म. टा. प्रतिनिधी, औरंगाबाद

जिल्हा मध्यवर्ती सहकारी बँकेचे अध्यक्ष सुरेश पाटील यांच्या आत्महत्याप्रकरणात आरोपी सदाशिव गायके व नानासाहेब गायकवाड पाटील यांच्या नियमित जामीन अर्जावर जिल्हा व सत्र न्यायाधीश एच. एस. महाजन यांच्या कोर्टात मंगळवारी (पाच मार्च) सुनावणी पूर्ण झाली. प्रकरणात आठ मार्चपर्यंत जामीन अर्जावरील निकाल राखीव ठेवण्यात आला आहे.

सुरेश पाटील यांनी २५ फेब्रुवारी रोजी आत्महत्या केली होती. काँग्रेसचे माजी जिल्हाध्यक्ष सदाशिव गायके व नानासाहेब गायकवाड पाटील हे २० वर्षांपासून त्रास देत आहेत व त्यांच्या छळाला कंटाळून आत्महत्या करत असल्याची सुसाइड नोट सुरेश पाटील यांनी लिहून विष प्राशन करून आत्महत्या केल्याची तक्रार माजी आमदार नितीन पाटील यांनी क्रांतीचौक पोलिस ठाण्यात दिली होती. या तक्रारीवरून दोघांना अटक होऊन त्यांची रवानगी आधी पोलिस कोठडीत व नंतर न्यायालयीन कोठडीत रवानगी करण्यात आली होती. त्यानंतर दोघांनी नियमित जामिनासाठी अर्ज दाखल केला होता. या नियमित जामीन अर्जावर मंगळवारी सुनावणी झाली. या प्रसंगी सुरेश पाटील यांना गायके यांनी आत्महत्या करण्यास प्रवृत केले. गायके यांनी नानासाहेब गायकवाड यांच्या मार्फत पाटील यांच्या मोबाइलवर कॉल केला होता. त्याचे कॉल डिटेल्स (सीडीआर) तपासण्यात येत असून, त्याचा अहवाल सादर केल्याचा युक्तिवाद जिल्हा सरकारी वकील अविनाश देशपांडे यांनी कोर्टात केला. या गुन्ह्याचा तपास सध्या प्राथमिक अवस्थेत असून, सीसीटीव्हीचे चित्रिकरण तपासण्यात येत आहे. सुरेश पाटील हे २५ फेब्रुवारी रोजी सकाळी सहा वाजून ४० मिनिटे ते नऊ यादरम्यान बंगल्याबाहेर आलेच नसल्याचे अ‍ॅड. राजेंद्र देशमुख यांनी न्यायालयाच्या निदर्शनास आणून दिले. गायके हे वकील असल्यामुळे त्यांना जामीन मंजूर दिल्यास ते तपासामध्ये अडथळा निर्माण करून साक्षीदारावर दबाव आणू शकतात. त्यामुळे गायके व पाटील यांना जामीन देण्यात येऊ नये, असाही त्यांनी युक्तिवाद केला.

\Bसर्व्हर बंद, तरीही चार गुन्हे दाखल

\Bसदाशिव गायके हे सकाळी वेदांतनगर पोलिस ठाण्यात अपहरणाची तक्रार देण्यास गेले, त्यावेळी त्यांना सर्व्हरमध्ये बिघाड आहे, असे सांगून बसवून ठेवले आणि रात्री आठ वाजता गायकेंâची फिर्याद घेऊन गुन्हा दाखल केला. पोलिसांनी सर्व्हर खराब असल्याचे सांगून गायकेंना पाठविले, परंतु त्या कालवधीमध्ये चार गुन्हे दाखल केल्याचा युक्तिवाद बचाव पक्षाच्या वतीने अ‍ॅड. एस. एस. लड्डा यांनी न्यायालयात केला. न्यायालयाने दोन्ही बाजुंचा युक्तीवाद ऐकून घेत आठ मार्चपर्यंत निकाल राखीव ठेवला.

म. टा. प्रतिनिधी, औरंगाबाद

पुंडलिकनगर पोलिसांनी केलेल्या परिश्रमामुळे फसवणुकीच्या गुन्ह्यात असलेली दोन वाहने तक्रारदारांना परत मिळाली. या गुन्ह्यातील आरोपीने आत्महत्या केल्यामुळे वाहनांची माहिती पोलिसाना मिळत नव्हती. ही वाहने २८ हजार रुपये महिना भाड्याने घेऊन आरोपीने नंदूरबार येथील एका व्यक्तीला दिली होती. पोलिसांनी नंदूरबार येथील ही वाहने जप्त केली.

पुंडलिकनगर भागात जगदीश संतोष जव्हेरी (वय ३२, रा. वाण्याविहार, अक्कलकुवा, जि. नंदूरबार) याने नऊ ऑक्टोबर रोजी गळफास घेत आत्महत्या केली होती. जव्हेरी याने पुंडलिकनगर भागात एक कार्यालय उघडले होते. आरोग्य विभागात आयुक्त असल्याचे तो सांगत होता. इनोव्हावर लाल दिवा लावून कारवर त्याने 'भारत सरकार' असे लिहिले होते. आरोग्य विभागात नोकरी लावून देतो; तसेच माझ्या विभागात गाड्या भाडेतत्त्वावर लागतात, असे सांगत त्याने लोकांचा विश्वास संपादन केला होता. राहुल कोरे (रा. राजाबाजार) आणि एका महिलेला त्याने फायनान्स कंपनीकडून दोन नवीन कार खरेदी करण्यास भाग पाडले होते. २८ हजार रुपये महिना याप्रमाणे त्याने कार भाडेतत्त्वावर घेतल्या. त्यासाठी त्याने नोटरीकडे करारनामाही केला होते.

काही दिवसानंतर कर्जबाजारी झाल्यामुळे जव्हेरी याने आत्महत्या केली होती. जव्हेरी याने आत्महत्या केल्याने त्याने भाड्याने घेतलेली ही वाहने कोठे लावली, याबाबत कोणालाही काही माहिती नव्हती. ही वाहने कर्ज काढून घेतली असल्याने, त्याचे हप्ते भरायचे कसे आणि वाहने कोठे आहेत, याची माहिती मिळत नसल्याने तक्रारदार हवालदिल झाले होते. याप्रकरणी पुंडलिकनगर पोलिस ठाण्यात जव्हेरीविरुद्ध फसवणुकीचा गुन्हा देखील दाखल करण्यात आला होता.

पुंडलिकनगर पोलिस ठाण्याचा नुकताच पदभार घेतलेले सहायक पोलिस निरीक्षक घनश्याम सोनवणे यांनी या गुन्ह्याचा तपास केला. यावेळी ही दोन वाहने नंदूरबार येथील हिरालाल सोनी नावाच्या व्यक्तीकडे असल्याची माहिती मिळाली. पथकाने नंदूरबार गाठून ही दोन्ही वाहने जप्त केली. सहायक पोलिस निरीक्षक सोनवणे यांच्या मार्गदर्शनाखाली उपनिरीक्षक विकास खटके, विष्णू मुंढे, बाळाराम चौरे, रवी जाधव, शिवाजी गायकवाड, कल्पना जांबोटकर यांनी ही कामगिरी केली.

\Bअशी शोधली वाहने\B

जव्हेरी याने वाहने कोणाला दिली, याची काहीही माहिती कार मालकांना दिली नव्हती. त्याच्या मृत्यूनंतर वाहने शोधायची कशी हा प्रश्न पडला. या दोन वाहनापैकी एक वाहन एका चालकाने जव्हेरीचे मूळ गाव नंदूरबार येथे नेऊन सोडले होते. पोलिसांनी या चालकाचा शोध घेत त्याच्याकडून माहिती घेतली. चालकाने दिलेल्या माहितीने त्यांना हिरालाल सोनीपर्यंत पोचवले. सुरुवातीला सोनीने वाहने जव्हेरीला परत केल्याचे सांगितले. नंतर पोलिसांनी खाक्या दाखवताच त्याने वाहने आपल्याकडे असल्याची कबुली दिली.

म. टा. विशेष प्रतिनिधी, औरंगाबाद

महापालिकेचे शहर अभियंता सखाराम पानझडे, निवृत्त कार्यकारी अभियंता सिकंदर अली, निवृत्त उपअभियंता सदानंद खन्ना यांची विभागीय चौकशी करण्याचे आदेश मुंबई उच्च न्यायालयाच्या औरंगाबाद खंडपीठाचे न्या. एस. एस. शिंदे आणि न्या. आर. जी. अवचट यांनी दिले आहेत.

शहरातील रस्त्यांच्या विकास कामासाठी राज्य शासनाने २४ कोटी ३३ लाख रुपयांचा विशेष निधी उपलब्ध करून दिला होता. या निधीतून व्हॉइट टॉपिंगची कामे होणार होती. रस्त्यांच्या कामाचा दर्जा राखण्यासाठी विभागीय आयुक्तांच्या अध्यक्षतेखाली समिती नेमण्यात आली होती. जिल्हाधिकारी सदर समितीचे सचिव, तर पालिका आयुक्त सदस्य आहेत. रस्त्यांच्या कामासाठी निविदा काढण्यासाठी पालिका शहर अभियंत्यांनी दरपत्रक मागवले. कामासाठी तीन निविदा प्राप्त झाल्या. मात्र, त्यातील दोन निविदा तांत्रिक कारण दाखवून नाकारण्यात आल्या आणि जीएनआय इन्फ्रास्ट्रक्चर या कंपनीची निविदा मंजूर केली. हा दर अंदाजपत्रकीय दरापेक्षा आठ टक्के अधिक असतानाही कायार्रंभ आदेश देण्यात आला. यासाठी स्थायी समितीची मान्यता घेण्यात आली. विशेष म्हणजे यासाठी लागणारा एक कोटी ६७ लाख रुपयांचा अधिभार हा पालिकेच्या निधीतून देण्याचा ठराव घेण्यात आला. या चुकीच्या निविदा पद्धतीला नगरसेवक विकास ऐडके यांनी याचिकेद्वारे आव्हान दिले होते. याचिकाकर्त्यातर्फे नितीन त्रिभुवन यांच्यासाठी बी. एल. सगर-किल्लारीकर,अधिकाऱ्यांतर्फे आर. आर. मंत्री, पालिकेतर्फे संजीव देशपांडे यांनी काम पाहिले.

\Bदोन आठवड्यांत चौकशी अधिकारी नेमा

\Bशासनाने दोन आठवड्यांत चौकशी अधिकारी नेमावा, पालिकेने यासंबंधीचे दस्ताऐवज चौकशी अधिकाऱ्याला उपलब्ध करून द्यावेत, असेही निकालात स्पष्ट करण्यात आले आहे. दरम्यान, डी. ए. वानखेडे यांच्या अध्यक्षतेखालील चौकशी समितीला याचिकाकर्त्याने आक्षेप घेतला. शहर अभियंता पानझडे आणि वानखेडे यांचा दर्जा एकच आहे. यापूर्वी पालिका आयुक्तांनी प्राथमिक चौकशी केली असून, विभागीय चौकशीत दोषी अधिकाऱ्यालाही दाद मागता येते. त्यामुळे चौकशी अधिकारी हा वरिष्ठ दर्जाचा असावा, अशी विनंती करण्यात आली.

म. टा. प्रतिनिधी, औरंगाबाद

देशी दारूचे एकच दुकान दोन महिन्या दोनदा फोडणाऱ्या आरोपीला पुंडलिकनगर पोलिसांनी अटक केली आहे. सप्टेंबर आणि नोव्हेंबर २०१८ या कालावधीत हे प्रकार घडले होते. आरोपीने गुन्ह्याची कबुली दिली असून, गुन्ह्यात वापरलेली दुचाकी जप्त करण्यात आली आहे.

३० नोव्हेंबर २०१८ रोजी मुकुंदवाडी रेल्वेस्टेशन येथील जुगल कमलनारायण जैस्वाल यांचे देशी दारुचे दुकान फोडून चोरट्यानी देशी दारुचे १८ बॉक्स चोरले होते. दोन महिन्यांपूर्वी देखील चोरट्याने हेच दुकान फोडून ३२ बॉक्स लंपास केले होते. याप्रकरणी पुंडलिकनगर पोलिस ठाण्यात गुन्हा दाखल आहे.

दरम्यान, या गुन्ह्यामध्ये संशयित आरोपी विजय सोमनाथ पिंपळे (वय २२, रा. मुकुंदवाडी स्मशानभूमीजवळ) याचा हात असल्याची माहिती पुंडलिकनगर पोलिसांना मिळाली होती. या माहितीवरून गुन्हे प्रकटीकरण पथकाने सापळा रचून आरोपी विजय पिंपळेला अटक केली. आरोपी पिंपळे याने दोन साथीदारांच्या मदतीने हे दोन्ही गुन्हे केल्याची कबुली दिली. लोखंडी रॉडचा वापर करून शटर फोडून त्याने बॉक्स दुचाकीवर लंपास केले होते. हा लोखंडी रॉड; तसेच दुचाकी पोलिसांनी जप्त केली आहे. सहायक निरीक्षक घनश्याम सोनवणे, उपनिरीक्षक खटके, जमादार शेळके, चौरे, डोईफोडे, रवि जाधव, राजेश यदमळ, शिवाजी गायकवाड, जालिंदर मांटे, जांबोटकर यांनी ही कारवाई केली.

\Bआरोपीला पोलिस कोठडी\B

आरोपी विजय सोमिनाथ पिंपळे (२२, रा. मुकुंदवाडी स्मशानभूमीजवळ) याला सोमवारी अटक होऊन मंगळवारी कोर्टात हजर केले. आरोपीने त्याच्या दोन साथीदारांसह गुन्हा केल्याची कबुली दिली असून, पसार आरोपींना अटक करणे व आरोपींनी गुन्ह्यात वापरलेली दुचाकी हस्तगत करणे बाकी आहे. यापूर्वी फिर्यादीच्या दुकानात चोरी झाली असल्याने त्यादृष्टीने तपास करायचा आहे. आरोपी यापूर्वी अहमदनगर येथे राहात होता. त्यामुळे आरोपीने त्या ठिकाणी काही गुन्हे केले आहेत का, याचाही तपास करायचा असल्याने आरोपीला पोलिस कोठडी देण्याची विनंती सहाय्यक सरकारी वकील बालाजी गवळी यांनी कोर्टात केली. ही विनंती मान्य करून कोर्टाने आरोपीला गुरुवारपर्यंत पोलिस कोठडी सुनावली.

म. टा. प्रतिनिधी, औरंगाबाद

महापालिकेत मालमत्ता कर आणि पाणीपट्टीची आतापर्यंतची वसुली ९४ कोटी रुपये झाली असून कंत्राटदारांचे देणे २१२ कोटींवर पोचले आहे. दरम्यान, कंत्राटदारांनी बिलांसाठी पालिका प्रशासनाकडे तगादा लावला आहे. या पार्श्वभूमीवर आयुक्त आणि कंत्राटदारांच्या मंगळवारी झालेल्या बैठकीत थकित बिले टप्प्या टप्प्याने देण्याचा घेण्यात आला.

महापालिकेच्या कंत्राटदारांचे १५४ कोटी रुपये एक ते दीड वर्षांपासून थकले आहेत. त्यामुळे कंत्राटदार सतत पाठपुरावा करत असून त्यांनी मंगळवारी पुन्हा एकदा आयुक्त डॉ. निपुण विनायक यांना गाठून रक्कम देण्याची मागणी केली. यावेळी झालेल्या बैठकीला अतिरिक्त आयुक्त डी. पी. कुलकर्णी, लेखाधिकारी महावीर पाटणी उपस्थित होते. बैठकीची माहिती देताना आयुक्त म्हणाले, कंत्राटदारांची १५४ कोटींची बिले थकली असून ज्येष्ठता यादीनुसार मार्च अखेरपर्यंत टप्प्या टप्प्याने बिले काढण्याचा निर्णय घेण्यात आला. कंत्राटदारांना पैसे देण्याची आमची भूमिका आहे. दरम्यान, लेखा विभागातील एका अधिकाऱ्याने कंत्राटदारांच्या थकित बिलांची रक्कम २१२ कोटींवर पोचल्याचे सांगितले. १५४ कोटींची थकबाकी एक-दीड वर्षांपूर्वीची होती, त्यात भर पडली आहे.

\Bअर्थसंकल्पाचे काम सुरू \B

अर्थसंकल्प तयार करण्याबद्दलही अधिकाऱ्यांची बैठक घेतल्याची माहिती आयुक्तांनी दिली. 'अर्थसंकल्प तयार करण्याची प्रक्रिया सुरू केली असून विभागासाठीचे मूळ बजेट आणि देखभाल दुरुस्तीसाठीचे बजेट, अशा दोन भागात विभागप्रमुखांकडून माहिती मागविली आहे. थकबाकीमुळे बजेट वाढले आणि पाहिजे तेवढी वसुली झाली नसल्याने उत्पन्न आणि खर्चात तफावत निर्माण झाली आहे. पालिकेचे बजेट कामनिहाय ऐवजी ब्लॉकनिहाय असावे, अशी आपली भूमिका असून तशा सूचना विभागप्रमुखांना दिल्या आहेत,' अशी माहिती आयुक्तांनी दिली. बजेटमध्ये प्राधान्यक्रमानुसार कामे ठरली पाहिजेत, अशी भूमिका आयुक्तांनी स्पष्ट केली.

म. टा. प्रतिनिधी, औरंगाबाद

औरंगाबाद लोकसभा मतदारसंघातून 'एमआयएम' निवडणूक लढवण्याची शक्यता आहे. पक्षाच्या शहर आणि जिल्हा पदाधिकाऱ्यांच्या बैठकीत वंचित बहुजन आघाडी आणि 'एमआयएम'चा संयुक्त उमेदवार निवडून आणण्याचा संकल्प करण्यात आला. उमेदवाराच्या नावाची घोषणा प्रकाश आंबेडकर आणि खासदार ओवेसी हे येत्या एक ते दोन दिवसांत करतील, अशी शक्यता व्यक्त केली जात आहे.

खासदार असदुद्दीन ओवेसी यांनी दिलेल्या संकेतानंतर सोमवारी (चार मार्च) रात्री शहराध्यक्षआंच्या कार्यालयात ही बैठक घेण्यात आली. यावेळी आमदार सय्यद इम्तियाज जलील, डॉ. गफ्फार कादरी, जिल्हाध्यक्ष अब्दुल रहीम नाईकवाडी, अरुण बोर्डे, शहराध्यक्ष समीर साजेद बिल्डर, पालिका गट नेते नासेर सिद्दीकी, पालिका विरोधी पक्ष नेते जमीर कादरी यांच्यासह पदाधिकारी व प्रमुख कार्यकर्ते उपस्थित होते. या बैठकीत पक्षाने लोकसभा निवडणूक लढवण्याची गरज पदाधिकाऱ्यांनी व्यक्त केली. लोकसभा निवडणुकीसाठी पक्षातर्फे आमदार इम्तियाज जलील यांच्या उमेदवारीची चर्चा आहे. मात्र काही इच्छुकांनी उमेदवारी मिळवण्यासाठी प्रयत्न सुरू केले आहेत. वंचित बहुजन आघाडी व काँग्रेसच्या युतीसाठी 'एमआयएम' लोकसभा निवडणूक लढवणार नाही, अशी घोषणा खासदार ओवेसी यांनी केली होती. त्यानंतर कार्यकर्त्यांकडून नाराजी व्यक्त झाली. ही नाराजी दूर करण्यासाठी औरंगाबादची जागा लढविण्याचा निर्णय घेण्यात आल्याचे आमदार जलील यांनी सांगितले. पक्षाने लोकसभा निवडणूक नजरेसमोर ठेऊन बुथनिहाय पक्ष बांधणी केली आहे. काही भागात बुथ बांधणी राहिली, असल्याचे सांगण्यात आले.

…

\Bओवेसींचे संकेत \B

खासदार असदुद्दीन ओवेसी यांनी सोमवारी (चार मार्च) ट्विट करून किशनगंज (बिहार) व औरंगाबाद (महाराष्ट्र) या लोकसभेच्या दोन जागा लढवण्याची घोषणा केली आहे.

…

\Bवंचित बहुजन आघाडीचे काय? \B

वंचित बहुजन आघाडीने माजी न्यायमूर्ती बी. जी. कोळसे पाटील यांच्या उमेदवारीची घोषणा केल्याने 'एमआयएम'ची अडचण झाली आहे. मुंबई येथील सभेपूर्वी आघाडी व 'एमआयएम'च्या नेत्यांत चर्चा झाली. त्यानंतर 'एमआयएम'ने उमेदवारी घोषित करण्याचा निर्णय जाहीर केला आहे. कोळसे पाटलांच्या उमेदवारीबद्दल वंचित बहुजन आघाडीने अद्याप पुढील निर्णय जाहीर केलेला नाही.

म. टा. प्रतिनिधी, औरंगाबाद

म्हाडाने आपल्या घरांच्या किमती तब्बल २० ते ४७ टक्के कमी केल्याने खरेदीसाठी ग्राहकांची झुंबड उडाली आहे. शहरातील अल्प उत्पन्न गटातील आणि मध्यम उत्पन्न गटातील ९१७ सदनिकांसाठी गेल्या आठ दिवसांत ४१९२ जणांनी ऑनलाइन नोंदणी केली असून, ४५० जणांनी सदनिका घेण्यासाठी पैसेही जमा केले आहेत. २७ मार्च रोजी तापडिया नाट्य मंदिरात या सदनिकांची सोडत काढली जाणार आहे.

म्हाडाचे अध्यक्ष उदय सामंत यांच्या हस्ते बुधवारी म्हाडा कार्यालयात ऑनलाइन अर्ज नोंदणी प्रक्रियेची सुरुवात झाली. शहरात एकूण अल्प गटातील ४९९ आणि मध्यम उत्पन्न गटातील ४१८ सदनिका असे एकूण ९१७ म्हाडाची घरे रिक्त आहेत. या रिक्त सदनिका सर्वसामान्य नागरिकांना घेता याव्या यासाठी या घरांच्या किमती कमी करण्यात आलेल्या आहेत. गेल्या आठ दिवसांत शहरातील ४१९२ जणांनी म्हाडाच्या ऑनलाइन संकेतस्थळावर नोंदणी केली आहे. २१३३ जणांचे ऑनलाइन अर्ज स्वीकारण्यात आले आहेत, तर अर्ज स्वीकारल्यानंतर अल्प गटातील घरांसाठी १० हजार ३३६ रुपये आणि मध्यम गटासाठी १५ हजार ३३६ रुपयांचे शुल्क ४५० अर्जदारांनी ऑनलाइन भरले. त्यात ५१६ अर्जदार पैसे भरण्याच्या रांगेत असल्याची माहिती म्हाडा कार्यालयाकडून देण्यात आली आहे.

---

\Bअसे आहेत सध्याचे दर

---\B

योजना - सदनिकेचे क्षेत्र रिक्त सदनिका आताची किंमत

२४८ सदनिका, तिसगाव २ बीएचके, ९१५ चौ. फूट १६९ १६ लाख

२५६ सदनिका, मध्यम, वाळूज - २ बीएचके, ९१५ चौ. फूट २४९ १६ लाख

१६० सदनिका, अल्प गट, एम आयडीसी पैठण - १ बीएचके, ५९६ चौ. फूट ९५ ७ लाख

४०४ सदनिका, अल्प गट, देवळाई - १ बीएचके - ५८९ चौ. फूट ४०४ ११ लाख ते ७ लाख ५० हजार

म. टा. प्रतिनिधी, औरंगाबाद

'विमानतळावर विमान उतरताना मोठा अपघात झाला असून अनेक जखमी झाले आहेत. त्यांना मदतीची तत्काळ गरज आहे,' असा संदेश पोहोचताच या अपघातग्रस्त विमानातून जखमींना काढण्यासाठी तसेच आरोग्य सुविधा पुरविण्याकरिता 'सीआयएसएफ' आणि विमानतळ प्राधिकरणाच्या अधिकाऱ्यांसोबत अत्यावश्यक सेवेतील वाहने, कर्मचाऱ्यांनी धाव घेतली.

औरंगाबाद येथील आंतरराष्ट्रीय विमानतळावर बुधवारी (६ मार्च) 'फुल स्केल एमरजन्सी मार्क ड्रिल' घेण्यात आले. बुधवारी सकाळी ११च्या सुमारास ही रंगीत तालीम घेण्यात आली. विमानतळावर तैनात 'फायर टीम', 'सीएसआयएफ'चे पथक, 'एअर ट्रफिक कंट्रोल'चे अधिकारी, महापालिका, पोलिस, जिल्हाधिकारी कार्यालयासह इतर विभागांच्या अधिकारी आणि कर्मचाऱ्यांनी या रंगीत तालमीत सहभाग घेतला. विमान उतरताना अपघात झाल्याच्या घटनेत नियोजन कसे असावे, यासाठी ही रंगीत तालीम घेण्यात आली.

\Bउपचाराचा सराव \B

आगीवर नियंत्रण मिळवणे, विमानातून जखमींना सुरक्षितरित्या बाहेर काढणे, गंभीर दुखापत झालेल्या प्रवाशांवर प्रथमोपचार करणे याचा सराव करण्यात आला. यात सिग्मा आणि धूत हॉस्पिटलच्या डॉक्टरांनी सहभाग नोंदविला. विमानतळावरून हॉस्पिटलपर्यंत जखमींना नेण्याचा सुद्धा सराव करण्यात आला, अशी माहिती विमानतळ संचालक डी. जी. साळवे यांनी दिली.

म. टा. प्रतिनिधी, औरंगाबाद

शाळेची विभागीय चौकशी करण्याची मागणी करूनही जिल्हा परिषद शिक्षण विभागाकडे त्याकडे दुर्लक्ष करत असल्याच्या निषेधार्थ मुकीम महेबूब पटेल या सहशिक्षकाने बुधवारी (६ मार्च) सकाळी जिल्हा परिषद आवारात विष पिऊन आत्महत्या करण्याचा प्रयत्न केला. पोलिस व उपस्थितांनी त्यांना वेळीच रोखल्याने अनर्थ टळला.

पटेल यांनी जिल्हा परिषद मुख्य कार्यकारी अधिकाऱ्यांना दोन मार्च रोजी निवेदन दिले होते. त्यात म्हटले होती. यापूर्वी त्यांनी १८ फेब्रुवारी रोजी पत्रव्यवहार करून शायनिंग स्टार मराठी प्राथमिक शाळा, खडकेश्वर व आझाद अली शाह शिक्षण संस्था अंतर्गत चालणाऱ्या दोन शाळांची विभागीय चौकशी करण्याची मागणी केली होती. त्यावर आजवर काहीच कार्यवाही झाली नाही. १८ फेब्रुवारी रोजी पटेल यांनी जिल्हा परिषद आवारात या प्रश्नी आत्महत्या करण्याचे सूचित केले होते. पण शिक्षण विभागाने चौकशी समिती नेमून आठवडाभरात अहवाल देण्याचे सांगितले होते. त्यास दहा दिवस उलटूनही काहीच कार्यवाही न झाल्याने बुधवारी सकाळी आत्महत्या करणार असल्याचे पटेल यांनी या निवेदनात म्हटले होते. याबाबत विभागीय आयुक्त कार्यालय, जिल्हाधिकारी कार्यालय, पोलिस ठाणे, शिक्षण उपसंचालक कार्यालयाला प्रती दिल्या होत्या.

पटेल हे बुधवारी सकाळी साडेदहाच्या सुमारास जिल्हा परिषद आवारात आले. त्यांचे पत्र प्रशासनाला मिळाल्याने पोलिस बंदोबस्त मागविण्यात आला होता. पोलिसांना गुंगारा देत त्यांनी विष प्राशन केले. त्यानंतर एकच धावपळ उडाली. पोलिसांनी त्यांना तत्काळ घाटी रुग्णालयात उपचारासाठी दाखल केले. या प्रकरणी क्रांतीचौक पोलिस ठाण्यात गुन्हा दाखल झाला असून पोलिस उपनिरीक्षक राऊत पुढील तपास करत आहेत.

\Bसेवेतून कमी केल्याने कुटुंबाची अडचण \B

पटेल यांना संस्थाचालकाने सेवेतून कमी केल्यामुळे पटेल कुटुंबीयांची अडचण झाली. याबाबत त्यांनी जिल्हा परिषदेकडे दाद मागितली आहे. दरम्यान, उपशिक्षणाधिकारी आश्विनी लाठकर यांनी पटेल यांची भेट गेऊन त्यांच्या प्रकृतीची विचारपूस केली. पटेल यांची प्रकृती स्थिर असल्याचे डॉक्टरांनी सांगितले. शाळेची चौकशी पूर्ण झाली असून अहवाल लवकरच सादर होणार असल्याचे सूत्रांनी सांगितले.

म. टा. प्रतिनिधी, औरंगाबाद

गेल्या महिन्याभरापासून मराठवाड्यातील दुष्काळाची तीव्रता अधिक गडद होत आहे. तहानलेल्या मराठवाड्याला आता केवळ टँकर आणि विहीर अधिग्रहणाचा आधार असल्याचे चित्र वाढलेल्या टँकर तसेच विहीर अधिग्रहणाच्या आकडेवारीवरून स्पष्ट होते. गेल्या दीड महिन्यात विभागात ८६१ विहिरींचे अधिग्रहण करण्यात आले असून, यातील केवळ २६३ विहिरींचे पाणी टँकरसाठी तर तब्बल ५९८ विहिरींचे पाणी इतर पाणीपुरवठा योजनांसाठी वापरण्यात येते.

महसूल विभागाच्या २१ जानेवारी रोजीच्या अहवालामध्ये मराठवाड्यामध्ये एक हजार २२५ विहिरींचे अधिग्रहण करण्यात आले होते, यामध्ये ४९८ विहिरी टँकरसाठी, तर ७२७ विहिरी टँकरव्यतिरिक्त पाणीपुरवठ्यासाठी अधिग्रहित करण्यात आल्या होत्या, मात्र विभागतील तीव्र पाणीटंचाईमुळे विहिरींची हीच संख्या एक मार्च रोजी वाढून २०८६ झाली आहे. यातील ७६१ विहिरी टँकरसाठी, तर एक हजार ३२५ विहिरींचे अधिग्रहण टँकर व्यतिरिक्त पाणीपुरवठ्यासाठी करण्यात आले आहे.

अधिग्रहणासोबतच विभागात दररोज टँकरच्या मागणीतही वाढ झाली आहे, सर्वच जिल्ह्यात टँकर सुरू झाले असले तरी पाच जिल्ह्यांमध्ये टँकरने एक हजाराचा आकडा पार केला आहे. यातील सर्वाधिक ७५६ टँकर एकट्या औरंगाबाद जिल्ह्यातील आहेत. दुष्काळाचे चटके सोसणाऱ्या मराठवाड्यातील पाणीटंचाई दिवसेंदिवस तीव्र होत असून, विभागातील ६७९ गावे व ९८ वाड्यांमधील तब्बल २५ लाख ३९ हजार नागरिकांची तहान दीड हजार टँकरद्वारे भागविण्यात येत आहे.

\Bविभागातील अधिग्रहित विहिरी\B

जिल्हा........टँकरसाठी......टँकर व्यतिरिक्त......एकूण

औरंगाबाद......२९१...........१२२...................४१३

जालना..........२०९...........१९४....................३३३

परभणी..........०३.............७३......................७६

नांदेड...........२६.............००......................२६

बीड.............१७७...........४५०....................६२७

लातूर...........०४..............१८१...................१८५

उस्मानाबाद...४३..............३०७....................३५०

एकूण..........७६१.............१२२५.................२०८६

म. टा. प्रतिनिधी, वैजापूर

आगामी लोकसभा निवडणुकीत औरंगाबाद मतदारसंघातून शिवसेना भारतीय जनता पक्ष युतीमध्ये शिवसेनेचा चंद्रकांत यांची उमेदवारी रद्द करून दुसरा उमेदवार द्यावा, अन्यथा भाजप प्रचार करणार नाही, असा इशारा भाजपच्या पदाधिकाऱ्यांनी बुधवारी वैजापूर येथे आयोजित विजय संकल्प फेरीच्या समारोपप्रसंगी दिला. त्यामुळे भाजप शिवसेनेत पुन्हा जुंपल्याचे चित्र बघायला मिळाले.

लोकसभा निवडणुकीचे वारे वाहू लागल्याने केंद्रात पंतप्रधान नरेंद्र मोदी यांचे हात बळकट करण्यासाठी भारतीय जनता पक्षातर्फे येथील लाडगाव चौफुलीवरून येवला रस्ता, आंबेडकर चौक, संकट मोचन मंदिर, टिळक पथ, महाराणा प्रताप रोड, उपविभागिय कार्यालयामार्गे जुन्या बसस्थानकापर्यंत दुचाकी फेरी काढण्यात आली. या फेरीत भाजपचे जिल्हाध्यक्ष एकनाथ जाधव, जिल्हा उपाध्यक्ष कल्याण दांगोडे किसान मोर्चाचे जिल्हाध्यक्ष कैलास पवार, अल्पसंख्यांक आघाडीचे जिल्हाध्यक्ष नबी पटेल, जिल्हा सचिव मोहन आहेर, तालुकाध्यक्ष नारायण तुपे, ज्ञानेश्वर इंगळे, जमीर पठाण, हमीद याबा आदीनी सहभाग घेतला.

फेरी जुन्या बसस्थानकात पोचल्यावर पदाधिकाऱ्यांची भाषणे झाली. जिल्हाध्यक्ष जाधव यांनी भाजपने आणलेल्या विविध योजनांची माहिती दिली. नबी पटेल यांनी मोदी सरकारने अल्पसंख्याक मुस्लिम समाजाच्या हज यात्रेसाठी दोन लाख बांधवांचा कोटा वाढवून घेतल्याचे सांगितले. औरंगाबाद जिल्हा परिषदेत काँग्रेस व शिवसेनेची युती आहे. ही युती तोडावी, अशी मागणी भाजपच्या कार्यकर्त्यांनी केली. वैजापूर, खुलताबाद व गंगापूर येथे भाजपचे पंचायत समिती सभापती आहेत. शिवाय नगराध्यक्ष भाजपचे आहेत. त्यामुळे युती असली तरी यावेळी औरंगाबाद मतदारसंघातून भाजपला उमेदवारीची संधी द्यावी. शिवसेनेच्या खैरे यांनाच पुन्हा संधी दिल्यास भाजपचे कार्यकर्ते प्रचार करणार नाहीत. शिवसेनेने उमेदवार बदलावा, अशी मागणी किसान मोर्चाचे जिल्हाध्यक्ष कैलास पवार यांनी केली.

म. टा. प्रतिनिधी, औरंगाबाद

महापालिकेने सफारी पार्कसाठी दिल्ली येथील ब्रिजराज शर्मा यांची 'पीएमसी' म्हणून नियुक्ती केली असून त्यांनी बुधवारी (६ मार्च) या जागेची पाहणी केली. पालिकेतर्फे मिटमिटा येथे सफारी पार्क विकसित केले जाणार आहे. येथील पिंजऱ्यांची रचना, पिंजऱ्यात कोणते प्राणी ठेवावेत यासाठी गुरुवारी पुन्हा जागेचे सर्वेक्षण केले जाणार आहे.

पालिकेच्या सिद्धार्थ उद्यानातील प्राणिसंग्रहालय सफारी पार्कमध्ये स्थलांतरित केले जाणार आहेत. यासाठी शासनाने मिटमिटा येथे शंभर एकर जागा दिली आहे. ती ताब्यात मिळून एक वर्षापेक्षा जास्त काळ लोटला तरी तेथे कोणतेही काम करण्यात आलेले नाही. दरम्यान, केंद्रीय प्राणिसंग्रहालय प्राधिकरणाने सिद्धार्थ उद्यानातील प्राणिसंग्रहालयाची मान्यता रद्द केली. त्यावर पालिकेने केलेल्या अपिलावरील सुनावणीत काही अटींच्या आधीन राहून प्राणिसंग्रहालयाला एक वर्षाची मुदतवाढ देण्यात आली आहे. त्यात सिद्धार्थ उद्यानातील प्राणिसंग्रहालय सफारी पार्क येथे स्थलांतरित करण्यासाठी युद्धपातळीवर काम करण्याची अट प्राधिकरणातर्फे घातलीआहे.

ब्रिजराज शर्मा हे बुधवारी शहरात दाखल झाले, त्यांनी जागेची पाहणी केली. त्यांच्यासोबत पालिकेचे कार्यकारी अभियंता शेख खमर, दक्षता कक्षाचे प्रमुख एम. बी. काजी, प्राणिसंग्रहालय संचालक विजय पाटील, कार्यालय अधीक्षक संजय नंदन हे होते. शर्मा यांनी संपूर्ण शंभर एकरचा परिसर फिरून पाहिला, अशी माहिती पाटील यांनी दिली. कोणते प्राणी कोठे असावेत, त्यांच्यासाठी पिंजऱ्यांची रचना कशी असावी, या बद्दल त्यांनी अधिकाऱ्यांसोबत प्राथमिक चर्चा केली. ते गुरुवारीही सर्वेक्षण करणार आहेत.

म. टा. प्रतिनिधी, औरंगाबाद

सिडको एमआयडीसी पोलिस ठाणे हद्दीतील कुख्यात गुन्हेगार नितीन रघुनाथ हिवराळे (वय २४, रा. शहानगर, मसनतपूर) याला 'एमपीडीए' कायदाखाली एका वर्षासाठी स्थानबद्ध करण्यात आले. पोलिस आयुक्त चिरंजीवप्रसाद यांनी बुधवारी हे आदेश जारी केले. हिवराळे याची हर्सूल कारागृहात रवानगी करण्यात आली आहे.

नितीन हिवराळे याच्यावर सिडको एमआयडीसी पोलिस ठाण्यात अपहरण, जबरी चोरी, बलात्कार, प्राणघातक शस्त्र बाळगणे. दहशत पसरवणे आदी गंभीर स्वरुपाचे गुन्हे दाखल आहेत. त्याच्यावर यापूर्वी २०१७मध्ये हद्दपारीची कारवाई करण्यात आली होती. त्याच्यावर वारंवार प्रतिबंधात्मक कारवाया केल्यानंतरही नितीनच्या गुन्हेगारी कारवायामध्ये फरक पडत नव्हता. यामुळे नितीन हिवराळे याच्याविरुद्ध् झोपडपट्टी दादा कायद्यानुसार स्थानबद्धतेची कारवाई करण्यात आली. पोलिस उपायुक्त डॉ. दीपाली धाटे घाडगे, सहायक आयुक्त डॉ. नाथनाथ कोडे यांच्या मार्गदर्शनाखाली पोलिस निरीक्षक मधुकर सावंत, सुरेंद्र माळाले, सहायनक निरीक्षक अजबसिंह जारवाल, जमादार द्वारकादास भांगे, नाना हिवाळे आणि अजय आवले यांनी ही कारवाई केली.

म. टा. प्रतिनिधी, औरंगाबाद

सिडको भागातील ४०० मिलीमीटर व्यासाची जलवाहिनी बुधवारी (६ मार्च) दुपारी दीडच्या सुमारास फुटल्यामुळे सिडको-हडको भागातील पाणी पुरवठा विस्कळीत झाला आहे. पालिकेने या भागाचे पाणी पुरवठ्याचे वेळापत्रक एक दिवसांने पुढे ढकलल्याचे पालिकेने कळवले आहे.

सिडको-हडकोतील नागरिक व नगरसेवक पाण्याच्या समस्येने नेहमीच त्रस्त आहेत. नुकत्याच झालेल्या स्थायी समितीच्या बैठकीत सिडकोतील पाणी पुरवठ्यावर चर्चा झाली होती. त्यानंतर बुधवारी एन ५ जलकुंभापासून एन ७ जलकुंभाला पंपिंगद्वारे पाणी पुरवठा करणारी ४०० मिलीमीटर व्यासाची जलवाहिनी फुटली. हे लक्षात येताच दुरुस्तीचे काम साडेचार वाजता पूर्ण करण्यात आले. दरम्यान, एन ७ येथील जलकुंभावरून केला जाणारा पाणी पुरवठा बंद पडला. दुरुस्तीनंतर तो सुरू करण्यात आला. जलवाहिनी फुटल्याने पाणी पुरवठा खंडित झालेल्या भागाला पाणी पुरवठा करण्यात येत आहे. याच भागाला गुरुवारी देखील पाणी पुरवठा केला जाणार आहे.

म. टा. प्रतिनिधी, फुलंब्री

वाहेगाव (ता. फुलंब्री) येथील एका शेतकऱ्याच्या शेतातील पाण्याने भरून ठेवलेल्या शेततळ्यात अज्ञात व्यक्तीने सोमवारी (चार मार्च) रात्री विषारी औषध टाकले. दुसऱ्या दिवशी शेतकरी शेततळ्यावर गेला असता त्याला पाण्याचा रंग बदललेला दिसल्याने रात्री कुणीतरी विषारी औषध टाकल्याची घटना उघडकीस आली आहे. याबाबत संबंधित शेतकऱ्याने वडोद बाजार पोलिस ठाण्यात अज्ञात व्यक्तीच्या विरोधात तक्रार केली आहे.

याबाबत अधिक माहिती अशी की, तालुक्यातील वाहेगाव येथील शेतकरी देविदास पांडुरंग श्रीखंडे यांच्या पत्नीच्या नावे असलेली शेतात (गट क्रमांत ११४) १०० × १०० फुटांचे शेततळे २०१८मध्ये चार लाख रुपये खर्च करून खोदले आहे. मागील पावसाळ्यात शेततळे भरून ठेवले आहे. सध्या परिसरात दुष्काळी परिस्थिती आहे. येथील विहिरी कोरड्या पडू लागल्या आहे. त्यामुळे पुढील काळात याच शेततळ्यातील पाणी पिण्यासाठी, जनावरांसाठी आणि शेतातील पिकांना उन्हाळ्यात देण्यासाठी साठवणूक करून ठेवलेले आहे. चार मार्च रोजी रात्री अज्ञात व्यक्तीने शेततळ्यात विषारी औषध टाकले. दुसऱ्या दिवशी श्रीखंडे शेतावर आले. त्यांनी शेततळ्याची पाहणी केली असता त्यांना शेततळ्यातील पाण्याचा रंग नेहमी प्रमाणे दिसला नाही. विषारी औषधाचा तवंग पाण्यावर तरंगलेला दिसून आला. शिवाय निळसर पिवळ्या रंगाचे झालेले दिसले. विषारी औषध पाण्यात टाकल्याने पाणी दूषित झाले आहे. हे पाणी जनावरांना पाजले असते किंवा कोणी प्यायसे असते तर, मोठी दुर्घटना झाली असती. त्यामुळे शेतकरी देविदास श्रीखंडे यांनी बुधवारी (पाच मार्च) वडोद बाजार पोलिस ठाण्यात तक्रार दिली.

म. टा. प्रतिनिधी, औरंगाबाद

शहरातील १५ वर्षांच्या मुलीला रस्त्यात अडवून लग्न कर, असे म्हणत तिच्यासह तिच्या भावांना जिवे मारण्याची धमकी देणारा मोहसीन खान युसूफ खान याला तीन वर्षे सक्तमजुरी, एक हजार रुपये दंडाची शिक्षा जिल्हा व सत्र न्यायाधीश एच. एस. महाजन यांनी बुधवारी (सहा मार्च) ठोठावली. त्याचवेळी भावाशी लग्न कर म्हणत पीडित मुलीला धमकावणारी आरोपीची बहीण व आरोपी सलमा बेगम युसूफ खान हिला एक वर्षाच्या चांगल्या वर्तवणुकीच्या हमीवर मुक्त करण्याचे आदेशही कोर्टाने दिले.

या प्रकरणी दहावीत शिकणाऱ्या अल्पवयीन मुलीने फिर्याद दिली होती. फिर्यादीनुसार, सात ऑक्टोबर २०१५ रोजी सायंकाळी सहा वाजता संबंधित मुलगी ही शिकवणीसाठी रोशनगेटकडे जात होती. त्यावेळी आरोपी मोहसीन खान युसूफ खान (२३) व त्याची आरोपी बहीण सलमा बेगम युसूफ खान (२९, दोघे रा. किराडपुरा) या दोघांनी मुलीला अडवून जबरदस्ती सय्यद फंक्शन हॉलजवळ नेऊन शिविगाळ केली; तसेच 'भावाशी संबंध ठेव, मोबाइलवर बोल, त्याच्याशी लग्न कर, अन्यथा तुझे लग्न होऊ देणार नाही,' अशी धमकी आरोपी सलमा बेगम हिने दिली. आरोपी मोहसीन खान याने मुलीशी लगट करून तिच्यावर अतिप्रसंग करण्याचा प्रयत्न केला. 'तू माझ्याशी लग्न केले नाहीस तर, तुला जीवंत सोडणार नाही, तुझ्या तिन्ही भावांना जिवे मारेन,' अशी धमकीही दिली. प्रकरणात जिन्सी पोलिस ठाण्यात दोन्ही गुन्हा दाखल करण्यात आला होता. खटल्यावेळी, अतिरिक्त जिल्हा सरकारी वकील सतीश मुंडवाडकर यांनी सहा साक्षीदारांचे जबाब नोंदविले. त्यात पीडित मुलगी व तिच्या वडिलांची साक्ष महत्त्वाची ठरली.

\Bविविध कलमांन्वये शिक्षा

\Bदोन्ही बाजुंच्या युक्तिवादानंतर व साक्ष-पुराव्यांवरुन न्यायालयाने दोन्ही आरोपींना भारतीय दंड संहितेच्या ५०४ कलमान्वये दोषी ठरवत आरोपी मोहसीन खान याला एक वर्ष सक्तमजुरीची शिक्षा ठोठाविली, तर आरोपी सलमा बेगम हिची एक वर्षाच्या चांगल्या वर्तवणुकीच्या हमीवर मुक्तता करण्याचे आदेश दिले. 'पोक्सो'च्या ७ व ८ कलमान्वये आरोपी मोहसीन खान याला तीन वर्षे सक्तमजुरी व ५०० रुपये दंड व दंड न भरल्यास आणखी तीन महिने सक्तमजुरी, त्याचवेळी ११ व १२ कलमान्वये एक वर्ष सक्तमजुरी व ५०० रुपये दंड व दंड न भरल्यास आणखी तीन महिने सक्तमजुरीची शिक्षा ठोठाविली.

म. टा. प्रतिनिधी, औरंगाबाद

राज्यात दुष्काळी परिस्थितीमुळे पशुधनासाठी आवश्यक असणारा चारा व पाणी उपलब्धतेसंबंधी गंभीर प्रश्न निर्माण होण्याची शक्यता असल्याने शासनाने गावोगावी चारा छावण्या उघडण्याचा मार्ग खुला करून दिला होता. त्यानुसार मराठवाड्यातील बीड जिल्ह्यात ११० आणि उस्मानाबाद जिल्ह्यात २० चारा छावण्या लवकरच सुरू करण्यात येणार आहेत, छावण्यांसंदर्भात पालकमंत्र्यांनीही मंजुरी दिल्याचे सूत्रांनी सांगितले.

दोन महिन्यांपूर्वी शासनाने दुष्काळग्रस्त तालुक्यांमध्ये मंडळस्तरावर चारा छावण्या सुरू करण्याचा निर्णय घेतला होता. यामध्ये प्रती छावणी ३०० ते ५०० जनावरांना ठेवण्याची मुभा देण्यात आली होती, मात्र या कालावधीत प्रशासनाकडे गंभीर दुष्काळ असलेल्या तालुक्यांमधुनही चारा छावण्यांसाठी फारशी मागणी आली नाही. यानंतर शासनाने गावोगावी चारा छावण्या सुरू करण्याचा निर्णय घेतला होता. आता दुष्काळाचे चटके अधिक तीव्र होत असल्यामुळे बीड आणि उस्मानाबाद जिल्ह्यात लवकरच चारा छावण्या उघडण्यात येणार आहेत. मराठवाड्यात नेमक्या किती चारा छावण्या सुरू कराव्या लागतील; तसेच मराठवाड्यात मुबलक चारा उपलब्ध असल्याची आकडेवारी प्रशासनाकडे तयार आहे. जिल्ह्यामध्ये नेमक्या कोणत्या भागात किती चारा छावण्या सुरू करण्याची गरज आहे, याबाबत निर्णय जिल्हाधिकाऱ्यांना घ्यावा लागणारा होता. यासाठी जिल्ह्यातील मोठ्या व लहान पशुधन संख्येस अनुसरून, पशुधनासाठी वेगवेगळ्या नियमित योजनांमधून उपलब्ध असलेला चारा; तसेच अतिरिक्त चारा उपलब्ध होण्यासाठी राष्ट्रीय कृषी विकास योजनेंतर्गत अतिरिक्त वैरण विकास कार्यक्रम, गाळपेर योजना कार्यक्रमामधून उपलब्ध होणारा चारा याबाबतचा आढावा जिल्हाधिकाऱ्यांना घ्यावा लागणार आहे. चारा छावण्या सुरू करण्यासाठी शासनाकडून घालून दिलेले नियम नवीन कायम राहणार आहेत. यानुसार एका छावणीमध्ये किमान ३०० ते ५०० जणावरे दाखल करता येणार आहेत. बीड आणि उस्मानाबाद जिल्ह्यात चारा छावण्यांना मंजुरी मिळाली असून येत्या काही दिवसांमध्ये मराठवाड्यातील इतर जिल्ह्यांमध्येही चारा छावण्या उघडण्याची शक्यता आहे.

\Bमराठवाड्यातील पशुधन\B

मराठवाड्यात लहान मोठी अशी एकूण ६७ लाख जनावरांची संख्या असून, यामध्ये ३६ लाख २५ हजार ४९० मोठी जनावरे, ११ लाख ३६ हजार लहान जनावरे आहेत. विभागात शेळ्या, मेढ्याची संख्या १९ लाख ४५ हजार ७२८ आहे. मराठवाड्यात जनावरांच्या संख्येच्या तुलनेत दररोज २६ हजार ३३० टन चाऱ्याची आवश्यकता आहे.

म. टा. प्रतिनिधी, औरंगाबाद

भाजप प्रदेशाध्यक्ष रावसाहेब दानवे यांनी जालना जिल्ह्यातील एका कार्यक्रमात लोकसभा निवडणुकीत पैसे वाटपासंदर्भात तसेच लोकशाही व्यवस्थेविषयी आक्षेपार्ह विधान केले होते. हे विधान कायदाविरोधी असल्याने दानवे यांना निवडणुकीसाठी अपात्र घोषित करावे, अशी मागणी करत प्रहार जनशक्ती पक्षाने बुधवारी जिल्हाधिकारी कार्यालयासमोर निदर्शने केली. जिल्हाधिकाऱ्यांमार्फत मुख्य निवडणूक आयोगाला निवेदन देण्यात आले. निवेदनावर प्रदीप त्रिभुवन, आकाश जाधव, सतीश हिवराळे, राजू प्रधान, शिवप्रकाश पगार, अजय घुसळे, राज चौथमल, रवी लिंगायत, ज्योती जाधव यांच्या स्वाक्षऱ्या आहेत.

म. टा. प्रतिनिधी, औरंगाबाद

लग्नानंतर दुसऱ्याच दिवशी वराने रेल्वेसमोर उडी मारून आत्महत्या केल्याचा खळबळजनक प्रकार बुधवारी सकाळी मुकुंदवाडी परिसरात उघडकीस आला. जीवन सोनाजी भोसले (वय ३०, रा. ब्रिजवाडी) असे मृत तरुणाचे नाव आहे.

जीवनचे एमएसडब्ल्यू झाले होते. सामाजिक कार्यकर्ता म्हणून त्याची ओळख होती. मंगळवारी कचनेर (ता. पैठण) येथे त्याचा विवाह सोहळा उत्साहात पार पडला. रात्री साडेनऊ वाजता भोसले कुटुंब नववधूसह घरी परतले. पहाटे सहा वाजता जीवन झोपेतून उठला. यानंतर दुचाकी घेऊन तो घराबाहेर पडला. त्याचा मोबाइल देखील त्याने घरीच ठेवला होता. बराच वेळ झाल्यानंतरही जीवन घरी परतला नाही. लग्नानंतरचे इतर विधी पार पाडण्यासाठी कुटुंब त्याची वाट पाहत होते. जीवनचा शोध सुरू असताना काही जणांनी तो मुकुंदवाडी स्टेशनकडे गेल्याची माहिती दिली. तेव्हा त्याने दुचाकी मुकुंदवाडी रेल्वे स्टेशनजवळ लावून धावत्या रेल्वेसमोर उडी घेतल्याचे उघड झाले. दुपारी घाटीत पार्थिवाचे शवविच्छेदन केल्यानंतर ते नातेवाईकांच्या स्वाधीन करण्यात आले. या प्रकरणी मुकुंदवाडी पोलिस ठाण्यात अकस्मात मृत्यूची नोंद करण्यात आली आहे.