म. टा. प्रतिनिधी, औरंगाबाद महापालिकेच्या दतीने बीड बायपासवरील अतिक्रमणे हटवून तेथे सर्व्हिस रोड नक्कीच करण्यात येणार आहे. या करिता तेथील नागरिक, लोकप्रतिनिधींची मदत घेण्यात येणार आहे, अशी माहिती पोलिस आयुक्त चिरंवजीप्रसाद यांनी शुक्रवारी पत्रकारांशी बोलताना दिली. दरम्यान, शुक्रवारी सकाळी ११ वाजता आयुक्तांनी बीड बायपास भागात अतिक्रमणाच्या पाडापाडीची पाहणी केली. पोलिस आयुक्त चिरंजीवप्रसाद यांनी बीड बायपास रोड येथे पाहणी करताना न काढलेली अतिक्रमित बांधकामे काढण्याच्या सूचना पालिका अधिकाऱ्यांना केल्या. त्यांच्यासोबत पोलिस उपायुक्त डॉ. राहुल खाडे, पोलिस निरीक्षक भारत काकडे, अशोक मुदीराज आदींची उपस्थिती होती. यावेळी पत्रकारांशी बोलताना ते म्हणाले की, बीड बायपास भागातील कारवाईत नागरिकांचे सहकार्य उत्तम राहिले आहे. यापुढील काळात अतिक्रमणे हटविताना नागरिक, लोकप्रतिनिधी यांच्याशी चर्चा करण्यात येणार आहे. अतिक्रमण हटाव मोहिमेला पोलिस बंदोबस्त देण्यात आल्याची माहिती त्यांनी दिली. पडेगाव तसेच हर्सूल येथील अतिक्रमणामुळे देखील वाहतुकीस अडचण होत असून अपघात होत आहेत. या अतिक्रमित रस्त्यावर देखील आगामी काळात कारवाई करणार असल्याचे संकेत त्यांनी दिली. लक्ष्मण चावडी ते एमजीएम हा जालना रोडला पर्यायी रस्ता असलेले काम रखडले आहे. हे काम नेमके कशामुळे रखडले आहे, याची माहिती घेणार असल्याचेही आयुक्त चिरंजीवप्रसाद यांनी सांगितले.
मोबाइल अॅप डाउनलोड करा आणि राहा अपडेट