म. टा. प्रतिनिधी, औरंगाबाद 'कंत्राटी कामगारांचे आंदोलन पोलिसांना बोलावून संपवा, 'अभाविप'च्या कार्यकर्त्यांना दणके देऊन बाहेर ओढले,' असे कुलगुरू डॉ. बी. ए. चोपडे यांचे संतापजनक वक्तव्य असलेली ऑडिओ क्लिप व्हायरल झाली आहे. पाण्यासाठी रात्री आंदोलन करणाऱ्या विद्यार्थिनींच्या आंदोलनाची कुलगुरुंनी 'हौशा-गवशांचे आंदोलन' म्हणत हेटाळणी केली आहे. ही क्लिप पसरल्यानंतर विद्यापीठ वर्तुळात संतापजनक प्रतिक्रिया उमटल्या आहेत. नवनवीन घोषणांनी नेहमी चर्चेत राहणारे कुलगुरू डॉ. चोपडे ऑडिओ क्लिपने वादाच्या भोवऱ्यात सापडले आहेत. व्यवस्थापन परिषदेची बैठक झाल्यानंतर मंगळवारी निकटवर्तीयांशी चर्चा करताना चोपडे यांनी केलेली वादग्रस्त वक्तव्ये कथित क्लिपमध्ये आहेत. यावेळी कुलगुरू चोपडे यांच्यासोबत विजय, शंकर नावाच्या व्यक्ती व एक महिला आहे. या चौघांचा संवाद ऑडिओ क्लिपद्वारे बाहेर आला. 'विद्यापीठातील कंत्राटी कामगारांचे आंदोलन पोलिस आयुक्तांशी चर्चा करून संपवा. संबंधित कर्मचारी विद्यापीठाचे नसून त्यांच्या मागण्या नियमबाह्य आहेत. त्यांना अटक करून जेलमध्ये टाका,' असे चोपडे फोनवर सांगत आहेत. या वक्तव्याचे कामगारांमध्ये तीव्र पडसाद उमटले. 'लोकशाही मार्गाने आंदोलन करूनही कुलगुरू आंदोलन उधळण्याची भाषा करतात हे दुर्दैव आहे. आंदोलन मोडीत काढणे ही हिटलरशाही आहे,' असे उपोषणार्थी कामगार किरणराज पंडित यांनी सांगितले. काही दिवसांपूर्वी वसतिगृहातील विद्यार्थिनींनी पाण्यासाठी केलेल्या आंदोलनावर चोपडे यांनी शेलक्या शब्दात नाराजी व्यक्त केली. 'अशा आंदोलनात हौशे-गवशे-नवशे लोक येतात अन् फोटो काढतात. या ठिकाणी काहीही चाललेले असते,' असे चोपडे म्हटल्याचे ऑडिओ क्लिमध्ये स्पष्टपणे ऐकू येते. अखिल भारतीय विद्यार्थी परिषदेने वसतिगृहातील समस्यांवर कुलगुरूंच्या दालनात आंदोलन केले होते. यावेळी आंबेडकरवादी संघटना आणि अभाविप यांच्यात वाद झाला होता. याबाबत बोलताना कुलगुरुंनी 'सचिनने त्यांना दणके दिले, बाहेर ओढले,' असे वक्तव्य केले; तसेच काही कार्यकर्त्यांच्या हिमतीचे कौतुक केले आहे. या वक्तव्याचा अभाविपच्या कार्यकर्त्यांनी निषेध केला असून, उच्च शिक्षणमंत्री विनोद तावडे यांच्याकडे तक्रार केली आहे. प्रभारी परीक्षा व मूल्यमापन संचालक दिगंबर नेटके यांचा काही दिवसांपूर्वीच पदभार काढण्यात आला. 'नेटके यांना पुराव्यात पकडले. त्यामुळे ते मान वर करू शकत नाही,' असे चोपडे म्हणतात. शिवाय व्यवस्थापन परिषदेच्या बैठकीत कॅरिऑनच्या निर्णयावर निंबाळकर 'आडवे' झाल्याचे सांगत चोपडे खळखळून हसतात. तेजनकर यांनी निंबाळकरांना अडचणीत आणल्याचे चोपडे यांनी म्हटले आहे. सध्या चोपडे यांची ऑडिओ क्लिप शैक्षणिक वर्तुळात चर्चेचा विषय ठरली आहे. \Bगांधी सन्मान मार्चची खिल्ली \Bविद्यापीठ प्रशासनाने दोन ऑक्टोबरची गांधी जयंतीची सुटी रद्द करून अभिवादनाचा कार्यक्रम घेतला नव्हता. या प्रकाराच्या निषेधार्थ मंगळवारी विद्यापीठात गांधी सन्मान मार्च काढण्यात आला होता. आंदोलकांनी कुलगुरू डॉ. बी. ए. चोपडे यांना गांधीजींची प्रतिमा भेट दिली. 'हे महात्मा गांधी आहेत. स्वातंत्र्यलढ्यात त्यांचे मोठे योगदान होते,' असे सांगत डॉ. उल्हास उढाण यांनी प्रतिमा दिल्यानंतर चोपडे यांचा चेहरा उतरला, मात्र सायंकाळी आपल्या वर्तुळात बोलताना ते गांधी मार्चची खिल्ली उडवताना दिसले. यावेळी उपस्थित महिलेने,'गांधी मार्च क्रांती चौकातून का नाही काढला? व्हाय विद्यापीठ गेट?' असा उपहासात्मक प्रश्न उपस्थित केल्याचे ऑडिओ क्लिपमध्ये ऐकू येते. माझी भूमिका संयमाची आणि न्यायाची आहे. सर्व विद्यार्थी माझ्यासाठी समान असताना कुणाची बाजू कशी घेणार? कंत्राटी कामगारांच्या मागण्यांवर चर्चा सुरू असून, आंदोलनाबाबत टोकाचा निर्णय घेतला नाही. - डॉ. बी. ए. चोपडे, कुलगुरू विद्यापीठाचे वातावरण दूषित करण्याचा अधिकार कुणालाही नाही. ऑडिओ क्लिप राज्य सरकारकडे देणार असून, तपास करण्यात येईल. सहभागी दोषी व्यक्तींवर कारवाईची मागणी करणार आहे. - डॉ. गजानन सानप, समन्वयक, विद्यापीठ विकास मंच
मोबाइल अॅप डाउनलोड करा आणि राहा अपडेट
