म. टा. प्रतिनिधी, बीड

बीड लोकसभा मतदारसंघातून उमेदवारी दाखल केलेल्या भारतीय जनता पक्षाच्या डॉ. प्रीतम मुंडे यांची जंगम व स्थावर संपत्ती १३ कोटींपेक्षा जास्त असून त्यांच्यावर विविध बँक व संस्थांचे आठ कोटींपेक्षा जास्त कर्ज आहे. त्यांचे प्रमुख प्रतिस्पर्धी राष्ट्रवादी काँग्रेसचे बजरंग सोनवणे यांची मालमत्ता चार कोटीहून अधिक असून ६४ लाख रुपयांचे कर्ज आहे.

उमेदवारी अर्ज दाखल करताना सादर केलेल्या प्रतिज्ञापत्रात डॉ. प्रीतम मुंडे आणि बजरंग सोनवणे यांच्या स्थावर,जंगम तसेच सोने, चांदी, शेअर मधील गुंतवणूक, शेत-जमीन, घरे, वाहन आदी संपत्तीचा उल्लेख करण्यात आला आहे. त्यानुसार डॉ. मुंडे यांची जंगम मालमत्ता १० कोटी कोटी ४७ लाख ७० हजार ९४९ रुपये एवढी आहे. स्थावर मालमत्ता तीन कोटी ८७ लाख ४८ हजार ६५४ एवढी आहे. त्यांच्यावर विविध वित्तीय संस्थांचे ८ कोटी ६२ लाख ७७ हजार ७९४ रुपये कर्ज आहे. त्यांचे पती गौरव खाडे यांच्याकडे दोन कोटी २१ लाख २ हजार ३२३ रुपयांची जंगम मालमत्ता, १८ लाख ५६ हजारांची स्थावर मालमत्ता व एक कोटी २५ लाख ५६ हजार एवढे कर्ज आहे. राष्ट्रवादी काँग्रेसचे उमेदवार बजरंग सोनवणे यांची जंगम मालमत्ता दोन कोटी ५२ लाख ११ हजार ४०९ रुपये, एक कोटी ६३ लाख रुपयांची स्थावर मालमत्ता आहे. त्यांच्यावर ६४ लाख २३ हजार ३०१ रुपयांचे कर्ज आहे. त्यांची पत्नी सारिका सोनवणे यांची जंगम मालमत्ता एक कोटी १२ लाख ३६ हजार व स्थावर मालमत्ता ५८ लाख ५० हजार रुपये एवढी आहे. त्यांच्यावर १४ लाख ३९ हजार ८०१ रुपयांचे कर्ज आहे.

नांदेड: नांदेड लोकसभा मतदारसंघातून भाजप-शिवसेना युतीचे उमेदवार प्रताप पाटील चिखलीकर यांनी मंगळवारी शक्तिप्रदर्शन करत उमेदवारी अर्ज दाखल केला. यानिमित्त मंगळवारी सकाळी दहा वाजता जुना मोंढा परिसरातून निघालेल्या मिरवणुकीत मोठ्या संख्येने कार्यकर्ते सामील झाले. शक्तिप्रदर्शनात चिखलीकरांनी अशोक चव्हाण यांच्यावर मात केल्याची चर्चा शहरात ऐकण्यात आली. युतीच्या मिरवणुकीमुळे वाहतुकीचा खेळखंडोबा झाला होता. चिखलीकरांचा ठिकठिकाणी सत्कार करण्यात आला.

मिरवणुकीचा समारोप जाहीर सभेने करण्यात आला. यावेळी व्यासपीठावर भाजप प्रदेशाध्यक्ष खासदार रावसाहेब दानवे, राज्याचे मंत्री बबनराव लोणीकर, केंद्रीय राज्यमंत्री हरदीपसिंग पुरी, माजी खासदार भास्करराव पाटील खतगावकर, आमदार सुजितसिंग ठाकूर, आमदार सुभाष साबने, आमदार तुषार राठोड, आमदार राम पाटील रातोळीकर, महानगराध्यक्ष डॉ. संतुकराव हंबर्डे, डॉ. अजित गोपछडे यांची प्रमुख उपस्थिती हेाती.

\Bचव्हाणांनी टीका करणे हास्यास्पद: दानवे \B

'गेल्या लोकसभा निवडणुकीत झालेली पराभवाची जखम भरून काढण्यासाठी सर्व कार्यकर्त्यांनी कामाला लागावे,' असे आवाहन भाजप प्रदेशाध्यक्ष खासदार रावसाहेब दानवे जाहीर सभेत केले. जिल्ह्याचे नेतृत्व करताना विद्यमान खासदारांनी विकास कामासाठी पाठपुरावा केला नाही, अशी टीका दानवे यांनी केली. प्रदेशाध्यक्षांनी शिफारस करूनही अनेक जागांवर त्यांच्या इच्छेविरुद्धचे उमेदवार देण्यात आले. पक्षात ज्यांचे काही चालत नाही, त्यांनी आमच्या टीका करणे हास्यास्पद आहे, अशी खिल्ली त्यांनी उडवली.

म. टा. प्रतिनिधी, औरंगाबाद

श्री संत एकनाथ महाराज षष्ठी सोहळ्यानिमित्ताने मंगळवारी टाळ-मृदुंगाच्या गजरात भानुदास-एकनाथांच्या जयघोषात श्री संत एकनाथ महाराज यांच्या पादुकांची पालखी मिरवणूक मोठ्या उत्साहात काढण्यात आली.

प्रतिष्ठाण नगरी पैठणप्रमाणे औरंगपुरा येथील श्री संस्थान एकनाथ मंदिरात दरवर्षी एकनाथ षष्ठी सोहळा मोठ्या उत्साहात साजरा केला जातो. २० मार्चपासून या सोहळ्यास प्रारंभ झाला आहे. सकाळी सहा वाजता काकडा आरती व भजन झाल्यानंतर सकाळी सात वाजता श्री संत एकनाथ महाराज यांच्या पादुकांची पालखी सोहळ्यास ह.भ.प कृष्णा महाराज आरगडे यांच्या प्रमुख उपस्थितीत सुरुवात झाली. विश्वस्त समितीचे अध्यक्ष अॅड. सदानंदराव देवे, सचिव लक्ष्मणराव थोरात, सहसचिव विष्णु जाधव, कोषाध्यक्ष दिनकर कोरान्ने, प्रा. गणेशराव घुगे, सचिन वाळके, रायभान पाटील, सतिषराव म्हस्के, सोमनाथ शेलार, गीताबाई देशमुख आदी उपस्थित होते.

पालखी सोहळ्यात सनई चौघडा, बँड पथक त्यामागे घोडेस्वार होते. टाळ-मृदुंगाच्या गजरात भानुदास-एकनाथांचा जयघोष करत पालखी कुंभारवाडा, मछली खडक, सराफा मार्गे गांधी पुतळा, शहागंज येथे पोहोचली. त्या ठिकाणी भाविकांनी रिंगण करत टाळ मृदुंगाच्या गजरात पाऊली खेळली. काहिंनी भारुड सादर केलेत. त्यानंतर राजाबाजार, किराणा चावडी, पानदरिबा, सुपारी हनुमान, गुलमंडी, औरंगपुरा मार्गे काढण्यात आलेल्या या पालखीची सांगता श्री संत एकनाथ मंदिर परिसरात झाली. दुपारी पादुका अभिषेक महापूजा झाली व त्यानंतर महाप्रसादाचे वाटप करण्यात आले. तर रात्री सात वाजता हभप रामराव महाराज हेडगे यांचे कीर्तनाचे आयोजन करण्यात आले होते. बुधवारी (२७ मार्च) हभप नाना महाराज कदम यांचे कीर्तन होणार असून २८ मार्चला दुपारी तीन वाजता हभप नवनाथ महाराज म्हस्के यांच्या काल्याच्या कीर्तनाने सोहळ्याची सांगता होणार आहे.

दैनदिन कार्यक्रम असे

पहाटे चार वाजता काकडा आरती, सकाळी सहा वाजता विष्णुसहस्त्रनाम, सकाळी सात ते ११ पर्यंत श्री ग्रंथराज ज्ञानेश्वरी पारायण, त्यानंतर गाथाभजन, दुपारी १२ वाजता विविध महिला भजनी मंडळांची भजने, सायंकाळी पाच वाजता हरिपाठ व रात्री पाच वाजता हरिकिर्तन आणि रात्री १० वाजता जागर असे दैनदिन कार्यक्रमाचे या निमित्ताने आयोजन केले जात आहे.

म. टा. प्रतिनिधी, औरंगाबाद

'निवडणूक जिंकण्यासाठी 'खान पाहिजे की बाण','औरंगाबाद की संभाजीनगर', आदी भावनिक मुद्दे पुढे करत काहींनी आतापर्यंत निवडणूक जिंकली आहे. आता ही 'पुडी' चालणार नाही. यावेळच्या निवडणुकीत जिल्ह्याचा विकास हाच आमचा मुख्य मुद्दा राहणार आहे,' अशी माहिती 'एमआयएम'चे औरंगाबाद लोकसभा मतदारसंघाचे उमेदवार आमदार इम्तियाज जलील यांनी दिली.

'एमआयएम'तर्फे सोमवारी रात्री हैदराबाद येथून आमदार जलील यांच्या उमेदवारी घोषित करण्यात आली. त्यानंतर ते मंगळवारी सायंकाळी पावणे पाचच्या विमानाने हैदराबाद येथून शहरात दाखल झाले. यावेळी मोठ्या संख्येने विमानतळावर आलेल्या कार्यकर्त्यांनी त्यांचे जोरदार स्वागत करण्यात आले. विमानतळावर मोठ्या संख्येने कार्यकर्ते आल्यामुळे स्वागताला मिरवणुकीचे स्वरूप प्राप्त झाले. ही मिरवणूक एपीआय कॉर्नरमार्गे चिश्तिया कॉलनी, रोशन गेट, जिल्हाधिकारी कार्यालय या मार्गे बुढीलेन येथील पक्ष कार्यालयापर्यंत गेली. यावेळी ठिकठिकाणी आमदार जलील यांचे पुष्पहार, पुष्पगुच्छ देऊन कार्यकर्त्यांनी स्वागत केले. जामा मशिदीत सायंकाळची नमाज अदा केल्यानतर त्यांनी रात्री आठ वाजता पक्षाचे पदाधिकारी व कार्यकर्त्यांसोबत संवाद साधला.

\Bशहर, जिल्ह्याची प्रगती खुंटली \B

विमानतळावर पत्रकारांशी बोलताना, आमदार जलील म्हणाले की, ही निवडणूक जाती, धर्म, पंथ यावर आधारित होणार नाही. मतदारांना 'विकास' हवा आहे. अनेक वर्षांपासून शहर व जिल्ह्याची प्रगती खुंटली आहे. यामुळे या निवडणुकीत मंदिर-मशीद, औरंगाबाद-संभाजीनगर, खान-बाण, असे मुद्दे चालणार नाहीत. सुशिक्षित, तरूण आणि महिलांकडून विकासाची अपेक्षा आहे.

उमेदवारीची घोषणा झाल्यानंतर वंचित बहुजन आघाडीचे प्रमुख अॅड. प्रकाश आंबेडकर यांच्याशी फोनवरून चर्चा केली. वंचित बहुजन आघाडीचे सर्व स्थानिक पदाधिकारी तुमच्यासोबत असतील, असे त्यांनी सांगितल्याचे जलील म्हणाले.

म. टा. प्रतिनिधी, औरंगाबाद

माजी विद्यार्थ्यांशी संवाद साधत 'नॅक' समिती सदस्यांनी विद्यापीठाच्या वाटचालीचा मागोवा घेतला. मराठवाड्यासारख्या मागास प्रदेशातील विद्यार्थी घडवण्यात विद्यापीठाचे योगदान असल्याचे माजी विद्यार्थ्यांनी सांगितले. उस्मानाबाद उपपरिसराचाही समितीने आढावा घेत समाधान व्यक्त केले.

विद्यापीठाच्या 'नॅक' मूल्यांकन प्रक्रियेत गुरुवारी समितीच्या सदस्यांनी माजी विद्यार्थी, पालक, विद्यार्थी, व्यवस्थापन परिषद सदस्य यांच्याशी वेगवेगळ्या सत्रात संवाद साधला. महात्मा फुले सभागृहात माजी विद्यार्थ्यांशी समितीच्या सदस्यांनी चर्चा करीत विद्यापीठाची शैक्षणिक वाटचाल जाणून घेतली. स्वानुभव सांगत विद्यार्थ्यांनी मराठवाड्याच्या एकूण जडणघडणीत विद्यापीठाचे योगदान समितीसमोर उलगडले. शेतावर खुरपे घेऊन काम करत होते. विद्यापीठामुळे हातात नेमबाजीचे पिस्टल आले. राष्ट्रीय स्पर्धांमध्ये पारितोषिके पटकावले. आता आंतरराष्ट्रीय पातळीवर पताका फडकावणार आहे, असे क्रीडा विभागाची माजी विद्यार्थिनी नेमबाज गीता म्हस्के हिने 'नॅक' समितीला सांगितले. माजी विद्यार्थ्यांत माजी कुलगुरू डॉ. विठ्ठलराव घुगे, डॉ. सुधीर गव्हाणे, दिग्दर्शक चंद्रकांत कुलकर्णी, डॉ. गणेश चंदनशिवे, उद्योजक मुकुंद कुलकर्णी, डॉ. राजेश जावळेकर, माजी सनदी अधिकारी सुभाष माने, 'एमटीडीसी'चे उपव्यवस्थापक चंद्रशेखर जैस्वाल, प्राचार्य डॉ. वैशाली प्रधान यांच्यासह अनेक माजी विद्यार्थी उपस्थित होते. सिफार्ट हॉलमध्ये पालक आणि विद्यार्थ्यांशी संवाद साधण्यात आला.

'नॅक' समितीच्या सदस्यांनी सकाळच्या सत्रात काही विभागांना भेट दिली. या पार्श्वभूमीवर विभागांनी उत्तम सादरीकरण केले. इतर वेळेस फारशी समाधानकारक कामगिरी नसलेल्या विभागांनीही उत्तम देखावा सादर केला. रॅगिंगविरोधी समितीच्या बैठका, समुपदेशन बैठका यांचे अहवालही सादर करण्यात आले. विभागात विद्यार्थ्यांचे समुपदेशन करण्यात आले नाही. पण, समितीसमोर समुपदेशनाची माहिती देत असल्याचे पाहून आश्चर्य वाटले, असे विद्यार्थ्यांनी सांगितले. सामाजिकशास्त्रे विभागात रांगोळ्या काढण्यात आल्या होत्या. शैक्षणिक व संशोधकीय कामगिरी दाखवण्याऐवजी सजावट आणि आगतस्वागत करण्यात बहुतेक विभागांनी वेळ घालवला. त्यावर समितीच्या एका महिला सदस्याने स्पष्ट नाराजी व्यक्त केली. समितीसाठी जनसंवाद व वृत्तपत्रविद्या विभागाचा बंद पडलेला स्टुडिओ उघडण्यात आला. तसेच नियमित विविध उपक्रम राबविण्यात येत असल्याचे सांगण्यात आले. ग्रंथालय आणि सामाजिकशास्त्रे विभागातील वॉटर कुलरसुद्धा पाण्याने भरलेले आहेत. इतर वेळेस विद्यार्थ्यांना पाण्याच्या शोधात विद्यापीठ कॅम्पसमध्ये भटकंती करावी लागते. नॅकमुळे परिसरात आमूलाग्र बदल झाल्याने विद्यार्थी सुखावले आहेत.

\Bउपपरिसराचे सादरीकरण\B

स्मार्ट रूम, प्लेसमेंट, ग्रामीण भागासाठी काम, मुलींसाठी सुसज्ज वसतिगृह, जल व भूमी संशोधन, ग्रंथालय सेवा, मुलींना मोफत भोजन यासह विविध सुविधा विद्यापीठाच्या उस्मानाबाद उपपरिसरात पुरवल्या जातात. या कामाचे सादरीकरण पाहून 'नॅक' समितीने समाधान व्यक्त केले. 'आउटकम बेस्ड एज्युकेशन' याबाबत समितीने आढावा घेतला. व्यवस्थपनशास्त्र, शिक्षणशास्त्र, जल व भूमी व्यवस्थापन, रसायनशास्त्र, सूक्ष्म जीवशास्त्र, जैवतंत्रज्ञान व इंग्रजी विभागप्रमुखांनी विभागांच्या कामगिरीची माहिती दिली.

म. टा. प्रतिनिधी, जालना

जालना लोकसभा मतदारसंघातून श्याम सिरसाट पाटील हे संभाजी ब्रिगेडचे पुरस्कृत उमेदवार राहणार आहेत, अशी माहिती मंगळवारी झालेल्या पत्रकार परिषदेत देण्यात आली. शेतकरी व सैनिकांचा अपमान करणारे भाजपचे खासदार रावसाहेब दानवेंविरुद्ध रणशिंग फुंकल्याचे यावेळी सांगण्यात आले.

संभाजी ब्रिगेडचे जिल्हाध्यक्ष तुळशीराम चंद पाटील म्हणाले की, राज्यात संभाजी ब्रिगेडतर्फे लोकसभा निवडणूक न लढविण्याचा निर्णय घेण्यात आला आहे. मात्र, प्रस्थापित राजकारणी, घराणेशाही मोडीत काढण्यासाठी प्रबळ अपक्ष उमेदवारांना पाठिंबा देण्याचे धोरण आहे. त्यानुसार, श्याम सिरसाठ पाटील यांना पुरस्कृत करण्यात आले आहे. जालना शहर व जिल्हा ३० वर्षांपासून विकासापासून दूर गेला आहे. सत्ताधारी आणि विरोधकांनी संगनमत करून जिल्ह्याचे वाटोळे केल्याचा आरोप श्याम सिरसाठ यांनी केला. पत्रकार परिषदेला विजय वाढेकर, विनोद जाधव, कैलास खांडेभराड, राजेश मोरे, दत्तात्रय कपाळे, सचिन सिरसाठ, बाळासाहेब बरसाले, लखन मिसाळ, प्रल्हाद चंद, गजानन चंद आदींची उपस्थिती होती.

म. टा. प्रतिनिधी, लातूर

लातूर लोकसभा मतदारसंघातून उमेदवारी अर्ज दाखल करण्याच्या शेवटच्या दिवशी प्रमुख तीन राजकीय पक्षांसह इतर राजकीय पक्ष आणि अपक्षांनी उमेदवारी दाखल केली. सोमवारी पाच आणि मंगळवारी दहा, असे एकूण दहा उमेदवारी अर्ज दाखल झाले आहेत. बहुचर्चित डॉ. शिवाजी काळगे यांनी मात्र अपक्ष म्हणूनही अर्ज दाखल केला नाही.

भाजपकडून सुधाकर शृंगारे, संजय दोरवे यांनी अर्ज दाखल केला. भाजपने उमेदवारी नाकारल्यामुळे नाराज झालेले अहमदपूर येथील पत्रकार डॉ. सिद्धार्थ सूर्यवंशी यांनी बहुजन समाज पक्षातर्फे उमेदवारी अर्ज दाखल केला. काँग्रेसचे मच्छिंद्र कामत, बहुजन वंचित विकास आघाडीतर्फे राम गारकर यांनी अर्ज दाखल केला.

रमेश निवृत्ती कांबळे, मिलिंद हरीभाऊ कांबळे, पपिता रावसाहेब रणदिवे, मिलिंद गणपत महालिंगे हे अपक्ष, रुपेश शांमराव शंके (स्वतंत्र भारत पक्ष), विकास सतीश कांबळे (वंचित बहुजन आघाडी), भगवान धोंडिबा कुमठेकर (शोषित बहुजन आघाडी), अरुण रामराव सोनटक्के (बहुजन रिपब्लिकन सोशालिस्ट पार्टी), दत्तू प्रभाकर करंदीकर (बहुजन मुक्ती पार्टी), मधुकर संभाजी कांबळे (बहुजन समाज पक्ष व अपक्ष) यांनी अर्ज दाखल केले.

\Bकाँग्रेसचा अर्ज साधेपणाने \B

अखिल भारतीय राष्ट्रीय काँग्रेस, राष्ट्रवादी काँग्रेस, आरपीआय व सर्व घटक पक्षांच्या संयुक्त पुरोगामी महाआघाडीचे अधिकृत उमेदवार मच्छिंद्र कामंत यांनी मंगळवारी उमेदवारी अर्ज दाखल केला. कामत यांचा अर्ज भरण्यासाठी सर्वजण मोटारीतून गेले. कोणताही गाजावाजा न करता काँग्रेसतर्फे पहिल्यांच अर्ज दाखल करण्यात आला आहे. त्यामुळे याची नोंद जिल्ह्याच्या राजकीय इतिहासात होईल. कामत यांच्यासोबत दिलीपराव देशमुख, आमदार अमित देशमुख, शैलेश पाटील चाकूरकर, राष्ट्रवादी काँग्रेसचे बसवराज पाटील नागराळकर, आमदार त्र्यंबक भिसे, माजी आमदार बाबासाहेब पाटील, अशोक पाटील निलंगेकर, माजी आमदार वैजनाथराव शिंदे, जिल्हा परिषद सदस्य धीरज देशमुख यांच्यासह काँग्रेस व घटक पक्षांचे पदाधिकारी उपस्थित होते.

उस्मानाबाद: उस्मानाबाद लोकसभा मतदारसंघ निवडणुकीसाठी मंगळवारी शेवटच्या दिवसापर्यंत एकूण २३ जणांनी ३७ नामनिर्देशन अर्ज दाखल केले, अशी माहिती जिल्हाधिकारी तथा निवडणूक निर्णय अधिकारी दीपा मुधोळ-मुंडे यांनी दिली.

या मतदारसंघातून राणा जगजितसिंह पाटील (राष्ट्रवादी काँग्रेस), अर्चना राणा जगजितसिंह पाटील (राष्ट्रवादी काँग्रेस), ओमप्रकाश भूपालसिंह उर्फ पवन राजे निंबाळकर (शिवसेना), अर्जुन सिद्राम सलगर (वंचित बहुजन आघाडी), डॉ. शिवाजी पंढरीनाथ ओमान (बहुजन समाज पक्ष), दीपक महादेव ताटे (भापसे), अण्णासाहेब रामचंद्र राठोड (भारतीय बहुजन क्रांती दल), विश्वनाथ सदाशिव फुलसुरे (क्रांतिकारी जयहिंद सेना), नवनाथ दशरथ उपळेकर, सुशीलकुमार दत्तात्रय जोशी, विष्णू गोविंद देडे, तुकाराम दासराव गंगावणे, जगन्नाथ निवृत्ती मुंडे, सय्यद सुलतान लडखान, अतुल विक्रम गायकवाड, डॉ. वसंत रघुनाथ मुंडे, काकासाहेब बापूराव राठोड, नेताजी नागनाथ गोरे, बसवराज गुरुलिंगप्पा वरनाळे, शंकर पांडुरंग गायकवाड, आर्यनराजे किसनराव शिंदे, मनोहर आनंदराव पाटील (सर्वअपक्ष) यांनी उमेदवारी दाखल केली आहे.

परभणी: परभणी लोकसभा मतदारसंघातून शेवटच्या दिवशी मंगळवारी १८ उमेदवारांनी २२ नामनिर्देशनपत्र दाखल केले. या मतदारसंघात एकूण २७ उमेदवारांनी ३८ नामनिर्देशनपत्र दाखल केले आहेत.

डॉ.अप्‍पासाहेब ओंकार कदम (स्‍वतंत्र भारत पक्ष), राजेश उत्तमराव विटेकर (राष्‍ट्रवादी काँग्रेस), डॉ. वैजनाथ सीताराम फड व डॉ. शामसुंदर पंढरीनाथ वाघमारे (बहुजन समाज पार्टी), हरिश्‍चंद्र दत्‍तू पाटील (संघर्ष सेना), संतोष गोविंद राठोड (भारतीय बहुजन क्रांती दल), सखाराम ग्‍यानबा बोबडे (अपक्ष व बहुजन आझाद पार्टी), दादाराव गणपतराव पंडित (भारिप बहुजन महासंघ), उत्‍तमराव पांडुरंगराव राठोड (बहुजन मुक्‍ती पार्टी), बालासाहेब शेषराव हारकळ (अपक्ष), उद्धव रामभाऊ पवार (अपक्ष), राजेंद्र दामोधर पगारे (अपक्ष), संजय (बंडू) हरिभाऊ जाधव (शिवसेना), डॉ. धर्मराज ज्ञानोबा चव्‍हाण (वंचित बहुजन आघाडी), सिद्धेश्‍वर पंडितराव पवार (अपक्ष), किशोर नामदेव गवारे (भारतीय प्रजा सुराज्‍य पक्ष), सुभाष अशोक अंभोरे (आंबेडकर नॅशनल काँग्रेस), संजय रामराव परळीकर (अपक्ष) आदींनी मंगळवारी अर्ज दाखल केले.

म. टा. प्रतिनिधी, औरंगाबाद

जिल्ह्यात गौण खनिजांची सर्रासपणे अवैध वाहतूक सुरू असल्याने शासनाच्या कोट्यवधी रुपयांचा महसूल बुडत आहे. गौण खनिजाची लूट थांबवण्यासाठी महसूल विभागाकडून कारवाईचे सत्र सुरू झाले असून, तीसगाव परिसरातील खदानींवर नुकतीच कारवाई करण्यात आली. या पार्श्वभूमीवर येणाऱ्या कालावधीतही सर्वच खदानींची तपासणी मोहीम हाती घेण्यत येणार असल्याचे अपर जिल्हाधिकारी भानुदास पालवे यांनी स्पष्ट केले.

जिल्हा प्रशासनाकडून वारंवार करण्यात येणाऱ्या लिलावातून बोटावर मोजण्या इतक्यात वाळू पट्यासह खदानींना प्रतिसाद मिळतो. लिलाव न झालेल्या ठिकाणाहून सुद्धा सर्रासपणे गौण खनिजांची लूट होत असल्याच्या तक्रारी पुढे येत आहे. त्यामुळे गेल्या आठवड्यात जिल्हा प्रशासनाच्या पथकाने तीसगाव (ता. औरंगाबाद) परिसरातील गौण खनिजांची लूट करणाऱ्या क्रशरधारकांवर कारवाई करून साडेअकरा लाखांचा दंड आकारला होता. यासह तीसगाव भागातील सात क्रशरधारकांचे पंचनामेही करण्यात आले होते. यामध्ये किती ब्रास गौण खनिजाचे उत्थनन केले याची माहिती घेऊन पंचनामे करण्यात आल आहेत. पंचनाम्यानंतर आता संबंधित क्रशरधारकांवर दंडात्मक कारवाईचे संकेत प्रशासनाने दिले आहेत.

म. टा. प्रतिनिधी, औरंगाबाद

औरंगाबाद शहर व परिसराचा विस्तार व पुढील २५ वर्षांत पाण्याची वाढणारी गरज लक्षात घेता जायकवाडी धरणातील पाण्याचे आरक्षण वाढवण्याचा प्रस्ताव महापालिकेने तयार केला आहे. ३० दशलक्ष घन मीटरने पाण्याचे आरक्षण वाढवण्यात यावे, असे महापालिकेने प्रस्तावात म्हटले केला असल्याची माहिती सूत्रांनी दिली.

औरंगाबाद शहराला जायकवाडी धरणातून पाणीपुरवठा केला जातो. त्यासाठी ७०० आणि १४०० मिलीमीटर व्यासाच्या दोन जलवाहिन्या टाकण्यात आल्या आहेत. या दोन्ही जलवाहिन्यांचे आयुष्य संपल्यामुळे सुमारे २००० मिलीमीटर व्यासाची नवीन जलवाहिनी टाकण्याचा निर्णय महापालिकेने घेतला आहे. त्यासाठी समांतर जलवाहिनी हा प्रकल्प राबविण्यात येत आहे. पुढील २५ वर्षांत औरंगाबाद शहराचा होणारा विस्तार व त्यामुळे वाढणारी लोकसंख्या यांचा विचार करून समांतर जलवाहिनीचे नियोजन करण्यात आले आहे. शहराला पाणीपुरवठा करण्याच्या दृष्टीने जलसंपदा विभागाने जायकवाडी धरणात औरंगाबाद महापालिकेसाठी पाण्याचे आरक्षण ठेवले आहे. सध्या हे आरक्षण ११३.२८ दशलक्ष घनमीटर आहे. यापैकी ५८ दशलक्ष घनमीटर पाणी दरवर्षी महापालिकेला लागते. ५५ दशलक्ष घनमीटर पाणी शिल्लक राहते.

सूत्रांनी दिलेल्या माहितीनुसार; पुढील २५ वर्षांचा विचार करता जायकवाडी धरणातील महापालिकेसाठी असलेले पाण्याचे आरक्षण ११३.२८ दशलक्ष घनमीटर वरून १४३ दशलक्ष घनमीटर करण्याचा प्रस्ताव पाणीपुरवठा विभागाने तयार केला आहे. सर्वसाधारण सभेत मान्यता मिळाल्यावर हा प्रस्ताव जलसंपदा विभागाकडे पाठवण्यात येणार आहे.

औरंगाबाद शहराची पाण्याची रोजची गरज लक्षात घेता सुमारे १६ लाख लोकसंख्येसाठी २०३ एमएलडी (दशलक्ष लिटर रोज) पाण्याची गरज आहे, परंतु एवढे पाणी उपसण्याची व ते वाहून नेण्याची क्षमता पालिकेच्या सध्याच्या यंत्रणेत नाही. त्यामुळे १५० ते १५५ 'एमएलडी' पाणी उपसले जाते. त्यापैकी १३० ते १३५ 'एमएलडी' पाणीच शहरात येते. समांतर जलवाहिनीचे काम येत्या तीन वर्षांत झाले तर, सुमारे ३०० 'एमएलडी' पाणी जायकवाडी धरणातून उपसले जाईल. सध्याच्या पाणीपुरवठ्याच्या विचार केल्यास समांतर जलवाहिनीसाठी उपसले जाणारे पाणी १५० 'एमएलडी'ने जास्त असणार आहे. त्यामुळे जायकवाडी धरणातील महापालिकेसाठीच्या पाण्याचे आरक्षण देखील वाढवण्यात यावे, असे पालिकेच्या यंत्रणेचे मत आहे.

जायकवाडी धरणात महापालिकेसाठी सध्या असलेले पाण्याचे आरक्षण : ११३.२८ दशलक्ष घनमीटर

वर्षभरात औरंगाबाद शहरासाठी लागणारे पाणी : ५८ दशलक्ष घनमीटर

महापालिकेला अपेक्षित असलेले पाण्याचे वाढीव आरक्षण : १४३ दशलक्ष घनमीटर

म. टा. प्रतिनिधी, औरंगाबाद

युतीचे उमेदवार म्हणून लोकसभेच्या औरंगाबाद मतदारसंघातून रिंगणात असलेले शिवसेनेचे खासदार चंद्रकांत खैरे यांनी निवडणुकीत कोणतीही कसर राहू नये याकरिता प्रयत्न सुरू केले आहेत. त्यांनी भाजपच्या स्थानिक नेते-पदाधिकाऱ्यांच्या गाठी-भेटीवर विशेष भर दिल्याची माहिती सूत्रांनी दिली.

कचऱ्यासह इतर अनेक मुद्यांवरून स्थानिक पातळीवर शिवसेना-भाजप युतीत गेल्या काही वर्षात दरी निर्माण झाली आहे. जिल्हा परिषदेत भाजपचे सर्वाधिक सदस्य असतानाही शिवसेनेने काँग्रेसला सोबत घेत सत्ता काबीज केल्याने भाजपत नाराजी आहे. त्यात गेल्या काही महिन्यात भाजप नेते विधानसभा अध्यक्ष हरिभाऊ बागडे यांच्यावरही खासदार खैरे यांनी तोफ डागली होती. हा वाद युतीच्या नेत्यांसमोर रंगला. त्यामुळे खासदार खैरे यांनी भाजप नेते, पदाधिकाऱ्यांच्या भेटी घेत 'मनोमिलन' करण्यावर भर दिला आहे. शहराध्यक्ष किशनचंद तनवाणी, आमदार अतुल सावे, बसवराज मंगरुळे यांच्यासह इतर पदाधिकारी, नेत्यांची त्यांनी सदिच्छा भेट घेतली. या भेटीत निवडणूक नियोजन, मतदारसंघातील परिस्थिती यावर चर्चा करत एकसंघपणे काम करू, असे आवाहन भाजप पदाधिकाऱ्यांनी केल्याचे सूत्रांनी सांगितले.

म. टा. प्रतिनिधी, औरंगाबाद

संयुक्त पुरोगामी महाआघाडीत शेतकरी कामगार पक्ष हा प्रमुख घटक पक्ष असतानाही काँग्रेस उमेदवार आमदार सुभाष झांबड यांची अद्यापही स्थानिक पदाधिकाऱ्यांना विश्वासात घेतले नाही, असा आरोप शेकापचे जिल्हा प्रवक्ते महेश गुजर यांनी केला. सन्मानाने बोलावले तरच महाआघाडीच्या उमेदवाराचा प्रचार करू, याबाबत २९ मार्चपर्यंत निर्णय घ्यावा, अन्यथा शेतकरी कामगार उद्योग क्रांती आघाडीतर्फे उमेदवार देऊ, असा इशारा त्यांनी दिला आहे.

महाराष्ट्रात काँग्रेस, राष्ट्रवादी काँग्रेस, शेकाप, स्वाभिमानी शेतकरी संघटना व इतर पक्ष, संघटनांनी एकत्र येत संयुक्त पुरोगामी आघाडी जाहीर केली आहे. औरंगाबाद लोकसभा निवडणुकीसाठी उमेदवार म्हणून काँग्रेस आमदार सुभाष झांबड यांनी प्रचार सुरू केला आहे. पण, त्यांनी केवळ राष्ट्रवादी काँग्रेसला सोबत घेतले आहे. शेकापच्या पदाधिकारी, कार्यकर्त्यांना कोणत्याही प्रकाराचा निरोप नाही. आघाडीतील इतर घटक पक्षांच्या नेत्यांचे फोटो बॅनरवर नाही, हा प्रकार शेकापने गांभीर्याने घेत शेकाप व इतर शेतकरी संघटनांना डावलने काँग्रेस उमेदवारासाठी नुकसानीचे ठरले, असा इशारा दिला आहे.

शेकाप पदाधिकारी, कार्यकर्त्यांना सोबत घेणार असाल, तर पक्षश्रेष्ठींच्या आदेशाने महाआघाडीच्या उमेदवाराचा प्रचार करू अन्यथा प्रचार नाही. येत्या २९ मार्च पर्यंत काँग्रेसने निर्णय न घेतल्यास शेतकरी कामगार उद्योग क्रांती आघाडीचा उमेदवार देऊ किंवा इतर पर्याय शोधू, असा इशाराही त्यांनी पत्रकाद्वारे दिला आहे.

म. टा. प्रतिनिधी, औरंगाबाद

उच्च माध्यमिक शाळांच्या मूल्यांकनाची प्रक्रिया पुन्हा नव्याने करण्याचे शिक्षण विभागाने निश्चित केले. अनेकवेळा प्रस्ताव पाठविल्यानंतर रखडलेल्या प्रक्रियेत पुन्हा नव्याने त्रुटी पूर्ण करून प्रस्ताव दाखल करावे लागणार आहेत.

राज्यात २०००पासून कायम विनाअनुदान धोरण राबविले जाते. १८ वर्षांपासून काम करणाऱ्या या शाळांमधील शिक्षकांनी अनुदान मिळावे, यासाठी वारंवार आंदोलने केली. २०१३मध्ये कायम शब्द काढून अनुदानाची प्रक्रिया सुरू करण्यात आली मात्र, २०१९ उजाडले तरी, शिक्षकांना वेतन मिळालेले नाही. त्यात २० टक्के अनुदानाची घोषणा करण्यात आली. त्यानंतर प्रस्तावांची प्रक्रिया सुरू झाली. वारंवार प्रस्तावांमुळे शिक्षकांची नाराजी समोर आली. त्यात आता पुन्हा त्रुटी राहिलेल्या संस्थांकडून मूल्यांकनासाठीचे प्रस्ताव मागविण्यात आले आहेत. त्यासाठी शाळांना ३० एप्रिलपर्यंत मुदत देण्यात आली आहे. वारंवार प्रक्रिया शिक्षण विभागाकडून केली जात असल्याने शिक्षकांमध्ये संताप आहे. प्रशासनाकडून अनुदानाच्या नावाखाली विनाकारण वेळखाऊ धोरण राबविले जात असल्याची चर्चा शिक्षकांमध्ये आहे.

\Bबायोमेट्रिक उपस्थिती आवश्यक\B

मूल्यांकनासाठी दिलेल्या पत्रात म्हटले आहे की, शाळांची यापूर्वी मूल्यांकन झालेल्या त्रुटींच्या पूर्ततेचे प्रस्ताव जिल्हास्तरावर संकलित करावेत. विभागाचे एकत्रित प्रस्ताव ३० एप्रिलपर्यंत सादर करावेत. यात शैक्षणिक गुणवत्ता, मूल्यांकनात समितीचा अहवाल, सरल प्रणाली, बायोमेट्रिक प्रणाली, शंभर टक्के विद्यार्थी आधार कार्ड, आरक्षण धोरणानुसार रोस्टर अद्ययावत आहे का, विज्ञान शाखेत प्रयोगशाळा, विद्यार्थी संख्या, मागील तीन वर्षांचा निकाल अशा निकषांचा समावेश आहे.

'इंडस्ट्री ४.०' आधुनिक तंत्रप्रणालीवरही चर्चा

म. टा. प्रतिनिधी, औरंगाबाद

लेथ मशीनवर दिलेली डिझाईन कमी वेळात अन् तंतोतंत बनिवणे असो की, विविध विषयांवर प्रोजेक्ट तयार करण्याची स्पर्धा 'स्वयंभू'मध्ये रंगली. जवाहरला नेहरू अभियांत्रिकी कॉलेजमध्ये झालेल्या या तंत्रसंमेलन उपक्रमात आठशेपेक्षा अधिक विद्यार्थ्यांनी सहभाग घेतला. नव्या पिढीतील उद्योजकांनी 'इंडस्ट्री ४.०'वर गटचर्चेत सहभाग घेतला.

'स्वयंभू' या टेक्निकल उपक्रमास सुरुवात झाली. दोन दिवसीय उपक्रमात विविध ३० स्पर्धांमधून विद्यार्थ्यांनी कौशल्याचे दर्शन घडविले. पहिल्या दिवशी उद्घाटन सत्रानंतर विविध स्पर्धांना सुरुवात झाली. ज्यामध्ये कॅडवॉर, लेथवॉर, प्रोअॅक्टो, आयडिया, वेबवॉर अशा स्पर्धा रंगतदार ठरल्या. लेथवॉरमध्ये सहभागी स्पर्धकाला डिझाइन दिले गेले. ते डिझाइन कमीत कमी वेळेत पूर्ण करणे यासाठी स्पर्धकांमध्ये स्पर्धा उल्लेखनीय ठरली. इतरांपेक्षा वेगवेगळ्या नावीन्यपूर्ण कल्पना मांडणारी आयडीया स्पर्धा अन् तेवढीच दिमाखदार ठरली ती प्रोजेक्ट स्पर्धा. यात विविध विषयावर प्रोजेक्ट सादर करत विद्यार्थ्यांनी पर्यावरण, वाहतूक सारख्या विषयांचे महत्त्व मांडले. याचवेळी 'इंडस्ट्री ४.०' या आधुनिक तंत्रप्रणालीवर नव्या पिढीच्या उद्योजकांनी गटचर्चेतून प्रकाश टाकला. यामध्ये रोबोटस्, इंटरनेट ऑफ थिंग्ज अशा विषयांवर मत मांडले. यामध्ये सौरभ भोगले, हर्षल नहार, केतकी कोकीळ, राधीका देशपांडे, दिपेश जाजू, मिहीर वैद्य, अद्वैत कंक यांनी सहभाग घेतला. कार्यक्रमाचे सूत्रसंचालन आशिष गाडेकर यांनी केले. केतकी कोकीळ म्हणाल्या, मानवी गरजांसाठी उत्पादन गुणवत्तापूर्ण मिळविण्यासाठी या नव्या तंत्राची अधिकाधिक गरज आहे. मिहीर वैद्य म्हणाले, रोबोटमुळे रोजगार कमी होण्याची शक्यता नसून रोजगाराचे स्वरूप बदलेल. हे तंत्रज्ञान मानवी हस्तक्षेप टाळू शकणार नाही. दिपेश जाजू म्हणाले, हे तंत्रज्ञान वापरताना पाश्चात्यांचे अनुकरण करण्यापेक्षा भारतीय पद्धतीचा अवलंब व्हायला हवा. राधिका देशपांडे म्हणाल्या, या तंत्रज्ञानाचा मानवी जीवन सुसह्य करण्यासाठीच उपयोग होणार आहे. सौरभ भोगले यांनी सांगितले की, हे तंत्रज्ञान आपले जीवन व्यापून टाकेल. येत्या १०, १५ वर्षांत हा बदल दिसतील. त्यावेळी ज्यांच्या जवळ नवनवीन संकल्पना असतील त्या उद्योजकांना उर्जितावस्था येईल. हर्षल नहार, अद्वैत कंक यांनी तंत्रज्ञान काळाची अपरिहार्यता मार्गदर्शनात मांडली. डॉ. धनंजय डोळस यांनी प्रास्ताविक केले. सूत्रसंचालन ओंकार तेंडुलकर, भाविका मनकानी यांनी तर विभागप्रमुख डॉ. एम. एस. कदम यांनी आभार मानले. कार्यक्रमासाठी डॉ. अभय कुलकर्णी, प्रा. कोमल जहागीरदार, मंगेश काळवणे, अश्वजीत खाडे, ओंकार तेरकर यांनी परिश्रम घेतले.