म. टा. प्रतिनिधी, औरंगाबाद शिवसेनाप्रमुख बाळासाहेब ठाकरे यांच्या शिल्प उभारणी सोहळ्याकडे शनिवारी शिवसेनेच्या बहुसंख्य नगरसेवकांनी पाठ फिरवली. शिवसेनाप्रमुखांमुळे सुमारे तीन दशकांपासून महापालिका शिवसेनेच्या ताब्यात आहे. मात्र, असे असतानाही शिवसेनेच्याच नगरसेवकांनी कार्यक्रमाला दांडी मारल्यामुळे उलटसुलट चर्चा सुरू आहे. जालना रोडवरील महर्षी दयानंद चौकात शिवसेनाप्रमुख बाळासाहेब ठाकरे यांचे शिल्प उभारण्याचा निर्णय महापालिकेने घेतला होता. या कामाचे भूमिपूजन १७ नोव्हेंबर २०१३ रोजी करण्यात आले होते. त्यानंतर शनिवारी शिल्प उभारण्याच्या कामाचा शुभारंभ शिवसेना नेते खासदार चंद्रकांत खैरे यांच्या हस्ते करण्यात आला. या कार्यक्रमाच्या निमंत्रण पत्रिका महापालिकेने सर्व नगरसेवक, पदाधिकारी, अधिकारी व शहरातील संबंधितांना दिल्या होत्या. महापालिकेत शिवसेनेचे २९ नगरसेवक आहेत. या कार्यक्रमाला किमान शिवसेनेचे सर्व नगरसेवक उपस्थित राहतील अशी अपेक्षा व्यक्त केली जात होती, पण प्रत्यक्षात हाताच्या बोटावर मोजता येतील येवढेच शिवसेनेचे नगरसेवक कार्यक्रमाला उपस्थित होते. त्यात महापौर नंदकुमार घोडेले, स्थायी समितीचे सभापती रेणुकादास (राजू) वैद्य, सभागृहनेता विकास जैन, राजेंद्र जंजाळ, स्वाती नागरे यांचे पती किशोर नागरे, बन्सी जाधव, गजानन मनगटे, कमलाकर जगताप, सचिन खैरे, मकरंद कुलकर्णी, शिल्पाराणी वाडकर, स्मिता घोगरे, सुनीता आउलवार, नितीन साळवी, सुमित्रा हळनोर यांचा समावेश होता. त्यांच्याशिवाय शिवसेनेचे महानगरप्रमुख प्रदीप जैस्वाल, आर्य समाजाचे दयाराम बसैये, जगन्नाथ बसैये, जिल्हा परिषदेच्या अध्यक्ष अॅड. देवयानी डोणगावकर, माजी महापौर कला ओझा, शिवसेना महिला आघाडीच्या सुनीता देव, राखी परदेशी यांचीही या कार्यक्रमाला उपस्थिती होती. \Bखैरेंचे दोन तास उशिराने आगमन \Bकार्यक्रमाची वेळ सकाळी नऊ वाजेची होती. नेहमीच्या पद्धतीनुसार साडेनऊ - दहावाजेपर्यंत कार्यक्रम सुरू होईल असे मानले जात होते. मात्र, पालिकेचे पदाधिकारी व अधिकारी साडेदहाच्या सुमारास कार्यक्रम स्थळी दाखल झाले. त्यानंतर अकरा वाजता खासदार चंद्रकांत खैरे यांचे आगमन झाले. काही नागरिक मात्र साडेनऊ वाजेपासून कार्यक्रम स्थळी हजर होते.
मोबाइल अॅप डाउनलोड करा आणि राहा अपडेट