म. टा. प्रतिनिधी, औरंगाबाद मराठवाड्याच्या विकासाचे प्रणेते पद्मविभूषण गोविंदभाई श्रॉफ यांचे तैलचित्र सरस्वती भुवन संस्थेतून हटविल्यामुळे वादंग निर्माण झाले असून, स्वातंत्र्यसैनिकांसह सामाजिक कार्यकर्त्यांनी संताप व्यक्त केला आहे. मात्र, या संतापानंतर मंगळवारी नवीन कार्यकारिणीने हे तैलचित्र पुन्हा संस्थेत लावले आहे. सरस्वती भुवन संस्थेला नावारूपाला आणण्यात गोविंदभाईंचा मोठा वाटा होता. निर्मोही, सैद्धांतिक भूमिकेचा आग्रह धरणारे तपस्वी मार्क्स व महात्मा गांधी यांच्या विचारांचा समन्वय साधणारे भाई हे शेकडो कार्यकर्त्यांची व शिक्षकांची प्रेरणा आहेत. त्यांच्यामुळे ओळखल्या जाणाऱ्या सरस्वती भुवन संस्थेत नवीन कार्यकारिणीने त्यांचे तैलचित्र काढले. त्यामुळे शहरातील ज्येष्ठ स्वातंत्र्यसैनिकांनी विद्यमान अध्यक्ष राम भोगले यांना पत्र पाठवित या घटनेबाबत संताप व्यक्त केला. 'गोविंदभाईंचे तैलचित्र कार्यालयातून काढल्याने धक्का बसला. भाईंना जाऊन १६ वर्षे झाली. त्यांच्या हयातीतच दिनकर बोरीकर, रमणभाई पारिख, ना. वि. देशपांडे या सर्वांनी मिळून भाईंची संमती घेऊन तैलचित्र लावले. संस्थेला स्थापन होऊन १०४ वर्षे झाले. त्यामध्ये अनेक अध्यक्ष होऊन गेलेले. मात्र, गोविंदभाईंनी संस्थेसाठी सामाजिक दृष्टीकोन स्वीकारला आणि मराठवाड्याच्या सर्वांगिण विकासासाठी चालवली. त्यामुळे ही संस्था मराठवाड्याच्या विकासाचे केंद्र झाले. गोविंदभाईंच्या या कार्याची दखल घेऊन त्यांची स्मृती जपण्यासाठी गोविंदभाई श्रॉफ ललित अकादमी स्थापन करण्यात आली. अशा थोर व्यक्तीचे तैलचित्र काढणे हा त्यांचा अपमान समजतो,'असा संताप व्यक्त करण्यात आला. निवेदनावर ना. वि. देशपांडे, ताराबाई, अॅड. काशिनाथ नावंदर, रामभाऊ फटांगळे यांच्या स्वाक्षऱ्या आहेत. संस्थेच्या सगळ्या अध्यक्षांचे फोटो एकाच रांगेत एकखारख्या आकारात लावण्यासाठी आम्ही हा फोटो काढला होता. त्यामुळे हा फोटो कायमस्वरूपी काढला असे नाही. अनेक अध्यक्ष होऊन गेले. त्यांचे फोटो इतरत्र ठेवण्यात आले आहेत. त्यांचेही फोटो लावणे आवश्यक आहे. - राम भोगले, अध्यक्ष, सरस्वती भुवन शिक्षण संस्था 'सभु' संस्था मराठवाड्यातील दोन कोटी जनतेचे श्रद्धास्थान आहे. गोविंदभाईची प्रतिमा काढणे हे अविवेकी, वेदनादायी कृत्य आहे. आज प्रतिमा काढली उद्या भाईंच्या स्मृतिस्थळावर हातोडा पडेल. घरातील आजी-आजोबा, आई-वडिलांचे फोटो काढायचे नसतात. त्यांना वंदन करायचे असते. - ज्ञानप्रकाश मोदाणी, सदस्य, सरस्वती भुवन शिक्षण संस्था गोविंदभाईंचे तैलचित्र हटवणे हा प्रकार धक्कादायक आहे. गोविंदभाईंच्या कार्याचा गौरव म्हणून हा फोटो यापूर्वीच्या सदस्यांनी लावला. त्यामुळे इतर अध्यक्षांच्या रांगेत त्यांनाही बसवणे ही बाब नवीन कार्यकारिणीकडून अभिप्रेत नव्हती. मात्र, त्यांनी ही कृती का केली माहिती नाही. - सुभाष लोमटे, सामाजिक कार्यकर्ते --- मटा भूमिका --- \Bअगोचरपणाच \B--- सरस्वती भुवन संस्थेच्या १०४ वर्षांच्या वाटचालीत गोविंदभाई श्रॉफ यांचा सिंहाचा वाटा आहे. ते संस्थेत सर्वाधिक काळ अध्यक्ष व सरचिटणीस होते. त्यांच्यामुळे 'सभु' नावारूपाला आली. आता निवडून आलेले नवनिर्वाचित अध्यक्ष राम भोगले यांनी गोविंदभाईंचे तैलचित्र हटविण्याचा निर्णय घेतला. हा शुद्ध अगोचरपणा आहे. त्यामुळे अनेक स्वातंत्र्यसैनिक, सामाजिक कार्यकर्ते यांच्या भावना दुखावल्या आहेत. इतर अध्यक्षांचे फोटो लावायचे होते, तर त्यासाठी गोविंदभाईचा फोटो हटविण्याची काहीएक गरज नव्हती. गोविंदभाईंचे तैलचित्र अशापद्धतीने हटविणे नक्कीच अपमानास्पद आहे.
मोबाइल अॅप डाउनलोड करा आणि राहा अपडेट
