म. टा. विशेष प्रतिनिधी,औरंगाबाद

सर्व कायदेशीर प्रक्रियेचा अवलंब करून २००३ ते २००८ दरम्यान भानुदास, बळीराम, माधव आणि अंकुश भगवंता पुटवाड या सख्ख्या भावांना 'कोळी महादेव' जमातीची वैधता प्रमाणपत्रे निर्गमित करण्यात आली होती. त्यानंतर तब्बल १० ते १५ वर्षांनंतर ती वैधता प्रमाणपत्रे रद्द करण्याबाबत पडताळणी समितीने प्रक्रिया सुरू केली. त्या प्रक्रियेला मुंबई उच्च न्यायालयाच्या औरंगाबाद खंडपीठाचे न्या. प्रसन्ना बी. वराळे आणि न्या. एस. एम. गव्हाणे यांनी स्थगिती दिली.

नांदेड जिल्ह्यातील कंधार तालुक्यामधील कळकावाडी येथील पुटवाड बंधूंना महाराष्ट्रÑ जात प्रमाणपत्र पडताळणी कायदा २००० व त्याअंतर्गत तयार केलेले नियम २००३ मध्ये नमूद विहित प्रक्रियेचा अवलंब करून अनुसूचित जमाती प्रमाणपत्र पडताळणी समितीने २००३ ते २००८ दरम्यान 'कोळी महादेव' जमातीची वैधता प्रमाणपत्रे दिली आहेत. त्याआधारे भानुदास, बळीराम आणि माधव हे अनुसूचित जमाती प्रवर्गातून अनुक्रमे प्राचार्य, शिक्षक आणि प्राध्यापक पदावर कार्यरत आहेत.

तक्रारींच्या अनुषंगाने समितीने सर्व पुटवाड बंधूंना तीन सप्टेंबर २०१८ रोजी नोटीस पाठवून खुलासा मागविला. सर्व भावांनी १६ ऑक्टोबर २०१८ रोजी खुलासा सादर करून सर्व कायदेशीर प्रक्रियेचा अवलंब करून, प्रमाणपत्र पडताळणी कायदा आणि त्याअंतर्गतच्या नियमांच्या तरतुदीनुसार निर्गमित करण्यात आलेली वैधता प्रमाणपत्रे रद्द करण्याचे अधिकार समितीला नसल्याचे नमूद केले. मात्र, या खुलाशाचा विचार न करता समितीने या सर्व भावांना पुन्हा सुनावणीसाठी बोलावले. म्हणून पुटवाड बंधूंनी खंडपीठात याचिका सादर करून समितीची प्रक्रिया रद्द करण्याची विनंती केली. याचिकाकर्त्याचे वकील सुनील विभुते यांनी युक्तिवाद करून तथ्य व कायदेशीर बाबी खंडपीठाच्या निदर्शनास आणून दिल्या. या याचिकेची सुनावणी १९ फेब्रुवारी रोजी होणार आहे.

\Bपुटेवाड बंधुंविरुद्ध तक्रार \B

तब्बल १० ते १५ वर्षांनंतर कुठल्याही प्रकारचा संबंध व कारण नसताना कास्ट्राईब कर्मचारी महासंघाचे नांदेडचे जिल्हाध्यक्ष अतुल चंद्रमोरे, यवतमाळ येथील देवानंद सावरकर आणि लातूर येथील विठ्ठल भोसले तसेच ऑर्गनायझेशन फॉर राईटस् ऑफ ट्रायबल, नागपूरचे अध्यक्ष राजेंद्र मारसकोल्ही यांनी २०१७-१८ मध्ये प्रमाणपत्र पडताळणी समितीकडे तक्रार करून पुटवाड बंधू हे 'कोळी' जमातीचे असून, त्यांची 'कोळी महादेव' जमातीची वैधता प्रमाणपत्रे रद्द करण्याची विनंती केली होती.

प्रदूषण नियंत्रण मंडळाची दिली एनओसी

म.टा. प्रतिनिधी, औरंगाबाद

कचऱ्यापासून गॅस निर्मिती प्रकल्प उभा करण्यास महाराष्ट्र प्रदूषण नियंत्रण मंडळाने ना हरकत प्रमाणपत्र दिले आहे. त्यामुळे हा प्रकल्प उभारण्याचा महापालिकेचा मार्ग मोकळा झाला आहे. कांचनवाडी येथे दररोज तीस टन कचऱ्यावर प्रक्रिया करून गॅस निर्मिती केली जाणार आहे.

महापालिकेचे आयुक्त डॉ. निपुण विनायक यांनी या संदर्भात ट्विट करून माहिती दिली आहे. त्यांनी प्रदूषण नियंत्रण मंडळाचे पत्र देखील ट्विट केले आहे. कचऱ्यावर प्रक्रिया करण्यासाठी चिकलठाणा, पडेगाव, हर्सूल आणि कांचनवाडी येथे जागा निश्चित करण्यात आल्या आहेत. या ठिकाणी कचरा प्रक्रिया प्रकल्प उभारण्यात येणार आहेत. चिकलठाणा, पडेगाव आणि हर्सूल येथे कचऱ्यापासून खत निर्मितीचा प्रकल्प उभारण्यात येणार आहे. त्यापैकी चिकलठाणा येथील जागेवर प्रक्रिया प्रकल्प उभारण्याचे काम सुरू करण्यात आले आहे. या ठिकाणी रोज १५० टन कचऱ्यावर प्रक्रिया करणारा प्रकल्प उभारण्यात येणार आहे. असाच प्रकल्प पडेगाव येथे देखील उभारला जाणार आहे. हर्सूल येथील जागेवर मात्र खुल्या तंत्रज्ञानावर आधारित प्रकल्पाची उभारणी केली जाणार आहे. कांचनवाडी येथील जागेवर बायोमिथेनायझेशनचा प्रकल्प उभारण्याचे महापालिकेने ठरविले आहे.

कांचनवाडी येथील गट क्रमांक ८ मधील सुमारे चार एकर जागेवर हा प्रकल्प उभारण्यात येणार आहे. याबद्दल महापालिकेने प्रदूषण नियंत्रण मंडळाकडून परवानगी मिळण्यासाठी व ना हरकत प्रमाणपत्र मिळण्यासाठी पत्रव्यवहार केला होता. प्रदूषण नियंत्रण मंडळाने पालिका आयुक्तांच्या नावे पत्र पाठवून बायोमिथेनाझेशन प्रकल्पाला परवानगी देत असल्याचे स्पष्ट केले आहे. ३१ डिसेंबर २०१३ पर्यंत या प्रकल्पाला प्रदूषण नियंत्रण मंडळाची परवानगी असेल असे आयुक्तांच्या नावे पाठवण्यात आलेल्या पत्रात नमूद करण्यात आले आहे. त्यानंतर महापालिकेला परवानगीचे नूतनीकरण करावे लागणार आहे. काही अटींच्या आधीन राहून परवानगी देण्यात येत आहे, असा उल्लेख देखील पत्रात करण्यात आला आहे. घनकचरा व्यवस्थापनाच्या संदर्भात २०१६ च्या कायद्याचे काटेकोरपणे पालन व्हावे, त्याचे उल्लंघन झाल्यास कारवाई करण्यात येईल, असा इशाराही देण्यात आला आहे. महापालिकेने २००६ या वर्षीच्या शासनाच्या निर्देशांचे देखील पालन तंतोतंत करणे गरजेचे आहे, असा उल्लेख नियंत्रण मंडळाने केला आहे. प्रकल्प उभा करणाऱ्या कंत्राटदाराने केंद्रीय प्रदूषण नियंत्रण मंडळाच्या मार्गदर्शकतत्वांनुसारच प्रकल्पाची उभारणी केली पाहिजे, हे त्याच्यासाठी बंधनकारक असेल अशी अट देखील नियंत्रण मंडळाने घातली आहे.

प्रदूषण नियंत्रण मंडळाची परवानगी व ना हरकत प्रमाणपत्र मिळाल्यामुळे आयुक्त डॉ. निपुण विनायक यांनी ट्विटरवरून समाधान व्यक्त केले आहे. आता लवकर या प्रकल्पाचे काम सुरू व्हावे, अशी भावना त्यांनी व्यक्त केली आहे.

म. टा. प्रतिनिधी, औरंगाबाद

नवोदित दिग्दर्शकांच्या कल्पक शॉर्टफिल्म चित्रपट महोत्सवाचे आकर्षण ठरल्या. शॉर्टफिल्म पाहण्यासाठी सर्वाधिक गर्दी झाली. चित्रकलेचे वेगळे विश्व दाखवणारा 'न्यूड' चित्रपट प्रेक्षकांना अंतर्मुख करुन गेला. इंगमार बर्गमन यांच्या 'पर्सोना' चित्रपटाला मोठा प्रतिसाद मिळाला.

सहाव्या औरंगाबाद आंतरराष्ट्रीय चित्रपट महोत्सवात शुक्रवारी वैविध्यपूर्ण चित्रपटांची रेलचेल होती. रवी जाधव दिग्दर्शित 'न्यूड' चित्रपटाने सुरुवात करण्यात आली. चित्रकला क्षेत्रातील पडद्यामागचे अनुभव मांडणारा चित्रपट प्रेक्षकांना अंतर्मुख करणारा ठरला. 'भोर', 'ऑरॉन', 'अंडरपँट थिफ' या चित्रपटांनाही गर्दी झाली. इंगमार बर्गमन दिग्दर्शित 'पर्सोना' चित्रपटाबाबत रसिकांमध्ये विशेष उत्सुकता होती. मात्र, गर्दी जास्त झाल्यामुळे काही वेळ नियोजन कोलमडले होते. बेशिस्त प्रेक्षकांनी शेरेबाजी करीत इतरांची गैरसोय केली.

दरम्यान, महोत्सवात शनिवारी 'अब्यक्तो', 'लव्हलेस', 'पेंटींग लाइफ', 'बंदिशाळा', 'भुवन शोम' चित्रपट दाखवण्यात येणार आहेत. दुपारी दोन वाजता परिसंवाद होणार आहे. या परिसंवादात दिग्दर्शक तेजस देऊस्कर, समीक्षक अमोल उदगीकर, दिग्दर्शक शिव कदम, अभिनेता संदीप कुलकर्णी सहभागी होणार आहेत.

शॉर्टफिल्मला गर्दी

एमजीएम शॉर्टफिल्म कॉम्पिटीशनला प्रेक्षकांची सर्वाधिक गर्दी झाली. सूरजा शिंदे दिग्दर्शित 'सदरा', अभिजीत माणके दिग्दर्शित 'राखोळी', अस्मिता जगदाळे दिग्दर्शित 'वजू', निखिल रामेकर दिग्दर्शित 'द लास्ट मिस्टेक' या शॉर्टफिल्म दाखवण्यात आल्या. औरंगाबाद शहरातील चित्रकर्मींच्या शॉर्टफिल्म प्रेक्षकांच्या पसंतीत उतरल्या.

म. टा. प्रतिनिधी, औरंगाबाद -

महापालिकेतर्फे मालमत्ता कर वसुली आणि बांधकामे नियमित करण्याची मोहीम १२ जानेवारी ते ३१ जानेवारीपर्यंत राबविण्यात येणार आहे. या मोहिमेच्या दरम्यान विलंब शुल्कामध्ये ५० टक्के सूट दिली जाणार आहे. या संदर्भातील अधिकृत घोषणा महापौर नंदकुमार घोडेले शनिवारी करणार आहेत.

दिवाळी संपल्यावर लगेचच महापालिकेतर्फे विशेष कर वसुली आणि बांधकामे नियमितीकरणाची मोहीम राबवण्यात आली होती. आठ दिवसांच्या या मोहिमेत ११ कोटी रुपयांचा कर जमा झाला. अशाच प्रकारची मोहीम पुन्हा राबवा, अशी मागणी नागरिकांकडून होत असल्यामुळे १२ ते ३१ जानेवारी दरम्यान मोहीम राबवण्याचे ठरविण्यात आले आहे. १० जानेवारीपासून ही मोहीम सुरू करायची होती, पण आयुक्त रजेवर असल्यामुळे त्या दिवशी मोहीम सुरू होऊ शकली नाही. आता शनिवारी (१२ जानेवारी) सकाळी ११ वाजता महापौरांसह अन्य पदाधिकाऱ्यांच्या उपस्थितीत मोहिमेचा शुभारंभ केला जाणार आहे. या मोहिमेच्या दरम्यान जे नागरिक मालमत्ता कर व पाणीपट्टी भरतील त्यांना विलंबशुल्कामध्ये ५० टक्के सूट दिली जाणार आहे. या मोहिमेसाठी पालिका प्रशासनाने तयारी केली आहे. वॉर्डनिहाय थकबाकीदारांची यादी तयार करण्यात आली आहे. शैक्षणिक संस्था, सरकारी-निमसरकारी कार्यालये यांच्याकडे असलेली थकबाकी वसूल करण्याचे उद्दीष्ट या मोहिमेच्या दरम्यान ठेवण्यात आले आहे.

औरंगाबाद : तालुका तलाठी संघाची नवीन कार्यकारणी नुकतीच जाहीर करण्यात आली असून अध्यक्षपदी योगेश पंडित, तर सरचिटणीसपदी संतोष लोळगे यांची निवड करण्यात आली. जिल्हाध्यक्ष सतीश तुपे यांच्या अध्यक्षतेखाली झालेल्या बैठकीमध्ये ही कार्यकारणी निवड करण्यात आली. यामध्ये गणेश सोनवणे (उपाध्यक्ष),सतीश घुगे (कार्याध्यक्ष), स्वप्नील शेळके (सहसचिव), आर. एस. शेळके (संघटक), विशाल मगरे (कोषाध्यक्ष), घागरे अप्पा व संजय पवार (सल्लागार), ज्ञानेश्वर सोनवणे व अशोक काशिद (निमंत्रित सदस्य) तर तनुजा जगताप यांची महिला प्रतिनिधीपदी नियुक्ती करण्यात आली.

म. टा. प्रतिनिधी, औरंगाबाद

विवेकानंद कला, सरदार दलिपसिंग वाणिज्य व विज्ञान महाविद्यालयाच्या वतीने संस्थेचे संस्थापक पंढरीनाथ पाटील ढाकेफळकर यांच्या स्मृतीप्रित्यर्थ सोमवारपासून (१४ जानेवारी) बुधवारपर्यंत विवेकानंद व्याख्यानमाला आयोजित करण्यात आली आहे. यात ख्यातनाम पत्रकार, अभ्यासक पी. साईनाथ, पर्यावरण अभ्यासक अतुल देऊळगावकर व काश्मीरमधील अनाथ मुलींचे भाग्यविधाते अधिक कदम यांचे व्याख्यान होणार आहे.

विवेकानंद महाविद्यालयाच्या प्रांगणात रोज सायंकाळी सहा वाजता ही व्याख्यानमाला होणार आहे. यात पी. साईनाथ हे 'शेतीसंकट, बदलता ग्रामीण भारत व शेतकरी आत्महत्या', अतुल देऊळगावकर हे 'हवामान बदलाचे आव्हान व आवाहन', तर अधिक कदम हे 'काश्मीरचे नवनिर्माणः नव्या नंदनवनाची शोधयात्रा' या विषयावर नागरिकांशी संवाद साधणार आहेत. महाविद्यालयाच्या वतीने नो व्हेईकल डे, शेअरिंग डे, मोडी लिपी कार्यशाळा, इतिहास विभागाअंतर्गत विविध प्रमाणपत्र अभ्यासक्रम, योग वर्ग आदी विविधांगी उपक्रम राबविण्यात येत असून, ध्यान केंद्रही लवकरच सुरू होणार आहेत. विवेकानंद व्याख्यानमाला हादेखील महाविद्यालयाच्या विविध उपक्रमांचाच भाग असून, यातून समाजापर्यंत पोहोचण्याचा प्रयत्न केला जात आहे, असे प्राचार्य श्याम शिरसाठ, उपप्राचार्य सर्वश्री डॉ. डी. आर. शेंगुळे, डॉ. आर. बी. शेजुळ, डॉ. तोटावाड आदींनी शुक्रवारी (११ जानेवारी) पत्रकार परिषदेत सांगितले.

\B'इन्फोसिस'साठी १२ जणांची निवड\B

महाविद्यालयामध्ये स्पर्धा परीक्षांसाठीही व्यावसायिक पद्धतीने विद्यार्थ्यांना मार्गदर्शन करण्यात येत आहे. स्पर्धा परीक्षांसाठी खासगीत २५-३० हजारांवर शुल्क घेतले जाते; परंतु महाविद्यालयात विद्यार्थ्यांना तज्ज्ञांकडून अशा प्रकारचे मार्गदर्शन केले जात आहे. याच विविध उपक्रमांमुळेच विद्यार्थ्यांना विविध क्षेत्रांत यश मिळत असून, शहरात नुकत्याच झालेल्या 'कॅम्पस इंटरव्हूव्ह'मध्ये महाविद्यालयामध्ये 'बीसीएस' केलेल्या १२ विद्यार्थ्यांची 'इन्फोसिस'सठी निवड झाली आहे.

म. टा. प्रतिनिधी, फुलंब्री

तालुक्यातील पाल शिवारात गिरजा नदी पत्रातून वाळूची अवैध वाळू वाहतूक करणाऱ्या दोन ट्रॅक्टरवर महसूल विभागाच्या अधिकाऱ्यांनी शुक्रवारी (११ जानेवारी) कार्यवाही केली. वाळूसह आठ लाख दहा हजारांचा मुद्देमाल जप्त करण्यात आला आहे.

तालुक्यात गिरीजा नदीचे पात्र मोठ्या प्रमाणात असून लिलाव झालेला नसताना वाळू चोरी होत आहे. याकडे तालुका प्रशासन दुर्लक्ष करीत आहे. तालुक्यातील पाल परिसरातून जाणाऱ्या गिरीजा नदी पत्रात अवैध वाळू दोन ट्रॅकटरच्या ट्रॉलीत भरून चोरीच्या उद्देशाने घेऊन जात होते. ही माहिती तहसील कार्यालयातील महसूल विभागाला मिळाल्यानंतर नायब तहसीलदार कचरू काथार, सुनील विश्वासू व एस. जी. सदावर्ते, महेंद्र मुनवर यांचे पथक घटनास्थळी पोहोचले. त्यांनी दोन्ही चालकांकडे रॉयल्टीबद्दल चौकशी केली. पण, त्यांच्याकडे रॉयल्टी आढळून आली नसल्यामुळे दोन्ही ट्रॅकटरवर जप्तीची कार्यवाही करून तहसील कार्यालायत आणले. ट्रॅक्टर क्रमांक एम. एच. २०, ए. बी. ९६२३ व एम. एच. २१ ए. डी. ५२३७ वर कार्यवाही करण्यात आली. याप्रकरणी एक लाख २५ हजार ४०० रुपयांची दंडात्मक कार्यवाहीची नोटीस देणार असल्याचे गौण खनिज विभागाचे प्रमुख कैलास जेठे यांनी सांगितले.

म. टा. प्रतिनिधी, वैजापूर

मराठा सेवा संघातर्फे जिजाऊ जन्मोत्सव साजरा करण्यासाठी गुरुवारी वैजापूर येथून सिंदखेडराजा येथे जिजाऊ रथयात्रा रवाना करण्यात आली. सिंदखेडराजा येथे ४२१ ज्योती प्रज्वलित करून रथयात्रेचे स्वागत करण्यात येणार आहे.

येथील छत्रपती शिवाजी महाराज पुतळ्यापासून रथयात्रेला सुरुवात झाली. यावेळी शिवाजी महाराजांना अभिवादन करण्यात आले. रथयात्रेचे आयोजक मोतीभाऊ वाघ, बाळू कोतकर, रतिलाल गायकवाड, धोंडिरामसिंह राजपूत, अण्णासाहेब घायवट, फकिरराव गलांडे, बाबासाहेब राऊत, गणेश वाघ आदी उपस्थित होते. सोनाली वाघ या मुलीने नारळ फोडल्यानंतर जिजाऊंच्या प्रतिमेची मिरवणूक काढण्यात आली. याप्रसंगी मराठा सेवा संघाचे जिल्हा अध्यक्ष डॉ. सुभाष बागुल, प्रा. सुरेश लिपाणे, श्याम मुळे, शंकर जाधव, वाल्मिक इंगळे, शशिकांत भालेराव, जगन गायकवाड, लियाकत उपस्थिती होते.

म. टा. प्रतिनिधी, औरंगाबाद

मोबाइल हाती आल्यानंतर तरुण दिग्दर्शकांची प्रयोगशीलता वाढली आहे. आपल्या मनातील सृजनाला पडद्यावर आणण्यासाठी प्रयत्न करीत आहेत. मात्र, केवळ कथावस्तू आणि तंत्रज्ञान हाती असून उपयोग नसतो. चित्रभाषा आत्मसात करून अभिजात कलाकृतींची निर्मिती करा असे मत मान्यवरांनी मांडले.

सहाव्या औरंगाबाद आंतरराष्ट्रीय चित्रपट महोत्सवात 'विथ मोबाइल एव्हरीवन इज ए फिल्ममेकर' चर्चासत्र घेण्यात आले. शनिवारी दुपारी झालेल्या परिसंवादात अभिनेता संदीप कुलकर्णी, स्पंदन फाऊंडेशनचे अमरजीत आमले, दिग्दर्शक तेजस देऊस्कर, कथालेखक अमोल उदगीरकर, महोत्सवाचे संचालक अशोक राणे व दिग्दर्शक शिव कदम सहभागी झाले. मोबाइलमुळे तंत्रज्ञान प्रत्येकाच्या हातात पोहचले. शॉर्टफिल्म, डॉक्युमेंट्री आणि चित्रपट यांचे चित्रीकरणसुद्धा मोबाइलद्वारे करण्यात येत आहेत. आपली संकल्पना थेट पडद्यावर मांडण्यासाठी नवीन तंत्रज्ञान उपयुक्त ठरत आहे. मात्र, तंत्रज्ञान असून उपयोग नसतो. तर चित्रपटाचे माध्यम समजून घेणे गरजेचे आहे असा मुद्दा परिसंवादात रंगला. दिग्दर्शक तेजस देऊस्कर म्हणाले, 'चित्रपट निर्मितीसाठी तंत्रज्ञान शिकणे गरजेचे आहे. चांगला विषय उत्तमरित्या मांडून प्रेक्षकांच्या हृदयापर्यंत पोहचण्यासाठी तंत्रज्ञानाची भूमिका उपयुक्त ठरते. अनेक गोष्टी तंत्रामुळे मनापर्यंत पोहचतात. या माध्यमातून प्रेक्षकांशी खोलवर संवाद साधता येतो.' गोष्ट सांगण्यासाठी चित्रपट माध्यम उपयुक्त असल्याचे अभिनेते संदीप कुलकर्णी यांनी सांगितले. 'उपजत काही सांगायचे असेल तर चित्रपट माध्यम सर्वोत्कृष्ट आहे. या क्षेत्रातील प्रत्येक माणूस काही ना काही सांगण्याचा प्रयत्न करतो. आपल्या देशात प्रत्येक क्षेत्रात अस्थैर्य आहे. त्यातून प्रत्येकाच्या मनात खदखद वाढली आहे. अशावेळी कुणीतरी चांगले प्रयत्न करीत आहे. ही प्रयोगशीलता उपयुक्त ठरेल' असे कुलकर्णी म्हणाले. उदगीरकर यांनी मोबाइलच्या उपयुक्ततेवर भाष्य केले. 'मोबाइल आपल्या हाती लागलेले वरदान आहे. विशेषत: तरुणांच्या विचारविश्वात खूप काही घडत आहे. मोबाइलमुळे व्यक्त होण्याला वाट मिळाली आहे. या वरदानाचा उत्तम वापर करा' असे उदगीकर म्हणाले. तर आमले यांनी चित्रपटाची भाषा समजून सांगितली. 'चित्रपट जगायला शिका. जेव्हा तुम्ही चित्रपटाशी एकरुप व्हाल तेव्हाच तुम्ही त्याचा भाग होऊ शकाल. चित्रपट करणारी माणसे ध्येयवेडी असतात. आजूबाजूच्या संवेदना तुमच्यापर्यंत किती प्रभावीपणे पोहचतात यावर तुमचे व्यक्त होणे अवलंबून आहे. जीवन जगताना आणि जगात वावरताना संवेदना पकडा असे आमले म्हणाले. उपस्थित प्रेक्षकांनी मान्यवरांशी संवाद साधला. या परिसंवादाला चांगला प्रतिसाद मिळाला. दरम्यान, महोत्सवात रविवारी दुपारी दोन वाजता दिग्दर्शक उमेश कुलकर्णी यांचा मास्टरक्लास होणार आहे.

\Bसुप्रिया सुळे यांची भेट\B

औरंगाबाद आंतरराष्ट्रीय चित्रपट महोत्सवाला खासदार सुप्रिया सुळे यांनी शनिवारी दुपारी भेट दिली. सुळे यांनी प्रेक्षकांशी संवाद साधला. यावेळी यशवंतराव चव्हाण प्रतिष्ठानचे अध्यक्ष अंकुशराव कदम, संयोजक नीलेश राऊत, शिव कदम, पवन गंगावणे, योगिता तळेकर आदी उपस्थित होते.

\Bसमारोप आज

\Bचित्रपट महोत्सवाचा रविवारी समारोप होणार आहे. प्रोझोन ऑयनॉक्स येथे सायंकाळी साडेसहा वाजता लघुपट आणि भारतीय चित्रपट गटातील सर्वोत्कृष्ट कलाकृतींना पुरस्कार देण्यात येणार आहे. या कार्यक्रमाला दिग्दर्शक एन. चंद्रा यांच्यासह इतर परीक्षक उपस्थित राहणार आहेत. त्यानंतर 'शॉपलिफ्टर्स' चित्रपट दाखवण्यात येणार आहे.

औरंगाबाद : २०१९ मध्ये होणाऱ्या लोकसभा निवडणुकीसाठी औरंगाबाद लोकसभा मतदारसंघातून काँग्रेसकडून इच्छुक असलेल्या उमेदवारांच्या मुलाखती गुरुवारी (१७ जानेवारी) आयोजित करण्यात आल्या आहेत.

जिल्हा काँग्रेस समितीचे सरचिटणीस किरण डोणगावकर यांनी प्रसिद्धीस दिलेल्या पत्रकात म्हटले आहे, की इच्छुक उमेदवारांच्या मुलाखती गुरुवारी सकाळी दहा वाजता शहागंज येथील गांधीभवनात जिल्हा निवड मंडळासमोर होतील. मंडळात जिल्हाध्यक्ष, शहराध्यक्ष, प्रदेश निरीक्षक, आजी माजी मंत्री, आमदार, खासदार, सर्व फ्रंटचे जिल्हाध्यक्ष यांचा समावेश आहे. मुलाखतीनंतर जिल्हा निवड मंडळाची बैठक होईल. इच्छुकांनी मुलाखतींसाठी उपस्थित राहावे, असे आवाहन जिल्हाध्यक्ष आमदार अब्दुल सत्तार, शहराध्यक्ष नामदेव पवार, आमदार सुभाष झांबड,कार्याध्यक्ष डॉ. कल्याण काळे, माजी आमदार नितीन पाटील यांनी केले आहे.

औरंगाबाद : इन्स्टिट्यूट फॉर डिझाइन ऑफ इलेक्ट्रिकल मेजरिंग इन्स्ट्रुमेंट (आयडीईएमआय),मुंबई. सूक्ष्म, लघु व मध्यम उद्योग मंत्रालयाच्या वतीने चेंबर ऑफ मराठवाडा इंडस्ट्रिज अँड अॅग्रीकल्चर (सीएमआयए) येथे १५ ते १७ जानेवारी दरम्यान एलईडी लाइट मॅन्युफॅक्चरिंग या विषयावर कार्यशाळेचे आयोजन करण्यात आले आहे. वरील तीन दिवशी दररोज दुपारी दोन ते सायंकाळी साडेपाच या वेळेत ही कार्यशाळा होईल. चर्चासत्रात एलईडी व्यवसायाची सुरुवात कशी करावी ? व्यवसाय संधी, बेसिक्स ऑफ एलईडी, बेसिक्स ऑफ पीसीबी, एलईडी ड्रायव्हर, बेसिक्स ऑफ सोल्डरिंग, टाइप्स ऑफ कंपोनंटस फिटिंग, टेस्टिंग ऑफ इल्युमिनेशन हँडस ऑन प्रॅक्टिस ऑफ मेकिंग एलईडी बल्ब अँड ट्यूब्ज याबाबत तांत्रिक बाबींची माहिती दिली जाईल. प्रशिक्षण पूर्ण करणाऱ्यांना प्रमाणपत्र दिले जाईल. प्रशिक्षणात सहभागी होण्यासाठी पूर्व नावनोंदणी आवश्यक आहे. अधिक माहितीसाठी सीएमआयए कार्यालय, रेल्वेस्टेशन एमआयडीसी येथे संपर्क साधावा,असे आवाहन करण्यात आले आहे.

म. टा. प्रतिनिधी, औरंगाबाद

अतिक्रमणातील घराचे काम करून देतो असे सांगून ४५ वर्षीय महिलेवर अत्याचार करणाऱ्या वाहन चालकाला शुक्रवारी रात्री पोलिसांनी बेड्या ठोकल्या. त्याला न्यायालयात हजर केले असता रविवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी एन. ए. पठाण यांनी शनिवारी दिले. रानबा उर्फ ज्ञानोबा जाधव (५७, रा. शासकीय निवास्थान छावणी) असे आरोपीचे नाव आहे.

जयसिंगपुऱ्यात राहणाऱ्या एका महिलेने याप्रकरणी तक्रार दिली. पीडिता ही बहिण व वडिलांसोबत राहते. तिच्या घरी महापालिकेची नोटीस आली. त्यात घर अतिक्रमणात असल्याचे नमूद करण्यात आले होते. त्यामुळे पीडिता नोव्हेंबर २०१८मध्ये पालिकेत नोटीसबाबत विचारपूस करण्यासाठी गेली असता तेथील कर्मचाऱ्यांनी तिला विभागीय आयुक्त कार्यालयात पाठविले. तेथे गेटवर पीडिता विचारपूस करीत असताना आरोपी जाधव याने पीडितेला भुमीलेख कार्यालयात जावून जागेच्या मोजमाप करण्यास सांगितले. काही मदत लागल्यास फोन करा, असे म्हणत एका कागदावर नाव व नंबर दिला. त्यानंतर संबंधित जागेचा निकाल पीडितेच्या कुटुंबाविरोधात लागला. ही बाब पीडितेने आरोपी जाधव याला सांगितली. त्यावर आपण दुसऱ्या पद्धतीने दावा करू म्हणत आरोपीने कागदपत्र घेण्याचा बहाणा करत २६ डिसेंबर २०१८ रोजी रात्री साडेसात ते साडेआठच्या दरम्यान पीडितेचे घर गाठले. तेव्हा पीडितेची बहीण वडिलांना सोडण्यासाठी रेल्वे स्थानकात गेली होती. ही संधी साधून आरोपी जाधव याने पीडितेवर अत्याचार केला.

\Bठार मारण्याची धमकी

\Bपीडितेने आरडा-ओरड करण्याचा प्रयत्न केला असता तिचे तोंड दाबून जीवे मारण्याची धमकी दिली. या प्रकरणात एक जानेवारी रोजी बेगमपुरा पोलिस ठाण्यात गुन्हा दाखल करण्यात आला. पोलिसांनी आरोपी जाधवला अटक करून न्यायालयात हजर केले असता विशेष सहायक सरकारी वकील आमेर काजी यांनी आरोपीला पोलिस कोठडी देण्याची विनंती न्यायालयाकडे केली. ही विनंती कोर्टाने मान्य केली.

म. टा. प्रतिनिधी, औरंगाबाद

औरंगाबाद स्मार्ट सिटी डेव्हलपमेंट कॉर्पोरेशन कंपनीची चुकीच्या पद्धतीने नोंदणी केल्यामुळे या कंपनीला साडेपाच कोटींचा इन्कम टॅक्स भरावा लागला. या कंपनीची नोंदणी करण्याची जबाबदारी 'पीएमसी'ची होती. पीएमसीने त्यात चूक केल्यामुळे साडेपाच कोटी 'पीएमसी'कडूनच वसूल करा, अशी मागणी कंपनीचे संचालक व महापालिकेच्या पदाधिकाऱ्यांनी आयुक्त तथा कंपनीचे मुख्याधिकारी डॉ. निपुण विनायक यांच्याकडे केली आहे.

स्मार्ट सिटी मिशनच्या अंतर्गत औरंगाबाद स्मार्ट सिटी डेव्हलपमेंट कॉर्पोरेशनला शासनाकडून सुमारे २५० कोटी मिळाले आहेत. या रकमेवर कंपनीने शासनाकडे साडेपाच कोटींचा प्राप्ती कर भरला. हा कर भरण्याला कंपनीचे संचालक तथा महापालिकेचे सभापती रेणुकादास (राजू) वैद्य यांनी आक्षेप घेतला. स्मार्ट सिटी मिशनमध्ये देशातील शंभर शहरांचा समावेश झाला आहे. या शहरांपैकी औरंगाबाद असे आहे की या शहराच्या कंपनीने प्राप्ती कर भरला आहे. कंपनी स्थापन करून त्याची शासनदरबारी नियुक्ती करण्याची जबाबदारी 'सीएचटूएमएल पीए'ची होती. या 'पीएमसी'ने कंपनीच्या नावासमोर 'लिमिटेड' हा शब्द लावल्यामुळे कंपनीला प्राप्ती कर भरावा लागला. त्यामुळे प्राप्ती कर भरलेले साडेपाच कोटी 'पीएमसी'कडून वसूल करा अशी मागणी आयुक्तांकडे केली असल्याचे वैद्य म्हणाले. स्मार्ट सिटीच्या बैठकीत देखील हा मुद्दा सर्व संचालक लावून धरतील असे त्यांनी स्पष्ट केले.

म. टा. प्रतिनिधी, औरंगाबाद

'हैदराबाद मुक्तिसंग्राम संघर्षगाथेचा समग्र इतिहास समाजासमोर आला नाही. तो जगाला कळावा,' असे आवाहन स्वामी रामानंद तीर्थ मराठवाडा विद्यापीठाचे माजी कुलगुरू डॉ. जनार्दन वाघमारे यांनी शनिवारी केले. ते 'हैदराबाद मुक्तीची संघर्षमय गाथा' कार्यक्रमात बोलत होते.

बाबासाहेब परांजपे फाऊंडेशनतर्फे रौप्यमहोत्सवानिमित्त हैदराबाद मुक्ती लढ्यातील स्वातंत्र्य सेनानींच्या शौर्यगाथा कार्यक्रमाचे आयोजन करण्यात आले होते. महसूल प्रबोधनीच्या सभागृहात आयोजित कार्यक्रमासाठी व्यासपीठावर सेवानिवृत्त सचिव देवदत्त मराठे, व्यंकटराव गायकवाड, सार्वजनिक बांधकाम विभागातील मुख्य अभियंता के. टी. पाटील, सी. डी. फकीर, अतुल चव्हाण, खुशबिरसिंग बिंद्रा यांची प्रमुख उपस्थिती होती. यावेळी डॉ. वाघमारे म्हणाले, 'हैदराबाद मुक्ती संग्रामाचा लढा मोठा आहे. आपल्या स्वातंत्र्य सैनिकांनी दिलेला लढा इंग्रजीतही समाजासमोर येण्यासाठी कुलगुरू असताना प्रयत्न केले. मात्र, दोनच खंड प्रकाशित होऊ शकले. हे कामही थांबले. जगाला हा इतिहास कळावा यासाठी इंग्रजी भाषेतून हा इतिहास लिहिला जावा. हैदराबाद प्रांताचा समग्र इतिहास लोकांपर्यंत पोहोचणे आवश्यक आहे. माजी पंतप्रधान पी. व्ही. नरसिंहराव, पद्मविभूषण गोविंदभाई श्रॉफ यांच्यासह अनेकांनी हैदराबाद प्रांताच्या इतिहास लेखनाचा प्रयत्न केला. मात्र, ते कार्य पूर्ण होऊ शकले नाही. वेगवेगळ्या पातळ्यांवर झालेल्या या लढ्यात मरावाड्यातील अनेक वीरांनी बलिदान दिले.' व्यंकटेश गायकवाड यांच्यासह अनेकांनी यावेळी आपले मनोगत व्यक्त केले. यावेळी अविनाश पाटील, बाबूराव शक्करवार आदींची प्रमुख उपस्थिती होती. कार्यक्रम यशस्वीतेसाठी जी. एस लातुरे, विवेक रेड्डी, बाळासाहेब माणुसमारे, पी. जी. कुलकर्णी आदींनी परिश्रम घेतले.

म. टा. प्रतिनिधी, औरंगाबाद

औरंगाबाद स्मार्ट सिटी डेव्हलपमेंट कॉर्पोरेशन कंपनीची चुकीच्या पद्धतीने नोंदणी केल्यामुळे या कंपनीला साडेपाच कोटींचा इन्कम टॅक्स भरावा लागला. या कंपनीची नोंदणी करण्याची जबाबदारी 'पीएमसी'ची होती. पीएमसीने त्यात चूक केल्यामुळे साडेपाच कोटी 'पीएमसी'कडूनच वसूल करा, अशी मागणी कंपनीचे संचालक व महापालिकेच्या पदाधिकाऱ्यांनी आयुक्त तथा कंपनीचे मुख्याधिकारी डॉ. निपुण विनायक यांच्याकडे केली आहे.

स्मार्ट सिटी मिशनच्या अंतर्गत औरंगाबाद स्मार्ट सिटी डेव्हलपमेंट कॉर्पोरेशनला शासनाकडून सुमारे २५० कोटी मिळाले आहेत. या रकमेवर कंपनीने शासनाकडे साडेपाच कोटींचा प्राप्ती कर भरला. हा कर भरण्याला कंपनीचे संचालक तथा महापालिकेचे सभापती रेणुकादास (राजू) वैद्य यांनी आक्षेप घेतला. स्मार्ट सिटी मिशनमध्ये देशातील शंभर शहरांचा समावेश झाला आहे. या शहरांपैकी औरंगाबाद असे आहे की या शहराच्या कंपनीने प्राप्ती कर भरला आहे. कंपनी स्थापन करून त्याची शासनदरबारी नियुक्ती करण्याची जबाबदारी 'सीएचटूएमएल पीए'ची होती. या 'पीएमसी'ने कंपनीच्या नावासमोर 'लिमिटेड' हा शब्द लावल्यामुळे कंपनीला प्राप्ती कर भरावा लागला. त्यामुळे प्राप्ती कर भरलेले साडेपाच कोटी 'पीएमसी'कडून वसूल करा अशी मागणी आयुक्तांकडे केली असल्याचे वैद्य म्हणाले. स्मार्ट सिटीच्या बैठकीत देखील हा मुद्दा सर्व संचालक लावून धरतील असे त्यांनी स्पष्ट केले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील विद्यार्थ्यांसाठी पिण्याच्या पाण्याची व्यवस्था करणे आणि पुढील दोन वर्षे समुपदेशन कार्यक्रम घेण्याचा निर्णय माजी विद्यार्थी संघटनेने घेतला आहे. या दहा कार्यक्रमांना मोठे उद्योग समूहांचे प्रायोजकत्व मिळाले आहे, अशी माहिती संघटनेचे पदाधिकारी डॉ. वाल्मिक सरवदे यांनी दिली. ते पत्रकार परिषदेत बोलत होते.

विद्यापीठातील माजी विद्यार्थी संघटनेने अधिक सक्रिय होऊन विद्यार्थ्यांसाठी विविध उपक्रम राबविण्याचा निर्णय घेतला आहे. या पार्श्वभूमीवर शनिवारी दुपारी संघटनेच्या पदाधिकाऱ्यांची बैठक झाली. यावेळी अध्यक्ष मुकुंद कुलकर्णी, डॉ. वाल्मिक सरवदे, डॉ. भारती गवळी, डॉ. सतीश दांडगे, डॉ. रत्नदीप देशमुख, डॉ. धनश्री महाजन आणि डॉ. एम. डी. शिरसाठ उपस्थित होते. विद्यापीठातील पाणी टंचाईमुळे विद्यार्थ्यांची गैरसोय होते. त्यामुळे आजीवन प्रौढ निरंतर शिक्षण विभाग परिसरात पाणी उपलब्ध करण्याचा निर्णय घेण्यात आला. या उपक्रमाचा खर्च संघटना करणार आहे. तसेच 'करिअर बिल्डिंग कॅपॅसिटीज अँड कॉम्पिटन्स' या विषयावर एक दिवसाचे मार्गदर्श शिबिर घेण्यात येणार आहे. आतापर्यंत माजी विद्यार्थी संघटनेच्या वतीने विविध मान्यवरांचे उद्योजकेतील संधी या विषयावर १७ व्याख्याने घेण्यात आली. २०१९ आणि २०२० या दोन वर्षांचे नियोजन करण्यात आले, असे सरवदे यांनी सांगितले. या संघटनेत आतापर्यंत तीन हजार २६५ विद्यार्थ्यांनी नाव नोंदणी केली आहे.

\Bसदस्यत्वाचे आवाहन

\B'बामू'चे हजारो विद्यार्थी देश-विदेशात उच्च पदावर कार्यरत आहे. या सर्वांना माजी विद्यार्थी संघटनेचे सदस्यत्व घेण्याचे आवाहन पदाधिकाऱ्यांनी केले आहे. आर्थिक सहकार्य मि‌ळाल्यास विधायक उपक्रम घेणे शक्य होईल, असे आवाहनात म्हटले आहे.

म. टा. प्रतिनिधी, औरंगाबाद

राष्ट्रवादी काँग्रेसच्या नेत्यांना शिवसेनेच्या महापौरांचे आकर्षण आहे का, असा प्रश्न आता विचारला जाऊ लागला आहे. त्याला दोन भेटींची कारणे आहेत. त्यामुळे शिवसेनेच्या वर्तुळातही या गाठींची चविष्ट चर्चा सुरू आहे.

औरंगाबादचे महापौर नंदकुमार घोडेले यांच्याबद्दल सर्वच पक्ष, संघटना, व्यक्तींमध्ये आपुलकीची भावना आहे. ही भावना फक्त औरंगाबादपुरतीच मर्यादित आहे असे या क्षेत्रात काम करणाऱ्यांचा समज होता. मात्र, तो समजही किती संकुचित आहे हे त्या दोन घटनांनी लक्षात आणून दिले आहे. शिवसेनाप्रमुख बाळासाहेब ठाकरे यांच्या स्मारकाच्या संदर्भात महापौर घोडेले यांच्यासह सभापती रेणुकादास (राजू) वैद्य आणि सभागृहनेता विकास जैन शुक्रवारी मुंबईला गेले होते. महापौरांची एक कार आणि वैद्य - जैन यांची दुसरी कार असा त्यांचा प्रवास होता. सकाळी सहाच्या सुमारास ते औरंगाबादेतून मुंबईकडे निघाले. दुपारी बारा वाजताची वेळ एकनाथ शिंदे यांनी या पदाधिकाऱ्यांना दिली होती. बरोबर बारा वाजता हे सर्वजण शिंदेच्या दालनात पोचले. शिंदेंशी चर्चा करून लगेचच ते माघारी फिरले. महापौरांची गाडी ठाणे येथे आली असता राष्ट्रवादी काँग्रेसचे आमदार जितेंद्र आव्हाड यांना दिसली. त्यांनी ती थांबवली आणि घोडेले यांच्या भेटासाठी ते त्यांच्या जवळ आले. घोडेले यांचा पाहुणचार करून त्यांनी त्यांच्याशी दहा ते पंधरा मिनीटे चर्चा केली. या भेटीची माहिती खुद्द महापौरांनी अनौपचारिकपणे पत्रकारांना दिली. यावेळी सभापती, सभागृहनेते देखील उपस्थित होते.

\B...अन् चर्चा रंगली!

\Bशनिवारी जिजाऊ जयंतीनिमित्त महापौर जिजाऊ चौकात अभिवादन करण्यासाठी गेले होते. या ठिकाणी राष्ट्रवादी काँग्रेसच्या नेत्या खासदार सुप्रिया सुळे देखील होत्या. महापौरांना पाहताच त्यांनी देखील आदरभाव व्यक्त केला. अभिवादन केल्यानंतर घोडेले - सुळे यांच्यात काही मिनीटे चर्चा झाली. घोडेले यांनीही सुळे यांचे स्वागत केले. दोघांमध्ये झालेल्या चर्चेचे अनेक कार्यकर्ते साक्षीदार होते.

म. टा. प्रतिनिधी, औरंगाबाद

रहेमानिया कॉलनीतल्या भाडेकरूना त्रास देणाऱ्यांना समजविण्यासाठी गेलेल्या जागा मालकाचा एका अल्पवयीन मुलाने भरदिवसा कात्री भोसकून खून केल्याची घटना घडल्याने खळबळ उडाली आहे. हॉटेल दरबार येथे ही घटना घडली. समद खान हाजी अहेमद खान (वय ४०, रा. कैसर कॉलनी) असे मृताचे नाव आहे.

पोलिसांनी दिलेल्या माहितीनुसार, समद खान यांचे कैसर कॉलनीत अजमत किराणा दुकान आहे. त्यांचे रहेमानिया कॉलनी भागात मदिना नावाचे हॉटेलही आहे. या हॉटेलमागे त्यांची तीन मजली इमारत आहे. तिथे भाडेकरू राहतात. दुपारी समद खान हे भाडेकरूंना भेटण्यासाठी तसेच भाडे वसूल करण्यासाठी आले होते. त्यावेळी भाडेकरूंनी या भागातील काही जण नाहक त्रास देत असल्याची तक्रार केली. अनेक जण इमारतीसमोर गाड्या उभ्या करतात. त्यांना समजावल्यास शिवीगाळ करतात, वाद घालतात असे सांगितले. त्यामुळे समद खान या मुलांना समजविण्यासाठी गेले असता, समद खान आणि त्या मुलांमध्ये वादावादी आणि शिवीगाळ झाली. या वादावादीनंतर विधीसंघर्ष बालकाने बाजूच्या टेलरच्या दुकानातून कपडे कापण्याची कात्रीसह दाबण आणले. कात्री आणि दाबन एकाच वेळी समद यांच्या छातीत आणि पोटात खुपसले. त्यामुळे खान रक्ताच्या थारोळ्यात पडले. त्यांना जखमी अवस्थेत उपचारासाठी घाटीत दाखल केले असता, त्यांचा वाटेतच मृत्यू झाला. खुनाची वार्ता कळताच नातेवाइकांनी घाटीत धाव घेतली होती. घाटीत जमाव जमल्याने त्या ठिकाणी कोणताही अनुचित प्रकार घडू नये यासाठी तगडा बंदोबस्त तैनात करण्यात आला होता. घटनेची माहिती मिळताच जिन्सी पोलिसांनी घटनास्थळी धाव घेतली. मृताच्या नातेवाइकांनी या भागात राहणारे सलीम पटेल यांच्या मुलाने खून केल्याचा आरोप केला आहे. या प्रकरणी जिन्सी पोलिस ठाण्यात गुन्हा दाखल करण्याची प्रक्रिया सुरू होती. या प्रकरणात दोन जणांना ताब्यात घेतल्याची माहिती सूत्रांनी दिली. दरम्यान, रहेमानिया कॉलनीत खून झाल्याची माहिती मिळताच नागरिकांची प्रचंड गर्दी जमली. जिन्सी पोलीस ठाण्याचे पोलीस निरीक्षक श्यामसुंदर वसूरकर हे पथकासह दाखल झाले. यावेळी दंगल नियंत्रण पथकाची व्हॅनही दाखल झाली. काही वेळानंतर उपायुक्त डॉ. राहुल खाडे यांनी घटनास्थळाला भेट दिली. या ठिकाणी पोलिस बंदोबस्त लावण्यात आला होता.

\Bखून करणारा नशेखोर\I

\I\Bखून करणारा अल्पवयीन मुलगा अमलीपदार्थाची नशा करतो. त्याच्याविरोधात जिन्सी पोलीस ठाण्यात दोन गुन्हे दाखल आहेत. या मारेकऱ्याच्या भावाचेही गुन्हेगारी रेकॉर्ड आहे, असे पोलिसांनी सांगितले. दरम्यान, खुनाची बातमी समजताच …गुन्हे शाखेचे अफरोज खान टीमसह दाखल झाले. आरोपीच्या शोधासाठी पोलिसांच्या तीन टीम वेगवेगळ्या ठिकाणी पाठविण्यात आल्या आहेत. आरोपीच्या वडिलांना आणि भावाला ताब्यात घेतल्याची माहिती पोलिस निरीक्षक श्यामसुंदर वसूरकर यांनी दिली.