म. टा. प्रतिनिधी, औरंगाबाद

देशी विदेशी पक्ष्यांचे हक्काचे घर असलेल्या जायकवाडी पक्षी अभयारण्याचा व्यवस्थापन आराखडा वन्यजीव विभागाने वरिष्ठ कार्यालयास मंगळवारी (२९ जानेवारी) सादर केला आहे. यात संरक्षण, गस्त वाढविण्यावर भर देणे, त्यासाठी स्पीड बोटचा वापर करणे, अशा सूचना केल्याची माहिती सूत्रांनी दिली.

औरंगाबाद तसेच अहमदनगर जिल्ह्यात सुमारे ३४ हजार १०५ हेक्टर क्षेत्रावर जायकवाडी पक्षी अभयारण्य विस्तारलेले आहे. जैवविविधतेने समृद्ध असलेल्या या अभयारण्यात देश, विदेशी असे विविध प्रजातीचे असंख्य पक्षी आढळतात. या परिसरात २१५ प्रकारच्या पाणवनस्पती असून, ६७ प्रकारचे मासे आढळतात. सूत्रांनी दिलेल्या माहितीनुसार वन्यजीव विभागाचे उप वनसंरक्षक आर. आर. काळे यांनी हा आराखडा नागपूर येथील प्रधान मुख्य वन संरक्षक (वन्यजीव) ए. के. मिश्रा यांना सादर केला आहे. समितीकडून आराखड्यास हिरवा कंदील प्राप्त होताच त्यानुसार पुढील कार्यवाही केली जाईल.

\Bआराखड्यात काय?

\Bपक्षी अभयारण्याचे संरक्षणाच्या दृष्टीने अत्याधुनिक साधनाचा वापर करणे, यात प्रामुख्याने कम्युनिकेशन यंत्रणा अधिक सक्षम करणे, परिसरात गस्त घालण्यासाठी स्पीड बोटचा वापरणे. सध्या एकच बोट उपलब्ध असून किमान दोन असाव्यात. वन रक्षकांना परिसरात गस्तीसाठी दुचाकी असावी. जायकवाडीसह अन्य ठिकाणी पक्षी अभयारण्याची माहिती देणारे केंद्र उभारणे. संवर्धनाच्या दृष्टीने पक्षी, पाणी यांचे नियमित निरीक्षण व संशोधनासाठी प्रयत्न व्हावे. त्यासाठी तज्ज्ञांची निवड करावी, अशा विविध उपाययोजना या आराखड्यात नमूद केल्या आहेत.

म. टा. प्रतिनिधी, औरंगाबाद

जंगल नाहीसे करून विकासाची कोणती संकल्पना राबवायची, असा प्रश्न करत विद्यार्थ्यांनी 'भारतीय' नाटिकेतून राष्ट्रीय एकात्मतेची हाक दिली. निमित्त होते छत्रपती कॉलेजच्या स्नेहसंमेलनाचे. गुरुवारपासून सुरू झालेल्या या संमेलनात पहिला दिवस गाजला तो विद्यार्थ्यांनी साकारलेल्या 'शिवचरित्र'ने.

कॉलेजच्या मैदानावर सुरू असलेल्या महोत्सवात तरुणाईचा उत्साह पहायला मिळाला. सुरुवातीला महोत्सवाचे उदघाटन पोलिस निरीक्षक एल. ए. शिनगारे यांच्या हस्ते झाले. त्यानंतर उभारण्यात आलेल्या 'आनंदनगरी'त विद्यार्थ्यांनी आनंद घेतला. 'शेलापागोटे'त आपल्या मित्रांना, शिक्षकांना खेचण्याची संधी तरुणाईने सोडली नाही. शिट्या अन् प्रत्येक शेलापागोटेवर टाळ्या देत विद्यार्थी प्रोत्साहन देत होते. त्यानंतर विद्यार्थ्यांनी एकांकिका सादर केल्या. छत्रपती शिवाजी महाराजांच्या जीवनातील विविध प्रसंग मांडणारा 'शिवचरित्र' उत्तम विद्यार्थ्यांनी सादर केला. यामध्ये 'सोन्याचा नांगर', ' कल्याणच्या सुभेदाराची सून' असे काही निवडक प्रसंग विद्यार्थ्यांनी सादर केले. उपस्थितांनी टाळ्यांच्या गजरात या सादरीकरणाचे स्वागत केले. नितीन पगारे याने दिग्दर्शन केले. यानेच शिवाजी महाराजांची भूमिकाही उत्तम केली. जिजामातेच्या भूमिकेत अश्विनी गाढवे, पंतच्या भूमिकेत सागर रावते तर इतर भूमिकांमध्ये अशोक चन्ने, सचिन भालेराव, विद्या मोरे यांनी अभिनय केला.

'एक दिन का ख्वाब'ने देशभरातील बेरोजगारी समस्या किती गंभीर बनते आहे हे मांडले. यामध्ये आदिनाथ कुबेर, कामिनी सपाटे, नितीन पगारे, विद्या मोरे, सचिन भालेराव, सागर रावते, युनूस लाखानी यांनी अभिनय केला. जंगलांचा होणारा ऱ्हास, आदिवासींचे आस्तित्व यावर आधारीत 'भारतीय' एकांकिकाही दाद मिळवून गेली. जंगलावर आमचा अधिकार आहे, त्याला नाहीसे करून विकास कसा, असा प्रश्न उपस्थित करणारे आदिवासी पात्र आपल्या कसदार अभियनातून विद्यार्थ्यांनी मांडले. यामध्ये सागर रावते, अशोक चन्ने, सचिन भालेराव, सारिका शिंदे, युनूस लाखानी, मंगेश इंगळे, विद्या मोरे यांनी अभिनय केला. त्यांना डॉ. जी. एन. वळेकर, प्रा. रमेश धोंडगे यांनी मार्गदर्शन केले. यासह विद्यार्थ्यांच्या नृत्याविष्काराने संमेलनातील उत्साह वाढविला. संमेलन यशस्वीतेसाठी पर्यवेक्षक आशिष वाघुंबरे, प्रा. राकेश खैरनार, डॉ. वैजनाथ कदम, डॉ. भारत सिरसाठ, डॉ. जी. एन. वडेकर आदी परिश्रम घेत आहेत.

\B'लोककला' आज

\Bस्नेहसंमेलनात लोककला शुक्रवारी रंगणार आहे. यामध्ये विविध कला प्रकारांचे सादरीकरण विद्यार्थी करणार आहेत. त्याची पूर्वतयारी विद्यार्थी करत होते. यासह एकांकिका, मुकअभिनय, विनोदी अभिनयासह संगीत शेलापागोटे होणार आहेत.

म. टा. प्रतिनिधी, औरंगाबाद

भावाशी संबंध असल्याचा आरोप करीत सर्वांसमोर अपमानित केल्यामुळे विवाहितेने गळफास घेऊन आत्महत्या केल्याच्या प्रकरणात आरोपी लक्ष्मीबाई सुरेश बिपटे हिचा अटकपूर्व जामीन अर्ज जिल्हा व सत्र न्यायाधीश एच. एस. महाजन यांनी फेटाळला.

या प्रकरणी मृत ज्योती प्रकाश वर्धे (४०) यांचे पती प्रकाश रंगनाथ वर्धे (४५, रा. बजाजनगर) यांनी फिर्याद दिली होती. फिर्यादीनुसार, २२ डिसेंबर २०१८ रोजी फिर्यादी कामावरुन घरी आल्यानंतर पत्नी ज्योती यांनी सांगितले की,'मला बऱ्याच दिवसांपासून शेजारी राहणारी आरोपी लक्ष्मीबाई सुरेश बिपटे (४२) ही त्रास देत आहे. आजही मी दुपारी घरासमोर उभी असताना लक्ष्मीबाईने 'तुझे तुझ्या भावासोबत संबंध होते व तू तुझ्या सगळ्या भावांना इथे जमा केले आहेस' असे सगळ्यांसमोर म्हणून मला अपमानित केले.' त्यावर फिर्यादीने ज्योती यांची समजूत काढली आणि लक्ष्मीबाईच्या बोलण्याकडे लक्ष देऊ नको, असे सांगितले. दुसऱ्या दिवशी फिर्यादीला सुटी असल्यामुळे तो पत्नी ज्योतीला बाहेर घेऊन गेला होता व तिथेही त्याने समजून सांगितले. मन शांत करण्यासाठी मुंबई हायवेवरील विपश्यना केंद्रातही फिर्यादीने पत्नीला नेले होते; परंतु ते केंद्र बंद होते. त्यानंतर सिडको गार्डनमध्ये नेऊन ज्योती यांचे मन वळवण्याचा प्रयत्न केला. दरम्यान, २४ डिसेंबर २०१८ रोजी ज्योती यांनी गळफास घेऊन आत्महत्या केल्याचे फिर्यादीच्या मुलाने फिर्यादीला फोनवरुन कळविले होते. प्रकरणात फिर्यादीच्या तक्रारीवरुन एमआयडीसी वाळूज पोलिस ठाण्यात गुन्हा दाखल करण्यात आला होता. दरम्यान, आरोपी लक्ष्मीबाई हिने कोर्टात अटकपूर्व जामीन अर्ज सादर केला असता, कोर्टाने तो फेटाळला. जिल्हा सरकारी वकील अविनाश देशपांडे यांनी काम पाहिले व त्यांना अॅड. सिद्धार्थ वाघ यांनी सहकार्य केले.

म. टा. प्रतिनिधी, औरंगाबाद

शारीरिक संबंधांसाठी विवाहितेच्या मुलांना जिवे मारण्याची धमकी देणारा आणि बंदुकीचा धाक दाखवून ३१ वर्षीय विवाहितेशी लगट करणारा माजी सैनिक व आरोपी गोविंद बसन्ना कांबळे याचा अटकपूर्व जामीन अर्ज जिल्हा व सत्र न्यायाधीश एच. एस. महाजन यांनी फेटाळला.

या प्रकरणी शहरातील ३१ वर्षीय विवाहितेने फिर्याद दिली होती. फिर्यादीनुसार, फिर्यादी ही शिवणकाम करते व आरोपी गोविंद बसन्ना कांबळे (४६, रा. कोळीवाडा, उमरगा, जि. उस्मानाबाद, ह. मु. औरंगाबाद) याच्या मुलीचे कपडे शिवण्याचे काम फिर्यादीकडे होते. त्यानिमित्ताने आरोपीने फिर्यादीचा फोन क्रमांक मिळवला आणि फिर्यादीशी जवळीक साधण्याचा प्रयत्न सुरू केला. त्यानंतर रस्त्यात गाठून 'तू मला आवडते' असे म्हणत शरीरसंबंधाची मागणी करू लागला. १७ जानेवारी २०१९ रोजी फिर्यादी मुलास शाळेतून घरी घेऊन येत असताना आरोपीने तिला गाठून शरीर संबंधाची मागणी केली. संबंध ठेवले नाहीतर मुलांना जिवे मारील, अशीही धमकी आरोपीने दिली होती. त्यापूर्वी २७ डिसेंबर २०१८ रोजी 'संबंध ठेव नाहीतर एखाद्या महिलेशी ओळख करुन दे' असे म्हणत आरोपी फिर्यादीला त्रास देत होता. 'मीच पोलिस, मला कोणीही पकडू शकत नाही' असे म्हणत बंदुकीचाही धाक दाखवत होता. या प्रकरणी फिर्यादीने तक्रार दिल्यावरून आरोपीविरुद्ध भादंवि ३५४, ३५४ (अ), ३५४ (ड), ३४१, ५०६ कलमान्वये मुकुंदवाडी पोलिस ठाण्यात गुन्हा दाखल करण्यात आला होता. प्रकरणात आरोपीने अटकपूर्व जामीन अर्ज सादर केला असता, कोर्टाने तो फेटाळला. जिल्हा सरकारी वकील अविनाश देशपांडे यांनी काम पाहिले व त्यांना अॅड. सिद्धार्थ वाघ यांनी सहकार्य केले.

म. टा. प्रतिनिधी, औरंगाबाद

'दहशतवाद कृतीत सहभागी होणे आणि सहभागी होण्याचा संशय असणे यात बरेच अंतर आहे. यामुळे औरंगाबाद येथून दहशतवादी कृत्यात अटक केलेल्या संशयितांवर युएपीए (दहशतवाद विरोधी कायदा) लागू होत नाही, असे निवेदन आम्ही एटीएस प्रमुख अतुलचंद्र कुलकर्णी यांना दिले आहे,' अशी माहिती गुरुवारी नुमाइंदा कौन्सिलतर्फे पत्रकार परिषदेत देण्यात आली.

पत्रकार परिषदेला औरंगाबादचे अध्यक्ष जियाउद्दीन सिद्दीकी, मौलाना अब्दुल कवी फलाही, कामरान अली खान, मेराज सिद्दीकी, माजी नगरसेवक जावेद कुरैशी, अब्दुल मोईद हश्र, अॅड. खिजर पटेल. अॅड. सलीम शेख, शारेख नक्षबंदी यांची उपस्थिती होती. एटीएस प्रमुखांना दिलेल्या निवेदनात म्हटले आहे की, औरंगाबादमध्ये पकडलेला मुशाहिद उल इस्लाम हा संगणकावर डिझाइनिंगचे काम करतो. त्याच्याकडून संगणक, हार्ट डिस्क, इतर वस्तू कायदेशीर होत्या. त्याचा कटाशी संबंध असणे शक्य नाही. संशयितांवर ऑगस्ट २०१८ पासून पाळत होती, तर वेळीच प्रतिबंधक कारवाई झाली असती. आजही देशाच्या सुरक्षिततेसाठी धोकादायक साइट सुरू आहेत. त्या एटीएसने ब्लॉक कराव्यात, अशी मागणी करण्यात आली आहे. यावर कुलकर्णी यांनी अशा साइट व व्हिडीओची संख्या पाचशेच्यावर असल्याचे सांगत याबाबत केंद्र स्तरावर कारवाई सुरू असल्याचे सांगितले. तसेच कौन्सिलच्या प्रतिनिधींना समाजात जनजागृती करण्याचे आवाहन केले. त्यानुसार काम सुरू केल्याची माहिती देण्यात आली.

\Bडोक्यावर बंदूक ठेवून

कोऱ्या कागदावर सह्या

\B'एटीएस पथकाने एका संशयित आरोपीच्या पत्नीच्या डोक्यावर बंदूक ठेवून कोऱ्या कागदावर सह्या करून घेतल्या,' असा आरोप पत्रकार परिषदेत करण्यात आला. तर एका संशयित आरोपीच्या नातेवाईकांनी एटीएसने घरातून जप्त केलेल्या साहित्यात औषधी जप्त केल्याचे सांगितले. हे औषध पाच वर्षांपूर्वीचे उंदीर मारण्याचे असल्याचे सांगितले.

म. टा. प्रतिनिधी, औरंगाबाद

अतिक्रमण करून भूखंड नावावर करून देण्यासाठी जिवे मारण्याची धमकी देणारी महिला आरोपी शरफुनिसाबेगम हकिमोद्दीन खान हिच्या पोलिस कोठडीत शनिवारपर्यंत (२ फेब्रुवारी) वाढ करण्याचे आदेश प्रथम वर्ग न्यायदंडाधिकारी के. के. कुरंदळे यांनी गुरवारी (३१ जानेवारी) दिले.

या प्रकरणी मिथुन सतीश व्यास (३६, रा. पानदरीबा, औरंगाबाद) यांनी फिर्याद दिली होती. फिर्यादीनुसार, २३ जानेवारी २०१९ रोजी फिर्यादीच्या गारखेडा परिसरातील भूखंडावर अतिक्रमण केल्याची माहिती फिर्यादीला मिळाली होती. त्यावरुन फिर्यादी हा भावासह भूखंडाच्या ठिकाणी पोहोचला. त्यांनी अतिक्रमणे काढण्याचा प्रयत्न केला असता, आरोपी राहुल चाबुकस्वार, वसीम खान हकिमोद्दीन खान, इम्रान खान, शरफुनिसाबेगम हकिमोद्दीन खान, मदस्सीखान हकिमोद्दीन खान, शेरू रहीम, शहेजादी शेख रहीम, समसुलखान, मकसुद मन्सुरखान, शेख सलीम शेख रहीम यांनी 'भूखंड आमच्या नावे करुन द्या अन्याथा जिवे मारू', अशी धमकी दिली. प्रकरणात फिर्यादीच्या तक्रारीवरुन जवाहरनगर पोलिस ठाण्यात गुन्हा दाखल होऊन आरोपी शरफुनिसाबेगम हकिमोद्दीन खान (६२, रा. विजयनगर, औरंगाबाद) हिला २५ जानेवारी रोजी अटक करण्यात आली होती. आरोपीला कोर्टात हजर केले असता, आरोपीला गुरुवारपर्यंत पोलिस कोठडी सुनावण्यात आली होती. कोठडीची मुदत संपल्यामुळे आरोपीला कोर्टात हजर केले असता, आरोपीच्या पोलिस कोठडीत शनिवारपर्यंत वाढ करण्याचे आदेश कोर्टाने दिले. सहाय्यक सरकारी वकील सुनील जोंधळे यांनी काम पाहिले.

म. टा. प्रतिनिधी, औरंगाबाद

लोकविकास बँकेचे संचालक जे. के. जाधव व त्यांचा मुलगा विक्रांत जाधव यांच्यावर नोकरीला लावण्याचे आमिष दाखवत फसवणूक केल्याप्रकरणी जिन्सी पोलिस ठाण्यात गुन्हा दाखल झाला आहे. या प्रकरणी योगेश लक्ष्मण कराळे (वय २९ रा. गोविंदनगर, रेल्वे स्टेशन रोड, मूळ रा. शिरेगाव गंगापूर) याने तक्रार दाखल केली आहे.

योगेश हा पदवीधर असून २०१४मध्ये नोकरीच्या शोधात असताना त्याची ओळख लोकविकास बँकेचे अध्यक्ष आणि उद्योग खात्यात अतिरिक्त संचालक म्हणून कार्यरत असलेल्या जग्गनाथ जाधव यांच्याशी झाली. योगेशने त्यांना नोकरीबाबत विचारणा केली असता जाधव यांनी नोकरी लावण्याचे आमिष दाखवत चार लाखांची मागणी केली. जून २०१६मध्ये योगेशने दोन लाख दिले. यावेळी जाधव यांनी बजाजनगर येथील हायटेक इन्स्टिट्यूट टेक्नोलॉजी कॉलेजमध्ये शिपाई पदावर नियुक्तीचे आश्वासन दिले. योगेशने महिन्याभरानंतर नियुक्तीपत्र मागितल्यानंतर जाधव आणि त्यांचा मुलगा विक्रांत यांनी आम्ही तुला नियुक्तीपत्र देणार नाही, तुला काय करायचे कर. आम्ही ठार मारू, अशी धमकी दिली. यानंतर योगेशने कॉलेजबाबत चौकशी केली असता, त्याला अधिकारी आणि कर्मचाऱ्यांनी शासकीय अनुदान येत नसल्याची माहिती दिली. फेब्रुवारी २०१७मध्ये योगेशने पुन्हा जाधव यांनी सेव्हन हिल्स कार्यालयात भेट घेतली. यावेळी त्याला अनुदानित संस्थेत काम करायचे असेल तर आणखी चार लाख रुपये द्यावे लागतील, असे सांगितले. योगेशने पैसे नसल्याचे सांगत पूर्वीचे चार लाख देण्याची मागणी केली. यावेळी ते पैसे बुडाल्याचे सांगितले. त्यामुळे योगेशच्या तक्रारीवरून जग्गनाथ जाधव आणि विक्रांत जाधव यांच्याविरुद्ध फसवणुकीचा गुन्हा दाखल करण्यात आला आहे.

\Bपंधरा दिवसात दुसरा गुन्हा

\Bजे. के. जाधव, विक्रांत जाधव यांच्यावर १७ जानेवारी रोजी देखील जिन्सी पोलिस ठाण्यात आत्महत्येस कारणीभूत केल्याप्रकरणी गुन्हा दाखल आहे. कृष्णा उर्फ किशोर रतनराव चिलघर (वय ३२ रा. संजयनगर) या तरुणाने गळफास घेऊन आत्महत्या केली होती. पाच लाख रुपये घेऊन नोकरीला लावण्याचे आमिष दाखवून फसवणूक केल्याचे तसेच बँकेतून घेतलेल्या कर्जासंदर्भात मानसिक त्रास दिल्याचे त्याने आत्महत्येपूर्वी लिहिलेल्या चिठ्ठीत नमूद केले होते.

म. टा. प्रतिनिधी, औरंगाबाद

समांतर जलवाहिनी प्रकरणी शुक्रवारी (एक फेब्रुवारी) सर्वोच्च न्यायालयात सुवानणी होणार आहे. सुनावणीच्या वेळी उपस्थित राहण्यासाठी महापालिकेचे आयुक्त डॉ. निपुण विनायक दिल्लीला रवाना झाले आहेत.

समांतर जलवाहिनीचे काम करण्यास सुभाष प्रोजेक्ट मार्केटिंग लिमिटेड (एसपीएमएल) या कंपनीने असमर्थता दर्शवली आहे. 'एसपीएमएल'ऐवजी एस्सेल ग्रुपला मुख्य भागीदार करा, अशी मागणी कंपनीकडून करण्यात आली होती. यासंदर्भात महापालिकेने सरकारी वकिलांचा अभिप्राय मागवला. एस्सेल ग्रुपला मुख्य भागीदार करता येणार नाही, असा स्पष्ट अभिप्राय सरकारी वकिलांनी नोंदवला. त्यानंतर कंपनीने समांतर जलवाहिनीच्या कामातून माघार घेण्याची तयारी दर्शवली आहे. महापालिकेने १३५ कोटी रुपये द्यावेत, आम्ही या कामातून माघार घेतो. लवादासमोरची आणि सर्वोच्च न्यायालयातील याचिका परत घेतो, असे पत्र कंपनीने आयुक्तांना दिले आहे.

शुक्रवारी होणाऱ्या सुनावणीच्या वेळी कंपनीचे हे पत्र आयुक्त सर्वोच्च न्यायालयात सादर करणार आहेत. कंपनी समांतर जलवाहिनीचे काम करण्यास तयार नसल्यामुळे जायकवाडी ते नक्षत्रवाडीपर्यंत मुख्य जलवाहिनी टाकण्याचे काम करण्यासाठी परवानगी द्यावी, अशी विनंती देखील आयुक्त महापालिकेतर्फे सर्वोच्च न्यायालयाला करणार आहेत. पाणीपुरवठ्याबद्दलची सध्याची स्थिती देखील सुनावणीच्या वेळी सर्वोच्च न्यायालयाच्या निदर्शनास आणून दिली जाणार आहे. आयुक्तांबरोबर पाणीपुरवठा व विधी या विभागांचे अधिकारी देखील दिल्लीला रवाना झाले आहेत.

म. टा. विशेष प्रतिनिधी, औरंगाबाद

हर्सूल भागातील विहिरीच्या परिसरात कचरा टाकल्यामुळे तेथील पाणी दूषित झाल्याचा मुद्दा गुरुवारी खंडपीठासमोर मांडण्यात आला. त्यावर पाण्याचे नमुने घेऊन अहवाल सादर करावा, असे आदेश मुंबई उच्च न्यायालयाच्या औरंगाबाद खंडपीठाने प्रदूषण मंडळाला दिले आहेत.

घनकचरा व्यवस्थापनावर राहुल कुलकर्णी यांची मूळ याचिका असून इतरांच्याही याचिकांवर सुनावणी झाली. घनकचरा व्यवस्थापन करावे, असे आदेश देऊन एक वर्षे होत आलेले असतानाही त्यावर काहीच उपायोजना होत नसल्याकडेही खंडपीठाचे लक्ष वेधण्यात आले. कचरा व्यवस्थापनाचे कंत्राट पी. गोपीनाथ रेड्डी कंपनीला देण्यात आले आहे. त्यासाठीची २२९ वाहनेही शहरात दाखल झाली आहेत, अशी माहिती पालिकेचे वकील राजेंद्र देशमुख यांनी खंडपीठाला दिली. खंडपीठाने अजूनही कचऱ्याचे संकलन का केले जात नाही, अशी विचाराणा केली. त्यावर वाहनांचा परवाना प्रादेशिक परिवहन विभागाकडून मिळालेला नाही, असे सांगण्यात आले. वाहनांच्या परवान्याबाबतची माहिती सादर करण्याचे निर्देश खंडपीठाने सरकारची बाजू मांडणारे सिद्धार्थ यावलकर यांना दिले. यावलकर यांनी तत्काळ माहिती घेतली असता ५० टक्के वाहनांचे परवाना मिळालेले आहेत. उर्वरित वाहनांच्या परवान्यासाठी आठवडाभराचा वेळ लागेल, असे सांगितले . शुक्रवारी दुपारी प्रादेशिक परिवहन कार्यालयाने व कचरा संकलनाबाबत पालिकेने शपथपत्र सादर करावे, असे आदेश खंडपीठाने दिले. यावेळी प्रज्ञा तळेकर, देवदत्त पालोदकर आदींनी याचिकाकर्त्यांची बाजू मांडली. प्रदूषण मंडळातर्फे उत्तम बोंदर यांनी काम पाहिले.

\Bसंवेदनशील मुद्दा; पावले उचला

\Bघनकचरा व्यवस्थापन होत नसल्याबद्दल खंडपीठाने नाराजी व्यक्त केली. शहरातील १५ लाख नागरिकांच्या व लहान मुलांच्या आरोग्याशी संबंधित या अत्यंत संवेदनशील मुद्यावर त्वरित पावले उचलणे आवश्यक आहे, असे मतही खंडपीठाने व्यक्त केले. दरम्यान, रेड्डी कंपनीला कचरा संकलन व वाहतुकीचे कंत्राट दिले. त्यावरचा करही नागरिकांच्या माथी मारला. मात्र, अजूनही शहरात कचरा उचलण्याचे काम पूर्ण क्षमतेने सुरू झालेले नाही. त्यामुळे महापालिका प्रशासनाकडून नागरिकांच्या जीवाशी खेळ सुरू असल्याची संतपाची भावना जनतेत आहे. हीच भावना कोर्टाने वेगळ्या शब्दातून व्यक्त करून संबंधितांचे कान टोचले.

\Bकोर्टाने कान टोचले

- \Bघनकचरा व्यवस्थापन आदेश

- एक वर्षापूर्वी देऊनही काम नाही\B

- \Bकचरा संकलन का होत नाही

- नागरिक, मुलांच्या आरोग्याशी खेळ

- संवेदनशील मुद्यावर त्वरित पावले उचला

- खंडपीठाने प्रशासनाचे टोचले कान \B

\B

म. टा. प्रतिनिधी, औरंगाबाद

नायब तहसीलदाराला ब्लॅकमेल करीत ५० हजाराची खंडणी उकळणाऱ्या दोघांना गुरुवारी हर्सूल परिसरात गुन्हे शाखेच्या पथकाने अटक केली. आरोपीमध्ये ऑल इंडिया बंजारा टायगर्सच्या संस्थापक अध्यक्ष आणि जिल्हाध्यक्षाचा समावेश आहे.

हरीशचंद्र रंगनाथ सोनवणे (वय ५४, रा. शिवेश्वर कॉलनी, हर्सूल) यांनी याप्रकरणी तक्रार दाखल केली आहे. सोनवणे हे जिंतूर येथे नायब तहसीलदार म्हणून कार्यरत आहेत. यापूर्वी ते जटवाडा येथे तलाठी म्हणून कार्यरत होते. त्यांच्या कामात उणिवा असल्याचे खोटे अर्ज वरिष्ठाकडे करीत त्यांच्याकडून ऑल इंडिया बंजारा टायगर्सच्या संस्थापक अध्यक्ष अशोक आर. राठोड, जिल्हाध्यक्ष प्रेमदास तुकाराम चव्हाण आणि नंदू बाळा चव्हाण यांनी खंडणी मागणे सुरू केले होते. सोनवणे यांनी या संदर्भात गुन्हे शाखेकडे तक्रार केली होती. गुरुवारी सायंकाळी आरोपी प्रेमदास चव्हाण आणि नंदू चव्हाणला पन्नास हजारांची खंडणी घेताना गुन्हेशाखेच्या पथकने सापळा रचून अटक केली. ही पीएसआय अमोल देशमुख, नंदकुमार भंडारे, विकास माताडे, नवाब शेख, विलास वाघ, विरेश बने, संजयसिंह राजपूत यांनी केली.

म. टा.विशेष प्रतिनिधी ,औरंगाबाद

हुंड्याच्या उर्वरित पैशांसाठी पत्नी मुक्ता काकडे हिचा खून केल्याच्या आरोपाखाली औरंगाबादच्या सत्र न्यायालयाने मुक्ताचा पती ज्ञानेश्वर तुळशीराम काकडे याला ठोठावलेली जन्मठेपेच्या शिक्षेसह इतर कलमांखालील शिक्षा मुंबई उच्च न्यायालयाच्या औरंगाबाद खंडपीठाचे न्या. संभाजी शिंदे आणि न्या. आर.जी. अवचट यांनी अपीलात कायम केली.

ज्ञानेश्वरचे लग्न आवडेउंचेगाव येथील रमेश लांडे यांची मुलगी मुक्तासोबत १३ डिसेंबर २००९ रोजी पैठण येथील काकडे महाराज आश्रमात झाले. लग्नात पाच लाख रुपये हुंडा देण्याचे ठरले. त्यापैकी दोन लाख लग्नावेळी दिले. नंतर उसाचे पैसे आल्यावर पुन्हा दोन लाख दिले. उर्वरित एक लाखासाठी पतीसह सासरचे लोक मुक्ताचा शारीरिक व मानसिक छळ करीत होते, असे फिर्यादीचे म्हणणे होते. २७ एप्रिल २०१० रोजी मुक्ताचे सासरे तुळशीराम यांचा अपघात झाल्याचा निरोप तिच्या वडिलांना मिळाला. ते पैठणला गेले असता त्यांची मुलगी मुक्ता स्वयंपाक घरात पडली होती. तांदळाचा डबा काढताना खुर्चीवरुन पडून ती मरण पावल्याचे मुक्ताच्या सासरच्या लोकांनी सांगितले. मात्र, मुक्ताच्या गळ्यावर काळे वळ असल्यामुळे तिच्या वडिलांना संशय आला. शिवाय 'गळा दाबल्याने आणि डोक्याला मार लागल्यामुळे मुक्ताचा मृत्यू झाल्याचे' शवविच्छेदन अहवालात म्हटले होते. म्हणून रमेश लांडे यांच्या तक्रारीवरुन जावई ज्ञानेश्वर, त्याचे वडील तुळशीराम, आई आशाबाई, भाऊ शेष नारायण आणि दत्तात्रय तसेच भावजय वंदना शेषनारायण यांच्याविरुद्ध भादंवि कलम ३०२, ३०४ (ब), ४९८ (अ) तसेच हुंडा प्रतिबंधक कायद्याचे कलम ३ आणि ४ नुसार गुहा दाखल करण्यात आला.

\Bसासरे, सासू निर्दोष

\Bखटल्याच्या सुनावणीअंती येथील सत्र न्यायालयाने खुनाच्या आरोपाखाली ज्ञानेश्वर, तुळशीराम आणि आशाबाईला जन्मठेप व हुंडाबळी व शारीरिक व मानसिक छळाच्या आरोपाखाली शिक्षा ठोठावली. मात्र, सबळ पुराव्या अभावी मुक्ताचे सासरे तुळशीराम लक्ष्मण काकडे आणि सासू आशाबाई तुळशीराम काकडे या दोघांची निर्दोष मुक्तता केली. या शिक्षेला तिघांनी खंडपीठात अपीलाद्वारे आव्हान दिले होते. सदर दुर्दैंवी घटना मुक्ताच्या लग्नाच्या सहा महिन्याच्या आतच घडली. म्हणून ज्ञानेश्वरला खंडपीठाने दोषी ठरविले. अर्जदाराची बाजू विजयकुमार सपकाळ यांनी मांडली. त्यांना व्ही.आर. औताडे व आदिनाथ जगताप यांनी सहकार्य केले.

म. टा. प्रतिनिधी, औरंगाबाद

शहरातील सात वर्षीय मुलीशी अश्लील चाळे करणारा आरोपी करण टिल्लू घोडके याने दाखल केलेला नियमित जामीन अर्ज मागे घेतला. प्रकरणावर जिल्हा व सत्र न्यायाधीश ए. एस. खडसे यांच्यासमोर सुनावणी सुरू होती.

११ डिसेंबर २०१८ रोजी सायंकाळी साडेसहाला आरोपी करण टिल्लू घोडके (२०, रा. औरंगाबाद) याने पीडित मुलीला आपल्या घरी बोलावून घेतले आणि तिच्याशी लैंगिक चाळे केलेले. या प्रकरणात जवाहरनगर पोलिस ठाण्यात गुन्हा दाखल होऊन आरोपीला अटक केल्यानंतर त्याची रवानगी आधी पोलिस कोठडीत व नंतर न्यायालयीन कोठडीत करण्यात आली होती. दरम्यान, आरोपीने नियमित जामिनासाठी अर्ज दाखल केला होता. सुनावणीवेळी जिल्हा सरकारी वकील अविनाश देशपांडे यांनी आरोपीच्या जामीन अर्जाला विरोध केला. त्यानंतर आरोपीने जामीन अर्ज मागे घेतला. प्रकरणात अ‍ॅड. देशपांडे यांना अ‍ॅड. सिद्धार्थ वाघ यांनी सहाय्य केले.

औरंगाबाद : ट्रायच्या आदेशानंतर पे चॅनल्स निवडण्याचा अधिकार देण्यात आला आहे. याबाबत कोलकोत्ता हायकोर्टाने आठ फेब्रुवारीपर्यंत केबल ऑपरेटर आणि मुख्य कंट्रोल रूमच्या सेवा पुरवठादारांच्या सेवा शर्तींबाबत करार करण्यासाठी वेळ दिला आहे. या निर्णयाचा आधार घेत औरंगाबाद शहरात फ्री टू एअर चॅनल्स केबल नेटवर्कच्या ग्राहकांना एक फेब्रुवारीपासून दिसणार आहेत. ब्रॉडकास्टर्सचे पैसे यात वाढविण्यात आलेले आहेत. यामुळे केबल ऑपरेटरचे नुकसान होत आहे. यासंदर्भातील निर्णय होईपर्यंत केबलद्वारे फ्री टू एअर चॅनल दिसणार असल्याची माहिती औरंगाबाद जिल्हा केबल ऑपरेटर्स असोसिएशनचे अध्यक्ष निशिकांत देशमुख यांनी दिली आहे.

म. टा. प्रतिनिधी, औरंगाबाद

वैजापूरच्या व्यापाऱ्याला मारहाण करून चिवड्याच्या बॉक्ससह रोख रक्कम आणि मोबाइल असा वीस हजारांचा लंपास केल्याची घटना पडेगावमध्ये घडली असून, याप्रकरणी नरेंद्र रामैय्या (रा. भाटिया गल्ली, वैजापूर) यांच्या तक्रारीवरून चौघांवर जबरी चोरीचा गुन्हा दाखल करण्यात आला आहे.

रामैय्या हे मंगळवारी रात्री शहरातून हळदीराम चिवड्याचे बॉक्स घेऊन नगरनाक्यावरून वैजापूरला जाण्यासाठी निघाले होते. यावेळी एका स्कॉर्पिओ जीपला हात दाखवून त्यांनी थांबवले. चिवड्याचे बॉक्स ठेवल्यानंतर ते जीपमध्ये बसले. यावेळी आत चार अनोळखी प्रवासी होते. चालकाने जीप पडेगाव रोडने पालिकेच्या जुन्या नाक्याजवळ परत वळवली. या ठिकाणी या आरोपींनी रामैय्या यांचे तोंड दाबत हात रुमालाने बांधले. त्यानंतर त्यांच्या तोंडात तंबाखू कोंबून त्यांना मारहाण केली. मारहाणीनंतर त्यांच्याकडील चिवड्याचे तीन बॉक्स व रोख सतरा हजार रुपये आणि मोबाइल असा ऐवज लुबाडत पसार झाले. या प्रकरणी रामैय्या यांच्या तक्रारीवरून पोलिस ठाण्यात जबरी चोरीचा गुन्हा दाखल करण्यात आला असून, पीएसआय पुरी तपास करीत आहेत.

म.टा. प्रतिनिधी, औरंगाबाद

स्मार्ट सिटी मिशनच्या सिटी बससेवेला शहरात चांगला प्रतिसाद मिळत आहे. सध्या २३ बस १४ मार्गांवरून चालवल्या जात आहेत. त्यात आणखी २० बसची भर पडणार आहे. टाटा कंपनीकडून २० बस प्राप्त झाल्या असून त्या एसटी महामंडळाकडे हस्तांतरित करण्यात आल्या आहेत. या बसचे आरटीओ पासिंग झाल्यावर १५ फेब्रुवारीपासून या बस देखील नागरिकांच्या सेवेत रुजू होतील. त्यामुळे १५ फेब्रुवारीपासून ४३ बस शहरातून धाऊ लागतील. मार्च अखेरपर्यंत सर्वच्या सर्व शंभर सिटी बस शहरात धाऊ लागतील.

म. टा. प्रतिनिधी, औरंगाबाद

'आंतरराष्ट्रीय पातळीवरील दर्जेदार नियतकालिकात लेख प्रकाशित करणे संशोधकासाठी आव्हानात्मक असते. लेखनशैली आणि संदर्भशैली जाणून घेतल्यास दर्जेदार लेख लिहिणे शक्य आहे. या पातळीवर संशोधकाने सर्व पैलू लक्षात घेतले पाहिजे,' असे प्रतिपादन विषयतज्ज्ञ डॉ. संगीता मेहता यांनी केले. त्या कार्यशाळेत बोलत होत्या.

डॉ. बाबासाहेब आंबेडकर मराठवाडा विद्यापीठातील ज्ञानस्रोत केंद्र आणि एल्सवेअर प्रकाशन यांच्यातर्फे 'शोधनिबंध लेखन' विषयावर बुधवारी कार्यशाळा घेण्यात आली. या उपक्रमाला व्यवस्थापन परिषद सदस्य डॉ. राजेश करपे, डॉ. नरेंद्र काळे, डॉ. राहुल म्हस्के, डॉ. शंकर अंभोरे, प्रमुख मार्गदर्शक डॉ. संगीता मेहता आणि ज्ञानस्रोत केंद्राचे संचालक डॉ. धर्मराज वीर यांची प्रमुख उपस्थिती होती. शोधनिबंध लेखनात त्रुटी असल्यामुळे संशोधकांना जागतिक दर्जाच्या नियतकालिकात संधी मिळत नाही. याबाबत जागरुकता वाढवण्यासाठी मेहता यांनी मार्गदर्शन केले.

'आंतरराष्ट्रीय दर्जाच्या जर्नल्समध्ये शोधनिबंध लिहिताना त्याची शैली आत्मसात करावी. कारण संबंधित संपादकीय मंडळ तडजोड करणारे नसते. अनेक दिग्गज संशोधकांचे लेखसुद्धा दुरुस्तीसाठी परत पाठवले जातात. त्यामुळे लेखनशैली आणि संदर्भशैली आवश्यक असते. गुणवत्तेचे मापदंड लावून शोधनिबंध स्वीकारले जातात. संशोधकाने शोधनिबंध देण्यापूर्वी ओपन सोर्स किंवा कमर्शियल यापैकी एक पर्याय निवडावा. या लेखाचा प्रभाव किती आहे याची अनुरूप टक्केवारीसुद्धा कळते,' असे मेहता म्हणाल्या.

संदर्भ लेखनाच्या पद्धतीवर त्यांनी सविस्तर माहिती दिली. डॉ. नरेंद्र काळे यांनी संशोधन पद्धतीच्या बदलत्या स्वरुपावर विचार मांडले. डॉ. धर्मराज वीर यांनी प्रास्ताविक केले. चक्रधर कोठी यांनी सूत्रसंचालन केले आणि डॉ. बापू शिंगटे यांनी आभार मानले. यावेळी प्राध्यापक, विद्यार्थी आणि संशोधक या तीन गटातील १९२ शिबिरार्थी उपस्थित होते.

\Bवाड्मयचौर्य रोखणे शक्य\B

'सध्या शोधनिबंधातील वाड्मयचौर्य शोधणे सहजसोपे झाले आहे. हा प्रकार टाळून दर्जेदार निबंध स्वत:च्या शब्दात लिहिण्याचा प्रयत्न करा. तसेच वाड्मयचौर्य आज्ञावलीचा वापर करून शोधनिबंध तपासा. यानंतरच तो सादर करावा,' असे आवाहन मेहता यांनी केले.

म. टा. प्रतिनिधी, औरंगाबाद

देशभरातील विद्यापीठाच्या भरतीत अनुसूचित जाती-जमाती आणि इतर मागास प्रवर्गावर अन्याय करण्यात येत आहे. '१३ रोस्टर' प्रणाली स्वीकारल्यामुळे घटनात्मक आरक्षण संपुष्टात आणले जात असल्याचा आरोप करीत 'बाप्सा' संघटनेने विद्यापीठात निदर्शने केली. याबाबत कुलगुरूंना निवेदन देण्यात आले.

अलाहाबाद उच्च न्यायालयाच्या आदेशानुसार विद्यापीठाच्या भरतीत '१३ रोस्टर' (बिंदूनामावली) प्रणाली स्वीकारण्यात आली आहे. ही प्रणाली मागास प्रवर्गाच्या विरोधात असल्याचा आरोप बिरसा-आंबेडकर-फुले स्टुडंटस असोसिएशनने (बाप्सा) केला आहे. विद्यापीठात ४९.५ टक्के आरक्षण होते. '१३ रोस्टर'नुसार ते संपुष्टात येणार आहे. त्यामुळे पूर्वीची २०० रोस्टर प्रणाली लागू करावी, अशी मागणी संघटनेने केली. या मागणीसाठी डॉ. बाबासाहेब आंबेडकर मराठवाडा विद्यापीठात गुरुवारी दुपारी निदर्शने करण्यात आली. लोकशाहीची पायमल्ली करणारा निर्णय तात्काळ मागे घेण्याचे निवेदन कुलगुरुंना देण्यात आले. या आंदोलनात प्र. न. कांबळे, तुळशीराम खोटरे, कोंडबा हटकर, पल्लवी खंडेराव, लहू खंडाळे, व्ही. आर. वाघमारे, जगन वळवी, यशवंत राठोड, रवींद्र बागूल यांच्यासह अनेक विद्यार्थी उपस्थित होते.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या अभ्यासिकेत उपद्रवी कार्यकर्त्यांना अटकाव घालण्यात येणार आहे. अभ्यासिकेत विद्यार्थ्यांच्या सुविधांसाठी आवश्यक असलेल्या उपाययोजनांचा प्रस्ताव ज्ञानस्रोत केंद्राने कुलगुरूंना दिला आहे. सुरक्षारक्षकांची संख्या वाढवणे गरजेचे असल्याचे प्रस्तावात म्हटले आहे. सध्या शेकडो विद्यार्थी प्रशासनाच्या निर्णयाच्या प्रतीक्षेत आहेत.

विद्यापीठाच्या अभ्यासिकेत किमान एक हजारापेक्षा जास्त विद्यार्थी नियमित अभ्यास करतात. वसतिगृहात पुरेशी जागा नसल्यामुळे अभ्यासिकेची सुविधा विद्यार्थ्यांसाठी सुसह्य ठरली आहे. स्पर्धा परीक्षा आणि नेट-सेटची तयारी करणाऱ्या विद्यार्थ्यांची अधिक संख्या आहे. सकाळी सात ते रात्री ११ या वेळेत अभ्यासिका सुरू असते. ग्रामीण भागातील सर्वाधिक विद्यार्थी असून काही विद्यार्थी संघटना व युवा नेते विद्यार्थ्यांना वेठीस धरीत असल्याचे प्रकार घडत आहेत. याबाबत 'महाराष्ट्र टाइम्स'ने 'अभ्यासिकेतील विद्यार्थी वेठीस' (सात जानेवारी) हे वृत्त प्रसिद्ध केले होते. या वृत्ताची तातडीने दखल घेत ज्ञानस्त्रोत केंद्राने (मध्यवर्ती ग्रंथालय) विद्यापीठ प्रशासनाला प्रस्ताव सादर केला आहे. उपद्रवी लोकांचा अभ्यासिकेतील हस्तक्षेप रोखण्यासाठी उपाययोजना सूचवल्या आहेत. प्रशासनाने मागील काही दिवसात ५० सुरक्षारक्षक कमी केले आहेत. त्याचा फटका अभ्यासिकेच्या सुरक्षेला बसला आहे. प्रशासनाने ठोस भूमिका घेऊन नियमावलीच्या अंमलबजावणीवर निर्णय घेणार आहे. कुलगुरू डॉ. बी. ए. चोपडे यांना प्रस्ताव सादर करण्यात आला आहे.

विद्यार्थी नेते आणि राजकीय युवा नेत्यांनी अभ्यासिकेचे विद्यार्थी वेठीस धरले आहेत. विद्यार्थी संघटनांचे पदाधिकारी अभ्यासिकेतील विद्यार्थ्यांना बाहेर बोलावतात. महापुरुषांची जयंती आणि पुण्यतिथीच्या कार्यक्रमाला गर्दी आवश्यक असल्यामुळे विद्यार्थ्यांची उपस्थिती सक्तीची केली आहे. विशेष म्हणजे विद्यापीठ प्रशासन महापुरुषांची जयंती साजरी करीत असतानाही संघटना स्वतंत्र कार्यक्रम घेतात. आंदोलनासाठीही विद्यार्थ्यांची गर्दी अभ्यासिकेतून जमवण्यात येत आहे.

\Bविद्यार्थीकेंद्रित सुविधा द्या\B

शेकडो विद्यार्थी मध्यवर्ती ग्रंथालय आणि अभ्यासिकेशी जोडले गेले आहेत. सर्वाधिक विद्यार्थी या परिसरात असतात. तरीसुद्धा पाणी टंचाई, पुरेसे दिवे, पंखे यांची वानवा आहे. अनेकदा मागणी करूनही प्रशासनाने सुविधा पुरविल्या नाहीत. विद्यापीठ विद्यार्थीकेंद्रित ठेवण्याचा मुद्दा फक्त भाषणापुरता मर्यादित राहिल्याची टीका विद्यार्थ्यांनी केली आहे.

अभ्यासिकेत विद्यार्थ्यांच्या अभ्यासात व्यत्यय येणार नाही याची दक्षता घेतली आहे. परिसरात अधिक सुरक्षारक्षक नेमणे अपेक्षित आहे. याबाबत प्रशासनाला प्रस्ताव सादर केला आहे.

- डॉ. धर्मराज वीर, संचालक, ज्ञानस्रोत केंद्र

म. टा. प्रतिनिधी, औरंगाबाद

शालेय, महाविद्यालयीन विद्यार्थ्यांना 'पबजी'ने लावलेले वेड. त्याचे दुष्परीणाम मांडत, तरुणाईने कसे दूर रहायला हवे, असा संदेश देणारा 'जय पबजी' नाटिका वसंतराव नाईक कॉलेजच्या रंगमंचावर अवतरली. यासह 'माझ्या गावची शाळा साहेब बंद नका ना करू' असे सांगणारा वासुदेव अन् 'लावणी'चा ठेका अशा जल्लोषात स्नेहसंमेलनाचा पहिला दिवस ठरला.

वसंतराव नाईक महाविद्यालयाचे वार्षिक स्नेहसंमेलन गुरुवारपासून सुरू झाले. कॉलेजच्या मैदानावर दोन दिवस चालणाऱ्या संमेलनाचा पहिला दिवस गाजला तो 'जय पबजी'सारख्या संवेदनशील नाटिकेने. स्नेहसंमेनातही अशा प्रकारची पहिल्यांदा नाटिका सादर करण्यात आली. अभ्यास, वाचनाकडे लक्ष न देता विद्यार्थी कसे त्याकडे आकर्षित झाले अन् हिंसक बनत आहेत, हे विद्यार्थ्यांनी मांडले. गावात वीज जाते अन् तरुणाई कशा प्रकारे खरी 'पबजी' खेळत कसा धांगडधिंगा करतात हे मांडत त्यातून ते वाचनाकडे कसे वळतात, हे दाखविले आहे. प्रा. वसंत हारकळ यांनी तयार केलेल्या नाटिकेत. पल्लवी पवार, विष्णू डोईफोडे, शुभम साळवे, राहूल धारवीणकर, शितल इंगळे, हेमलता धामुणे यांनी अभिनय केला.

सर्वसामान्य कुटुंबातील चित्र, शालेय, महाविद्यालयीन विद्यार्थ्यांचे अशा 'मोबाइल गेम' घरातील हरवलेला संवाद यातून दाखविण्यात आला. प्रारंभी मुंबई विद्यापीठ लोककला विभागाचे प्रमुख डॉ. गणेश चंदनशिवे यांच्या उपस्थितीत स्नेहसंमेलनाचे उद्घाटन करण्यात आले. यावेळी संस्थेचे अध्यक्ष प्राचार्य राजाराम राठोड, प्राचार्य डॉ. मिलिंद उबाळे, विद्यार्थी संसद सचिव गजानन जाधव यांची उपस्थिती होती. कार्यक्रम यशस्वीतेसाठी समिती प्रमुख डॉ. देवराज दराडे, प्रा. प्रविण बोबडे, डॉ. गजानन हनवते, डॉ. सविता लोथे, प्रा. शिवचरण गिरी, प्रा. सुवर्णा दंडे, शिवाजी राठोड, सतीश पवार, वर्षा देवळ यांनी परिश्रम घेतले.

\B'शाळा बंद'बाबतही लक्ष वेधले\B

महाराष्ट्राची लोकधारा अंतर्गत विविध कलाप्रकार सादर करत विद्यार्थ्यांनी आपल्या कलेचे दर्शन घडविले. यामध्ये बहिणाबाई चौधरी यांची 'अरे संसार संसार जसा चुल्यावर' ही ओवी, शाळा बंद करण्याऱ्या सरकारी धोरणावर 'वासुदेव' प्रकारातून 'माझ्या गावची शाळा साहेब बंद नका ना करू,' असा संदेश दिला. यासह भजन कला प्रकारात 'धरली पंढरीचा चोर', भारूडमध्ये 'विंचू मला चावला' तर 'उड जायगा एक दिन पंछी' या 'कव्वाली'ला उभे राहत प्रोत्साहन दिले. 'जलसा'मध्ये 'भीम जलसा' सादर केला यानंतर आला लावणी कलाप्रकार. विद्यार्थी कलाकाराला शिट्या, टाळ्या अन् नाचणारी तरुणाई असा उत्साह कलाप्रकारात महोत्साव रंगून गेला.