म. टा. प्रतिनिधी, औरंगाबाद एमजीएम हॉस्टेलमध्ये खून झालेल्या आकांक्षा देशमुखच्या प्रकरणाला पाच दिवस उलटले, मात्र अद्याप या गुन्ह्याचे गूढ उकलण्यास सिडको पोलिस, गुन्हे शाखेला यश आलेले नाही. मंगळवारी रात्री साडेनऊ वाजता गंगा हॉस्टेलच्या रूम क्रमांक ३३४मध्ये हा प्रकार उघडकीस आला होता. दरम्यान, याप्रकरणी सिडको पोलिस ठाण्यात जबाब घेण्याचे काम सुरू आहे. आकांक्षा अनिल देशमुख (वय २२, रा. माजलगाव) ही तरुणी एमजीएम कॉलेजमध्ये फिजियोथेरपीचे शिक्षण घेत होती. सोमवारी रात्री सव्वानऊ वाजता हॉस्टेलच्या रुममध्ये परतलेल्या आकांक्षाचा मृतदेह मंगळवारी रात्री साडेनऊ वाजता आढळला होता. घाटी हॉस्पिटलमध्ये तिचे पोस्टमार्टम करण्यात आले. यावेळी वैद्यकीय अहवालात गळा आवळल्याने मृत्यू झाला आहे, हा अभिप्राय देण्यात आला. याप्रकरणी सिडको पोलिस ठाण्यात खुनाचा गुन्हा दाखल करण्यात आला आहे. खोलीमध्ये आकांक्षा खाली पडलेल्या अवस्थेत होती; तसेच रुमचा दरवाजा लोटलेला होता आणि पाठीमागे केवळ खुर्ची लावलेली होती. रुममधील टेबल देखील आडव्या अवस्थेत होता. आकांक्षाच्या खुनाच्या घटनेनंतर वसतिगृह परिसरात खळबळ उडाली आहे. पोलिसांनी याप्रकरणी आतापर्यंत तिचे रुममेट, वसतिगृहाचे अधीक्षक, सुरक्षारक्षक आदीचे जबाब नोंदवले आहे. तिचा भाऊ राहुल देशमुख याचा देखील पोलिसांनी नोंदवला आहे. दरम्यान, सोमवारी तिच्या आई, वडिलांचा जबाब घेण्यात येणार असल्याची माहिती सूत्रांनी दिली.
मोबाइल अॅप डाउनलोड करा आणि राहा अपडेट
