शहर बससेवेला विद्यार्थ्यांचा मोठा प्रतिसाद
म. टा. प्रतिनिधी, औरंगाबाद
शहर बससेवेला पहिल्याच दिवशी विद्यार्थ्यांचा उत्स्फूर्त प्रतिसाद मिळाला. कॉलेजच्या वेळापत्रकानुसार बससेवेचे वेळापत्रक न जुळल्याने अनेक विद्यार्थ्यांची अडचण झाली. मात्र, पहिल्याच दिवशी दोन हजार विद्यार्थ्यांनी प्रवास करत, बससेवेचे स्वागत केले.
स्मार्ट सिटी अंतर्गत शहर बससेवेला प्रत्यक्ष बुधवारी सुरुवात झाली. शहरातील चौदा मार्गावरून धावणाऱ्या बसपैकी सात मार्ग औरंपुऱ्यातून जातात येथे बस थांबे आहेत. केंद्रावरून ठिकाणाहून शाळा, कॉलेजांमध्ये येणाऱ्या विद्यार्थ्यांची संख्या अधिक होती. बजाननगर, रांजनगाव, शिवाजीनगर, मुख्य बसस्थानकातून येणाऱ्या विद्यार्थ्यांची संख्या अधिक होती. औरंगपुरा ते रांजनगाव मार्गावर जाणाऱ्या शहर बससेवा सुरू झाली अन् ती रोजगार व स्वयंरोजगार कार्यालय, बाबा पेट्रोल पंप, ऑफिसर मेस, नगरनाका, गोलवाडी, साऊथ सिटी, एएस क्लब, सिडको महानगर, हॉटेल ओअॅसिस, मोरे चौक, प्रताप चौक, डॉ. आंबेडकर चौक आणि रांजणगाव फाटा अशा मार्गावर पोहचली. औरंगपुऱ्यातून बस निघताना बसमध्ये तुरळक गर्दी होती. बाबा पेंट्रोलपंपावर बस थांबली अन् गाडीत प्रवाशांची संख्या वाढली. पुढे सिडको महानगर, हॉटेल ओअॅसिस, मोरे चौक व प्रताप चौकात बसमधून उतरणाऱ्या प्रवाशांची संख्या मोठी होती. येताना रांजनगावमधून बसमध्ये बसणाऱ्यांमध्ये विद्यार्थ्यांची संख्या सर्वाधिक होती. बसमध्ये बसण्यासही जागा नसल्याने उभा राहणाऱ्यांची संख्या अधिक होती यात सर्वाधिक विद्यार्थी होते. बाबा चौकात काही प्रवासी उतरताच तोच पुन्हा बसमध्ये चढणाऱ्यांची संख्या अधिक होती. त्यामुळे या मार्गावर बसच्या फेरी अपुऱ्या पडल्या.
५० मिनिटमध्ये १४ किलोमीटर, सेल्फीचा आनंद
औरंगपुरा ते रांजणगाव अकरा बसथांबे आहेत. एक फेरी करायला ४० मिनीट अन् हॉल्टसाठी १० मिनीट देण्यात आले. मात्र, त्यापूर्वीच बस पोहचली. रस्त्यात वाहतुकीची अडचणही फारसी नव्हती. मात्र, थांबे नसल्याने अडचणी समोर आल्या. त्यामुळे विद्यार्थी, एमआयडीतील विविध कर्मचाऱ्यांना रस्त्यावरच बसची प्रतीक्षा करत थांबावे लागते. त्यामुळे बसथांबे तात्काळ करण्यात यावेत असेही प्रवाशांनी सांगितले. बसमधून उतरल्यानंतर, बसमध्ये बसल्यानंतर नवीन बसमध्ये सेल्फी काढत तरुणाईने स्वागत केले.
प्रतिक्रिया
शहर बससेवेत अत्याधुनिक बस दाखल झाल्याने आनंद झाला. कॉलेजचे व शहर बससेवेचे वेळापत्रक याचा ताळमेळ असला तर आमच्यासाठी अधिक चांगले होईल.
कल्याण बोरुडे
अनुभव अतिशय चांगला होता. मात्र, वेळेप्रमाणे बस सुरू राहाव्यात अन् संख्या अधिक वाढावी जेणेकरून प्रवाशांचा जास्तीचा वेळ खर्ची लागणार नाही.
पवन काळवणे
मी, बीएस्सीचे शिक्षण घेतो. कॉलेजमध्ये सकाळी नऊ वाजता तासिका सुरू होते. त्यामुळे रांजणवहून येण्यासाठीचा विचार केला तर बसची संख्या वाढविणे गरजेचे आहे.
अनिल लोमटे
अतिशय कमी पैशात ही सेवा सुरू झाली याचा आनंद आहे. यातील सातत्य अन् बसगाड्यांची संख्या, वेळापत्रक याबाबत अधिक स्पष्टता हवी.
अश्विनी तुपे
आमच्याकडे बससेवेचा मार्ग साजापूर, जोगेश्वरी अशा भागात नाही. त्याचा फटका विद्यार्थ्यांना बसतो आहे. याचा विचार प्रशासनाने करायला हवा.
कुणाल गायकवाड
बससंख्या कमी असल्याने उभा राहून येण्याची वेळ येते. विद्यार्थी संख्या विचारात घेत नियोजन व्हायला हवे. दर कमी झाल्याचा विद्यार्थ्यांना फायदा झाला.
ऋषिकेश धनवटे
