म. टा. प्रतिनिधी, औरंगाबाद

फटाका बाजारासाठी महापालिकेच्या अग्निशमन विभागाकडे आतापर्यंत दोन जागांचे अर्ज आले आहेत. दिवाळीला किमान २५ दिवस शिल्लक असल्यामुळे अर्जांची संख्या आणखी वाढेल असे मानले जात आहे. अग्निशमन विभागातर्फे अद्याप कुणालाही परवानगी देण्यात आली नाही.

दोन वर्षांपूर्वी औरंगपुरा येथील जिल्हा परिषद मैदानावरील फटाका मार्केटला आग लागली. त्यानंतर या मैदानावर फटाका मार्केटला परवानगी द्यायची नाही, असा निर्णय प्रशासनाने घेतला आहे. त्यामुळे गतवर्षी शहराच्या विविध भागात मोकळ्या जागांवर फटाका मार्केट भरविण्यात आले. संग्रामनगरसमोर बीड बायपास रस्त्याला लागून गतवर्षी फटाका मार्केट सुरू केले होते. यंदा देखील त्याच ठिकाणी मार्केट सुरू होण्याची शक्यता आहे. त्याच्या परवानगीसाठी अर्ज प्राप्त झाल्याचे अग्निशमन विभागाकडून सांगण्यात आले. दुसरा अर्ज केंब्रिज शाळेजवळच्या मोकळ्या जागेवर मार्केट सुरू करण्याबद्दलचा आहे. या दोन्हीही अर्जांवर अद्याप निर्णय घेण्यात आला नाही. गरवारे क्रीडा संकुल, टीव्ही सेंटर चौक, मुकुंदवाडी, चिकलठाणा या ठिकाणी देखील फटाका मार्केट सुरू केले जातात, पण या मार्केटच्या परवानगीचे अर्ज अद्याप प्राप्त झाले नाहीत.

औरंगाबाद: मराठवाडा साहित्य परिषदेच्या वतीने दोन दिवस न. शे. पोहनेरकर व्याख्यानमाला आयोजित करण्यात आली आहे. प्रसिद्ध कादंबरीकार प्रा. रंगनाथ पठारे शनिवारी (१३ ऑक्टोबर) आणि रविवारी (१४ ऑक्टोबर) 'पदार्थविज्ञान व कथात्म साहित्य निर्मिती' या विषयावर व्याख्यान देणार आहेत. साहित्य रसिकांनी उपस्थित रहावे असे आवाहन मसापचे अध्यक्ष कौतिरकार ठाले पाटील, प्रा. किरण सगर, डॉ. दादा गोरे, देवीदास कुलकर्णी आणि डॉ. रामचंद्र काळुंखे यांनी केले आहे.

म. टा. प्रतिनिधी,औरंगाबाद

पारंपारिक वेशभूषेतील समाजबांधव, ढोल पथक, सजीव देखावा सादर करून अग्रवाल समाजाने अग्र संस्कृती व एकतेचे दर्शन घडवले. मान्यवरांच्या उपस्थितीत नुकतीच अग्रेसन महाराज यांची जयंती उत्साहात साजरी करण्यात आली.

अग्रेसन महाराज जयंतीनिमित्त शहागंज येथून निघालेल्या फेरीत माजी मंत्री राजेंद्र दर्डा, महापौर नंदकुमार घोडेले, नगरसेविका कीर्ती शिंदे, अग्रवाल सभेचे अध्यक्ष राजेश अग्रवाल, सचिव ओमप्रकाश अग्रवाल, अग्रवाल युवा मंचचे अध्यक्ष दिलीप अग्रवाल, सचिव अनुप अग्रवाल, अग्रवाल महिला समितीच्या अध्यक्ष सुनीता अग्रवाल, सचिव कविता अग्रवाल यांच्यासह पदाधिकारी उपस्थित होते. फुलांनी सजवलेल्या रथामध्ये अग्रेसन महाराज यांच्या चांदीच्या प्रतिमेस अभिवादन करण्यात आले. ढोल पथक आणि अग्रेसन विद्या मंदिरच्या विद्यार्थिनींचे लेझिम पथक मिरवणुकीचे वैशिष्ट्य ठरले. मिरवणूक यशस्वी करण्यासाठी अग्रवाल बहू बेटी मंडळाच्या अध्यक्ष नीतू अग्रवाल व सचिव पूजा अग्रवाल, अग्रेसन भवन विश्वस्त मंडळाचे संजयकुमार तिबडेवाल, विजय अग्रवाल व संदीप गोयल, महाराज अग्रेसन शैक्षणिक संस्थेचे सीताराम अग्रवाल, प्रफुल्ल अग्रवाल आदींनी परिश्रम घेतले.

\Bसांस्कृतिक कार्यक्रमांना उधाण

\B

अग्रेसन महाराज जयंतीनिमित्त अग्रवाल महिला समितीतर्फे 'दादी-नानी फॅशन की दुनिया','रेट्रो कपल रंगारंग डांस शो' आणि काकडीपासून सजावट स्पर्धा घेतल्या. यावेळी अध्यक्ष सुनीता अग्रवाल, सचिव कविता अग्रवाल, आयोजक मालती गुप्ता, प्रीती पित्ती, रेखा भारुका उपस्थित होत्या. कल्पना बगडिया, निशा पित्ती आणि दीपा अग्रवाल यांनी अनुक्रमे प्रथम, द्वितीय व तृतीय क्रमांक मिळवले. वीणा गादिया, श्वेता कासलीवाल व रचना पहाडे परीक्षक होत्या. शिल्पा अग्रवाल, शालिनी अग्रवाल आणि सीमा अग्रवाल या काकडी सजावट स्पर्धेच्या विजेत्या ठरल्या. ज्योती इंदानी परीक्षक होत्या. साक्षी अग्रवाल यांनी सूत्रसंचालन केले. रेट्रो कपल डान्स शो स्पर्धेत प्रथम क्रमांक चेतना अग्रवाल आणि नेहा भारूका, नेहा और दीक्षा अग्रवाल यांनी पारितोषिक पटकावले. अग्रवाल युवा मंचच्या वतीने बुगी-बुगी ही डान्सवर आधारित स्पर्धा आणि आनंदनगरी घेण्यात आली.

म. टा. प्रतिनिधी, औरंगाबाद

'महाराष्ट्र टाइम्स' आणि 'आदिशक्ती नारी विकास प्रतिष्ठान'च्या यांच्यातर्फे रविवारपासून (१४ ऑक्टोबर) 'साज पैठणीचा' या अनोख्या कार्यक्रमाचे आयोजन खास महिलांसाठी करण्यात येत आहे. शहरातील प्रत्येक वॉर्डात तीन ठिकाणी महिलांचे विविध खेळ, स्पर्धा आयोजित करून विजेत्यांना आकर्षक बक्षिसे जिंकण्याची संधी मिळणार आहे.

'आदिशक्ती नारी विकास प्रतिष्ठान'च्या संचालिका, नागेश्वरवाडी येथील नगरसेविका कीर्ती महेंद्र शिंदे यांच्या सौजन्याने; तसेच 'महाराष्ट्र टाइम्स'तर्फे आयोजित 'साज पैठणीचा' या आगळ्यावेगळ्या उपक्रमात शहरातील सर्वच वॉर्डातील महिलांना विविध भेटवस्तू, पैठणी साडी, ट्रॅव्हलिंग बॅग, गालिचा, क्वाइन जिंकण्याची संधी मिळणार आहे. त्याचबरोबर प्रेक्षक महिलांना देखील 'लकी ड्रॉ'च्या माध्यमातून बक्षिसे जिंकण्याची संधी असणार आहे. प्रत्येक वॉर्डात तीन ठिकाणी 'साज पैठणीचा' कार्यक्रम आयोजित करण्यात येईल. प्रत्येक ठिकाणी तीन अशा नऊ विजेत्या स्पर्धकांची एकत्रित एक स्पर्धा होईल व त्यातील प्रथम, द्वितीय आणि तृतीय अशी बक्षिसे देण्यात येतील. विशेष म्हणजे प्रत्येक सहभागी स्पर्धकाला नाणे (क्वाइन) भेट स्वरुपात मिळणार आहे.

सध्या सर्वत्र नवरात्रीची धूम सुरू असून, नारीशक्तीला प्रोत्साहित करण्यासाठी 'साज पैठणीचा' हा कार्यक्रम नवचैतन्य आणणार आहे. या कार्यक्रमांसाठी नॉलेज पार्टनर 'लिटिल एंजल्स इंग्लिश स्कूल', हेल्थ पार्टनर 'गेटवेल कॅन्सर क्लिनिक' सक्सेस पार्टनर डॉ. शिवकुमार गोरे यांचे 'सुखायु सुश्रुत हॉस्पिटल' व 'शिंदे रॉक वूड' यांचे सहकार्य लाभले आहे. जास्तीत जास्त महिलांनी या अनोख्या उपक्रमात सहभाग नोंदवण्याचे आवाहन संयोजिका कीर्ती महेंद्र शिंदे यांच्या वतीने करण्यात आले आहे.

म. टा. प्रतिनिधी, औरंगाबाद

चौधरी कॉलनी वॉर्ड क्रमांक ३७ मधील हिनानगरच्या रहिवासी ऋतुजा सोनाजी कांबळे (वय १७) हिचे डेंगीमुळे शुक्रवारी (१२ ऑक्टोबर) मृत्यू झाला. तिची तेरा वर्षांची लहान बहीणदेखील डेंगीमुळे आजारी असल्याचे समोर येत आहे. दरम्यान, स्वाइन फ्लूने आणखी एका ३६ वर्षीय महिलेचा गुरुवारी एका खासगी रुग्णालयात मृत्युला झाला. सद्यस्थितीत डेंगीसह स्वाइन फ्लूच्या रुग्णांवर मोठ्या प्रमाणात घाटीसह खासगी रुग्णालयांमध्ये उपचार होत आहे.

ऋतुजाच्या मृत्युची माहिती मिळाल्यावर पालिकेचे विरोधी पक्ष नेते जमीर कादरी व 'एमआयएम'चे गटनेते नासेर सिद्दिकी यांनी हिनानगरात जाऊन कांबळे कुटुंबियांची भेट घेतली. या संपूर्ण परिसरात साफसफाई होत नाही, औषधींची फवारणी होत नाही, असे लक्षात आल्यावर त्यांनी वॉर्ड अधिकारी व आरोग्य अधिकाऱ्यांना पत्र देऊन आवश्यक उपाययोजना करण्याची सूचना केली. महापौर नंदकुमार घोडेले यांनाही त्यांनी पत्र दिले व ऋतुजा कांबळेच्या कुटुंबियांना महापालिकेतर्फे आर्थिक मदत करा, अशी मागणी केली. कांबळे कुटुंबाची आर्थिक स्थिती फारच बेताची आहे. कादरी व सिद्दिकी यांनी हिनानगरला भेट दिली तेव्हा नागरिक मोठ्या संख्येने जमा झाले होते. त्यांनी पालिकेबद्दल रोष व्यक्त केला. डेंगीबरोबरच स्वाइन फ्लूचे प्रमाणही झपाट्याने वाढत आहे.

\Bस्वाइन फ्लूचे दहा बळी \B

आतापर्यंत स्वाइन फ्लूच्या शहरातील बळींची संख्या दहावर पोहोचल्याचे स्पष्ट झाले आहे. आतापर्यंत शहरात २५ स्वाइन फ्लू पॉझिटिव्ह रुग्णांवर उपचार झाले आहे. ते रुग्ण औरंगाबादसह बुलडाणा, जळगाव, यवतमाळ, जालना, बीड आदी ठिकाणचे आहेत.

म. टा. प्रतिनिधी, औरंगाबाद

प्रसिद्ध चित्रपट निर्माते, दिग्दर्शक राकेश ओमप्रकाश मेहरा यांनी कथा चोरून 'रंग दे बसंती' चित्रपटाची निर्मिती केल्याच्या दाखल दाव्यात मेहरा हे कोर्टात हजर न झाल्यामुळे कोर्टाने मेहरांविरुद्ध जामीनपात्र वॉरंट तामील करण्याचे आदेश दिले होते. त्यामुळे मेहरा यांनी शुक्रवारी (१२ ऑक्टोबर) कोर्टात हजर होऊन पाच हजार रुपयांचा दंड भरला आणि यापुढे सुनावणीस नियमीत हजर राहण्याचे अभिवचन दिले. त्यानंतर राकेश मेहरा यांचे वारंट रद्द करण्याचे आदेश प्रथम वर्ग न्यायदंडाधिकारी एच. एस. पुराडउपाध्ये यांनी दिले.

या प्रकरणात कथाकार मुश्ताक मोहसिन (५८, रा. नूतन कॉलनी, औरंगाबाद) यांनी दावा दाखल केला होता. कथाकार मुश्ताक मोसीन यांनी आपल्या अनेक कथा अमिताभ बच्चन कार्पोरेशन लि. (एबीसीएल) कंपनीमध्ये नोंदणी करुन कथेच्या झेरॉक्स प्रती दाखल केल्या होत्या. मेहरा हे 'एबीसीएल'चे सदस्य होते. त्यांनी मोहसिन यांची पूर्वपरवानगी न घेता त्यांची कथा चोरुन २००६ मध्ये 'रंग दे बसंती' व २००९ मध्ये 'दिल्ली-६' या चित्रपटांची निर्मिती करुन कोट्यवधींची कमाई केल्याचा आरोप करीत, मोहसिन यांनी २०१० राकेश ओमप्रकाश मेहरा व निर्माता रॉनी स्क्रुवाला यांच्याविरुद्ध दावा दाखल केला होता. सुनावणीवेळी मेहारा व स्क्रुवाला हे गैरहजर राहात असल्यामुळे कोर्टाने दोघांना नोटीस, समन्स बजावून चौकशीसंदर्भात हजर राहण्याचे आदेश दिले होते. त्यानंतरही ते हजर न झाल्यामुळे जामीनपात्र वारंट बजावण्यात आले होते. या प्रकरणी मेहरा हे शुक्रवारी कोर्टात हजर झाले आणि कोर्टाच्या आदेशानंतर त्यांनी पाच हजार रुपयांचा दंड भरुन पुढील सुनावणीला नियमीत हजर राहण्याचे अभिवचन दिले. मोहसिन यांच्यावतीने अ‍ॅड. मनुलाल पटेल यांनी बाजू मांडली.

म. टा. प्रतिनिधी, औरंगाबाद

बनावट कागदपत्राआधारे बँकेत खाते उघडून चेक क्लोन करून गंडा घालणाऱ्या टोळीतील एका प्रमुख आरोपीला गुन्हे शाखेने वसई (मुंबई) येथून अटक केली आहे. या आरोपीची मुंबईत प्रचंड मालमत्ता असल्याचे समोर आले आहे. अजय उर्फ ओमप्रकाश अनिल श्रीवास्तव (वय ४२ मूळ रा. सारनाथ, उत्तर प्रदेश) असे या आरोपीचे नाव आहे.

गुन्हे शाखेच्या पथकाने २७ जून रोजी बँकाना गंडा घालणाऱ्या टोळीला अटक केली होती. यावेळी पोलिसांनी संशयित आरोपी हरिश गोविंद गुंजाळ (रा. मानगाव, ता. कुडाळ, सिंधुदुर्ग) मनीषकुमार जयराम मौर्य उर्फ राकेश उर्फ मनिष यादव उर्फ अमित रमेश सिंग (रा. उत्तर प्रदेश), मंदीपसिंग बनारसीदास सिंग (रा. गुरुदासपूर, पंजाब), रशीद इम्तीयाज खान (रा. नालासोपारा, पालघर), डब्ल्यू शेख अरमान शेख (रा. कमलसागर, पश्चिम बंगाल) यांना अटक केली होती. या टोळीने शहरातील १९ बँकांमध्ये बनावट कागदपत्रांआधारे खाती उघडली होती. यांच्या ताब्यातून मुंबईहून बनावट चेकबूक, पॅनकार्ड, आधारकार्ड, पासबुक, विविध बँकांचे २७ एटीएम कार्ड, १५ मोबाइल आदी साहित्य जप्त केले होते. या टोळीतील चेक वटवणारा प्रमुख आरोपी अजय श्रीवास्तव पसार झाला होता. त्याला तीन महिन्यानंतर अटक करण्यात गुन्हे शाखेला यश आले आहे. पोलिस निरीक्षक मधुकर सावंत यांच्या मार्गदर्शनाखाली पथकाने ही कारवाई केली.

…

\Bपत्नीच्या नावावर दोन दुकाने\B

आरोपी अजय श्रीवास्तव याने आपण केवळ नववी उत्तीर्ण असल्याची माहिती पोलिसांना दिली. मुंबई येथे वसई भागात एका महिन्यापूर्वी तो राहावयास आला होता. त्याच्या घराची किंमत अंदाजे दोन कोटी असल्याची माहिती सूत्रांनी दिली; तसेच त्याचे मुंबईला दोन बियर बार आहे. यापैकी एका बारमध्ये त्याची ३० लाखांची गुंतवणूक होती. या आरोपीवर सहारनपूर उत्तरप्रदेश येथे देखील गुन्हा दाखल आहे. सहारनपूर पोलिसांनी श्रीवास्तवच्या भागीदाराला विश्वासात घेऊन त्याची ३० लाखांची रुपये परत करायला लावली व ही रक्कम गुन्ह्यात त्यांनी सील केली असल्याची देखील माहिती सूत्रांनी दिली. तसेच त्याच्या पत्नीच्या नावावर दोन दुकाने आहेत. यापैकी एक केक शॉप असून, दुसरे दुकान लेडीज गारमेंटचे असल्याची माहिती आहे.

म. टा. प्रतिनिधी, औरंगाबाद

खाण्यास रुचकर आणि आरोग्यवर्धक असलेल्या सीताफळांची येथील कृषी उत्पन्न बाजार समितीत मंगळवारी १८ क्विंटल आवक झाली. खुलताबाद, कन्नडसह बीड जिल्ह्यातून आवक होत असून उच्च प्रतीच्या सीताफळाला क्विंटलमागे साडेचार हजार रुपयांपर्यंत भाव मिळाला आहे. तर किरकोळ बाजारात ६० ते १०० रुपये प्रती किलोदराने त्यांची विक्री होत आहे. तर बाजारात बोरंची आवकही सुरू झाली आहे.

रसाळ व मधूर फळ असलेल्या सीताफळाला नॅचरल आईसक्रिम म्हणून ओळखले जाते. मागील पंधरवड्यापासून सीताफळाची आवक वाढू लागली आहे. सीताफळाची आवक दौलताबाद, कसाबखेडा, कन्नडसह बीड आदी भागातून होत असून, स्थानिक तसेच जिल्ह्यातील बाजारपेठेतून सीताफळाच्या मागणीत सातत्याने वाढ होत असल्याने दरात तेजी आहे.

मंगळवारी १८ क्विंटल सीताफळ जाधववाडी येथील कृषी उत्पन्न बाजार समितीत बाजार समितीत दाखल झालेत. त्यास किमान भाव १ हजार ५०० रुपये तर दर्जानुसार कमाल भाव ४ हजार रुपये प्रति क्विंटल मिळाला, अशी माहिती फळेभाजीपाला विभागाच्या अधिकाऱ्यांनी दिली.

३ ऑक्टोबर रोजी ठोक बाजारात सीताफळाला क्विंटल मागे साडेचार हजार रुपये भाव मिळाला असून आवक अधिक वाढल्यास दर कमी होतील, असे विक्रेत्यांनी सांगितले.

दरम्यान, किरकोळ बाजारात दर्जानुसार ५० ते १०० रुपये प्रती किलो या दराने सीताफळांची विक्री होत असल्याचे फळविक्रेते इस्माईल खान यांनी सांगितले. तर बोरंची आवकही बाजार सुरू झाली असून यासह बाजारात मोसंबीची आवकही वाढली आहे. मंगळवारी ४८ क्विंटल आवक झाली असून क्विंटलमागे सरासरी दर अडीच हजार रुपये मिळाला. आरोग्यास पौष्टिक असलेले सफरचंदची आवकही तेजीत असून नवरात्र उत्सवामुळे उपवास फराळ बरोबरच आरोग्यवर्धक व पौष्टिक असलेल्या या फळांनाही मागणी वाढली आहे.

म. टा. प्रतिनिधी, औरंगागाबाद

क्लिष्ट शस्त्रक्रियेनंतर अन्नच नव्हे, तर पाणी पिण्यासही त्रास होणाऱ्या ७४ वर्षांचे संपतराव जोगदंड व १५ वर्षांचा संतोष दाबके यांना मोठा दिलासा मिळाला. दोन्ही रुग्णांना 'अकेलेसिया कार्डिया' हा आजार असल्याचे निदान उशिरा का होईना झाल्यानंतर डॉ. संदीप भालसिंग व त्यांच्या टीमने विशेष शस्त्रक्रिया करून दोघांना दिलासा दिला.

संपतराव जोगदंड यांना तीन वर्षांपूर्वी अन्न गिळण्याचा त्रास सुरू झाला. जेवण गिळताना घशामध्ये अडकल्यासारखे वाटू लागले व उलटीद्वारे अन्न बाहेर पडू लागले. काही डॉक्टरांनी त्यांना कर्करोग झाल्याचे सांगून मुंबईच्या टाटा हॉस्पिटलमध्ये तात्काळ उपचार घेण्याचा सल्ला दिला. 'टाटा'मध्ये त्यांना अकेलेसिया कार्डिया हा आजार असल्याचे निदान केले आणि मुंबई महापालिकेच्या रुग्णालयात त्यांच्यावर शस्त्रक्रिया करण्यात आली, मात्र तोच त्रास पुन्हा सुरू झाला. त्यानंतर पोटविकार शल्यचिकित्सक डॉ. संदीप भालसिंग, डॉ. नवीन कासलीवाल, डॉ. विनय झवर, भूलतज्ज्ञ डॉ. संतोष देशमुख यांच्या टीमने जटील शस्त्रक्रिया यशस्वी करुन जोगदंड यांना दिलासा दिला आणि गिळण्याच्या त्रासातून त्यांची मुक्तता केली. संतोष दापके यालाही अशाच स्वरुपाचा त्रास होत होता. त्याच्यावर दुर्बिणीद्वारे शस्त्रक्रिया करण्यात आली.

म. टा. प्रतिनिधी, औरंगाबाद

चिकलठाणा येथील मिनी घाटी अर्थात जिल्हा सामान्य रुग्णालयाचे दोन वॉर्ड गुरुवारपासून (११ ऑक्टोबर) सुरू झाले. काह दिवसांपूर्वीच रुग्णालयाचा बाह्य रुग्ण विभाग (ओपीडी) झाला असून, आता आंतररुग्ण विभागातील (आयपीडी) दोन वॉर्डही सुरू झाले आहेत. पुढील टप्प्यात अपघात विभाग व प्रसुती विभाग सुरू होईल, अशी अपेक्षा केली जात आहे.

बहुप्रतिक्षित व बहुचर्चित 'मिनी घाटी'ची काही महिन्यांपूर्वी 'ओपीडी' आणि आता 'आयपीडी'देखील छुप्या पद्धतीनेच सुरू झाली आहे. सद्यस्थितीत रुग्णालयात दोन वेळेला ओपीडी सुरू असून, आता पुरुष व महिला वॉर्ड सुरू करण्यात आला आहे. 'ओपीडी'तील ज्या रुग्णांना दाखल करुन त्यांच्यावर उपचार करण्याची गरज आहे, अशांनाच सध्या वॉर्डात दाखल केले जात आहे. अर्थात, गेल्या दोन दिवसांत मोजक्याच रुग्णांवर उपचार झाले असले तरी भविष्यात 'आयपीडी'च्या रुग्णांची संख्या वाढेल, अशी अपेक्षा केली जात आहे. या संदर्भात जिल्हा शल्यचिकित्सक डॉ. सुंदर कुलकर्णी यांना छेडले असता, अजूनही शस्त्रक्रियागृहाचे काही काम बाकी असल्यामुळे रुग्णांवर शस्त्रक्रिया होऊ शकत नाही. हे काम पूर्ण झाल्यावर निर्जंतुकीकरणाची प्रक्रिया पूर्ण केली जाईल. अपेक्षेप्रमाणे अहवाल येताच प्रसुती विभाग सुरू केला जाईल. टप्प्याटप्प्याने रुग्णालय कार्यान्वित होईल, असेही डॉ. कुलकर्णी यांनी सांगितले.

Unmesh.deshpande@timesgroup.com

Tweet- @ UnmeshdMT

औरंगाबाद : गंगाजळी आटल्याने विकासकामांचे वांदे झालेल्या महापालिकेला सौर घबाड गवसले असून, प्रशासकीय इमारतीवर बसविलेल्या सोलार पॅनलमुळे तब्बल बारा हजार युनीट वीज निर्मिती झाली आहे. ही वीज महावितरणला देण्यात आली असून, त्यातून यापुढे महिन्याकाठी सुमारे आठ लाखांचे उत्पन पालिकेला मिळणार आहे.

औरंगाबादचा स्मार्टसिटी योजनेबरोबरच सोलार सिटी योजनेत देखील समावेश झाला. या योजनेअंतर्गत शहराच्या विविध भागात सोलार पॅनल लावून अपारंपरिक ऊर्जा निर्मिती करण्याचे नियोजन करण्यात आले. सोलार सिटीचा पहिला प्रकल्प पालिकेच्या प्रशासकीय इमारतीपासून सुरू करण्याचा निर्णय प्रशासनाने घेतला. त्यानुसार पालिकेच्या टप्पा क्रमांक तीन इमारतीवर गणेशोत्सवाच्या पहिल्या दिवशी सोलार पॅनल बसविण्यात आले. या पॅनलमधून निर्माण होणाऱ्या वीजेमुळे पालिकेच्या प्रशासकीय इमारतीचे वीजेचे बील कमी होईल, असा दावा करण्यात आला होता. प्रशासकीय इमारतीचे बिल किती कमी झाले, याची माहिती पालिकेच्या लेखा विभागाकडून घेतली असता सुमारे दोन लाख रुपयांचा फायदा सोलार पॅनलच्या प्रकल्पामुळे होईल असे स्पष्ट करण्यात आले. टप्पा क्रमांक तीन या इमारतीवर बसविलेल्या सोलार पॅनलमुळे रोज सरासरी चारशे युनीट वीज निर्मिती होते. निर्माण झालेली वीज महावितरण कंपनीला व्यावसायिक दराने दिली जाते. रोज निर्माण होणाऱ्या चारशे युनीट वीजेचा विचार केल्यास महिनाभरात सरासरी बारा हजार युनीट वीज निर्मिती झाली आहे. एवढी वीज व्यावसायिकदराने महावितरणला विकल्यामुळे सुमारे आठ लाख रुपये महावितरणकडून महापालिकेला दर महिन्याला मिळणार आहेत. महापालिकेच्या तिन्हीही प्रशासकीय इमारतींचे वीजेचे बिल दर महिन्याला सुमारे साडेपाच ते सहा लाख रुपये येते. हे बिल आठ लाख रुपयांमधून वळते केल्यास दोन ते अडीच लाख रुपये शिल्लक राहतील असे मानले जात आहे. शिल्लक राहिलेल्या या रकमेतून पालिकेच्या अन्य काही इमारतींचे बिल अदा करणे शक्य आहे असे लेखा विभागाचे मत आहे.

\Bफायद्यातला पहिलाच प्रकल्प

\Bसोलार पॅनलच्या माध्यमातून महापालिकेचा पहिलाच फायद्यातला प्रकल्प तयार झाला आहे. महापालिकेने आतापर्यंत बीओटी, सिटी बस, साफसफाईच्या कामाचे खासगीकरण, भूमिगतगटार योजना या सारखे अनेक प्रकल्प राबवले. सर्वच प्रकल्प फसले किंवा तोट्यात गेले. सोलार पॅनल्सच्या प्रकल्पातून मात्र पालिकेला लाभ मिळाला आहे.

सोलार पॅनलचा पायलट प्रकल्प यशस्वी झाल्याचा आनंद आहे. सोलार सिटी संदर्भात स्मार्टसिटी मिशनमधून आपण संपूर्ण शहराचे नियोजन करीत आहोत. त्यामुळे अपारंपरिक ऊर्जा वापराला चालना मिळेल व महापालिकेची बचत देखील होईल. परवाच मुख्यमंत्र्यांबरोबर बैठक झाली. त्यात सोलार सिटीवर चर्चा झाली. औरंगाबादमधील सर्व शासकीय कार्यालयांच्या इमारतीवर हा प्रकल्प उभारण्याचे ठरले आहे.

- नंदकुमार घोडेले, महापौर

म. टा. प्रतिनिधी, औरंगाबाद

शिवसेनेने स्वबळावर निवडणूका लढण्याची संपूर्ण तयारी केली असून, दसऱ्यानंतर पक्षप्रमुख उद्धव ठाकरे राज्यातील सर्व लोकसभा मतदारसंघाचा दौरा करणार आहेत. २३ ऑक्टोबर रोजी ते मराठवाड्यात येणार असून, त्यांच्या उपस्थितीत बीड आणि औरंगाबाद येथे मेळाव्याचे आयोजन करण्यात येणार आहे.

भारतीय जनता पक्षाबरोबर युती न करता लोकसभा आणि विधानसभेची निवडणूक स्वबळावर लढण्याची घोषणा शिवसेनेने पूर्वीच केली आहे. आता लोकसभा निवडणुकीचे वारे सुरू झाल्यामुळे शिवसेनेचे पक्षप्रमुख उद्धव ठाकरे दसरा मेळाव्यानंतर लोकसभा निवडणुकीच्या दृष्टीने चाचपणी करण्यासाठी व कार्यकर्त्यांनी संवाद साधण्यासाठी प्रत्येक मतदारसंघात जाणार आहेत. मिळालेल्या माहितीनुसार ठाकरे यांच्या दौऱ्याची सुरुवात खान्देशातून होणार आहे. त्यानंतर ते २३ ऑक्टोबर रोजी मराठवाड्यात येतील. मराठवाड्यातील दौऱ्यात पहिल्या टप्प्यात त्यांच्या उपस्थितीत बीड आणि औरंगाबाद येथे गटप्रमुख, बुथप्रमुख, शाखा प्रमुखांचा मेळावा आयोजित केला जाणार आहे. सूत्रांनी दिलेल्या माहितीनुसार सकाळी बीड येथील मेळाव्याला ठाकरे मार्गदर्शन करतील, तर सायंकाळी औरंगाबादेतील मेळाव्यात ते उपस्थित राहतील. औरंगाबादेत सुमारे पाच हजार कार्यकर्त्यांचा मेळावा होईल, असा विश्वास व्यक्त केला जात आहे. औरंगाबाद लोकसभा मतदारसंघात शिवसेनेची दोन हजार बुथप्रमुखांची फौज तयार आहे, त्याशिवाय गटप्रमुख आणि शाखा प्रमुख मेळाव्याला येतील. दसरा मेळाव्याच्या नंतर लोकसभा मतदारसंघातील मेळाव्याची तयारी सुरू होईल.

म. टा. प्रतिनिधी, औरंगाबाद

क्रेडाईने आयोजित केलेल्या 'ड्रीम होम' प्रॉपर्टी एक्स्पोला उदंड प्रतिसाद मिळत असून, आजपर्यंत तब्बल पावणेतीनशे जणांनी आपल्या स्वप्नातील घराचे बुकिंग केले आहे. प्रदर्शनाचा रविवारी शेवटचा दिवस आहे.

क्रांती चौकातील हॉटेल मॅनोर लॉन्समध्ये सुरू असलेल्या या भव्य गृह प्रदर्शनाच्या निमित्ताने अनेक मंडळी आवर्जून भेट देत आहेत. शनिवारी माजी मुख्यमंत्री पृथ्वीराज चव्हाण, आमदार सुभाष झांबड यांनी प्रदर्शनाला भेट देत क्रेडाईचे कौतुक केले. या प्रदर्शनाचे वैशिष्ट्य म्हणजे अनेक स्टॉलधारकांनी घर खरेदी करू इच्छिणाऱ्यांकरिता साइटवर लगेचच भेट देण्यासाठी वाहनांची व्यवस्थाही केली आहे. याशिवाय प्रदर्शनाच्या निमित्ताने अनेक सवलतीही जाहीर केल्या आहेत. अनेक वित्तीय संस्थांनीही प्रदर्शनात सहभाग घेतला असून, विविध कर्ज योजना, सवलती यांची माहिती दिली जात आहे. त्यामुळे आपल्या बजेटमधील घर निवडणे इच्छुकांना सोपे ठरते आहे. सर्व कागदपत्रे असतील तर जागेवरच कर्ज मंजुरीचीही व्यवस्थाही बँक, वित्तीय संस्थांनी केली आहे. नागरिकांचा मोठा प्रतिसाद लाभत असून, आतापर्यंत सहा हजार जणांनी भेट दिली आहे, तर आतापर्यंत पावणेतीनशे जणांनी घरांचे बुकिंग केले आहे. प्रदर्शनाच्या यशस्वीतेकरिता क्रेडाईचे अध्यक्ष रवी वट्टमवार, सचिव आशुतोष नावंदर, आयोजन समिती प्रमुख संग्राम पटारे, नरेंद्रसिग जबिंदा, प्रशांत अमिलकंठवार, सौरभ गुप्ता प्रीतेश धानुका, रमेश नागपाल, सिद्धार्थ कांकरिया, उदय कासलीवाल, विजय शक्करवार, अनिल अग्रवाल आदीसह सर्व कार्यकारिणी सदस्य प्रयत्नशील आहेत.

\Bदरवाढीपूर्वीची सुवर्णसंधी

\Bरेरा, जीएसटी आता स्थिरावले आहे. यामुळे बांधकाम क्षेत्रात आलेली तत्कालीन मंदी आता संपुष्टात आल्याचे दिसते. मात्र, लवकरच टायटल इन्शुरन्स येणार आहे. त्याच्या परिणामी येत्या काही दिवसांत घरांच्या किमती वाढण्याची शक्यता आहे. जुन्याच दरात घर खरेदीची ही शेवटची संधी आहे, असे क्रेडाईचे अध्यक्ष रवी वट्टमवार व सचिव आशुतोष नावंदर यांनी सांगितले.

म. टा. प्रतिनिधी, औरंगाबाद

राज्याचे परिवहन मंत्री दिवाकर रावते यांनी शनिवारपासून जिल्ह्यातील दुष्काळ भागाच्या पाहणी दौऱ्यास सुरुवात केली आहे. दुष्काळी परिस्थितीच्या अनुषंगाने जलयुक्त शिवार, जलसंधारण, मागेल त्याला शेततळ्यांची कामे प्रशासनाच्या वतीने मोठया प्रमाणात सुरू करण्यात येणार आहे. यामाध्यमातून औरंगाबाद जिल्ह्यातील पर्जन्यमान कमी असलेल्या गावातील शेतकरी, मजुरांना रोजगार उपलब्ध करून देण्यात येईल, असे त्यांनी पैठण, गंगापूर तालुक्यातील शेतकऱ्यांशी चर्चा करताना सांगितले.

औरंगाबाद जिल्ह्यातील आडूळ, अब्दुलपूर तांडा, पारूंडी, शेंदुरवादा, गुरू धानोरा, दहेगाव बंगला या गावातील पिकांची पाहणी रावते यांनी केली. आमदार संदीपान भुमरे, प्रशांत बंब, जिल्हा परिषद अध्यक्षा देवयानी डोणगावकर, उपविभागीय अधिकारी भाऊसाहेब जाधव, संदीपान सानप, तहसीलदार अरुण जऱ्हाड यावेळी उपस्थित होते. दहेगाव बंगला येथील नारायण खंडेराव शिंनगारे यांच्या शेतात जाऊन रावते यांनी पिकांची पाहणी करून शेतकऱ्यांशी संवाद साधला. यावेळी सरपंच विक्रम राऊत यांनी दुष्काळाची दाहकता मोठी आहे. अन्नधान्य टंचाई बरोबरच जनावरांच्या चाऱ्यांचा प्रश्न गंभीर आहे. जनावरांसाठी वैरण उपलब्ध करून देताना वैरणीसाठी शेतकऱ्यांच्या खात्यावर रक्कम जमा करावी, रेशनची व्यवस्था करत प्रती माणसी पिण्याच्या पाण्याचा कोटा वाढवून द्या, अशी मागणी केली. दरम्यान, विविध गावातील पीक पाहणीनंतर रावते यांच्या अध्यक्षतेखाली जिल्हाधिकारी कार्यालयाच्या सभागृहात तसेच गंगापूर तहसील कार्यालय येथे दु्ष्काळी परिस्थितीत करावयाच्या उपाययोजनांबाबत पैठण, गंगापूर तालुक्यातील अधिकाऱ्यांची आढावा बैठक घेण्यात आली.

म. टा. प्रतिनिधी, औरंगाबाद

मराठवाड्यात सगळीकडे भीषण दुष्काळ परिस्थिती निर्माण झाली आहे. शैक्षणिक, परीक्षा शुल्क भरण्यासाठी पैसेच नसल्यामुळे हजारो विद्यार्थ्यांना यावर्षी परीक्षेवर पाणी सोडावे लागण्याची भीती आहे. त्यामुळे दहावी, बारावी, पदवी, पदव्युत्तरचे शिक्षण घेणाऱ्या विद्यार्थ्यांचे परीक्षा शुल्क माफ करावे, अशी मागणी मराठवाडा पदवीधर मतदारसंघाचे आमदार सतीश चव्हाण यांनी मुख्यमंत्री देवेंद्र फडणवीस, उच्च व तंत्रशिक्षणमंत्री विनोद तावडे यांच्याकडे केली आहे.

मुख्यमंत्री व शिक्षणमंत्र्यांना आमदार चव्हाण यांनी दिलेल्या दिलेल्या निवेदनात म्हटले आहे की, डॉ. बाबासाहेब आंबेडकर मराठवाडा विद्यापीठ व स्वामी रामानंद तीर्थ मराठवाडा विद्यापीठाअंतर्गत शिक्षण घेणारे बहुतांशी विद्यार्थी ग्रामीण भागातील आहेत. दुष्काळाच्या झळांमुळे त्यांना गावाकडून मिळणारी आर्थिक मदत बंद झाल्यामुळे या विद्यार्थ्यांपुढे शिक्षण कसे घ्यायचे, असा प्रश्न निर्माण झाला आहे. यावर्षी स्वामी रामानंद तीर्थ मराठवाडा विद्यापीठाअंतर्गत पदवीचे ८० हजार, तर पदव्युत्तरचे ३५ हजार विद्यार्थी परीक्षा देणार आहेत. डॉ. बाबासाहेब आंबेडकर मराठवाडा विद्यापीठाअंतर्गत जवळपास तीन लाख सात हजार विद्यार्थी परीक्षा देणार आहेत. तसेच मराठवाड्यात दहावी व बारावीची परीक्षा देणाऱ्यांमध्ये देखील सर्वाधिक विद्यार्थी ग्रामीण भागातीलच आहे. परीक्षा जवळ आल्याने शाळा, महाविद्यालयांनी विद्यार्थ्यांकडून शैक्षणिक व परीक्षा शुल्कासाठी तगादा लावला आहे. त्यामुळे मराठवाड्यातील शकडो विद्यार्थी शिक्षण सोडण्याच्या मन:स्थितीत आहेत.

त्यामुळे विद्यार्थ्यांच्या आर्थिक अडचणी लक्षात घेता किमान त्यांची परीक्षा शुल्क माफ करावी,' अशी मागणी करण्यात आली आहे.

………………

म. टा. प्रतिनिधी, औरंगाबाद

तिसगाव परिसरातील सिमेन्स कंपनीचे कॉपर वायर केबल चोरी करणाऱ्या तीन जणांना एमआयडीसी वाळूज पोलिसांनी अटक केली आहे. या प्रकरणात दिनेश उर्फ काल्या डबलू कुमार, आकाश प्रकाश मिसाळ आणि रफिक ख्वाजा शेख या तिघांना अटक केली आहे. त्यांच्याकडून दहा लाखांचा मुद्देमाल जप्त करण्यात आला आहे.

पोलिसांनी दिलेल्या माहितीनुसार नऊ ऑक्टोबर रोजी रात्री दीड ते पावणेतीनच्या दरम्यान अज्ञात व्यक्तीने सुरक्षा रक्षकाला गुप्ती आणि तलवारीचा धाक दाखवून सिमेन्स कंपनीचे आठ लाख दोन हजार ५०० रुपयांचे कॉपर वायर चोरून नेले होते. या प्रकरणात हरेश विश्वासभाई पटेल यांच्या फिर्यादीवरून गुन्हा दाखल केला होता. विशेष पथकाला मिळालेल्या माहितीनुसार संशयित व्यक्ती दिनेश उर्फ काल्या डबलू कुमार (रा. रेल्वे स्टेशन परिसर, औरंगाबाद) याला चेलिपुरा भागातून ताब्यात घेतले. त्याची झडती घेतली असता, एक धारदार गुप्ती जप्त करण्यात आली. काल्याच्या चौकशीनंतर आकाश मिसाळ (वय १९, रा. फुलेनगर, उस्मानपुरा) आणि रफिक ख्वाजा शेख (रा. रेंगटीपुरा, जिन्सी) याला ताब्यात घेण्यात आले. त्याच्याकडून गाडी जप्त करण्यात आली. या गाडीचा उपयोग कॉपर वायर चोरीमध्ये करण्यात आला होता.

औरंगाबाद : तरुणाच्या घराचे बांधकाम सुरू असताना त्याच्याविरुद्ध महापालिका आणि पोलिस ठाण्यात तक्रार अर्ज देत २५ हजारांची खंडणी स्वीकारणाऱ्या खंडणीखोराला जिन्सी पोलिसांनी रंगेहाथ पकडले. पोलिसांनी पकडताच या खंडणीखोराने केलेला करारनाम्याचा मुद्रांक फाडला. मुजीब खान उस्मान खान (वय ४४, रा. चंपाचौक, म्हाडा कॉलनी) असे पकडलेल्या व्यक्तीचे नाव आहे.

रोशनगेट भागातील मोहंमद हाफीज मोहंमद हबीब हसन (वय २४, रा. मेट्रो अपार्टमेंट) यांचे चंपा चौकातील म्हाडा कॉलनीतील घराचे बांधकाम सुरू आहे. त्यामुळे बांधकामाचे काही साहित्य सार्वजनिक रस्त्यावर आहे. त्याला अडचणीत आणण्यासाठी खंडणीखोर मुजीब खान याने काही दिवसांपूर्वी महापालिकेचा अतिक्रमण विभाग आणि जिन्सी पोलिस ठाण्यात तक्रार अर्ज दिला. या तक्रार अर्जावरून त्याने मोहंमद हाफीजला धमकावण्यास सुरुवात केली. त्याच्याकडे यापुढे खोट्या तक्रारी न करण्यासाठी तीन लाखांच्या खंडणीची मागणी केली. याशिवाय मुद्रांकावर तसा करारनामा देखील केला. अखेर त्याच्या त्रासाला कंटाळलेल्या मोहंमद हाफीजने जिन्सी पोलिस ठाणे गाठत तक्रार दिली. त्यावरून जिन्सी पोलिस ठाण्याचे उपनिरीक्षक दत्ता शेळके व त्यांच्या पथकाने २५ हजारांची खंडणी स्वीकारताना मुजीब खानला रंगेहाथ पकडले. मुजीब खानची न्यालयात जामिनावर मुक्तता झाली.