोक व आरोपी सुरेश यांना भादंवि ३२४ कलमान्वये तीन महिने कारावास व १ हजार रुपये दंड व दंड न भरल्यास १५ दिवस अतिरिक्त कारावासाची शिक्षा सुनावली, तर सांडू पवार याच्या वयाचा विचार करुन त्याला १५ हजारांच्या बंधपत्रावर मुक्त करण्याचे आदेश दिले.

म. टा. प्रतिनिधी, औरंगाबाद

सभापतींचे अधिकार गोठवा, नगरसचिवांना निलंबित करा, अशी मागणी आता महापालिकेच्या स्थायी समितीच्या सदस्यांनी केली आहे. या मागणीचे निवेदन तयार करण्यात आले असून १५ सदस्यांच्या त्यावर स्वाक्षऱ्या आहेत. स्थायी समितीच्या सोळा पैकी १५ सदस्यांनी पुकारलेले बंड शिगेला पोचले आहे.

कचऱ्यावर प्रक्रिया करण्यासाठी चिकलठाणा आणि पडेगाव येथे प्रत्येकी १५० मेट्रिक टन क्षमतेच्या मशीन्स बसवण्याचा प्रस्ताव स्थायी समितीच्या बैठकीत मंजूर करण्यात आला. मायो वेसल्स या कंपनीला मशीन्सचा पुरवठा करण्याचे व पुढील पाच वर्ष कचऱ्यावर प्रक्रिया करण्याबरोबरच मशीन्सची देखभाल दुरुस्ती करण्याचे कंत्राट त्याच कंपनीला देण्याचा उल्लेख या प्रस्ताव आहे. स्थायी समितीच्या बैठकीत हा प्रस्ताव मंजूर करण्यात आला. प्रस्ताव मंजूर झाल्यावर स्थायी समितीच्या सदस्यांनी त्याला आक्षेप घेतला. मायो वेसल्स कंपनीकडून कचऱ्यावर प्रक्रिया करण्यासाठी बेंगळूरु आणि उज्जैन येथे काम सुरू असल्याचा उल्लेख प्रस्तावात आहे. या दोन्हीही ठिकाणी कंपनीचे काम कसे सुरू आहे याची प्रत्यक्ष पाहणी करून त्याचा अहवाल स्थायी समितीच्या बैठकीत ठेवा, तोपर्यंत मंजूर केलेला प्रस्ताव स्थगित ठेवा. कंपनीचे काम त्या शहरांमध्ये योग्य प्रकारे सुरू असेल तर मशीन्स पुरवठा करण्याबरोबरच त्याची देखभाल दुरूस्ती करण्याचे काम त्या कंपनीला द्या, कंपनीचे काम योग्य प्रकारे होत नाही, असे लक्षात आले तर प्रस्ताव रद्द करा, अशी मागणी सदस्यांनी केली आहे. सदस्यांच्या मागणीचा विचार सभापती राजू वैद्य यांनी केला नाही. त्यामुळे सदस्यांनी महापौरांना निवेदन देऊन मायो वेसल्सला मशीनचे कंत्राट देण्याचा प्रस्ताव सर्वसाधारण सभेत घेण्याची विनंती केली. महापौरांनी देखील याचा विचार केला नाही.

त्यामुळे आता स्थायी समितीचे १६ पैकी १५ सदस्य एकत्र आले आहेत. त्यांनी आयुक्तांच्या नावे पत्र तयार केले असून त्यात सभापतींचे अधिकार गोठवा, अधिकार काढून घ्या, अशी मागणी केली आहे. मंजूर केलेल्या प्रस्तावाला स्थगिती देण्याची मागणी करणारा प्रस्ताव नगरसचिवांनी विषय पत्रिकेत समाविष्ट केला नाही, त्यामुळे नगरसचिवांना निलंबित करा, अशी मागणी देखील १५ सदस्यांनी पत्रात केली आहे.

'डेक्कन' वरची शिष्टाई निष्फळ

दरम्यान, कचरा प्रक्रिया मशीन्सच्या खरेदीवरून स्थायी समितीमध्ये निर्माण झालेला पेच सुटावा यासाठी सोमवारी खासदार चंद्रकांत खैरे यांच्या डेक्कन येथील निवासस्थानी बैठक झाली. बैठकीला स्थायी समितीमधील शिवसेनेच्या पाच सदस्यांनाच बोलावण्यात आले होते. स्थायी समितीच्या बैठकीचा कोरम पाच सदस्यांनी पूर्ण होतो. त्यामुळे पाच सदस्यांची समजूत काढण्याचा प्रयत्न करण्यात आला, पण सदस्यांनी त्यास प्रतिसाद दिला नाही. विशेष म्हणजे या पाच सदस्यांमध्ये खैरे यांचे पुत्र ऋषीकेश यांचा समावेश आहे. या बैठकीतही सभापती एकाकी पडले होते, अशी माहिती सूत्रांनी दिली.

म. टा. प्रतिनिधी, औरंगाबाद

'राज्यकर्त्यांचा आत्मविश्वास कमी होतो तेव्हा देशात धर्माधर्मात तेढ निर्माण केली जाते. धर्माच्या नावावर हत्या होत आहेत आणि खासगी क्षेत्र वाढत नसल्याने सरकारी नोकरीसाठी तरुण आरक्षण मागत आहेत. मराठवाड्याने नेहमीच महाराष्ट्राला समृद्ध विचार दिला. सद्यस्थितीत मराठवाड्यानेच राज्याला हिताची दिशा सांगावी,' असे प्रतिपादन राष्ट्रवादी काँग्रेसचे प्रदेशाध्यक्ष आमदार जयंत पाटील यांनी केले. उद्योजक मधुकरराव मुळे यांना जीवनगौरव पुरस्कार प्रदान केल्यानंतर ते बोलत होते.

मराठवाडा साहित्य परिषदेच्या वतीने उद्योजक व सामाजिक-सांस्कृतिक कार्यकर्ते मधुकरराव मुळे यांना जीवनगौरव पुरस्काराने सन्मानित करण्यात आले. यशवंतराव चव्हाण नाट्यगृहात मंगळवारी सायंकाळी कार्यक्रम झाला. यावेळी मंचावर राष्ट्रवादी काँग्रेसचे प्रदेशाध्यक्ष आमदार जयंत पाटील, 'मसाप'चे अध्यक्ष कौतिकराव ठाले-पाटील, कार्यवाह डॉ. दादा गोरे, मधुकरराव मुळे, आमदार राजेश टोपे, माजी आमदार बदामराव पंडीत, कवी प्रा. फ. मुं. शिंदे, अॅड. सुखदेव शेळके व विजयकुमार कोलते यांची प्रमुख उपस्थिती होती. आमदार पाटील यांच्या हस्ते मुळे यांना सन्मानित करण्यात आले. स्मृतिचिन्ह व रोख २५ हजार रुपये असे पुरस्काराचे स्वरुप आहे. सद्यस्थितीवर पाटील यांनी भाष्य केले. 'कॉ. गोविंद पानसरे, डॉ. नरेंद्र दाभोलकर, एम. एम. कलबुर्गी व गौरी लंकेश यांच्या हत्येचे मूळ जालना शहरातील नगरसेवकाचे घर निघाले. कर्नाटकात त्याने गोळीबाराचे प्रशिक्षण दिले. आपल्याच धर्मातील लोकांना मारायची ही प्रवृत्ती कुठून आली ? दाभोलकर यांना गोळ्या घातल्याचे औरंगाबादचा तरुण शरद कळसकर सांगतो. सचिन अंदुरे याच प्रकरणात सापडतो. सगळं चांगलं सुरू असताना हे घडलं. आपल्याला कुणीतरी सोडविण्यासाठी पाठबळ देतो असे लक्षात आल्यानंतर या प्रवृत्ती वाढतात. सध्या देशात धर्माधर्मात तेढ वाढवली जात आहे. रुपयाचे अवमूल्यन, पेट्रोलचे चढे दर आणि महागाईच्या कैचीत जनता सापडली आहे. अपयश झाकण्यासाठी धर्माचे मुद्दे काढले जात आहेत' अशी टीका पाटील यांनी केली. सदभावनेने दुसऱ्यांना समजून घेण्याचे मधुकरराव मुळे यांचे मोठेपण आहे. कवी-लेखकांना सांभाळले. ही साधी गोष्ट नाही. अधिक मोठ्या पुरस्काराने त्यांचा सन्मान होईल असे प्रा. फ. मुं. शिंदे म्हणाले. 'मसाप'च्या नाट्यगृह उभारणीत मुळे यांचा मोलाचा वाटा आहे. शिक्षण क्षेत्रात कार्यरत असलेल्या मुळे यांनी साहित्य व सांस्कृतिक क्षेत्रात भरीव काम केले, असे प्रास्ताविकात कौतिकराव ठाले-पाटील यांनी सांगितले. डॉ. ऋषिकेश कांबळे यांनी सूत्रसंचालन केले आणि डॉ. दादा गोरे यांनी आभार मानले. यावेळी रसिक आणि राजकीय कार्यकर्ते उपस्थित होते.

मुळे अण्णा भावुक झाले

जीवनगौरव पुरस्कार स्वीकारल्यानंतर बोलताना मधुरकरराव मुळे भावुक झाले. 'वडील शिक्षक असले तरी फक्त पाच रुपये पगार होता. आईला दुसऱ्याच्या शेतात मजुरीसाठी जावे लागले. एकदा लहान भावाला भूक लागल्यामुळे आईचा शोध घेताना दोघे रडलो. एवढे कष्ट का करावे लागतात, असा विचार डोक्यात आला. या प्रसंगाने जीवनाला दिशा मिळाली. भावंडांनी कष्ट करून यश मिळवले. मोठ्या लोकांचा समृद्ध सहवास मिळाला' असे सांगताना मुळे यांच्या डोळ्यात अश्रू तरळले.

म. टा. विशेष प्रतिनिधी ,औरंगाबाद

शेतमाल खरेदीसाठी हमीभाव जाहीर करूनही मागील दहा वर्षांपासून हमीभावानुसार शेतमाल खरेदी-विक्री न केल्याप्रकरणी केंद्र शासनासह राज्य शासनाला नोटीस बजावण्याचे आदेश मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे व न्या. मनीष पितळे यांनी दिले. केंद्र व राज्य शासनाला म्हणणे मांडण्यासाठी दोन आठवड्यांचा अवधी देण्यात आला आहे.

वकील अजित काळे यांच्या जनहित याचिकेत म्हटल्यानुसार कृषी मूल्य आयोगाकडून केंद्र शासनाला शेतमाल हमी भाव संदर्भात मार्गदर्शन करण्यात येऊन त्या अनुषंगाने केंद्र शासनतर्फे दरवर्षी शेतमालाचा हमीभाव जाहीर केला जातो. हमीभाव हे आवश्‍यक वस्तू कायद्याचा आधार घेऊन केंद्र शासनतर्फे अन्नधान्याचे भाव नियंत्रणात ठेवण्यासाठी व ग्राहक आणि उत्पादक यांच्यात ताळमेळ ठेवण्यासाठी हमीभाव जाहीर केला जातो. या भावासंदर्भात अधिसूचना प्रसिद्ध करण्यात येऊन प्रत्येक राज्याला या हमीभावानुसार शेतमाल खरेदी- विक्री व नियंत्रणांसंदर्भात निर्देश देण्यात येतात. परंतु, मागील काही वर्षांत महाराष्ट्रात हमीभावापेक्षा कमी किंमतीत शेतमालाची खरेदी विक्री झाल्याचे कागदपत्रांसह काळे यांनी खंडपीठाच्या निदर्शनास आणून दिले. हमीभावाने केंद्र व राज्य शासनाने बाजार समितीमार्फत हमीभावाप्रमाणे बाजार दरात घसरण झाल्यानंतर समितीने शासनासाठी खरेदी करावे असेही म्हणणे मांडण्यात आले. २०१८-१९ या वर्षात केंद्र शासनाने जाहीर केलेल्या हमीभाव संदर्भात काळे यांनी युक्तीवाद केला. या याचिकेची सुनावणी नऊ ऑक्‍टोबर रोजी होणार आहे.

\Bदहा वर्षांतील फरक शेतकऱ्यांना द्यावा \B

बाजार समिती कायदा कलम ३२ (ड) व नियम ९४ (ड) नुसार हमी भावापेक्षा कमी किंमतीत शेतमालाची खरेदी विक्री करू नये व तसे केल्यास संबंधितावर कारवाई करण्याचे बंधन हे समितीवर असूनही कारवाई केली जात नसून या नियमाचे उल्लंघन होत आहे. त्यामुळे केंद्र व रज्य शासनाने शासकीय खरेदी केंद्रे सुरू करावे. तसेच मागील दहा वर्षांतील बाजारभाव व केंद्र शासनाने निर्देशित केलेल्या शेतमालाच्या हमीभावाच्या रकमेतील फरक शेतकऱ्यांना अदा करण्याची विनंती याचिकेत करण्यात आली.

म. टा. प्रतिनिधी, औरंगाबाद

छावणीवासियांसाठी कर्णपुरा नाका ते छावणीपर्यंत तयार करण्यात आलेला नवीन जलवाहिनी चाचपणी सुरू असतानाच मंगळवारी (२५ सप्टेंबर) जेसीबीमुळे फुटली. त्यामुळे पाइप बदलून तसेच चाचपणी पूर्ण होऊन जलवाहिनी पूर्णपणे कार्यान्वित होण्यासाठी निदान काही दिवसांची प्रतीक्षा करावी लागणार असल्याचे स्पष्ट झाले आहे.

छावणी परिसरात गेल्या नोव्हेंबर महिन्यात खाम नदीतून आलेल्या जुन्या जलवाहिनीतून दूषित पाण्याचा पुरवठा होऊन गॅस्ट्रोचा उद्रेक झाला होता आणि त्यात दहा हजारांपेक्षा जास्त नागरिकांना गॅस्ट्रोचा फटका बसला होता. एकट्या छावणी परिषदेच्या रुग्णालयात साडेसात हजार गॅस्ट्रो रुग्णांवर उपचार केल्याची नोंद झाली होती. त्यामुळे २४ नोव्हेंबर रोजी झालेल्या छावणीच्या सर्वसाधारण सभेत नगरसेवकांनी खाम नदीवरून आणि पुलाला समांतर नवीन जलवाहिनी टाकण्याची मागणी केली होती. जेणेकरून जलवाहिनीतील पाणी दूषित होणार नाही. विशेष म्हणजे तत्कालिन अध्यक्षांनी नव्या जलवाहिनीच्या कामाला मंजुरी देऊन ४५ लाखांचा निधीदेखील त्याच बैठकीत मंजूर केला होता. तसेच डिसेंबरपर्यंत नवीन जलवाहिनीचे काम पूर्ण करण्याचे आदेशही तत्कालीन अध्यक्षांनी दिले होते. मात्र हे काम रखडले आणि तब्बल दहा महिन्यानंतर हे काम आता पूर्णत्वाकडे आहे. सद्यस्थितीत पुलावरील कॉलम व कॉलमवरील लोखंडी बांधकाम पूर्ण होऊन या बांधकामावर पाइप बसविण्यात आले आहेत. तसेच पाइप जोडण्याचे कामही पूर्णत्वाच्या दिशेने असतानाच मंगळवारी काम सुरू असताना जेसीबीचा धक्का लागून एक पाइप फुटला व मोठ्या प्रमाणात पाणी वाया गेल्याचेही सूत्रांनी सांगितले. त्यामुळे आता फुटलेल्या पाइपची जोडणी करून आणि संपूर्ण जलवाहिनीची पुन्हा एकदा चाचपणी होऊन नवीन जलवाहिनी कार्यान्वित होणार आहे.

\B

पाणी पोहोचले छावणीपर्यंत

\B

नव्या जलवाहिनीचा पाईप फुटण्याअगोदर याच जलवाहिनीचे पाणी थेट छावणीपर्यंत पोहोचल्याचेही परिषदेच्या अधिकाऱ्यांनी सांगितले. त्यामुळे फुटलेला पाईप जोडल्यानंतर नवीन प्रश्न उपस्थित न झाल्यास पाणी पुरवठा सुरळीपणे सुरू होईल, अशी आशा व्यक्त केली जात आहे. मात्र जायकवाडीतून कर्णपुऱ्यापर्यंत आलेल्या मुख्य जलवाहिनीच्या वेगवेगळ्या प्रेशरमध्येही नवीन जलवाहिनीतील पाणी कुठल्याही अडथळ्याशिवाय येते की नाही, यासाठी किमान काही दिवस चाचपणी करावी लागणार असल्याचेही अधिकाऱ्यांकडून सांगण्यात आले.

म. टा. प्रतिनिधी, औरंगाबाद

नेहरू पुतळ्याजवळ उधळलेल्या दोन बैलांच्या धडकेत छावणी परिषदेची चतुर्थ श्रेणी महिला कर्मचारी गंभीर जखमी झाली. तिच्यावर अॅपेक्स रुग्णालयात उपचार सुरू असून, तत्काळ शस्त्रक्रिया करण्यात आली आहे. पन्नाशीतील रुक्मिणीबाई या नेहरू पुतळ्याजवळ काम करीत होत्या. तेवढ्यात दोन बैल आपापसात भांडण करीत असताना उधळले आणि मागून येऊन रुक्मिणीबाईंना धडकले. यात त्या गंभीर जखमी झाल्या. त्यांना अॅपेक्समध्ये दाखल करण्यात येऊन त्यांच्यावर तातडीने शस्त्रक्रिया करण्यात आली असून, सध्या त्यांची प्रकृती स्थिर आहे. त्यांना छावणी परिषदेच्या वतीने दीड लाखांचा आपत्कालीन निधी तत्काळ देण्यात आल्याचे परिषदेचे उपाध्यक्ष प्रशांत तारगे म्हणाले.

म. टा. प्रतिनिधी, औरंगाबाद

शिल्पनगरीतील रहिवासी सीए महेश अग्रवाल यांचे घर फोडून मंगळवारी (२५ सप्टेंबर) भरदुपारी चोरी करण्यात आली. चोरट्यांनी त्यांच्या घरातील कपाटातून सात लाख रुपयांचे दागिने व २२ हजार रुपयांची रोख रक्कम पळविली. या घटनेचा गुन्हा वेदांतनगर पोलिस ठाण्यात नोंदविण्यात आला आहे.

शिल्पनगरीत महेश अग्रवाल यांचे घर आहे. ते दुसऱ्या मजल्यावरच्या फ्लॅटमध्ये राहतात. मंगळवारी ते व त्यांची पत्नी दोघेही कामाच्या निमित्ताने घराबाहेर गेले होते. याच दरम्यान चोरट्यांनी डाव साधला. घराचे कुलूप तोडून ते घरात घुसले. बेडरूममधील कपाट उघडून त्यातील सोन्याचे दागिने व रोख रक्कम पळवली. अग्रवाल दांपत्य दुपारी घरी आल्यानंतर चोरी झाल्याचे त्यांच्या लक्षात आले. त्यांनी लगेच वेदांतनगर पोलिस ठाण्यात तक्रार दिली. पोलिस निरीक्षक अनिल आडे, गुन्हे शाखेचे सहाय्यक पोलिस निरीक्षक राहुल सूर्यतळे यांच्यासह अन्य पोलिस कर्मचारी घटनास्थळी दाखल झाले. त्यांनी पाहणी केली. पोलिस चोराचा शोध घेत आहेत.

म. टा. प्रतिनिधी, औरंगाबाद

'महापालिकेत काम घेवून येणाऱ्या सामान्य माणसांची संख्या फार कमी आहे. दलालच जास्त संख्येने येतात,' असे म्हणत महापालिका आयुक्त डॉ. निपुण विनायक यांनी अक्षरश: बाँबगोळा टाकला आहे. त्यांच्या या विधानामुळे दलाल आणि दलालांचे पोशिंदे यांचे पितळ उघडे पडल्याचे मानले जात आहे.

डॉ. विनायक यांनी श्रीमंत छत्रपती शिवाजी महाराज पुराणवस्तू संग्रहालयाच्या परिसरात पत्रकारांशी विविध विषयांवर संवाद साधला. यावेळी पत्रकारांनी त्यांना तुम्ही पालिकेत येत नाही, कार्यालयात बसत नाही. त्यामुळे नागरिकांची गैरसोय होते. नगरसेवकांना धावपळ करावी लागते असे निदर्शनास आणून दिले आणि पालिका मुख्यालयातील कार्यालयात न बसण्याचे कारण विचारले. यावर मत व्यक्त करताना ते म्हणाले, 'पालिकेत काम घेवून किंवा समस्या घेवून येणाऱ्या सामान्य नागरिकांची संख्या फार कमी आहे. त्याउलट दलालांची संख्या जास्त आहे. दलाल येतात आणि भेटतात. त्यामुळे मी कार्यालयात येत नाही. लोकांची कामे असतात, ती मी करतो. मी स्वत:च लोकांना भेटण्यासाठी वॉर्डा वॉर्डांमध्ये जातो. लोकांमध्ये मिसळतो, त्यांच्या समस्या जाणून घेतो. कचराकोंडी, पाण्याची समस्या, रस्त्यांची कामे यात आतापर्यंत मी गुरफटून गेलो होतो. आता एक एक प्रश्न सुटू लागला आहे. त्यामुळे कार्यालयात यायला वेळ मिळेल,' असे मत त्यांनी व्यक्त केले.

वैजापूर: प्रहार जनशक्ती पक्षातर्फे वैजापूर येथे कार्यकर्त्यांचा मेळावा घेण्यात आला. या मेळाव्यात प्रहार जनशक्ती पक्ष आगामी विधानसभेची निवडणूक लढवणार असल्याची घोषणा पक्षाचे जिल्हाप्रमुख संजय चव्हाण यांनी केली. या कार्यक्रमाला विनायकराव पाटील महाविद्यालयाच्या स्थानिक नियामक मंडळाचे माजी अध्यक्ष विश्वास पाटील यांची प्रमुख उपस्थिती होती. शेतकऱ्यांना न्याय देण्यासाठी प्रहारच्या पाठिशी उभे राहू, असे आश्वासन विश्वास पाटील यांनी कार्यकर्त्यांना मार्गदर्शन करतांना दिले. मेळाव्याचे आयोजक व प्रहारचे तालुकाप्रमुख ज्ञानेश्वर घोडके, गणेश सावंत यांनी प्रमुख पाहुण्यांचे स्वागत केले. याप्रसंगी सुधाकर शिंदे, शिवाजी गाढे, कुणाल राऊत, लक्ष्मी देशमुख, देवदत्त साळवे, संतोष धाडगे, अमोल फरताळे, हरिभाऊ महाजन, सुनील झिंझुर्डे, शकिल अत्तार, समता परिषदेचे बाळासाहेब शिंदे, पुंडलिक गायकवाड आदींसह कार्यकर्ते उपस्थित होते.

म. टा. प्रतिनिधी, औरंगाबाद

'मराठवाड्यामध्ये ऐन पावसाळ्यात पावणे दोनशे टँकर सुरू असून दुष्काळाचे सावट आहे. परतीचा पाऊस पडणार नाही, असे सांगण्यात आले आहे. औरंगाबादला मंत्रीमंडळाची बैठक घेणे सरकारचे काम नाही काय? असा सवाल करत मराठवाड्यात ताबडतोब दुष्काळ जाहीर करावा', अशी मागणी राष्ट्रवादीचे नेते अजित पवार यांनी केली. औरंगाबाद येथे बुधवारी (२६ सप्टेंबर) झालेल्या राष्ट्रवादी युवक बुथ कमिटी विभागीय सक्षमीकरण संकल्प मेळाव्यात ते बोलत होते.

यावेळी ते म्हणाले की, 'मुख्यमंत्री विलासराव देशमुख असताना आम्ही अनेकदा मराठवाड्याच्या प्रश्नासाठी औरंगाबाद येथे मंत्रीमंडळाची बैठका घेतल्या. मंत्रीमंडळाने त्या-त्या भागात जाऊन तेथील आमदार, खासदार, जिल्हा परिषद पदाधिकारी आदी लोकप्रतिनिधींसोबत बोलले तर प्रश्न समजतात, मंत्रीमंडळाची बैठक घेणे सरकारचे काम नाही काय? आज जायकवाडी, मांजरा, माजलगाव, निम्न तेरणा, सीना कोळेगाव धरणाची अवस्था, परिस्थिती पाहिली आहे काय? असा प्रश्न करत सरकारने कर्जमाफीची केलेली घोषणा केवळ घोषणाच आहे. अत्यल्प पावसामुळे मराठवाड्यातील अनेक पिके गेली असून सरकार पीक विम्याबाबतही काहीच बोलत नसल्याचे त्यांनी सांगितले.

मुख्यमंत्री पेट्रोलचे दर कमी का करत नाही?

देशभरात पेट्रोलचे दर गगनाला भिडलेले आहेत, सर्वात महाग पेट्रोल महाराष्ट्रात विक्री होते. शेजारील कर्नाटक राज्याने पेट्रोलचे दर कमी करण्याचा निर्णय घेतला, मग राज्याचे मुख्यमंत्री पेट्रोल दर का कमी करत नाहीत. यासाठी सर्वसामान्यांनी त्यांना निवडून दिले काय, असा सवाल पवार यांनी करत निवडणुकीच्या कालावधीत सरकार पेट्रोल स्वस्त करू शकते, असेही त्यांनी सांगितले.

मराठवाड्याची स्थिती

टँकरसंख्या - १७६ (औरंगाबाद - १५५, जालना - २१)

विभागाचा सरासरी पाऊस - ७७९ मिमी

आतापर्यंतचा पाऊस - ४९४.६ मिमी

अपेक्षित सरासरीच्या तुलनेत - ७२.१० टक्के

वार्षिक सरासरीच्या तुलनेत - ६३.४२ टक्के

म. टा. प्रतिनिधी, औरंगाबाद

खासगी बसमधून ढकलून गंभीर मारहाण केल्यानंतर ३२ वर्षीय तरुणाचा मृत्यू झाल्याप्रकरणात संशयित आरोपी भानुदास सीताराम लोखंडे याला मंगळवारी (२५ सप्टेंबर) अटक करण्यात आली. त्याला बुधवारी कोर्टात हजर करण्यात आले असता, शनिवारपर्यंत (२९ सप्टेंबर) पोलिस कोठडीत ठेवण्याचे आदेश प्रथम वर्ग न्यायदंडाधिकारी गजला अल अमोदी यांनी दिले.

याप्रकरणी मृत शेख ताहेर शेख कादर (वय ३२, रा. अंगुरी बाग, मोतीकारंजा) याचा भाऊ शेख करीम शेख कादर (वय २२, रा. अंगुरी बाग) याने फिर्याद दिली होती. त्यानुसार, २७ ऑगस्ट रोजी भाऊ अंगुरी बाग परिसरातील शनी मंदिराजवळ रस्त्यावर बेशुद्ध पडल्याचे फोनवर कळवले होते. फिर्यादीने तिथे धाव घेतली, त्याचा दुसरा भाऊ शेख रहेमान यांनी शेख ताहेरला घाटीत दाखल केले. त्याला डॉक्टरांनी तपासून मृत घोषित केले. मृताच्या शरिरावर मारहाणीच्या खुणा होत्या व शवविच्छेदन अहवालातही फुफ्फुसाला जखम झाल्यामुळे मृत्यू झाल्याचे नमूद करण्यात आले. तसेच सीसीटीव्ही फुटेजमध्येही बसमधून ढकलल्याचे व मृताला लोखंडे याने मारहाण केल्याचे दिसून आले. याप्रकरणात भादंवि ३०२ कलमान्वये सिटी चौक पोलिस ठाण्यात गुन्हा दाखल करण्यात आला होता. दरम्यान, अटकपूर्व जामीन अर्ज जिल्हा कोर्टाने फेटाळल्यानंतर लोखंडेला मंगळवारी अटक करण्यात आली. गुन्हा गंभीर स्वरुपाचा असून, कोणत्या कारणासाठी गुन्हा केला, कोणी साथीदार आहेत का, याचा तपास करून आरोपीचे कपडे व दुचाकी जप्त करायची आहे. त्याचवेळी आरोपीच्या रक्ताचे नमुने घ्यावयाचे असल्याने पोलिस कोठडी देण्याची विनंती सहाय्यक सरकारी वकील एस. आर. ढोकरट यांनी केली.

म. टा. प्रतिनिधी, औरंगाबाद

भरधाव टिप्पर चालवत दुचाकीला धडक देऊन दुचाकीवर मागे बसलेल्या महिलेच्या मृत्युस कारणीभूत ठरलेला आरोपी टिप्परचालक गणेश तुकाराम देवकर याला तीन महिने कारावास व दोन हजार रुपये दंडाची शिक्षा प्रथम वर्ग न्यायदंडाधिकारी आर. ए. ए. खतीब यांनी ठोठावली. तसेच दंडाच्या रकमेपैकी एक हजार रुपये मृत महिलेच्या पतीला नुकसान भरपाई म्हणून देण्याचे आदेशही कोर्टाने दिले.

या प्रकरणात बाबुराव रामचंद्र क्षीरसागर (वय ५०, रा. गारखेडा, औरंगाबाद) यांनी फिर्याद दिली होती. फिर्यादीनुसार, १९ डिसेंबर २०१३ रोजी दुपारी ते पत्नी शकुंतलाबाई यांच्यासोबत दुचाकीवर शिवाजीनगर येथील एका रुग्णालयात नातेवाईकांना भेटण्यासाठी जात होते. त्यावेळी शिवाजीनगर परिसरातील सुतगिरणीकडून चौकाकडे येणाऱ्या भरधाव टिप्परने पाठीमागून दुचाकीला जोराची धडक दिली. या अपघातात दुचाकीवरील शकुंतलाबाई खाली पडल्या व त्याचवेळी टिप्पर त्यांच्या अंगावरुन गेला. अपघातात शकुंतलाबाई गंभीर जखमी झाल्या. त्यांना उपचारासाठी खासगी रुग्णालयात दाखल केले असता उपचारादरम्यान त्यांचा मृत्यू झाला. या प्रकरणी टिप्परचालक गणेश तुकाराम देवकर (वय ३३, रा. निपाणी, ता. जि. औरंगाबाद) याच्याविरुद्ध जवाहरनगर पोलिस ठाण्यात भादंवि २७७, ३०४, ३३७, ३३८ कलमान्वये गुन्हा दाखल करण्यात आला. खटल्यावेळी सहाय्यक सराकरी वकील सूर्यकांत सोनटक्के यांनी सहा साक्षीदारांचे जबाब नोंदविले. दोन्ही बाजुंच्या युक्तिवादानंतर व साक्ष-पुराव्यांवरुन कोर्टाने आरोपी गणेश देवकरला भादंवि ३०४ (अ) कलमान्वये तीन महिने कारावास व एक हजार रुपये दंड तसेच भादंवि २७९ कलमान्वये तीन महिने कारावास व एक हजार रुपये दंडाची शिक्षा ठोठावली. या प्रकरणात पैरवी अधिकारी म्हणून संजय भैरव व जयंत दीक्षित यांनी काम पाहिले.

म. टा. प्रतिनिधी, औरंगाबाद

'परीक्षेचे गुण तुमचे आयुष्य ठरवत नाही. तुमचे आयुष्य तुम्ही ठरवता. सुवर्णपदक मिळाल्याने कुणाचे दोन वर्षे आयुष्य वाढले नाही. एखाद्या परीक्षेत अपयश आल्यानंतर आत्महत्येचा विचार कशासाठी करता? युवा मित्रांनी आपल्यातील क्षमता ओळखून कष्टपूर्वक जीवन सुंदर करावे' असे प्रतिपादन अभिनेता सुबोध भावे यांनी केले. युवा महोत्सवाचे उदघाटन केल्यानंतर ते बोलत होते.

डॉ. बाबासाहेब आंबेडकर मराठवाडा विद्यापीठाचा युवा महोत्सव बुधवारी सुरू झाला. 'सृजनरंग' मंचावर सकाळी साडेअकरा वाजता अभिनेता सुबोध भावे यांनी महोत्सवाचे उद्घाटन केले. यावेळी मंचावर कुलगुरू डॉ. बी. ए. चोपडे, प्र-कुलगुरु डॉ. अशोक तेजनकर, परीक्षा विभाग संचालक डॉ. जयश्री सूर्यवंशी, अभिनेते उमेश जगताप, विद्यार्थी विकास मंडळाचे संचालक डॉ. मुस्तजीब खान, नलिनी चोपडे, प्रा. योगिता तौर, डॉ. सुधाकर शेंडगे, डॉ. दासू वैद्य, डॉ. लक्ष्मीकांत शिंदे, डॉ. जयंत शेवतेकर, डॉ. वाल्मिक सरवदे, डॉ. संभाजी भोसले, डॉ. संजय नवले, डॉ. फुलचंद सलामपुरे, डॉ. शिरीष अंबेकर, डॉ. संजय पाटील व डॉ. शंकर अंभोरे यांची प्रमुख उपस्थिती होती. युवा महोत्सवात सहभागी झालेल्या विद्यार्थ्यांचा उत्साह पाहून सुबोध यांनी आयुष्याकडे पाहण्याचा दृष्टिकोन सांगितला. 'शिक्षण घेऊन जीवनात पुढे जाण्यासाठी तुम्ही विद्यापीठात, कॉलेजात आले आहात. या स्वप्नांचा काही भाग कुटुंबिय व मित्र असतात. पदवी मिळवून शिक्षण पूर्ण होत असले तरी अनौपचारिक शिक्षणच तुम्हाला माणूस म्हणून घडवते. महापुरुषांचे विचार आणि समाज तुम्हाला घडवतो. तरीसुद्धा दहावी-बारावीत नापास झाल्यानंतर मुलं आत्महत्या करतात याचे दु:ख वाटते. स्पर्धेच्या ओझ्याखाली आनंद घेणे आपण विसरलो. मी बारावी नापास झाल्यानंतर आइस्क्रिमची पार्टी दिली होती. प्रत्येकवेळी यशस्वी होण्यापेक्षा कधी-कधी अयशस्वी होणेसुद्धा एक शिक्षण असते. हल्ली महागायक, महानायक, महानेता होण्याच्या नादात सर्वसामान्यपण हरवून गेले आहे. आपण अपयश साजरे करणे विसरलो. स्पर्धेत निर्मितीचा आनंद विसरलो. जगणे म्हणजे कष्ट असून शेवटपर्यंत कष्ट संपत नाहीत. आपल्या आवडत्या क्षेत्रात काम करा' असे भावे म्हणाले.

अभिनेते उमेश जगताप यांनी आपला कला प्रवास मांडला. 'युवा महोत्सवात स्पर्धक म्हणून येत होतो. या चार वर्षांनी खूप काही शिकवले. जगभर इंग्रजी नाटक सादर करण्याची प्रेरणा महोत्सवात मिळाली. कष्ट केल्यास पैसा-प्रसिद्धी मिळते. पण, यशाला शॉर्टकट नसतो हे ध्यानात ठेवले पाहिजे. महोत्सवाच्या निकालाचा विचार न करता कार्यरत रहा' असे जगताप म्हणाले. युवा महोत्सवात वैयक्तिक सादरीकरण उत्तम केलेले १०० कलाकार निवडले जाणार आहेत. यातील ४० कलाकारांना इंद्रधनुष्य व विभागीय महोत्सवात संधी मिळेल' असे डॉ. अशोक तेजनकर यांनी सांगितले. डॉ. मुस्तजिब खान यांनी प्रास्ताविक केले. या कार्यक्रमाला विद्यार्थी, प्राध्यापक आणि कर्मचारी उपस्थित होते.

----मराठी माणूस कोण ?

'मराठी माणूस कसा ओळखावा याचे साधे निकष आहेत. इंग्रजी आणि मराठी भाषेत कसं बोलता येणार नाही याची चिंता करतो तो मराठी माणूस. जो मराठी असूनही मराठी माणसाशी मराठीत बोलत नाही तो मराठी माणूस असतो' असे सुबोध भावे यांनी म्हणताच हशा झाला. देशात मराठी माणसाचे मोठे योगदान आहे. स्वातंत्र्याची उब मनात निर्माण करणारे छत्रपती शिवाजी महाराज, देशाची राज्यघटना लिहिणारे डॉ. बाबासाहेब आंबेडकर, स्वातंत्र्य चळवळीचा पाया घालणारे लोकमान्य टिळक, चित्रपटाची मुहूर्तमेढ रोवणारे दादासाहेब फाळके, मुलींसाठी पहिली शाळा सुरू करणारे महात्मा फुले, सावित्रीबाई फुले, पहिली सर्कस सुरू करणारे विष्णूपंत छत्रे अशा व्यक्तींचे कर्तृत्व पाहिले की नतमस्तक व्हावे. म्हणून मराठी भाषेचा न्यूनगंड बाळगू नका' असे भावे म्हणाले.

आजचे सादरीकरण (२७ सप्टेंबर)

स्टेज क्रमांक १ (सृजनरंग)

सकाळी ९. ३० - समूह गायन भारतीय

दुपारी दोन - लावणी

स्टेज क्रमांक २ (लोकरंग)

सकाळी ९.३० - वासुदेव

दुपारी दोन - भारूड

स्टेज क्रमांक ३ (नाट्यरंग)

सकाळी ९. ३० - मूकाभिनय

दुपारी दोन - एकांकिका

स्टेज क्रमांक ४ (नादरंग)

सकाळी ९.३० - शास्त्रीय गायन

दुपारी दोन - शास्त्रीय सुरवाद्य

स्टेज क्रमांक ५ - (नटरंग)

सकाळी ९.३० - मिमिक्री

दुपारी दोन - लोकनाट्य

स्टेज क्रमांक ६ (शब्दरंग)

सकाळी ९.३० - वादविवाद

स्टेज क्रमांक ७ (ललितरंग)

सकाळी ९.३० - कोलाज

दुपारी १२ - स्पॉट फोटोग्राफी

दुपारी २.३० - मृदमुर्तीकला

सायंकाळी पाच - लघुपट

---युवा महोत्सव

महाविद्यालये - २२८

कलावंत - २५००

परीक्षक - ६५

कला प्रकार - ३६

रंगमंच - ०७

म. टा. प्रतिनिधी, औरंगाबाद

देशाला भेडसावत असलेल्या आरक्षण, शेतमालाचे भाव, सामाजिक तेढ, पर्यावरण, मनुस्मृतीचे उदात्तीकरण अशा ज्वलंत विषयांचे प्रतिबिंब युवा महोत्सवात उमटले. शोभायात्रेत आरक्षणाच्या मुद्यावरील सादरीकरण चर्चेचा विषय ठरले. माझी जात कोणती ? मला आरक्षण मिळेल का असे विचारणारा पिचलेला शेतकरी शोभायात्रेचे आकर्षण ठरला.

विद्यापीठाच्या युवा महोत्सवाची सुरुवात शोभायात्रेने झाली. वाय कॉर्नर ते मुख्य रंगमंचापर्यांत निघालेल्या शोभायात्रेत महाविद्यालयांनी वैविध्यपूर्ण सादरीकरण केले. मराठा, धनगर, मुस्लिम, लिंगायत, महिला आरक्षणाच्या ज्वलंत विषयावर भूम येथील शंकरराव पाटील महाविद्यालयाच्या संघाने देखावा सादर केला. प्रातिनिधीक शेतकरी 'माझी जात कोणती' असा विचारुन आरक्षणाची याचना करीत आहे. सर्वांना पेचात पाडणारा हा प्रश्न सुटणार कसा यावर चर्चा रंगली. देवगिरी महाविद्यालयाने संविधान यात्रा काढली. यावेळी विविध राज्याचे प्रतिनिधीत्व करीत कलाकारांनी एकतेचा संदेश दिला. शिरुर येथील कालिकादेवी महाविद्यालयाने पर्यावरणाचा विषय मांडला. 'व्यथा वेदनांचा महापूर' या विषयावर आधारीत पर्यावरणाची हानी केल्यास केरळसारखी पूरस्थिती उद्भवेल असा संदेश दिला गेला. वृक्षाच्या प्रतिकात्मक दृष्यातून कलाकारांनी सर्वांनाच अंतर्मुख केले. मनुस्मृती की संविधान या विषयावरही सादरीकरण झाले. लासूर येथील छत्रपती शाहू महाविद्यालयाने दुष्काळावर सादरीकरण केले. सामाजिक संदेश देणारे फलक हाती घेऊन विद्यार्थी कलाकारांनी जनजागृती केली. सजीव देखाव्यांना तेवढीच चांगली संगीत साथसंगत लाभली. टाळ, मृदंग, संबळ, तुणतुणे, हलगी आणि ढोल-ताशाच्या गजरात निघालेल्या मिरवणुकीला चांगला प्रतिसाद मिळाला. मात्र, दरवर्षीच्या तुलनेत शोभायात्रेत सहभागी झालेल्या महाविद्यालयांची संख्या अत्यल्प होती. केवळ १४ संघांनी सहभाग घेतल्यामुळे फक्त अर्ध्या तासात मिरवणूक संपली. शोभायात्रा काढण्याबाबत सुरुवातीपासून संयोजकांचा संभ्रम होता. महाविद्यालयांना शेवटपर्यंत कळवण्यात आले नाही. त्यामुळे भाग घेतला नसल्याचे संघप्रमुखांनी सांगितले.

जिकडे तिकडे कलाकारांचा मेळा

युवा महोत्सवात २२८ महाविद्यालयातील संघ सहभागी झाले आहेत. अडीच हजार कलाकार सादरीकरण करणार आहेत. महोत्सवाचा पहिलाच दिवस असल्यामुळे स्पर्धक कलाकार ठिकठिकाणी सराव करण्यात मग्न होते. एकांकिका, भारुड, लावणी, कव्वाली अशा कला प्रकारांचा रियाज रंगला होता. कॅम्पसमध्ये जागा मिळेल तिथे कलाकारांची तयारी सुरू होती. या तयारीमुळे सर्वत्र वाद्यांचा नाद घुमत होता. अवघे वातावरण सांस्कृतिक झाल्यामुळे विद्यापीठाचा नूर पालटला. संबळ, ताशा, ढोल, तुणतुणे, दिमडी, हलगी, चोंडके, पायपेटी, बासरी, ढोलकी या पारंपरिक वाद्यांना ऐकण्यासाठी विद्यार्थ्यांची गर्दी झाली.