'नरेंद्र मोदी या माणसावर मी विश्वास टाकला होता मात्र त्यांनी केसाने गळा कापला. मोदी आणि शहांबद्दल माझ्या मनात प्रचंड राग आहे. त्या रागातूनच लोकसभा निवडणुकीत माझ्या पक्षाचा उमेदवार उभा नसतानाही मी प्रचारात उतरलो आहे', अशा शब्दांत मनसे अध्यक्ष राज ठाकरे यांनी नांदेडमधील सभेतून पंतप्रधान मोदी यांच्यावर निशाणा साधला.
मी कुणाचाही प्रचार करायला आलो नाही. मोदी-शहा ही दोन नावे देशाच्या राजकीय क्षितिजावरून दूर जाणे आवश्यक आहे आणि त्यासाठीच आपण मतदान करावे, ही माझी विनंती आहे, असे आवाहन राज यांनी केले.
पंतप्रधान मोदी यांच्या राजस्थानातील चुरू येथील भाषणाचा दाखला देत राज यांनी टीकास्त्र सोडले. चुरू येथील व्यासपीठावर शहीद जवानांचे फोटो लावण्यात आले होते. त्यावर बोट ठेवत 'शहीद जवानांचे फोटो लावून भाषणे करायला लाजा वाटत नाहीत का?' असा संतप्त सवाल राज यांनी केला.
राज यांचे फटकारे...
> बेरोजगारीचे आकडे लपवत आहेत. शेतकरी आत्महत्यांचे आकडे लपवले जात आहेत. माध्यमांची गळचेपी सुरु आहे. नरेंद्र मोदी आणि अमित शहा हे देशाला हुकूमशाहीकडे नेत आहेत. तुम्हाला आयुष्यभर मोदी आणि शहांचे गुलाम बनून राहायचे आहे का?
> नरेंद्र मोदींच्या सभेत म्हणे कोणी काळा शर्ट घालून आला तरी बाहेर काढलं जात आहे. पंतप्रधान काळ्या रंगाला का घाबरतात? याला कारण जे २०१४ला बोलले होते ते पूर्ण करता आले नाही म्हणून आता हे घाबरलेत.
> योगी आदित्यनाथ म्हणाले, देशाची सेना ही म्हणे मोदींची सेना आहे आणि आज मोदींनी नव-मतदारांना आवाहन केलं की तुमचं पहिलं मत हे बालाकोटचा एअरस्ट्राइक करणाऱ्या सैन्यासाठी, पुलवामाच्या वीर शहिदांसाठी द्या. जवानांच्या नावावर मत मागताना लाज नाही वाटत?
> नोटबंदीमुळे जवळपास ४ कोटी लोकांचा रोजगार गेला, हा अधिकृत आकडा आहे पण ह्या विषयावर मोदी बोलायला तयार नाहीत.
> 'मन की बात' ही कल्पना मुळात हिटलरची आहे.
> मोदी फक्त पंडित नेहरू, इंदिरा गांधींबद्दल बोलत आहेत, स्वत:च्या कामाबद्दल ते कधी बोलणार? बेरोजगार तरुणांबद्दल कधी बोलणार? महिला सुरक्षेबद्दल कधी बोलणार? शेतकरी आत्महत्येबद्दल कधी बोलणार?
> संपूर्ण बहुमताचं सरकार देशाने मोदींच्या हातात दिलं पण त्यांनी काय केलं? नोटबंदी आणली, आधी एफडीआयला विरोध केला आता एफडीआय आणलं, जीएसटीला विरोध केला आणि आता जीएसटी आणून छोट्या व्यापाऱ्यांचं कंबरडं मोडलं.
> बीडमध्ये महिलांची गर्भाशयं विकली जात आहेत, चौकीदार करतो काय?
> नरेंद्र मोदी नांदेडला येऊन गेले पण शेतकऱ्यांबद्दल बोलले नाहीत. मोदी-फडणवीस सत्तेत आल्यापासून १४ हजार शेतकऱ्यांनी आत्महत्या केल्या. दुष्काळामुळे गावंच्या गावं विस्थापित होत आहेत. हेच का अच्छे दिन?
> भारतीय जनता पक्षाचे एक नेते म्हणतात की, सैन्याच्या कारवाईचे पुरावे शहिदांचे नातेवाईक मागत असतील तर ते देशद्रोही आहेत! ही असली विधानं करवतात कशी या भाजपच्या नेत्यांना.
> महाराष्ट्र गोदावरीच्या पाण्यासाठी भांडतोय आणि दुसऱ्या मार्गाने पाणी गुजरातला वळवलं जात आहे. देवेंद्र फडणवीस यावर काहीच बोलत नाही कारण हा तर बसवेलला मुख्यमंत्री.
पाहा: राज ठाकरे यांचं संपूर्ण भाषण
मोबाइल अॅप डाउनलोड करा आणि राहा अपडेट
