वाळूज महानगर: बैलगाडी चोरांनी केलेल्या चाकू हल्ल्यात गंगापूर तालुक्यातील डोमेगाव येथील एक वृद्ध शेतकऱ्याचा मृत्यू झाला. त्यांच्यासोबत शेतात असलेला १३ वर्षांचा मुलगा गंभीर जखमी झाला आहे. ही घटना बुधवारी (२६ सप्टेंबर) सकाळी साडे दहाच्या सुमारास घडली. या घटनेतील मृताचे नाव दामोधर किसन महानोर (वय ६५ रा़ डोमेगाव), असे असून जखमी मुलाचे नाव दादाराव आण्णा महानोर, असे आहे. महानोर हे नेहमीप्रमाणे मलकापूर शिवारातील गट नंबर २१मधील शेतात गेले होते. तेथे सकाळी साडे दहाच्या सुमारास आलेल्या चार जणांनी त्यांची बैलगाडी व गाडीला बांधलेली गाय घेऊन पळून जाण्याचा प्रयत्न केला. त्यांना महानोर यांनी अडवले असता त्यांच्यावर हल्ला करून बैलगाडी घेऊन राजुरा गावाच्या दिशेने गेले. राजुरा येथे त्यांनी बैलगाडी घेऊन जाण्यासाठी चारचाकी वाहनाची चौकशी केली. त्यावेळी नागरिकाना बैलगाडीवरील नाव बघून संशय आला. त्यांनी पंढरीनाथ महानोर यांना फोनवरून ही माहिती दिली. चौकशी केली असता ही बैलगाडी त्यांचीच असल्याचे एकाने सांगितले़ मात्र, नागरिकांनी बैलगाडी घेऊन आलेल्या शंकर नंदू जगताप (वय २० रा. येसगाव ता़ गंगापूर) याला पकडून ठेवले. त्याच्याकडे चौकशी केली असता त्याने आणखी तीन साथीदारासह चोरीच्या उद्देशाने गेलो असता, महानोर व मुलाने विरोध केल्याने त्यांना बाजरीच्या पिकात नेऊन त्यांच्यावर चाकूने वार केल्याची माहिती दिली. किशोर धोंडिराम महानोर यांच्या तक्रारी वरून वाळूज पोलिस ठाण्यात गुन्हा दाखल करण्यात आला असून एकाला ताब्यात घेतले आहे. या प्रकरणी उपनिरीक्षक अमितकुमार बागुल हे तपास करत आहेत. मुलावर उपचार सुरू दामोधर महानोर व दादाराव महानोर यांना उपचारासाठी घाटी हॉस्पिटल मध्ये दाखल केले असता दामोधर याना डॉक्टरानी तपासून मृत घोषित केले. गंभीर जखमी दादाराव याला उपचारासाठी औरंगाबाद येथील खासगी हॉस्पिटलमध्ये दाखल केले आहे.
मोबाइल अॅप डाउनलोड करा आणि राहा अपडेट