म. टा. प्रतिनिधी, औरंगाबाद 'चांगली शाळा आणि शिक्षण मिळणे भाग्याची गोष्ट आहे. तुम्हाला चांगले शिक्षक मिळाले आहेत. खूप शिका आणि जीवनात भरारी घ्या' या शब्दात प्रसिद्ध गायिका वैशाली सामंत यांनी दिव्यांग व अनाथ मुलांना नवीन वर्षाच्या शुभेच्छा दिल्या. त्या 'प्लेजर ऑफ गिव्हिंग' कार्यक्रमात बोलत होत्या. जनसंवाद आणि वृत्तपत्रविद्या विभागाच्या वतीने अनाथ व दिव्यांग मुलांना कपडे वाटप करण्यासाठी 'प्लेजर ऑफ गिव्हिंग' कार्यक्रम घेण्यात आला. विभागाच्या प्रांगणात मंगळवारी दुपारी हा कार्यक्रम झाला. यावेळी प्र-कुलगुरू डॉ. अशोक तेजनकर, गायिका वैशाली सामंत आणि विभागप्रमुख डॉ. दिनकर माने यांची उपस्थिती होती. सावित्रीबाई फुले मूकबधिर विद्यालय, बाबासाई एचआयव्हीबाधित मुलांचे बालगृह, संत कबीर, राजर्षी शाहू आणि डॉ. बाबासाहेब आंबेडकर संस्थेच्या १०० मुलांना कपड्यांचे वाटप करण्यात आले. लहान मुलांशी सामंत यांनी संवाद साधला. 'मला अभ्यासाचा खूप कंटाळा येत होता. तुम्हाला पण कंटाळा येत असेल. पण तुमच्या चेहऱ्यावरील प्रश्नांची उत्तरे फक्त शाळेतच मिळू शकतात. अभ्यास करा आणि आयुष्यात चांगले नाव कमवा' असे सामंत म्हणाल्या. या उपक्रमासाठी प्रा. राजेश चंचलानी, उद्योजक प्रकाश भोजवानी आणि ऋतुजा सोमाणी यांनी अर्थसहाय केले. डॉ. संध्या मोहिते यांनी प्रास्ताविक केले. गणेश फरताडे यांनी सूत्रसंचालन केले. यावेळी डॉ. प्रभू गोरे, डॉ. संजीव सावळे यांच्यासह कर्मचारी व विद्यार्थी उपस्थित होते. \Bविद्यार्थ्याचेही गीत सादर \B विद्यार्थ्यांनी वैशाली यांना नवीन वर्षाच्या शुभेच्छा दिल्या. अक्षय पगारे या विद्यार्थ्याने मुलींसाठी लिहिलेले गाणे सादर केले. 'वक्तसे पहिले बडी होती है बेटिया, जन्नतसे आयी परी होती है बेटिया' गीत सादर करून सर्वांची मने जिंकली. वैशाली यांनी 'एका तळ्यात होती बदके पिले सुरेख' गीत सादर केले.
मोबाइल अॅप डाउनलोड करा आणि राहा अपडेट
