म. टा. प्रतिनिधी, औरंगाबाद कुख्यात खिडकी गँगच्या दोन आरोपींना गुन्हे शाखेच्या पथकाने जेरबंद केले आहे. बीड येथील हे आरोपी असून त्यांनी चार गुन्ह्याची कबुली दिली आहे. आरोपींच्या ताब्यातून चौदा तोळ्याचे दागिने जप्त करण्यात आले आहेत. शहरात बंद घराच्या खिडक्याचे ग्रील काढून घरात प्रवेश करून चोऱ्या करण्याचे प्रकार घडले होते. याप्रकरणी गुन्हे शाखेच्या पथकाने खिडकी गँगचा सूत्रधार सय्यद सिकंदर सय्यद अख्तर (रा. हर्सूल) याला साथीदारासह अटक करून त्याच्याकडून घरफोडीचे गुन्हे उघडकीस आणले होते. या टोळीतील इतर आरोपी पसार झाले होते. हे आरोपी माळीवेस बीड येथे असल्याची माहिती गुन्हे शाखेच्या पथकाला मिळाली. या माहितीवरून पथकाने बीड गाठून आरोपी शंकर तानाजी जाधव (वय ३५, रा. पाथरुड गल्ली) आणि बलबीर अमृत जाधव (वय ३६, रा. माळवेस चौक, बारदरी गल्ली, बीड) यांना अटक केली. पोलिस चौकशीत या आरोपींनी शहरात घरफोड्या केल्याची कबुली दिली. त्यांचा तिसरा पसार साथीदार अक्षय मिठ्ठू गायकवाड उर्फ चिंटू (रा. बीड) याच्या मदतीने त्यांनी सिडको, हर्सूल आणि बेगमपुरा पोलिस ठाण्याच्या हद्दीत घरफोड्या केल्याची माहिती दिली. पोलिसांनी दोन्ही आरोपीकडून चौदा तोळे सोने आणि एक मोबाइल हस्तगत केला. ही कारवाई पोलिस आयुक्त चिरंजीवप्रसाद, उपायुक्त डॉ. दीपाली धाटे-घाडगे, एसीपी डॉ. नागनाथ कोडे यांच्या मार्गदर्शनाखाली पोलिस निरीक्षक मधुकर सावंत, एपीआय अजबसिंग जारवाल, जमादार शिवाजी झिने, राजेंद्र साळुंके, सुनील धात्रक, गजानन मांटे, प्रभाकर राऊत, विशाल सोनवणे, भरतसिंग बहुरे, ज्ञानेश्वर पवार, अनिल थोरे व नाना फुंदे यांनी केली. … \Bस्वतंत्र तयार केली टोळी \Bआरोपी शंकर जाधव याला गुन्हे शाखेच्या पथकाने यापूर्वी देखील अटक केली होती. पुंडलिकनगर पोलिस ठाणे हद्दीतील दोन गुन्ह्याची त्याने कबुली दिली होती. टोळीचा प्रमुख सूत्रधार सय्यद सिकंदर कारागृहात गेल्यानंतर शंकरने त्याची नवीन टोळी तयार करीत शहरात घरफोडीचे गुन्हे केले असल्याचे समोर आले आहे.
मोबाइल अॅप डाउनलोड करा आणि राहा अपडेट
