म. टा. प्रतिनिधी, औरंगाबाद नाटकाच्या प्रयोगाद्वारे आपल्या नाट्य कलावंत असलेल्या संतोष नवरखेले उर्फ प्रभू या मित्राला नाट्यशास्त्राचे विद्यार्थी आदरांजली वाहणार आहेत. १४ नोव्हेंबर रोजी त्यासाठी 'दयाशंकर कि डायरी' या हा नाट्यप्रयोग विनामूल्य सादर केला जाणार आहे. संतोष नवरखेले या नाट्य कलावंताचे १७ ऑक्टोबर रोजी मुंबईत नाटकाची तालिम संपवून लोकलने परतत असताना अपघाती निधन झाले होते. अत्यंत मनमिळावू, हसतमुख आणि दर्जेदार नाट्य कलावंत असलेल्या प्रभूचा मृत्यू नाट्य कलावंतांना चटका लाऊन गेला. निलंगा तालुक्यातील रामलिंग मुदगड या छोट्याशा गावातून अभिनेता होण्यासाठी आलेल्या संतोषने विद्यापीठाच्या नाट्यशास्त्र विभागात अभिनयाचे धड गिरविले होते. मुंबईत व्यावसायिक रंगभूमीवर नशीब आजमावण्यासाठी गेला होता. संतोषच्या मृत्यूसमयी त्याच्याजवळ 'दयाशंकर की डायरी' या नाटकाची संहिता होती. त्यामुळे त्याच्या मित्रांनी याच दीर्घांकाचा प्रयोग करून त्याला श्रद्धांजली वाहण्याचा निर्णय घेतला. १४ नोव्हेंबर रोजी सायंकाळी साडेसहा वाजता तापडिया नाट्यमंदिरात हा प्रयोग होईल. नादिरा बब्बर लिखित व सय्यद अल्ताफ दिग्दर्शित या नाट्यप्रयोगात रमाकांत भालेराव आणि प्रेरणा खरात यांच्या प्रमुख भूमिका आहेत. विनोद आघाव, वाल्मिक जाधव, अनिल मोरे, योगेश म्हेत्रजकर, अनिल बडे, राजेश आगुंडे हे कलावंत संगीत, नेपथ्य, प्रकाशयोजनेची बाजू सांभाळणार आहेत. प्रा. डॉ. राजू सोनवणे यांचे मार्गदर्शन या कलावंतांना मिळाले आहे.
मोबाइल अॅप डाउनलोड करा आणि राहा अपडेट
