म. टा. प्रतिनिधी, औरंगाबाद ऑनलाइन औषध विक्री विरोधात एकवटलेल्या औषध विक्रेत्यांनी मंगळवारी हल्लाबोल आंदोलन केले. त्यांनी दुचाकी मोर्चा काढत जिल्हाधिकारी आणि अन्न व औषध प्रशासन कार्यालयावर धडक मारत अधिकाऱ्यांना मागण्यांचे निवेदन दिले. ऑनलाइन औषध विक्रीला बंदी न केल्यास तीव्र आंदोलनाशिवाय पर्याय राहणार नाही, असा इशारा देण्यात आला. आंदोलानाचा रुग्णांना फटका बसू नये, यासाठी मेडिकल स्टोअर्स सुरू ठेवण्यात आली होती. अखिल भारतीय औषधी विक्रेता संघटनेने पुकारलेल्या आंदोलनाला प्रतिसाद देत औरंगाबाद केमिस्ट अॅण्ड ड्रगिस्ट असोसिएशनने हे आंदोलन केले. औषधी भवन येथून सकाळी साडे अकराच्या सुमारास वाहनफेरी काढण्यात आली. पैठण गेट, गुलमंडी, सिटी चौक, किल्लेअर्क मार्गे ती जिल्हाधिकारी कार्यालयावर धडकली. तेथे जिल्हा प्रशासनाला निवेदन सादर केल्यानंतर शहागंज, सिटी चौक, गुलमंडी मार्गे औषध विक्रेते औरंगपुरा येथील अन्न व औषध प्रशासन कार्यालयात जाऊन घोषणा देण्यात आल्या. यावेळी असोसिएशनचे अध्यक्ष रावसाहेब खेडकर, सचिव दिलीप ठोळे, सहसचिव विनोद लोहाट, बापुराव सोनवणे, कपिल टिबडीवाला, किरण जोशी, रितेश छाजेड यांच्यासह मोठ्या संख्येने औषध विक्रेते उपस्थित होते. ऑनलाइन फार्मसीसंदर्भात केंद्र सरकार तयार करत असलेल्या मसुद्याला देशभरातील संघटनेने विरोध दर्शविला आहे. मागण्यांसंदर्भात तीन वेळा देशव्यापी बंद पुकारण्यात आला. वारंवार पाठपुरावा करण्यात आला पण, तरीही सरकार याबाबत गंभीर नाही, असा आरोपही संघटनेने केला आहे. काही दिवसांपूर्वीच, चेन्नई, दिल्ली हायकोर्टाने सुद्धा ऑनलाइन औषधविक्रीबाबत ठोस नियम लागू होत नाहीत, तोपर्यंत त्यावर घालण्यात आलेली बंदी कायम राहील, असा आदेश दिला होता. पण, अद्याप या आदेशाची अंमलबजावणी झालेली नाही, असा आरोप आंदोलकांनी केला. ऑनलाईन औषध विक्री समाज हिताची नाही. औषधांच्या दुष्परिणामांपासून सामान्य जनतेस वाचविणे, हा आंदोलनामागचा मूळ उद्देश आहे. ऑनलाइन फार्मसीच्या माध्यमातून देशभरात बेकायदेशीरपणे व्यवसाय सुरू आहे. याद्वारे नार्कोटिक्स ड्रग्ज, झोपेची औषधे, गर्भपाताच्या गोळ्या यांसारख्या अनेक धोकादायक औषधांची विक्री होत आहे. युवकांमध्ये नशेच्या औषधांच्या वापराचा मोठा धोका आहे. या औषधांची गुणवंत्ता कोण तपासणार? हा प्रश्न आहे. -दिलीप ठोळे, सचिव, केमिस्ट अॅण्ड ड्रगिस्ट असोसिएशन
मोबाइल अॅप डाउनलोड करा आणि राहा अपडेट
