म. टा. प्रतिनिधी, औरंगाबाद

भगव्या रंगाचे राजकारण करून तीन दशकांपासून महापालिकेत सत्ता उपभोगणाऱ्या शिवसेनेने सिटी बसच्या रंगातही राजकारणाचा शिरकाव केला आहे. त्यामुळे 'सिटी बसचा रंग भगवा ठेवा,' अशी सूचना महापौरांनी आयुक्तांना केली आहे.

स्मार्टसिटी प्रकल्पाच्या माध्यमातून पालिका क्षेत्रात सिटी बस सेवा सुरू करण्याचा निर्णय घेण्यात आला. पहिल्या टप्प्यात शंभर सिटी बसचा पुरवठा करण्यासाठी टाटा कंपनीला वर्कऑर्डर दिली. तीस, तीस आणि चाळीस अशा तीन टप्प्यांत कंपनी सिटी बस उपलब्ध करून देणार आहे. त्यापैकी पहिल्या टप्प्यातील तीस बस दिवाळीच्या सुमारास प्राप्त व्हाव्यात, असा प्रयत्न केला जात आहे. सिटी बसचा रंग कोणता असावा याची विचारणा स्मार्टसिटीच्या एसपीव्हीचे मुख्याधिकारी तथा महापालिकेचे आयुक्त डॉ. निपुण विनायक यांनी महापौर नंदकुमार घोडेले यांच्याकडे केली होती. दोन दिवसांत बसचा रंग कळवा असे त्यांनी महापौरांना सांगितले होते. याबाबत माहिती देताना महापौर म्हणाले, 'भगव्या रंगाच्या बस असाव्यात असे आयुक्तांना कळविले आहे. दिवाळीपर्यंत तीस बस मिळतील. पाडव्याला सिटी बससेवेचा शुभारंभ केला जाईल. ही सेवा चालविण्याबद्दल एसटी महामंडळाने तत्वत: मान्यता दिली आहे. आयुक्त आणि एसटी महामंडळाचे व्यवस्थापकीय संचालक यांच्यात याबद्दल चर्चा झाली आहे. परिवहन मंत्री दिवाकर रावते यांनी देखील यात लक्ष घालावे, अशी विनंती करणारे पत्र आपण रावते यांना लिहिले आहे. औरंगाबाद दौऱ्यावर आल्यानंतर या बद्दल चर्चा करू असे रावते म्हणाले आहेत,' असे महापौरांनी सांगितले.

\Bआयुक्त जाणार दिल्लीला

\B'स्मार्टसिटी प्रकल्पाचे मेंटॉर सुनील पोरवाल यांचा गंभीर अपघात झाला आह. शिवाय ते येत्या डिसेंबर महिन्यात सेवानिवृत्त देखील होणार आहेत. त्यामुळे त्यांच्या जागी नवीन मेंटॉरची नियुक्ती करा, असे पत्र मुख्यमंत्र्यांना पाठविले आहे. ग्रीनफिल्ड प्रकल्पाचा निधी स्मार्टसिटी प्रकल्पातील अन्य कामांसाठी वळविण्याचा प्रस्ताव केंद्र सरकारकडे पाठवला आहे. या संदर्भात स्मार्टसिटी प्रकल्पाचे केंद्र सरकारचे विशेष अधिकारी कुणालकुमार यांच्याशी चर्चा करण्यासाठी आयुक्त दिल्लीला जाणार आहेत,' अशी माहिती देखील घोडेले यांनी दिली.

\Bसंत तुकाराम नाट्यगृहाचे खासगीकरण

\B'सिडकोतील जगद्गुरू संत तुकाराम नाट्यगृहाचे खासगीकरण केले जाणार असून, त्याबद्दलची निविदा नुकतीच काढण्यात आली आहे. संत एकनाथ रंगमंदिराच्या नूतनीकरणाचे काम देखील सुरू करण्यात आले आहे. या रंगमंदिराच्या वातानुकूलीत यंत्रणेच्या कामाची निविदा अंतिम टप्प्यात आले,' असे महापौरांनी स्पष्ट केले.

म. टा. प्रतिनिधी, औरंगाबाद

'अनधिकृत बांधकाम अधिकृत करून घेण्यासाठी रजिस्ट्रीचे बंधन असणार नाही. बाँड पेपरवर झालेले व्यवहार ग्राह्य धरून बांधकामे अधिकृत केली जातील,' अशी माहिती बुधवारी महापौर नंदकुमार घोडेले यांनी दिली.

अनधिकृत बांधकामे अधिकृत करण्यासाठी पालिकेने शासनाच्या निर्देशानुसार काही अटी शिथिल करत अभय योजना जाहीर केली आहे. त्याला सर्वसाधारण सभेने देखील मान्यता दिली. शहरातील प्लॉटच्या खरेदी - विक्रीचे बहुतांश व्यवहार बाँड पेपरवर झाले आहेत. यात प्रामुख्याने गुंठेवारी वसाहतीत मालमत्तांच्या समावेश आहे. या मालमत्ता मोठ्या संख्येने अधिकृत व्हाव्यात व त्यातून पालिकेला महसूल मिळावा या उद्देशाने बांधकामे अधिकृत करण्यासाठी बाँड पेपर ग्राह्य धरा, असे निर्देश महापौरांनी नगररचना विभागाच्या अधिकाऱ्यांना दिले आहेत. 'दीडशे कोटींच्या रस्त्यांचे रेट अॅनॅलिसीस ( दर पृथकरण) संबंधित कंत्राटदारांकडून गुरुवारी सायंकाळपर्यंत प्राप्त होईल. त्यावर आयुक्त विचार करतील आणि रस्त्याच्या कामाच्या निविदा स्थायी समितीसमोर मंजुरीसाठी पाठवतील. या मंजुरीनंतर कंत्राटदारांना वर्कऑर्डर देवून रस्त्यांची कामे सुरू केली जातील,' असे घोडेले यांनी स्पष्ट केले.

म. टा. विशेष प्रतिनिधी, औरंगाबाद

औरंगाबाद शहरातील पथदिव्यांभोवतीचे बेकायदा टाकण्यात आलेले वायरचे जाळे काढून टाकण्याचे आदेश मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे व न्या. मनीष पितळे यांनी महापालिकेला दिले आहेत.

शहरातील पथदिव्यांभोवती बेकायदा वायरचे जाळे पसरलेले असून त्यामुळे अपघात, जीविताला धोका पोहोचत असल्याने त्यावर कारवाई करावी, अशा विनंती करणारी याचिका मुकेश राजेश भट यांनी केली आहे. खंडपीठाने पालिकेला दोन आठवड्याच्या आत त्या वायर काढून टाकण्याचे गुरुवारी आदेश दिले. वेळप्रसंगी पोलिसांची मदत घ्या, आणि त्याचा अहवाला खंडपीठात सादर करा, असे आदेशात नमूद केले. शहरात ४० ते ५० हजार पथदिवे आहेत. सर्व पथदिवे पालिकेची मालमत्ता आहे. त्याच्या देखभालीची जबाबदारीही पालिकेचीच आहे. या पथदिव्यांभोवती खासगी केबल चालक, इंटरनेट चालकांचे वायर लटकतात. जालना, जळगाव, रेल्वेस्टेशन रोडवर अनेक ठिकाणी पथदिव्यांभोवती खासगी वायरचे जाळे लटकलेले दिसते आहे. भट यांनी वायरचे जाळे काढण्यासंदर्भात पालिकेकडे अर्ज केला होता. मात्र, त्या अर्जास काहीच प्रतिसाद दिला नाही म्हणून त्यांनी खंडपीठात धाव घेतली. या याचिकेवर सुनावणी झाली असता दोन आठवड्याच्या आत पथदिव्यांवर लटकत असलेली वायरी काढून टाकाव्यात, असे आदेश दिले. याचिकाकर्त्यांची बाजू सचिन हिंगे हे मांडत आहेत.

\Bएकाचा चिरला गेला होता गळा \B

लटकणाऱ्या वायरमध्ये अडकून २३ सप्टेंबर २०१७ रोजी महावीर चौक ते सिद्धार्थ उद्यानाच्या दिशेने जाणाऱ्या रस्त्यावरून जाताना दोघे पडले. त्यातील एकाचा गळा गंभीररित्या चिरला गेला. अशी घटना घडण्याची शक्यता ओळखून मुकेश राजेश भट यांनी २८ सप्टेंबर रोजीच पालिकेकडे अर्ज दाखल करून वायरच्या जाळ्याकडे लक्ष वेधले होते. सोबत काही छायाचित्रेही सादर केली होती.

म. टा. प्रतिनिधी, औरंगाबाद

गेल्या १५ दिवसांपासून शहरात सुरू असलेल्या इलेक्ट्रॉनिक वोटिंग मशीनच्या (ईव्हीएम) पहिल्या तपासणीत तब्बल १३९ कंट्रोल युनिट (सीयू), तर ५० बॅलेट युनिट (बीयू) नादुरुस्त निघाले आहेत. आता ही यंत्रे भारत इलेक्ट्रिकल्स कंपनीला परत पाठवून नवीन यंत्रे मागविण्यात येणार आहेत, अशी माहिती उपजिल्हाधिकारी प्रशांत शेळके यांनी दिली. कला महाविद्यालयात १२ सप्टेंबरपासून सुरू झालेली पहिली तपासणी गुरुवारी (२७ सप्टेंबर) पूर्ण झाली.

देशभरात इव्हीएम मशीनविरोधात राजकीय पक्षांचा गदारोळ सुरू आहे. पूर्वीप्रमाणेच मतपत्रिकेवर मतदान घ्या, अशी मागणी होत असल्याने जिल्हाधिकारी कार्यालयामध्ये प्रमुख पक्षांच्या प्रतिनिधींसमोर मतदानयंत्रांची तपासणी करण्यात आली. यासाठी औरंगाबादला प्राप्त झालेल्या तीन हजार ३३९ कंट्रोल युनिट पैकी १३९ मशीन नादुरुस्त आढळल्या. बटन न दबणे, डिस्‍प्ले बंद असणे, चुकीची तारीख दाखवणे, अशा अडचणी अभियंत्यांच्या निदर्शनास आल्या. दुसरीकडे पाच हजार ५३२ बॅलेट युनिट पैकी ५० मशीन नादुरुस्त आढळल्या. नादुरुस्त सीयू व बीयू बंगळुरू येथील भारत इलेक्ट्रिकल्स कंपनीला पाठवण्यात येणार आहेत. त्या बदल्यात औरंगाबादला नवीन मशीन मिळणार आहेत.

तपासणीच्या पहिल्या दिवशी उपस्थित असलेल्या काँग्रेस, शिवसेना, 'एमआयएम'च्या प्रतिनिधींनी इव्हीएम वापराबाबत प्रश्नचिन्ह निर्माण करत विरोध दर्शवला होता. इव्हीएम ऐवजी पूर्वीप्रमाणे मतपत्रिकेवरच मतदान घ्यावे, असे मत व्यक्त केले गेले. औरंगाबाद जिल्ह्यात मतदान केंद्रानुसार आवश्यक मतदान यंत्रापैकी २५ टक्के अधिक मतदान यंत्रे उपलब्‍ध आहेत. यापैकी पाच टक्के मतदानयंत्र जनजागृतीसाठी जिल्ह्यात पाठविण्यात येणार आहेत.

\B'व्हीव्हीपॅट' लवकरच येणार\B

आगामी निवडणुकांमध्ये व्होटर व्हेरिफियेबल पेपर ऑडिट ट्रेल प्रणालीचा ((व्हीव्हीपॅट, मतदान चिठ्ठी) वापर करण्यात येणार आहे. यापूर्वी शहरात याचा वापर प्रायोगिक तत्वावर करण्यात आला होता. या माध्यमातून पसंतीच्याच उमेदवाराला मत दिल्याची खात्री स्क्रीनवर बघून करता येते. या शिवाय छापील पावती प्रिंटरला जोडलेल्या सिलबंद बॉक्समध्ये आपोआपच जमा होते. येत्या काही दिवसात जिल्ह्यासाठी 'व्हीव्हीपॅट' मशीन प्राप्त होणार आहे. त्यानंतर या प्रणालीची पहिली तपासणी करण्यात येणार आहे. ते करताना पुन्हा एकदा बॅलेट युनिट आणि कंट्रोल युनिटची एकत्र तपासणी होणार असल्याची माहितीही निवडणूक विभागाचे उपजिल्हाधिकारी प्रशांत शेळके यांनी दिली.

म. टा. प्रतिनिधी, औरंगाबाद

ऐच्छिक रक्तदान दिनानिमित शासकीय वैद्यकीय महाविद्यालय व रुग्णालयाच्या (घाटी) विभागीय रक्तपेढीतर्फे एक ऑक्टोबर ते १६ ऑक्टोबरपर्यंत रक्तदान शिबिरांसह विविध उपक्रमांचे आयोजन करण्यात आले आहे. या उपक्रमांमध्ये 'हॅपिनेस इज डोनेटिंग ब्लड' या घोषवाक्यावर भर देण्यात येणार आहे.

रक्तदान दिनानिमित्त सोमवारी वाळूज येथील आयसीईईएम इंजिनीअरिंग कॉलेज व विद्यापीठ, दोन ऑक्टोबर रोजी वैजापूर व मुकुंदवाडी, तीन, चार, सहा, नऊ व १२ ऑक्टोबर रोजी शहरात रक्तदान शिबिर होणार आहे. पाच ऑक्टोबरला सकाळी क्रांतीचौक ते पैठण गेटमार्गे औरंगपुरा येथे रॅलीचे आयोजन केले आहे. आठ ऑक्टोबरला सकाळी दहाला घाटीच्या बाह्यरुग्ण विभागात रांगोळी स्पर्धा, पोस्टर प्रदर्शन भरविण्यात येणार आहे. दहा ऑक्टोबरला खांडेवाडी येथे बडवे इंजिनिअरिंग कंपनीत रक्तदान शिबिर होणार आहे. एक ते १५ ऑक्टोबरदरम्यान विविध महाविद्यालयांत तज्ज्ञांची व्याख्याने व रक्तदान शिबिरे होतील. १६ ऑक्टोबरला रक्तदान शिबिर संयोजकांचा मेळावा व सत्कार होणार असल्याचे पॅथॉलॉजी विभागप्रमुख डॉ. राजन बिंदू, वैद्यकीय अधीक्षक डॉ. भारत सोनवणे, सहयोगी प्राध्यापक डॉ. अनिल जोशी यांनी गुरुवारी पत्रकार परिषदेत सांगितले. या वेळी रक्तपेढीचे डॉ. सुरेश गवई, डॉ. शुभज्योती पोळे यांची उपस्थिती होती.

म. टा. प्रतिनिधी, औरंगाबाद

ज्ञानरचनावादाची पायाभरणी करणाऱ्या वाई येथील भारत विद्यालयाच्या अभ्यास दौऱ्यासाठी जिल्हा परिषदेच्या माध्यमिक शिक्षकांसह अधिकाऱ्यांचे पथक गुरुवारी रवाना झाले, अशी माहिती प्राथमिक विभागाचे शिक्षणाधिकारी सूरजप्रसाद जयस्वाल यांनी दिली.

मुख्य कार्यकारी अधिकारी पवनीत कौर यांच्या मार्गदर्शनाखाली दौऱ्याचे आयोजन करण्यात आले आहे. या पथकात माध्यमिक शाळेतील ४०, खासगी शाळ‌ेचे चार, तसेच प्राथमिक शाळेतील तीन शिक्षकांसह चार अधिकाऱ्यांचा समावेश आहे. औरंगाबाद जिल्ह्यातील माध्यमिक शिक्षकांना ही अनुभूती मिळावी. हे परिणामकारक तंत्र समजून आपल्याकडे अंमलबजावणी सुकर व्हावी, यासाठीच या दौऱ्याचे आयोजन केले आहे. दौऱ्यांचा खर्च शिक्षकांनी स्वत: उचलला आहे. पथकात जयस्वाल, शिक्षणाधिकारी राकेश साळुंके ,विस्तार अधिकारी राजेंद्र महाजन, रमेश ठाकूर आणि माध्यमिक शिक्षक गणेश राठोड, नीलकंठ लोसरवाड, अनिल देशमुख,अमरसिंग चंदेल आदींचा समावेश आहे. महाराष्ट्रात सर्वप्रथम भारत विद्यालयाचने ज्ञानरचनावादी शिक्षणाचा प्रारंभ केला. प्रगत शैक्षणिक महाराष्ट्रासाठी कुमठे बीट पूर्वी हा प्रयोग याच शाळेत अभूतपूर्व यशस्वी झाला आहे, अशी माहिती जयस्वाल यांनी दिली. सध्या या शाळेत माध्यमिकचे वर्ग ज्ञानरचनावादी शिक्षण घेत आहेत, महाराष्ट्रात पूर्णतः या तंत्राने शिक्षण देणारी दुसरी माध्यमिक शाळा नाही.

म. टा. प्रतिनिधी, औरंगाबाद

'देशाच्या तीन राष्ट्रपतीकडून पुरस्कार स्वीकारला. विदेशातील राष्ट्रपतींनीही सन्मान केला. ७५०पेक्षा अधिक पुरस्कार मिळाल्यानंतरही माझ्या मुलांसाठी मला आजही भीक मागावी लागते. वंचितांना, अनाथांना आश्रय देणारी माझी संस्था विनाअनुदानित आहे. सरकारला ही संस्था अनुदानित करण्याचे कधी वाटले नाही का? या आईचे काम सरकारला माहित नाही. सरकारने दिल्याशिवाय मी स्वत:हून अनुदान घेणार नाही,' असा निर्धार गुरुवारी सिंधुताई सपकाळ यांनी व्यक्त केला.

दृष्टी फाउंडेशनच्या वतीने आरफन फ्री इंडिया कार्यक्रमांतर्गत संस्थेच्या वतीने विशेष कार्यक्रमाचे आयोजन संत तुकाराम महाराज नाट्यगृहात केले होते. यावेळी उपायुक्त वर्षा ठाकूर यांच्यासह अन्य मान्यवरांची उपस्थिती होती. या कार्यक्रमात मान्यवरांच्या हस्ते समाजात लोकोपयोगी तसेच समाजिक कार्य करणाऱ्या संस्थेच्या प्रमुखांचाही सत्कार करण्यात आला. यावेळी सिंधुताई म्हणाल्या, 'औरंगाबादशी सिंधुताईचे नाते जुने आहे. १९७४साली औरंगाबादच्या रेल्वेस्टेशन येथूनच भीक मागण्याची सुरुवात केली. भुकेमूळे व्याकुळ होऊन आपण काम केले. दु:खाला शोधत शोधत अनाथांची आणि वंचितांची आई बनण्याचे सौभाग्य आपल्याला मिळाले. यावेळी मुलींना शिक्षण घेताना आपली संस्कृती, आपली परंपरा टिकवून शिक्षणात अग्रेसर होऊन पुढे जा. आधुनिकतेच्या वाऱ्यात वाहून आपले आयुष्य वाया घालू नका, असा सल्ला दिला. एकमेकाला सांभाळून, आधार देऊन काम करण्याबाबतही उपस्थितांना आवाहन केले.'

\Bआजही झोळी पसरावी लागते...

\Bसिंधुताई म्हणाल्या, 'अनाथांसाठी काम करणारी माझी संस्था आजही विनाअनुदानित आहे. मी माझ्या मुलांना कष्टांने मोठे केले आहे. आजही त्यांचे दु:ख पुसण्यासाठी मी गंभीरपणे काम करित आहे. मला आजही आमच्या मुलांसाठी झोळी पसरावी लागते. या संस्थेचे काम बघून शासनाला वाटले, तर त्यांनी अनुदान जाहीर करावे. मी अनुदान मागण्यासाठी शासनाकडे जाणार नाही.'

म. टा. विशेष प्रतिनिधी, औरंगाबाद

'शहरातील कचरा समस्या सोडविणे ही एकट्या महापालिकेची जबाबदारी नसून, नागरिकांचा यामध्ये सक्रिय सहभाग आवश्यक आहे. कचरा निर्मूलनासाठी कचरा वर्गीकरण हे नागरिकांनी करायला हवे. याबाबत पालिकेने रेडिओ, तसेच इतर माध्यमांतून जनजागृती करण्याची आवश्यकता आहे,' असे मत मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे आणि न्या. मनीष पितळे यांनी व्यक्त केले.

शहरातील कचऱ्यासंदर्भात दाखल याचिका तसेच अवमान याचिकेवरील सुनावणी करण्यात आली. कचऱ्याचे वर्गीकरण आणि प्रक्रिया या संदर्भात पालिकेने उभारलेल्या यंत्रणा, तेथील कामकाजाची पाहणी, मजुरांची संख्या, होणारे काम या संदर्भात देखरेख ठेवणाऱ्या समितीमध्ये याचिकाकाकर्त्याचाही समावेश करण्यात यावा. तसेच या संदर्भात तीन आठवड्यांत शपथपत्राच्या माध्यमातून अहवाल सादर करण्याचे निर्देश खंडपीठाने दिले. कचरा प्रक्रियेसाठी महापालिकेने निश्चित केलेल्या पडेगाव, हर्सूल, कांचनवाडी आणि चिकलठाणा येथे वर्गीकरण न करता कचरा टाकला जात आहे. या संदर्भात आणि विविध आक्षेप घेणाऱ्या याचिका तसेच मूळ अवमान याचिकेवर गुरुवारी सुनावणी घेण्यात आली. कचऱ्याचे वर्गीकरण न करता टाकला जात असल्याच्या आक्षेपावर खंडपीठाने, महाराष्ट्र प्रदूषण नियंत्रण मंडळाचे प्रादेशिक अधिकारी, विभागीय आयुक्त, महापालिका आयुक्त आणि घनकचरा व्यवस्थापन समितीचे प्रमुख यांच्या समितीमध्ये याचिकाकर्त्यांच्या समावेश करावा, त्यांनी कचरा प्रक्रिया केंद्रांच्या पाहणीवेळी या सदस्यांना बरोबर न्यावे, असे निर्देश खंडपीठाने दिले

कचरा निर्मूलनाअंतर्गत शंभर टक्के कचरा वर्गीकरण झाल्याशिवाय शासनाने दिलेल्या ९२ कोटी रुपयांचा वापर करता येणार नाही, असा शासन निर्णय असताना त्या निधीचाही वापर होतो आहे. तो थांबवावा अशी याचिकाकर्त्यांनी केलेली विनंतीही खंडपीठाने अमान्य केली. शहरातील कचरा प्रक्रियेसंदर्भात समितीने पाहणी करून १९ ऑक्टोबरपर्यंत वस्तुस्थिती निदर्शक अहवाल शपथपत्राद्वारे सादर करण्याचे आदेश खंडपीठाने दिले. या प्रकरणी याचिकाकर्त्यांतर्फे प्रज्ञा तळेकर, मूळ याचिकाकर्त्यातर्फे देवदत्त पालोदकर, महापालिकेतर्फे राजेंद्र देशमुख, तर प्रदूषण नियंत्रण मंडळातर्फे उत्तम बोंदर हे काम पाहत आहेत.

\Bलोकजागृती करावी \B

वर्गीकरण केल्याशिवाय पडेगाव येथे कचरा टाकण्यास मनाई करावी, या विनंतीवर खंडपीठाने आजघडीला अशी स्थगिती देता येणार नाही, असे स्पष्ट केले. विविध माध्यमातून लोकजागृती करावी, कचरा वर्गीकरणाबाबत नागरिकांपर्यंत माहिती पोहोचविण्यासाठी सेलिब्रिटींची मदत घ्यावी, पथनाट्याचाही उपयोग करता येऊ शकेल. उच्च न्यायालय खंडपीठ वकील संघानेही यात सहभागी व्हावे, अशी अपेक्षा खंडपीठाने व्यक्त केली.

म. टा. प्रतिनिधी, औरंगाबाद

सातारा परिसरात साठ खांबांवर विजेच्या तारा ओढण्यात आल्या असून नवरात्रोत्सवात या खांबांवर दिवे लागतील, असा दावा महापौर नंदकुमार घोडेले यांनी केला. सातारा व देवळाई भागात पथदिवे लावण्याची मागणी या भागातील नगरसेवकांसह नागरिकांची आहे. शहरात सुमारे दहा हजार वीज खांबांवर एलईडी दिवे बसविले जात आहेत.

वीज खांबांवरील जुन्या फिटिंग शहराच्या इतर भागात वापरण्याचा निर्णय यापूर्वीच झाला आहे. त्यानुसार सातारा व देवळाईत एक हजार फिटिंग लावण्यात येणार आहेत. त्यापैकी साठ खांबावर विजेच्या तारा ओढण्याचे काम झाले आहे. नवरात्रोत्सवापर्यंत शंभर खांबांवर तारा ओढण्याचे काम पूर्ण होईल आणि लगेच त्यावर पथदिवे लावण्यास सुरुवात केली जाईल, अशी माहिती महापौरांनी दिली.

\Bकंत्राटदारावर कारवाई करा \B

सातारा भागातील रेणुकामाता मंदिर ते चाटे स्कूल हा रस्ता बांधला जात आहे. हे अयोग्यरितीने होत असल्याची तक्रार अॅड. महेश कानडे यांनी पालिका आयुक्तांकडे केली आहे. 'हा रस्ता १८ फूट रुंद आणि सुमारे दोन किलोमीटर लांब आहे. मजबुतीकरण व डांबरीकरण करताना रस्ता दोन फूट खोदून त्यात दीड फूट मुरुम, एक फूट खडी, ऑल ग्रेड मटेरियल टाकणे गरजेचे आहे. त्यानंतर त्यावर सहा इंचाचे वेटमिक्स काँक्रिट करून नंतर सात इंचाचा डांबराचा थर देणे कंत्राटदाराला बंधनकारक आहे. या निकषानुसार केले जात नाही. त्यामुळे या कामाची चौकशी करून कंत्राटदार आणि संबंधित अधिकाऱ्यावर कारवाई करावी अशी मागणी तक्रारीत केली आहे.

म. टा. प्रतिनिधी, औरंगाबाद

जागतिक पर्यटन दिनानिमित्त 'एमटीडीसी'ने गुरुवारी विविध कार्यक्रम घेतले. विमानतळ, रेल्वेस्टेशन आणि बसस्थानकावर जावून एमटीडीसीच्या अधिकाऱ्यांनी पर्यटकांचे स्वागत केले. फ्रान्सच्या पर्यटकांनी खिर्डी येथील तरंगता गणपतीला भेट दिली.

'एमटीडीसी'च्या रिसॉर्टचे व्यवस्थापक विजय जाधव यांच्या नेतृत्वाखाली पर्यटकांच्या स्वागताचा कार्यक्रम पार पडला. यानिमित्त विमानतळावर सुमारे ७० पर्यटकांचे स्वागत करण्यात आले. त्यात जपानी पर्यटकांची संख्या जास्त होती. त्यानंतर डॉ. बाबासाहेब आंबेडकर मराठवाडा विद्यापीठाच्या पर्यटनशास्त्र विभागात परिसंवाद घेण्यात आला. दुपारी 'एमटीडीसी' कार्यालयातील कर्मचाऱ्यांची नेत्र तपासणी करण्यात आली.

खिर्डी येथील तरंगता गणपतीस जागतिक पर्यटन दिनाच्या निमित्ताने फ्रान्सच्या पर्यटकांनी खिर्डी येथील तरंगता गणपतीला भेट दिली. जॅक आणि जॅकलीन यांनी गणपतीचे दर्शन घेतले. कुलस्वामिनी प्रतिष्ठानचे अध्यक्ष विलास कोरडे, संदीप राठोड यांनी ही भेट घडवून आणली. देशमुख यांनी पाहुण्यांचे औक्षण केले. यावेळी सर्जेराव देशमुख, हिवरडे, प्रल्हाद गायकवाड यांच्यासह गावातील नागरिक उपस्थित होते. पर्यटकांनी खिर्डीच्या शाळेलाही भेट दिली.

म. टा. प्रतिनिधी, औरंगाबाद

पुणे येथील बँकेत मुलाला नोकरी मिळवून देण्याचे आमिष दाखवून विद्यापीठातील शिपायाकडून तब्बल पावणेपाच लाख रुपये उकळण्यात आले. हा प्रकार ऑगस्ट २०१६ पासून सुरू होता. या प्रकरणी बेगमपुरा पोलिस ठाण्यात डॉ. बाबासाहेब आंबेडकर मराठवाडा विद्यापीठाच्या निवृत्त लिपिकासह तिघांवर फसवणुकीचा गुन्हा दाखल करण्यात आला आहे.

याप्रकरणी रघु गंगाराम बारसकर (वय ५०, रा. विद्यापीठ परिसर) यांनी तक्रार दाखल केली आहे. बारसकर हे विद्यापीठात संशोधन केंद्रात शिपाई आहेत. ऑगस्ट २०१६ मध्ये बारसकर यांच्याकडे त्यांच्या ओळखीतील विद्यापीठाचे निवृत्त वरिष्ठ लिपिक मनोहर भिवाजी कांबळे व मिर्झा बरकत बेग हे भेटण्यासाठी आले होते. कांबळे यांनी तुमच्या मुलाला पुण्यामध्ये बँकेत नोकरी लावतो, त्यासाठी सहा लाख रुपये लागतील, असे आमिष दाखवले. बारसकर यांनी या प्रस्तावाला होकार दर्शविला. यानंतर बारसकर यांनी त्यांना कर्ज काढून सुमारे चार लाख सत्तर हजार रुपयांची रक्कम दिली. कांबळे यांनी काशीनाथ कचरू जाधव (रा. भावसिंगपुरा) याची भेट घालून दिली होती. रक्कम दिल्यानंतरही कांबळे व जाधव नोकरी मिळवून देत नसल्याने बारसकर यांनी त्यांचा पाठपुरावा केला. यावेळी बारसकर यांना घेऊन कांबळे व जाधव यांनी पुणे गाठून अरुण गायकवाड नावाच्या व्यक्तीची भेट घेतली. गायकवाड याने तुमचे पैसे आमच्याकडे आले असून लवकरच नोकरीची ऑर्डर काढतो, असे आश्वासन दिले. ठराविक मुदत उलटल्यानंतरही नोकरीची ऑर्डर आली नसल्याने आपली फसवणूक झाल्याचे बारसकर यांच्या निदर्शनास आले. याप्रकरणी बेगमपुरा पोलिस ठाण्यात संशयित आरोपी कांबळे, जाधव व अरुण गायकवाड यांच्या विरुद्ध फसवणूकीचा गुन्हा दाखल करण्यात आला आहे. याप्रकरणी उपनिरीक्षक सरवर हे तपास करीत आहेत.

म. टा. प्रतिनिधी, औरंगाबाद

महापालिकेत आलेल्या आयुक्तांना गुरुवारी 'आमची कामे होत नाहीत' असे म्हणत नागरिकांनी घेराव घातला. नेमके याचवेळी रोज दुपारी तीन ते पाचपर्यंत पालिकेत बसणार का, असा प्रश्न पत्रकारांनी केला. त्यामुळे आयुक्तांचा तीळपापड झाला. 'मला इतकेच काम नाही,' असे म्हणत फोटो काढणाऱ्या फोटोग्राफरवरही 'आता माझ्या घरापर्यंत येता का,' असा आगतिक संताप त्यांनी व्यक्त केला.

आयुक्त डॉ. निपुण विनायक महापालिकेतील कार्यालयात क्वचित येतात. त्यांचे सारे काम शासकीय बंगल्यात असलेल्या कार्यालयातून किंवा डॉ. बाबासाहेब आंबेडकर संशोधन केंद्रातून चालते. त्यामुळे सर्वसामान्य नागरिकांना त्यांना भेटताच येत नाही. रोज अनेक नागरिकांना निराश होऊन परतावे लागते. आयुक्त गुरुवारी पालिका मुख्यालयातील आपल्या कार्यालयात आले. त्यांनी काही अधिकाऱ्यांच्या बैठका घेतल्या. दरम्यानच्या काळात त्यांना भेटण्यासाठी त्यांच्या दालनाबाहेर पन्नास - साठ नागरिक जमा झाले. ते दुपारी दीडच्या सुमारास घरी जाण्यासाठी निघाले. तेव्हा नागरिकांनी त्यांना व्हरंड्यातच घेराव घातला. 'आमचे प्रश्न ऐकून घ्या, आमचे प्रश्न सोडवा,' अशी विनंती नागरिक करीत होते. 'मी तुमचे म्हणणे ऐकून घेतो, पण सध्या मला जायचे आहे' असे म्हणत ते जिन्याच्या पायऱ्या उतरून जाऊ लागले. इतक्यात काही पत्रकारांनी त्यांना 'तुम्ही रोज दुपारी तीन ते पाच पालिका मुख्यालयात येवून बसणार का,' असा सवाल केला. सवाल करताना एका पत्रकाराचा आवाज वाढला. त्याला आयुक्तांनी आक्षेप घेतला. 'लहान आवाजात बोला, मोठ्याने का बोलता,' असे ते म्हणाले. इतक्यात प्रेस फोटोग्राफर त्यांचे फोटो काढण्यासाठी सरसावले. त्यामुळे आयुक्त अधिकच चिडले. 'आता माझ्या घरापर्यंत फोटो काढत येता का,' असे म्हणत ते कारमध्ये बसले आणि निघून गेले. आयुक्तांच्या या वागण्यामुळे समस्या घेवून आलेले नागरिक मात्र निराश झाले.

म. टा. प्रतिनिधी, कन्नड

शहरातील ग्रामीण रुग्णालय परिसरात शिवाजी महाविघालयातील राष्ट्रीय सेवा योजनेच्या विद्यार्थांनी राष्ट्रीय सेवा योजना दिनानिमित्त एक दिवशीय स्वच्छता मोहीम राबवली.

या निमित्ताने रुग्णालय परिसरातील गाजर गवत काढून त्याची विल्हेवाट लावण्यात आली. तसेच परिसरातील झाडांना पाण्याची आळवणीसाठी स्वच्छता करण्यात येवून केरकचरा वेचण्यात आला. स्वयंसेवक विद्यार्थ्यांनींनी संपूर्ण परिसर झाडून स्वच्छ केला. यावेळी प्राचार्य विजय भोसले, उपप्राचार्य भाऊसाहेब मगर यांची प्रमुख उपस्थिती होती. ही स्वच्छता मोहीम यशस्वी करण्यासाठी कार्यक्रमाधिकारी प्रा. अतिश मेहेत्रे, प्रा. जगदीश भेलोंडे, डॉ. सुनील गोरडे, डॉ. मीना वडगुळे, डॉ. प्रकाश महाजन व डॉ. गांगुर्डे यांनी प्रयत्न केले. यावेळी स्वयंसेवक विद्यार्थी उपस्थित होते. कार्यक्रमाचे संचलन किशोर राठोड याने केले, तर गौरव खरे यांनी आभार मानले.

म. टा. प्रतिनिधी, औरंगाबाद

पाऊस नसल्याने विहिरीचे पाणी देऊन शेतकरी पिके जगवण्याचा प्रयत्न करत आहेत. मात्र वारंवार वीजपुरवठा खंडित होणे, जळालेले रोहित्र दुरुस्त करून न देणे यामुळे शेतकरी हैराण आहेत. शेतकऱ्यांनी या तक्रारीचा भडिमार गुरुवारी झालेल्या जिल्हास्तरीय विद्युतीकरण समितीच्या बैठकीत केला. महावितरण तसेच शासकीय नियमांमुळे शेतकऱ्यांसाठी हा दुष्काळातील तेरावा महिना असल्याची व्यथा शेतकऱ्यांनी मांडली.

जिल्हास्तरीय विद्युतीकरण समितीची बैठक महावितरण कार्यालयाच्या सभागृहात पार पडली. या बैठकीचे अध्यक्ष खासदार चंद्रकांत खैरे हे होते. बैठकीत महापौर नंदू घोडेले, जिल्हा परिषद अध्यक्षा अॅड. देवयानी डोणगावकर, महावितरणचे मुख्य अभियंता सुरेश गणेशकर, अधीक्षक अभियंता संजय सरग आदींची उपस्थिती होती.

या बैठकीत सोयगाव, गंगापूर यासह जिल्ह्यातील इतर भागातून आलेल्या शेतकऱ्यांनी व्यथा मांडल्या. ग्रामीण भागात दाब वाढल्याने रोहित्र नादुरुस्त होण्याचे प्रमाण वाढले आहे. ते वेळेत दुरूस्त करून मिळत नसल्याने पिके वाळण्याचा धोका आहे. रोहित्र बदलण्यासाठी पैसे मागितले जात असल्याचा आरोप शेतकऱ्यांनी केला. तसेच संबंधित अधिकारी समस्या ऐकत नसून त्यांच्यावर कारवाईची मागणी केली.

\B…मुख्य अभियंत्यांचा भडका \B

या बैठकीत शेतकरी गाऱ्हाणे मांडत असताना, एकाने सोयगाव तालुक्यातील एका लाइनमनला निलंबित केल्याचा प्रश्न उपस्थित केला. त्यावर मुख्य अभियंता सुरेश गणेशकर हे चांगलेच भडकले. त्यांनी कर्मचारी आमचा आहे, आम्ही बघून घेऊ, असे ठणकावले. त्यानंतरही संबधिताने वाद घातल्यानंतर गणेशकरांचा पारा चढला. त्यांनी त्या कर्मचाऱ्याच्या निलंबनाचा तुमच्याशी काय संबंध? महावितरणाची बदनामी तुम्ही का करता, अशा शब्दात त्याला फैलावर घेतले.

म. टा. प्रतिनिधी, औरंगाबाद

वाळुची तस्करी करणाऱ्या आरोपींवर ग्रामीण पोलिसांनी छापे मारले. ही कारवाई बुधवारी शिवूर येथे शिवना नदीचे पात्र, तसेच फुलंब्री जवळील पाल येथे करण्यात आली. या कारवाईत चार वाहने जप्त करून चौघांना अटक करण्यात आली. याप्रकरणी सबंधित पोलिस ठाण्यात गुन्हे दाखल करण्यात आले आहेत.

फुलंब्री पोलिस ठाणे हद्दीतील पाल येथे वाळुची चोरटी वाहतूक करण्यात येत असल्याची माहिती विशेष पथकाला मिळाली होती. या माहितीवरून पथकाने सावंगी टोल नाका येथे सापळा रचला. यावेळी वाळू वाहतूक करणारा एक टिप्पर पोलिसांनी पकडला. या टिप्परमध्ये दोन ब्रास वाळू विना परवाना व रॉयल्टी नसताना नेण्यात येत होती. पोलिसांनी संशयित आरोपी अय्युब युसूफ पटेल याला अटक केली. याप्रकरणी फुलंब्री पोलिस ठाण्यात गुन्हा दाखल करण्यात आला आहे. ही कारवाई सहाय्यक पोलिस निरीक्षक मनोहर वानखेडे, योगेश खमाट, सुधीर वाघ, अभिजित डहाळे व रोहित पगडे यांनी केली.

…शिवूर पोलिस ठाणे हद्दीतील मांडकी शिवारातील शिवना नदीपात्रातून वाळू तस्करी होत असल्याच्या माहितीवरून छापा मारला. यावेळी चार टेम्पोतून वाळू वाहतूक करण्यात येत होती. पोलिसांना पाहताच दोन टेम्पो चालक पळून गेले. एक टेम्पो पोलिसांनी पकडला. याप्रकरणी संशयित आरोपी विठ्ठल भागीनाथ गायकवाड (वय २३), विठ्ठल अशोक उबाळे (वय २७, दोघे रा. भायगाव गंगा), तसेच गणेश उत्तम तुपे (वय २५ रा. राहेगाव) यांना अटक केली. ही कारवाई सहाय्यक पोलिस निरीक्षक महेश आंधळे, रोहिदास तांदळे, तिलोकचंद पवार, अविनाश भास्कर, विष्णू जाधव, रवींद्र काळे, रमेश टोंपे, अमोल कांबळे, देवराव तायडे व नेताजी जाधव यांच्या पथकाने केली.

म. टा. प्रतिनिधी, औरंगाबाद

कन्नड येथील आदिवासी मुलांच्या वसतिगृहाचा प्रश्न तातडीने निकाली काढा, यासह इतर मागण्यांसाठी एकलव्य संघटनेने येथील एकात्मिक आदिवासी प्रकल्प अधिकारी कार्यालयासमोर बेमुदत बिऱ्हाड ठिय्या आंदोलन सुरू केले आहे.

कन्नड येथील आदिवासी मुलांचे वसतिगृह अनेक वर्षांपासून भाड्याच्या इमारतीमध्येआहे. या वसतिगृहात १२५ विद्यार्थी राहतात. इमारत परिसर राहण्यास आरोग्यदायी नसून भौतिक सुविधा नाहीत, असा आंदोलकांचा आरोप आहे. सर्व सोई सुविधायुक्त स्वतंत्र नवीन इमारत वसतिगृहासाठी तातडीने उपलब्ध करून द्यावी, अशी मागणी संघटनेने केली. यासंदर्भात वारंवार पाठपुरावा करूनही प्रशासनाने दखल न घेतल्याने आंदोलन करावे लागत असल्याचे संघटनेचे प्रदेश उपाध्यक्ष पवनराजे सोनवणे यांनी सांगितले.

यासह कन्नड तालुक्यातील वडनेर येथील आश्रमशाळा परिसरात सुमारे ५० एकर पडिक जमीन आहे. ती दरवर्षी लिलाव करून जनावरे चारण्यासाठी दिली जाते. पण, यंदा तसे न करता गावातील आदिवासी समाजातील बांधवांना शेती कसण्यासाठी भाडेतत्वावर तात्पुरत्या स्वरुपात देण्यात यावी. बीड जिल्ह्यातील शेडाळा येथील विनयभंग प्रकरणी आरोपीवर गुन्हा दाखल करावा, आदी मागण्या यावेळी करण्यात आल्या. मागण्याबाबत सकारात्मक निर्णय होईपर्यंत माघार घेणार नाही, असा इशारा आंदोलकांनी दिला आहे. यावेळी रमेश गांगुर्डे, किसन सोनवणे, विनायक ठाकरे, शामराव ठाकरे, कैलास सोनवणे, मगन ठाकरे, हौसा ठाकरे आदी उपस्थित होते.

म. टा. प्रतिनिधी, औरंगाबाद

वॉलमार्ट व फ्लिपकार्टचे समायोजन आणि थेट शंभर टक्के विदेशी गुंतवणुकीविरोधात व्यापारी एकवटले असून, शुक्रवारी तब्बल ७२ संघटनांनी एकत्र येत देशव्यापी बंद पुकारला आहे. या आंदोलनात सहभागी व्हावे यासाठी गुरुवारी जिल्हा व्यापारी महासंघाने जनजागृती फेरी काढली.

उस्मानपुरा सर्कल येथून सकाळी अकरा वाजता फेरीला सुरुवात झाली. वॉलमार्ट गो बॅक, देश व्यापारी करे पुकार, रद्द करो ये करार यासह अन्य घोषणाबाजी करत व्यापाऱ्यांनी दुकानदार, नागरिकांना आंदोलनमागील भूमिका सांगत बंदमध्ये सहभागी व्हावे, असे आवाहन केले. महासंघाचे अध्यक्ष जगन्नाथ काळे, अजय शहा, आदेशपालसिंग छाबडा, लक्ष्मीनारायण राठी, सरदार हरिसिंग, राजन हौजवाला, गुलाम हक्कानी, विजय जैस्वाल यांच्यासह व्यापारीवर्ग उपस्थित होते. क्रांती चौक, पैठण गेट, टिळक पथ, गुलमंडी, सिटी चौक, शहाबाजार, रोशन गेट, आझाद चौक, टीव्ही सेंटर, कॅनॉट गार्डनमार्गे जयभवानीनगर काढलेल्या या फेरीची सांगता गजानन महाराज मंदिर चौक येथे करण्यात आली.

\Bयेथे मिळतील औषधे

\Bअखिल भारतीय औषधी विक्रेता संघटनेनेही शुक्रवारी बंद पुकारला आहे. त्यापार्श्वभूमीवर रुग्ण व त्यांच्या नातेवाईकांची औषधांसाठी परवड होऊ नये, यासाठी अन्न व औषध प्रशासनाने (एफडीए) नाथ सुपर मार्केट, औरंगपुरा येथील कार्यालयात (०२४०-२३३१२६८, ९४२२४९६९४१) नियंत्रण कक्ष सुरू केले आहे. यासह कमलनयन बजाज हॉस्पिटल, सेठ नंदलाल धूत, युनायटेड सिग्मा, हेडगेवार, एमजीएम आदी हॉस्पिटल प्रशासनाला पुरेसा औषधीसाठा ठेवण्याचे निर्देश देण्यात आले आहेत. औषध पुरवठा करण्याबाबत औषध विक्रेत्यांनाही सूचना दिल्या आहेत, अशी माहिती एफडीएचे प्रभारी सह आयुक्त स. रां. काळे यांनी दिली.

वॉलमार्ट व फ्लिपकार्ट करार रद्द करा, प्राप्तीकराची मर्यादा पाच लाखांपर्यंत वाढवा यासह अन्य मागण्यासाठी हा बंद पुकारण्यात आला आहे. महासंघाशी संलग्न एकूण बहात्तर संघटनांनी आंदोलनास सक्रिय पाठिंबा दिला आहे.

- जगन्नाथ काळे, अध्यक्ष, जिल्हा व्यापारी महासंघ

औरंगाबाद : घाटी परिसरातील सुमारे चार हजार चौरसफूट जागेवरील अतिक्रमण बुधवारी महापालिकेच्या पथकाने हटविले. टीन पत्र्यांचे दोन शेड, कच्चे बांधकाम झालेल्या एका खोलीचे बांधकाम यावेळी पाडण्यात आले. भडकलगेट- काजीवाडा येथे हे अतिक्रमित अनधिकृत बांधकाम होते. वारंवार नोटीस बजावूनही ते हटवले जात नसल्यामुळे पालिकेच्या पथकाने ही कारवाई केली. पदनिर्देशित अधिकारी पी. डी. पाठक, इमारत निरीक्षक सय्यद जमशीद, रवींद्र देसाई यांनी ही कारवाई केली.

म. टा. प्रतिनिधी, औरंगाबाद

उपअभियंता सरताजसिंग चहेल यांच्यावर दमदाटी करणारे उपमहापौर विजय औताडे यांच्यावर कारवाई करा, अशी मागणी करणारे निवेदन महापालिका अधिकारी संघटनेने आयुक्तांच्या नावे दिले आहे. त्यामुळे पालिकेत लोकप्रतिनिधी-अधिकारी, असा वाद निर्माण होण्याची शक्यता आहे.

आयुक्तांना दिलेल्या निवेदनात संघटनेच्या पदाधिकाऱ्यांनी म्हटले आहे की, उपमहापौर औताडे यांनी १२ सप्टेबर रोजी चहेल यांना सर्वसाधारण सभेच्या सभागृहातील अँटीचेंबर मध्ये बोलावून नियमबाह्य काम करण्यासाठी डांबून ठेवले, दमदाटी केली, अंगावर धावून गेले. शासकीय कामात औताडे यांनी अडथळा आणला आहे. या प्रकारामुळे अधिकारी-कर्मचाऱ्यांची मानसिक स्थिती खालावण्याची शक्यता आहे. प्रशासनाचे प्रमुख म्हणून अधिकारी-कर्मचाऱ्यांचे मनोबल वाढवण्यासाठी आपल्या पाठिंब्याची नितांत गरज आहे. त्यामुळे या सर्व प्रकाराची व्यक्तीश: दखल घेवून चहेल यांना न्याय मिळावा यासाठी उपमहापौरांवर कारवाई करण्यात यावी. निवेदनावर संघटनेचे अध्यक्ष डॉ. संजय पवार, सचिव डॉ. बी. एस. नाईकवाडे, उपाध्यक्ष डॉ. नीता पाडळकर, एम. बी. काझी, सहसचिव नितीन गायकवाड, डी. डी. सूर्यवंशी यांची नावे आहेत.