म. टा. प्रतिनिधी, औरंगाबाद
प्रबोधनात्मक गीतांवर ठेका धरीत हजारो आंबेडकरी अनुयायांनी डॉ. बाबासाहेब आंबेडर यांची १२८ वी जयंती जल्लोषात साजरी केली. क्रांती चौक ते भडकल गेटपर्यंत निघालेल्या मिरवणुकीत शेकडो वाहनांतून आकर्षक देखावे सादर करण्यात आले. ढोल-ताशांचा गजर, आतषबाजी, विद्युत रोषणाई आणि डीजेच्या तालावर तरुणाईने मिरवणुकीत रंग भरले.
भारतरत्न डॉ. बाबासाहेब आंबेडकर यांच्या १२८ व्या जयंतीनिमित्त रविवारी शहरात वैविध्यपूर्ण उपक्रम राबवण्यात आले. सायंकाळी शहरातील विविध भागातून भव्य मिरवणुका काढण्यात आल्या. क्रांती चौक ते भडकल गेट असा मिरवणुकीचा मार्ग होता.
क्रांती चौकातून सायंकाळी मिरवणुकीला सुरुवात झाली. 'डॉ. बाबासाहेब आंबेडकर की जय', 'जय भीम'चा जयघोष करीत अनुयायांचे शेकडो जथ्थे मिरवणुकीत सहभागी झाले. काही युवा खेडाळूंनी तलवारबाजी आणि दांडपट्ट्याचे प्रात्याक्षिके सादर करीत उपस्थितांचे लक्ष वेधले. मैत्रेय क्रीडा मंडळाच्या ढोल पथकाने तरुणांचा उत्साह वाढवला. मिरवणुकीत चौसरनगर मित्रमंडळ, भीमज्वाला मित्रमंडळ, भीम ज्योत मित्रमंडळ, द बुद्धा युवा मित्रमंडळ, द ग्रेट बुद्धा मित्रमंडळ, संविधान मित्रमंडळ, तथागत मित्रमंडळ, त्रिरत्न मित्र मंडळ, डॉ. जितेंद्र देहाडे युवा मंडळ, भीमशक्ती यांच्यासह शहरातील विविध भागातील मंडळांनी सहभाग घेतला. लेझीम पथकांनी शिस्तबद्ध सादरीकरण केले. रोषणाई आणि डिजेने मिरवणुकीत रंग भरले. तीन भागातील मंडळांचे क्रांती चौकात आगमन झाल्यानंतर मिरवणुकीचा उत्साह शिगेला पोहचला. काँग्रेस, भीमशक्ती संघटना, भारतीय बौद्ध महासभा, पीपल्स रिपब्लिकन पार्टी यूथ फोर्स, भारतीय दलित कोब्रा, पँथर्स मित्र मंडळ, समता सैनिक, भारतीय जनसंघर्ष सेना, बहुजन मुक्ती पार्टी, जनक्रांती संघटना, बहुजन समाज पक्ष आदी पक्ष, संघटनांनी ठिकठिकाणी मिरवणुकीतील पथकांचे स्वागत केले.
दरम्यान, जनजागृती करण्यासाठी काही ठिकाणी स्टॉल उभारण्यात आले होते. मतदान जागृती, रक्तदानाचे महत्त्व, पाणी वाचवा असे संदेश देणारे देखावे सादर करण्यात आले. संविधान, आंबेडकर यांचा जीवनप्रवास सांगणारे मोठे देखावे मिरवणुकीच्या गाडीत उभारण्यात आले होते. मिरवणूक पाहण्यासाठी रस्त्याच्या दुतर्फा हजारो अनुयायांची गर्दी उसळली होती. गर्दीची गैरसोय होऊ नये म्हणून ठिकठिकाणी पोलिस बंदोबस्त तैनात करण्यात आला होता. मात्र, वाहतुकीचे नियोजन कोलमडल्यामुळे क्रांती चौक उड्डाणपुलावर काही वेळ वाहतूक कोंडी झाली होती. तब्बल एक तासानंतर वाहतूक सुरळीत सुरू झाली.
राजकारण्यांची गर्दी
लोकसभा निवडणुकीचे औचित्य साधत विविध पक्षाच्या नेत्यांनी मिरवणूक काळात उपस्थित राहून संवाद साधला. मिरवणुकीतील पथकांचे स्वागत करण्यात आले. क्रांती चौक ते पैठण गेट परिसरात स्वागत मंच उभारण्यात आले होते. दरवर्षीच्या तुलनेत यावर्षी राजकीय नेत्यांचा सहभाग जास्त होता. राजकीय समीकरणे जुळवण्यासाठी स्वागत मंचाचा प्रभावी वापर करण्याचा प्रयत्न झाला.
तरुणाईचा जल्लोष
डॉ. बाबासाहेब आंबेडकर जयंतीचा जल्लोष तरुणाईच्या सहभागाने लक्षवेधी ठरला. काही तरुणांनी फेसबुक, यू-ट्यूब चॅनलद्वारे मिरवणुकीचे लाइव्ह प्रक्षेपण केले. सेल्फी पॉइंटवर गर्दी उसळली होती. समूह नृत्य आणि घोषणांनी परिसर दणाणून गेला. मिरवणूक मार्गात स्वच्छतागृह आणि पिण्याच्या पाण्याची व्यवस्था नव्हती. त्यामुळे मिरवणुकीत सहभागी कार्यकर्त्यांची गैरसोय झाली.
शहरभर उत्साह
शहरातील विविध भागात आंबेडकर जयंतीचा उत्साह दिसला. जयभीमनगर, एकनाथनगर, कबीरनगर, चौसरनगर, मुकुंदवाडी, घाटी परिसर, क्रांतीनगर, शिवाजीनगर, सातारा परिसर येथे जयंती उत्साहात साजरी झाली. या भागातून सायंकाळी अनेक मंडळांनी भव्य मिरवणुका काढल्या. भडकलगेटजवळ सर्व मिरवणुकीचा समारोप करण्यात आला.
