म. टा. प्रतिनिधी, औरंगाबाद 'पुंडलिकनगरच्या जलकुंभावरून सिडको एन ३, एन ४ भागाला पाणीपुरवठा करण्याच्यासाठी जलवाहिनी टाकण्याच्या कामाची तांत्रिक बाजू तपासून अहवाल सादर करा,' असे आदेश महापौर नंदकुमार घोडेले यांनी पाणीपुरवठा विभागाच्या अधिकाऱ्यांना दिले. पुंडलिकनगर जलकुंभावरून सिडको एन ३, एन ४ भागाला पाणीपुरवठा करण्यासाठी स्वतंत्र जलवाहिनी टाकण्यात येणार आहे. मात्र, या कामासाठी पुंडलिकनगर, हनुमाननगरच्या नागरिकांचा व नगरसेवकांचा विरोध आहे. स्वतंत्र जलवाहिनी टाकल्यास पुंडलिकनगर - हनुमाननगर व परिरसाच्या पाणीपुरवठ्यावर परिणाम होईल, अशी या भागातील नागरिकांची भीती आहे. त्यामुळे जलवाहिनी टाकण्याच्या मुद्यावरून दोन - तीन वेळा संघर्षाचे प्रसंग या भागात निर्माण झाले. शिवसेना जिल्हाप्रमुख अंबादास दानवे यांनी हनुमाननगरात नागरिकांची बैठक घेवून स्वतंत्र जलवाहिनी टाकण्यास विरोधही केला. त्यामुळे जलवाहिनी टाकण्याचा मुद्दा पेटण्याची शक्यता निर्माण झाली आहे. या पार्श्वभूमीवर सोमवारी महापौर नंदकुमार घोडेले यांनी पुंडलिकनगर, हनुमाननगरसह सिडको एन ३, एन ४ भागातील नगरसेवकांची बैठक आयोजित केली होती. बैठकीला आयुक्त डॉ. निपुण विनायक यांच्यासह अठरा नगरसेवकांची उपस्थिती होती. पुंडलिकनगरच्या जलकुंभावरून सिडकोसाठी जलवाहिनी टाकणे तांत्रिकदृष्ट्या कितपत योग्य आहे, याची तपासणी करून अहवाल सादर करण्याचे आदेश यावेळी महापौरांनी महापालिकेचे पाणीपुरवठा विषयीचे तज्ज्ञ सल्लागार राजेंद्र होलानी यांना दिले. होलानी यांचा अहवाल आल्यावर पुढील कार्यवाही केली जाणार आहे. तोपर्यंत दोन्ही बाजूचे नगरसेवक व नागरिकांना शांत राहण्याचे आवाहन महापौरांनी केले आहे.
मोबाइल अॅप डाउनलोड करा आणि राहा अपडेट
