म. टा. प्रतिनिधी, औरंगाबाद मालमत्ता कर वसुली आणि बांधकाम नियमितीकरणाच्या संदर्भात पुन्हा एकदा विशेष मोहीम राबवा, अशी सूचना करणारे पत्र महापौर नंदकुमार घोडेले यांनी महापालिका आयुक्तांच्या नावे दिले आहे. आयुक्तांना दिलेल्या पत्रात घोडेले यांनी म्हटले आहे की, महापालिकेचे उत्पन्न वाढवण्याच्या दृष्टीने 'थकित मालमत्ता कर वसुली व बांधकाम नियमितीकरण सप्ताह' नोव्हेंबर महिन्यात राबवण्यात आला होता. त्याला नागरिकांकडून चांगला प्रतिसाद मिळाला. वसुली देखील चांगली झाली. ही बाब लक्षात घेता सात ते २५ जानेवारीच्या दरम्यान पुन्हा अशी मोहीम राबवण्यात यावी. महापालिकेचे आर्थिक उत्पन्न वाढवण्याच्या दृष्टीने महाराष्ट्र महानगरपालिका अधिनियम १९४९ चे कलम १४० ब च्या तरतुदीप्रमाणे विशेष थकित कर वसुली व बांधकाम नियमितीकरण मोहीम राबवण्यात यावी. यासाठी सर्व संबंधित अधिकाऱ्यांना कार्यवाहीसाठी योग्य ते आदेश देण्यात यावेत. समन्वयासाठी विशेष अधिकाऱ्यांची नियुक्ती करावी. मोहीमेचे योग्य प्रकारे नियोजन करावे, अशा सूचना या पत्रात करण्यात आल्या आहेत.
मोबाइल अॅप डाउनलोड करा आणि राहा अपडेट