म. टा. विशेष प्रतिनिधी ,औरंगाबाद

वैद्यकीय पदव्युत्तर अभ्यासक्रमासाठी प्रवेशपूर्व पात्रता परीक्षेत यशस्वी झालेल्या २५ मराठा समाजाच्या उमेदवारांना जात वैधता प्रमाणपत्राच्या हमीस अधीन राहून अर्ज स्वीकारण्याचे आदेश मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे व न्या. नितीन सांबरे यांनी वैद्यकीय पदव्युत्तर राज्य प्रवेशपूर्व परीक्षा विभागाला दिले आहेत.

वैद्यकीय पदवी (एमबीबीएस) घेतलेल्या परभणी येथील शिवाजी भोसले व इतर २५ जणांनी पदव्युत्तर अभ्यासक्रमासाठी अर्ज केला होता. यासाठी झालेल्या नीट पीजी २०१९साठी त्यांनी अर्ज सादर केला होता. महाराष्ट्र शासनाने ३० नोव्हेंबर २०१८ रोजी मराठा समाजाचा अंतर्भाव सामाजिक व शैक्षणिक मागास प्रवर्गात केला. मराठा समाजाला शिक्षण आणि नोकरीत सोळा टक्के आरक्षण या निर्णयाद्वारे दिलेले आहे. सर्व याचिकाकर्त्यांकडे मराठा समाजाचे जात प्रमाणपत्र असून, त्यांनी शासनाच्या निर्णयाच्या आधारेच वैद्यकीय पदव्युत्तर प्रवेशपूर्व परीक्षेसाठी अर्ज केला होता. प्रवेशपूर्व परीक्षेत सर्व जण यशस्वी झाले आणि त्यांनी गुणवत्ता यादीत स्थानही मिळविले. केंद्र व राज्य अशा प्रत्येकी पन्नास टक्के जागा अभ्यासक्रमासाठी असून राज्याच्या वाट्याला आलेल्या पन्नास टक्के जागांमधून त्यांनी अर्ज सादर केलेला आहे. सर्व यशस्वी उमेदवारांच्या कागदपत्रांच्या पडताळणीसाठी १३ ते २० मार्च २०१९ या कालावधीत उपस्थित राहण्याचे निर्देश दिलेले आहेत. जात वैधता प्रमाणपत्र सोबत आणण्याची अट घालण्यात आली आहे. यशस्वी मराठा उमेदवारांकडे केवळ जात प्रमाणपत्र असून, जात वैधता प्रमाणपत्र मिळाले नसल्याने दिलेल्या कालावधीत समितीकडे देणे अशक्य असल्याने त्यांनी खंडपीठात याचिका केली. सामाजिक व शैक्षणिकदृष्ट्या मागास कोट्यातून पदव्युत्तर अभ्याक्रमासाठी प्रवेश देण्यात यावा, अशी विनंती याचिकेत करण्यात आली होती.

\Bलेखी स्वरूपात हमीपत्र घ्या

\Bवैधता प्रमाणपत्र नसल्याने भविष्यात वैधता प्रमाणपत्राच्या अधिन राहून प्रवेश देण्यात यावा, असेही याचिकेत नमूद केले आहे. या अनुषंगाने खंडपीठाने आयुक्त राज्य प्रवेशपूर्व पात्रता परीक्षा विभाग यांना निर्देश द्यावे. जात वैधता प्रमाणपत्र सादर करण्यासंबंधी सर्वांकडून लेखी स्वरूपात हमीपत्र घ्यावे, असेही आदेशित केले आहे. अर्जदारांची बाजू संतोष डांबे यांनी मांडली. राज्यशासनाच्या वतीने सहाय्यक सरकारी वकील मंजूषा देशपांडे यांनी काम पाहिले.

म. टा. प्रतिनिधी, औरंगाबाद

जय भवानीनगर वार्ड क्रमांक ९२चे भारतीय जनता पक्षाचे वॉर्ड अध्यक्ष सुनील प्रल्हाद अहिरे (वय ३५) यांनी रविवारी रात्री गळफास घेऊन आत्महत्या केली. एका महिला आणि कॉँग्रेस नगरसेविकेच्या पतीने दिलेल्या त्रासामुळे आत्महत्या केल्याचे सुसाइड नोटमध्ये नमूद केले आहे. या प्रकरणी मुकुंदवाडी पोलिस ठाण्यात गुन्हा नोंदविण्यात आला आहे.

पोलिसांनी दिलेल्या माहितीनुसार, अहिरे यांचे एका महिलेसोबत मागील सहा वर्षांपासून प्रेम संबंध होते. मात्र, गेल्या काही महिन्यांपासून त्यांच्यात वाद सुरू झाला. याप्रकरणी पंधरा दिवसांपूर्वी अहिरेंच्या पत्नींनी या महिलेविरोधात मुकुंदवाडी पोलिस ठाण्यात तक्रार दिली होती. तेव्हापासून अहिरे आणि या महिलेतील वाद अधिक विकोपाला गेला. दरम्यान, अहिरे यांनी रविवारी रात्री राहत्या घरी गळफास घेऊन आत्महत्या केली. आत्महत्येपूर्वी लिहून ठेवलेली चिठ्ठी पोलिसांच्या हाती लागली. या चिठ्ठीमध्ये एक महिला आणि मोहन नाना साळवे यांच्या त्रासाला कंटाळून आत्महत्या करत असल्याचे लिहून ठेवले आहे. या चिठ्ठीच्या आधारे आरोपी विरोधात गुन्हा नोंदवावा आणि त्यांना अटक करावी. अशी मागणी नातेवाईकांनी पोलिसांकडे केली होती.

…………

\Bआमदार सावेंचे ठिय्या आंदोलन

\Bअहिरे यांनी मृत्यूपूर्वी लिहलेल्या चिठ्ठीच्या आधारे आरोपींविरोधात गुन्हा नोंदवावा आणि त्यांना अटक करावी, या मागणीसाठी आमदार अतुल सावे आणि मृताच्या नातेवाइकांनी मुकुंदवाडी पोलिस ठाण्यासमोर सुमारे तासभर ठिय्या दिला. यावेळी पोलिस अधिकारी आणि आमदारांमध्ये शाब्दिक वाद झाला. या प्रकरणी एका महिलेवर आणि मोहन नाना साळवे (वय ५५) या दोघांवर गुन्हा दाखल करण्यात आला आहे.

म. टा. प्रतिनिधी, औरंगाबाद

महावितरणच्या सातारा शाखा कार्यालयाने राबवलेल्या विशेष मोहिमेत सातारा-देवळाई परिसरात वीजचोरीची दहा प्रकरणे उघडकीस आली. या प्रकरणांत सुमारे पावणेआठ लाख रुपयांची वीजचोरी झाल्याचे निष्पन्न झाले.

महावितरणचे मुख्य अभियंता सुरेश गणेशकर, अधीक्षक अभियंता बिभिषण निर्मळ, कार्यकारी अभियंता प्रेमसिंह राजपूत यांच्या मार्गदर्शनाखाली सातारा शाखेचे सहायक अभियंता अविनाश चव्हाण यांनी विशेष पथक स्थापन करून फेब्रुवारी महिन्याच्या अखेरच्या आठवड्यात वीजचोरी पकडण्यासाठी मोहीम राबविली. या पथकाने केलेल्या कारवाईत नऊ घरगुती व एका व्यावसायिक ग्राहकाची वीजचोरी पकडण्यात आली. रिमोटद्वारे मीटर बंद करणे, सर्व्हिस वायर बायपास करणे, मीटरमध्ये फेरफार अशा प्रकारे वीज चोरण्यात आली. पोपट सपकाळ, कमलाबाई वाघ, ए. डी. जायभाये, पंचफुला गायकवाड, दीपक जगदाळे, सय्यद अब्दुल सत्तार सांडू, सुनीता मोरे, उषा मोदी, एस. पी. काळे (दोन वीजजोडण्या) हे ग्राहक आढळून आले. या सर्व ग्राहकांना सुमारे पावणेआठ लाख रुपयांची वीजचोरी केल्याची बिले देण्यात आली आहेत.

विहित मुदतीत ही बिले न भरणाऱ्या ग्राहकांवर पोलिसांत गुन्हा दाखल करण्यात येणार आहे. सातारा शाखेचे जनमित्र पी. एच. भक्कड, डी. डी. साबळे, एच. एल. त्रिभुवन, मंगेश त्रिभुवन, शिवप्रसाद लिंगायत, पुंजाराम बावस्कर, डी. एस. बडे, समाधान गुडघे, अनिल जाधव, सतीश धाकतोडे, गणेश बिडवे व आशिष शिंदे यांनी ही मोहीम यशस्वी केली.

म. टा. प्रतिनिधी, औरंगाबाद

नांदेडहून औरंगाबादमार्गे हजरत निझामोद्दिन ही साप्ताहिक मराठवाडा संपर्क क्रांती एक्स्प्रेस रेल्वे सुरू करण्याची घोषणा करण्यात आली होती. या घोषणेनुसार येत्या १९ मार्चला ही रेल्वे नांदेडहून सुरू होणार असल्याची शक्यता नांदेड रेल्वे विभागाकडून व्यक्त करण्यात आली आहे.

औरंगाबाद रेल्वे मार्गावरून दिल्ली, अमृतसरकडे धावणाऱ्या सचखंड एक्स्प्रेसला कायम वेटिंग असते. दिल्लीसाठी विशेष रेल्वे देण्याची मागणी वारंवार मराठवाड्यातील रेल्वे संघटनेकडून करण्यात येत होती. याबाबत रेल्वे अधिकाऱ्यांनाही वारंवार निवेदने देण्यात आली होती. गेल्या अनेक वर्षांपासून ही मागणी केली जात असल्याने अखेर रेल्वे विभागाने सात मार्च रोजी नांदेड, औरंगाबादमार्गे हजरत निझामोद्दिन ही आठवडी रेल्वे सुरू करण्याचा निर्णय जाहीर केला आहे. यामुळे दिल्लीकडे जाणाऱ्या रेल्वे प्रवाशांना नांदेड ते हजरत निझामोद्दिन ही साप्ताहिक रेल्वे उपलब्ध होणार आहे. या रेल्वेची पहिली फेरी ही १९ मार्च रोजी सोडण्यात येणार असल्याची माहिती रेल्वे विभागाकडून देण्यात आली आहे. आचारसंहिता असल्यामुळे या रेल्वेचे उद्घाटन होणार नाही. ही रेल्वे थेट सुरू करण्याचे नियोजन नांदेड रेल्वे विभागाकडून करण्यात आले असल्याची माहिती रेल्वे सूत्रांनी दिली.

…

\Bपाच वर्षांनंतर मिळाली रेल्वे\B

साधारणत: पाच वर्षांपूर्वी उत्तरेकडे जाण्यासाठी हैदराबाद ते अजमेर ही रेल्वे सुरू करण्यात आली होती. यानंतरच्या काळात दक्षिणेकडे जाणाऱ्या किंवा शिर्डी दर्शनासाठी चेन्नई ते नगरसोल, नगरसोल ते नरसापूर, औरंगाबाद रेनीगुंटा या रेल्वे सुरू करण्यात आल्या. पाच वर्षांनंतर उत्तरेकडे जाण्यासाठी आणखी एक रेल्वे मिळणार असल्याची चर्चा रेल्वे संघटनांमध्ये केली जात आहे.

म. टा. प्रतिनिधी, औरंगाबाद

गँगरीनचे रुग्ण उपचारासाठी वेळेत आले तर ८० ते ९० टक्के रुग्णांचा पाय वाचवणे शक्य आहे; परंतु अजूनही अनेक रुग्ण वेळेत उपचारासाठी येत नसल्याचे समोर येत आहे. त्यातही 'ड्राय गँगरीन'च्या जवळजवळ सगळ्याच केसेसमध्ये रुग्णांचे पाय वाचवता येऊ शकतात, असेही तज्ज्ञांनी स्पष्ट केले आहे. महत्वाचे म्हणजे ग्रामीण भागातील रुग्णांच्या 'गँगरीन'मागे धुम्रपान हेच प्रमुख कारण असल्याचेही स्पष्ट आहे. खासगी रुग्णालयांबरोबरच घाटीमध्येही अनेक 'गँगरीन'च्या रुग्णांना दिलासा मिळत असून, घाटीच्या 'सीव्हीटीएस'मध्ये रुग्णांवर यशस्वी उपचार-शस्त्रक्रिया होत आहेत. महिन्याकाठी शहरात सुमारे शंभर गँगरीनचे रुग्ण उपचारासाठी येत असल्याचेही तज्ज्ञांनी सांगितले.

या प्रकारच्या रुग्णांवर शासकीय वैद्यकीय महाविद्यालय व रुग्णालयाच्या (घाटी) 'उरोशल्य चिकित्सा आणि हृदयरोग अतिचिकित्सा' (सीव्हीटीएस) विभागामध्ये प्रत्येक महिन्याला सात ते आठ रुग्ण उपचारासाठी येत आहेत आणि यामध्ये मराठवाड्यासह विदर्भातील रुग्णांचाही उल्लेखनीय समावेश आहे. टाकरहेड (ता. चिखली, जि. बुलडाणा) येथील ६५ वर्षीय तुकाराम पैठणे यांना अत्यवस्थ स्थितीत 'सीव्हीटीएस'मध्ये दाखल करण्यात आले होते व त्यांच्यावर शस्त्रक्रिया करुन त्यांचा पाय वाचवण्यात 'सीव्हीटीएस'चे शल्यचिकित्सक डॉ. प्रशांत मोरे यांना यश मिळाले. उल्लेखनीय म्हणजे तुकाराम पैठणे यांच्यावर यापूर्वी अँजिओप्लास्टी झाली होती आणि त्यांना पक्षाघाताचाही झटका येऊन गेला होता. त्यामुळे त्यांच्या पायावर शस्त्रक्रिया करणे बरेच जिकिरीचे व क्लिष्ट होते; तरीही त्यांचा पाय वाचवण्यात यश आले, असेही डॉ. मोरे म्हणाले. त्याचवेळी इतर दोन गँगरीनच्या रुग्णांवरही 'सीव्हीटीएस'मध्ये उपचार सुरू असून, तिन्ही रुग्णांना कधी ना कधी तंबाखुसह धुम्रपानाचे व्यसन होते, असेही त्यांच्याशी बोलल्यानंतर स्पष्ट झाले. या विषयी एमजीएम वैद्यकीय महाविद्यालय व रुग्णालयातील इंटरव्हेश्नल रेडिओलॉजिस्ट डॉ. शिवाजी पोले म्हणाले, माझ्याकडे दररोज दोन ते तीन, तर महिन्याकाठी ३० ते ४० गँगरीनचे रुग्ण उपचारासाठी येतात. यामध्ये ग्रामीण भागातील रुग्णांमध्ये असलेले धुम्रपानाचे व्यसन, हेच प्रमुख कारण असल्याचे स्पष्ट झाल्याशिवाय राहात नाही. त्याशिवाय मधुमेह, उच्चरक्तदाब, स्थुलता, स्टिरॉईडचा वापर हीदेखील गँगरीनची इतर कारणे आहेत. शहरी रुग्णांमध्ये मधुमेह हेदेखील महत्वाचे कारण असल्याचे डॉ. पोले म्हणाले.

\B'निकोटिन'ने रक्तवाहिन्या होतात ब्लॉक

\Bतंबाखू आणि तंबाखुजन्य पदार्थांमधील 'निकोटीन'मुळे पायाच्या छोट्या-मोठ्या रक्तवाहिन्या ब्लॉक होतात आणि रक्तपुरवठा सुरळीत न झाल्यास 'गँगरीन'ची शक्यता वाढत जाते. त्यातही तंबाखुजन्य पदार्थांपेक्षा थेट धुम्रपानामुळे पायाच्या रक्तवाहिन्या चोकअप होण्याची जास्त शक्यता असते. मधुमेह हेदेखील आणखी एक प्रमुख कारण असल्याचे शहरी रुग्णांवरुन दिसून येते आणि या आजाराला 'पेरिफेरल व्हॅस्क्युलर डिसीज' म्हटले जात असल्याचे फिजिशियन व इंन्टेसिव्हिस्ट डॉ. आनंद देशमुख म्हणाले. याच पद्धतीने हृदयाच्या रक्तवाहिन्या ब्लॉक झाल्या तर हृदयरोग किंवा हृदयाचा झटका, तर मेंदुच्या रक्तवाहिन्या ब्लॉक झाल्या तर पक्षाघात होऊ शकतो. त्यामुळे थोडे चालतानाही विनाकारण पोटऱ्या (क्रॅम्प्स) भरुन येत असतील किंवा व्यायाम केल्यावर शरीर किंवा पाय गरम होण्याऐवजी थंड पडत असतील, तर ते 'पेरिफेरल व्हॅस्क्युलर डिसीज'चे एक लक्षण असू शकते, असेही डॉ. देशमुख म्हणाले.

\Bशाखा जास्त तर ब्लॉक्सदेखील जास्त

\Bरक्तवाहिन्यांच्या शाखा (ब्रान्चेस) जेवढ्या जास्त, तेवढे ब्लॉक्स होण्याची शक्यता जास्त असते आणि हृदयापेक्षा पायाच्या रक्तवाहिन्यांच्या शाखा जास्त व किचकट असतात. त्यामुळे पायाच्या रक्तवाहिन्या ब्लॉक होण्याची शक्यता जास्त असते. त्यातच ग्रामीण भागातील व्यक्ती तसेच शेतकऱ्यांकडून कष्टाची कामे मोठ्या प्रमणावर होत असतात आणि त्यामुळे त्यांच्यामध्ये शहराच्या तुलनेत हृदयरोग किंवा पक्षाघात कमी असू शकतो. मात्र तरीही 'निकोटीन'चा परिणाम म्हणून 'पायाचा अटॅक' अर्थात 'गँगरीन' होतोच. यात 'ड्राय गँगरीन' असेल तर जवळजवळ सगळ्याच केसेसमध्ये रुग्णाचा पाय वाचवता येऊ शकतो. 'वेट गँगरीन' असेल तर मात्र धोका जास्त असतो व यात पायाचा काही भाग काढावा लागू शकतो. अर्थात रुग्णावर वेळेत उपचार झाले तर पाय गमावण्याची वेळ कमीत कमी येते, असेही डॉ. पोले यांनी स्पष्ट केले.

म. टा. प्रतिनिधी, औरंगाबाद

महापालिकेचे आयुक्त डॉ. निपुण विनायक रजेवरून परतण्याची शक्यता नाही, अशी चर्चा सुरू झाली आहे. त्यामुळे पालिकेतील पदाधिकाऱ्यांचे धाबे दणाणले आहे. डॉ. विनायक यांनी रजा न वाढवता परत यावे, यासाठी त्यांना गळ घातली जात आहे.

डॉ. निपुण विनायक सोमवारपासून रजेवर गेले आहेत. त्यांची रजा १७ मार्चपर्यंत आहे. या काळात शासनाने ओमप्रकाश बकोरिया यांच्याकडे पालिका आयुक्तपदाचा अतिरिक्त कार्यभार दिला आहे. महापालिकेतील सूत्रांनी दिलेल्या माहितीनुसार; डॉ. निपुण विनायक रजा वाढवण्याची शक्यता आहे. त्यांच्या कार्यपद्धतीवर आक्षेप घेत स्थायी समितीचे सभापती रेणुकादास (राजू) वैद्य यांनी त्यांना अकार्यक्षम ठरविण्याचा प्रयत्न केला होता. त्यांनी आयुक्तांना नावे पत्र दिल्याने महापालिकेचे वातावरण ढवळून काढले आहे. सभापतींच्या पत्राला डॉ. विनायक यांनी सर्वसाधारण सभेत सविस्तर उत्तर दिले. त्यांच्या उत्तराला प्रत्युत्तर देत सभापतींनी पुन्हा एक पत्र त्यांना दिले. पत्रप्रपंचापासून डॉ. विनायक नाराज झाल्याचे सांगितले जात होते. त्यामुळेच त्यांनी १७ मार्चपर्यंत रजा टाकली. आता पुन्हा ते रजा वाढवण्याच्या विचारात आहेत.

डॉ. विनायक रजा वाढवणार असल्याची कुणकुण लागल्यामुळे महापालिकेतील प्रमुख पदाधिकाऱ्यांचे धाबे दणाणले आहे. रजा न वाढवता त्यांनी परत यावे, अशी गळ घातली जात आहे. या काळात आयुक्तपदाचा अतिरिक्त कार्यभार ओमप्रकाश बकोरिया यांच्याकडे देण्यात आला आहे. डॉ. निपुण विनायक यांनी रजा वाढवली, तर बकोरिया यांच्याकडेच महापालिका आयुक्तपदाची सूत्रे राहतील आणि ते अधिकारी, पदाधिकाऱ्यांना परवडणार नाही. त्यामुळे डॉ. निपुण विनायक यांनी परत यावे, यासाठी प्रयत्न केले जात आहेत.

म. टा. प्रतिनिधी, औरंगाबाद

कॉपीमुक्त परीक्षेचे सगळे दावे कागदावरच राहिले आहेत. बारावी परीक्षेत कॉपी प्रकरणांनी मंगळवारी ३०० चा आकडा पार केला. जमिनीवर बसून परीक्षा देणे, दहा रुपयात कॉपी, सामुहिक कॉपी अशा प्रकरणांनी दहावी, बारावी परीक्षा गाजते आहे.

माध्यमिक व उच्च माध्यमिक शिक्षण मंडळातर्फे बारावीची परीक्षा २१ फेब्रुवारीपासून तर दहावीचे पेपर एक मार्चपासून सुरू झाले. कॉपीमुक्त परीक्षा असा दावा मंडळाने केला होता. त्यासाठी शिक्षण विभागाची भरारी पथके, महसूल विभागाचे बैठे पथक परीक्षा केंद्रावर नेमण्यात आल्याचे सांगण्यात येते. असे असले तरी, हा सगळा दावा फोल ठरल्याचे पहिल्या दिवसापासून समोर आला आहे. अनेक केंद्रावर सामुहिक कॉपी सर्रास सुरू आहे. त्यासह कॉही केंद्रावर शेटरमध्ये जमिनीवर बसून परीक्षा देण्याची वेळ परीक्षार्थींवर आली. त्यामुळे पायाभूत सुविधांमध्येही सगळे दावे कागदावरच राहिले. मंगळवारच्या बारावीच्या भुगोलचा पेपर होता. या पेपरला कॉपी प्रकरणांनी ३००चा आकडा पार केला आहे. मंगळवारी विभागात ४२ विद्यार्थ्यांवर कारवाई करण्यात आली. यात सर्वाधिक ३५ विद्यार्थी हे बीड जिल्ह्यातील आहेत. औरंगाबाद जिल्ह्यातील सात विद्यार्थ्यांचा समावेश आहे.

औरंगाबाद, बीडमध्ये स्पर्धा

बारावीत कॉपी बहाद्दरांच्या आकडेवारीत कोणता जिल्हा स्पर्धेत पुढे राहील यासाठी औरंगाबाद आणि बीड जिल्ह्यात स्पर्धा सुरू आहे. विभागात दोन्ही जिल्ह्यात ९० पेक्षा अधिक विद्यार्थ्यांवर कॉपी प्रकरणी कारवाई करण्यात आली आहे. औरंगाबादमध्ये आजपर्यंत ९४ तर बीडमध्ये ९१ विद्यार्थ्यांवर कारवाई करण्यात आली आहे. आजपर्यंत विभागात ३०१ विद्यार्थ्यांवर कारवाई करण्यात आली आहे.

कॉपीचे नानाविध प्रकार

परीक्षेत पहिल्याच दिवशी जमिनीवर बसून परीक्षा देण्याचा प्रकार समोर आला. त्यानंतर चक्क दहा रुपयाला प्रश्नाच्या उत्तराची झेरॉक्सप्रत, खिडक्यांमधून कॉपी पुरविण्याचे प्रकार, प्रश्नपत्रिकेतर उत्तरे लिहण्याचे प्रकार यासह सामुहिक कॉपी असे प्रकार समोर आले आहेत.

म. टा. प्रतिनिधी, औरंगाबाद

जायकवाडी धरणातील उपयुक्त पाणीसाठ्यात झपाट्याने घट होऊ लागली आहे. त्यामुळे आपत्कालीन पंपहाउस सुरू करण्यासाठी महापालिका प्रशासनाची लगबग सुरू झाली आहे. या पंपहाउसचे काम मंगळवारी सुरू करण्यात आले. आठ दिवसात पंपहाउस तयार होईल असे मानले जात आहे.

जायकवाडी धरणात सध्या २.११ टक्केच उपयुक्त पाणीसाठा आहे. या धरणाच्या दोन्ही कालव्यांमधून पाणीपुरवठा सुरुच असल्यामुळे पाणीसाठ्यात झपाट्याने घट होत आहे. त्याशिवाय बाष्पीभवन देखील मोठ्या प्रमाणावर होत आहे. त्यामुळे दहा ते पंधरा दिवसांत धरण मृतसाठ्यापर्यंत जाण्याची शक्यता वर्तवली जात आहे. मृतसाठ्यातून औरंगाबाद शहरासाठी पाणीपुरवठा करायचा असेल तर त्यासाठी महापालिकेला आपत्कालीन पंपहाउस सुरू करावे लागते. हे पंपहाउस सुरू करण्याच्या कामाला मंगळवारी प्रारंभ करण्यात आला. या कामाची पाहणी कार्यकारी अभियंता हेमंत कोल्हे यांनी केली. त्यांच्याबरोबर उपअभियंता घुले व अन्य अधिकारी कर्मचारी होते. आपत्कालीन पंपहाउसचे काम आठ दिवसांत पूर्ण होईल, असे मानले जात आहे.

जायकवाडी धरणातील पाण्याची आवक पूर्णपणे थांबलेली आहे. धरणातील एकूण पाणीसाठा ७८४.०४५ दशलक्ष घनमीटर इतरा आहे. उपयुक्त पाणीसाठा (जीवंत पाणी साठा) ४५.९३९ दशलक्ष घनमीटर इतका आहे. जीवंत पाणीसाठ्याची टक्केवारी २.११ टक्के आहे. जायकवाडी धरणाच्या उजव्या कालव्यातून ६०० क्युसेक व डाव्या कालव्यातून १२०० क्युसेक पाण्याचा विसर्ग केला जात आहे.

\Bटँकर्सची शंभरी\B

दरम्यान, शहरात पाण्याची मागणी वाढली आहे. पाणीपुरवठा ठरवलेल्या 'नो नेटवर्क' एरियात जलवाहिन्यांचे जाळे नसल्यामुळे टँकरद्वारेच पाणीपुरवठा करावा लागत आहे. गेल्या काही दिवसांत नागरिकांकडून टँकरची मागणी वाढल्यामुळे महापालिकेनेही टँकरची संख्या वाढवली आहे. सध्या ९६ टँकर सुरू आहेत. त्यांची आणखी मागणी आहे. मागणी तपासून टँकर सुरू करण्याबद्दल निर्णय घेतला जाईल, असे कार्यकारी अभियंता कोल्हे यांनी सांगितले. एका टँकरच्या सात ते आठ फेऱ्या होतात. ९६ टँकरच्या माध्यमातून ७६८ फेऱ्या सध्या होत आहेत.

म. टा. प्रतिनिधी, औरंगाबाद

सरस्वती भुवन हायस्कूल, गोंदेगाव येथील केंद्रावर सामुहिक कॉपीचा धक्कादायक प्रकार समोर येताच शिक्षणाधिकारी, शिक्षण मंडळाने तडकाफडकी केंद्र संचालक बदलला. पर्यवेक्षकांचीही चौकशी होणार असून याबाबत मंडळ चौकशी समिती स्थापन करणार असल्याचे सूत्रांनी सांगितले. सरस्वती भुवन संस्थेच्याच बिडकीन केंद्रावर एकाचवेळी २७ कॉपी बहाद्दरांना पकडल्याची घटना ताजी असतानाच हा दुसरा प्रकार समोर आला.

माध्यमिक व उच्च माध्यमिक शिक्षण मंडळातर्फे दहावी, बारावीच्या परीक्षा सुरू आहेत. पहिल्या दिवसापासून परीक्षा केंद्रावर सर्रास कॉपी सुरू आहेत. श्री सरस्वती भुवन शिक्षण संस्थेच्या बिडकीन येथील सरस्वती भुवन हायस्कूल केंद्रावर कॉपी प्रकरणी २७ विद्यार्थ्यांवर कारवाई करण्यात आली होती. ती घटना ताजी असतानाच पुन्हा सोमवारी गोंदेगाव येथील सरस्वती भुवन हायस्कूल केंद्रावर दहावी गणित विषयाच्या पेपरला सामुहिक कॉपीचा प्रकार समोर आला. कार्बनच्या मदतीने अशा प्रकारची एकाच हस्ताक्षरातील कॉपी समोर आली. यात शंभरपेक्षा जास्त छायांकित प्रती शिक्षणाधिकाऱ्यांच्या पथकाने जप्त केल्या. त्यासह कॉपी मोठ्या प्रमाणात जप्त करण्यात आली. संबंधित घटनेनंतर संबंधित केंद्राचा केंद्र संचालक बदलण्यात आला असून त्यांच्यावरही तातडीने कारवाई करण्याचे आदेश शिक्षणाधिकाऱ्यांनी दिले. संबंधित प्रकारची उत्तरे देणाऱ्या अन् अशाप्रकारे मास कॉपी पुरविणाऱ्या शिक्षकाचीही माहिती घेतली जात आहे. शिक्षणाधिकाऱ्यांनी सविस्तर अहवाल दिल्यानंतर या प्रकरणासाठी मंडळाने चौकशी समिती स्थापन करण्याचा निर्णय घेतल्याचे सूत्रांनी सांगितले. ३२५ विद्यार्थी परीक्षा केंद्रावर परीक्षा देत असून १३ पर्यवेक्षक आहेत. त्यांची याबाबत चौकशी होणार आहे.

कॉपी प्रकरणी सहा केंद्र संचालक बदलले

कॉपी प्रकरणात दहावी, बारावी परीक्षेत सहा परीक्षा केंद्रावरील केंद्र संचालक बदलण्याची वेळ आजपर्यंत मंडळावर आली आहे. औरंगाबाद जिल्ह्यातील कॉपीचे प्रमाण मोठ्या प्रमाणात असल्याचा प्रकार समोर आला. त्यात ही कारवाई करण्यात आली आहे. विभागातील उर्वरित जिल्ह्यातही कॉपी प्रकरणाला आळा घालण्यास शिक्षण मंडळ, महसूल विभाग अपयशी ठरला आहे.

या घटनेनंतर तातडीने गोदेंगावचा केंद्र संचालक बदलला आसून, छायांकित कॉपी प्रत बोर्डाकडे देण्यात आली आहे. तसेच प्रसंगी उपस्थित असलेले १३ पर्यवेक्षकांची नावे ही परीक्षा मंडळाला कळविण्यात आले आहेत. लवकरच बोर्ड यांना चौकशी समितीकडे बोलवून साक्ष नोंदवतील. तसेच प्रत्येकाचे हस्ताक्षर तपासून संबंधीतावर कार्यवाही करण्यात येईल. तसेच याबाबत संस्थेला कळवले असून संस्थास्तरावर संबंधितावर कार्यवाही करावी अशी सूचना देण्यात आली आहे.

- बी. बी. चव्हाण

शिक्षणाधिकारी

म. टा. प्रतिनिधी, औरंगाबाद

चहाच्या उधारीचे पैसे मागितल्याने झालेल्या वादातून चाकूहल्ला केल्याप्रकरणात मुकेश जवाहरलाल मखरीजे (केवट) व विकास जवाहरलाल मखरीजे (केवट) यांना अनुक्रमे तीन व एक वर्षाच्या कारावासाची शिक्षा तदर्थ जिल्हा व सत्र न्यायाधीश एन. टी. घाडगे यांनी ठोठावली.

या प्रकरणी दीपक पोपटराव कुमावत (रा. विश्वानंद कॉलनी) यांनी फिर्याद दिली होती. फिर्यादीनुसार, कन्नड येथील शरद पवार कॉलनीत राहणारा मुकेश जवाहरलाल मखरीजे (केवट) याचे वडील चहाचा स्टॉल चालवितात. तीन फेब्रुवारी २०१४ रोजी फिर्यादी हा आपल्या मित्रासह चहा पिण्यासाठी स्टॉलवर आला होता. त्यावेळी फिर्यादीला चहाची उधारी मागितल्यामुळे शाब्दिक वाद झाला होता. त्यावेळी मुकेशने मध्यस्थी करून भांडण सोडविले. मात्र त्याच दिवशी दुपारी मुकेश, भरत तुळशीराम धुपे (रा. शनिमंदिराजवळ) व विकास जवाहरलाल मखरीजे हे तिघे शरद पवार कॉलनीत गेले. त्यांनी फिर्यादीला बोलवून घेतले आणि शिविगाळ करत तिघांनी लाथा-बुक्यांनी मारहाण केली. त्याचवेळी मुकेश व भरत यांनी फिर्यादीवर चाकूहल्ला केला, तर विकासने तो चाकूâ लपवल्याची तक्रार फिर्यादीने केली. फिर्यादीच्या तक्रारीवरुन मुकेश, भरत व विकास यांच्याविरोधात कन्नड पोलिस ठाण्यात गुन्हा दाखल करण्यात आला होता.

\Bपुराव्याअभावी एकास सोडले

\Bखटल्यावेळी, अतिरिक्त जिल्हा सरकारी वकील सतीश मुंडवाडकर यांनी दहा साक्षीदार तपासले. यात वैद्यकीय पुरावा व प्रत्यक्षदर्शींची साक्ष महत्वाची ठरली. दोन्ही बाजूंच्या युक्तिवादानंतर व साक्ष-पुराव्यांवरून न्यायालयाने मुकेशला तीन वर्षे कारावास व दहा हजार रुपये दंड व दंड न भरल्यास सहा महिने कारावास, तर पुरावा नष्ट केला म्हणून भारतीय दंड संहितेच्या २०१ कलमान्वये विकास केवट याला एक वर्ष कारावास व पाच हजार रुपये दंड व दंड न भरल्यास सहा महिने कारावासाची शिक्षा सुनावली. तसेच सबळ पुराव्याअभावी कोर्टाने भरत धुपे यास सोडले.

म. टा. प्रतिनिधी, औरंगाबाद

जवाहरनगर भागात सोनाराला थाप मारून दागिने पळविणाऱ्या महिलेला गुन्हे शाखेने अटक केली आहे. शबाना फेरोज शेख (रा. संजयनगर) असे या महिलेचे नाव असून, तिच्या ताब्यातून चोरलेले दागिने जप्त करण्यात आले आहे.

शिवाजीनगर भागातील कृष्णा ज्वेलर्स येथे ११ फेब्रुवारी रोजी सायंकाळी काळा बुरखा घातलेली एक महिला दाखल झाली. या महिलेने दागिने विकत घ्यावयाचे असल्याचे सांगून सेल्समन शिवाजी औटे यांच्याकडून काही दागिने पाहिले. सोन्याचे पदक आणि तीन सोन्याच्या अंगठ्या निवडल्या. त्यानंतर आपले पती रस्त्यावर रिक्षात थांबले आहेत. मी त्यांना दागिने दाखवून येते, असे सांगितले. त्यावेळी पतीला आत बोलवा, असे म्हटल्यानंतर पतीला अर्धांगवायू झाल्यामुळे ते आत येऊ शकत नसल्याची थाप मारली़ त्यानंतर दागिने घेऊन महिला दुकानातून निघून गेली, ती परत आलीच नाही. याप्रकरणी सेल्समन शुभम शिंदे यांच्या तक्रारीवरून फसवणुकीचा गुन्हा दाखल करण्यात आला होता.

\Bसापळ्यात अडकली

\Bपोलिस उपनिरीक्षक अमोल देशमुख हे ११ मार्च रोजी पेट्रोलिंग करत असताना गुप्त बातमीदाराने माहिती दिली की, सोनाराला ठगवणारी महिला गुन्ह्यातील मुद्देमाल विक्री करण्यासाठी जात आहे. या माहितीवरून उपनिरीक्षक देशमुख आणि त्यांच्या टीमने बायजीपुरा भागात सापळा लावून शबाना फेरोज शेख हिला ताब्यात घेतले़ तिने गुन्हा कबूल केला. तिच्या ताब्यातून ३५ हजार रुपयांचे दागिने जप्त केले आहेत. पुढील तपासासाठी तिला जवाहरनगर पोलिसांच्या ताब्यात देण्यात आले आहे.

म. टा. प्रतिनिधी, औरंगाबाद

इमारतीच्या पार्किंगमध्ये हॅन्डल लॉक करून ठेवलेली दुचाकी चोरल्याप्रकरणी आरोपी अक्रम अल्बदेअरी फैज अल्बदेअरी याला मंगळवारी (१२ मार्च) पुण्यातून अटक करून त्याच्या ताब्यातून चोरीची दुचाकी जप्त करण्यात आली. त्याला न्यायालयात हजर केले असता, आरोपीला शुक्रवारपर्यंत (१५ मार्च) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. वाय. एच. मोहम्मद यांनी दिले.

या प्रकरणी अतिया अख्तर खाजा इमरानोद्दीन (४२, रा. किनो हौसिंग सोसायटी, मौलाना आझाद जवळ) यांनी फिर्याद दिली होती. फिर्यादीनुसार, फिर्यादीचे पती खाजा इमरानोद्दीन यांनी फिर्यादीच्या नावावर दुचाकी घेतली होती. आठ मे २०१८ रोजी रात्री खाजा इमरानोद्दीन यांनी ते राहत असलेल्या इमारतीच्या पार्किंगमध्ये दुचाकी हॅन्डल लॉक करून ठेवली असता दुचाकीची चोरी झाली. फिर्यादीच्या तक्रारीवरून बेगमपुरा पोलिस ठाण्यात गुन्हा दाखल करण्यात आला होता. दरम्यान, पुण्याच्या गुन्हे शाखेने चोरीच्या दुचाकीबाबत आरोपी अक्रम अल्बदेअरी फैज अल्बदेअरी (२०, रा. शिवनेरी नगर, कोंढवा, पुणे, मुळ रा. हिमायतबाग, औरंगाबाद) याला सोमवारी (११ मार्च) अटक केल्याची माहिती बेगमपुरा पोलिसांना माहिती दिली. त्यावरून पोलिसांनी पुण्याहून आरोपीला अटक केली. तसेच त्याच्याकडून चोरीची दुचाकीदेखील जप्त केली.

\Bआणखी दुचाकींची चोरी?

\Bआरोपीला मंगळवारी कोर्टात हजर केले असता, आरोपीने आणखी काही दुचाकींची चोरी केली आहे का, याच्या तपासासह आरोपीने गुन्ह्यात वापरलेली चावी हस्तगत करणे बाकी आहे. तसेच चोरलेल्या दुचाकीची जुनी नंबर प्लेट कुठे ठेवली व आरोपीला गुन्ह्यात कोणी मदत केली का, याचाही तपास करावयाचा असल्याने आरोपीला पोलिस कोठडीत देण्याची विनंती सहय्यक सरकारी वकील भागवत काकडे यांनी कोर्टात केली. ही विनंती मान्य करून कोर्टाने आरोपीला शुक्रवारपर्यंत पोलिस कोठडी सुनावली.

म. टा. प्रतिनिधी, औरंगाबाद

लोकसभा निवडणुकीच्या अनुषंगाने ग्रामीण पोलिसांनी ऑल आउट ऑपरेशन मोहीम राबवून सोमवारी रात्री रेकॉर्डवरील तब्बल ३९ गुन्हेगारांना बेड्या ठोकल्या. ग्रामीण पोलिस अधीक्षक मोक्षदा पाटील यांच्या आदेशानुसार ही कारवाई करण्यात आली.

कन्नडमध्ये अवैध शस्त्र बाळगल्याप्रकरणी एका व्यक्तीला अटक करण्यात आली. चिकलठाणा हद्दीतील गेवराई येथे अवैध शस्त्र बाळगल्याप्रकरणी एकाला अटक केली. त्यांच्याकडून दोन तलवारी, एक चाकू आणि एक कोयता जप्त केला. ग्रामीण पोलीस हद्दीतील १७ गुन्हेगारी वस्त्यांवर शोध मोहीम राबवत काही गुन्ह्यात पाहिजे असलेल्या आरोपींना अटक केली. जिल्ह्यातील जुन्या गुन्ह्यातील ३५ हिस्ट्रीशिटरची आणि रेकॉर्डवरील आरोपींची चौकशी करण्यात आली. वीरगाव आणि चिकलठाणा परिसरात अवैध वाळूची वाहतूक करणाऱ्या दोघांना ताब्यात घेतले आहे. त्यांच्याकडून दोन मोठी वाहने जप्त केली. नाकाबंदीच्या दरम्यान एक हजार ५४ वाहनांची तपासणी करत ६७ वाहनांवर दंडात्मक कारवाई केली. ग्रामीण पोलिसांनी अचानक सुरू केलेल्या ऑपरेशन ऑल आउट मोहिमेमुळे ग्रामीण भागातील गुन्हेगारांमध्ये एकच खळबळ उडाली आहे.

म. टा. प्रतिनिधी, औरंगाबाद

अधिव्याख्यात्यांच्या 'कॅस'ला सहसंचालक गैरहजर राहिल्यामुळे बीड जिल्ह्यातील शेकडो प्राध्यापकांची परवड झाली. विद्यापीठात बैठकीसाठी जमलेल्या अधिव्याख्याते पाच तास वाट पाहून अखेर बीडला परतले. नियोजित वेळापत्रक माहिती असूनही सहसंचालक आले नसल्यामुळे प्राध्यापक प्रचंड संतापले.

डॉ. बाबासाहेब आंबेडकर मराठवाडा विद्यापीठ आणि सहसंचालक, उच्च शिक्षण कार्यालयाने अधिव्याख्यात्यांचे स्थाननिश्चिती (कॅस) शिबीर आयोजित केले आहे. बीड जिल्ह्यातीलल अधिव्याख्यात्यांचे १२ मार्च, जालना १३ मार्च, औरंगाबाद १४ मार्च आणि उस्मानाबाद जिल्ह्याचे १५ मार्चला कॅस शिबीर होणार आहे. या बैठकीत संबंधित अधिव्याख्यात्याला वेतन निश्चितीसह मान्यता देण्यात येणार आहे. सेवापुस्तिका, कुटुंब मर्यादा प्रमाणपत्र, जात वैधता प्रमाणपत्र आणि इतर कागदपत्रांसह बोलावले होते. या वेळापत्रकाप्रमाणे बीड जिल्ह्यातील प्राध्यापक विद्यापीठात उपस्थित होते. पण, सहसंचालक सतीश देशपांडे उपस्थित राहिले नाही. त्यामुळे प्राध्यापकांची प्रचंड गैरसोय झाली. प्राध्यापकांच्या कॅस प्रक्रियेबाबत शिक्षण सहसंचालक कार्यालय अतिशय बेजबाबदारपणे वागल्याची टीका प्राध्यापकांनी केली. बीड जिल्ह्यातील जवळपास दीडशे प्राध्यापक सकाळी दहापासून सहसंचालक सतीश देशपांडे यांची वाट पाहत होते. देशपांडे कॅसकडे फिरकले नसल्यामुळे प्राध्यापक विद्यापीठाच्या महात्मा फुले सभागृहात बसून होते. अखेर दुपारी सर्वजण बीडला परतले. ही अत्यंत निषेधार्ह बाब असून याचा जाब सहसंचालकांना विचारला पाहिजे असे व्यवस्थापन परिषदेचे माजी सदस्य उल्हास उढाण यांनी सांगितले.

विद्यापीठाचा कर थकला

राज्य शिक्षण कर, रोजगार हमी कर, वृक्ष कर असा एकूण एक कोटी १४ लाख ७४ हजार रुपये कर विद्यापीठाकडे थकीत आहे. या कराच्या वसुलीसाठी महापालिकेचे कर निरीक्षक शिवाजी झनझन आणि सहकाऱ्यांनी मंगळवारी कुलसचिव डॉ. साधना पांडे यांची भेट घेतली. कर माफ करण्याची मागणी विद्यापीठाने केली आहे. मात्र, राज्यातील एकाही विद्यापीठाचा कर माफ करण्यात आला नसल्याचे झनझन यांनी सांगितले. या पद्धतीने कर माफ झालेल्या एखाद्या विद्यापीठाचे नाव सांगा असेही प्रशासनाला सूचवले. विद्यापीठाच्या एकूण ३८ इमारतींच्या कराचाही त्यात समावेश आहे.

म. टा. प्रतिनिधी, औरंगाबाद

दुष्काळी परिस्थितीत डॉ. बाबासाहेब आंबेडकर मराठवाडा विद्यापीठातील विद्यार्थ्यांना मोफत जेवण देण्याच्या योजनेला अखेर सुरुवात झाली. या योजनेत ८२२ विद्यार्थ्यांना दरमहा ११०० रुपये मदत दिली जाणार आहे. या उपक्रमाला राज्यभरातील दानशूर व्यक्ती आणि संस्थांना हातभार लावला आहे.

दुष्काळी पार्श्वभूमीवर विद्यापीठ कॅम्पसमधील विद्यार्थ्यांना मोफत जेवण देण्याच्या योजनेला सुरुवात झाली आहे. विद्यापीठ प्रशासनाचे दहा लाख रुपये आणि दानशूर व्यक्ती-संस्थांचे २८ लाख असे ३८ लाख रुपये योजनेसाठी जमा झाले आहेत. प्रशासकीय उदासीनतेत विद्यार्थ्यांना मदत मिळत नव्हती. याबाबत 'मोफत जेवणाचा नुसता गाजावाजा' हे वृत्त 'महाराष्ट्र टाइम्स'ने (१२ मार्च) प्रसिद्ध केले. या वृत्तानंतर राष्ट्रवादी विद्यार्थी काँग्रेसचे दीपक बहिर यांच्यासह विद्यार्थ्यांनी प्र-कुलगुरू डॉ. अशोक तेजनकर यांची भेट घेऊन बिकट परिस्थिती सांगितली. तेजनकर यांनी तातडीने विद्यार्थी कल्याण विभागाला सूचना करुन मदत देण्याची सूचना केली. त्यानुसार दुपारी योजनेतीलल पात्र विद्यार्थ्यांच्या बँक खात्यात प्रत्येकी ११०० रुपयांची मदत जमा झाली. दुष्काळग्रस्त सहायता समितीचे अध्यक्ष व व्यवस्थापन परिषद सदस्य डॉ. नरेंद्र काळे यांनी सामाजिक संस्थांना मदतीसाठी आवाहन केले होते. मुंबईच्या केअरिंग फ्रेंड्स संस्थेने काळे यांच्याशी चर्चा करून २२ लाख रुपये आर्थिक सहाय्य केले. दरमहा विद्यार्थ्यांच्या खात्यावर रक्कम जमा करण्याची अट संस्थेने घातली होती. त्यानुसार मदतीचा पहिला हप्ता दहा लाख रुपये विद्यापीठाच्या खात्यात जमा करण्यात आला होता. या उपक्रमामुळे दुष्काळग्रस्त तालुक्यातील शेकडो विद्यार्थ्यांना फायदा झाला आहे.

चार महिने मदत मिळणार

योजनेसाठी विद्यार्थ्यांचे अर्ज मागवले होते. त्यानुसार चार महिने प्रत्येकी ११०० रुपये मदत दिली जाणार आहे. पहिल्या महिन्याची मदत मंगळवारी देण्यात आली, असे नरेंद्र काळे यांनी सांगितले. यात ४७२ विद्यार्थी आणि ३५० विद्यार्थिनी असे एकूण ८२२ विद्यार्थ्यांचा समावेश आहे. एकूण नऊ लाख चार हजार रुपये मदत देण्यात आली.

दुष्काळी परिस्थितीची दाहकता पाहून तातडीने निर्णय घेतला. चार महिने दरमहा ११०० रुपये मदत देण्यात येईल. विद्यापीठ प्रशासन विद्यार्थ्यांना नेहमीच सहकार्य करण्यासाठी तत्पर आहे.

डॉ. अशोक तेजनकर, प्र-कुलगुरू

केअरींग फ्रेंड्स संस्थेचे निमेषभाई सुमती यांनी भरीव मदत करुन विद्यार्थ्यांना आधार दिला. मानवलोक संस्थेचे अनिकेत लोहिया यांनीही सहकार्य केले. यशवंतराव चव्हाण यांच्या जयंतीच्या दिवशीच गरजू विद्यार्थ्यांना मदत मिळाल्याचा आनंद आहे.

डॉ. नरेंद्र काळे, सदस्य, व्यवस्थापन परिषद

म. टा. प्रतिनिधी, औरंगाबाद

'जगणे अर्थपूर्ण करायचे असेल तर तुम्हाला कलेशी जोडून घ्यावे लागते. कला तुम्हाला कधीच सोडून जाणार नाही. उलट तुमच्या जीवनात ती आनंदच निर्माण करील. आयुष्याचा समतोल वाढवण्यासाठी कला आवश्यक आहे,' असे प्रतिपादन ज्येष्ठ अभिनेते डॉ. मोहन आगाशे यांनी केले. ते पुरस्कार स्वीकारल्यानंतर बोलत होते.

मराठवाडा साहित्य परिषदेतर्फे दिला जाणारा यशवंतराव चव्हाण वाड्मय पुरस्कार 'मी लोकांचा सांगाती' या पुस्तकासाठी भाई संपतराव पवार यांना आणि नटवर्य लोटू पाटील पुरस्कार ज्येष्ठ अभिनेते डॉ. मोहन आगाशे यांना प्रदान करण्यात आला. नांदापूरकर सभागृहात मंगळवारी सायंकाळी कार्यक्रम झाला. यावेळी व्यासपीठावर डॉ. मोहन आगाशे, भाई संपतराव पवार, कविवर्य ना. धों. महानोर, डॉ. मनोहर जाधव, डॉ. दिलीप घारे, कौतिकराव ठाले पाटील, प्रकाश पायगुडे यांची प्रमुख उपस्थिती होती. महानोर यांच्या हस्ते पवार आणि आगाशे यांना पुरस्कार प्रदान करण्यात आला. स्मृतिचिन्ह आणि रोख ११ हजार रुपये असे पुरस्काराचे स्वरुप आहे. हा पुरस्कार स्वीकारल्यानंतर आगाशे यांनी कला आणि जीवनाचा अर्थ उलगडला. 'करणारा तो…आपण निमित्त असे म्हणत प्रामाणिकपणे काम केल्यास आनंद मिळतो. मनाला शिस्त लावली तर निसर्गाचा आनंद घेता येतो. कलाकार काही वेगळा नसतो. उत्तम स्वयंपाक करणे, केर काढणे ही सुद्धा कला आहे. त्यामुळे कलाकारांचे फाजील लाड बंद करून काही काळ पुरस्कार देणेसुद्धा थांबवले पाहिजे,' असे आगाशे म्हणाले. पवार यांनी सामाजिक चळवळीचा मागोवा घेतला.

'नैसर्गिक संपत्ती आणि मानवी श्रमातून विकास करता येतो हे मला उमगले. चळवळ यशस्वी करायची असेल तर संवेदनशील माणसांचे कवच लाभले पाहिजे. संकटात लोकांना साथ दिल्यास ते कायम सोबत राहतात. दुष्काळात लोकांना आत्मभान देण्याचे काम केल्याचा प्रवास पुस्तकात मांडला,' असे पवार म्हणाले. डॉ. दिलीप घारे यांनी आगाशे यांच्या कारकिर्दीवर आणि मनोहर जाधव यांनी पवार यांच्या पुस्तकावर भाष्य केले. डॉ. दादा गोरे यांनी सूत्रसंचालन केले आणि डॉ. रामचंद्र काळुंखे यांनी आभार मानले. यावेळी पदाधिकारी व रसिक उपस्थित होते.

\Bगिधाडे वाढली

\Bआपल्या भाषणात आगाशे यांनी 'घाशीराम कोतवाल', 'गिधाडे' या नाटकांच्या आठवणी सांगितल्या. 'घाशीराम कधीच व्यावसायिक नाटक झाले नाही. प्रयोग जास्त होत राहिले तरी ते हौशीच होते. तेंडूलकर यांनी 'गिधाडे' नाटक लिहिल्यानंतर असे लोक असतात का, असा प्रश्न विचारला गेला. आजकाल गिधाडे इतकी झालीत की साधी माणसं असतात का असा प्रश्न विचारावा लागेल,' असे आगाशे म्हणाले.

म. टा. प्रतिनिधी, औरंगाबाद

बीड बायपास रोडवरील अपघातांची साखळी भेदण्यासाठी सुरू केलेल्या अतिक्रमण हटाव कारवाईत महापालिकेकडून चक्क भेदभाव केला जात आहे. बड्या मालमत्ताधारकांवर कारवाई करण्यात चालढकल सुरू असून, मंगळवारी देवळाई चौक ते सूर्या लॉन्स समोरील भागातील काही निवडक मालमत्ताधारकांचे अतिक्रमण हटविण्यात आले. त्यामुळे ही कारवाई वादाच्या भोवऱ्यात सापडली आहे.

बायपास रोडवरील होणारे अपघात रोखण्यासाठी सोमवारी अतिक्रमण हटाव कारवाई सुरू करण्यात आली. या कारवाईत पोलिस आयुक्त चिरंजीव प्रसाद यांच्या उपस्थितीत निशांत हॉटेल समोरील भागापासून ते जबिंदा लॉन्सपर्यंतच्या प्रस्तावित रस्त्यावरील मालमत्ता हटविणे सुरू करण्यात आले. त्यात दहा मालमत्तांचे अतिक्रमण काढण्यात आले. पोलिस आयुक्तांनी स्वत: फिरून ही जागा रस्त्यासाठी द्या, असे आवाहन मालमत्ताधारकांना केले. पोलिस बंदोबस्त मिळाल्याने पालिकेनेही धडाक्यात कारवाई सुरू केली. मास्टर कुकसमोरील भागापासून जंबिंदा लॉन्स आणि गुरुकुल शाळेच्या बाजुच्या मोकळ्या मैदानावरील जागा प्रस्तावित रोडसाठी घेतली. मंगळवारी सकाळी दहा वाजल्यापासून कारवाईला प्रारंभ झाला. मात्र, पोलिस आयुक्त नसल्याने कारवाई करण्यात भेदभाव करणे सुरू झाले. यात सर्वाधिक अपघात प्रणव क्षेत्र असलेल्या देवळाई चौक ते सूर्या लॉन्सकडे जाणाऱ्या प्रस्तावित रस्त्यावरील मालमत्तांची अतिक्रमणे हटविण्यात आली. यातही बड्या दुकानादरांना वगळ्यात आले. देवळाई चौकातील छोट्या दुकानदारांना काही तासांत दुकाने रिकामे करण्याचे फर्मान पालिकेच्या पथकाने सोडले. दोन जेसीबी घेऊन पालिकेचे अधिकारी कारवाईसाठी उभेच होते. दुकानदारांनी आपली कागदपत्रे दाखवून कारवाई थांबविण्याचा प्रयत्न केला. मात्र, दुकानासमोरील पत्रे हटविण्याची कारवाई सुरू करण्यात आली. ही कारवाई सुरू करताच दुकानदार आपले सामान बाहेर काढण्यासाठी धावले. त्यांनी सामान बाहेर काढण्यास सुरुवात केली. पालिकेचे पथक सामान बाहेर काढेपर्यंत काही वेळेसाठी थांबले. त्यानंतर ही दुकाने जमीनदोस्त करून सर्व्हिस रोडसाठी प्रस्तावित जागा मुक्त केली. यावेळी काही मालमत्ताधारकांनी आपला आक्षेप नोंदविला. काहींनी कोर्टाची कागदपत्रे महापालिका अधिकाऱ्यांना दाखविण्यासाठी आणली. मात्र, ही कागदपत्रे पोलिस आयुक्तांना दाखवा, असे त्यांना सांगण्यात आले. इतकी कडक कारवाई करताना मात्र अनेक बड्या मालमत्ताधारकांना पालिकेच्या पथकाने सूट देत त्यांच्यावर कृपाछत्र धरले. या बड्या दुकानदारांच्या मालमत्ता हटविणार का, रेणुका माता मंदिराच्या कमानीसमोरील भागापासून ते देवळाई चौकापर्यंत कारवाई करणार नाही का, असा सवाल छोट्या दुकानदारांनी उपस्थित केला. मात्र, पालिकेच्या अधिकाऱ्यांनी याबाबत उत्तर देणे टाळले. त्यामुळे व्यापाऱ्यांमध्ये असंतोष काही. काही ठरविक आणि बड्या दुकानादरांच्या अतिक्रमणांना अभय कशासाठी, असा सवाल उपस्थित केला जात आहे.

\Bआजही चालणार बुलडोझर

\Bबुधवारी सकाळपासून सूर्या लॉन्स ते देवळाई या मार्गावर प्रस्तावित सर्व्हिस रोडसाठी या रस्त्यावरील अतिक्रमणे हटविली जाणार आहेत, अशी माहिती महापालिकेच्या अधिकाऱ्यांनी दिली. मात्र, ज्याप्रमाणे मंगळवारी बायपासवरील बड्या मालमत्तांना वगळून कारवाई करण्यात आली. तसेच या ठिकाणीही होणार का, असा प्रश्न उपस्थित केला जात आहे.

……

बीड बायपास रोडवरील ज्या ठिकाणी सर्वाधिक अपघात होत आहेत, अशा ठिकाणी प्रस्तावित सर्व्हिस रोडवरील मालमत्ता हटविण्याची कारवाई सध्या केली जात आहे. ही मोहीम सुरूच राहणार आहे. सर्व्हिस रोड जोडण्यासाठी आवश्यक सर्व मालमत्ता आगामी काही दिवसांत हटविण्यात येतील.

- ओमप्रकाश बकोरिया, प्रभारी महापालिका आयुक्त

……