म. टा. प्रतिनिधी, औरंगाबाद चिकलठाण्यातील मिनी घाटी अर्थात जिल्हा सामान्य रुग्णालयामध्ये मंगळवारपासून (चार डिसेंबर) प्रसुती सेवा सुरू होणार आहेत. विशेष म्हणजे रुग्णालयामध्ये आता कधीही सिझेरियन शस्त्रक्रिया होऊ शकेल, अशा रितीने यंत्रणा सज्ज झाली आहे. त्याचप्रमाणे वेगवेगळ्या नेत्र शस्त्रक्रियांसाठी सुसज्ज 'मॉड्युलर ओटी'चे कामदेखील रुग्णालयाच्या शेवटच्या मजल्यावर सुरू झाले आहे; तसेच रुग्णालयासाठी सिटी स्कॅन मंजूर झाले आहे आणि सिटी स्कॅन रुग्णालयामध्ये बसवण्यासाठी येत्या काही आठवड्यात बांधकाम व विद्युत काम सुरू होणार असल्याचे संकेत आहेत. 'मिनी घाटी'चे उद्घाटन रखडले असले तरी रुग्णालयातील विविध विभाग आता हळुहळु सुरू होत आहेत. आधी बाह्यरुग्ण विभाग (ओपीडी) सुरू झाला आणि अलीकडेच आंतररुग्ण विभागदेखील (आयपीडी) सुरू झाला आहे. 'ओपीडी'सह 'आयपीडी'ची रुग्णसंख्या झपाट्याने वाढत असून, सद्यस्थितीत दोन्ही वेळच्या 'ओपीडी'साठी दररोज सुमारे ६०० रुग्ण उपचारासाठी येत आहेत, तर रोजच्या 'आयपीडी'मध्ये सुमारे २० ते २५ रुग्ण दाखल होत आहेत. रुग्णालयामध्ये दर शुक्रवारी 'कॅन्सर ओपीडी' सुरू झाली आहे आणि 'किमोथेरपी सेंटर'च्या सेवाही प्रत्येक शुक्रवारी मिळणार आहेत. रुग्णालयामध्ये लसीकरण विभागही सुरू झाला आहे. त्याशिवाय आयुर्वेद विभागाचा बाह्यरुग्ण विभागही सुरू झाला असून, आयुर्वेदाची ओपीडी दररोज सुरू आहे. आयुर्वेद विभागासाठी दहा खाटा देण्यात आल्या आहेत आणि भविष्यात पंचकर्म व इतर सुविधाही दिल्या जाऊ शकतात, असेही जिल्हा शल्यचिकित्सक डॉ. सुंदर कुलकर्णी यांनी 'मटा'शी बोलताना सांगितले. तसेच नेत्र शस्त्रक्रियांसाठी 'मॉड्युलर ओटी'चे बांधकाम व विद्युत काम प्रत्यक्षात सुरू झाले आहे. नेत्र शस्त्रक्रियांवेळी रुग्णांना जंतुसंसर्ग होणार नाही, अशा अत्याधुनिक सोयी-सुविधा या शस्त्रक्रियागृहात असणार आहेत. या कामासाठी ९५ लाख रुपये मंजूर झाले आहेत. नेत्र शस्त्रक्रियांसाठी उपयुक्त असणारी आधुनिक यंत्रसामुग्रीदेखील उपलब्ध केली जाणार आहे. रुग्णालयासाठी सिटी स्कॅन मंजूर झाले आहे आणि सिटी स्कॅन उपकरण रुग्णालयामध्ये बसविण्यासाठी लागणारे बांधकाम व विद्युत काम दोन आठवड्यात पूर्ण करण्याचा प्रयत्न असणार आहे. स्त्रीरोग विभागाच्या ओपीडी सेवा यापूर्वीच सुरू झाल्या आहेत आणि मंगळवारपासून प्रसुती सेवा सुरू होतील. त्यासाठी लागणारे तज्ज्ञ डॉक्टर, परिचारिका व कर्मचारी उपलब्ध आहे. विशेष म्हणजे एकाचवेळी पाच प्रसुती होऊ शकतील, अशा सुविधा प्रसुती कक्षात उपलब्ध आहेत, असेही डॉ. कुलकर्णी यांनी सांगितले. \Bमार्चपर्यंत जुन्या ठिकाणीच शस्त्रक्रिया \Bआमखास मैदानासमोरील जिल्हा सामान्य रुग्णालयाची जागा राज्य कर्करोग संस्थेला देण्यात आली असून, तसा आदेश जिल्हाधिकाऱ्यांनी नुकताच काढला आहे. तरीही मार्चपर्यंत नेत्र विभागाच्या शस्त्रक्रिया व उपचार हे आमखास समोरील जुन्या रुग्णालयामध्ये होणार आहेत. मार्चनंतर सर्व नेत्र शस्त्रक्रिया 'मिनी घाटी'तील 'मॉड्युलर ओटी'मध्ये होतील, असेही सांगण्यात आले.
मोबाइल अॅप डाउनलोड करा आणि राहा अपडेट
