म. टा. प्रतिनिधी, औरंगाबाद मजुरीचे दोन हजार रुपये घेऊन घरी पायी निघालेल्या मजुराच्या गळ्याला चाकू लावून जिवे मारण्याची धमकी देत बेदम मारहाण करुन दोन हजार रुपये लुटल्याप्रकरणी पोलिसांनी तक्रार नोंदवली नाही कोर्टात धाव घेतली असता, कोर्टाच्या आदेशानंतर गुन्हा दाखल होऊन, अक्षय म्हसा जाधव व मनोज श्रीरंग कसबे या आरोपींना अटक करण्यात आली. त्यांना कोर्टात हजर केले असता, आरोपींना शनिवारपर्यंत (५ जानेवारी) पोलिस कोठडीत ठेवण्याचे आदेश प्रथम वर्ग न्यायदंडाधिकारी के. के. कुरंदळे यांनी दिले. या प्रकरणी मजुरी काम करणारे फेरोजखान शौकत खान (३२, रा. इंदिरानगर, औरंगाबाद) यांनी फिर्याद दिली होती. फिर्यादीनुसार, फिर्यादी हा ८ नोव्हेंबर २०१८ रोजी मजुरीचे दोन हजार रुपये घेऊन पायी घरी निघाला असता, इंदिरानगरच्या पुंजाबाई चौकात सायंकाळी साडेसातच्या सुमारास आरोपी अक्षय म्हसा जाधव (२२), आरोपी मनोज श्रीरंग कसबे (२५, दोघे रा. प्रियदर्शन कॉलनी, गारखेडा) व त्याच्या दोन साथीदारांनी फिर्यादीला दारु पिण्यासाठी पैसे मागितले. फिर्यादीने नकार देताच, आरोपी अक्षय याने फिर्यादीच्या गळ्याला चाकू लावून आरोपी मनोज व त्याच्या दोन साथीदारांनी फिर्यादीला लाकडी दांड्यांनी शिविगाळ व मारहाण केली. तसेच चाकूने वार करीत फिर्यादीच्या खिशातील मजुरीचे दोन हजार रुपये हिसकावून घेतले आणि पोलिसांत तक्रार केली तर जिवे मारण्याची धमकीही दिली. या प्रकरणात फिर्यादीने उपचारानंतर पोलिस ठाण्यात तक्रार दिली; परंतु पोलिसांनी तक्रार नोंदवली नाही म्हणून फिर्यादीने फौजदारी प्रक्रिया संहिता कलम १५६ प्रमाणे कोर्टात तक्रार दाखल केली होती. कोर्टाने फिर्यादीच्या तक्रारीची दखल घेऊन प्रकरणात भादंवि ३४१, ३२६, ३९४, ५०४, ५०६ कलमान्वये जवाहरनगर पोलिस गुन्हा दाखल करण्याचे आदेश दिले होते. त्यानुसार गुन्हा दाखल होऊन वरील दोन्ही आरोपींना बुधवारी (२ जानेवारी) अटक करण्यात आली. \Bफरार आरोपींना अटक बाकी \Bदोन्ही आरोपींना गुरुवारी कोर्टात हजर केले असता, आरोपींकडून दोन हजार रुपये तसेच चाकू व दांडा जप्त करणे आणि दोन फरार आरोपींना अटक करणे बाकी आहे. त्याशिवाय गुन्ह्याचा तपास होणे शक्य नाही. त्यामुळे आरोपींना पोलिस कोठडी देण्याची विनंती सहाय्यक सरकारी वकील सुनिल जोंधळे यांनी कोर्टात केली. ही विनंती मान्य करुन कोर्टाने दोन्ही आरोपींना शनिवारपर्यंत पोलिस कोठडीत ठेवण्याचे आदेश दिले.
मोबाइल अॅप डाउनलोड करा आणि राहा अपडेट
