म. टा. प्रतिनिधी, औरंगाबाद

बीड बायपास रोडवर आठवड्यात दोघांचा अपघाती मृत्यू झाला. गेल्या काही वर्षांपासून हा मार्ग मृत्यूचा सापळा ठरला आहे. महानुभाव चौक ते देवळाई चौक पाच किलोमीटरच्‍या अंतरात गेल्या पंधरा वर्षात तब्बल शंभर लोकांचे बळी गेले असून, दीड वर्षात ७१ अपघातांत २२ जणांचा जीव गमावावा लागला आहे. मात्र, अजूनही पोलिस विभागाला या मार्गावरील बेशिस्त वाहतूक सुरळीत करण्यात यश आले नाही.

शहरातील वाहतुकीला पर्याय म्हणून बीड बायपास रोडची सुविधा वाहनधारकांसाठी उपलब्ध आहे. मात्र, या मार्गावरून जड वाहतूक देखील मोठ्या प्रमाणावर होते. गेल्या काही वर्षांपासून या रोडवर वाहतूक करणे दुचाकीस्वारांसाठी जीवघेणे ठरत आहे. बायपासच्या दोन्ही बाजूला गेल्या मोठ्या प्रमाणात नागरी वसाहती उभारल्या गेल्या. या भागात व्यापारी प्रतिष्ठाने, मंगल कार्यालय, लॉन, हॉटेल, शैक्षणिक संस्था देखील वाढल्या. यामुळे या भागात वाहतुकीची वर्दळ मोठया प्रमाणात होते. त्यामुळे बेशिस्त वाहतूक, अपघात आणि त्यात मृत्यू पडण्याऱ्यांची संख्याही वाढली. या पाच किलोमीटरच्या पट्ट्यात अपघाताची काही ठिकाणे धोकादायक ठरत आहेत. यामध्ये एमआयटी चौकात ११ जणांना जीव गमवावा लागला. त्याखालोखाल देवळाई चौकात आठ, तर रेणुका माता कमानीसमोर आतापर्यंत चार जणांचे प्राण गेले.

…बायपासच्या अलीकडे शहराचा जुना भाग तर पलीकडच्या बाजूला सातारा परिसर व नवीन वसाहती आहेत. सातारा परिसरातील नागरिकांना शहरात यायचे असल्यास बीड बायपासवरून येण्याशिवाय पर्याय नाही. त्यामुळे या रोडवरील वाहतूक मोठ्या प्रमाणावर वाढली असून दैनंदिन वाहतूक करणाऱ्यामध्ये कामगार, विदयार्थी, नोकरदार वर्ग आदींचा समावेश आहे. महत्वाची बाब म्हणजे यामध्ये दुचाकीस्वारांची संख्या लक्षणीय आहे.

…

\Bराँगसाइड वाहतूक; पोलिसांचे दुर्लक्ष

\Bबीड बायपास रोडवर आणखी एक बाब म्हणजे राँगसाइड होणारी वाहतूक. तत्कालीन पोलिस आयुक्त अमितेशकुमार यांनी बायपास रोडवर अनेक ठिकाणी दुभाजकामध्ये असलेले वळण रस्ते बंद केले होते. सुरक्षित वाहतुकीच्या दृष्टीने याचे नियोजन करण्यात आले होते. मात्र, दुचाकीस्वार लांबचा वळसा टाळण्यासाठी अनेक वेळा राँगसाइड वाहतूक करताना दिसून येतात. यामुळे देखील अपघाताचा धोका वाढला आहे. विशेषत: या मार्गावर पोलिसांचे नियोजन पूर्णत: बारगळले आहे. संग्रामनगर उड्डाणपूल चौकात सिग्नलची व्यवस्था योग्य नाही. तसेच जड आणि भरधाव वाहतुकीवर कुणाचेही नियंत्रण नाही. त्यामुळे अपघातांची संख्या वाढली आहे.

…

बीड बायपास सहा पदरी होणार ही घोषणा अनेक महिन्यापासून एकतो आहे. प्रत्यक्षात हे काम कधी होणार हा प्रश्न आहे. अवजड वाहनांची वाहतूक अजूनही सर्रास सुरू आहे. बायपासवर अपघाताची मालिका थांबवण्यासाठी ठोस प्रयत्न करणे गरजेचे आहे. अवजड वाहनांच्या गतीवर यासाठी मर्यादा आणायला हवी.

- प्रवीण मोहिते, नागरिक

…

बायपासवर लग्नसराईच्या काळात वाहतूक कोंडीचा मोठा फटका या भागातील नागरिकांना सहन करावा लागतो. या रोडवर अनेक लॉन्स, मंगल कार्यालय आहेत. रस्त्यावरच लग्नाला येणाऱ्या वाहनांची पार्किंग करण्यात येते. यामुळे रस्त्यावरील वाहनांना जाण्यासाठी जागा उरत नाही. पोलिसांनी या बाबीकडे लक्ष द्यावे.

- अमोल रगडे, नागरिक

…

---

चौकट

---

वर्ष मृतांची संख्या

---

२००३ १

२००४ ५

२००५ ३

२००६ ५

२००७ ५

२००८ ७

२००९ ४

२०१० २

२०११ ५

२०१२ ६

२०१३ १०

२०१४ ६

२०१५ ६

२०१६ ८

२०१७ १६

२०१८ ९

…

म. टा. प्रतिनिधी, औरंगाबाद

नव्वद टक्के रुग्णांना काचबिंदुची कोणतीच लक्षणे नसतात आणि काचबिंदू लक्षात येईपर्यंत ४० टक्के किंवा त्यापेक्षा जास्त दृष्टी गेलेली असते. महत्वाचे म्हणजे काचबिंदुने गेलेली दृष्टी परत आणता येत नाही. त्यामुळेच पस्तीशी-चाळीशीनंतर वर्षातून एकदा तरी काचबिंदुची तपासणी करुन घ्या, डोळ्यांचे प्रेशर तपासा, असा सल्ला नेत्ररोगतज्ज्ञांनी काचबिंदू जनगागृती सप्ताहानिमित्त केले. याच जनजागृती सप्ताहानिमित्त रविवारी (१० मार्च) क्रांतीचौकातून भानुदास चव्हाण सभागृहापर्यंत जनजागृती फेरी काढण्यात आली व त्यानंतर जनसामान्यांना काचबिंदुविषयी मार्गदर्शन केले.

महापौर नंदकुमार घोडेले, शासकीय वैद्यकीय महाविद्यालय व रुग्णालयाच्या नेत्ररोग विभागाच्या प्रमुख डॉ. वर्षा नांदेडकर, सहयोगी प्राध्यापक डॉ. वैशाली उने, नेत्ररोग संघटनेचे सचिव डॉ. आनंद पिंपरकर, सायन्टिफिक कमिटी चेअरमन डॉ. जगदिश लोया, कोषाध्यक्ष डॉ. केदार नेमिवंत आदींच्या उपस्थितीत रॅलीचे उद्घाटन झाले. त्यानंतर ही पायी रॅली क्रांतीचौकातून भानुदास चव्हाण सभागृहापर्यंत काढण्यात आली. त्यानंतर काचबिंदुविषयी जनसामान्यांना विविध स्लाईडसच्या सहाय्याने मार्गदर्शन करण्यात आले. काचबिंदुमुळे गेलेली दृष्टी परत येत नसल्याने चाळीशीनंतर डोळ्यांची तपासणी करुन घ्यावी. आजाराचे निदान झाले असेल तर नेत्ररोगतज्ज्ञांच्या सल्ल्यानुसार 'आय ड्रॉप्स'सह नियमित औषधोपचार घ्यावा. या आजारात 'फॉलोअप'ही तितकाच महत्वाचा असतो, असेही डॉ. नांदेडकर, डॉ. उने, डॉ. लोया यांच्यासह डॉ. संतोष अग्रवाल, डॉ. अजित हजारी आदींनी सांगितले. या प्रसंगी नागरिकांच्या विविश शंकांचे निरसनही करण्यात आले. या कार्यक्रमाचे सूत्रसंचान डॉ. पिंपरकर यांनी केले.

म. टा. प्रतिनिधी, औरंगाबाद

क्रांतीचौक वॉर्डातील शंभुमहादेवनगर येथील महापालिकेच्या मालकीच्या खुल्या जागेभोवती संरक्षक भिंत बांधण्याच्या व या ठिकाणी जॉगिंग ट्रॅक तयार करण्याच्या कामाचा शुभारंभ आमदार संजय शिरसाट यांच्या हस्ते करण्यात आला. यावेळी महापालिकेच्या स्थायी समितीचे सदस्य सिद्धांत शिरसाट, क्रांतीचौक वॉर्डच्या नगरसेविका शिल्पाराणी वाडकर यांची विशेष उपस्थिती होती.

आमदार स्थानिक विकास निधीतून हे काम करण्यात येत आहे. यावेळी उदय जैस्वाल, पंकज वाडकर, राजू राजपुत, राजेंद्र पाटील बागडे, एस. व्ही. पोहनेकर, बी. जी. पाटील, जयराज पाथ्रीकर, अॅड शिरसाठ, रवी पाटील, डॉ. उदय वारे, सुनील काथार, गणेश पिंप्रीकर, मंदार देसाई, राज जैस्वाल, आकाश गायकवाड, दादाराव खरात, संदीप पोहनेकर, प्रशांत लकडे, विनोद तंगे, अजित चव्हाण, स्वप्नील बागडे, जिजाबाई देसाई पाटील, सुमेधा पाटील, रमाबाई पाटील, हिराबाई पाटील, सुनंदा पितळे व नागरिकांची मोठी उपस्थिती होती.

म. टा. प्रतिनिधी,औरंगाबाद

अपघातासाठी कुख्यात ठरलेल्या बीड बायपासवर रविवारी ट्रकने दिलेल्या धडकेत दुचाकीवरील महिला जागीच ठार झाली, तर महिलेचे पती किरकोळ जखमी झाले. वत्सला मच्छिंद्र काळे (वय ५०, ह. मु. नाईकनगर, देवळाई परिसर, मूळ रा. ताडपिंपळगाव ता. कन्नड) असे मृत महिलेचे नाव आहे. याप्रकरणी सातारा पोलिस ठाण्यात नोंद करण्यात आली आहे.

काळे आपल्या पत्नीसह रविवारी दुपारी दुचाकीवर बीड बायपासमार्गे ताडपिंपळगावी जात होते. सूर्या लॉन्सजवळ लग्न असल्याने या ठिकाणी रस्त्यावर गर्दी होती. त्यातून मार्ग काढत असताना पाठीमागून बीडकडून आलेल्या एका ट्रकने काळे यांच्या दुचाकीला धडक दिली. यामध्ये वत्सलाबाई ट्रकखाली आल्याने त्यांच्या पोटावरून चाक गेल्याने त्यांचा जागीच मृत्यू झाला. तर काळे किरकोळ जखमी झाले. अपघातानंतर लग्नातील वऱ्हाडी मंडळी तसेच इतरांनी धाव घेत ट्रकचालकाला पकडले. सातारा पोलिस ठाण्याचे जमादार मरकड, शेख यांनी घटनास्थळी धाव घेतली. जखमींना घाटी रुग्णालयामध्ये हलवण्यात आले. तेव्हा डॉक्टरांनी तपासून वत्सलाबाई यांना मृत घोषित केले. या प्रकरणी पोलिस ठाण्यात ट्रकचालकाविरुद्ध गुन्हा दाखल करण्याची प्रक्रिया रात्री उशिरापर्यंत सुरू होती.

…

\Bकधी थांबणार सत्र?

\Bगेल्या दोन दिवसांत बीड बायपासवर अपघातात महिलेचा हा दुसरा बळी गेला आहे. शुक्रवारी झालेल्या अपघातात स्नेहल बावळे या महिलेचा मृत्यू झाला होता, तर त्यांचे पती मनोज बावळे जखमी झाले होते. रविवारी पुन्हा या अपघाताची पुनरावृत्ती झाली. यावेळी ट्रक दुचाकीच्या अपघातात वत्सलाबाई यांचा बळी गेला. बायपासवरील अपघाताचे सत्र कधी थांबणार, असा सवाल नागरिक करत आहेत.

म. टा. प्रतिनिधी, औरंगाबाद

जिल्ह्यात चार लाखांपेक्षा जास्त बालकांना रविवारी (दहा मार्च) पल्स पोलिओ डोस पाजण्यात आला. या मोहिमेत शहरात कुठलाही अनुचित प्रकार झाला नसल्याचे महापालिकेच्या आरोग्य वैद्यकीय अधिकारी डॉ. नीता पाडळकर यांनी सांगितले.

महापौर नंदकुमार घोडेले, नगरसेवक मकरंद कुलकर्णी, डॉ. नीता पाडळकर, डॉ. मेघा जोगदंड, डॉ. उज्ज्वला भामरे आदींच्या उपस्थितीत सिडको एन आठ परिसरातील महापालिकेच्या रुग्णालयात पल्स पोलिओ मोहिमेचे उद्घाटन झाले. जिल्ह्यातील औरंगाबाद, पैठण, गंगापूर, वैजापूर, खुलताबाद, कन्नड, सोयगाव, सिल्लोड, फुलंब्री या तालुक्यांमध्ये दोन लाख ५४ हजार ७१३, महापालिका कार्यक्षेत्रातील ६३१ बूथमध्ये सुमारे एक लाख २५ हजार तर, छावणी परिसरात आठ ठिकाणी दोन हजार ३२९ बालकांना पल्स पोलिओ डोस पाजण्यात आला. जिल्ह्यामध्ये सरासरी ९१ टक्के बालकांना पोलिस डोस पाजण्यात आल्याचे स्पष्ट झाले आहे.

म. टा. प्रतिनिधी, औरंगाबाद

आरोग्याची काळजी घ्या. प्रत्येकाने आपला रक्तदाब व मधुमेह नियंत्रित ठेवावा. डॉक्टरांच्या सल्ल्याशिवाय गोळी बंद करू नका. टेन्शनमुक्त जगा, असा सल्ला शासकीय वैद्यकीय महाविद्यालयाच्या वार्धक्यशास्त्र विभागप्रमुख डॉ. मंगला बोरकर यांनी दिला.

सदाचार संवर्धक ज्येष्ठ नागरिक संस्थेच्या वतीने जागतिक महिला दिनानिमित्त व्याख्यानाचे आयोजन करण्यात आले होते. याप्रसंगी डॉ. बोरकर बोलत होत्या. कार्यक्रमाच्या अध्यक्षस्थानी अशोक भालगावकर होते. यावेळी त्या म्हणाल्या, रोज सकाळी नियमितपणे प्रसन्न वातावरणात चाला म्हणजे जीवन आनंदी व टेन्शनमुक्त जगता येईल. चालताना शरीराचा थरकाप होत असेल, तर काठीचा आधार घ्या, लाजू नका. सर्व ज्येष्ठांनी खूप संसार केला. आता मुलांच्या संसारात ढवळाढवळ करू नका, त्यांचा संसार त्यांना व्यवस्थित करू द्या, सर्वांनी संगीत, नाटक या गोष्टींमध्ये वेळ घालवावा. प्रत्येकाने आहाराबाबत समतोल ठेवावा तसेच स्मृतीभ्रंषाबाबतही डॉ. बोरकर यांनी मार्गदर्शन केले. शेवटी ज्येष्ठांना आरोग्याविषयी विचारलेलय प्रश्नांना त्यांनी उत्तरे दिली. कार्यक्रमाचे सूत्रसंचलन संस्थेचे सचिव अनिल चौधरी यांनी केले. यावेळी संस्थेच्या महिला सभासदांनी महिलांच्या प्रगतीबाबत विचार मांडले.

म. टा. प्रतिनिधी, औरंगाबाद

आकर्षक पेहराव, फेटे घातलेल्या तरुणी आणि उत्स्फूर्त जल्लोषात शनिवारी (१० मार्च) महाराष्ट्र टाइम्सची ऑल वुमेन पॉवर रॅली दणक्यात साजरी झाली. क्रांतीचौकातील हॉटेल मॅनोर लॉनवरून सुरू झालेल्या स्त्री शक्तीच्या जागराची याच लॉनवर सांगता झाली.

तरुणींना आणि महिलांना त्यांच्या हक्काची 'स्पेस' मिळाली की त्या त्यांचे वय विसरून किती उत्स्फूर्तपणे आणि जिंदादिल पद्धतीने तो प्रत्येक क्षण समरसून एन्जॉय करतात नव्हे जगतात, याचे मूर्तीमंत उदाहरण म्हणजे 'महाराष्ट्र टाइम्स'ची 'ऑल वुमेन पॉवर बाइक रॅली'. क्षणापुरता का होईना सगळे जग विसरून स्वत:च्या मस्तीत, धुंदीत पार विरघळून जात थिरकत्या संगीताच्या तालावर मनमस्त थिरकण्याचा मनस्वी आनंद घेत तितक्याच जोशात व सहजनेते नव्वारी-फेट्यांपासून ते वेस्टर्न लुकपर्यंतच्या वेगवेग‌ळ्या वेशात-आवेशात साऱ्याजणी बाइकवर स्वार झाल्या. त्याच अपूर्व जोशातील बाईकराण्यांमध्ये 'अभिनंदन'ही होते आणि 'एअरस्ट्राइक' करणारे आणि पाकिस्तानी सैनिक व दहशतवाद्यांशी दोन हात करणारे 'सैनिक'ही होते आणि 'भारत माता की जय','वंदे मातरम'चा जयघोषही पदोपदी होता. एखादा 'बाइकोत्सव' कसा असतो किंवा असू शकतो, हे 'महाराष्ट्र टाइम्स'च्या वतीने आयोजित बाईक रॅलीमध्ये दिसून आल्याशिवाय राहात नाही, अशाच भावनाच जणू बहुतेकींच्या चेहऱ्यावर तरळत होते. खास वेगवेगळ्या 'थीम'सह वेगवेग‌ळ्या पोषाखांमध्ये आणि थेट बुलेटपासून बहुतेक सर्व प्रकारच्या बाईकसह सहभागी झालेल्या रॅलीतून केवळ सहा वर्षात हा 'बाईकोत्सवा'चा ट्रेंड शहरात किती खोलपर्यंत मुरला आहे, हे रॅलीतील शेकडोजणींच्या उत्स्फूर्त सहभागातून स्पष्ट झाल्याशिवाय राहात नाही. हॉटेल मॅनोर येथे समस्त बाइकोत्सवाला उधाण आले होते आणि याच ठिकाणी तरुणी-महिलांनी आपल्या उत्साहाला मोकळी वाट करून दिली आणि याच ठिकाणाहून रॅली निघाली आणि पुन्हा याच ठिकाणी रॅलीची सांगताही झाली.

म. टा. प्रतिनिधी, औरंगाबाद

'युरोपात शिक्षकांना मिळतो तसा सन्मान भारतात मिळत नाही. पवित्र ज्ञान देणाऱ्या शिक्षकाला कारकुनी कामे सोपवली जातात. निवडणूक प्रक्रियेचे काम सोपवून शिक्षकांवर अतिरिक्त कामाचा बोजा टाकतात. हा या पेशाचा अपमान आहे,' अशी टीका आमदार इम्तियाज जलील यांनी केली. ते स्वाभिमानी मुप्टाच्या अधिवेशनात बोलत होते.

स्वाभिमानी मुप्टा शिक्षक, प्राध्यापक व शिक्षकेतर संघटनेचे आरक्षण हक्क अधिवेशन रविवारी पार पडले. डॉ. बाबासाहेब आंबेडकर मराठवाडा विद्यापीठाच्या नाट्यगृहात आयोजित अधिवेशनाला कुलगुरू डॉ. बी. ए. चोपडे, आमदार इम्तियाज जलील, डॉ. शंकर अंभोरे, प्राचार्य कमलाकर कांबळे, प्राचार्य किसन पवार, प्राचार्य किशोर साळवे यांची प्रमुख उपस्थिती होती. शिक्षकांनी आदर्श विद्यार्थी घडवावे अशी, अपेक्षा चोपडे यांनी व्यक्त केली. 'शिक्षकाने अद्ययावत ज्ञान घेतले पाहिजे. या माध्यमातून आदर्श नागरिक व विद्यार्थी घडवले जातील. शिक्षकांना चांगले वेतन व मान-सन्मान मिळावा यासाठी सरकारने प्रयत्न करावे' असे चोपडे म्हणाले. शिक्षकांचे प्रश्न विधीमंडळात मांडणार असल्याचे आश्वासन जलील यांनी दिले. विलास पांडे यांनी सूत्रसंचालन केले आणि अनिता पांडे यांनी आभार मानले. या अधिवेशनासाठी डॉ. संतोष मोकळे, प्राचार्य राजकुमार म्हस्के, डॉ. बाळासाहेब लिहिणार, डॉ. अशोक बंडगर, डॉ. भगवान गव्हाडे, डॉ. मिलिंदराज बुक्तरे आदींनी परिश्रम घेतले. या अधिवेशनाला शिक्षक, प्राध्यापक व कर्मचारी उपस्थित होते.

\Bअधिवेशनातील ठराव\B

मागासवर्गीयांचा अनुशेष विशेष भरती मोहिमेद्वारे भरावा, बिंदूनामावलीची अंतिम तपासणी करुनच शैक्षणिक संस्थेमधील सर्व संवर्गातील पदे केंद्रीय पद्धतीने भरावी, पवित्र प्रणालीद्वारे शिक्षक भरती करताना संस्था स्तरावर मुलाखत न घेता थेट गुणवत्तेनुसार नियुक्ती करावी, निकषपात्र विनाअनुदानित विद्यालये व महाविद्यालयांना १०० टक्के अनुदान द्यावे, जुनी पेन्शन योजना लागू करावी आदी ठराव अधिवेशनात मंजूर करण्यात आले.

(जनावरांचा फाइल फोटो वापरावा)

म. टा. प्रतिनिधी, औरंगाबाद

राज्यात दुष्काळी परिस्थितीमुळे पशुधनासाठी आवश्यक असणारा चारा व पाणी उपलब्धतेसंबंधी गंभीर प्रश्न निर्माण होण्याची शक्यता असल्याने शासनाने महिनाभरापूर्वी मंडळनिहाय चारा छावण्या उघडण्याचा निर्णय घेतला होता. आता शासनाने चारा छावण्यातील जनावरांची कमाल संख्या ५०० वरून तीन हजार केली आहे.

शासनाने दुष्काळग्रस्त तालुक्यांमध्ये मंडळस्तरावर चाराछावण्या सुरू करण्याचा निर्णय घेतला होता. यामध्ये प्रती छावणी ३०० ते ५०० जनावरांना ठेवण्याची मुभा देण्यात आली होती. मात्र, जनावरांची संख्या वाढल्यास गावोगावात एकापेक्षा अधिक छावण्यांची संख्या जास्त होण्याची शक्यता असून यावर प्रशासनाला नियंत्रण मिळविण्यात अडचणी निर्माण होण्याची शक्यता होती. त्यामुळे शासनाने ७ मार्च रोजी चारा छावण्यांमधील कमाल जनावरांच्या संख्येत वाढ करण्याचा निर्णय घेतला. मंत्रिमंडळ उपसमितीच्या बैठकीमध्ये चर्चा करण्यात आल्यानंतर प्रत्येक चारा छावणीत आता ५०० ऐवजी तीन हजारपर्यंत वाढ करण्यात येणार आहे. या निर्णयानुसार आता एका चारा छावणीतील जनावरांची संख्या तीन हजारांपेक्षा जास्त झाली तरच त्या ठिकाण दुसरी चारा छावणी उघडण्यास परवानगी मिळणार आहे.

मराठवाड्यात नेमक्या किती चारा छावण्या सुरू कराव्या लागतील तसेच मराठवाड्यात मुबलक चारा उपलब्ध असल्याची आकडेवारी प्रशासनाकडे तयार आहे. मात्र, आता जिल्ह्यामध्ये नेमक्या कोणत्या भागात किती चारा छावण्या सुरू करण्याची गरज आहे, याबाबत निर्णय जिल्हाधिकाऱ्यांना घ्यावा लागणार आहे. यानुसार बीड, उस्मानाबाद तसेच औरंगाबाद जिल्हाप्रशासनाने चारा छावणी उघडण्यासंदर्भात तयारी सुरू केली आहे. सूत्रांनी दिलेल्या माहितीनुसार बीड जिल्ह्यात ११० तर उस्मानाबाद जिल्ह्यात २० चाराछावण्या उघडण्यासाठी परवानगी देण्यात आली आहे, तर औरंगाबाद जिल्ह्यातही १७ चारा छावण्या उघडण्यासंदर्भात अर्ज प्रशासनाला प्राप्त झाले आहेत.

जिल्ह्यातील मोठ्या व लहान पशुधन संख्येस अनुसरून, पशुधनासाठी वेगवेगळ्या नियमित योजनांमधून उपलब्ध असलेला चारा तसेच अतिरिक्त चारा उपलब्ध होण्यासाठी राष्ट्रीय कृषी विकास योजनेअंतर्गत अतिरिक्त वैरण विकास कार्यक्रम तसेच गाळपेर योजना कार्यक्रमामधुन उपलब्ध होणारा चाऱ्याचा आढावा घेऊन जिल्ह्यांना वापरता येणार आहे.

मराठवाड्यातील जनावरांची संख्या : ६७ लाख

मोठी जनावरे : ३६ लाख २५ हजार ४९०

लहान जनावरे : ११ लाख ३६ हजार

शेळ्या-मेंढ्या : १९ लाख ४५ हजार ७२८

दररोज चाऱ्याची आवश्यकात : २६ हजार ३३० टन

म. टा. प्रतिनिधी, औरंगाबाद

स्त्रीमुक्तीचा उदो-उदो केला जातो, स्त्रिच्या त्यागाला हिरो बनविले जाते, परंतु ती खरोखर स्वतंत्र आहे का? याचा विचार केला पाहिजे, 'स्त्री मुक्‍तीच्या, स्त्री पुरुष समानतेच्या गोष्टी केल्या तरी, पूर्वपार चालत आलेल्या सामाजिक, सांस्कृतिक रुढींमुळे देशातल्या महिलांना एक पाय निश्‍चित मागे खेचल्यासारखा वाटतो. सर्वांनी महिलांना शिका, बाहेर पडा, शिक्षण, नोकरी, व्यावसाय करा असे सांगत घरची जबाबदारी पार पडावी, अशी अपेक्षा असते. मात्र असाच संदेश पुरुष व मुलांना त्यांच्या आई देत नाही. अशा असवस्थ करायला लवाणाऱ्या गोष्टींचा विचार करण्याची गरज असल्याचे आवाहन पोलिस अधिक्षक मोक्षदा पाटील यांनी रविवारी (१० एप्रिल) केले.

आविष्कार फाउंडेशनच्या वतीने जागतिक महिला दिनानिमित्त दिल्या जाणाऱ्या राज्यस्तरीय राजमाता जिजाऊ पुरस्काराचे वितरण मराठवाडा महसूल प्रबोधिनी येथे करण्यात आले. यावेळी त्याप्रसंगी प्रमुख पाहुण्या म्हणून पोलिस अधीक्षक मोक्षदा पाटील बोलत होत्या. कार्यक्रमाच्या अध्यक्षस्थानी निवृत न्यायमूर्ती बी. एन. देशमुख हे होते. यावेळी सिडकोचे प्रशासक मधुकर राजेआर्दड, डॉ. बाबासाहेब आंबेडकर मराठवाडा विद्यापीठाचे प्र-कुलगुरू डॉ. अशोक तेजनकर, महावितरणचे सेवा निवृत्त कार्यकारी संचालक शंकर शिंदे, उद्योजक श्रीकांत शेळके, अविष्कार फाऊंडेशचे अध्यक्ष संजय पवार, मराठवाडा प्रमुख प्रा. डॉ. संतोष भासेले यांची उपस्थिती होती.

यावेळी मार्गदर्शन करताना मोक्षदा पाटील म्हणाल्या, स्त्री मुक्‍ती महिला दिन, पिंक डे, बेटी बचाओ, बेटी पढओ सारखे चांगले उपक्रम राबविले जात असले तरीही देशात महिलांची संख्या एक हजार पुरुषांमागे केवळ ९२० आहे. राज्याचाही हाच जन्मदर आहे. दर बरोबरीचा असायला पाहीजे पण तसे नाही. एवढ्या मुली कुठे जातात? मुलगाच पाहिजे असा महिलेवर दबाव असतो. दोन मुली झाल्या तरी कोणी आनंदी नसते. तिसरे मूल हे मुलगाच होईल. या अपेक्षेने किती चुकीच्या गोष्टी आजही आपण करतो. या आपल्याला असवस्थ करायला लावणाऱ्या या प्रश्‍नांविषयी विचार कराण्याची वेळ आली आहे. देशाच्या संविधानाने महिलांना अनेक अधिकार प्राप्त झालेले आहेत. या अधिकारांचा महिलांनी वापर करायला हवा. त्यासाठी धाडसाने पुढे जायला हवे, असे आवाहनही पाटील यांनी केले.

यावेळी प्र. कुलगुरू डॉ. अशोक तेजनकर म्हणाले की, महिलांमध्ये संघर्ष करण्याची वृत्ती असते तसेच कुटुंब समर्थपणे उभे करण्यासाचे काम त्याच करू शकतात, त्यात समर्पण भावना असते. यावेळी त्यांनी आपल्या आईच्या कार्याचे उदाहरण दिले. यावेळी मधुकर राजे आर्दड, न्या. बी. एन. देशमुख यांचेही भाषण झाले.

प्रारंभी उत्तमबाई चव्हाण यांचा पोलिस अधीक्षक मोक्षदा पाटील यांच्या हस्ते आदर्श माता विशेष पुरस्काराने सन्मान करण्यात आला. फाउंडेशनच्या वतीने राज्यभरातील ३५ कतृत्त्ववान महिलांना राजमाता जिजाऊ पुरस्कार देऊन सन्मानित करण्यात आले. कार्यक्रमाचे प्रास्ताविक फाउंडेशनचे मराठवाड्याचे अध्यक्ष डॉ. संतोष भोसले यांनी केले. याप्रसंगी अध्यक्ष संजय पवार यांनी आपल्या भाषणात फाउंडेशनच्या कार्याची माहिती दिली.

---

यांचा झाला सत्कार

उत्तमबाई चव्हाण यांना आदर्श माता विशेष पुरस्कार देऊन गौरविण्यात आले. त्यानंतर राज्यभरातील विविध क्षेत्रांतील महिलांना जिजाऊ पुरस्काराने गौरविण्यात आले. यात शशीकला बोराडे, अॅड. वैशाली जाधव, प्रा. विजया मुसांडे, पल्लवी चौधरी, माधवी पेचफुले, सुवर्णा जाधव, सुजाता पवार, रुचिका पालोदकर, लता कालवार, अंजली चिंचोलीकर, विद्या पाटील, वैशाली आठवले (औरंगाबाद), सुमित्रा कोते (अहमदनगर), सुलभा देशमुख (उस्मानाबाद), सुरेखा लहाने (जालना), सुरेखा पाटील (लातूर), डॉ. श्‍यामल वरकड (जालना), अनिता नवरखेले (लातूर), वैशाली ताटे (सोलापूर), अनुराधा जोशी, अंजली कानिंदे (नांदेड), सुजाता सावणे (अमरावती), स्मिता नलावडे (सिंधुदुर्ग), अनिता जोशी (बेळगाव), सरिता नाईक, प्रज्ञा पंडित (कोल्हापूर), विजया शिंदे (रायगड), पूनम नेरकर (नंदुरबार) यांचा समावेश आहे.

म. टा. प्रतिनिधी, औरंगाबाद

संविधान ही विचारप्रणाली आहे. संवविधानाची अत्यंत गरज आहे, कारण संविधान नसते तर सत्ताधाऱ्यांना नियंत्रणात ठेवणे कठीण झाले असते, असे प्रतिपादन दामोदरम संजिवय्या विधी विद्यापीठाचे माजी कुलपती प्रा. ए. लक्ष्मीनाथ यांनी आज केले. महाराष्ट्र राष्ट्रीय विधी विद्यापीठात आयोजित राष्ट्रीय चर्चासत्रात ते बोलत होते.

विद्यापीठातर्फे 'भारतीय संविधानापुढील कायद्यातील समकालीन आव्हाने' विषयावर चर्चासत्राचे आयोजन करण्यात आले होते. विद्यापीठाच्या सभागृहात झालेल्या उद्घाटन कार्यक्रमासाठी व्यासपीठावर प्रभारी कुलगुरू डॉ. जे. कोंडय्या यांची प्रमुख उपस्थिती होती. यावेळी पुढे प्रा. लक्ष्मीनाथ म्हणाले, संविधानासमोर आज अनेक आव्हाने आहेत. मुलभूत अधिकार हा महत्त्वाचा भाग आहे. त्याबाबतही अनेक मतमतांतरे निर्माण होत आहेत. यासह सामाजिक, राजकीय अशा विविध क्षेत्रातील आव्हाने कमी नाहीत. आधारकार्डबाबत सक्ती करण्याबाबत सर्वोच्च न्यायालयाला भूमिका घ्यावी लागली. प्रसारमध्यमे ही शक्तीशाली अस्त्र आहेत, परंतु त्यांचा प्रभावीपणे वापर होताना दिसत नाही, अशी खंतही त्यांनी व्यक्त केली. प्रास्ताविकात कुलगुरू डॉ. कोंडय्या यांनी विद्यापीठाची वाटचाल, अपेक्षित बदल मांडले. प्रभारी कुलसचिव डॉ. अशोक वडजे यांनी आभार मानले. दिवसभरात विविध सत्रात तज्ज्ञांनी मार्गदर्शन केले. यामध्ये डॉ. एस. पी. सिंग, प्रा. कृष्णा मुरली यांनी मार्गदर्शन केले. चर्चासत्रानिमित्त ग्रंथालयातर्फे विधी अभ्यासक्रमातील विविध पुस्तकांचे प्रदर्शनही भरिवण्यात आले होते. प्रदर्शनात सहा हजारपेक्षा अधिक पुस्तक, नियतकालिके मांडण्यात आली. त्यासाठी जनसंपर्क अधिकारी डॉ. पी. एस. बनसोडे यांनी परिश्रम घेतले.

म. टा. प्रतिनिधी, औरंगाबाद :

चिकलठाणा आंतरराष्ट्रीय विमानतळ प्राधिकरणातर्फे थायलंडच्या राजदुतांना औरंगाबादहून बँकॉकसह अन्य आशियाई देशांना जाण्यासाठी विमानसेवा सुरू करावी, असा प्रस्ताव विमानतळ प्राधिकरणाकडून देण्यात आला आहे.

डॉ. बाबासाहेब आंबेडकर मराठवाडा विद्यापीठासोबत सामंजस्य करार करण्याच्या कार्यक्रमासाठी थायलंडचे राजदूत चुटिन्टोन गोंगस्कडी हे आठ मार्च रोजी शहरात आले होते. थायलंडचे राजदूत गोंगस्कडी यांची विमानतळ संचालक डी. जी. साळवे यांनी विमानतळावर भेट घेतली. यावेळी साळवे म्हणाले, 'औरंगाबाद शहर हे पर्यटन शहर आहे. त्यामुळे या शहराला आंतरराष्ट्रीय विमान सेवेसोबत जोडण्याची गरज आहे. बँकॉकसह अन्य आशियाई देशातून औरंगाबादसाठी विमान सेवा सुरू करावी.'

या प्रस्तावाबाबत सांस्कृतिक तसेच पर्यटनाच्या दृष्टीने हा प्रस्ताव योग्य असल्याचे सांगत वरिष्ठ पातळीवर याबाबत लवकरच निर्णय घेण्याचे आश्वासन थायलंडच्या राजदुतांनी दिल्याची माहितीही माहिती साळवे यांनी दिली.

विमान सेवा वाढविण्याचा प्रयत्न

औरंगाबाद विमानतळावरून सध्या एअर इंडिया, जेट एअरवेज आणि ट्रू जेट कंपनीची विमानसेवा सुरू आहे. या तीन कंपन्यांच्या सेवेमुळे औरंगाबाद शहर दिल्ली, मुंबई, हैदराबाद आणि तिरुपतीशी हवाईसेवेने जोडले आहे. गेल्या दीड ते दोन वर्षांपासून विमानसेवा वाढविण्याचा प्रयत्न विमानतळ प्राधिकरणांकडून केला जात आहे.

नागरिकांचे आरोग्य धोक्यात, अग्नीशमन दलाच्या दोन गाड्या

म. टा. प्रतिनिधी, औरंगाबाद

रमानगरमध्ये भर वस्तीत असलेल्या कचऱ्याच्या ढिगाऱ्याला रविवारी रात्री आग लागली. अर्धातास सुरू असलेली आग आटोक्यात आणण्यासाठी अग्नीशमन विभागाचे दोन पाण्याचे बंब घटनास्थळी पाठविण्यात आले. त्यानंतर आग आटोक्यात आली.

महापालिकेचा कचरा प्रश्न वर्षभरानंतरही पूर्णपणे सुटलेला नाही. त्यातच कचऱ्याला आग लागण्याच्या घटना वारंवार समोर येत आहेत. पालिकेने रमानगर परिसरात 'पिट' उभारले. आधीच दुर्गंधीमुळे नागरिकांचे हाल होत असताना रविवारी अचानकपणे या कचऱ्याला आग लागल्याने गोंधळ उडाला. बाजुलाच घरे असल्याने परिसरातील नागरिकांनी अग्नीशमन विभागाला कळविले. आग अधिक वाढू नये यासाठी प्रयत्न सुरू झाले. रात्री ९ च्या सुमारास लागलेल्या आगीनंतर तात्काळ अग्नीशमन दलाला कळविण्यात आल्याने विभागाच्या दोन गाड्या घटनास्थळी आल्या. त्यानंतर आग आटोक्यात आली. पालिकेने विविध भागामध्ये पिट बांधले यातील एक येथे उभारण्यात आले. त्यात झोन क्रमांक ९ मधील ८० टक्के कचऱ्याचे वर्गीकरण याच ठिकाणी. ओला व सुका कचरा वेगळा करून प्रक्रियेसाठी पाठविला जातो. सुका कचरा येथेच ठेवण्यात येतो. भर वस्तीत अशा प्रकारचे कचरा 'पिट' उभारण्यात आले. त्यामुळे नागरिकांच्या आरोग्याला धोका निर्माण झाला आहे. या प्रकरणी नगरसेविका शिल्पाराणी वाडकर यांनी प्रशासनाच्या भूमीकेबाबत नाराजी व्यक्त केली. आग लागल्यानंतर वॉर्ड अधिकाऱ्यांसह इतर अधिकाऱ्यांना फोन करूनही त्यांनी प्रतिसाद दिला नसल्याचे सांगीतले.

म. टा. प्रतिनिधी, औरंगाबाद

'दर्जेदार चित्रपट तयार करण्यासाठी चित्रभाषा अवगत करणे गरजेचे आहे. चित्रपट चित्रभाषेतून बोलतो, संवादातून नव्हे. १०६ वर्षांच्या वाटचालीनंतरही चित्रपटात बाष्कळ बडबड असेल तर ते दुर्दैव आहे. आता हिंदी-मराठी चित्रपट पाहणारे प्रेक्षक कमी होत असून, २० वर्षांनंतर चित्रपट 'कम्युनिटी आर्ट' राहण्याची शक्यता नाही,' असे प्रतिपादन दिग्दर्शक मंगेश जोशी यांनी केले. नवोदित कलाकार-दिग्दर्शकांशी संवाद साधताना ते बोलत होते.

नवव्या क्लॅप नॅशनल शॉर्टफिल्म फेस्टिव्हलचा रविवारी समारोप झाला. एमजीएम फिल्म आर्टसच्या व्ही. शांताराम थिएटरमध्ये दिवसभरात २८ लघुपट दाखवण्यात आले. 'लेथ जोशी' चित्रपटाचे दिग्दर्शक मंगेश जोशी यांनी लघुपट चित्रकर्मींशी संवाद साधला. चित्रपट निर्मिती आणि बदलत्या प्रवाहावर त्यांनी मते मांडली. 'पटकथा चांगली असेल तर जगातील कोणताही निर्माता चित्रपट निर्मितीस तयार होईल, पण मराठी भाषेतूनही वैश्विक गोष्ट सांगणारा तुमचा चित्रपट पाहिजे. चित्रपट निर्मिती सोपी असली तरी, प्रदर्शन आणि व्यवसाय कठीण गोष्ट आहे. त्यामुळे या क्षेत्राची जाण असलेला निर्माता शोधणे नवोदित दिग्दर्शकांची जबाबदारी आहे. बहुतांशी प्रेक्षकांना चित्रपटात श्रीमंती पहायची असते. समस्या आणि रडगाणे कोण पाहणार अशी तक्रार असते. त्यामुळे वर्षाला १०० मराठी चित्रपट तयार होऊनही मोजकेच यशस्वी ठरतात. कारण, मराठी चित्रपट पाहण्याची प्रेक्षकांची मानसिकता नाही' असे जोशी म्हणाले. पुढील २० वर्षात चित्रपटगृहे राहण्याची शक्यता नाही. कारण चित्रपट एकत्रितपणे पाहण्याची 'कम्युनिटी आर्ट' उरणार नसून, मोबाइलवर चित्रपट पाहणे असे त्याचे स्वरुप राहील. दोन तास चित्रपटगृहात बसणेसुद्धा प्रेक्षकांना नको वाटते' अशी खंत जोशी यांनी व्यक्त केली.

दरम्यान, या सत्रानंतर सर्वोत्कृष्ट लघुपटांना पारितोषिक वितरण करण्यात आले. यावेळी दिग्दर्शक मंगेश जोशी, सादिक पलगिरी, एमजीएम फिल्म आर्टसचे संचालक शिव कदम, परीक्षक संतोष पाठारे, अमेय दक्षिणदास, संयोजक विनय जोशी व अक्षय वाळिंबे उपस्थित होते. प्रथम विजेत्या 'पॅम्पलेट' लघुपटाला रोख १५ हजार रुपये आणि स्मृतिचिन्ह देण्यात आले. द्वितीय आणि तृतीय विजेत्या लघुपटांना अनुक्रमे दहा हजार रुपये आणि पाच हजार रुपये, स्मृतिचिन्ह देण्यात आले.

\Bविजेते लघुपट

\Bप्रथम : पॅम्पलेट (शेखर रणखांबे)

द्वितीय : तरंग (सुमीत पाटील)

तृतीय : द ड्रेनेज (विक्रांत रामदास)

परीक्षक पसंती : कातडं (अमित नरवडे)

सर्वोत्कृष्ट अभिनेत्री : हेली शहा (हॅपी बर्थडे)

सर्वोत्कृष्ट अभिनेता : जय शेवाळकर (डिफर्मेशन)

सर्वोत्कृष्ट संकलन : कर्तव्य मोकल (लाडू)

सर्वोत्कृष्ट छायांकन : गिरीश मॅक्रेरी (पुलंजी)

सर्वोत्कृष्ट लेखक : रोहित पाटील (चमचम आणि शुभम)

सर्वोत्कृष्ट दिग्दर्शक : शेखर रणखांबे (पॅम्पलेट)

म. टा. प्रतिनिधी, औरंगाबाद

कायम दुष्काळाच्या झळा सोसत असलेल्या मराठवाड्याला शासनाकडूनही सापत्न वागणूक मिळत आहे. टंचाईवर मात करण्यासाठी जुलै ते डिसेंबर या कालावधीत औरंगाबाद जिल्ह्यात खर्च झालेला ४४ कोटी १४ लाख रुपयांची रक्कम जिल्हा प्रशासनाला मिळाली नाही. हा निधी मिळावा यासाठी जिल्हा प्रशासनाने विभागीय आयुक्त कार्यालयाला जानेवारी महिन्यातच पत्र पाठविले आहे. मराठवाड्याच्या पाचवीला पूजलेल्या दुष्काळामुळे आर्थिक घडी बिघडली असताना शासनही औरंगाबाद जिल्ह्याकडे दुर्लक्ष करत असल्याचे यावरून स्पष्ट होत आहे.

दुष्काळामुळे संपूर्ण मराठवाड्याची तहान टँकरद्वारे भागविण्यात येत आहे. यंदाही टंचाईच्या सर्वाधिक झळा औरंगाबाद जिल्ह्याला बसत आहेत. टंचाईची जून २०१८ अखेरपर्यंतची असलेली ३७ कोटी रुपयांची मागणी फेब्रुवारी २०१९ मध्ये देण्यात आली. तर जुलै ते डिसेंबर २०१८ या कालावधीतील ४४ कोटी रुपयांचा खर्च अद्यापही शासनाकडून येणे शिल्लक आहे. यामध्ये नळ योजना विषेश दुरुस्तीसाठी एक कोटी ४७ लाख, तात्पूत्या पूरक नळयोजनेसाठी एक कोटी १९ लाख टँकरद्वारे पाणीपुरवठा करण्यासाठी ३४ कोटी ८६ लाख तर खाजगी विहीर अधिग्रहणासाठी सहा कोटी ६१ लाख रुपये असा एकूण ४४ कोटी १४ लाख रुपयांचा खर्च औरंगाबाद जिल्ह्यात करण्यात आला होता. निधी नसल्यामुळे टंचाई निवारणार्थ प्रशासनाला अडचणीचा सामना करावा लागत आहे. पैसेच उपलब्‍ध नसल्यामुळे शासनाच्या इतर हेडमधून खर्चाचे व्यवस्थापन करावे लागत असल्याचे सूत्रांनी सांगितले. जूनपर्यंत टंचाईचा सामना करावा लागणार आहे. सध्या औरंगाबाद जिल्ह्यातील जायकवाडी प्रकल्पांमध्ये तीन टक्के, मध्यम प्रकल्पांमध्ये दोन टक्के तर लघु प्रकल्पांमध्ये केवळ सात टक्के पाणीसाठा शिल्लक आहे. सध्या औरंगाबाद जिल्ह्याची तहान टँकरद्वारे भागविण्यात येत आहे. येणाऱ्या कालावधीमध्ये टंचाई निवारणार्थ उपाययोजना करण्यासाठी मोठा निधी खर्च करावा लागण्याची शक्यता आहे.

म. टा. प्रतिनिधी, औरंगाबाद

शेतकऱ्यांना शेतमाल विक्रीसाठी 'शेतकरी ते ग्राहक' अशी हक्काची बाजारपेठ देण्यासाठी ग्रामविकास संस्थेने पुढाकार घेतला आहे. सिडको परिसरात फळे, भाजीपाला आणि धान्य विक्रीला प्रायोगिक तत्त्वावर सुरुवात झाली. पहिल्याच दिवशी ग्राहकांनी चांगला प्रतिसाद दिला.

एकोड परिसरातील चित्ते नदी खोऱ्यातील दर्जेदार नैसर्गिक द्राक्षे शहरात विक्रीसाठी आली आहेत. द्राक्षे उत्पादक शेतकरी ते ग्राहक या माध्यमातून शेतमाल विक्री करण्यात येत आहे. ठाकरेनगर येथील ग्रामविकास भवनात या उपक्रमाला सुरुवात झाली. या कार्यक्रमाला आमदार अतुल सावे, राज्य बालहक्क संरक्षण आयोगाचे अध्यक्ष प्रवीण घुगे, प्रा. गजानन सानप, डॉ. टी. आर. पाटील, ग्रामविकास संस्थेच्या अध्यक्ष जयश्री हदगल, नरहरी शिवपुरे, मनोज शेवाळे यांची प्रमुख उपस्थिती होती. शेतमाल शहरात विक्री करण्यासाठी शेतकऱ्यांना सर्व मदत करण्यात येईल असे आश्वासन सावे यांनी दिले. चित्ते नदी खोऱ्यात नदी पुनरुज्जीवनामुळे फळबागा, दूध, भाजीपाला व धान्याचे उत्पादन वाढले आहे. हा शेतमाल जय भगवानबाबाबा गटशेतीच्या माध्यमातून व्हीएसटीएफ प्रकल्पाच्या सहकार्याने बाजारपेठेत विकण्यात येईल, अशी माहिती ग्रामविकास संस्थेचे नरहरी शिवपुरे यांनी दिली. या कार्यक्रमाला रत्नाकर कुलकर्णी, अधिसभा सदस्य योगिता होके पाटील, विजय उक्कलगावकर, अशोक खाडे, रायभान खाडे, भगवान कुबेर, रामदास चव्हाण, दामोदर कुबेर, रामेश्वर कुबेर, मुरलीधर घोडके उपस्थित होते.

\Bग्राहकांचा प्रतिसाद

\Bशेतकरी व ग्राहक यांच्यात विक्रेता व व्यापारी यांची मध्यस्थी नसल्यामुळे योग्य दरात शेतमालाची विक्री करण्यात येत आहे. पहिल्या दिवशी ५० रुपये प्रतिकिलो दराने ३०० किलो द्राक्षे विकले गेले. डाळींब आणि मोसंबीची ४० रुपये प्रतिकिलो दराने विक्री झाली. फळपिकांना शहरात हक्काची बाजारपेठ मिळाल्यामुळे शेतकऱ्यांनी समाधान व्यक्त केले.

नदीचे पुनरुज्जीवन झाल्यामुळे पाणी वाढून फळे व भाजीपाल्याचे उत्पादन वाढले. संघटीतपणे औरंगाबाद शहरात चांगल्या दर्जाची फळे, भाजीपाला व धान्य विक्री करणार आहे. ग्राहक बँक तयार करण्याचा विचार आहे.

- अशोक खाडे, शेतकरी

म. टा. प्रतिनिधी, औरंगाबाद

स्वच्छ सर्वेक्षणात शेवटून दुसरा क्रमांक पटकाविलेल्या औरंगाबादमध्ये जागोजागी कचरा जाळण्याचा अघोरी प्रकार सुरू असून, त्यातही रामतारा हौसिंग सोसायटी, चाणक्यपुरी, तापडिया नगर, श्रीकृष्णनगर आदी वसाहतींच्या आसपास राहणाऱ्या नागरिकांना सातत्याने कचऱ्याच्या धुराचा कठीण सामना करावा लागत आहे. एकतर या वसाहतींलगत वाहत असणाऱ्या नाल्यामध्ये सर्रास कचरा टाकला जात असून, हा कचरा सातत्याने जाळण्यात येत आहे. दुर्दैवाने, पालिकेच्या यंत्रणेला कशाचेच सोयरसुतक नाही आणि या नाल्यापासून हाकेच्या अंतरावर राहणाऱ्या नगरसेविकेलाही या प्रकरणात लक्ष घालावे असे वाटत नाही.

शहरात कचऱ्याचा प्रश्न गंभीर बनल्यापासून याच नाल्याच्या परिसरात कचरा टाकण्याच्या आणि कचरा जाळण्याच्या प्रकारात फार मोठी वाढ झाली आहे. संपूर्ण नाल्याभर आणि अगदी वाट्टेल तिथे कचरा टाकला जातो आणि हा कचरा टाकण्याचा प्रकाराला कुठेही पूर्णविराम, स्वल्पविराम, अल्पविराम मिळालेला नाही. केवळ नाल्यातच नव्हे, तर नाल्यासमोरच्या मोकळ्या जागेतही कचरा टाकला जातो. नाल्यासमोरच कचऱ्याचे संकलन होते; परंतु या ठिकाणी कचरा न टाकता नाल्यात, नाल्याच्या आसपास व चक्क रस्त्याच्या दोन्ही बाजुंनी टाकला जातो. हॉटेलचालक, छोटे-मोठे टपरीचालक, खानावळ चालवणारे असे सगळे या रस्त्याच्या दोन्ही बाजुंनी व नाल्यामध्ये कचरा टाकून मोकळे होतात. त्यातच कचरा रोज उचलता जात नाही, अशी तक्रार करीत अनेक रहिवासीदेखील कचरा टाकून मोकळे होतात. मात्र, कचरा टाकणाऱ्यांना कोणीही अडवत नाही व कचरा पेटवून देणाऱ्यांनाही कोणी काही बोलत नाही. कचरा पेटवून दिल्यानंतर हा कचरा मात्र काही तास जळत असतो आणि त्याचा धूर हा 'रामतारा'सह इतर वसाहतींच्या दिशेने प्रत्येकवेळी जात असतो व त्याचा त्रास नागरिकांना भोगावा लागतो. काही दिवसांपूर्वी तर एकाचवेळी पाच ते सहा ठिकाणी किंवा त्याही जास्त ठिकाणी कचरा पेटवून देण्यात आला होता व त्यामुळे या रस्त्याने दुचाकीवर जाणाऱ्या-येणाऱ्यांना आणि विशेषत: पादचाऱ्यांना श्वास घेणेही कठीण होत होते. याबाबत कुणालाही 'ना खेद ना खंत' अशी एकंदर स्थिती आहे.

\Bवीज खांबाला लागला मुहूर्त

\Bयाच रस्त्याला एक विद्युत खांब पार धोकादायक स्थितीत वाकडा झाला होता. हा खांब कुणाच्या अंगावर पडतो की काय, अशी स्थिती होती. उशिरा का होईना या खांबाचे नशिब पालटले आहे. या ठिकाणी नवीन खांब रविवारी बसवण्यात आला. त्याच्याच बाजुचाही खांब यानिमित्ताने बसवण्यात आला आहे. आता या खांबावर दिवे लागावेत, अशीही नागरिकांची अपेक्षा आहे.

म. टा. प्रतिनिधी, औरंगाबाद

आहार, व्यायाम, काळजी व जगण्याचा हेतू याच चार सूत्रांवरच आरोग्य अवलंबून आहे. बदलत्या जिवनशैलीमुळे होणाऱ्या आजारांशी लढा द्यायचा असेल तर या चतुःसूत्रीचा वापर करा, असे आवाहन 'प्रयास सेवांकुर'चे संस्थापक डॉ. अविनाश सावजी यांनी दिला.

जागतिक महिला दिनाच्या निमित्ताने गेट गोर्इंग व एमजीएम वैद्यकीय महाविद्यालय व रुग्णालयाच्या वतीने आयोजित कार्यक्रमात ते बोलत होते. या वेळी एमजीएम हॉस्पिटलचे डॉ. प्रविण सूर्यवंशी, प्रख्यात हृदयरोगतज्ज्ञ डॉ. अजित भागवत यांची विशेष उपस्थिती होती. निरोगी रहा, कार्यरत रहा व दिर्घायुष्य जगा, असा संदेश देताना डॉ. सावजी म्हणाले, आहार हे सर्वात महत्वाचे सूत्र आहे. ताजे आणि स्वच्छ अन्न घ्या. पॅक व जंकपूâडचा मोह टाळा. मधूमेह, रक्तदाब, ह्रदयरोग या आजारांचे मुख्य कारण शारिरीक हालचालींचा अभाव आहे. व्यायाम अर्थात शरीराची हलचाल हे सूत्र निरोगी जीवनासाठी महत्वाचे आहे. त्यामुळे स्ट्रेचिंग, कार्डिओ, वजन कमी करण्यासाठीचे व्यायाम नियमित करायला हवेत. केवळ शरीर निरोगी असून चालत नाही तर मनही निरोगी हवे. त्यासाठी 'शेअर अ‍ॅण्ड केअर' हे तिसरे सूत्र अंगिकारायला हवे. 'सपोर्ट ग्रुप' हे अनेक दूर्धर आजारात महत्वाची भूमिका बजावतात असे त्यांनी सांगितले. जगण्याचा हेतू असेल तर मन आणि शरीर गुंतून जाते. त्यामुळेही आजापासून दूर जाता येते. रुग्णाला त्याच्या जगण्याच्या हेतूची जाण डॉक्टरांनी करुन देणे आवश्यक आहे. शरीराबरोबर मनावर उपचार होणे हे चौथे सूत्र आहे. तथापी या चारही सूत्रांचा एकत्रित विचार झाला तरच बदलत्या जीवनशैलीमुळे होणाऱ्या आजारावर मात करता येते, असेही ते म्हणाले. या प्रसंगी डॉ. अजित भागवत यांनी ह्रदय स्वास्थ्याचे गूढ उकलले. त्यांच्या हस्ते डॉ. सावजी यांच्या पुस्तकाचे प्रकाशन झाले. गेट गोर्इंगच्या डॉ. उमा महाजन, डॉ वंदना मिश्रा, नीना निकाळजे, डॉ. चारुशीला देशमुख, भावना लोहिया, डॉ. सुजाता लाहोटी, डॉ. संतोष तोतला, डॉ. निती सोनी, डॉ. प्रिया देशमुख, डॉ. संगीता देशपांडे, दिपा डाबरी, निरुपमा नागोरी, दिप्ती खेमका यांनी कार्यक्रमासाठी पुढाकार घेतला.

\Bकष्टकरी महिलांची आरोग्य तपासणी

\Bजागतिक महिला दिनाचे औचित्य साधून घरकाम करणाऱ्या सुमारे ७५ महिलांची मोफत आरोग्य तपासणी करण्यात आली. विशेषतः महिलांमधील आजार व हिमोग्लोबीन तपासून प्राथमिक उपचार करण्यात आले. एमजीएम रुग्णालयातील डॉक्टरांनी यासाठी सहकार्य केले. डॉ. सावजी यांनी महिलांशी संवाद साधून आरोग्य विषयक मार्गदर्शन केले.

म. टा. प्रतिनिधी, औरंगाबाद

उत्तरपत्रिका फेरतपासणीची रखडलेली कामे आणि लोकसभा निवडणुकीच्या पार्श्वभूमीवर पदवी परीक्षेच्या वेळापत्रकात बदल करण्यात आला आहे. १९ मार्चपासून सुरू होणारी परीक्षा आता २९ मार्चपासून होण्याची शक्यता आहे. परीक्षा मंडळाच्या बैठकीनंतर वेळापत्रक निश्चित करण्यात येईल अशी माहिती प्रभारी परीक्षा संचालक डॉ. जी. आर. मंझा यांनी दिली.

डॉ. बाबासाहेब आंबेडकर मराठवाडा विद्यापीठाच्या परीक्षा विभागाने पदवी आणि पदव्युत्तर अभ्यासक्रमाच्या परीक्षेचे नियोजन केले होते. येत्या १९ मार्चपासून पदवी वर्गाची परीक्षा होणार असल्याचे जाहीर करण्यात आले होते. मागील आठवड्यात अचानक परीक्षा संचालकांच्या बदल्या करण्यात आल्या. सहा दिवसात डॉ. जयश्री सूर्यवंशी, डॉ. दिगंबर नेटके यांना पदमुक्त करण्यात आले. परीक्षा संचालकाचा पदभार डॉ. जी. आर. मंझा यांना देण्यात आला. मंझा यांनी परीक्षा विभागाचा आढावा घेतल्यानंतर रखडलेली कामे निदर्शनास आली. पदवी वर्गाच्या विद्यार्थ्यांनी उत्तरपत्रिका फेरतपासणीसाठी लक्षणीय अर्ज केले आहेत. बीएस्सीचे ९००, बी. कॉम ३०० आणि बी. ए. वर्गाचे १५० अर्ज आहेत. ही रखडलेली कामे पूर्ण करण्यास मंझा यांनी प्राधान्य दिले. मागील सत्राचा निकाल जाहीर झाल्यास विद्यार्थ्यांना पुढील सत्राची तयारी करणे सोपे जाईल असे त्यांनी स्पष्ट केले. तसेच एप्रिल महिन्यात होणाऱ्या लोकसभा निवडणुकीच्या मतदानाच्या वेळापत्रकाचा आढावा घेण्यात आला. त्यानुसार पदवी अभ्यासक्रमाची परीक्षा २९ मार्चपासून घेण्याचा प्रस्ताव विद्यापीठ प्रशासनाला दिला आहे. परीक्षा मंडळाची बैठक झाल्यानंतर वेळापत्रक निश्चित करण्यात येणार आहे. तसेच पदव्युत्तर वर्गाची परीक्षा एप्रिल महिन्याच्या पहिल्या आठवड्यात सुरू होण्याची शक्यता आहे.

विधिच्या परीक्षेचा वाद

माणिकचंद पहाडे विधि महाविद्यालयात सराव परीक्षा आणि सत्र परीक्षेतील प्रश्नपत्रिकेत साम्य आढळल्यामुळे परीक्षा रद्द करण्यात आली. आता फेरपरीक्षा घेण्याचा निर्णय परीक्षा विभागाने घेतला असून लवकरच वेळापत्रक जाहीर करण्यात येणार आहे. फक्त पहाडे महाविद्यालयाने सराव परीक्षा घेतली होती. त्यांच्या चुकीचा त्रास इतर महाविद्यालयांना कशासाठी असा सवाल महाविद्यालये आणि विद्यार्थ्यांनी केला आहे. परीक्षा विभागातील काही अधिकाऱ्यांच्या निष्काळजीपणामुळे हा प्रकार घडल्याचा आरोप मराठवाडा लॉ कृती समितीने केला आहे. विधि शाखेतील प्रथम वर्षाच्या विद्यार्थ्यांची फेरपरीक्षा घेऊ नये अशी मागणी विद्यार्थ्यांनी केली. निवेदन देण्यासाठी गेलेल्या विद्यार्थ्यांना सोमवारी कुलगुरुंनी भेट नाकारली. त्यामुळे विद्यार्थ्यांनी स्वीय सचिवांच्या कक्षात ठिय्या आंदोलन केले. यावेळी नवनाथ देवकते, अजहर पटेल, दीपक डोईफोडे, अर्जुन डुकरे, कमलाकर लांडगे, अभय आव्हाड, प्रकाश गायकवाड यांच्यासह शेकडो विद्यार्थी उपस्थित होते. तर प्रश्नपत्रिकेत साम्य असल्यामुळे सर्वांची फेरपरीक्षा होईल असे परीक्षा विभागाने स्पष्ट केले.

शिष्यवृत्ती रखडली

शेतकरी व शेतमजूर कुटुंबातील पीएच. डी. संशोधक विद्यार्थ्यांसाठी विद्यापीठ प्रशासनाने शिष्यवृत्ती जाहीर केली. मात्र, संशोधन विभागातील थंड कामकाजामुळे विद्यार्थ्यांना अजूनही अंतिम पत्र मिळालेले नाही. परिणामी, शिष्यवृत्तीसाठी अर्ज करता येत नसल्याचे विद्यार्थ्यांनी सांगितले. येत्या १७ मार्चपर्यंत संशोधक विद्यार्थ्यांना अलॉटमेंट पत्र देण्याची सूचना केल्याचे प्र-कुलगुरू डॉ. अशोक तेजनकर यांनी सांगितले.