म. टा. प्रतिनिधी, औरंगाबाद
शहरात शनिवारी श्री रामनवमी उत्सव मोठ्या उत्साहात साजरा करण्यात आला. मिरवणूक, अन्नदान, कीर्तन, गीतरामायण अशा कार्यक्रमांचे ठिकठिकाणी आयोजन करण्यात आले होते.
किराडपुऱ्यातील श्री रामचंद्र मंदिरात पहाटेपासून भाविकांची दर्शनासाठी भाविकांनी गर्दी केली. सकाळी दहा वाजता भरत चौरे महाराज यांचे कीर्तन झाले. दुपारी १२ वाजता मोठ्या उत्साहात श्री राम जन्मोत्सव साजरा करण्यात आला. खासदार चंद्रकांत खैरे, आमदार अतुल सावे, माजी खासदार प्रदीप जैस्वाल, श्रीरामचंद्र मंदिर (मठ) बालाजी ट्रस्टचे अध्यक्ष मानसिंग पवार, उत्तमराव मनसुटे, अवधूत जगताप, दयाराम बसैये (बंधू) हेमंत जोशी, ट्रस्टी यांच्यासह भाविक मोठ्या संख्येने उपस्थित होते. सांयकाळी मंदिर परिसरातून श्रीरामची मिरवणूक काढण्यात आली. सजवलेल्या रथात प्रभू श्रीराम, लक्ष्मण आणि सीतामाता यांच्या मूर्ती ठेवल्या होत्या. गांधेली येथील रहिवासी हरिभाऊ रसाळ व त्यांच्या पत्नीच्या हस्ते मिरवणूक रथाचे पूजन करण्यात आले. मिरवणुकीची सांगता श्रीराम मंदिर येथे झाली. सायंकाळी मंदिर परिसरातील सभागृहात सुंदरकांड रामायण पाठाचे आयोजन करण्यात आले होते.
कैलासनगर येथील श्रीराम देवस्थान चॅरिटेबल ट्रस्टतर्फे जन्मोत्सव मोठ्या उत्साहात साजरा करण्यात आले. सायंकाळी श्रीराम प्रतिमेची मिरवणूक काढण्यात आली. यावेळी उत्सव समितीचे अध्यक्ष नरेश भालेराव, नगरसेविका आशा भालेराव, राजेंद्रसिंग बग्गा, पी. बी. पैठणकर उपस्थित होते. श्रीराम नवमी उत्सव समितीतर्फे श्री संस्थान गणपती सायंकाळी सहा वाजता भव्य मिरवणूक काढण्यात आली. माजी खासदार प्रदीप जैस्वाल यांच्या हस्ते आरती झाल्यावर मिर‌वणूकीस प्रारंभ झाला. यावेळी ऋषिकेश जैस्वाल, रोहित फुलवाणी, संजय पाटील, संकेत वैद्य, सौरभ यादव आदी उपस्थित होते. समर्थनगर येथील श्रीराम मंदिरातही नवमी मोठ्या उत्साहात साजरी झाली. मनोहरबुवा दीक्षित यांच्या कीर्तनानंतर सकाळी आठ वाजता 'श्रीं'ची पालखी मिरवणूक समर्थनगर परिसरात काढण्यात आली. आंतरराष्ट्रीय हिंदू परिषद, राष्ट्रीय बजरंग दलातर्फे सायंकाळी सहा वाजता क्रांती चौकातून मिरवणूक काढली.
\Bसाताऱ्यात मिरवणूक
\Bप्रभू रामचंद्रांचा जन्मोत्सव शनिवारी सातारा परिसरात उत्साहात साजरा करण्यात आला. बरोबर बारा वाजता मंदिरातील मूर्तीची आरती करून रामनामाचा जयघोष करण्यात आला. या प्रसंगी भाविकांना पंजिरी, टरबूज, खरबूज, शरबत व महाप्रसादाचे वाटप करण्यात आले. सातारा हायकोर्ट कॉलनीतील दक्षिणमुखी हनुमान मंदिरातही रामकथा, पूजन व महाप्रसादाचे आयोजन करण्यात आले होते. बंबाटनगर, मार्तंडनगर, खंडोबा मंदिर, नाईकनगर, देवळाई परिसरातही रामजन्मोत्सवानिमित्त वाहन फेरी, राम, लक्ष्मण, सीता, हनुमानाच्या प्रतिमेची मिरवणूक काढण्यात आली. भाविकांना बुंदी व खिचडीचा प्रसाद वाटण्यात आला.
