म. टा. प्रतिनिधी, औरंगाबाद औरंगाबाद लोकसभा मतदारसंघातील महायुतीचे उमेदवार चंद्रकांत खैरे यांच्या प्रचारासाठी ठाकरे पिता-पुत्रांबरोबच शिवसेना, भाजप नेत्यांच्या सभांचे नियोजन करण्यात आले आहे. त्याशिवाय स्थानिक पदाधिकारी, नगरसेवकांची फळी देखील प्रचाराच्या कामात गुंतली आहे. शिवसेनेचे पक्षप्रमुख उद्धव ठाकरे यांची १९ एप्रिल रोजी जाहीर सभा होणार आहे. युवासेनेचे प्रमुख आदित्य ठाकरे यांची सभा १३ ते १५ एप्रिलदरम्यान हडकोतील टीव्ही सेंटर चौकात होणार आहे. त्याशिवाय प्रत्येक विधानसभा मतदारसंघात एक मोठी सभा व्हावी, असा प्रयत्न केला जाणार आहे, अशी माहिती शिवसेनेचे जिल्हाप्रमुख अंबादास दानवे यांनी दिली. शिवसेनेचे नेते दिवाकर रावते, रामदास कदम, संजय राऊत, नितीन बानगुडे पाटील, महिला व बालकल्याण मंत्री पंकजा मुंडे यांच्या सभा विधानसभा मतदारसंघ निहाय होणार आहेत. चंद्रकांत खैरे जिल्हा परिषद सर्कलनिहाय दौरा करणार आहेत तर, दानवे पंचायत समितीनिहाय प्रचार दौरा करणार आहेत. महिला आघाडी व युवासेनेचे देखील प्रचाराच्या दृष्टीने स्वतंत्र नियोजन करण्यात आले आहे. औरंगाबाद शहरातील रोज दहा वॉर्डांत नगरसेवक, पदाधिकारी प्रचार फेऱ्या काढणार आहेत. घरोघरी जाऊन प्रचाराचे नियोजन आहे. प्रचार संपण्याच्या शेवटच्या दिवशी महायुतीची मिरवणूक (महारॅली) काढण्यात येणार आहे. \Bमंगळवारी 'आदित्य संवाद'\B शहरातील युवकांशी संवाद साधण्यासाठी युवासेनेचे प्रमुख आदित्य ठाकरे मंगळवारी (दोन एप्रिल) येत आहेत. स.भु. कला आणि वाणिज्य महाविद्यालयात ते युवकांशी संवाद साधणार असून, या कार्यक्रमाला 'आदित्य संवाद' असे नाव देण्यात आले आहे. सायंकाळी सहा वाजता हा कार्यक्रम होणार आहे.
मोबाइल अॅप डाउनलोड करा आणि राहा अपडेट
