म. टा. प्रतिनिधी, औरंगाबाद

कर्ज देण्याचे आमीष दाखवून सात लाखांना गंडा घातल्याप्रकरणी दिल्लीचा आरोपी जितेंद्रसिंग गोविंदसिंग मीना याचा नियमित जामीन अर्ज जिल्हा व अतिरिक्त सत्र न्यायाधीश एच. एस. महाजन यांनी सोमवारी (१५ ऑक्टोबर) फेटाळला.

याप्रकरणी दलपतभाई दामजीभाई पटेल (४२, सिडको अन-आठ) यांनी फिर्याद दिली होती. फिर्यादीनुसार; २० सप्टेंबर २०१७ रोजी फिर्यादीला महिलेचा फोन आला होता. तिने आपण पुणे येथील कंपनीतून बोलत असल्याचे सांगत कर्ज हवे असल्यास कागदपत्रे पाठवा, असे सांगितले होते. फिर्यादीने ५ ऑक्टोबर २०१७ रोजी ईमेलवर पॅन कार्ड, आधार कार्ड व बँकेचे स्टेटमेंट पाठविले. त्यानंतर फिर्यादीला एनओसी, कार्ड चार्जेस अशा विविध शुल्कांच्या नावाखाली आरोपींनी सात लाख १६ हजार २०० रुपयांना गंडा घातला.

याप्रकरणी फिर्यादीच्या तक्रारीवरून आरोपींविरोधात सिडको पोलिस ठाण्यात गुन्हा दाखल करण्यात आला होता. पोलिसांनी तपास करुन आरोपी जितेंद्रसिंग मीना (२६, रा. हरिनगर, मायापुरी, दिल्ली) याला १६ सप्टेंबरला दिल्लीतून अटक केली. कोर्टाने त्याची आधी पोलिस कोठडीत व नंतर न्यायालयीन कोठडीत रवानगी केली. आरोपीने नियमित जामिनीसाठी अर्ज दाखल केला असता, आरोपीने आर्थिक फसवणूक करून मिळवलेली रक्कम आरोपीकडून हस्तगत करणे आहे. आरोपी हा मुळचा दिल्लीचा असल्याने त्याला जामीन दिल्यास तो पसार होऊ शकतो. त्यामुळे जामीन मंजूर करू नये, अशी विनंती जिल्हा सरकारी वकील अविनाश देशपांडे यांनी कोर्टात केली. ही विनंती मान्य करून कोर्टाने आरोपीचा नियमित जामीन अर्ज फेटाळला. जिल्हा सरकारी वकील अॅड. देशपांडे यांना अ‍ॅड. सिद्धार्थ वाघ यांनी सहकार्य केले.

म. टा. प्रतिनिधी, औरंगाबाद

चारित्र्यावर संशय घेऊन विवाहितेच्या अंगावर रॉकेल ओतून तिला जाळून मारणारा तिचा पती अमोल जगन्नाथ साळवे याला सोमवारी (१५ ऑक्टोबर) अटक करण्यात आली. त्याला कोर्टात हजर करण्यात आले असता आरोपी पतीला शुक्रवारपर्यंत (१९ ऑक्टोबर) पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. के. देशपांडे यांनी दिले.

याप्रकरणी मृत वैशाली साळवे यांनी फिर्याद दिली होती. फिर्यादीनुसार; आरोपी अमोल (३८, रा. राहुल नगर, रेल्वे स्थानक परिसर) व मृत वैशाली यांचा आठ वर्षांपूर्वी विवाह झाला होता. त्यांना एक मुलगी व मुलगा आहे. आरोपी अमोल हा पत्नी वैशालीच्या चारित्र्यावर संशय घेऊन तिला नेहमी मारहाण करीत असे. आरोपीचे भाऊ भानुदास साळवे, अंबादास साळवे, जाऊ वर्षा अंबादास साळवे, सासू व नणंद सुनीता साठे हेही तिचा छळ करीत होते. २३ जुलै २०१८ रोजी सायंकाळी साडेपाचच्या सुमारास आरोपी अमोलने पत्नीच्या चारित्र्यावर संशय घेत तिला शिविगाळ केली व घरातील रॉकेलने भरलेली कॅन वैशालीच्या अंगावर ओतून तिला पेटवन दिले. गंभीर अवस्थेत तिला उपचारासाठी घाटीत दाखल करण्यात आले असता, तिने दिलेल्या जबाबावरुन आरोपींविरोधात सातारा पोलिस ठाण्यात गुन्हा दाखल करण्यात आला होता.

उपचारादरम्यान २८ जुलै रोजी वैशालीचा मृत्यू झाला. त्यानंतर प्रकरणात आरोपी अमोल साळवे विरोधात खुनाचा गुन्हा दाखल करण्यात आला. मात्र आरोपी अमोल हा आगीत भाजल्याने त्याच्यावर दोन महिन्यांपासून घाटीत उपचार सुरु होते. उपचार पूर्ण झाल्याने पोलिसांनी आरोपीला सोमवारी अटक करून कोर्टात हजर केले असता, कोर्टाने आरोपीला शुक्रवारपर्यंत पोलिस कोठडी सुनावली. सहायक सरकारी वकील योगेश तुपे यांनी काम पाहिले.

म. टा. प्रतिनिधी, औरंगाबाद

व्हॉटस अॅप पोस्टमुळे झालेल्या प्राणघातक हल्ल्यात मृत्युमुखी पडलेल्या मोसीन पठाणच्या सहा मारेकऱ्यांना रविवारी मध्यरात्री शोधमोहीम राबवून हर्सूल पोलिसांनी अटक केली. फातेमानगर भागात रविवारी सायंकाळी १४ जणांनी हा खुन केला हेाता. दरम्यान, दुसऱ्या दिवशी तणावपूर्ण वातावरणात मोसीन पठाण याच्यावर अंत्यसंस्कार करण्यात आले.

प्लॉटिंगचा व्यवसाय असलेले मोसीन पठाण हे त्यांच्या मित्रमंडळीच्या एका व्हॉटस अॅप ग्रुपमध्ये होते. या ग्रुपवर काही जणांशी त्यांचा पोस्ट टाकण्यावरून वाद सुरू होता. गेल्या काही दिवसांपासून हे व्हॉटस अॅपयुद्ध सुरू होते. या वादातून मोसीन पठाण यांना काही जणांनी फातेमानगर भागात सायंकाळी बोलावले. मोसीन पठाण यांनी त्याचा भाचा इरफान शेख (वय २५, रा. हर्सूल) याला देखील बोलावून घेतले होते. या ठिकाणी भर चौकात मोसीन पठाण यांच्यावर १४ ते १५ जणांनी तलवार, रॉड, गुप्ती, लाठ्या-काठ्यांनी हल्ला चढवला. यामध्ये मोसीन पठाण जागीच ठार झाले, तर इरफान हा गंभीर जखमी झाला.

याप्रकरणी हर्सूल पोलिस ठाण्यात १४ आरोपींविरुद्ध खुनाचा गुन्हा दाखल करण्यात आला आहे. पोलिस निरीक्षक मनीष कल्याणकर यांनी रात्रभर शोध मोहीम राबवून सहा आरोपींना अटक केली. यामध्ये जावेद कलंदर पटेल (वय ३७), शेख रहीम उर्फ बाबा रसूल पटेल (वय ५०), शेख आबेद नूर पटेल (वय २१), आमेर नबी पटेल वय (२०), तौफिक गुलाब पटेल (वय २६) आणि सद्दाम सलीम पटेल (वय २६, सर्व रा. हर्सूल परिसर) यांचा समावेश आहे. उर्वरित पसार आरोपींचा शोध सुरू असल्याची माहिती पोलिस निरीक्षक मनिष कल्याणकर यांनी दिली.

…

\Bफातेमानगर चौकात बंदोबस्त\B

मोसीन पठाण यांच्या नातेवाईकांनी सोमवारी पोस्टमार्टेमनंतर मृतदेह ताब्यात घेण्यास नकार दिला. यामुळे काही काळ तणाव निर्माण झाला होता. निरीक्षक कल्याणकर यांनी नातेवाईकांची समजूत काढल्यानंतर मृतदेह ताब्यात घेऊन अंत्यसंस्कार केले. तणावग्रस्त वातावरणात अंत्यसंस्कार पार पडले असून, फातेमानगर चौकात देखील बंदोबस्त तैनात करण्यात आला आहे.

म. टा. प्रतिनिधी, औरंगाबाद

एकीकडे देशातला एक वर्ग 'भाकरीचा चंद्र शोधण्यात जिंदगी बरबाद झाली...' अशा अवस्थेत असताना, दुसरीकडे औरंगाबादवासीय दररोज तब्बल शंभर क्विंटल अन्न कचऱ्यात फेकून देण्यात येत आहे.

शहरातील विविध वॉर्डात पहाटेपासून कचरा वेचण्याची प्रक्रिया होते. कचरा वेचक कर्मचाऱ्यांना सध्या अन्न नासाडीच्या प्रकाराला मोठ्या प्रमाणात सामोरे जावे लागत आहे. जे शिळे अन्न कचऱ्यामध्ये टाकण्यात येते त्यामध्ये पोळी, भाकरी आणि भात सर्वाधिक आढळतो. पोळी, भाकरी पेपरमध्ये गुंडाळून टाकण्यात येते. एका ठिकाणाहून तीन ते तीनशे पोळ्या, भाकरी सापडतात. अन्न कचऱ्यात टाकण्याचे प्रकार अधिक होत असल्याने आणि ते पायात येऊ नये, अन्नाचे पावित्र्य पाळल जावे यासाठी कचरा वेचकांनी त्यासाठी स्वतंत्र व्यवस्था केली आहे. उघड्यावर टाकलेले अन्न वेगळे केले जाते. किंवा कचरा गाडी फिरताना स्वतंत्र गोणीत हा कचरा टाकण्यास नागरिकांना सांगण्यात येते. दररोज एका वॉर्डातून चार गोणी भरून पोळी, भाकरी जमा होतात. त्यावर प्रक्रिया केली जाते असे पालिकेच्या अधिकाऱ्यांनी सांगितले. शहरात ११५ वॉर्ड आहेत. प्रत्येक ठिकाणी कमी, अधिक प्रमाण आहे.

\Bमंगलकार्यालयांचे ५५ टक्के अन्न उघड्यावर

\Bशहरातील कचऱ्यामध्ये सापडणारे हे अन्न यासह मंगलकार्यालयामध्येही ५५ टक्के अन्न नासाडी होत असल्याचे निर्ष्कष अन्न वाचवा समितीने काढला आहे. लग्न, महोत्सव, भंडाऱ्यामध्ये प्रमाणापेक्षा अन्न शिजवणे हेच अन्न नासाडीचे कारण असल्याचे सांगितले जाते. यासह ताटामध्ये घेताना अधिक घेतले जाते. जेवढे जाते तेवढे खाल्ले जाते अन् उरलेले अन्न टाकून देण्यात येते, जे वाया जाते.

तीनशे-तीनशे पोळ्या कचऱ्यामध्ये टाकल्याचे समोर आले आहे. गृहणींना कल्पना नसते. कळत-नकळत अन्नाची नासाडी होते. शहराचा विचार केल्यास त्याचे प्रमाण मोठे आहे. हे तर कचऱ्यामध्ये आढळणारे शिळे अन्न झाले. मंगलकार्यालयांमध्येही अंदाज न आल्याने ५५ टक्के अन्न वाया जाते. जे उघड्यावर टाकल्या जाते. अशा प्रकारे नासाडी होणार नाही याची काळजी घेण्याची गरज आहे.

- अनंत मोताळे, अन्न वाचवा समिती, औरंगाबाद

कचऱ्यामध्ये शिळे अन्न मोठ्या प्रमाणात आढळते. ज्यामध्ये पोळी, भाकरी आणि भात आढळतो. प्रमाण वाढल्याने कचऱ्यातून ते आम्ही बाहेर काढतो. एका वॉर्डात किमान चार पोती भरून अशा प्रकारचे अन्न निघते. जे उघड्यावर फेकले जाते. आता तर आमच्या ज्या कचरा वेचणाऱ्या गाड्या आहेत. त्यावर स्वतंत्र गोणी केल्या आहेत. कचरा टाकण्यासाठी आलेल्यांना अन्न असेल, तर त्यामध्ये टाकण्यासाठी सांगतो. शिळे अन्न टाकणे ही त्यांची वैयक्तिक बाब आहे. मात्र, अन्न नासाडीपेक्षा प्रमाण पद्धत असावी असे वाटते.

- कमलाकर ज्ञाते, स्वच्छता निरीक्षक, महापालिका

म. टा. प्रतिनिधी, औरंगाबाद

महापालिकेच्या तिजोरीत खडखडाट असताना जनतेच्या पैशाची उधळपट्टी करून अधिकाऱ्यांना नवीन वाहने घेण्याचा प्रस्ताव रद्द करा, अशी मागणी महाराष्ट्र नवनिर्माण सेनेने महापालिका आयुक्तांकडे केली आहे. 'काम नाही कवडीचे, गाडी हवी लाखांची,' असे म्हणत मनसेने आयुक्त डॉ. निपुण विनायक यांना निवेदन सादर केले.

महापालिकेतील २३ अधिकाऱ्यांना नवीन वाहने खरेदीसाठी सुमारे एक कोटी ३८ लाखांचा प्रस्ताव २० ऑक्टोबरच्या सर्वसाधारण सभेत ठेवल्याचे समजले आहे. पालिकेतील काही अधिकारी खासगी वाहने वापरतात, त्या बदल्यात त्यांना दरमहा १५ हजार रुपये देते. त्यात अधिकारी समाधानी आहेत. असे असताना नवीन वाहने कोणाला खुश करण्यासाठी खरेदी केल्या जात आहेत, असे निवेदनात म्हटले आहे.यावळी आयुक्तांना प्रतिकात्मक स्वरुपात लहान मुलांच्या खेळणीतील २३ वाहने भेट देण्यात आल्या. या निवेदनावर सुमीत खांबेकर, बिपीन नाईक, संदीप कुलकर्णी, वैभव मिटकर, सतनामसिंग गुलाटी, प्रशांत दहीवाडकर, चेतन पाटील, प्रवीण मोहिते, मनीष जोगदंडे आदींची नावे आहेत. पालिकेच्या तिजोरीत खडखडाट असून कंत्राटदारांचे देणे थकले आहे. त्यामुळे विकासकामे ठप्प झाली, तर अधिकारी-कर्मचाऱ्यांचे वेतन देण्यासाठी पालिकेकडे निधी नाही. अर्थसंकल्पात तरतूद नसताना ८९ माजी सैनिकांना नियुक्त करण्यात आले. एक वर्षात त्यांच्या पगारावर दोन कोटी रुपये खर्च केले जाणार आहेत. कचऱ्याबद्दलच्या जनजागृतीसाठी पाच खासगी संस्थांवर कोट्यावधींचा खर्च केला जात आहे, असे या निवेदनात म्हटले आहे.

म. टा. प्रतिनिधी, औरंगाबाद

समन्यायी पाणी वाटप कायद्यानुसार जायकवाडी धरणात अहमदनगर व नाशिक जिल्ह्यातील धरणातून सहा ते सात टीएमसी पाणी सोडण्यात येणार आहे. जायकवाडी धरणात १७२ दशलक्ष घनमीटर पाण्याची तूट असल्यामुळे पाणी सोडण्याचा निर्णय पाटबंधारे महामंडळाच्या बैठकीत घेण्यात आला. नगर-नाशिक जिल्ह्यातील शेतकऱ्यांनी पाणी सोडण्यास विरोध केल्यामुळे मराठवाडा विरुद्ध नगर-नाशिक असा संघर्ष पुन्हा उफाळण्याची शक्यता आहे.

समन्यायी पाणी वाटपाबाबत सोमवारी गोदावरी पाटबंधारे महामंडळात बैठक झाली. नगर व नाशिक जिल्ह्यातील पाणीवापराबाबत मुख्य अभियंता आणि अधिकाऱ्यांनी आढावा घेऊन चर्चा केली. येत्या तीन दिवसांत नगर-नाशिक जिल्ह्यातील धरणातून जायकवाडी धरणात पाणी सोडण्यात येईल, असे गोदावरी पाटबंधारे महामंडळाचे कार्यकारी संचालक अजय कोहीरकर यांनी सांगितले. बैठकीला औरंगाबादचे मुख्य अभियंता दि. द. तवार, नाशिकचे मुख्य अभियंता वि. भा. कुलकर्णी, महामंडळाचे अधीक्षक अभियंता अ. रा. नाईक, 'कडा'चे अधीक्षक अभियंता संजय भर्गोदेव, अधीक्षक अभियंता राजेश मोरे, अहमदनगरचे मुख्य अभियंता आर. पी. मोरे, किरण देशमुख, कार्यकारी अभियंता पालखेड राघवेंद्र भाट, नाशिकचे कार्यकारी अभियंता राजेंद्र शिंदे यांची उपस्थिती होती. वरील धरणातील पाणीसाठा आणि पाणीवापर लक्षात घेऊन पाण्याची तूट निश्चित करण्यात आली. त्यानुसार तीन दिवसात पाणी सोडण्यात येईल. नगर-नाशिक जिल्ह्यातील शेतकऱ्यांनी जायकवाडीत पाणी सोडण्यास विरोध केला आहे. परिणामी, दुष्काळी परिस्थितीत दोन विभागात पाणीसंघर्ष होण्याची शक्यता आहे.

\B...असा आहे पाणीसाठा

\Bमुळा समुहातून १८९ दलघमी पाणीवापर झाला. सध्या ४०५ दलघमी पाणीसाठा शिल्लक असून पाणीवापरासह ५९४ दलघमी होता. प्रवरा समुहातून ९६ दलघमी पाणीवापर झाला असून, सध्या ५०६ दलघमी शिल्लक आहे. वापरासह ६०२ दलघमी पाणीसाठा होता. गंगापूर समुहात ६८ दलघमी पाणीवापर झाला असून २४६ दलघमी पाणीसाठा शिल्लक आहे. तर वापरासह ३१४ दलघमी पाणीसाठा होता. गोदावरी दारणा समुहातून १६५ दलघमी पाणीवापर झाला आहे. ६०९ दलघमी पाणीसाठा शिल्लक असून ७१४ दलघमी पाणीसाठा झाला होता. तर पालखेड समुहातून १०० दलघमी वापर झाला असून, २९८ दलघमी पाणीसाठा शिल्लक आहे. ३९८ दलघमी इतका पाणीसाठा होता. जायकवाडी धरणातून ४४१ दलघमीचा वापर झाला असून ७९५ दलघमी पाणीसाठा शिल्लक आहे. या परिस्थितीचा आढावा घेऊन पाण्याची तूट काढण्यात आली आहे.

\Bतीन दिवसांत पाणी सोडणार \B

समन्यायी पाणी वाटप कायद्यानुसार १५ ऑक्टोबरला नगर-नाशिकच्या एक जुलै ते १५ ऑक्टोबरपर्यंतच्या खरिपाच्या पाणी वापराचा आढावा घेण्यात आला. या जिल्ह्यातील एकूण पाणीसाठा, वापरलेले पाणी आणि शिल्लक पाणीसाठा याचा हिशेब करण्यात आला. त्यानुसार कोणत्या धरणातून किती पाणी सोडायचे हा निर्णय तीन दिवसात घेण्यात येईल, असे कार्यकारी संचालक अजय कोहीरकर यांनी सांगितले. यानुसार सहा ते सात टीएमसी पाणी सोडण्यात येणार आहे.

\Bनगर-नाशिक विरुद्ध मराठवाडा

\B२०१२मध्ये ऐन दुष्काळात जायकवाडी धरणात पाणी सोडण्यावरून नगर-नाशिक विरुद्ध मराठवाडा असा संघर्ष सुरू झाला होता. मराठवाडा जनता विकास परिषदेने न्यायालयात याचिका करुन पाणी सोडण्यास भाग पाडले होते. सध्या जायकवाडीत ३६ टक्के पाणीसाठा शिल्लक आहे. मात्र, जायकवाडी ६५ टक्क्यांपेक्षा कमी भरल्यास समन्यायी पाणी वाटप कायद्यानुसार पाणी सोडणे बंधनकारक आहे. यानुसार पाणी सोडण्यात येणार आहे.

म. टा. प्रतिनिधी, औरंगाबाद

थकित मजुरी व ओळख पत्र त्वरित मिळावे यासाठी कागद, काच, पत्रा कामगारांनी मंगळवारपासून महापालिकेसमोर बेमुदत उपोषण सुरू केले आहे. दरम्यान, महापौरांच्या आश्वासनानंतर आंदोलन मागे घेण्यात आले आहे.

थकित मजुरी व ओळख पत्र त्वरित मिळावे यासह अन्य मागण्यांसाठी वारंवार पाठपुरावा करूनही न्याय मिळत नसल्याने कागद, काच, पत्रा कामगारांमध्ये तीव्र नाराजी आहे. महापौरासह महापालिका आयुक्तांनी यापूर्वी आश्वासन देऊनही एकही मागणी मान्य न झाल्याने संतप्त झालेल्या या कामगारांनी बेमुदत उपोषणाचे हत्यार उपसले. कामगार नेते सुभाष लोमटे, आशा डोके, कल्पना कुलकर्णी, देविदास कीर्तीशाही यांच्यासह कामगार मोठ्या संख्येने उपस्थित होते. दरम्यान, महापौर घोडेले यांनी आंदोलनस्थळी जात कामगारांशी चर्चा केली. तर महापौरासह आयुक्तांनीही कामगारांचे प्रश्न सोडविण्यात येईल, असे आश्वासन दिल्याने आंदोलन तूर्तास स्थगित करत असल्याने संघटनेच्या नेत्या डोके यांनी सांगितले.

म. टा. प्रतिनिधी, औरंगाबाद

शहरात मोठ्या प्रमाणात होत असलेली अन्नाची नासाडी कमी करा, अन्न वाचवा, असा नारा अन्न वाचवा समितीने मंगळवारी फेरी काढून दिला. 'इतना ही लो थाली मे की व्यर्थ न जाय नाली मे' अशा घोषणा यावेळी देण्यात आल्या.

जागतिक अन्न अधिकार दिनानिमित्त संस्थान गणपती मंदिरापासून सहायक पोलिस आयुक्त गोवर्धन कोळेकर यांच्या प्रमुख उपस्थितीत फेरीला सुरुवात झाली. राजाबाजार, पानदरिबा मच्छली खडक, गुलमंडी मार्गे औरंगपुऱ्यातील बलवंत वाचनालया जवळ फेरी विसर्जित करण्यात आली. शहरातील मंगल कार्यालय, घरांमध्ये अन्नाची नासाडी करू नका, अन्न वाचवा असा संदेश ही मंडळी देत होती. जनजागृतीसाठी अन्न हे पूर्ण ब्रह्म आहे, ताटात अन्न उष्टे टाकू नका, अन्न उकिरड्यावर टाकल्याने पर्यावरणाला धोका निर्माण होतो आहे, पर्यावरणाची काळजी घ्या, अन्नाची बचत अन्नदानापेक्षा श्रेष्ठ असते असे फलक हाती घेत फेरीत नागरिक सहभागी झाले. यावेळी अनंत मोताळे, चंद्रकात वाजपेयी, लता कुलकर्णी, किरण शर्मा, दिलीप आसबे, शिवाजी पाथ्रीकर, सुधीर लाखकर, स्वाती कुलकर्णी, रितू अग्रवाल, राजेश कुलकर्णी, नंदकिशोर कुलकर्णी, अनुराधा पुराणिक, स्वाती सोनार यांची उपस्थिती होती.

कळत नकळत अन्नाची मोठ्या प्रमाणात नासाडी होते. त्याबाबत जनजागृतीसाठी यंदा पहिल्यांदाच अशा फेरी काढून जनजागृती करण्यात आली.

- अनंत मोताळे, अन्न वाचवा समिती

म. टा. प्रतिनिधी, औरंगाबाद

मागील दोन ते तीन वर्षांपूर्वी नाथ सीड्स कंपनीवर वीजेच्या गैरवापराबाबत कारवाई करून महावितरणाने दंडही प्रस्तावित केला होता. याविरोधात मुख्य विदयुत निरीक्षक मुंबई यांच्यासमोर दावा दाखल करण्यात आला. या प्रकरणात महावितरण कंपनीने नाथ सिड्स कंपनीकडून आकारलेला दंड परत करण्याचा आदेश दिला आहे.

पैठण रोडवर असलेल्या नाथ सीड्स कंपनीची इसारवाडी (ता. पैठण, औरंगाबाद) येथे गट क्रमां ५५येथे जागा आहे. या जागेवर त्यांनी सीड्स उद्योगासाठी महावितरण कंपनीकडून औद्योगिक वापरासाठी वर्ष २०१२मध्ये उच्चदाब वीजपुरवठा घेतला. या जागेजवळच गट क्रमांक ५६ मधील काही जागा त्यानी नाथ पल्प अॅँड पेपर मिल यांच्याकडून लीज करारावर घेतली आहे. याबाबत सुरक्षा पथकाने आक्षेप घेऊन, दंड प्रस्तावित केला होता. या प्रकरणात अधीक्षक अभियंता आणि सुरक्षा पथकाचा अहवाल वेगवेगळा येत होता. अधीक्षक अभियंता यांनी वरील प्रमाणे निर्णय दिल्यानंतर सुरक्षा पथकातर्फे त्याच जागेची पुन्हा एकदा १४ ऑगस्ट २०१५ रोजी स्थळ तपासणी केली व पुन्हा त्याच त्रुटी दाखवून दंडात्मक कारवाई करीत ४९.८८ लाखांचे वीज बिल दिले. यावेळी सुरक्षा पथकाने कंपनीस ४९ लाख ८८ हजार रुपयांचे भरण्याचे सांगण्यात आले. याविरोधात कंपनीने दंडाची रक्कम भरून मुख्य विद्युत निरीक्षक मुंबई यांच्याकडे अपील दाखल केले होते.

\Bअधिकाऱ्यावर कारवाईचे आदेश

\Bमुख्य विद्युत निरीक्षक, मुंबई यांच्यासमोर नाथ सीड्स तर्फे ग्राहक प्रतिनिधी म्हणून हेमंत कापडिया यांनी बाजू मांडली. मुख्य विद्युत निरीक्षकांनी या प्रकरणात दोन्ही बाजूचे म्हणणे ऐकून महावितरण कंपनीला दंड केलेली रक्कम नाथ सीड्स कंपनीला जमा करण्याचे आदेश दिले. तसेच या प्रकरणात आर्थिक नुकसान झालेले नसताना ग्राहकाना वेठीस धरणाऱ्या अधिकाऱ्याविरुद्ध कारवाई करण्याचे आदेश दिले आहेत.

औरंगाबाद : महाराष्ट्र जीवन प्राधिकरणाकडून महापालिकेत प्रतिनियुक्तीवर आलेले पाणीपुरवठा विभागाचे उपअभियंता सरताजसिंग चहेल यांना आयुक्त डॉ. निपुण विनायक यांनी पालिकेच्या सेवेतून कार्यमुक्त केले आहे. त्यामुळे चहेल यांना त्यांच्या मूळ विभागात रुजू व्हावे लागेल. चहेल यांच्या कार्यमुक्तीच्या संदर्भात आयुक्तांनी काढलेल्या आदेशात म्हटले आहे की, चहेल यांची नियुक्ती ३ जून २०१८पर्यंत राहील असे आदेशात नमूद केले आहे. हा कालावधी संपल्यामुळे त्यांना १५ ऑक्टोबर २०१८ रोजी महापालिकेच्या सेवेतून कार्यमुक्त करण्यात येत आहे. पालिकेचे तत्कालीन आयुक्त ओम प्रकाश बकोरिया यांनी चहेल यांची प्रतिनियुक्तीवर नियुक्ती करून घेऊन समांतर जलवाहिनीचा प्रकल्प त्यांच्या हाती दिला होता. बकोरियांबरोबर काम करताना समांतर जलवाहिनी प्रकल्पातील अनेक त्रुटी त्यांनी निदर्शनास आणल्या होत्या. बकोरिया यांची बदली झाल्यावर चहेल वादात सापडले. काही नगरसेवकांनी त्यांच्यावर आरोप देखील केले. उपमहापौर विजय औताडे यांच्याबरोबर त्यांचे झालेले भांडण सर्वश्रुत आहे. औताडे यांच्या विरोधात चहेल यांनी पोलिसात तक्रार देखील दाखल केली आहे.

म. टा. प्रतिनिधी, औरंगाबाद

कुलगुरू डॉ. बी. ए. चोपडे यांचे वादग्रस्त वक्तव्य असलेल्या कथित ऑडिओ क्लिपचा वाद धुमसत आहे. चोपडे यांच्या 'बेताल' वक्तव्याच्या विरोधात राज्यपालांची भेट घेऊ असे विद्यापीठ विकास मंचने जाहीर केले. वादग्रस्त वक्तव्याबाबत विद्यापीठ विकास मंचचे अधिसभा सदस्य आणि व्यवस्थापन परिषद सदस्यांनी कुलगुरूंची भेट घेतली. क्लिपचा खुलासा करण्यासाठी कुलगुरू चोपडे पत्रकार परिषद घेण्याची शक्यता आहे.

डॉ. बाबासाहेब आंबेडकर मराठवाड़ा विद्यापीठाचे कुलगुरू डॉ. बी. ए. चोपडे यांच्या वादग्रस्त वक्तव्याच्या विरोधात विद्यापीठ विकास मंचने आक्रमक भूमिका घेतली आहे. मागील साडेचार वर्षांत बहुजन कुलगुरू म्हणून अनेकदा त्यांचे समर्थन केले. पण, त्यांच्या वक्तव्याचा तीव्र धिक्कार करीत असल्याचे मंचचे निमंत्रक डॉ. गजानन सानप यांनी सांगितले. विद्यापीठ विकासाचे धोरण अवलंबणार असे चोपडे सतत सांगत होते. पण, विद्यापीठातील २० वर्षांची आर्थिक, शैक्षणिक, सांस्कृतिक व सामाजिक गुलामगिरी मोडून काढण्याची त्यांची भाषा त्यात सहभागी होण्याची होती हेच वक्तव्यावरून स्पष्ट होते असे सानप यांनी निवेदनात म्हटले आहे. डॉ. बाबासाहेब आंबेडकर यांच्या नावाने असलेल्या विद्यापीठात पदाने व सन्मानाने मोठ्या असलेल्या व्यक्तीने अशी संविधानविरोधी वक्तव्य करणे चूक आहे. 'अभाविप'च्या कार्यकर्त्यांचे आंदोलन गुंड बोलावून मोडणे, कंत्राटी कर्मचाऱ्यांचे आंदोलन संपवणे आणि अर्थिक गोंधळ थेट कुलगुरुंबद्दल संभ्रम निर्माण करीत असून विद्यापीठासाठी लाजिरवाणी बाब आहे, असे सानप यांनी म्हटले आहे. याबाबत विकास मंचचे अधिसभा सदस्य आणि राज्यपाल नियुक्त व्यवस्थापन परिषद सदस्यांनी मंगळवारी कुलगुरूंची भेट घेऊन मागणीचे निवेदन दिले. यावेळी किशोर शितोळे, डॉ. गजानन सानप, योगिता तौर-होके पाटील, डॉ. रंजन गर्गे, नरहरी शिवपुरे, पंकज भारसाखळे, प्रा. संजय गायकवाड उपस्थित होते. ऑडिओ क्लिपमध्ये छेडछोड झाली असून पोलिसात तक्रार दिली आहे असे चोपडे म्हणाले. मात्र, सदस्यांनी योग्य खुलासा करण्याचे आवाहन केले. त्यानुसार कुलगुरू प्रसारमाध्यमांसमोर म्हणणे मांडणार आहेत.

ही क्लिप आल्यापासून कुलगुरुंनी कोणतेही स्पष्टीकरण दिले नाही. म्हणजे हे सर्व मान्य असल्याबाबत संकोच नसावा. विद्यापीठ विकास मंच याविरोधात उच्च शिक्षणमंत्री व राज्यपालांची भेट घेणार आहे.

- डॉ. गजानन सानप, निमंत्रक, विद्यापीठ विकास मंच

म. टा. प्रतिनिधी, औरंगाबाद

ग्रामीण भागात परीक्षा केंद्रांवर पदवीच्या परीक्षेत सर्रास कॉपी सुरू आहे. कॉपीला अटकाव करण्यासाठी विद्यापीठाने ३१ भरारी पथके नेमली आहेत, पण २२५ परीक्षा केंद्रांवर पोहचण्यासाठी संख्या पुरेशी नाही. शिवाय प्रत्येक केंद्रावर पोलिस नसल्यामुळे कॉपीबहाद्दरांचे फावले आहे. त्यामुळे परीक्षा केंद्र परिसरात कॉप्यांचा खच दिसत आहे.

डॉ. बाबासाहेब आंबेडकर मराठवाडा विद्यापीठाच्या पदवी अभ्यासक्रमाच्या परीक्षा सोमवारी सुरू झाल्या आहेत. औरंगाबाद, बीड, जालना आणि उस्मानाबाद जिल्ह्यात तीन लाख सात हजार विद्यार्थी परीक्षा देत आहेत. एकूण २२५ परीक्षा केंद्र असून परीक्षा सुरळीत सुरू असल्याचा दावा परीक्षा व मूल्यमापन विभागाने केला आहे. ऐनवेळी परीक्षा केंद्र बदलल्यामुळे पहिल्याच दिवशी शेकडो विद्यार्थ्यांची धावपळ झाली. नवीन केंद्र शोधताना परीक्षेला उशीर होऊनही विद्यापीठ प्रशासन ढिम्म आहे. प्रत्येक परीक्षा केंद्रावर सीसीटीव्ही लावणे बंधनकारक असल्याचे प्रशासनाने जाहीर केले होते. परीक्षेच्या नियोजनाबाबत घेतलेल्या प्राचार्यांच्या बैठकीत सीसीटीव्हीवर चर्चा झाली. ऐनवेळी निर्णय 'ऐच्छिक' ठरवत प्रशासनाने कॉपीला मोकळे रान करून दिले. परीक्षा केंद्रावर पोलिस बंदोबस्त पुरवण्याबाबत पोलिस आयुक्तांना पत्र दिल्याचे प्रभारी परीक्षा व मूल्यमापन संचालक डॉ. जयश्री सूर्यवंशी यांनी सांगितले होते. प्रत्यक्षात ग्रामीण भागातील परीक्षा केंद्रांवर पोलिस बंदोबस्ताशिवाय परीक्षा सुरू आहे. सीसीटीव्ही आणि पोलिस बंदोबस्त नसल्यामुळे कॉपीबहाद्दरांनी बिनबोभाट कॉपी केली. कॉपीला अटकाव करण्यासाठी विद्यापीठाने ३१ भरारी पथके नेमली आहेत. मात्र, ही संख्या अत्यंत कमी असून पथकाला प्रत्येक केंद्रावर पोहचणेसुद्धा शक्य नाही. दुर्गम भागातील केंद्रांवर पथक एकदाही पोहचत नाही. शहर आणि परिसरातील केंद्राला एखादी भेट देऊन औपचारिकता पूर्ण केली जात आहे. सत्र परीक्षेत कॉपी रोखण्यात विद्यापीठ प्रशासनाला अपयश आले. वाळूज, चौका, सावंगी, फुलंब्री, खुलताबाद, सोयगाव, बाजारसावंगी, सावळदबारा, पारध अशा अनेक ठिकाणी सर्रास कॉपी सुरू आहे. या केंद्रावर सोमवारी ११ कॉपीबहाद्दरांवर कारवाई करण्यात आली. कॉपीमुळे वादग्रस्त ठरलेल्या काही महाविद्यालयांना पुन्हा परीक्षा केंद्र देण्यात आले आहे. दरम्यान, कुलगुरू डॉ. बी. ए. चोपडे यांच्यासह व्यवस्थापन परिषद सदस्य किशोर शितोळे यांनी परीक्षा केंद्रांची पाहणी केली. सदस्याला वर्गात जाण्याचा आणि फोटोसेशन करण्याचा अधिकार आहे का, असा सवाल प्राचार्यांनी केला आहे. याबाबत परीक्षा विभागाने मौन बाळगले आहे.

\Bआत सगळे 'आलबेल'

\Bचौका येथील एका परीक्षा केंद्राला भेट दिली असता अनेक विद्यार्थी कॉपी करताना दिसले. बाहेरून मात्र वातावरण शांत दिसत होते. परीक्षा केंद्राबाहेर बसलेल्या पालकांनी चर्चा करताना 'केंद्र बाहेरून शांत मात्र आत सगळं आलबेल सुरू आहे' असे सांगितले. परीक्षा केंद्राच्या सभोवताली कॉप्यांचा खच पडलेला होता. अख्खे गाइड वर्गात नेऊन विद्यार्थी परीक्षा देत आहेत. विद्यापीठापासून काही किलोमीटर अंतरावर सुरू असलेले गैरप्रकार परीक्षा विभागाचे वाभाडे काढणारा ठरला आहे.

\Bसहकेंद्रप्रमुख गैरहजर

\Bविद्यापीठाने २२५ केंद्रावर सहकेंद्रप्रमुख नेमले आहेत. मात्र, पहिल्या दिवशी ८५ आणि दुसऱ्या दिवशी फक्त ६१ सहकेंद्रप्रमुख रूजू झाले. प्रशासन कारवाई करीत नसल्यामुळे गैरहजर राहण्याचे प्रमाण वाढले आहे. तर संबंधित महाविद्यालयांचे प्राचार्य प्राध्यापकांना पाठवत नसल्याचे डॉ. सूर्यवंशी यांनी सांगितले. या विसंवादात परीक्षेवर गंभीर परिणाम झाला आहे.

सहकेंद्रप्रमुख रूजू झाले नसल्यामुळे दुसऱ्यांची नेमणूक करण्यात येईल. परीक्षा सुरळीत सुरू असून ग्रामीण भागातील केंद्राची मंगळवारी पाहणी केली. चार जिल्ह्यांचा आढावा घेत आहोत.

- डॉ. जयश्री सूर्यवंशी, प्रभारी संचालक, परीक्षा व मूल्यमापन विभाग

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील आर्थिक गैरव्यवहारासंदर्भात शासनाने नेमलेल्या डॉ. एस. एफ.पाटील चौकशी समितीने दीड महिन्यापूर्वी अहवाल सादर केला आहे. या अहवालातील शिफारशीनुसार शासनाने दोषी अधिकाऱ्यांवर कडक कारवाई करावी, अशी मागणी आमदार सतीश चव्हाण यांनी केली. याबाबत उच्च व तंत्रशिक्षणमंत्री विनोद तावडे यांना पत्र देण्यात आले.

डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांचा अनागोंदी कारभार, भ्रष्टाचार, विविध प्राधिकरणांवर केलेल्या बेकायदा नेमणुका अशा विविध प्रश्नांवर सभागृहात चव्हाण यांनी आवाज उठवला होता. त्यानंतर तावडे यांनी कुलगुरूंच्या घोटाळ्यांची उच्चस्तरीय समितीकडून चौकशी करण्याची घोषणा केली होती. तावडे यांनी माजी कुलगुरू डॉ. एस. एफ. पाटील यांच्या अध्यक्षतेखाली चौकशी समिती नेमली होती. या समितीने दीड महिन्यांपूर्वी राज्य शासनाला अहवाल सादर केला आहे. मात्र, शासनाने कार्यवाही केली नसल्यामुळे आमदार सतीश चव्हाण यांनी मुंबई येथे उच्च व तंत्रशिक्षणमंत्री विनोद तावडे यांची भेट घेतली.

औरंगाबाद : महापौर परिषद येत्या २७ ऑक्टोबर रोजी नागपूर येथे होत आहे. या परिषदेचे निमंत्रण औरंगाबादचे महापौर नंदकुमार घोडेले यांना अध्यक्ष विश्वनाथ महाडेश्वर यांनी पाठवले आहे. महाराष्ट्र महापौर परिषदेची सभा पनवेल येथे ऑगस्ट महिन्यात झाली होती. या सभेत नागपूरच्या महापौर व महाराष्ट्र महापौर परिषदेच्या उपाध्यक्षा नंदा जिचकार यांनी आगामी महापौर परिषद नागपूर येथे आयोजित करावी, असे सूचविले होते.

म. टा. प्रतिनिधी, औरंगाबाद

दिवंगत मनमोहनसिंग ओबेरॉय धर्मनिरपेक्ष वृत्तीने राजकारण करणारे नेते होते. त्यांनी दुर्बल घटकांसाठी शेवटपर्यंत संघर्ष केला. राजकारणात राहूनही निर्लेप राहणारा नेता विरळा होता या शब्दांत विविध क्षेत्रातील मान्यवरांनी ओबेरॉय यांना श्रद्धांजली वाहिली. शहरातील रस्त्याला किंवा सभागृहाला ओबेरॉय यांचे नाव देण्यात येईल असे महापौर नंदकुमार घोडेले यांनी जाहीर केले.

माजी महापौर आणि राष्ट्रवादी काँग्रेसचे ज्येष्ठ नेते मनमोहनसिंग ओबेरॉय यांचे नुकतेच निधन झाले. त्यांना श्रद्धांजली वाहण्यासाठी तापडिया नाट्यमंदिरात मंगळवारी सायंकाळी सर्वपक्षीय श्रद्धांजली सभा घेण्यात आली. या शोकसभेला विविध राजकीय पक्ष, संघटना, संस्थांचे पदाधिकारी उपस्थित होते. ओबेरॉय यांच्या वेगळ्या पैलूंवर महापौर नंदकुमार घोडेले यांनी प्रकाश टाकला. 'उस्मानपुरा रस्त्याचे रुंदीकरण सुरू असताना ते भेटले. त्यांचे कार्यालय रुंदीकरणात पडणार म्हणून भेटायला आले असतील असे वाटले. तर ते म्हणाले माझे कार्यालय आधी घ्या. पण, इतरांचा विचार करा. हे सामाजिक भान त्यांनी शेवटपर्यंत जपले. या नेत्याचे नाव शहरातील रस्त्याला किंवा सभागृहाला देण्यात येईल' असे घोडेले म्हणाले.

\Bदातृत्व शेवटपर्यंत टिकून\B

'ओबेरॉय यांचे दातृत्व शेवटपर्यंत टिकून होते. कुणाच्या मुलाची फी भर, कुणाला द‌वाखान्यासाठी मदत कर अशी मदतीची बंद मूठ कायम राहिली' असे माजी महापौर रशीदमामू म्हणाले. श्रद्धांजली सभेला आमदार अतुल सावे, आमदार अब्दुल सत्तार, माजी आमदार प्रदीप जैस्वाल, नामदेव पवार, माजी उपमहापौर तकी हसन, मधुकरराव मुळे, कॉ. मनोहर टाकसाळ, कॉ. उद्धव भवलकर, किशोर पाटील, दिलीप चव्हाण, पृथ्वीराज पवार, नवीनसिंग ओबेरॉय यांच्यासह शेकडो नागरिक उपस्थित होते. सुधाकर सोनवणे यांनी सूत्रसंचालन केले.

म. टा. प्रतिनिधी, औरंगाबाद

'साज पैठणीचा' या अनोख्या उपक्रमाचा उत्साह शिगेला पोचला आहे. विविध पारंपरिक खेळांमध्ये सहभागी होण्यासाठी महिलांची चढाओढ लागली आहे. 'महाराष्ट्र टाइम्स' आणि 'आदिशक्ती नारी विकास प्रतिष्ठान' यांच्यातर्फे या उपक्रमाचे आयोजन करण्यात आले आहे. सोमवारी सायंकाळच्या आणि मंगळवारी सकाळच्या सत्रात अनुक्रमे भाग्यश्री ठाकूर व सुजाता शिंदे या पैठणीच्या मानकरी ठरल्या.

'साज पैठणीचा' या आगळ्यावेगळ्या उपक्रमात शहरातील सर्वच वॉर्डातील महिलांना विविध भेटवस्तू जिंकण्याची संधी मिळणार आहे. नारीशक्तीचा सन्मान व्हावा यासाठी हा उपक्रम राबवण्यात येत आहे. सकाळी आणि सायंकाळच्या सत्रात सहभागी विजेत्या महिलांना पैठणी साडी, ट्रॅव्हलिंग बॅग, गालिचा, क्वाइन अशा भेटवस्तू जिंकण्याची संधी मिळत आहे. विशेष म्हणजे या स्पर्धेतील खेळांच्या दरम्यान होणाऱ्या गमती-जमतींना उपस्थित प्रेक्षक टाळ्यांच्या कडकडाटात प्रतिसाद दिला.

सोमवारी सायंकाळी पुष्पनगरी, काळा राम मंदिर, समर्थनगर याठिकाणी 'साज पैठणीचा' स्पर्धा घेण्यात आली. मंगळवारी (१६ ऑक्टोबर) सकाळच्या सत्रात बारापुल्ला गेट परिसर, गरम पाणी बुद्ध विहारा परिसर, लक्ष्मी कॉलनी महादेव मंदिर परिसरात ही स्पर्धा घेण्यात आली. प्रत्येक ठिकाणी तीन अशा नऊ विजेत्या स्पर्धकांची एकत्रित एक स्पर्धा घेऊन त्यातील प्रथम, द्वितीय आणि तृतीय अशी बक्षिसे देण्यात येत आहेत. प्रत्येक विजेत्या स्पर्धकाला क्वाइन भेट स्वरुपात देण्यात येत आहे. दररोज शहरातील प्रत्येक वॉर्डात तीन ठिकाणी महिलांचे विविध खेळ, स्पर्धा आयोजित करून विजेत्यांना आकर्षक बक्षिसे जिंकण्याची संधी मिळत आहे. इतकेच नव्हे तर प्रेक्षक महिलांना देखील लकी ड्रॉच्या माध्यमातून बक्षिसे जिंकत आहेत.

या स्पर्धेत सहभागी महिलांना पासिंग द पास (वस्तू एकमेकींकडे देणे), बकेट बॉल (ठराविक अंतरावरून बकेटमध्ये चेंडू टाकणे), फोर कॉर्नर, चमचा लिंबू आणि उखाणे यासारख्या उपक्रमांचे आयोजन करण्यात आले होते. यावेळी सूत्रसंचलनाची जबाबदारी निकिता मांजरमकर व शैलेश कोरडे यांनी पार पाडली.

स्पर्धेतील विजेत्यांची नावे

पुष्पनगरी

प्रथम : डॉ. रुपाली धर्माधिकारी

द्वितीय : मीरा कुलकर्णी

तृतीय : शुभांगी वाळूजकर

लकी ड्रॉ विजेत्या (क्वाइन) : अरुणा दरक, अनिता कुलकर्णी, मीरा ठाणकर

काळा राम मंदिर, समर्थनगर

प्रथम : दीपाली जाधव

द्वितीय : भाग्यश्री ठाकूर

तृतीय : संध्या कुलकर्णी

लकी ड्रॉ विजेत्या (क्वाइन) : सुनीता स्वामी, सुरेखा खोंड, भारती मुथा

समर्थनगर

प्रथम : तेजश्री बांगर

द्वितीय : स्नेहा तांदळे

तृतीय : मनीषा अमृतकर

लकी ड्रॉ विजेत्या (क्वाइन) : ललिता जाधव, विनीता हर्सुलकर, सुषमा चोपडा

तिन्ही गटातून फायनल विजेते

प्रथम : पैठणी साडी- भाग्यश्री ठाकूर

द्वितीय : ट्रॅव्हलिंग बॅग- संध्या कुलकर्णी

तृतीय : गालिचा- शुभांगी वाळूजकर

बारापुल्ला गेट परिसर-

प्रथम : लता तुपे

द्वितीय : सुजाता शिंदे

तृतीय : उषा गायकवाड

गरम पाणी, बुद्ध विहाराजवळ

प्रथम : दीक्षा शेजूळ

द्वितीय : सुनीता वंजारे

तृतीय : रंजना साबळे

लकी ड्रॉ विजेत्या (क्वाइन) : पूजा प्रधान, नीता दाभाडे, रमा दाभाडे

लक्ष्मी कॉलनी, महादेव मंदिराजवळ

प्रथम : निशा भंडारी

द्वितीय : प्रेमा जाधव

तृतीय : उषा चातशे

तिन्ही गटातून फायनल विजेते-

प्रथम : पैठणी साडी - सुजाता शिंदे

द्वितीय : ट्रॅव्हलिंग बॅग - सुनीता वंजारे

तृतीय : गालिचा- विद्या गायकवाड

आज याठिकाणी रंगणार स्पर्धा

बुधवार, १७ ऑक्टोबर २०१८

सकाळचे सत्र

भीमनगर, भावसिंगपुरा

१०.३० वाजता : आमीन चौक, भावसिंगपुरा

११.३० वाजता : कामगार कल्याण, बौद्ध विहाराजवळ

१२.३० वाजता : विपश्यना बुद्ध विहार, भावसिंगपुरा

सायंकाळचे सत्र

४ वाजता : साई मंदिर, पहाडसिंगपुरा

५ वाजता : मल्हाव समाज मंदिर, बेगमपुरा

६ वाजता : महापालिका शाळा, गोगाबाबा मंदिर

म. टा. प्रतिनिधी, औरंगाबाद

खिडकी उघडी असल्याची संधी साधून हात घालून मोबाइल लंपास करणाऱ्या दोघांना गुन्हे शाखेने जेरबंद केले. यामध्ये एका तरुणासह अल्पवयीन आरोपीचा समावेश आहे. या तिघांनी दोन गुन्ह्याची कबुली दिली आहे.

एक ऑक्टोबर रोजी रात्री गजानन सुदाम वरटे (रा. द्वारकापुरी, एकनाथनगर) यांच्या घरातून उघड्या खिडकीतून हात घालून चोरट्यांनी २३ हजाराचे तीन मोबाइल लंपास केले होते. याप्रकरणी वरटे यांच्या तक्रारीवरून उस्मानपुरा पोलिस ठाण्यात गुन्हा दाखल करण्यात आला होता. रविवारी गुन्हे शाखेचे एपीआय राहुल सूर्यतळ यांना दोन तरुण गोपाळ टी पॉइंटजवळ चोरीचे मोबाइल विक्रीसाठी घेऊन येणार असल्याची माहिती मिळाली होती. या माहितीवरून सापळा रचण्यात आला. यावेळी संशयित आरोपी अनिल ज्ञानेश्वर दाभाडे (वय १९ रा. नागसेननगर) याच्यासह एका अल्पवयीन मुलाला ताब्यात घेण्यात आले. या दोघांची झडती घेतली असता दोघांकडे तीन मोबाइल आढळले. याबाबत अधिक चौकशी केली असता हे मोबाईल चोरीचे असल्याची कबुली दिली. ही कारवाई पोलिस निरीक्षक मधुकर सावंत, एपीआय सूर्यतळ, जमादार संतोष सोनवणे, बापुराव बावीस्कर, लालखान पठाण, नंदलाल चव्हाण, योगेश गुप्ता, रितेश जाधव, वीरेश बने, अतुल तुपे आदींनी केली.

म. टा. प्रतिनिधी, औरंगाबाद

जेष्ठ नागरिकाला मारहाण करण्याच्या धमक्या देत त्याच्या प्लॉटवर अतिक्रमण करण्यात आले. हा प्रकार रविवारी रात्री आठ वाजता जवाहरनगर पोलिस ठाण्याच्या हद्दीत घडला. याप्रकरणी आठ आरोपीविरुद्ध जवाहरनगर पोलिस ठाण्यात गुन्हा दाखल करण्यात आला आहे.

याप्रकरणी हरिदास लालचंद सोनी या जेष्ठ नागरिकाने तक्रार दाखल केली. सोनी आणि त्यांच्या भागीदाराचा जवाहरनगर भागात प्लॉट आहे. रविवारी सायंकाळी या प्लॉटवर काही जणांनी कब्जा केला. प्लॉटची वॉल कंपाउंडची भिंत तोडून त्यानी आत प्रवेश केला. येण्या-जाण्याचा मार्ग बंद करून त्यांनी पत्र्याचे शेड उभारले. सोनी आणि त्यांच्या भागीदाराला मारहाण करण्याची धमकी देत त्यांनी हे कृत्य केले. याप्रकरणी सोनी यांनी पोलिस ठाण्यात तक्रार केली. त्यावरून संशयित आरोपी वसीमखान, इम्रान, शेख मुद्दसीर हकीमोद्दिन, शेख रहीम, शहेजादी रहीम शेख आणि दोन अनोळखी आरोपीविरुद्ध दंगल करणे, अतिक्रमण केल्याप्रकरणी गुन्हा दाखल करण्यात आला आहे. पीएआय आहेर याप्रकरणी तपास करीत आहेत.

औरंगाबाद : दसरा सणाच्या दोन दिवस आधीच केंद्र सरकारने टपाल कर्मचाऱ्यांना खूशखबर दिली आहे. यंदा टपाल विभागाच्या कर्मचाऱ्यांना ६० दिवसांचा बोनस जाहीर केला आहे. त्यानुसार कर्मचाऱ्यांना सूमारे १४ हजार रुपयांचा बोनस हाती येईल. वर्ग तीन तसेच वर्ग चारमधील कर्मचाऱ्यांसह ग्रामीण डाक सेवकांना याचा लाभ होणार असून, राजपत्रित अधिकाऱ्यांना बोनसचा लाभ मिळणार नाही.