शिवसेना वर्तमानपत्रातून आणि जाहीर सभेत जरी आरोप-प्रत्यारोप करीत असली तरी शिवसेना आमचा जुना मित्रपक्ष आहे. केंद्र आणि राज्य सरकारमध्ये ते आमच्या सोबत आहेत. सरकारमध्ये कसल्याही प्रकारची अडचण आली नाही. कुठल्याही कामाला त्यांनी विरोध केला नाही. त्यामुळेच आम्ही त्यांच्याकडून युतीची अपेक्षा करतोय. निर्णय शेवटी शिवसेनेलाच घ्यायचा आहे, या शब्दात भाजपचे प्रदेशाध्यक्ष खासदार रावसाहेब दानवे यांनी युतीच्या संदर्भातील चर्चेचा चेंडू पुन्हा एकदा शिवसेनेच्या अंगणात टोलावला.
जालन्यातील प्रदेश कार्यकार्यकारणीच्या बैठकीच्या निमित्ताने झालेल्या पत्रकार परिषदेत सोमवारी ते बोलत होते. आम्ही शिवसेनेसोबत युती करू, अशी आमची अपेक्षा आहे. समविचारी पक्षांनी एकत्र यावे ही भाजपची स्पष्ट भूमिका आहे. मतविभाजन टाळावं. काँग्रेस आणि राष्ट्रवादीला फायदा होऊ नये म्हणून भाजपने यापूर्वीच जाहीर केलं आहे. एनडीएमधील सगळे घटकपक्ष मिळून ही निवडणूक लढावी हे भाजपचे मत आहे. मात्र निर्णय शेवटी शिवसेनेलाच घ्यायचा आहे, असं दानवे म्हणाले. जागावाटपाचा कोणताही प्रस्ताव आमच्या समोर आलेला नाही. बंद दाराआड काही चर्चा झाली नाही. लोकसभेच्या निम्म्या निम्या जागावाटून घ्यायच्या असा कोणताही प्रस्ताव आमच्यासमोर आलेला नाही. जेव्हा केव्हा चर्चेला बसू तेव्हा दोन्ही बाजूंनी प्रस्ताव येतील. ते आम्हाला त्यांचा प्रस्ताव देतील आम्ही आमचा प्रस्ताव त्यांना देऊ. मग त्यावर चर्चा होईल, या निर्णयाची डेडलाईन तर उमेदवारी अर्ज मागे घेण्याच्या वेळेपर्यंत चालेल, असं दानवे यांनी स्पष्ट केलं. कोणीतरी हात पुढे करेल आणि दुसरा त्याच्या हातात हात मिळवेल किंवा दोघे एकदम हात पुढे करतील, असं ते म्हणाले.
आम्ही शेवटपर्यंत युतीसाठी हात पुढे करणार. निर्णय शेवटी शिवसेनेलाच घ्यायचा आहे. आमच्या हातात हात द्यायचा की नाही हे त्यांनी ठरवायचं, असं दानवे यांनी सांगितलं. शिवसेनेकडून सातत्याने भाजपवर कठोर टीका होतेय. तरी आपण युतीसाठी चर्चा करणार का? असा प्रश्न दानवे यांना करण्यात आला होता. त्यावर उत्तर देत दानवे यांनी युतीच्या निर्णयाचा चेंडू शिवसेनेकडे टोलवला आहे. भाजपने घेतलेल्या या पत्रकार परिषदेला प्रवक्ते माधव भंडारी, केशव उपाध्ये आणि शिरीष बोराळकर उपस्थित होते.
मोबाइल अॅप डाउनलोड करा आणि राहा अपडेट
