म. टा. प्रतिनिधी, औरंगाबाद

चार वर्षात दुप्पट परताव्याचे आमिष दाखवून शेतकऱ्याची १८ लाख ३३ हजार रुपयांची फसवणूक करण्यात आली. या प्रकरणी तीन आरोपींविरुद्ध वेदांतनगर पोलिस ठाण्यात फसवणुकीचा गुन्हा दाखल करण्यात आला आहे. २०१३ ते २०१५ या कालावधीत हा प्रकार घडला.

या प्रकरणी रामकृष्ण परसराम रोठे (वय ४२, रा. वैजापूर) यांनी तक्रार दाखल केली आहे. २०१३ मध्ये रोठे यांची लासूर येथील अभयचंद इंदरचंद मुथा यांच्यासोबत ओळख झाली. मुथा यांनी त्यांची जमीन खरेदी-विक्रीची मोठी फर्म असल्याचे सांगत या फर्ममध्ये पैशांची गुंतवणूक केल्यास चार वर्षात दुप्पट परतावा मिळेल, असे आमिष दाखवले. रोठे यांनी विश्वास ठेवून त्यांना टप्प्याटप्प्याने रक्कम दिली. या रक्कमेची पावती देण्याचे सुरुवातीला मुथा यांनी कबुल केले, मात्र दिली नाही. रोठे यांना रक्कमेचा परतावा मिळाला नसल्याने त्यांनी मुथा यांच्याकडे पैशाची मागणी सुरू केली. बन्सीलालनगर येथील मुथा यांचे कार्यालय गाठून रोठे यांनी पैशाची मागणी केली. यावेळी पैसे परत मिळणार नाही, काय करायचे करा, अशी धमकी मुथा यांनी दिली. या प्रकरणी रोठे यांच्या तक्रारीवरून संशयित आरोपी इंदरचंद माणिकचंद मुथा, अभयकुमार इंदरचंद मुथा आणि संजय चंद्रभान बोरा (सर्व रा. रेल्वे स्टेशन) यांच्या विरुद्ध फसवणूकीचा गुन्हा दाखल करण्यात आला आहे. याप्रकरणी उपनिरीक्षक भदरगे हे तपास करीत आहेत.

म. टा. प्रतिनिधी, वैजापूर

तालुक्यातील खंडाळा येथील मुश्ताक उस्मान पठाण (वय ४०) या रिक्षाचालकाचा मृतदेह शनिवारी सकाळी जाफ्राबाद (ता. श्रीरामपूर) येथे संशयित अवस्थेत सापडल्याने खळबळ उडाली आहे. चोरांनी मारहाण करून रोख रक्कम व मोबाइल पळवल्याची माहिती त्यांनी कुटुंबीयांना एका हॉटेलवरील फोनवरून दिली होती. त्यामुळे संशय निर्माण झाला आहे.

मुश्ताक पठाण हे रिक्षाचालक शुक्रवारी रात्री श्रीरामपूर येथून होंडा सीटी विनापासिंग दुचाकी घेऊन वैजापूरकडे येत होते. नाऊर चौफुलीवरून वैजापुरकडे येण्याचा रस्ता सोडून ते जाफ्राबाद रस्त्याने गेले. त्यांचा मृतदेह शनिवारी सकाळी स्थानिक व्यक्तींनी बघितला. त्यानंतर पोलिस पाटील राजेंद्र राशीनकर यांनी पोलिसांना कळवले. दुचाकीच्या कुशनवरील मोबाइल नंबरवरून मृताची ओळख पटली. मृताच्या शरिरावर मारहाणीच्या खुणा नसल्याचे हेड कॉन्स्टेबल अशोक गायकवाड यांनी सांगितले. दरम्यान, याप्रकरणी श्रीरामपूर पोलिस ठाण्यात अकस्मात मृत्युची नोंद करण्यात आली आहे. मुश्ताक यांच्या मागे पत्नी, पाच मुले, आई वडील, असा परिवार आहे.

सल्ला ऐकला नाही

चोरांनी मारहाण करून मोबाइल व रोख रक्कम पळवल्याची माहिती मुश्ताक यांनी घरी दिल्यानंतर त्यांना हॉटेलवरच थांबण्याचा सल्ला दिला होता. मात्र हा सल्ला न ऐकता मुश्ताक जाफ्राबादकडे गेल्याने त्यांच्या जीवावर बेतले, अशी चर्चा ग्रामस्थांमध्ये आहे.

म .टा. प्रतिनिधी, औरंगाबाद

महापालिकेने शहरात सुरू केलेल्या सिटीबस सेवेवा औरंगाबादकरांचा मोठा प्रतिसाद मिळत असल्यामुळे रिक्षाच्या भाड्यांत कपात करण्यात आली आहे. शेअरिंग रिक्षाचे प्रमुख मार्गावर पहिल्या दोन किलोमीटरचे दर कमी करण्यात आले असून, शहर बसची संख्या वाढल्यानंतर हे भाडे आणखी कमी होणार असल्याची शक्यता रिक्षाचालकांनी व्यक्त केली.

औरंगाबाद शहरात स्मार्ट सिटीबस सेवा सुरू करण्यात आली आहे. २४ शहर बसच्या माध्यमातून ही बस सेवा सुरू करण्यात आली. ही बस सेवा सुरू झाल्याचा फटका शहरातील रिक्षाचालकांना बसत आहे. आधीच रिक्षा परमिट खुले असल्याने रिक्षाचालकांत स्पर्धा वाढली आहे. त्यात सिटीबस सेवेची आता भर पडली आहे. सध्या शहरात चालत असलेल्या बसचा वापर करणाऱ्या प्रवाशांची संख्या पूर्वीच्या तुलनेत तिप्पटीने वाढली आहे.

सुरवातीच्या काही दिवस रिक्षाचालकांनी सिटीबसला मिळत असलेल्या प्रतिसादाची माहिती घेतली. सिटीबसची प्रवासी संख्या वाढू लागली, त्यानंतर रिक्षाचालकांनी शेअरिंग रिक्षाचे दोन किलोमीटर अंतरासाठी प्रती प्रवासी भाडे पाच रुपयांनी कमी केले. मोठ्या अंतरासाठी पूर्वीचे भाडे कायम ठेवले आहे. विशेष म्हणजे फक्त सिटीबस सुरू असलेल्या मार्गावरील भाडे कमी करण्यात आले आहे. यात जालना रोड, जळगाव रोड आणि बीड बायपास रोड, वाळूज रोड यांचा समावेश आहे. सध्या शहरबसची संख्या ३४पर्यंत पोचली आहे. ही संख्या ५०पर्यंत पोचल्यास रिक्षांचे आणखी कमी होण्याची शक्यता काही चालकांनी व्यक्त केले आहे.

………

शहारातील मुख्य मार्गावरील रिक्षांचे भाडे

मार्ग..............................पूर्वीचे भाडे.....आताचे दर

रेल्वे स्टेशन ते मोंढा नाका.......२०.............१५

रेल्वे स्टेशन ते सिडको............३०.............२५

बाबा पेट्रोल पंप ते सिडको.......३०.............२५

बाबा पेट्रोल पंप ते मोंढा नाका...२०.............१५

……

शहर बस सुरू आहेत. याशिवाय वाढलेल्या रिक्षांसह अवैधरित्या कंपनीच्या बसमधून प्रवासी वाहतूक केली जात असल्याचा फटका रिक्षाचालकांना बसत आहे. रिक्षाचालकांचा धंदा २० ते २५ टक्क्यांनी घटला आहे.

- निसार अहेमद, रिक्षा चालक संघर्ष कृती समिती

……

शहर बसने प्रवासी दर कमी ठेवले आहे. त्यांना परवडत नसतानाही त्यांचे दर कमी आहे. यामुळे काही मार्गावर प्रवाशांना सेवा देण्यासाठी दर कमी करण्यात आले आहे.

- दत्ता नागरे, जिल्हाध्यक्ष, जय भगवान महासंघ

औरंगाबादेत शिवसेना, भाजप युतीचा रविवारी मेळावा झाला. या मेळाव्यात शिवसेनेच्या नेते, पदाधिकाऱ्यांनी शिवसेनेचा स्कार्फ गळ्यात घातला होता, तर भाजपच्या नेते, पदाधिकाऱ्यांनी भाजपचा स्कार्फ गळ्यात घातला होता. खासदार चंद्रकांत खैरे यांच्या गळ्यात फक्त शिवसेनेचा स्कार्फ होता. ही बाब लक्षात आल्यावर डॉ. भागवत कराड व संजय केनेकर यांनी खैरेंच्या गळ्यात भाजपचा स्कार्फ देखील घातला.

म. टा. प्रतिनिधी, औरंगाबाद

डॉ. बाबासाहेब आंबेडकर तंत्रशास्त्र विद्यापीठातर्फे (बाटू) घेण्यात आलेल्या अभियांत्रिकी परीक्षेचा निकाल रखडला आहे. डिसेंबरमध्ये परीक्षा घेण्यात आली, सध्या मार्च सुरू आहे. मात्र, निकाल अद्याप जाहीर नाही. निकालास विलंब करणाऱ्या इतर विद्यापीठांच्या रांगेत 'बाटू'ही येऊन बसले आहे.

राज्यातील तंत्रशिक्षण अभ्यासक्रमाच्या कॉलेजांसाठी स्वतंत्र विद्यापीठ असलेल्या डॉ. बाबासाहेब आंबेडकर तंत्रशास्त्र विद्यापीठाकडे संलग्निकरणाचा आकडा वाढतो आहे. मात्र, विद्यापीठाच्या कारभारातील अडचणी दूर झालेल्या नाहीत. परीक्षेच्या निकालाला होणारा विलंब आता समोर आला आहे. विद्यापीठाने डिसेंबरमध्ये विविध सत्रातील परीक्षा घेतल्या निकाल जाहीर करण्यास विद्यापीठ विसरले, असे चित्र आहे. विद्यापीठाकडे यंदापासून संलग्नित महाविद्यालयांची संख्या १०८ वर पोहचली. यातील अभियांत्रिकी अभ्यासक्रमाच्या कॉलेजांची संख्या सत्तरच्या घरात आहे. अभियांत्रिकी पदवी अभ्यासक्रमांच्या परीक्षा दहा डिसेंबर ते चार जानेवारी दरम्यान घेण्यात आल्या. परीक्षा झाल्यानंतर ४५ दिवसांत निकाल जाहीर करणे आवश्यक असते. परीक्षा होऊन ७५ दिवस उलटले. त्यानंतरही अद्याप निकालाचा पत्ता नाही. निकालानंतर पुढील प्रक्रियाही लांबणार असल्याने विद्यार्थ्यांमध्ये नाराजीचा सूर आहे. विद्यापीठ प्रशासनाकडून योग्य उत्तरे दिली जात नाहीत. त्यामुळे कॉलेज प्रशासनामध्येही संताप आहे.

उत्तरपत्रिका तपासणीच नाही

'सीसीटीव्ही'च्या निगराणीत परीक्षा, ६०+४० पॅर्टन असा दावा विद्यापीठ प्रशासनाकडून केली जाते. त्यासह इतर विद्यापीठांच्या तुलनेत वेगळे असा दावा करणाऱ्या 'बाटू'चा प्रशासनाचा दावा फोल ठरला आहे. निकालाला लागणारा विलंब विद्यापीठासाठी डोकदुखी ठरला आहे. विद्यापीठाकडून उत्तरपत्रिकांची तपासणी ऑनलाइन पद्धतीने केली जाते. अद्याप कॉलेजांची संख्या मर्यादित आहे. त्यात सर्व महाविद्यालयांचे हे द्वितीय वर्ष आहे. त्यामुळे उत्तरपत्रिकांची संख्या मर्यादित आहे. सूत्रांनी दिलेल्या माहितीनुसार उत्तरपत्रिका तपासणीची प्रक्रियाच पूर्ण झालेली नाही. यंदा विद्यापीठाने तपासणीचे काम सर्व कॉलेजांकडे दिले होते. जानेवारीच्या पहिल्या आठवड्यापासूनच तपासणीचे काम विभागून दिल्यानंतरही तपासणीचे काम पूर्ण झालेले नाही. उत्तरपत्रिका तपासणीची प्रक्रियाच पूर्ण झाली नसल्याने त्यांची प्रक्रिया पूर्ण केव्हा होणार आणि निकाल केव्हा असा प्रश्न उपस्थित केला जात आहे.

म. टा. प्रतिनिधी सिल्लोड

घरची अत्यंत हलाकीची स्थिती असताना एका शेतकऱ्याच्या मुलाने जिद्दीने परिश्रम करत महाराष्ट्र लोकसेवा आयोगाची परीक्षा उत्तीर्ण होत पोलिस उपनिरीक्षकपद मिळवले आहे. विष्णू गोविंदा वाघ (रा. पिंपळगाव घाट), असे या तरुणाचे नाव आहे.

विष्णू वाघ यांच्या वडिलांना अडीच एकर कोरडवाहू शेती असून त्यावरच संपूर्ण कुटुंब उदरनिर्वाह करते. कोरडवाहू शेती असल्यामुळे परिस्थिती अत्यंत हलाखीची आहे. या परिस्थितीत वडिलांनी दोन बहिणींचे कसेबसे लग्न केले. त्यामुळे परिस्थितीची जाणीव ठेवूत विष्णू यांनी जिद्दीने अभ्यास केला. महाविद्यालयीन शिक्षण घेताना सुट्यांत केटरिंगची कामे केली. एम. ए. (अर्थशास्त्र) पर्यंत शिक्षण घेत असताना पोलिसांत भरती होण्याचा प्रयत्न यशस्वी झाला नाही. महाराष्ट्र लोकसेवा आयोगाच्या परीक्षेची तयारी सुरू केली, पण, खासगी शिकवणी लावण्याची ऐपत नसल्याने औरंगाबाद येथे विद्यापीठात मोफत अभ्यासिकेत मन लाऊन अभ्यास केला. जानेवारी २०१६ पासून तयारी करत तीन वर्षांत यश मिळवले.

\Bअभ्यासावर लक्ष केंद्रीत करा: वाघ\B

आई-वडिलांचा चेहरा नेहमी डोळ्यासमोर ठेऊन अभ्यास करावा. अभ्यास करताना एकाग्रता ठेवावी, पुस्तकांचे खूप वाचन करावे. व्हॉट्सअप, फेसबुक यासह मोबाइलचा वापर कमी करून तरुणांनी अभ्यासावर लक्ष केंद्रीत करावे, असे आवाहन विष्णू वाघ यांनी केले आहे.

म. टा. प्रतिनिधी, औरंगाबाद

आम्ही टीका चोरून केली नाही आणि मैत्रीही चोरून केली नाही. दिलखुलासपणे मैत्री केली आहे, असे प्रतिपादन शिवसेनेचे पक्षप्रमुख उद्धव ठाकरे यांनी केले. आदित्य ठाकरे यांच्या उमेदवारीबद्दल पक्षच निर्णय घेईल. त्यात आपण पडणार नाही, असेही त्यांनी स्पष्ट केले.

शिवसेना, भाजप युतीच्या मराठवाडा विभागातील पदाधिकारी व लोकप्रतिनिधींचा मेळावा रविवारी औरंगाबादेत झाला. यावेळी उद्धव ठाकरे बोलत होते. व्यासपीठावर मुख्यमंत्री देवेंद्र फडणवीस, विधानसभेचे अध्यक्ष हरिभाऊ बागडे, भाजपचे प्रदेशाध्यक्ष रावसाहेब दानवे, बबनराव लोणीकर, संभाजी पाटील निलंगेकर, पंकजा मुंडे, अर्जुन खोतकर, सुजीतसिंह ठाकूर, खासदार प्रितम मुंडे, शिवसेनेचे संपर्कनेते विनोद घोसाळकर, आमदार मनिषा कायंदे, आमदार संजय शिरसाट,आमदार अतुल सावे, महापौर नंदकुमार घोडेले, जिल्हा परिषदेच्या अध्यक्षा अॅड. देवयानी डोणगावकर, भाजपचे शहराध्यक्ष किशनचंद तनवाणी, शिवसेनेचे जिल्हाप्रमुख अंबादास दानवे, नरेंद्र त्रिवेदी आदी उपस्थित होते.

उद्धव ठाकरे म्हणाले, 'आता आपसातील वाद मिटले आहेत. जबाबदाऱ्यांचेही वाटप झाले आहे. येथे येईपर्यंत सर्वांचे लक्ष अर्जुन खोतकर व रावसाहेब दानवे यांच्याकडे होते. खोतकर हे शिवसेनाप्रमुखांचा कट्टर शिवसैनिक आहेत. ते चुकीच्या मार्गाने जाणार नाहीत. श्रीकृष्णाने अर्जुनाला माशाचा डोळा दाखवला होता. मी या अर्जुनाला देशद्रोह्यांचा डोळा दाखवला आहे. गेल्या काही काळात संघर्ष झाला. दोन्ही पक्ष इरेला पेटले. स्वतंत्र लढण्याचाही निर्णय घेतला, पण आता हेच उगाळत बसायचे का?'

भाजप, शिवसेनेची युती म्हणजे आमच्यावर मोठी जबाबदारी आहे. राज्याच्या हिताच्या विरोधात शिवसेना आली असा एकही मुद्दा मुख्यमंत्र्यांनी दाखवावा, असे आव्हान ठाकरे यांनी दिले. पदाधिकाऱ्यांना ते म्हणाले, 'युती झाली म्हणून आरामात राहू नका. जनतेचे आशीर्वाद आपल्याला हवे आहेत. शासनाने जनतेसाठी, शेतकऱ्यांसाठी विविध योजना जाहीर केल्या. कर्जमाफी देखील केली, पण योजना, कर्जमाफी तळागाळापर्यंत पोचवण्याचे काम आपल्याला करायचे आहे. यासाठी गावागावात मदतकेंद्र सुरू करा, मदतकेंद्र सुरू केल्यावर वेगळा प्रचार करण्याची देखील गरज पडणार नाही.'

गोपीनाथ मुंडे यांचा उल्लेख करून ते म्हणाले, 'गोपीनाथरावांनी युतीसाठी आयुष्य वाहून टाकले. त्यांनी अपार कष्ट केले. त्यांनी कष्ट केल्यामुळे आपण पंतप्रधान, मुख्यमंत्री होण्याचे स्वप्न पाहू शकतो.'

यावेळी अर्जुन खोतकर, पंकजा मुंडे, रावसाहेब दानवे, चंद्रकांत खैरे यांची भाषणे झाली. खैरे यांच्या कार्य अहवालाचे प्रकाशन मुख्यमंत्री व शिवसेनापक्षप्रमुखांच्या हस्ते करण्यात आले. अंबादास दानवे यांनी सूत्रसंचालन केले. महापौर नंदकुमार घोडेले यांनी आभार मानले.

महालक्ष्मीचे दर्शन घेऊन २४ मार्च रोजी प्रचाराचा नारळ आम्ही वाढवत आहोत. आम्हाला सत्ता गोरगरीबांसाठी पाहिजे आहे. आमच्या मुलाबाळांसाठी सत्ता नको आहे. आदित्य ठाकरे यांच्या उमेदवारीबद्दल पक्षच काय तो निर्णय घेईल आणि ठरवेल. त्यात मी पडणार नाही. शिवसेना गोरगरीबांसाठी लढणारी संघटना आहे. आता दुराव्याचा कोळसा उगाळत बसायचे नाही.

- उद्धव ठाकरे, शिवसेना पक्षप्रमुख

म. टा. प्रतिनिधी, औरंगाबाद

मराठवाड्यातील ३२ लाख दुष्काळी शेतकऱ्यांसाठी सरकारने अनुदान वाटपाचे तीन टप्प्यांतील अनुदानाची रक्कम दिली असली तरी उर्वरित ७९२ कोटी रुपये आचारसंहितेच्या कचाट्यात अडकले आहेत. त्यामुळे आता दुष्काळी अनुदानाची उर्वरित रक्कम लोकसभा निवडणुका झाल्यानंतरच शेतकऱ्यांच्या पदरात पडण्याची शक्यता आहे.

पाणी नाही, पैसा नाही, दुष्काळामुळे अर्थचक्र बिघडल्यामुळे मराठवाड्यातील शेतकरी मेटाकुटीला आला आहे. सरकारने मदत म्हणून विभागाला यंदा २५६४ कोटी ९१ लाख रुपयांची मदत जाहीर केली. आतापर्यंत तीन टप्प्यांमध्ये १७७२ कोटी ७१ लाख रुपयांची मदत त्या-त्या जिल्ह्यांना वितरित करण्यात आली. यातील ९७ टक्के रक्कम वाटपही करण्यात आली आहे. तथापि, अनेक शेतकऱ्यांना अद्याप या अनुदानाचा छदामही मिळालेला नाही.

दुष्काळ जाहीर झाल्यानंतर महिन्याभरानेच मराठवाड्याला ५२५ कोटी रुपयांचा पहिला हप्ता मिळाला होता. त्यानंतर १४ फेब्रुवारी रोजी ५२५ कोटी रुपयांचा दुसरा हप्ता तर २१ फेब्रुवारी रोजी विभागातील शेतकऱ्यांसाठी ७२२ कोटी रुपयांचा निधी प्राप्त झाला. एकूण देण्यात आलेल्या १७७२ कोटी ७१ लाख रुपयांपैकी १७२४ कोटी रुपये (९७.२७ टक्के) २७ लाख २२ हजार ५२२ लाभार्थी शेतकऱ्यांच्या बँक खात्यामध्ये जमा करण्यात आली आहे. मराठवाड्यात तब्बल ३२ लाख शेतकऱ्यांना दुष्काळाचा फटका बसला असून उर्वरित शेतकरी मदतीच्या प्रतिक्षेत आहेत. यंदा दुष्काळामुळे मराठवाड्यातील ४८ लाख ६१ हजार हेक्टर क्षेत्रापैकी ३३ लाख ७१ हजार हेक्टरवरील पिके करपली असून, ९० टक्के शेतकऱ्यांना दुष्काळाचा फटका बसला आहे. मराठवाड्यात दुष्काळ जाहीर झालेल्या पाच हजार ५१७ गावांपैकी केवळ पाच हजार २२७ गावातील २९ लाख २७ हार ९१३ लाभार्थी शेतकऱ्यांच्या याद्या तयार करण्यात आल्या आहेत. यापैकी २७ लाख २२ हजार ५२२ शेतकऱ्यांच्या बँक खात्यामध्ये नियमाप्रमाणे अनुदानही मिळाले आहे. अनुदानाची वाट पाहणाऱ्या शेतकऱ्यांना आचारसंहिता संपुष्टात येईपर्यंत शेतकऱ्यांना अनुदानाची वाट पहावी लागण्याची शक्यता आहे.

यंदा अत्यल्प पावसामुळे मराठवाड्यातील खरिपाची होळी झाली. ४८ लाख ६१ हजार हेक्टर क्षेत्रापैकी तब्बल ३३ लाख ७१ हजार हेक्टरवरील पिके दुष्काळामुळे करपली. यामध्ये ३६ लाख २७ हजार शेतकऱ्यांपैकी तब्बल ३२ लाख ५५ हजार (९० टक्के) शेतकऱ्यांना दुष्काळाचा फटका बसला असून शेतकरी अनुदानाची वाट पाहत आहेत.

प्राप्त अनुदान - १७७२ कोटी ७१ लाख

शिल्लक अनुदान - ७९२ कोटी २० लाख

दुष्काळ घोषित गावे - ५५१७

याद्या तयार असलेली गावे - ५२२७

एकूण शेतकरी संख्या - ३२ लाख ९८ हजार ३३७

यादी तयार शेतकरी संख्या - २९ लाख २७ हजार ९१३

बँकेत पैसे जमा झालेले शेतकरी संख्या- २७ लाख २२ हजार ५२२

बँकेत पैसे जमा - १७२४ कोटी २६ लाख

टक्केवारी - ९७.२७ टक्के

म. टा. प्रतिनिधी, औरंगाबाद

मराठवाडा साहित्य परिषदेचा 'कवयित्री लिला धनपलवार विशेष काव्य पुरस्कार' रविवारी (१७ मार्च) नांदेडचे ज्येष्ठ कवी गोविंद कुलकर्णी यांना प्रदान करण्यात आला. ज्येष्ठ समीक्षक प्रा. प्रभाकर बागले यांच्या हस्ते हा पुरस्कार प्रदान करण्यात आला.

मराठवाडा साहित्य परिषद कवितेच्या क्षेत्रात मोलाची कामगिरी करणाऱ्या मराठवाड्यातील कवीला 'लिला धनपलवार' यांच्या नावाने पुरस्कार देते. यंदा हा पुरस्कार गोविंद कुलकर्णी यांना देण्यात आला. रविवारी मराठवाडा साहित्य परिषदेच्या डॉ. नांदापूरकर सभागृहात हा पुरस्कार प्रदान सोहळा पार पडला. यावेळी डॉ. दासू वैद्य, प्राचार्य कौतिकराव ठाले पाटील, डॉ. दादा गोरे यांची व्यासपीठावर उपस्थिती होती.

यावेळी गोविंद कुलकर्णी यांच्या कविता लेखनावर दासू वैद्य यांनी भाष्य केले. वैद्य म्हणाले की, 'गोविंद कुलकर्णी हे दुर्मिळ सच्चेपणा असलेले कवी असून ते निष्ठेने कविता लिहित गेले. बाहेरच्या जगामध्ये काय सुरू आहे याची पर्वा न करता गोविंद कुलकर्णी हे त्यांच्या पद्धतीने कविता करतात. जगण्याच्या छोट्या छोट्या क्षणातून कविता करता येते हे गोविंद कुलकर्णी यांच्या कवितेतून स्पष्ट होते.' कार्यक्रमास साहित्य क्षेत्रातील मान्यवरांची उपस्थिती होती.

म. टा. प्रतिनिधी, औरंगाबाद

जुन्या वादातून विष्णूनगरमध्ये शनिवारी मध्यरात्री दोन गटात पिता-पुत्रावर प्राणघातक हल्ला करण्यात आला. या हल्ल्यात दोघे गंभीर जखमी झाले असून त्यांच्यावर उपचार सुरू आहेत. या प्रकरणी जवाहरनगर पोलिस ठाण्यात दोन्ही गटांनी परस्पर विरोधात दिलेल्या तक्रारीवरून खुनाचा प्रयत्न आणि जबरी चोरीचे गुन्हे दाखल करण्यात आले आहेत. या प्रकरणी एका गटाच्या चार आरोपींना अटक करण्यात आली आहे.

या प्रकरणी पहिल्या गटातर्फे रतन हिरालाल अग्रवाल (वय ४९, रा. विष्णूनगर) यांनी तक्रार दाखल केली आहे. अग्रवाल यांचा सोनपापडी विक्रीचा व्यवसाय असून ते पत्नी, मुलगा शुभम, सिद्धांत यांच्यासोबत राहतात. काही दिवसापूर्वी या भागातील संदीप शिंदे, सचिन पालेजा, रवींद्र तोगे आणि लहू गटकाळ यांच्यात वाद झाला होता. दरम्यान, अग्रवाल यांचा मुलगा शुभम हा संदीप शिंदे आणि सचिन पालेजा यांच्या ओळखीचा आहे. शनिवारी मध्यरात्री शुभम मित्रासह घरी येत असताना त्याच्यावर गटकाळ, तोगे आणि चार ते पाच जणांनी चाकू आणि लोखंडी रॉडने हल्ला केला. अग्रवाल यांच्या मित्राने त्यांना फोनवर ही माहिती दिली. यानंतर रतन अग्रवाल तातडीने घटनास्थळी गेले. मुलगा शुभमला वाचवण्यासाठी ते प्रयत्न करत असताना गटकाळ याने रतन अग्रवाल यांच्यावरही चाकूने हल्ला केला. यामध्ये अग्रवाल हे गंभीर जखमी झाले. रिवॉल्व्हरचा धाक दाखवत गटकाळ याने अग्रवाल यांना कायमचे संपण्याची धमकी दिली. अग्रवाल बेशुद्धावस्थेत कोसळल्याने ते मरण पावल्याचे समजून संशयित आरोपी पळून गेले. याप्रकरणी अग्रवाल यांच्या तक्रारीवरून आरोपी लहू गटकाळ, रवींद्र तोगे आणि साथीदारांविरुद्ध खुनाचा प्रयत्न, दंगल करणे आदी कलमानुसार गुन्हा दाखल करण्यात आला आहे. लहू गटकाळ, रवींद्र तोगे, अंकुश मंडलिक आणि गणेश जोशी यांना पोलिसांनी अटक केली. या प्रकरणी पोलिस निरीक्षक हेमंत गिरमे तपास करीत आहेत.

याच प्रकरणात दुसऱ्या गटातर्फे रवींद्र तोगे यांनी तक्रार दाखल केली आहे. या तक्रारीत रवींद्र तोगे हे त्यांचे मित्र अंकुश मंडलिक, गणेश जोशी यांच्यासोबत घरी येत होते. यावेळी संशयित आरोपी संदीप शिंदे हा गाडीसमोर आला आणि त्याने मारहाण करीत रिवॉल्व्हरचा धाक दाखवत ठार मारण्याची धमकी दिली. आपण तेथून पळालो असता रतन अग्रवाल यानी तलवारीने मारहाण करीत गळ्यातील सोन्याची चैन हिसकावली, तसेच सचिन पालेजा, शुभम अग्रवाल, पवन तांबे आणि सोमनाथ शिंदे यांनी मारहाण करत खिशातील साडेनऊ हजार रुपये काढून घेतले. तोगे यांचा मित्र गणेश जोशी हा वाचवण्यासाठी आला असता राहुल पालेजा याने त्याला मारहाण केल्याचे तक्रारीत म्हटले आहे. या तक्रारीवरून सर्व संशयित आरोपींविरुद्ध जबरी चोरीचा गुन्हा दाखल करण्यात आला आहे. या प्रकरणाचा तपास उपनिरीक्षक शशिकांत तायडे हे करीत आहेत.

म. टा. प्रतिनिधी, औरंगाबाद

जमीन विक्रीच्या व्यव्हारातून जेष्ठ नागरिक, तसेच त्यांच्या पत्नी आणि मुलाला घरात घुसून मारहाण करण्यात आली. हा प्रकार शनिवारी रात्री ११ वाजता सिडको एन ७, बजरंग चौक या भागात घडला. याप्रकरणी दोन आरोपींविरुद्ध सिडको पोलिस ठाण्यात गुन्हा दाखल करण्यात आला आहे.

या प्रकरणी अनिल नारायण कुलकर्णी (वय ५६, रा. सिडको एन ७, बजरंग चौक) यांनी तक्रार दाखल केली. कुलकर्णी हे पत्नी, मुले आणि सुनांसह राहतात. काही महिन्यांपूर्वी त्यांचा सुंदरवाडी येथील जमिनी विक्रीचा व्यवहरा सुरेश शिंगारे आणि भुषण शिरोळे यांच्यासोबत ठरवला होता. मात्र, सध्या या जमिनीवरून त्यांच्यात कोर्टात वाद सुरू आहे. संशयित आरोपी सुरेश सखाराम शिंगारे (रा. गारखेडा) आणि भुषण शिरोळे (रा. सिडको एन ५) हे दोघे शनिवारी रात्री ११ वाजता त्यांच्या घरी आले. बळजबरीने घरात घुसून मला तुमची जमीन घ्यायची नाही, माझे पैसे परत करा, असा वाद घालत चापटबुक्क्याने मारहाण केली. कुलकर्णी यांची पत्नी आणि मुलगा भांडण सोडवण्यासाठी आले असता त्यांना देखील शिवीगाळ करीत मारहाण करण्यात आली. तसेच तुला सिडकोत राहू देणार नाही, हातपाय तोडून टाकतो, अशा धमक्या दिल्या. या प्रकरणी कुलकर्णी यांच्या तक्रारीवरून सुरेश शिंगारे आणि भुषण शिरोळे यांच्या विरुद्ध गुन्हा दाखल करण्यात आला आहे.

म. टा. प्रतिनिधी, औरंगाबाद

गुटख्यासह सुगंधी सुपारी व सुगंधी तंबाखूचा साठा करून विकणाऱ्या संशयित आरोपीने दाखल केलेला नियमित जामीन अर्ज जिल्हा व सत्र न्यायाधीश एच.के. भालेराव यांनी फेटाळला. प्रवीण संजय झंवर (वय २८, रा. शेकटा), असे त्याचे नाव आहे.

या प्रकरणी अन्न व औषधी प्रशासन विभागाचे मोहमंद फरीद अब्दुल रशीद सिद्धीकी यांनी तक्रार दिली होती. शेकटा येथे राहणारा प्रवीण झंवर याच्या घरी छापा मारून अन्न व औषध प्रशासन विभागाने २२ हजार ५८ रुपयांच्या गुटख्यासह सुगंधी सुपारी, तंबाखूचा साठा जप्त केला होता. या प्रकरणात करमाड पोलिस ठाण्यात गुन्हा दाखल करण्यात आला. पोलिसांनी तपास करून झंवरला ९ मार्च रोजी अटक केली. न्यायालयाने त्याची पोलिस कोठडीनंतर न्यायालयीन कोठडीत रवानगी केली. त्यानंतर झंवर याने दाखल केलेला नियमित जामीन अर्ज न्यायालयाने फेटाळला. या प्रकरणात सहाय्यक अभियोक्ता अजित अंकुश यांनी काम पाहिले.

अर्जुन खोतकर- रावसाहेब दानवे वादावर पडदा

म. टा. प्रतिनिधी, औरंगाबाद

राज्यमंत्री अर्जुन खोतकर यांनी गेल्या काही दिवसांपासून आपल्या धनुष्याची प्रत्यंचा ताणून भाजपचे प्रदेशाध्यक्ष रावसाहेब दानवे यांच्या नेम धरलेला बाण अखेर पुन्हा त्यांच्याच भात्यात जावून विसावला आहे. रविवारी दानवे-खोतकर यांच्यातील वादावर अखेर पडदा पडला. खोतकर दानवे यांना उद्देशून म्हणाले, 'तुम्ही राज्यकर्ते व्हा, तुमच्यासाठी मी रान मोकळे करीत आहे.' तर, दानवे खोतकर यांना उद्देशून म्हणाले, 'तुम्ही धोका देऊ नका, मी देखील तुम्हाला धोका देणार नाही. इथून पुढे इमाने इतबारे काम करू.'

शिवसेना-भाजप युतीच्या पदाधिकारी व लोकप्रतिनिधींचा मराठवाडास्तरीय मेळावा रविवारी औरंगाबादेत आयोजित करण्यात आला होता. हा मेळावा सुरू होण्यापूर्वी खोतकर-दानवे यांच्यातील वाद मिटवण्यासाठी शहरातील एका हॉटेलमध्ये उच्चस्तरीय बैठक झाली. बैठकीला मुख्यमंत्री देवेंद्र फडणवीस, शिवसेनेचे पक्षप्रमुख उद्धव ठाकरे उपस्थित होते. बैठकीच्या नंतर झालेल्या मेळाव्यात खोतकर-दानवे यांची भाषणे झाली.

यावेळी बोलताना खोतकर म्हणाले, 'काय बोलावे हा प्रश्नच आहे. गेले तासभर मुख्यमंत्री व शिवसेनेचे पक्षप्रमुख यांच्या बरोबर मी व रावसाहेब दानवे बसलो होतो. उद्धव ठाकरे यांनी आम्हा दोघांनाही युतीचा धर्म समजवून सांगितला. गेली ३० वर्षे मी शिवसेनाप्रमुखांचा सच्चा शिवसैनिक आहे. आता पक्षप्रमुखांनी निर्णय घेतला आहे. मी कधीच पक्षाच्या विरोधात गेलो नाही. मधल्या काळात आमच्या जिल्ह्यात आणीबाणीची स्थिती निर्माण झाली होती. आमचा मित्र मोठा झाला पाहिजे, पण मोठा होताना त्याने सोबतच्यांना विसरू नये, युतीचा धर्म त्यांनी देखील पाळावा. युतीसाठी पक्ष जी काही जबाबदारी देईल ती पूर्णपणे पार पाडू. आजपासून युतीच्या कामाला लागणार आणि युतीचा झेंडा फडकवणार आहे.'

रावसाहेब दानवे म्हणाले, 'खोतकर आणि मी वर्ष-दोन वर्षे एकमेकांच्या विरोधात बोलत होतो. संघर्ष करीत होतो. आणीबाणीत भाग घेणाऱ्यांना आता कॉम्पेन्सेशन दिले जाईल. आमचा संघर्ष वैयक्तिक नव्हता. जालना जिल्ह्यात युती सर्वात जास्त मजबूत आहे. तुम्ही मला धोका देऊ नका, मी देखील तुम्हाला धोका देणार नाही. इथून पुढे इमाने इतबारे काम करू. मी आता परीक्षेला बसलो आहे. परीक्षेत १०० टक्के मार्क पडतील. तुम्ही जेव्हा परीक्षेला बसाल तेव्हा तुम्हालाही १०० टक्के मार्क पडतील'.

दानवेंचा वाढदिवस खोतकर साजरा करणार

जोपर्यंत श्रीकृष्ण धर्म सांगत नाही तोपर्यंत अर्जुन कामाला लागत नाही हे खरे आहे. जे पूर्वी घडले तेच आजही घडले, असा उल्लेख मुख्यमंत्री देवेंद्र फडणवीस यांनी खोतकर-दानवे यांच्याबद्दल केला. उद्या दानवे यांचा वाढदिवस आहे. तो साजरा करण्यासाठी अर्जुनराव पुढाकार घेतील व वाढदिवस साजरा करतील, असे ते म्हणाले.

म. टा. प्रतिनिधी, औरंगाबाद

बीड बायपासचा सर्व्हिस रोड मोकळा करण्यासाठी महापालिकेने रविवारी सुद्ध कारवाई केली. पालिकने रविवारी सावित्री लॉन्स, कल्पतरू लान्सचे अतिक्रमणे हाटविले.

बायपासवरील अपघातानंतर महापालिका प्रशासन मागील सोमवारपासून सलग कारवाई करत आहे. त्यानुसार, रविवारीही कारवाई सुरूच ठेवण्यात आली. मोठा पोलिस बंदोबस्त, लवाजमा घेवून पालिका प्रशासन बायपासवर पोहचले. सोमवारपासून सुरू असलेल्या कारवाईत ९०पेक्षा अधिक बांधकामे, अतिक्रमणे काढण्यात आली. प्रभारी आयुक्त ओम प्रकाश बकोरिया यांच्या आदेशावरून अतिक्रमण विभागप्रमुख अविनाश देशमुख यांनी रविवारी अतिक्रमण काढण्याची कारवाई सुरू ठेवली. दिवसभरात सावित्री लॉन्स समोरील बांधकाम पाडण्यात आले, तर कल्पतरू लॉन्स जवळील बांधकाम पाडून रस्त्यावरील छोटी अतिक्रमणे हटविण्यात आली. पालिकेचे पथक बायपासवर फिरून रस्त्याला अडथळा ठरणारी अतिक्रमणे काढत असल्यामुळे मालमत्ताधारकांमध्ये खळबळ उडाली. अनेक जण स्वत:हून साहित्य काढून घेत असल्याचे दिसले. या कारवाईत अधिकारी वामन कांबळे, अतिक्रमण हटाव पथक प्रमुख प्रभाकर पाठक, दक्षता पथक प्रमुख एम. बी. काझी, शाखा अभियंता संजय चामले, एस. एल. कुलकर्णी, मजहर अली, विनोद पवार, पी. बी. गवळी, पोलिस निरीक्षक इंदलसिंग बहुरे यांनी सहभाग घेतला.

म. टा. प्रतिनिधी, औरंगाबाद

मुख्यमंत्री देवेंद्र फडणवीस आणि शिवसेनेचे पक्षप्रमुख उद्धव ठाकरे यांच्या उपस्थितीत रविवारी झालेल्या शिवसेना, भारतीय जनता पक्ष युतीच्या मेळाव्यावर समांतर जलवाहिनी आणि कचरा प्रश्नाचे सावट होते. समांतर जलवाहिनीचा प्रश्न युती सरकारच सोडवेल, असे मुख्यमंत्री म्हणाले. समांतर जलवाहिनी, कचरा प्रश्नात 'तू तू - मै मै'मध्ये थोडा वेळ गेला, अशी कबुली ठाकरे यांनी दिली.

औरंगाबाद शहराचा समांतर जलवाहिनीचा प्रश्न, कचऱ्याची समस्या, रस्त्यांचे रखडलेले काम याचा निवडणुकीवर परिणाम होईल आणि युतीला त्याचा जाब द्यावा लागेल, अशी चर्चा आहे. या प्रश्नांचे सावट युतीच्या मेळाव्यावर होते. मुख्यमंत्री देवेंद्र फडणवीस यांनी भाषणात समांतर जलवाहिनीच्या कामाचा आवर्जून उल्लेख केला. ते म्हणाले, 'उद्धव ठाकरे यांनी आताच मला समांतर जलवाहिनीच्या प्रश्नाबद्दल सांगितले आहे. या शहराचा समांतर जलवाहिनीचा प्रश्न युतीचे सरकारच सोडवेल. यासाठी जे जे काही करावे लागेल ते सर्व करण्यासाठी राज्य सरकारची तयारी आहे.'

उद्धव ठाकरे म्हणाले, 'या शहराचा समांतर जलवाहिनीचा प्रश्न असेल, कचऱ्याचा प्रश्न असेल. या प्रश्नात 'तू तू - मै मै'मध्ये थोडा वेळ गेला आहे. हे प्रश्न सोडवण्यासाठी जे काही शक्य आहे ते सर्व करू. येथील नागरिकांच्या मनातील कचरा आम्हा दोघांना मिळून साफ करायचा आहे.'

\Bमटा भूमिका

मुख्यमंत्र्यांमुळे प्रश्न रखडला\B

औरंगाबाद शहराच्या समांतर जलवाहिनीचा प्रश्न मुख्यमंत्र्यांमुळेच रखडला आहे. समांतर जलवाहिनीचे काम करण्यास संबंधित कंपनीने असमर्थता दाखवल्यावर महापालिकेच्या आयुक्तांनी राज्य शासनाकडे एक ते दीड महिन्यापूर्वी स्वतंत्र प्रस्ताव पाठवला. समांतर जलवाहिनीसाठीचे सुमारे ३५० कोटी रुपये महापालिकेकडे जमा आहेत. त्यातून जायकवाडी ते नक्षत्रवाडीपर्यंत मुख्य जलवाहिनी टाकण्याच्या कामाला परवानगी द्या, त्याशिवाय जलवाहिनी कामासाठी ४०० कोटींचा निधी द्यावा, असे या प्रस्तावा म्हटले आहे. शहरातील वाढीव पाणीपुरवठा योजनेसाठी जास्तीच्या ३५० कोटींची मागणी देखील प्रस्तावात करण्यात आली आहे. जायकवाडी ते नक्षत्रवाडी यादरम्यान मुख्यजलवाहिनीचे काम झाले तरी, शहराला पाणीपुरवठ्याबाबतीत मोठा दिलासा मिळणार आहे, पण हा प्रस्ताव मुख्यमंत्र्यांकडेच खाते असलेल्या नगरविकास विभागाकडे पडून आहे, त्यावर काहीच निर्णय झालेला नाही.

औरंगाबाद - डॉ. बाबासाहेब आंबेडकर मराठवाडा विद्यापीठाच्या नाट्यशास्त्र विभागात 'पंचरंगी पठ्ठे बापूराव' कार्यक्रम आयोजित करण्यात आला आहे. नाट्यशास्त्र विभागात सोमवारी सायंकाळी सहा वाजता कार्यक्रम होणार आहे. लोककला अकादमीचे प्रमुख प्रा. डॉ. गणेश चंदनशिवे, प्रा. डॉ. प्रवीण भोळे, प्रा. डॉ. प्रकाश खांडगे यांच्या मार्गदर्शनाखाली कार्यक्रम सादर होईल. योगेश चिकटगावकर, आरती नगरकर, प्रमिला लोदगेकर, आतंबर शिरढोणकर, स्मिता वेताळे, प्राजक्ता महामुनी, विकास कोकाटे आदी कलावंत सहभागी होणार आहेत. गण-गौळण, रंगबाजी, लावणी, छक्कड, कटाव, सवाल-जबाब लोककला प्रकार सादर होणार आहेत.

म. टा. प्रतिनिधी, पैठण

लोकसभा निवडणुकीच्या आदर्श आचारसंहितेची अंमलबजावणी सुरू झाली असून खासदार रावसाहेब दानवे यांना वाढदिवसाच्या शुभेच्छा देण्यासाठी शहरभर विनापरवाना लावलेले डिजिटल होर्डिंग नगर पालिकेने जप्त केले.

लोकसभेच्या निवडणुकीची आचारसंहिता लागू होताच शहरातील विनापरवाना डिजिटल बोर्ड, पक्षाचे होर्डिंग व विविध राजकीय पक्षांचे चिन्ह असलेले झेंडे काढण्याची मोहीम सुरू करण्यात आली आहे. शनिवारी रात्रीपासून, खासदार दानवे यांना वाढदिवसाच्या शुभेच्छा देणारे भाजप कार्यकर्ते कल्याण गायकवाड यांचे डिजिटल बॅनर शहरातील प्रत्येक चौकात झळकण्यास सुरुवात झाली होती. याची माहिती मिळताच रविवारी ते काढून जप्त करण्यात आले. विनापरवाना डिजिटल बोर्ड व झेंडे लावल्यास जप्त करून कार्यवाही केली जाईल, असा इशारा नगर पालिकेने दिला आहे.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठात शहाजीराजे भोसले अध्यासन केंद्र सुरू करण्यात येणार आहे. या केंद्राच्या विस्तारांतर्गत वेरूळ येथे विद्यापीठाने उपक्रम राबवावेत, असा प्रस्ताव शहाजीराजे भोसले स्मारक समितीने दिला आहे. नियोजित प्रस्तावानुसार पुरेशी जागा उपलब्ध झाल्यास वस्तूसंग्रहालय आणि संशोधन केंद्र साकारण्याची शक्यता आहे. या प्रस्तावावर विद्यापीठ प्रशासन लवकरच निर्णय घेणार आहे.

विद्यापीठ कॅम्पसमध्ये ११ अध्यासन केंद्रे कार्यरत असून, चार नवीन केंद्रांची भर पडणार आहे. येत्या जून महिन्यात प्रस्तावित अध्यासन केंद्रे सुरू करण्यात येणार आहेत. यात लोककवी वामनदादा कर्डक अध्यासन केंद्र, विलासराव देशमुख अध्यासन केंद्र, शहाजीराजे भोसले अध्यासन केंद्राचा समावेश आहे. ऐतिहासिक संशोधन आणि प्रकल्पाला वाहिलेले शहाजीराजे भोसले संशोधन केंद्र विद्यापीठाचे वैशिष्ट्यपूर्ण केंद्र ठरणार आहे. वेरूळ येथे मालोजीराजे गढी व शहाजीराजे भोसले स्मारक आहे. स्मारक समितीने विद्यापीठाला अध्यासन केंद्रांतर्गत वेरूळला नियमित उपक्रम घेण्याबाबत चर्चा केली. मालोजीराजे गढी परिसरात समितीने तीन दालने बांधली आहेत. संशोधन केंद्रासाठी एखादे दालन देणे शक्य असल्याचे चव्हाण यांनी सांगितले. एकूण नऊ एकर जागेपैकी तीन एकर जागा रस्ता आणि आरोग्य केंद्रासाठी संपादित करण्यात आली. अडीच एकर जागेवर स्मारकाचा विकास करण्यात आला आहे. सध्या साडेतीन एकर जागा शिल्लक आहे. शिवपूर्वकाळात बांधलेल्या तलावालगत भोसले घराण्याची १६३ एकर जमीन आहे. ही जमीन स्मारक समितीने मिळवण्यासाठी प्रशासकीय स्तरावर प्रयत्न सुरू केले आहेत. या प्रस्तावाला तत्वत: मान्यता मिळाली आहे, असे चव्हाण यांनी सांगितले.

शहाजीराजे यांचे स्वराज्य स्थापनेत विशेष योगदान आहे. त्यांच्या कारकिर्दीवर प्रकाश टाकणारा प्रकल्प नियोजित जागेवर सुरू करणे विचाराधीन आहे. स्मारक समिती वर्षभर विविध उपक्रमातून शहाजीराजांचे स्मरण करीत असते. या कार्याला विद्यापीठाच्या अध्यासन केंद्राची जोड मिळणार आहे. संशोधन आणि ऐतिहासिक वस्तूंचे संवर्धन असा प्रकल्प अध्यासन केंद्राच्या माध्यमातून राबविण्यात येणार आहे.

\Bवेरूळला आज कार्यक्रम\B

स्वराज्यसंकल्पक शहाजीराजे भोसले जयंती महोत्सव सोमवारी वेरूळ येथे होणार आहे. या कार्यक्रमाला डॉ. राजे मुधोजी भोसले (नागपूर), शिवाजी दत्तात्रय राजे जाधव (सिंदखेडराजा), विधानसभा अध्यक्ष हरिभाऊ बागडे, राज्यमंत्री अर्जुन खोतकर, मराठा रामनारायण, मराठा सुमीत (पानिपत), बाबा भांड आदी उपस्थित राहणार आहेत. यावेळी ध्वजारोहण आणि सांस्कृतिक कार्यक्रम होणार आहे.

शहाजीराजे भोसले अध्यासन केंद्र विद्यापीठाने सुरू करणे आनंदाची बाब आहे. विद्यापीठात उपक्रम घेतानाच वेरूळ येथेही घेण्याची गरज आहे. अध्यासन केंद्रासाठी तीन दालनातील काही जागा देणे शक्य आहे.

- किशोर चव्हाण, अध्यक्ष, शहाजीराजे भोसले स्मारक समिती

म. टा. प्रतिनिधी, औरंगाबाद

धारुर (जि. बीड) येथे मिनी एमआयडीसी तयार करण्यात येत आहे. त्याठिकाणी एमआयडीसीमध्ये पायभूत सुविधांची कामे केली जाणार आहेत. या कामासाठी सव्वा कोटीची निविदा महाराष्ट्र राज्य औद्योगिक महामंडळाने काढली आहे.

धारूर औद्योगिक वसाहतीमध्ये भूखंड विक्री झाली आहे. ३१ एकर औद्योगिक वसाहतीत पायभूत सुविधा पुरविणे शिल्लक होते. या क्षेत्रफळात दोन व्यावसायिक भूखंडांसह ६३ औद्योगिक भूखंड आहेत. अंतर्गत रस्त्यांचे मजबुतीकरण, डांबरीकरण केले जाईल. सध्या असलेल्या मुरूमाच्या रस्त्यावर डांबरीकरण, जलव्यवस्थापनाचा भाग म्हणून तयार करण्यात आलेल्या विहिरीचे खोलीकरण या माध्यमातून काम करण्यात येणार आहे. संपूर्ण औद्योगिक वसाहतीत १०० मिलिमीटर रुंदीची जलवाहिनी टाकण्यात येणार आहे. जलवितरणासाठी पाण्याची टाकी आणि पथदिवे बसविले जातील. त्यासाठी एक कोटी ३५ लाख ८२ हजार ९०० रुपयांची निविदा महामंडळाने काढली आहे.

म. टा. प्रतिनिधी, औरंगाबाद

कापूस खरेदी विक्रीचा व्यवसाय करणाऱ्या व्यापाऱ्यासह २८ शेतकऱ्यांना ८० लाख १६ हजार ६५ रुपयांचा गंडा घालणाऱ्या गुजरातच्या चार व्यापाऱ्यांनी दाखल केलेला अटकपूर्व जामीन अर्ज जिल्हा व सत्र न्यायाधीश के. आर. चौधरी यांनी फेटाळला. राजूभाई मनसूखलाल जोशी (वय ४५), गौरव राजेश राजकोट (वय २१), राकेश वासुदेव आचार्य (वय २४) व अजय विनोदराय जोशी (वय ३३, सर्व रा. राजकोट, गुजरात), अशी त्यांची नावे आहेत.

या प्रकरणात संतोष निवृत्ती वाघ (वय २७, रा. शेकटा) यांनी तक्रार दिली होती. वाघ यांचा ओमसाई कॉटन ग्रुप असून ते कापूस खरेदी-विक्रीचा व्यापार करतात. २०१६ मध्ये सोमनाथ कॉटेक्स जीनिंगचे मालक राजूभाई जोशी यांच्याशी कापसाबद्दल तोंडी करार केला होता. त्यानुसार, वाघ यांनी जीनिंगला कापूस द्यायचा व कंपनीने प्रति क्विंटल ७० रुपये कमिशन द्यायचे ठरले. त्यानुसार वाघ हे शेकटा परिसरातील शेतकऱ्यांकडून कापूस घेऊन संशयित आरोपींना विकत होते. ७ नोव्हेंबर २०१६ ते ३१ मार्च २०१७ दरम्यान जीनिंगचे गौरव जोशी व राकेश आचार्य हे दोघे स्वत: शेकटा येथे हजर राहून कापसाची प्रतवारी पाहून ट्रकमधून कापूस पाठवित होते. संशयित आरोपींनी २०८ ट्रकमध्ये १५ कोटी ५४ लाख ७६ हजार ७७५ रुपयांचा २७ हजार १२५ क्विंटल कापूस पाठविला होता. त्यापैकी १४ कोटी ७४ लाख ६० हजार ७१० रुपये जीनिंगने शेतकऱ्यांच्या बँक खात्यात 'आरटीजीएस'द्वारे जमा केले. पण, उर्वरित रक्कम व कमिशन मागण्यासाठी वाघ गेले असता राजकोट येथे मारहाण करण्यात आली. या प्रकरणात करमाड पोलिस ठाण्यात गुन्हा दाखल करण्यात आला. या प्रकरणात अटक टाळण्यासाठी चारही संशयित आरोपींनी दाखल केलेला अटकपूर्व जामीन अर्ज न्यायालयाने फेटाळला. या प्रकरणात जिल्हा सरकारी वकील अविनाश देशपांडे यांनी काम पाहिले. त्यांना सिद्धार्थ वाघ यांनी सहकार्य केले.

\B८० लाख हडपले\B

२८ शेतकऱ्यांकडून खरेदी केलेल्या कापसाचे ६१ लाख ७० हजार ६८६ रुपये व वाघ यांचे कमिशन १९ लाख १५० रुपये, असे एकूण ८० लाख १६ हजार ६५ रुपये जीनिंगने दिले नाही. हे पैसे मागण्यासाठी वाघ हे ७ नोव्हेंबर २०१६ रोजी राजकोट येथे गेले असता संशयित आरोपींनी त्यांना शिवीगाळ करून मारहाण केली.