म. टा. प्रतिनिधी, पैठण

मागणी केली नसतानाही मोदी सरकारने अर्थसंकल्पात शेतकऱ्यांना वार्षिक सहा हजारांची मदत जाहीर केली आहे. शासनाचे हे धोरण शेतकऱ्यांची थट्टा करणारे असून त्यांच्यात गुलामगिरीची भावना निर्माण करणारे आहे. यामुळे शासनाच्या या घोषणेचा निषेध करण्याचा ठराव पाचव्या अखिल भारतीय शेतकरी साहित्य संमेलनात मंजूर करण्यात आला.

शहरातील माहेश्वरी भक्त निवास येथे दोन दिवसांचे पाचवे अखिल भारतीय शेतकरी साहित्य संमेलन सुरू आहे. या साहित्य संमेलनात रविवारी 'कर्जमुक्ती शेतीची की शेतकऱ्यांची', 'शेतीप्रधान साहित्य आणि साहित्यिक', आदी विषयांवर परिसंवाद घेण्यात आले. तसेच शेतकरी गझल मुशायरा व कवी संमेलनाचे आयोजन करण्यात आले. संध्याकाळी पुरस्कार वितरण करून व पाच ठराव मंजूर करत संमेलनाची सांगता करण्यात आली.

समारोपाच्या सत्रात शेतकरी संघटनेचे ज्येष्ठ नेते वामनराव चटप, संजय पानसे, कडुअप्पा पाटील, दिलीप भोयर, नीलकंठ घवघवे, संमेलनाध्यक्ष इंद्रजित भालेराव, कार्याध्यक्ष गंगाधर मुटे, स्वागताध्यक्ष सतीश बोरूळकर, कैलास तवार यांच्यासह मोठ्या संख्येने नागरिक व शेतकरी उपस्थित होते.

\Bसंमेलनातील ठराव\B

-शेतीकडे शासनाचे दुर्लक्ष होत असल्याने शेतकरी देशोधडीला लागले आहेत. यामुळे शासनाने शेतीला संजीवनी मिळवून देण्यासाठी निर्णायक पावले उचलावीत.

-प्राथमिक, माध्यमिक व उच्च शिक्षणात शेतीसाहित्याला प्राधान्य द्यावे.

-शेतकरी आत्महत्येने विक्राळ रूप धारण केले आहे. त्या रोखण्यासाठी केलेल्या उपाययोजना कुचकामी ठरल्या आहेत. त्यामुळे शासनाने पत्रकार व शेतीसाहित्यिकांचा समावेश असलेली समिती स्थापन करावी.

- शेती व शेतकरी विषयाला प्राधान्यक्रम देण्यात येत असल्याने अखिल भारतीय मराठी साहित्य संमेलनाचे अभिनंदन.

- वार्षिक सहा हजार रुपयांची मदत ही शेतकऱ्यांची थट्टा असून या घोषणेमुळे शेतकऱ्यांत गुलामीची भावना निर्माण होणार आहे. यामुळे शासनाचा निषेध.

म. टा. प्रतिनिधी, औरंगाबाद

लोकसभा निवडणुकीपूर्वी औरंगाबाद विभागातील महसूल अधिकाऱ्यांच्या बदल्या होणार असल्याचा आदेश असला तरी अद्याप त्याबद्दल अनेक अधिकाऱ्यांमध्ये संभ्रम आहे. काही अधिकाऱ्यांनी औरंगाबादमध्येच कसे राहता येईल याकरिता रिक्तपदांवर नजर ठेऊन आहेत.

येत्या काही दिवसांत लोकसभेच्या निवडणुका होऊ घातल्या असून, यापूर्वीच औरंगाबाद विभागातील अनेक महसूल अधिकाऱ्यांच्या बदल्या करण्यात येणार आहेत. निवडणूक आयोगाने बदलीसाठी घालून दिलेल्या अटीनुसार गेल्या चार वर्षापैकी तीन वर्षे एकाच पदावर असलेले तसेच या कालावधीत निवडणुकीत प्रशासकीय पातळीवर थेट जबाबदारी सांभाळलेल्या अधिकाऱ्यांबाबतची माहिती विभागीय आयुक्त कार्यालयाने शासनाला पाठवली आहे. यामुळे आता कोणत्याही क्षणी बदल्यांचे आदेश निघण्याची शक्यता आहे. बदल्या करण्यात येताना शासनाला या अधिकाऱ्यांची बदली 'होम डिस्ट्रिक'लाही करता येणार नाही. या नियमामुळे आता बदल्यांपासून बचाव करत औरंगाबाद शहरातच गेल्या अनेक वर्षांपासून राहिलेल्या अधिकाऱ्यांना शहराबाहेर जावे लागण्याची शक्यता आहे.

म. टा. प्रतिनिधी, औरंगाबाद

कर्करोगाबाबत जनजागृती करण्यासाठी नगरहून निघालेली युवकांची कार रॅली, डॉ. संकपाळ यांचे आरोग्य कीर्तन, तर कर्करुग्णांची सेवा करणाऱ्या डॉक्टरांचा गौरव करीत राज्य कर्करोग संस्थेत सोमवारी (४ फेब्रुवारी) जागतिक कर्करोग दिन साजरा करण्यात आला. यानिमित्त व्यसनांपासून दूर राहण्याचा मौलिक सल्लाही विविध माध्यमातून देण्यात आला.

शासकीय वैद्यकीय महाविद्यालय व रुग्णालयाचे (घाटी) प्रभारी अधिष्ठाता डॉ. शिवाजी सुक्रे, घाटीचे जनऔषध विभागप्रमुख डॉ. मोहन डोईबळे, कर्करुग्णालयाचे विशेष कार्य अधिकारी डॉ. अरविंद गायकवाड, वैद्यकीय अधीक्षक डॉ. संगीता पाटील, डॉ. बालाजी शेवाळकर, डॉ. लिंगायत, डॉ. देशमुख, डॉ. अजय बोराळकर, डॉ. अनघा वरुडकर व सर्वोदय संस्थेचे संचालक विलास चंदने, आरंभ संस्थेचे प्रदीप काळे, अविनाश सावजी, बाबा संकपाळ आदींची प्रमुख होती. कर्करोग दिनानिमित्त प्रयास या स्वयंसेवी संस्थेच्या वतीने नगरहून कार रॅली काढण्यात आली असून, ही रॅली सोमवारी कर्करुग्णालयात दाखल झाली, तर मंगळवारी जालन्याहून सिंदखेडराजा, अकोला, अमरावती येथे जाणार आहे. त्याचवेळी डॉ. संकपाळ यांनी आरोग्य कीर्तनाद्वारे कॅन्सरवर मात करण्याचा संदेश दिला. याच कार्यक्रमात विश्वकर्मा संस्थेतर्फे कर्करुग्णालयातील डॉक्टरांचा यशोचित गौरव करण्यात आला. या कार्यक्रमाचे सूत्रसंचलन डॉ. शुभांगी घुले-खेडकर यांनी केले, तर प्रास्ताविक डॉ. सुनील पंडागळे यांनी केले. कार्यक्रमासाठी समाजसेवा अधीक्षक बालाजी देशमुख, संदीप भंडागे, इंदल जाधव, विशाल हिवराळे, सिद्धार्थ जाधव, सतीश खरात यांनी पुढाकार घेतला.

म. टा. प्रतिनिधी, औरंगाबाद

महाराष्ट्र राज्य वक्फ बोर्डाच्या सदस्यपदी आमदार अब्दुल सत्तार यांची बिनविरोध निवड करण्यात आली. लोकप्रतिनिधींमधून नियुक्त सदस्य बाबा जानी दुर्राणी यांच्या कार्यकाळ संपल्यानंतर एक वर्षापासून हे पद रिक्त होते. सदस्य निवडीसाठी आमदारांमध्ये प्रक्रिया राबविण्यात आली. त्यात आमदार बाबा जानी दुर्राणी यांनी दाखल केलेला अर्ज परत घेतल्याने आमदार सत्तार यांची निवड बिनविरोध झाल्याची माहिती सोमवारी देण्यात आली. आमदार सत्तार यांच्यासह महिला लोकप्रतिनिधीमधून आमदार हुस्न बानो निजामोद्दीन खलीफ यांची निवड करण्यात आल्याचे कळते. या दोन सदस्यांच्या निवडीनंतर मुत्तवल्ली वर्गातून दोन सदस्यांची निवड केली जाणार आहे. या चार सदस्यांच्या निवडीनंतर बोर्डाची संपूर्ण कार्यकारिणी अस्तित्वात येईल.

म. टा. प्रतिनिधी, औरंगाबाद

व्यवसायाच्या वेगळ्या कल्पना मांडणाऱ्या तीन तरुणांचा सोमवारी बजाज ऑटो भारतीय युवा शक्ती ट्रस्ट आणि डॉ. बाबासाहेब आंबेडकर मराठवाडा विद्यापीठाच्या संयुक्त विद्यमाने पुरस्कार देऊन गौरव करण्यात आला.

वाळूज येथील बजाज विहार स्पोर्टस कॉम्प्लेक्समध्ये झालेल्या कार्यक्रमाला बजाज ऑटो सीएसआरचे सल्लागार सी. पी. त्रिपाठी, बँक ऑफ बडोदाचे उप महाव्यवस्थापक सुरेंद्र शर्मा, भारतीय युवा शक्ती ट्रस्टच्या समितीचे अध्यक्ष मुनीष शर्मा आणि अरुणा विनोद कुमार, बँक ऑफ महाराष्ट्रचे क्षेत्रीय व्यवस्थापक संजय हिरेमठ, एबीआयचे सहाय्यक महाव्यवस्थापक नीलम उपाध्यय व सुधा प्रकाश यांची उपस्थिती होती.

वर्ष २०१८मध्ये ही बिझनेस आयडिया स्पर्धा घेण्यात आली होती. स्पर्धेत एक हजार पेक्षा जास्त युवकांच्या प्रवेशिका प्राप्त झाल्या. यात तीन जणांना पुरस्कार देण्यात आले. यातील पहिला पुरस्कार हा ५० हजार रुपये, दुसऱ्या पुरस्कारासाठी ३० हजार आणि तिसऱ्या पुरस्कारासाठी २० हजार रुपये, तर ज्युरी पुरस्कार देऊन उत्कृष्ट बिझनेस आयडिया देणाऱ्या तरुणांचा सन्मान करण्यात आला. यावेळी उदयोजकांनी स्वत: उत्पादित केलेल्या वस्तूंचे प्रदर्शन मांडले. दोनशे पेक्षा जास्त उद्योजक, मेंटर, विदयार्थी आणि बँकर यांची यावेळी उपस्थिती होती.

Unmesh.deshpande@timesgroup.com

Tweet - @UnmeshdMT

औरंगाबाद : शहरवासीयांसाठी एक आनंदाची बातमी. स्मार्ट सिटी मिशनच्या माध्यमातून औरंगाबादमध्ये रेट्रोफिटिंगच्या अकराशे कोटींच्या कामाला केंद्र सरकारने मंजुरी दिली आहे. त्यामुळे वारसास्थळे व या स्थळांच्या परिसराचा विकास सुसाट होईल, अशी आशा आहे.

शहराचा स्मार्ट सिटी मिशनमध्ये समावेश झाला, त्यावेळी स्मार्ट सिटी अंतर्गत 'ग्रीनफिल्ड डेव्हलपमेंट'मध्ये काम करण्याचे ठरविण्यात आले. १७०० कोटींच्या प्रकल्पात ११०० कोटी रुपये ग्रीनफिल्डसाठी राखून ठेवले. मात्र, ग्रीनफिल्ड प्रकल्प होणे शक्य नसल्याचे लक्षात आल्यावर औरंगाबाद स्मार्ट सिटी डेव्हलपमेंट कॉर्पोरेशनने ग्रीनफिल्ड रद्द करण्याचा निर्णय घेतला. त्याऐवजी रेट्रोफिटिंगमध्ये काम करण्याचा निर्णय घेण्यात आला. त्यानुसार ग्रीनफिल्डसाठी राखून ठेवलेल्या निधीचे विभाजन करण्यात आले. हा प्रस्ताव केंद्र सरकारला पाठवला. या प्रस्तावावर केंद्र सरकारकडून काहीच उत्तर न आल्यामुळे कॉर्पोरेशनचे मख्याधिकारी तथा पालिकेचे आयुक्त डॉ. निपुण विनायक यांनी केंद्रीय नगरविकास मंत्रालयाचे अवर सचिव कुणालकुमार यांची वेळ घेतली. डॉ. विनायक यांनी सोमवारी त्यांची दिल्लीत भेट घेत चर्चा केली. यावेळी उपमुख्य कार्यकारी अधिकारी अंजू उप्पल, अतिरिक्त आयुक्त संतोष कवडे उपस्थित होते. कुणालकुमार यांच्याशी झालेल्या चर्चेची माहिती डॉ. निपुण विनायक यांनी 'मटा' ला दिली. ते म्हणाले, 'ग्रीनफिल्ड ऐवजी रेट्रोफिटिंगचे काम करण्यास कुणालकुमार यांनी मान्यता दिली आहे. त्यानुसार शहरातील वारसास्थळे व या स्थळांच्या आजूबाजूच्या परिसराचा विकास केला जाईल. त्याशिवाय 'ऑक्सिजन हब'साठी देखील काम केले जाणार आहे.'

\B...पाणी, शिक्षण, आरोग्याची कामे

\Bमहापालिका आयुक्त डॉ. निपुण विनायक म्हणाले, 'रेट्रोफिटिंगशिवाय स्मार्ट वॉटरिंग, पाण्याचा फेरवापर, जलफेरभरण आणि विहिरींचे पुनर्भरण, शिक्षण, आरोग्य या क्षेत्रात स्मार्ट सिटी मिशनमधून काम करण्यास परवानगी दिली आहे. ग्रीनफिल्डसाठीचा ११०० कोटींचा निधी आता या कामासाठी वापरता येईल. स्मार्ट सिटीसाठी केंद्र सरकारकडून ५०० कोटी व राज्य सरकारकडून २५० कोटी रुपये मिळणार आहेत. त्यापैकी २३६ कोटी रुपये मिळाले आहेत. २३६ कोटी रुपये सिटी बस प्रकल्पासाठी वापरले जातील. १२० कोटी रुपये मास्टर सिस्टीम इंटिग्रेटर साठी, ३०० कोटी रुपये रेट्रोफिटिंगसाठी, तर १०० कोटी पाणीपुरवठ्याच्या कामांसाठी वापरण्याचे नियोजन आहे.'

म. टा. प्रतिनिधी, जालना

गावालगतच्या गोठ्यात खेळत असलेल्या तीन बालकांचा आगीत होरपळून मृत्यू झाला. क्षीरसागर (ता. भोकरदान) या गावात सोमवारी सकाळी दहाच्या सुमारास ही घटना घडली.

वेदान्त विष्णू मव्हारे (वय ८), संजीवनी गजानन मव्हारे (वय ५), सार्थक मारोती कोलते (वय ६) अशी मरण पावलेल्या मुलांची नावे आहेत. वेदान्त व संजीवनी हे चुलत भाऊ-बहीण आहेत. हे तिघेजण नेहमीप्रमाणे सकाळी खेळत गावलगतच्या गोठ्याजवळ गेले होते. या ठिकाणी वाळलेला कडबा, मक्याचे दाणे काढल्यावर उरलेले पाचट, गोवऱ्यांचा मोठा साठा होता. त्याला लागून पत्र्याची छोटी शेड होती. ही मुले या ठिकाणी खेळत होती. आग लागल्याचे गावकऱ्यांनी बघितले आणि ती विझवण्यासाठी प्रयत्न केला. अग्निशमन दलाच्या जवानांनी आग विझवली आणि त्यानंतर या तिन्ही मुलांचे मृतदेह येथे आढळून आले. आगीमध्ये पूर्ण होरपळून गेलेल्या या मुलांना बघून त्यांच्या आई आणि वडील नातेवाईकांनी अक्षरशः हंबरडा फोडला. शवविच्छेदनानंतर पोलिस उपनिरीक्षक पवार यांनी मृतदेह नातेवाईकांच्या ताब्यात दिले.

परभणी : येथील उरसा निमित्त काढण्यात येणाऱ्या एका संदलमध्ये सहभागी तरुणावर उंटाने हल्ला केला. त्याच्या मानेला जोरदार चावा घेतल्याने एका तरुणाचा मृत्यू झाला. हा प्रकार सोमवारी घडला.

समीर समशोद्दीन (वय १६) असे मृत तरुणाचे नावे आहे. शहरातील तुरबुल हक्क दर्गा परिसरात दरवर्षी फेब्रुवारी महिन्यात उरुस यात्रा भरते. या यात्रेनिमित्त उंटासह संदल (मिरवणूक) काढण्याची प्रथा आहे. मनाचा संदल असलेल्या मिरवणुकीची सुरुवाम शनिवारी जिल्हाधिकारी पी. शिवाशंकर यांच्या हस्ते करण्यात आली. त्यानंतर ही मिरवणूक शहरातील मुख्य मार्गाने दर्गा परिसरात रवाना झाली. वाटेत आजाद कॉर्नरवर आलेल्या या मिरवणुकीत सहभागी समीर समशोद्दीन या १६ वर्षाच्या तरुणाची उंटाने अचानक मान पकडली. जोरदार चावा घेऊन सोडून दिले. लोकांनी त्याला तात्काळ दवाखान्यात हलवले. मात्र, उपचारादरम्यान त्याचा मृत्यू झाला.

दरम्यान, सुमारे १०० ते १२५ वर्षांपासून ही संदल यात्रा काढण्यात येते. मात्र, असा प्रकार कधीही घडला नसल्याचे जाणकार सांगतात. उंट हा अतिशय शांत आणि उंच प्राणी आहे, त्याच्या पाठीवर चादर चढवून त्याला संदलमध्ये सहभागी केले जाते. परंतु, त्यांच्याकडून असा प्रकार घडल्याने आश्चर्य व्यक्त होत आहे.

......................

म. टा. प्रतिनिधी, औरंगाबाद

महाविद्यालय मूल्यांकनासाठी २० हजार रुपये शुल्क भरण्याचा निर्णय मागे घेण्यात आला आहे. मात्र, मूल्यांकन समिती सदस्यांचे मानधन आणि प्रवासखर्च महाविद्यालयाला करावा लागणार आहे. मूल्यांकन अर्ज करण्यासाठी ११ फेब्रुवारीपर्यंत मुदतवाढ देण्यात आली आहे. मूल्यांकन शुल्क भरण्यास महाविद्यालयांनी नकार दिला होता.

डॉ. बाबासाहेब आंबेडकर मराठवाडा विद्यापीठाने संलग्नित महाविद्यालयांची मूल्यांकन प्रक्रिया सुरू केली आहे. एकूण ४१७ महाविद्यालयांना ११ फेब्रुवारीपर्यंत अर्ज दाखल करण्यास मुदतवाढ देण्यात आली. मूल्यांकनासाठी २० हजार रुपये शुल्क भरण्यास काही महाविद्यालयांनी नकार दिला होता. शुल्क अतिरिक्त असून विद्यापीठानेच खर्च करावा, अशी भूमिका घेतली होती. 'कॉलेज ऑडिट'चा निर्णय उच्च शिक्षण विभागाचा आहे. निर्णयाची पुरेपूर अंमलबजावणी करण्याची जबाबदारी विद्यापीठ प्रशासनावर आहे. याबाबत प्राचार्य आणि विद्यापीठाच्या प्रशासकीय अधिकाऱ्यांची सोमवारी दुपारी बैठक झाली. मूल्यांकन शुल्क रद्द करण्याचा निर्णय बैठकीत घेण्यात आला. मात्र, मूल्यांकन समितीचा प्रवासखर्च आणि सदस्यांचे मानधन महाविद्यालयाला द्यावे लागणार आहे. मूल्यांकन नोंदणी शुल्क एक हजार रुपये, तीन सदस्यांना प्रत्येकी किमान दोन हजार रुपये मानधन आणि प्रवासखर्च कॉलेज देणार आहे. प्रवासखर्च वाचवण्यासाठी विद्यापीठबाह्य समितीचे सदस्य शेजारील जिल्ह्यातील नेमण्याचा निर्णय झाला. ही प्रक्रिया पूर्णत: गोपनीय असून 'नॅक'ची तयारी करीत असलेल्या महाविद्यालयांचे मूल्यांकन पहिल्या टप्प्यात होणार आहे. समितीच्या सदस्य सीलबंद अहवाल प्राचार्यांना देणार असून प्राचार्य विद्यापीठात सादर करणार आहेत. या अहवालाच्या मूल्यांकनासाठी प्र-कुलगुरू डॉ. अशोक तेजनकर यांच्या अध्यक्षतेखाली केंद्रीय समिती नेमण्यात आली आहे. अहवालाचे विश्लेषण केल्यानंतर महाविद्यालयाला श्रेणी दिली जाणार आहे. अनुदानित आणि विनाअनुदानित महाविद्यालयांच्या संख्येची सरासरी निश्चित करुन मूल्यांकन होणार आहे. पण, सुमार दर्जाच्या महाविद्यालयांचे पहिल्या टप्प्यात मूल्यांकन होणे आवश्यक आहे. या महाविद्यालयांचा दर्जा सुधारण्यासाठी विद्यापीठाने ठोस उपाययोजना कराव्यात असा मुद्दा काही प्राचार्यांनी उपस्थित केला.

\Bत्रुटी झाकण्याचा प्रयत्न

\Bपहिल्या टप्प्यात ३० टक्के महाविद्यालयांचे मूल्यांकन होणार आहे. येत्या १५ मार्चपर्यंत प्रक्रिया पूर्ण करण्यात येणार आहे. अनेक महाविद्यालयात प्रचंड त्रुटी आहेत. मूल्यांकन अर्जासोबत तीन वर्षांची माहिती सादर करताना त्यांची दमछाक झाली आहे. त्यामुळे काही संस्थाचालक शुल्काचा मुद्दा मांडून प्रक्रिया रद्द करण्याचा प्रयत्न करीत होते. पण, वादात तोडगा काढत शुल्क मागे घेत प्रशासनाने महाविद्यालयांना मूल्यांकन प्रक्रियेत सहभागी करून घेतले आहे.

प्रशासकीय निर्णयानुसार 'कॉलेज ऑडिट' पूर्ण होणार आहे. शैक्षणिक दर्जा राखण्यासाठी प्रक्रिया आवश्यक आहे. १५ मार्चपर्यंत प्रक्रिया पूर्ण करण्यात येईल.

- डॉ. अशोक तेजनकर, प्र-कुलगुरू

म. टा. प्रतिनिधी, औरंगाबाद

प्राध्यापक भरतीसाठी लागू करण्यात आलेली '१३ पॉइंट रोस्टर' प्रणाली रद्द करण्याच्या मागणीसाठी शैक्षणिक संघटनांनी विद्यापीठात मोर्चा काढला. आरक्षणविरोधी षडयंत्र उधळून ला‌वण्यासाठी देशव्यापी आंदोलन करण्याचा निर्णय संघटनांनी जाहीर केला.

विद्यापीठ स्तरावर प्राध्यापक पदस्थापना करण्यासाठी नवीन १३ पॉइंट रोस्टर प्रणाली लागू करण्यात आली आहे. देशातील ४० केंद्रीय विद्यापीठात अंमलबजावणी झाली असून, प्रादेशिक विद्यापीठात अंमलबजावणी होण्याची शक्यता आहे. या प्रणालीनुसार अनुसूचित जाती -जमाती, इतर मागासवर्गीय प्रवर्गातील उमेदवार संधीपासून वंचित राहणार आहे. केंद्र सरकारच्या निर्णयाविरोधात डॉ. बाबासाहेब आंबेडकर मराठवाडा विद्यापीठात सोमवारी जोरदार निदर्शने करण्यात आली. स्टुडंट्स फेडरेशन ऑफ इंडिया, ऑल इंडिया स्टुडंट्स फेडरेशन, सत्यशोधक विद्यार्थी संघटना आणि प्रतिसाहित्य संमेलन कृती समितीने वाय कॉर्नर ते मुख्य प्रशासकीय इमारतीपर्यंत मोर्चा काढला. यावेळी विद्यार्थी, संशोधक व प्राध्यापकांनी जोरदार निदर्शने केली. संघटनांच्या प्रतिनिधींनी नवीन प्रणालीला विरोध करीत भूमिका मांडली. मागास घटकांचे संविधानिक अधिकार नाकारले जात आहेत. नेट-सेट, पीएचडीधारक विद्यार्थी संधीपासून दूर आहेत. आरक्षणविरोधी षडयंत्र हाणून पाडण्याचा भूमिका संघटनांनी जाहीर केली. कुलगुरू डॉ. बी. ए. चोपडे यांना निवेदन देण्यात आले. या आंदोलनात नितीन वाव्हळे, लोकेश कांबळे, सुजित चंदनशिवे, अमोल खरात, मनोज मुनेश्वर, रामप्रसाद वाव्हळ, सत्यजित मस्के, रवी खंदारे, सोनाली मस्के, समाधान बारगळ, सफा हयात, मेघना मराठे यांच्यासह विद्यार्थी उपस्थित होते.

म. टा. प्रतिनिधी, औरंगाबाद

दुष्काळाने सर्वाधिक होरपळ औरंगाबाद जिल्ह्याची होत असून, ग्रामीण भागामध्ये पाण्यासाठी नागरिकांची वणवण सुरू आहे. पाण्याचा प्रश्न सोडवण्यासाठी प्रशासनाने जिल्ह्यातील विविध भागांमध्ये ६७० टँकर सुरू केले आहेत, मात्र विहिरींतून आणलेले पाणी दूषित आहे, या भीतीने नागरिक ते घेण्यास नकार देत आहेत. यामुळे अनेक ठिकाणी रीफिलिंग सेंटरचा लांबचा टप्पा गाठून टँकर भरून आणावे लागत असल्याचे जिल्हाधिकारी उदय चौधरी यांनी सांगितले.

विषेश म्हणजे नागरिकांचा आक्षेप असलेल्या गावांतील विहिरींच्या पाण्याची तपासणी केली आहे. ते पाणी पिण्यायोग्य आहे, मात्र नागरिकांना पाणी दूषित असल्याची शंका असल्यामुळे प्रशासनाला दूर अंतरावर असलेल्या टँकर रीफिलिंग सेंटरवरून पाणी आणून विविध गावांतील नागरिकांची तहान भागवावी लागत आहे. यावर्षी मराठवाड्याच्या इतर जिल्ह्यांच्या तुलनेत सर्वाधिक ६७० टँकर औरंगाबाद जिल्ह्यामध्ये सुरू आहेत. जिल्ह्यातील ४८८ गावे व १८९ वाड्यांमधील ११ लाख नागरिकांची तहान केवळ टँकरद्वारे भागवण्यात येते. वाड्या-वस्त्यांवरही पिण्याचे पाणी पोचावे, अशी व्यवस्था प्रशासनाने केली आहे. यासाठी परिसरातील विहिरींचे अधिग्रहणही केले आहे, मात्र तेथील पाणी दूषित आहे या भीतीमुळे अनेक गावातील नागरिकांनी ते पाणी घेण्यास विरोध केला आहे. विशेष म्हणजे या विहिरींमधील पाण्यााची तपासणी केली असून, ते पाणी पिण्यायोग्य आहे, असे प्रशासन म्हणते, मात्र नागरिक आरोग्याच्या भीतीमुळे हे पाणी घेण्यास नकार देत आहेत. त्यामुळे प्रशासनाला आता अनेक ठिकाणचे टँकर रीफिलिंग सेंटरवरून भरून आणावे लागत आहेत. यामुळे जिल्ह्यात पाणीपुरवठा करणाऱ्या अनेक टँकरचे किलोमीटर दररोज शंभरच्या जवळपास जात आहे, याचा अतिरिक्त खर्चही प्रशासनाला करावा लागणार आहे. २०१२मध्ये औरंगाबाद जिल्ह्याला दुष्काळाचा सामना करावा लागला होता. त्यावेळी प्रशासनाने शेंद्रा; तसेच फारोळा येथे शुद्ध पाण्याचे हायड्रेन उभारण्यात आले होते. या हायड्रेनच्या माध्यमातून टँकर भरून शुद्ध पाणी गावोगावात पोचवण्यात आले होते.

\Bरीफिलिंग पॉइंट वाढवण्याच्या सूचना\B

औरंगाबाद जिल्ह्यामध्ये बहुतांश ठिकाणी 'एमआयडीसी'च्या माध्यमातून सुरू असलेले टँकर रीफिलिंग सेंटरची संख्या वाढवण्याच्या सूचना जिल्हाधिकारी उदय चौधरी यांनी 'एमआयडीसी'च्या अधिकाऱ्यांना दिल्या आहेत. यासाठी येणारा खर्चही एमआयडीसीला करावा लागणार असल्याचे चौधरी यांनी सांगितले.

\Bवैजापूरसाठी नाशिकहून पाणी

\Bपाणीटंचाईच्या कालावधीमध्ये येणाऱ्या काळात कमी अंतराच्या ठिकाणाहून पाणी आणण्यात येणार असून, यामध्ये वैजापूर तालुक्यातील काही गावांना पाणीपुरवठा करण्यासाठी नाशिक जिल्ह्यातील मध्यम प्रकल्पातून पाणी घेण्यात येणार आहे. यासाठी जिल्हाधिकारी उदय चौधरी यांनी पत्रव्यवहारही केला आहे. या प्रकल्पातून पाणी घेता आले, तर वैजापूर तालुक्यातील ३० ते ३५ गावांना पाणीपुरवठा करण्यासाठी २३ किलोमीटरचा फेरा वाचणार आहे. जिल्हा प्रशासनाने पाठविलेल्या पत्रावर नाशिक प्रशासनाने अद्याप काहीही कार्यवाही केलेली नाही, असे सूत्रांनी सांगितले.

म. टा. प्रतिनिधी, औरंगाबाद

व्यंकटेश अपार्टमेंटच्या गल्लीमध्ये तेथील नागरिक अमित भांगे यांच्या घराबाहेर सीसीटीव्ही कॅमेरे लावलेले आहेत. या कॅमेऱ्यामध्ये चोरट्यांचे चित्रिकरण झाले आहे. दुपारी दीड वाजता गळ्यात मोठा रुमाल, डोळ्यावर चष्मा, अंगात पांढरा चौकडीचा शर्ट घातलेला चोरटा पायी व्यंकटेश अपार्टमेंटकडे जाताना दिसत आहे. या चोरट्याच्या पाठीमागून दुचाकीवर दुसरा चोरटा गेला. या चोराच्या अंगात निळा शर्ट, डोळ्यावर गॉगल, डोक्याला रुमाल बांधलेला असून, पाठीवर सॅक लटकवलेली आहे. हेल्मेटसोबत असून ते चोरट्याने हातात ठेवल्याचे दिसत आहे. काही मिनिटांतच हे चोरटे पुराणिक यांच्या घरातून चोरलेली लाल बॅग घेऊन जाताना चित्रित झाले असून, रुमाल घातलेला पायी गेलेला चोरटा बॅग पकडून मागे बसलेला आहे.

…पुराणिक यांच्या फ्लॅटमध्ये चोरी करण्यास चोर गेलेला होता. चोरटा फ्लॅटमध्येच असताना पुराणिक यांचा मुलगा शिकवणीवरून परतला. तोपर्यंत फ्लॅटमधील चोरट्याने कार्यभाग साधला होता. चोरटा खाली येत असतानाच मुलगा वर फ्लॅटकडे जात होता. जिन्यामध्ये एकमेकांशी यांची क्रॉसिंग झाली. सीसीटीव्हीमध्ये चित्रित झालेल्या या चोराला मुलाने देखील ओळखले आहे.

…

\Bअपार्टमेंट सुरक्षेविना

\Bव्यंकटेश अपार्टमेंट चार मजली आहे, मात्र या अपार्टमेंटच्या सुरक्षिततेसाठी कोणतीही व्यवस्था करण्यात आलेली नाही. या ठिकाणी सुरक्षारक्षक नसल्यामुळे चोरट्याला थेट फ्लॅटपर्यंत जाण्यास अडचण आली नाही; तसेच या अपार्टमेंटमध्ये सीसीटीव्ही देखील नसल्याने चोरट्याला याचा फायदाच झाला.

…

आठ मिनिटांत चोरी

सुनिता पुराणीक अवघ्या आठ दिवसांपूर्वी या अपार्टमेंटमध्ये राहण्यास आल्या. त्यांच्या घरात कपाटात मोठ्या प्रमाणावर सोने आणि रक्कम असल्याची; तसेच दुपारी कोणी घरात नसल्याचे देखील चोराला माहिती असावी. यामुळेच सराईतपणे चोरट्याने दुपारी घरी कोणी नसताना पुराणिक यांचे घर फोडत अवघ्या आठ मिनिटांत दागिन्यांची बॅग घेऊन पलायन केले.

म. टा. प्रतिनिधी, औरंगाबाद

सोळा वर्षाच्या विद्यार्थीनीने गळफास घेत आत्महत्या केल्याचा प्रकार रविवारी सायंकाळी विजयश्री कॉलनी एन पाच येथे उघडकीस आला. श्रावणी संतोष परिहार (वय १६) असे या विद्यार्थिनीचे नाव आहे. श्रावणीच्या आत्महत्येचे कारण समजू शकले नसून, सिडको पोलिस ठाण्यात अकस्मात मृत्यूची नोंद करण्यात आली आहे.

सिडको पेालिस ठाण्याचे पेट्रोलिंग व्हॅन रविवारी सायंकाळी गस्त घालीत होती. यावेळी नियंत्रण कक्षाने त्यांना विजयश्री कॉलनी येथे एका मुलीने गळफास घेतल्याची माहिती दिली. पोलिसांनी घटनास्थळी धाव घेतली असता श्रावणीने पंख्याला ओढणीने गळफास घेतल्याचे दिसून आले. श्रावणीला तातडीने घाटी हॉस्पीटलमध्ये हलवण्यात आले. यावेळी डॉक्टरांनी तीला तपासून मृत घोषित केले. श्रावणी एका कॉलेजमध्ये ११वीच्या वर्गात शिक्षण घेत होती. तिच्या आत्महत्येचे नेमके कारण समजू शकले नसल्याची माहिती पोलिस निरीक्षक निर्मला परदेशी यांनी दिली. याप्रकरणी पीएसआय पुनम पाटील तपास करीत आहेत.

…

म. टा. प्रतिनिधी, औरंगाबाद

पेमेंट थकल्यामुळे महापालिकेतील कंत्राटदारांनी काम बंद आंदोलन सुरू केले आहे. या आंदोलनामुळे सुमारे ९० टक्के कामे बंद पडल्याचा अंदाज आहे. प्रामुख्याने वॉर्डांतर्गत रस्ते, पाणी पुरवठा, ड्रेनेज आणि इमारती बांधकामांचा त्यात समावेश आहे.

महापालिकेत सुमारे १५० कंत्राटदार नोंदणीकृत आहेत असून नोंदणी नसलेले तेवढेच कंत्राटदार विविध कामे करतात. या कंत्राटदारांचे पेमेंट दीड वर्षांपासून थकले आहे. मिळालेल्या माहितीनुसार, १८५ कोटींचे पेमेंट थकले असून तशी कबुली स्थायी समितीच्या बैठकीत प्रशासनातर्फे देण्यात आली आहे. वारंवार पाठपुरावा करून देखील पेमेंट मिळत नसल्यामुळे काम बंद आंदोलन करण्याचा इशारा कंत्राटदारांनी शनिवारी महापौर व अतिरिक्त आयुक्तांना दिला होता. त्यासोबतच आत्मदहन करण्याचा इशारा देखील दिला होता. त्यानुसार, सोमवारपासून काम बंद पुकारण्यात आले आहे. थकीत पेमेंटपैकी किमान ६० टक्के पेमेंट पालिकेने करावे, अशी मागणी आहे. नगरसेवकांच्या स्वेच्छा निधीतून अनेक कामे करण्यात आली आहेत, एकाच एजन्सीचे अनेक बिल प्रलंबित आहेत, रस्त्यांच्या कामांचे देखील बिल बाकी आहे. वर्ष-दीड वर्षापासून पेमेंट न मिळाल्यामुळे कामांसाठी उधारीवर साहित्य मिळत नसल्याची खंत कंत्राटदारांनी व्यक्त केली.

म. टा. प्रतिनिधी, औरंगाबाद

दुष्काळातील शुल्क माफीचा गैरफायदा घेत, बारावीच्या विद्यार्थ्यांकडून घेतलेल्या परीक्षा फीच्या पैशांचा मलिदा लाटणक्याचा प्रयत्न करणे प्राचार्याला चांगले अंगलट आले आहे. मंडळाच्या तपासणीनंतर हे बिंग फुटले असून, आता शुल्कासह दंडापोटी साडेतेवीस लाखांची रक्कम भरण्याची वेळ ढोरकीनच्या मानसिंगभाऊ पवार कनिष्ठ महाविद्यालयावर आली आहे.

बारावीची लेखी परीक्षा २१ फेब्रुवारीपासून सुरू होत, तर प्रात्यक्षिक परीक्षा केव्हाच सुरू झाल्या आहेत. यात ढोरकीनच्या मानसिंगभाऊ पवार कनिष्ठ महाविद्यालयाने विद्यार्थ्यांकडून शुल्क जमा केले. ऑनलाइन अर्ज भरले. त्यानंतर ऑफलाइन कागदपत्रांची माहिती जमा केली. मात्र,

परीक्षा फीची रक्कम जमाल केली नाही. हे मंडळाच्या तपासणीत उघड झाले आहे. सूत्रांनी दिलेल्या माहितीनुसार यात संबंधित शाळेतील काम पाहणाऱ्यांनी शुल्क जमा केले. मात्र, त्याच दरम्यान परीक्षा शुल्कमाफी जाहीर झाली. त्यामुळे हे पैसे नाही भरले तर धकेल. हॉलतिकीट येतील अन् मुले थेट परीक्षा देतील, अशी समज करून घेऊन प्राचार्य आणि प्रशासनाने हे पैसे भरलेच नाहीत. मात्र, शुल्काची रक्कम घेऊ नका, असा कोणताही आदेश नसल्याने मंडळाने शुल्काचे चलन घेतले. संबंधित संस्थेकडून परीक्षा शुल्क न आल्याने या विद्यालयाच्या प्रात्यक्षिकाचे साहित्य मंडळाने थांबवले आहे. आधी दंडासह रक्कम जमा करा, तेव्हाच आम्ही प्रात्यक्षिकाचे साहित्य पाठवू असे स्पष्ट केले. या प्रकारामुळे खळबळ उडाली आहे.

\Bसाडेचारशे विद्यार्थी

\Bसंबंधित विद्यालयात बारावीच्या चार तुकड्या असल्याची माहिती शिक्षण उपसंचालक कार्यालयाकडून देण्यात आली. सुमारे साडेचारशे विद्यार्थी परीक्षेला बसले आहेत. प्रत्येकी ४३५ रुपये परीक्षांचे शुल्क, त्याचवेळी शुल्क भरले असते, तर ही वेळ आली नसल्याचे सांगण्यात येते. आता, ही रक्कम भरण्यासाठी संबंधित संस्था प्रशासनाची धावपळ उडाली आहे. त्यातील काही रक्कम भरल्याचेही सांगण्यात येत आहे. उर्वरीत रक्कम जमा केल्याशिवाय प्रक्रिया होणार नाही, असे मंडळाकडून स्पष्ट करण्यात आले.

\Bमंडळाची प्रक्रिया दोषी!

\Bमंडळाकडे दहावी, बारावीचे अर्ज भरताना आधी ऑनलाइन अर्ज भरण्यात येतात. त्यानंतर शाळा चलन भरून ऑफलाइन कागदपत्रांसह माहिती मंडळाकडे जमा करते. या दोन्ही प्रक्रिया वेगवेगळ्या स्तरावर होत असल्याने मंडळाला कोणी फी भरली हे त्याचवेळी समजत नाही. कागदपत्र जमा केल्यानंतर कोणी शुल्क जमा केले, कोणाचे किती विद्यार्थी याची पडताळणी करावी लागते. इतर परीक्षांप्रमाणे अर्ज भरतानाच परीक्षा शुल्क जमा करण्याची व्यवस्था नसल्याने हा गोंधळ उडत असल्याचे सांगण्यात येते. दुसरीकडे यंदापासून थेट ऑनलाइन हॉलतिकीट पोहचती केली जाणार आहेत. त्यामुळे असे गैरप्रकार होण्याची अधिक भीती व्यक्त केली जात आहे.

म. टा. प्रतिनिधी, औरंगाबाद

युथ फॉर डेमॉक्रसी, निर्धार सोशल फाउंडेशनतर्फे सोमवारी (चार फेब्रुवारी) सांस्कृतिक दहशतवाद विरोधी दिन पाळण्यात आला. यानिमित्त क्रांती चौकात धरणे देण्यात आली. सरदार वल्लभभाई पटेल यांनी राष्ट्रीय स्वयंसेवक संघावर बंदी आणली होती; त्या घटनेला ७० वर्षे पूर्ण झाल्याने त्याची उजळणी व्हावी आणि तरुणांना इतिहासाची माहिती होण्यासाठी दिन पाळण्यात आल्याचे संयोजकांनी सांगितले.

महात्मा गांधी यांची हत्य करण्यासाठी विखारी वातावरण तयार केल्याचा ठपका ठेवत चार फेब्रुवारी १९४८ रोजी तत्कालीन केंद्रीय गृहमंत्री सरदार पटेल यांनी राष्ट्रीय स्वयंसेवक संघावर बंदीचा निर्णय घेतला होता. त्याची आठवण म्हणून सांस्कृतिक दहशतवाद विरोधी दिनाचे आयोजन करण्यात आले. हिंदू महासभेच्या नेत्यांनी नुकत्याच झालेल्या गांधी पुण्यतिथी रोजी केलेल्या कृत्याचा निषेध करून राष्ट्रपित्याचा अवमान करण्याऱ्या त्यांना देशद्रोहाच्या कलमाखाली अटक करण्याची मागणी करण्यात आली. या धरणे आंदोलनात प्रा. डॉ. हृषीकेश कांबळे, डॉ. गुरुदत्त राजपूत, डॉ. दिलीप चव्हाण, राजेश मुंढे, डॉ. उल्हास उढाण, बाळासाहेब गरुड आदी मान्यवरांसह युथ फॉर डेमोक्रॅसी आणि निर्धार सोशल फाउंडेशनचे सदस्य अक्षय पाटील, प्रतीक पाटील, अॅड. संदीप पाटील, अमोल दांडगे, अक्षय जेवरीकर, मयूर सोनवणे, विशाल बन्सवाल, डॉ. कपिल झोटिंग, अक्षय शिंदे, नितीन कीर्तीशाही, योगेश सोळंके, सौरभ जाधव, ओंकार पाटील, भास्कर पाटील यांची उपस्थिती होती.

म. टा. प्रतिनिधी, औरंगाबाद

दारुसाठी पैसे दिले नाही म्हणून लोखंडी पट्टीने कानावर वार करून गंभीर जखमी करणारे भारत उर्फ जॉन शंकरतीर्थे व शुभम भिकुलाल जाट यांना सहा महिने सक्तमजुरी व प्रत्येकी दोन हजार रुपये दंडाची शिक्षा प्रथम वर्ग न्यायदंडाधिकारी के. के. कुरंदळे यांनी ठोठावली.

याप्रकरणी बाबासाहेब श्यामराव शिंदे (२२, रा. जयभवानीनगर, औरंगाबाद) याने फिर्याद दिली होती. फिर्यादीनुसार, ११ जून २०१४ रोजी सकाळी दहाच्या सुमारास फिर्यादी विश्रांती चौकातून भाजी घेऊन जात असताना आरोपी भारत उर्फ जॉन शंकरतीर्थे (२२) व शुभम भिकुलाल जाट (२३, दोघे रा. जयभवानीनगर) यांनी फिर्यादीला थांबवून दारुसाठी पैशांची मागणी केली. पैसे देण्यास नकार देताच आरोपी भारत याने फिर्यादीच्या डाव्या कानावर लोखंडी पट्टीने वार केला, तर आरोपी शुभम याने फिर्यादीला हाता-पायांनी मारहाण केली. यात फिर्यादी गंभीर जखमी झाला.

प्रकरणात फिर्यादीच्या तक्रारीवरून मुकुंदवाडी पोलिस ठाण्यात गुन्हा दाखल करण्यात आला होता. खटल्यावेळी, सहाय्यक सरकारी वकील सुनील जोंधळे यांनी तीन साक्षीदारांचे जबाब नोंदविले. दोन्ही बाजुंच्या युक्तिवादानंतर व साक्ष-पुराव्यांवरून कोर्टाने दोन्ही आरोपींना भारतीय दंड संहितेच्या ३२४ कलमान्वये सहा महिने सक्तमजुरी व प्रत्येकी एक हजार रुपये दंड, दंड न भरल्यास एक महिना सक्तमजुरी, भारतीय दंड संहितेच्या ३२३ कलमान्वये दोन्ही आरोपींना पाच महिने सक्तमजुरी व प्रत्येकी ५०० रुपये दंड व दंड न भरल्यास एक महिना सक्तमजुरी, तर भारतीय दंड संहितेच्या ५०६ कलमान्वये दोन्ही आरोपींना तीन महिने सक्तमजुरी व प्रत्येकी ५०० रुपये दंड व दंड न भरल्यास १५ दिवस सक्तमजुरीची शिक्षा ठोठावली. दंडापैकी तीन हजार रुपये फिर्यादीला नुकसान भरपाईपोटी देण्याचे आदेशही कोर्टाने दिले.

म. टा. प्रतिनिधी, औरंगाबाद :

शहरातील रस्त्यांवर वाहनांचे अपघात होऊन कोणाचे जीव जाऊ नयेत. अपघातांचे 'ब्लॅक स्पॉट' दूर करण्याचे काम सध्या सुरू आहे. बीड बायपास रोडचा प्रश्न गंभीर आहे. या परिस्थितीवर मात करण्यासाठी नागरिकांची समिती स्थापन करून, त्यातून समोर येणाऱ्या उपाय योजना राबवून हा रस्ता अपघात शून्य करण्याचा प्रयत्न आहे. यासाठी नागरिकांची सहकार्य करण्याची गरज असल्याचे आवाहन पोलिस आयुक्त चिरंजीव प्रसाद यांनी केले.

राज्य रस्ता सुरक्षा अभियानाची सुरुवात सोमवार (चार फेब्रुवारी) करण्यात आली. या अभियानाच्या उद्घाटन कार्यक्रम छत्रपती शाहू महाराज शिक्षण संस्थेच्या सभागृहात घेण्यात आले. त्यावेळी चिंरजीव प्रसाद बोलत होते. या कार्यक्रमाप्रसंगी महापौर नंदकुमार घोडेले, सार्वजनिक बांधकाम विभागाचे मुख्य अभियंता के. टी. पाटील, अप्पर जिल्हाधिकारी पी. एल. सोरमारे, प्रभारी प्रादेशिक परिवहन अधिकारी संजय मेत्रेवार, 'सीएसएमएसएस'चे प्रशासकीय अधिकारी डॉ. श्रीकांत देशमुख, प्राचार्य डॉ. उल्हास शिंदे, डॉ. डी. के. शेळके, डॉ. जी. बी. डोंगरे, अशोक आहेर यांची उपस्थिती होती.

यावेळी चिरंजीव प्रसाद यांनी सांगितले की, रस्ता किंवा महामार्गावर स्पीड ब्रेकर उभारण्यास कोर्टाने मर्यादा टाकलेल्या आहेत. शहराचा विचार केल्यास बीड बायपास रस्ता हा शहरात आलेला आहे. या बीड बायपास रोडवरील होणारी वाहतूक आणि घडणारे अपघात विचारात घेता, अधिक सुरक्षा उपाय योजना राबवावे लागणार आहे. सध्या शहर वाहतूक पोलिसांकडून उपाय योजना केली जात आहे. काही प्रमाणात या प्रभावी ठरत आहे. आता वाहनाच्या वेगाची मर्यादाही ४० किलो मीटरवर करण्यात आली आहे. जास्त वेग असणाऱ्या वाहनांवर निश्चित कारवाई करण्यात येणार आहे. बीड बायपास अपघात मुक्त करण्यासाठी नागरिकांच्या सहकार्याची त्याच्याकडून आगामी आठ दिवसांत या सूचना मागविण्यात येणार आहे. महापौर नंदकूमार घोडेले यांनी बीड बायपास रोडवरील वाढत्या अपघाताचे प्रमाण चिंतेचा विषय असल्याचे सांगितले.

……

म. टा. प्रतिनिधी, सिल्लोड

अंधारी (ता. सिल्लोड) येथील आरोग्य केंद्राची इमारत मोडकळीस आल्याने महिलांना कुटुंब नियोजन शस्त्रक्रियेसाठी चक्क दुसऱ्या आरोग्य केंद्रांचा आधार घ्यावा लागत आहे. शिवाय जाण्या-येण्याची सुविधा नसल्याने १२ ते १३ गावांतील रुग्ण या आरोग्य केंद्राकडे फिरकतही नाही.

या आरोग्य केंद्रांतर्गत पळशी, केऱ्हाळा, भवन, लोणवाडी, पिंपळगाव पेठ, निल्लोड, कायगाव अशी उपआरोग्य केंद्रे आहेत. या केंद्राला टाकळी, मांडगाव, म्हसला बुर्द, खुर्द, तांडा बाजार, जिवरग टाकळी, गव्हाली, उपळी, बोरगाव कासारी, गेवराई सेमी, चिंचखेडा, बनकिन्होळा, वरखेडी, तलवाडा बाभूळगाव, भायगाव अशी २३ गावे जोडलेली आहे, परंतु यातील टाकळी, मांडगाव, म्हसला बुर्द, खुर्द, उपळी व लोणवाडी ही गावे अंधारीला लागून आहे. शिवाय या गावांचा दैनंदिन दळणवळण या गावांशी निगडित आहे, परंतु इतर गावांसाठी जाण्या-येण्याची सुविधा नाही. शिवाय या गावांना सिल्लोड शहराजवळ असल्याने त्यांचासाठी हे आरोग्य केंद्र असुविधेचे आहे. यामुळे या गावातील रुग्णांना खाजगी हॉस्पिटलमध्ये उपचार घ्यावे लागत आहे.

आरोग्य केंद्राची फरशी, छताच्या स्लॅब जागोजागी निखळल्याचे चित्र आहे. इमारत मोडकळीस आल्याने सर्व सुविधा असूनही कुटुंब नियोजन शस्त्रक्रिया शिबिर घेणे बंद आहे. आरोग्य केंद्राला लागून असलेल्या गावांतील महिलांना या शस्त्रक्रियेसाठी आमठाणा, पालोद, आंळद (ता. फुलंब्री) या आरोग्य केंद्रांच्या आधार घ्यावा लागत आहे.

अंधारी येथे सोमवारी आठवडी बाजार भरतो. यामुळे या दिवशी टाकळी, मांडगाव, म्हसला बुर्द, खुर्द, उपळी व लोणवाडी या गावातील रुग्ण मोठ्या प्रमाणात येतात. या दिवशी ४०० ते ५०० रुग्णांची 'ओपीडी' राहते. इतर दिवशी १०० ते १५० रुग्णांची आरोग्य केंद्रात तपासणी करून औषधी दिली जाते. आरोग्य अधिकारी, कर्मचारी, औषधी अशा सुविधा युक्त या रुग्णालयाला सुसज्ज इमारतीची अत्यंत गरज आहे.

\Bवैद्यकीय अधिकाऱ्यांचे अप-डाउन

\Bया आरोग्य केंद्रात दोन वैद्यकीय अधिकारी यांच्यासह १९ कर्मचारी कार्यरत आहेत. त्यांना राहण्याची सुविधा ही आहे, परंतु वैद्यकीय अधिकारी रात्रीच्या वेळी या ठिकाणी थांबत नाही. यामुळे रात्री- अपरात्री रुग्णांना सिल्लोड येथील उपजिल्हा रुग्णालयात किंवा खाजगी रुग्णालयात उपचार घ्यावे लागत आहे. वरिष्ठांनी याकडे लक्ष देणे गरजेचे आहे.

अंधारी आरोग्य केंद्राची इमारत मोडकळीस आलेली आहे. इमारत दुरुस्तीचा प्रस्ताव संबंधित विभागाकडे पाठविण्यात आला आहे. इमारत खराब असल्याने ऑपरेशन थिएटरमध्ये कुटुंब नियोजन शस्त्रक्रिया केल्या जात नाहीत. त्या आम्ही आळंद व सिल्लोडला करतो. त्याचबरोबर आरोग्य केंद्रातील कर्मचारी रात्री-अपरात्री सेवा बजावतात.

- डॉ. योगेश राजपूत, वैद्यकीय अधिकारी, आळंद

म. टा. प्रतिनिधी, औरंगाबाद

तुळजापूर तालुक्यातील यमगरवाडीतील शेतवस्तीवर सशस्त्र दरोडा टाकून लोखंडी गज, जंब्या व सुऱ्याने गंभीर मारहाण करीत विरोध करणाऱ्या महिलेचा खून करून १९ हजारांचा ऐवज लुटणारे पंम्प्या दामू शिंदे, बालाजी शिवाजी काळे, टुन्या उर्फâ प्रेमचंद दामू शिंदे या आरोपींना जन्मठेप व प्रत्येकी आठ लाख दोन हजार रुपये दंडाची शिक्षा मोक्काचे विशेष न्यायाधीश के. आर. चौधरी यांनी ठोठावली. २०१४मधील घटनेत मृत झालेल्या महिलेच्या गळ्यातील मंगळसूत्रही दरोडेखोरांनी हिसकावून नेले होते.

याप्रकरणी जयाजी खंडू सरवदे (४५, रा. यमगरवाडी, ता. तुळजापूर) यांनी फिर्याद दिली होती. फिर्यादीनुसार, १३ डिसेंबर २०१४ रोजी रात्री नऊच्या सुमारास फिर्यादी हे आपल्या शेतातील पिकाला पाणी देत होता. फिर्यादीच्या शेजारी राहणारे सखाराम जोगदंड हेदेखील पिकाला पाणी देत होते. जोगदंड यांचे पाणी देणे झाल्यामुळे जेवण करण्यासाठी त्यांनी मोबाइलवरून फिर्यादीला वस्तीवर बोलवले. त्यानंतर फिर्यादीसह पांडुरंग जोगदंड व साखाराम जोगदंड हे तिघे जेवण करण्यासाठी बसले होते, तर काशीबाई पांडुरंग जोगदंड या पत्र्याच्या शेडमध्ये भाकरी करत होत्या. त्याचवेळी वस्तीच्या दिशेने पाच ते सातजण धावत आले आणि शिविगाळ-मारहाण करीत त्यांनी मोबाइल, पैशांची मागणी केली. फिर्यादीने त्यांना विरोध करताच दरोडेखोरांनी सुरा, जंब्या व लोखंडी गजाने मारहाण केली. फिर्यादीला मारहाण होत असल्यामुळे पांडुरंग, सखाराम व काशीबाई जोगदंड यांनी धाव घेत दरोडेखोरांना विरोध केला असता दरोडेखोरांनी त्यांच्यावरही प्राणघातक हल्ला केला. या हल्ल्यात काशीबाई या गंभीर जखमी होऊन खाली कोसळल्या व त्याच ठिकाणी त्यांचा मृत्यू झाला.

काशीबाई रक्ताच्या थारोळ्यात पडलेल्या असताना दरोडेखोरांनी त्यांच्या गळ्यातील मंगळसूत्र; तसेच घरातील रोख रक्कम असा १९ हजारांचा ऐवज हिसकावून नेला. जखमींना सोलापूरच्या रुग्णालयात दाखल करण्यात आले होते. फिर्यादीच्या तक्रारीवरून तामनवाडी पोलिस ठाण्यात सात दरोडेखोरांविरोधात गुन्हा दाखल करण्यात आला होता. प्रकरणात १८ डिसेंबर रोजी पंम्प्या दामू शिंदे (३०, रा. मानमोडी, ता. तुळजापूर), बालाजी शिवाजी काळे (३२, रा. बसंवतवाडी, ता. तुळजापूर) व टुन्या उर्फâ प्रेमचंद दामू शिंदे (३२, रा. मानमोडी, ता. तुळजापूर) या तिघांना अटक करून संघटित गुन्हेगारीमुळे त्यांच्यावर 'मोक्का'अंतर्गत गुन्हा दाखल करण्यात आला होता. आरोपी पंम्प्या, बालाजी, टुन्या यांच्यासह भाऊसाहेब मधुकर पवार (रा. वडशिवनी, ता करमाळा), प्रभू मोतीराम पवार (रा. ढोक बाभूळगाव), विलास लक्ष्मण भोसले (रा. सिदगाव, ता. तुळजापूर) व शैल्या आठल्या शिंदे (निलेगाव, ता. तुळजापूर) या सात जणांविरुद्ध मोक्काच्या विशेष कोर्टात दोषारोपपत्र दाखल करण्यात आले होते. खटल्यावेळी, विशेष सरकारी वकील अ‍ॅड. सुदेश शिरसाठ यांनी १९ साक्षीदारांचे जबाब नोंदविले. यामध्ये फिर्यादीसह पांडुरंग यांची साक्ष महत्त्वाची ठरली.

\Bविविध कलमान्वये शिक्षा

\Bदोन्ही बाजुंच्या युक्तिवादानंतर व साक्ष-पुराव्यांवरून कोर्टाने पम्प्या, बालाजी व टुन्या यांना भारतीय दंड संहितेच्या ३९६ कलमान्वे तिघांना जन्मठेप, प्रत्येक एक हजार रुपये दंड, दंड न भरल्यास १५ दिवस साधा कारावास, भारतीय दंड संहितेच्या ३९७ कलमान्वये तिघांना प्रत्येकी सात वर्षे सक्तमजुरी, प्रत्येकी एक हजार रुपये दंड, दंड न भरल्यास १५ दिवस कारावास, मोक्का कायद्याच्या ३,१ (i) कलमान्वे जन्मठेप, प्रत्येकी एक लाख रुपये दंड, दंड न भरल्यास अडीच वर्षे कारावास, मोक्का कायद्याच्या ३,१ (ii) कलमान्वये पाच वर्षे सक्तमजुरी, प्रत्येकी एक लाख रुपये दंड, दंड न भरल्यास अडीच वर्षे कारावस, मोक्का कायद्याच्या तीन कलमान्वे पाच वर्षे सक्तमजुरी, प्रत्येकी एक लाख रुपये दंड, दंड न भरल्यास अडीच वर्षे कारावास, मोक्का कायद्याच्या तीन व चार कलमान्वये तिघांना सात वर्षे सक्तमजुरी, प्रत्येकी पाच लाख रुपये दंड, दंड न भरल्यास साडेतीन वर्षे कारावासाची शिक्षा ठोठावली.

\Bचार आरोपी अजूनही फरार

\Bया गुन्ह्यात जखमी झालेला फिर्यादी जयाजी सरवदे यांना ५० हजार रुपये, तर सखाराम व पांडुरंग यांना प्रत्येकी एक-एक लाख रुपये नुकसान भरपाई देण्यात यावी, असेही कोर्टाने आदेशात नमूद केले आहे. अ‍ॅड. शिरसाठ यांना अ‍ॅड. नितीन मोने व अ‍ॅड. प्रिया देशपांडे यांनी सहकार्य केले. मात्र घटना घडल्यापासून भाऊसाहेब मधुकर पवार, प्रभू मोतीराम पवार, विलास लक्ष्मण भोसले व शैल्या आठल्या शिंदे हे चौघे दरोडेखोर अजूनही फरार आहेत.