म. टा. प्रतिनिधी, औरंगाबाद 'आंबेडकरी पक्षातील सर्व गट एकत्र येणार असतील तर मी अॅड. बाळासाहेब आंबेडकर यांच्या नेतृत्वाखाली काम करण्यास तयार आहे. एकच लक्ष्य रिपब्लिकन पक्ष हे ध्येय ठेवून ऐक्य होणार असेल तर मंत्रिपद सोडण्यास तयार आहे, असे प्रतिपादन केंद्रीय सामाजिक न्याय राज्यमंत्री रामदास आठवले यांनी केले. ते नामविस्तार दिनी जाहीर सभेत बोलत होते. डॉ. बाबासाहेब आंबेडकर मराठवाडा विद्यापीठाच्या २५ व्या नामविस्तार दिनानिमित्त रिपाइंचे अध्यक्ष खासदार रामदास आठवले यांची जाहीर अभिवादन सभा झाली. आंबेडकर महाविद्यालयाच्या मैदानावर सोमवारी रात्री झालेल्या सभेला प्रदेश अध्यक्ष बाबूराव कदम, खासदार चंद्रकांत खैरे, मिलिंद शेळके, संजय ठोकळ, किशोर थोरात, उद्धव सोनवणे, नागराज गायकवाड, श्रावण गायकवाड, मधुकरराव चव्हाण, मन्सूर अली खान आदी उपस्थित होते. प्रदेश उपाध्यक्ष मिलिंद शेळके यांनी भारिप बहुजन महासंघाचे नेते अॅड. प्रकाश आंबेडकर यांच्यावर टीका केली. त्यामुळे काही वेळ सभेत गोंधळ होऊन तणाव निर्माण झाला होता. आपल्या भाषणात आठवले यांनी वादावर पडदा टाकला. हा दिवस टीका टिप्पणीचा नाही. आमच्या नेत्यांनीही टीका करताना भान ठेवले पाहिजे. आपल्या समाजाच्या नेत्यावर टीका कशासाठी? नामांतर झाल्यानंतर सामाजिक न्यायासाठी सर्वांनी एकत्रित येणे गरजेचे आहे. गायरान जमिनी मिळवून देणे, मागासवर्गीय विद्यार्थ्यांचे शिष्यवृत्तीचे प्रश्न, उद्योगात संधी देणे, बेघरांना पक्की घरे बांधून देणे अशी अनेक महत्त्वाची कामे आहेत. त्यामुळे आपापसात गोंधळ घालून उपयोग नाही. सगळे आंबेडकरी पक्ष एकत्र आले आणि सर्व समाज घटकांना सोबत घेतल्यास महाराष्ट्राचा मुख्यमंत्री रिपब्लिकन पक्षाचा होईल. सगळे गट एकत्र येणार असतील तर मी मंत्रीपद सोडून बाळासाहेब आंबेडकर यांच्या नेतृत्वाखाली काम करण्यास तयार आहे, असे आठवले म्हणाले. या सभेत नागसेन सावदेकर, निशा भगत, राजाभाऊ शिरसाट यांनी भीमगीते सादर केली. सभेला नागरिक उपस्थित होते. वंचित बहुजन आघाडीवर टीका एमआयएम आणि भारिप बहुजन महासंघाची युती दळभद्री आहे अशी टीका रिपाइं नेते संजय ठोकळ यांनी केली. सत्तेत जाण्यासाठी कोणताही पक्ष वर्ज्य नसतो. भाजपसोबत रिपाइंने युती करुन बाबासाहेबांची पाच स्मारकं केली. भीमा कोरेगावला सर्वात आधी रामदास आठवले गेले होते. पण, पुणे परिषद घेऊन कुणी भीमा कोरेगाव घडवून आणले हे सर्वांना ठावूक आहे या शब्दात ठोकळ यांनी प्रकाश आंबेडकर यांना लक्ष्य केले.
मोबाइल अॅप डाउनलोड करा आणि राहा अपडेट
