म. टा. प्रतिनिधी, औरंगाबाद

गेल्या साडेचार वर्षांत मराठवाड्यातील गोदावरी खोऱ्यात किती पाणी साठवले? त्यातून शेतीला किती पाणी दिले? पिण्यासाठी किती पाणी दिले? उपलब्ध पाण्यातून बाष्पीभवनाद्वारे किती पाणी कमी झाले? यासह सिंचनाला दिलेल्या पाण्यातून, उद्योगांना पाण्यातून किती पैसे मिळाले? याचा हिशेब जलसंपदा मंत्री गिरीष महाजन यांनी मराठवाड्याच्या जनतेला द्यावा, अशी मागणी जिल्हा परिषदेचे सदस्य रमेश गायकवाड यांनी एका पत्रकार परिषदेद्वारे केली.

यावेळी नगरसेवक कैलास गायकवाड यांच्यासह अन्य सदस्यांची उपस्थिती होती. रमेश गायकवाड यांनी सांगितले की, मराठवाड्यासाठी १०२ अब्ज घनफूट (टीएमसी) पाण्याचे धरण बांधण्यात आले आहे. नगर-नाशिकचे ११५ टीएमसी पाणी असतानाही त्यांनी १६५ टीएमसी क्षमतेचे धरण बांधून मराठवाड्याच्या हक्काचे पाणी पळविले. मराठवाड्यात दुष्काळ, नापिकी व नगर-नाशिकने अडविलेल्या पाण्यामुळेच बेरोजगारी, शेतकऱ्यांच्या आत्महत्या वाढल्या आहेत. याचा सिंचन क्षेत्र व औद्योगिक क्षेत्र याच्यावर फार मोठा परिणात होत आहे.

गायकवाड यांनी या पत्रकार परिषदेत जलसंपदा मंत्री गिरीष महाजन यांच्यावर समन्यायी पाणी वाटपात मराठवाड्याच्या जनतेवर अन्याय केल्याचेही आरोप केले. जल आराखडा तयार करताना मुळा व प्रवरा हे वेगळे खोरे दाखवून त्याचा वेगळा नकाशा तयार केले व उपलब्ध पाणी वेगळे दाखविले. त्यातून मराठवाड्यात व नगर-नाशिक यांच्या भांडणे लावण्याचे काम केले आहे. याशिवाय ब्रह्मगव्हाण सिंचन योजना हे मराठवाड्यातील एका आमदाराला खूष करण्यासाठी आणण्यात आली आहे. मराठवाड्यात पाण्याची बिकट समस्येला जलसंपदा मंत्री जबाबदार असल्याचा आरोपही त्यांनी केला.

\Bनिवडणुकीत 'जायकवाडी'चा मुद्दाच नाही\B

औरंगाबाद लोकसभा निवडणुकीच्या प्रचारात जायकवाडीच्या पाण्याचा मुद्दा कोणत्याही पक्षाकडून किंवा उमेदवारांकडून उचलला गेला नाही. समन्यायी पाणी वाटप; तसेच अन्य विषयांवर लोकप्रतिनिधींकडून पाठपुरावा आवश्यक असल्याचेही मतही त्यांनी यावेळी व्यक्त केले.

म. टा. प्रतिनिधी, औरंगाबाद

महावीर चौक किंवा बाबा पेट्रोल पंप चौकात होणारी कोंडी दूर करण्यासाठी शहर वाहतूक पोलिसांकडून विशेष नियोजन करण्यात आले. या नियोजनामुळे बाबा पेट्रोल पंप चौकात असलेले हॉटेल चालक, ट्रॅव्हल्स एजंट आणि इतर व्यवसायिकांच्या व्यवसायावर परिणाम होत आहे. शिवाय एका चौकातील होणारी कोंडी ही तीन चौकांत विभागली गेली. याचा फटका सर्वसामान्य प्रवाशांना सहन करावा लागत आहे.

शहर वाहतूक पोलिसांनी काही महिन्यांपूर्वी महावीर चौक (बाबा पेट्रोलपंप सर्कल) येथे उड्डाणपूल येथील वाहतूक कोंडी कमी करण्यासाठी छावणी पूल (छावणी टोल बूथ) ते भगवान महावीर चौक (बाबा पेट्रोल पंप सर्कल) यादरम्यान एकेरी रस्ता (वन वे) केला आहे. अदालत रोडमार्गे छावणीकडे जाणाऱ्या वाहतुकीला पंचवटी चौकामार्गे छावणी पुलावर जावे लागते. पूर्वी बाबा पेट्रोल पंप चौकात वाहतूक कोंडी होत होती. या निर्णयामुळे ती आता छावणीतील लोखंडी पुलाच्या परिसरात होत आहे. लोखंडी पुलवरून शहरात येणाऱ्या वाहनांच्या समोरून पंचवटीमार्गे येत असलेल्या वाहनांना वळण घ्यावे लागत आहे. पंचवटीमार्गे आलेल्या व 'सीबीएस'कडे जाणाऱ्या वाहनांना बाबा पेट्रोल पंप चौकातूनच पुढे जावे लागत आहे. यामुळे या चौकात वाळूजहून सरळ कोर्टाकडे जाणारी वाहने आणि सीबीएसकडे जाणाऱ्या वाहने समोरासमोर येत असतात. यामुळे या ठिकाणी अपघाताचा धोका निर्माण होण्याची शक्यता आहे. याशिवाय पंचवटी चौकातही येणारी वाहने आणि रेल्वे स्टेशनकडून येणारी वाहने एकाच चौकात येतात. त्यामुळे या चौकात वाहतुकीची कोंडी होत आहे. या चौकात प्रवासी घेण्यासाठी एसटी बस थांबत असतात. यामुळेही कोंडीत भर पडत आहे.

एकीकडे वाहतूक कोंडीचा फटका तर, दुसरीकडे या नियोजनामुळे बाबा पेट्रोल पंपाच्या आसपास असलेल्या व्यवसायिकांना गेल्या दोन महिन्यांपासून फार मोठा फटका बसलेला आहे. या ठिकाणी हॉटेल आणि इतर व्यवसायिकांची दीडशे ते दोनशे दुकाने आहेत. बाबा चौकात आलेले अनेक जण या हॉटेलमध्ये येत असतात. शिवाय ट्रॅव्हल्स कंपन्यातून तिकीट घेऊन प्रवास करणाऱ्यांनाही याचा फटका बसत आहे.

\Bग्राहक नसल्याचा फटका\B

पूर्वीच्या वाहतूक व्यवस्थेत योग्य बदल करून तीच व्यवस्था कायम ठेवल्यास, या भागातील व्यवसायिकांना फटका बसणार नाही. प्रवासी किंवा पर्यटकांना आमच्या दुकानापर्यंत येण्यासाठी दीड किलोमीटरचा फेरा मारावा लागत आहे. परिस्थिती कायम राहिल्यास या मार्गावरील दुकाने बंद करण्याचा निर्णय या भागातील दुकानदारांना करावा लागण्याची शक्यता आहे, असे औरंगाबाद ट्रॅव्हल्स असोसिएशनचे उपाध्यक्ष डॉ. प्रवीण डेरे यांनी सांगितले.

म. टा. प्रतिनिधी, औरंगाबाद

घाटीच्या मेडिसिन विभागात शॉटसर्किट झाल्यामुळे 'एमआयसीयू'मध्ये शनिवारी (२० एप्रिल) गोंधळ उडाला. त्यामुळे रविवारी दुरुस्तीचे हाम पूर्ण करुन 'एमआयसीयू'च्या निर्जंतुकीकरणाची प्रक्रिया करण्यात आली आणि सोमवारी दुपारपासून हा विभाग पुन्हा सेवेत येणार आहे. शासकीय वैद्यकीय महाविद्यालय व रुग्णालयाच्या औषधवैद्यकशास्त्र (मेडिसिन) विभागात शनिवारी शॉटसर्किट झाल्यामुळे सायंकाळी साडेपाचच्या सुमारास 'एमआयसीयू'मध्ये विद्युत पुरवठा खंडित झाला होता. त्यामुळे विभागातील व्हेंटिलेटर बंद पडले. विभागप्रमुख डॉ. मीनाक्षी भट्टाचार्य यांनी तात्काळ धाव घेत डॉक्टर व निवासी वैद्यकीय अधिकारी-कर्मचाऱ्यांच्या मदतीने रुग्णांना इतर वॉर्डमध्ये व्हेंटिलेटरवर शिफ्ट केले, तर ज्या रुग्णांना व्हेंटिलेटरची गरज नव्हती अशा रुग्णांना इतर वॉर्डात हलवले. त्यामुळे अनर्थ टळला. त्यानंतर दुरुस्ती तातडीने पूर्ण करुन निर्जंतुकीकरणाची प्रक्रिया पूर्ण करण्यात आल्याचे प्रशासनाच्या वतीने सांगण्यात आले.

म. टा. प्रतिनिधी, औरंगाबाद

अवघ्या काही तासांवर मतदान येऊन ठेपले असून, विविध मार्गे प्रचाराची रणधुमाळी टिपेला पोहोचली असतानाच मतदानाच्या गडबडी मात्र समोर आल्याशिवाय राहात नसल्याची स्थिती आहे. याच गडबडीचा भाग म्हणून एकाच भागातील आणि एकाच कुटुंबातील आई-वडील व दोन मुलांचे मतदान दोन वेगवेगळ्या ठिकाणी आल्याचा अजब प्रकार समोर आला आहे. विशेष म्हणजे संबंधित अधिकाऱ्यांना याविषयी जाब विचारला असता, आता काहीही होऊ शकत नसल्याचे अधिकाऱ्यांनी सांगून हात वरती केले आहेत.

हा प्रकार ज्यांच्यासोबत घडला ते कुटुंब अनेक वर्षांपासून सिडकोत राहणारे आहे. याच कुटुंबातील सर्व सदस्यांचे मतदान मागच्या निवडणुकीवेळी सिडकोतच होते. आता मात्र अर्ध्या सदस्यांचे मतदान दिल्लीगेट परिसरातील महात्मा गांधी राष्ट्रीय ग्रामीण रोजगार हमी योजनेच्या जिल्हा परिषद सभागृह येथे आहे, तर अर्ध्या सदस्यांचे मतदान जयभवानी नगर येथील किडस् कॅपिटल इंग्रजी शाळेत आहे. दोन वेगवेगळ्या ठिकाणी मतदान होणार असल्याने कुटुंबीय त्रस्त झाले असून, कुटुंबप्रमुखाने याविषयी जिल्हाधिकारी कार्यालय गाठून घडल्या प्रकाराचा जाब विचारला असता, 'आता उशीर झाला आहे व त्यामुळे काहीही होऊ शकत नाही' असे सांगून संबंधित अधिकारी चक्क मोकळे झाले आहेत. या प्रकाराला जबाबदार कोण, असा सवाल उपस्थित करीत संबंधित कुटुंबाने आपली व्यथा 'मटा'कडे मांडली.

म. टा. प्रतिनिधी, औरंगाबाद

विरोधी पक्ष कधी नव्हे इतका हताश व हतबल झाला आहे. खुद्द प्रदेशाध्यक्ष यांनी 'माझे कुणी ऐकत नाही' असे जाहीर सांगितले असून, प्रदेशाध्यक्ष याचीच जर पराभूत मनोवृत्ती असेल तर पक्षाची काय अवस्था असेल हे लक्षात आल्याशिवाय राहात नाही आणि नांदेडचा खासदार हा मोदींना पंतप्रधान करण्यासाठी दिल्लीला जाणारा असेल. तसेच यंदा मागच्या वर्षीपेक्षा जास्त खासदार महायुतीचे असतील, असा दावा भाजप प्रदेश सरचिटणिस आमदार सुजितसिंग ठाकूर यांनी रविवारी (२१ एप्रिल) पत्रकार परिषदेत केला.

या वेळी भाजप प्रवक्ते शिरीष बोराळकर, आमदार प्रशांत बंब, आमदार अतुल सावे, विकास मंडळाचे अध्यक्ष डॉ. भागवत कराड, भाजप शहर अध्यक्ष किशनचंद तनवाणी, माजी उपमहापौर प्रशांत देसरडा, अनिल मकरिये आदींची उपस्थिती होती. यंदाही एनडीएचे सरकार येणार आणि मागच्या निवडणुकीपेक्षा जास्त खासदार निवडून येणार असे सांगताना, औरंगाबादमध्ये खासदार चंद्रकांत खैरे हेच पुन्हा एकदा खासदारपदी निवडून येणार असल्याचे ठाकूर म्हणाले. भाजप नेते, पदाधिकाऱ्यांकडून खैरे यांचा प्रचार केला जात नसल्याचा आरोप आहे, याविषयी ठाकूर यांना छेडण्यात आले असता, असे काहीही नसून, दोन्ही पक्षांचा एकमेकांवर विश्वास असल्याचे ते म्हणाले. अपक्ष उपेदवार हर्षवर्धन जाधव यांच्या शुक्रवारी झालेल्या सभेत त्यांनी आपल्या पाठीशी भाजप प्रदेशाध्यक्षासह अख्खी भाजपची फौज असल्याचे जाहीरपणे सांगितले; याविषयी ठाकूर यांना विचारले असता, संपूर्ण भाजप त्यांच्या पाठीशी असती तर त्यांना अपक्ष म्हणून उभे राहण्याची वेळ आली असती का, असा सवालही ठाकूर यांनी उपस्थित केला. तसेच अपक्ष उमेदवार जर मोदींचा फोटो वापरत असेल तर ते नक्कीच चुकीचे आहे, असेही ते म्हणाले. उस्मानाबादला काही अडचण निर्माण झाली असली तरी निवडून येणारा खासदार हा महायुतीचाच असेल, असाही दावा ठाकूर यांनी केला.

\Bमतदानावर बहिष्कार, प्रत्यक्ष बोलणार

\Bजालना जिल्ह्यातील ५१ गावांतील नागरिकांनी कॅनॉलचे काम न झाल्याबद्दल मतदानावर बहिष्कार टाकण्याचे जाहीर केल्याबाबत ठाकूर यांना छेडले असता, डॉ. कराड म्हणाले, संबंधित कॅनॉलच्या कामासाठी निधी मंजूर आहे. मात्र काही शेतकऱ्यांनी पाईपलाईन टाकण्यासाठी नकार दिल्याने हे काम झालेले नाही. संबंधित शेतकऱ्यांशी प्रत्यक्ष बोलणी करुन हा प्रश्न सोडवला जाईल, असेही त्यांनी सांगितले.

…

म. टा. प्रतिनिधी, औरंगाबाद

लोकसभा निवडणुकीतील औरंगाबाद मतदारसंघाचे मतदान मंगळवारी होणार आहे. या मतदानादरम्यान कायदा आणि सुव्यवस्था अबाधित ठेवण्यासाठी शहर आणि जिल्ह्यात एकूण नऊ हजार पोलिस अधिकारी आणि कर्मचाऱ्यांचा बंदोबस्त नेमण्यात आला आहे. तसेच ग्रामीण पोलिस अधिक्षक कार्यालयाच्या वतीने बंदोबस्तावरील पोलिसांसाठी फूड पॅकेटसोबतच चिक्की, चिवडा, ओआरएस पाकिटे देखील देण्यात येणार आहेत.

मंगळवारी सकाळपासून या मतदानाला प्रारंभ होणार आहे. जिल्ह्यात एकूण दोन हजार एकवीस मतदान केंद्र आहेत. या काळात बंदोबस्तासाठी शहर आणि ग्रामीण पोलिसांच्या वतीने वेगवेगळा बंदोबस्त तैनात करण्यात आला आहे. शहर पोलिस आयुक्तालयाच्या वतीने बंदोबस्तात एक पोलिस आयुक्त, तीन उपायुक्त, सहा एसीपी, ३५ पोलिस निरीक्षक, १४९ एपीआय, पीएसआय, दोन हजार ७३४ कर्मचारी, साडेसहाशे होमगार्ड आणि राज्य राखीव दलाच्या दोन कंपन्यांचा समावेश आहे. ग्रामीण पोलिस अधिक्षक कार्यालयाच्या वतीने जिल्ह्यात एक पोलिस अधिक्षक, एक अप्पर पोलिस अधिक्षक, सहा डिवायएसपी, नऊ पोलिस निरिक्षक, ८५ एपीआय, पीएसआय, एक हजार ६८ कर्मचारी, साडेचारशे होमगार्ड, सीआरपीएफच्या एक कंपनीसोबतच मध्यप्रदेश येथील राखीव पोलिस दलाचे जवान असा एकूण साडेचार हजार पोलिस अधिकारी आणि कर्मचाऱ्याचा बंदोबस्त तैनात करण्यात आला आहे.

…

चिक्की, ओआरएसचे वाटप

ग्रामीण पोलिस अधिक्षक कार्यालयाच्या वतीने बंदोबस्तावरील कर्मचाऱ्यांसाठी चोख नियोजन करण्यात आले आहे. प्रत्येक कर्मचाऱ्याला २०० ग्रॅम चिक्की, चिवडा, दोन ओआरएसची पाकीटे, एक लीटरची पाणी बॉटल असे साहित्य अल्पोपहारासाठी देण्यात येणार आहे.

…

शहर आणि जिल्ह्यात पथसंचलन

मतदानाच्या पार्श्वभूमीवर शहर आणि जिल्ह्यात विविध पोलिस ठाण्या अंतर्गत पोलिसांचे पथसंचलन करण्यात आले. शहरात टीव्ही सेंटरपासून पथसंचलनाला सुरुवात करण्यात आली. पोलिस उपायुक्त राहुल खाडे यांच्या मार्गदर्शनाखाली हे पथसंचलन विविध भागात करण्यात आले.

म. टा. प्रतिनिधी, औरंगाबाद

शिवस्वराज्य बहुजन पक्षाचे उमेदवार हर्षवर्धन जाधव यांना मराठा सेवा संघाने पाठिंबा दिला आहे. सेवा संघाच्या २२ कक्षांनी रविवारी पाठिंबा जाहीर केला. मतदारसंघात सर्व जाती-धर्मासाठी जाधव यांनी काम केले आहे. त्यामुळे पाठिंबा देत असल्याचे मराठा सेवा संघाने प्रसिद्धीपत्रकात म्हटले आहे.

औरंगाबाद लोकसभा मतदारसंघात शिवस्वराज्य बहुजन पक्षाचे उमेदवार हर्षवर्धन जाधव निवडणूक लढवत आहेत. त्यांना मराठा सेवा संघाने जाहीर पाठिंबा दिला आहे. याबाबत सेवा संघाने जाहीर पत्र काढले. औरंगाबाद जिल्ह्याशी निगडीत प्रश्न सोडवण्याचे काम जाधव यांनी केले. मराठा आरक्षणासाठी आमदारकीचा राजीनामा देण्याची तयारी दाखवली. कन्नड मतदारसंघात राजपूत समाजाला जात वैधता प्रमाणपत्र मिळवून देण्यासाठी सहकार्य केले. तसेच औरंगाबाद शहरातील कचरा प्रश्न सोडवण्यासाठी पुढाकार घेतला होता. या कामाची दखल घेऊन जाधव यांना मराठा सेवा संघ व त्याच्याशी निगडीत २२ कक्ष पाठिंबा देत असल्याचे पत्रकात म्हटले आहे. या कक्षात वीर भगतसिंग विद्यार्थी परिषद, डॉ. पंजाबराव देशमुख शिक्षक परिषद, जगतगुरु तुकोबाराय साहित्य परिषद, मराठा वसतीगृह कक्ष आदी कक्षांचा समावेश आहे. तसेच पत्रकावर जिल्हा कार्याध्यक्ष डी. एम. पाटील, जिजाऊ ब्रिगेड जिल्हाध्यक्ष हेमा पाटील, डी. डी. पवार, भाऊसाहेब देशमुख, प्रा. भाऊसाहेब शिंदे, ज्ञानेश्वर अंभोरे, दीपक जाधव, मोतीभाऊ वाघ, डॉ. जनार्दन पिंपळे, रघुनाथ पोफळे यांची स्वाक्षरी आहे.

म. टा. प्रतिनिधी, औरंगाबाद

'महापालिकेने बँक गॅरंटी न दिल्यामुळे कर्ज मिळू शकले नाही. त्यामुळे कामाची गती मंदावली आहे,' असे एलईडीचे काम करणाऱ्या कंत्राटदाराने महापालिकेला कळवले आहे.

शहरातील विजेच्या खांबांवर एलईडी दिवे लावण्याचे कंत्राट इलेक्ट्रॉन एनर्जी सेव्हिंग लिमिटेडला देण्यात आले आहे. शहरात ६५ हजार पथदिवे असून त्यापैकी ४० हजार पथदिव्यांवर एलईडी लावण्याचे कंत्राट दिले आहे. कंपनीने यापैकी २८ हजार दिवे लावले. कंत्राटाची मुदत एक वर्षाची होती, परंतु या मुदतीत दिवे लावणे शक्य होत नसल्यामुळे पालिकेच्या आयुक्तांनी कंपनीला नोटीस बजावून ९३ लाख रुपयांचा दंड भरण्याचे कळवले आहे. या नोटीसला कंपनीने उत्तर दिल्याची माहिती कार्यकारी अभियंता शेख खमर यांनी दिली. 'कंपनीसाठी पालिकेने बँक गॅरंटी द्यायला हवी होती. बँक गॅरंटीच्या आधारे कंपनी कर्ज काढणार होती, परंतु अद्याप बँक गॅरंटी दिली नसल्याने कर्ज प्रकरण होऊ शकले नाही. परिणामी, काम रेंगाळले,' असे कंपनीने नमूद केल्याचे शेख खमर यांनी सांगितले.

\Bपालिकेला ३६ कोटी द्यावे लागणार

\Bमहापालिकेला बँक गॅरंटीपोटी सुमारे ३६ कोटी रुपये द्यावे लागणार आहेत. महापालिकेची आर्थिक स्थिती लक्षात घेता एवढी मोठी रक्कम पालिका एकाचवेळी गुंतवू शकेल याची खात्री नाही. जोपर्यंत कर्ज मंजूर होत नाही, तोपर्यंत एलईडीच्या कामाला गती मिळण्याची शक्यता नसल्याचे बोलले जात आहे.

म. टा. प्रतिनिधी, औरंगाबाद

अध्यापक पदवी, पदव्युत्तर अभ्यासक्रमांच्या परीक्षा सुरू होण्यापूर्वीच तीन परीक्षा केंद्र बदलण्याचा प्रताप डॉ. बाबासाहेब आंबेडकर मराठवाडा विद्यापीठ प्रशासनाने केला आहे. २५ एप्रिलपासून या परीक्षा सुरू होणार असून, यात परीक्षा केंद्रात आणखी बदल होऊ शकतो, अशी शक्यता असल्याने विद्यार्थ्यांमध्ये संभ्रम आहे.

अध्यापक पदवी, पदव्युत्तर अभ्यासक्रमाच्या परीक्षांचे वेळापत्रक विद्यापीठाने जाहीर केले आहे. लोकसभा निवडणुकीच्या पार्श्वभूमीवर वेळापत्रक काही दिवसांनी पुढे गेले. येत्या गुरुवारपासून पदवी, पदव्युत्तर अशा दोन्ही अभ्यासक्रमांच्या परीक्षा सुरुवात होत आहे. त्यात विद्यापीठाच्या परीक्षा विभागाने चक्क तीन वेळा बदल केल्याने विद्यार्थी, कॉलेज प्रशासनातही संभ्रम आहे. सुरुवातीला शहरातील विद्यार्थ्यांसाठी एक परीक्षा केंद्र निश्चित करण्यात आले. त्यात पुन्हा बदल करण्यात आला. त्याची अधिसूचना जारी करण्यात आली. त्यानंतर प्रत्यक्ष हॉलतिकीटवर तिसरेच परीक्षा केंद्र नमूद करण्यात आले. त्यामुळे नेमका हा काय गोंधळ आहे, असा प्रश्न विद्यार्थ्यांना पडला.

सूत्रांनी दिलेल्या माहितीनुसार; सुरुवातीला सरस्वती भुवन कॉलेज परीक्षा केंद्र निश्चित करण्यात आले. त्यात बदल करत इं. भा. पाठक महिला महाविद्यालय परीक्षा केंद्र असेल असे सांगण्यात आले. प्रत्यक्षात काही दिवस परीक्षेला राहिले असताना शनिवारी शासकीय कला व विज्ञान कॉलेज परीक्षा केंद्र निश्चित करण्यात आले. यातही बदल करण्याच्या हालचाली सुरू आहेत. परीक्षेला काही तीन-चार दिवसांचा कालावधी शिल्लक असताना परीक्षा केंद्रच निश्चित होत नसल्याने प्रशासनाचा गलथान कारभार समोर आला आहे.

परीक्षांचे वेळापत्रकात अशा प्रकारे बदल करण्यात येऊ नयेत, निश्चित वेळापत्रक, परीक्षा केंद्र एकाच वेळी ठरविल्यास विद्यार्थ्यांची फरफट होणार नाही, असे प्राचार्यांचे म्हणणे आहे.

\Bपरीक्षा लांबल्या\B

राज्यातील अध्यापक पदवी, पदव्युत्तर अभ्यासक्रमाच्या कॉलेजांमधील प्रवेश प्रक्रिया राज्य सामाईक प्रवेश प्रक्रिया कक्ष (सीईटी सेल) यांच्याकडून होते. प्रक्रियेला दरवर्षी विलंब होतो. प्रक्रियेला होणाऱ्या विलंबामुळे अभ्यासक्रमाचे वेळापत्रक कोलमडले. डॉ. बाबासाहेब आंबेडकर मराठवाडा विद्यापीठांतर्गत ४२ अध्यापक महाविद्यालये असून, प्रथम वर्षाला सुमारे चार हजार विद्यार्थी प्रवेश घेतात. सीईटी सेलच्या प्रक्रियेने विद्यापीठाचे शैक्षणिक, परीक्षांचे वेळापत्रकातील ताळमेळ बिघडला आहे. परीक्षाचे वेळापत्रक एक सत्राने लांबल्याचे समोर आले. वेळापत्रक लांबल्याने त्याचा फटका विद्यार्थ्यांना बसत आहे. त्यात विद्यापीठस्तरावरील, असे गोंधळ विद्यार्थ्यांचे शैक्षणिक नुकसान होण्याची शक्यता असल्याचे विद्यार्थ्यांचे म्हणणे आहे.

..

बीएड परीक्षा....२५ एप्रिल ते ४ मे दरम्यान

एमएड परीक्षा....२५ एप्रिल ते ९ मे दरम्यान

..

शहरात परीक्षा केंद्र..१

प्रथम वर्ष..........१०७५

द्वितीय वर्ष........७५०

..

म. टा. प्रतिनिधी, औरंगाबाद

अजूनही सव्वाशे कोटी जनतेपैकी केवळ सात कोटी जनता कर भरणारी आहे. तसेच क्रूड ऑइल, खाद्यतेलापासून अनेक वस्तुंची आयात करण्याशिवाय पर्याय नाही. अनेक मोठमोठ्या कंपन्यांपासून मीडिया हाउसपर्यंत अनेकांची मालकी आपल्या देशात नाही. अशी एकंदर अर्थस्थिती असताना बँकिंग क्षेत्रात विदेशी मॉडेल वापरणे अयोग्य ठरेल, एकच कररचनेची आणि त्याचबरोबर कर्जबुडव्यांचे कान पिळणारी व्यवस्था असणे आर्थिक सुरक्षेसाठी गरजेची आहे, असे मत ज्येष्ठ उद्योजक राम भोगले यांनी 'फोरम फॉर इंटिग्रेडेट नॅशनल सिक्युरिटी'च्या (फिनस्) वतीने आयोजित राष्ट्रीय सुरक्षाविषयक चर्चासत्रात व्यक्त केले.

या चर्चासत्रात देशांतर्गत, देशाबाहेरची, सीमांची सुरक्षा, आर्थिक सुरक्षा व आंतरराष्ट्रीय दहशतवादाविषयी मंथन करण्यात आले. हा कार्यक्रम रविवारी (२१ एप्रिल) भानुदास चव्हाण सभागृहात घेण्यात आला. या वेळी मुंबईच्या एमईटी महाविद्यालयाचे प्रा. राजीव गुप्ते, माजी सहाय्यक कमांडट हर्षद बेळे यांची व्यासपीठावर उपस्थिती होती. भोगले म्हणाले, ८० टक्के मध्यमवर्गीय व उच्च मध्यमवर्गीय जनता निवृत्तीनंतर काय, किती रक्कम मिळेल, याचा विचार करते. अशी स्थिती आहे तर अजूनही कर भरणारे केवळ सात कोटी आहेत. अर्थव्यवस्था भक्कम होण्यासाठी ही संख्या वाढणे गरजेचे आहे. तसेच नैसर्गिक स्रोत, मोठ्या कंपन्या आणि मीडिया हाउस यांची मालकी होणाकडे यावर आर्थिक सुरक्षा अवलंबून आहे. अर्थमंत्र्यांचा फोन गेला की ताबडतोब कर्ज मंजूर होणारी व्यवस्था हवी की सर्व बाबी पडताळून योग्य तेवढेच कर्ज देणारी व कर्जबुडव्यांचे कान पिळणारी बँकिंग व्यवस्था हवी, याचा विचार करण्याची गरज आहे. ही व्यवस्था भक्कम असेल, तर किंगफिशर किंवा जेटसारखी अवस्था होणार नाही, नीरव मोदीसारखे कर्ज बुडवणारेही तयार होणार नाहीत. योग्य तेवढे कर्ज मिळाले तर कायद्याच्या चौकटीत कारखाने चालतील. त्यामुळे बँकिंगसाठी विदेशी मॉडेल आपल्या देशात लागू करून काहीही साध्य होणार नाही, असेही भोगले म्हणाले.

चीनविषयी बोलताना डॉ. गुप्ते म्हणाले, डोकलामवरून दोन्ही देशांचे संबंध ताणले गेले असले तरी पूर्वीसारखे शत्रुत्वाचे संबंध राहिलेले नाहीत. आज चीन आपल्यासाठी शत्रुराष्ट्र नसून प्रतिस्पर्धी राष्ट्र आहे. मात्र चीनने भारताभोवती, श्रीलंकेत व इतरत्र बंदरांचे जाळे निर्माण केले आहे. हे व्यापारी कारणांसाठी असल्याचे सांगण्यात आले असले तरी, व्ह्यूरचनेच्या दृष्टीने त्यांची निर्मिती करण्यात आल्याचे नाकारता येणार नाही. भारतानेही फ्रान्स व इतर देशात बंदरे बांधली आहेत. त्यांचा वाहतुकीसाठी मोठा लाभ होत आहे व होणार आहे, असे गुप्ते म्हणाले. भारताकडे सुमारे सव्वाशे अणवस्त्रे आहेत, तर पाकिस्तानकडे १४० अणवस्त्रे आहेत. मात्र पहिल्यांदा अणवस्त्र वापरणार नाही, ही भारताची भूमिका आहे, तर गंभीर स्थितीत पाकिस्तान वापरू शकतो. तरीही दुसऱ्याच अणू हल्ल्यात पाकिस्तानला बेचिराख करण्याची क्षमता भारताची आहे, असे ते म्हणाले.

\Bनक्षलवादाची जागा घेतली माओवादाने

\Bअलीकडे नक्षलवाद्यांच्या हल्ल्यात एका आमदाराचा मृत्यू झाला. त्यापूर्वी तीन वर्षांत एकही नक्षलवादी हल्ला झाला नव्हता. देशामध्ये नक्षलवाद संपण्याचा मार्गावर नसून, नक्षलवादाची जागा माओवादाने घेतली आहे. आर्थिक गरजेपोटी माओवादी जंगलांमधून शहरांमध्ये शिरत आहेत. काही उच्चशिक्षितांच्या माध्यमातून काम करवून घेतले जात असल्याचे बेळ‌े म्हणाले. त्यासाठी आपल्या घरातूनच योग्य संस्कार मिळाले, तर माओवादाला दूर ठेवता येईल, असेही ते म्हणाले.

(पान दोन मेन करणे. विमानाचे कॅरिकेचर वापरावे)

म. टा. प्रतिनिधी, औरंगाबाद :

जेट एअरवेज विमान कंपनी बंद झाल्यानंतर स्पाईस जेट कंपनीने त्यांच्या विमान सेवेचा विस्तार करण्याचा निर्णय घेतला आहे. या निर्णयांतर्गत २४ मार्गावर विमान सेवा सुरू करण्याची घोषणा करण्यात आली. मात्र, पहिल्या यादीतून औरंगाबाद विमान मार्गाचा विचार करण्यात आला नसल्याची माहिती समोर आली.

औरंगाबाद विमानतळावरून जेट एअरवेज कंपनीच्या दिवसभरातून दोन फेऱ्या होत होत्या. मुंबई औरंगाबाद मुंबई या विमानातून दररोज ४५० प्रवासी जात होते. हे विमान बंद झाल्यामुळे याचा फटका या प्रवाशांना बसला आहे. या विमान प्रवाशांच्या सोयीसाठी ट्रॅव्हल्स असोसीएशन, हॉटेल असोसीएशनच्या काही प्रतिनिधींसह औरंगाबाद विमानतळ प्राधिकरणाकडून औरंगाबाद मुंबई ही विमान सेवा चालू करण्याबाबत पत्रव्यवहार करण्यात आला होता. याशिवाय विमानतळ प्राधिकरणाकडून दिलेल्या प्रस्तावावर विचार करण्यात येणार असल्याचे संकेतही स्पाईस जेट विमान कंपनीकडून देण्यात आले होते. यामुळे स्पाईस जेट लवकर सुरू होईल. अशी शक्यता होती.

स्पाईस जेटने १८ जुलै रोजी २४ विमान मार्गावर बोईंग ७३७-८०० एनजी हे विमान सुरू करण्याचा निर्णय जाहीर केला आहे. या निर्णयांतर्गत दिल्ली आणि मुंबई येथून ही सेवा चालविण्यात येणार आहे. यात जयपूर, पाटना, दिल्ली, बंगरूळू, बागडोरा, अमृतसर, मंगलुरू, हैदराबाद, कोइंबतूर, कोलकोत्तासह अन्य मार्गावर विमान सेवा सुरू करण्याचा निर्णय घेण्यात आला आहे. या यादीत औरंगाबाद शहराचे नाव नसल्याची माहिती समोर आली.

…

१६ कनेक्शन मुंबईहून

स्पाईस जेट विमान कंपनीकडून जाहीर करण्यात आलेल्या २४ कनेक्शन सुरू करण्याचा निर्णय घेण्यात आला आहे. यात विमानाच्या १६ फेऱ्या एकट्या मुंबईतून सुरू करण्यात येणार असून ४ दिल्लीहून सुरू करण्यात येणार आहेत. तर मेट्रो शहरातून दोन विमान सेवा सुरू करण्याची घोषणा करण्यात आली.

………

म. टा. प्रतिनिधी, औरंगाबाद

लोकसभा निवडणुकीच्या पार्श्वभूमीवर शहरात अवैध धंद्याविरुद्ध जोरदार मोहीम सुरू आहे. सिडको पोलिसांनी रविवारी कारवाई करीत देशी दारूचा दहा बॉक्सचा साठा जप्त केला. सनी सेंटरमध्ये हा साठा ठेवण्यात आला होता. याप्रकरणी आरोपीला अटक करण्यात आली असून, सिडको पोलिस ठाण्यात गुन्हा दाखल करण्यात आला आहे.

सिडको पोलिस ठाण्याचे पथक पथसंचलन करीत असताना त्यांना सनी सेंटरमध्ये एका गाळ्यामध्ये देशी दारूचे दहा बॉक्स विक्रीसाठी ठेवण्यात आल्याची माहिती मिळाली. या माहितीवरून पथकाने या ठिकाणी छापा मारला. यावेळी संशयित आरोपी गणेश नंदू घोडके (वय २५, रा. आयोध्यानगर) याच्या ताब्यातून दहा बॉक्स जप्त करण्यात आले. आरोपी गणेशला अटक करण्यात आली आहे. ही कारवाई पोलिस आयुक्त चिरंजीवप्रसाद, उपायुक्त राहुल खाडे, सहायक आयुक्त गुणाजी सावंत, पोलिस निरीक्षक अशोक गिरी यांच्या मार्गदर्शनाखाली पोलिस उपनिरीक्षक भरत पाचोळे, राजेश बनकर, प्रकाश डोंगरे, सुरेश भिसे, दिनेश बन, स्वप्नील रत्नपारखी, विजय भानुसे यांनी केली.

म. टा. प्रतिनिधी, औरंगाबाद

महिला प्रवाशाच्या बॅगमधील पावणेसहा लाखांचे दागिने सहप्रवासी महिलेने लंपास केले. हा प्रकार शुक्रवारी दुपारी १२ ते पावणेदोन यादरम्यान कन्नड ते औरंगाबाद मार्गावर घडला. याप्रकरणी अज्ञात आरोपीविरुद्ध क्रांतीचौक पोलिस ठाण्यात गुन्हा दाखल करण्यात आला आहे.

स्नेहनगर, कन्नड येथील ३३ वर्षांची विवाहित महिला पती आणि सासू, सासऱ्यासह कन्नड येथे कार्यक्रमाला गेली होती. ही महिला शुक्रवारी दुपारी पती आणि सासू, सासऱ्यासह औरंगाबाद येथे बसने येत होती. यावेळी महिलेला कंडक्टरमागे असलेली जागा मिळाली तर, तिच्या कुटुंबीयांना बसच्या मागच्या बाजुला जागा मिळाली. या महिलेच्या पायापाशी तिची बॅग ठेवलेली होती. बस हतनूरच्या पुढे आल्यानंतर बसमध्ये एक प्रवासी महिला आली. ही प्रवासी महिला कंडक्टरच्या मागे बसलेल्या महिलेच्या पायाजवळ बॅग असलेल्या ठिकाणी बसली. पडेगावजवळ ही महिला उतरून गेली. कन्नड येथील महिला मध्यवर्ती बसस्थानक येथे कुटुंबीयांसह उतरली. त्यांनी बॅग तपासली असता बॅगमध्ये असलेला दागिन्याचा डबा आणि पर्स गायब असल्याचे आढळून आले. या डब्यात मंगळसूत्र, एकदाणी, सोन्याचा गोफ, नेकलेस, वेढा, पाटल्या, तीन अंगठ्या, ठुशी, नथ असा १२ तोळ्यांचे एकूण पावणेसहा लाखांचा ऐवज होता. याप्रकरणी पोलिस ठाण्यात गुन्हा दाखल करण्यात आला असून, पोलिस उपनिरीक्षक राऊत तपास करीत आहेत.

म. टा. प्रतिनिधी, औरंगाबाद

गारखेडा येथील बेपत्ता तरुणाचा मृतदेह सावरगाव हडप (ता. जालना) येथे आढळला. विजय देविदास सुर्वे (वय ४१, रा. शंभुनगर, गारखेडा) असे या तरुणाचे नाव आहे. विजय हा नऊ एप्रिल रोजी मोपेडवर त्याच्या मित्रासोबत घराबाहेर पडला होता. या संशयित आरोपीविरुद्ध मौजपुरी पोलिस ठाण्यात खुनाचा गुन्हा दाखल करण्यात आला असून, जवाहरनगर पोलिस ठाण्यात वर्ग करण्यात आला आहे.

याप्रकरणी विजयच्या पत्नीने तक्रार दाखल केली आहे. नऊ एप्रिल रोजी दुपारी विजयच्या ओळखीचा मनोज शहादेव गवळी (रा. इंदिरानगर) हा त्याला बाहेर जाण्यासाठी बळजबरी करीत होता. विजय हा त्याच्या मोपेडची किल्ली घरातून घेऊन पत्नीला थोड्या वेळात येतो, असे सांगून मोपेड घेऊन गवळीसोबत गेला होता. पतीची दोन दिवस वाट पाहिली. त्यानंतर त्याच्या पत्नीने जवाहरनगर पोलिस ठाण्यात जाऊन पती बेपत्ता असल्याची नोंद केली होती. दरम्यान १२ एप्रिल रोजी विजयचा मेहुणा आनामी मोरे याला मौजपुरी पोलिस ठाण्यातून फोन आला होता. तुमची दुचाकी आणि एका व्यक्तीचा मृतदेह सावरगाव हडप येथे आढळून आला असल्याची माहिती पोलिसांनी मोरे यांना दिली. या माहितीवरून मोरे आणि विजयच्या भावाने जालना येथे जाऊन मृतदेह पाहिला असता तो विजय सुर्वे याचाच असल्याचे आढळून आले. याप्रकरणी मनोज गवळी याच्यासोबत पैशाच्या देवाणघेवाणीचा वाद असल्यामुळे गवळी याने विजयला त्याच्या सासरी, सावरगाव येथे नेऊन विहिरीत ढकलून खून केला; तसेच पुरावा नष्ट करण्यासाठी मोपेड विहिरीत टाकल्याचे तक्रारीत नमूद करण्यात आले आहे. या तक्रारीवरून संशयित आरोपी गवळीविरुद्ध खुनाचा गुन्हा दाखल करण्यात आला आहे. याप्रकरणी पोलिस उपनिरीक्षक तायडे तपास करीत आहेत.

…

\Bगवळीने घरी येऊन केली चौकशी\B

विजयच्या पत्नीने पोलिस ठाण्यात पती बेपत्ता असल्याची नोंद केल्यानंतर संशयित आरोपी गवळी हा दोन वेळा विजयच्या घरी येऊन गेला. विजय कोठे आहे त्याला मी पैसे दिले आहेत, असे त्याने सांगितले होते. विजयच्या कुटुंबीयांनी त्याला विश्वासात घेऊन विचारले असता त्याने,'माझ्यासोबत सावरगावला चल तीन तासात तुम्हाला विजयला शोधून देतो,' असे सांगितले होते.

…

\Bशेजारील महिलेवरही संशय\B

विजयच्या पत्नीच्या तक्रारीत शेजारी राहणाऱ्या महिलेवरही संशय घेण्यात आला आहे. २८ मार्च रोजी विजयचा या महिलेसोबत ड्रेनेज लाइन वाद झाला होता. यावेळी या महिलेने तिच्या नातेवाईकांना बोलावून विजयला मारहाण केली होती; तसेच त्याला ठार मारण्याची देखील धमकी दिली असल्याचे तक्रारीत नमूद करण्यात आले आहे.

म. टा. प्रतिनिधी, औरंगाबाद

शेंद्रा एमआयडीसी परिसरात स्क्रॅप लाकडाच्या साठ्याला सोमवारी (२२ एप्रिल) दुपारी आग लागून मोठे नुकसान झाले. दुपारी सव्वा वाजता या अग्नीकल्लोळाला सुरुवात झाली, रात्री उशिरापर्यंत आगीवर नियंत्रण आणण्याचे प्रयत्न अग्निशमन दलातर्फे सुरू होते. ही आग शॉर्टसर्किटमुळे लागल्याची शक्यता व्यक्त होत आहे.

शेंद्रा एमआयडीसी परिसरात स्कोडा कंपनीजवळ अंबादास मेटे यांची स्क्रॅपची कंपनी आहे. या कंपनीच्या आवारात स्कोडा कंपनीच्या वाहनांसाठी पॅकिंगकरिता लागणारे लाकूड व इतर स्क्रॅपचा समावेश होता. दुपारी सव्वाच्या सुमारास या कंपनीच्या आवारातील सामानाला अचानक आग लागली. काही वेळात आगीने रौद्ररुप धारण केले. त्यामुळे आग विझवण्याचा प्रयत्न करणाऱ्या कर्मचाऱ्यांनी कंपनीबाहेर धाव घेतली. याची माहिती मिळताच अग्निशमन दलाने घटनास्थळी धाव घेतली. आगीची तीव्रता पाहून चिकलठाणा आणि करमाड पोलिस घटनास्थळी दाखल झाले. आग वाढत असल्याने गरवारे कंपनी आणि एमआयडीसीच्या अग्निशमन दलाच्या बंबाना पाचारण करण्यात आले. या आगीत मोठे नुकसान झाले असून जीवितहानी झाली नसल्याची माहिती अग्निशमन दलाने दिली.

\Bकंपनी परिसरातील टपऱ्या जळाल्या \B

आगी वाढत जाऊन कंपनी परिसरातील टपऱ्या आगीच्या भक्ष्यस्थानी पडल्या. वाऱ्यामुळे आग जास्त भडकली. या आगीत कंपनीचे तिन्ही शेड जळून खाक झाले. बघ्यांच्या गर्दीला आवारताना पोलिसांच्या नाकीनऊ आले.

म. टा. प्रतिनिधी, औरंगाबाद

लोकसभा निवडणूक आचारसंहितमुळे औरंगाबाद जिल्हा मध्यवर्ती सहकारी बँकेच्या अध्यक्षपदाची निवड जून महिन्यात येणार आहे. पूर्वीच्या वेळापत्रकाप्रमाणे ही निवड १५ एप्रिल रोजी होणार होती.

राज्य सहकारी निवडणूक प्राधिकरणाने यासंदर्भात अध्यासी अधिकारीही नियुक्त केले होते. औरंगाबाद जिल्हा मध्यवर्ती सहकारी बँकेच्या अध्यक्षपदाची निवडणूक १५ एप्रिल रोजी होणार होती. मात्र ११ एप्रिल रोजी राज्य सरकारकडून सहकारी संस्थांना आदेश देण्यात आले. त्यात म्हटले आहे, की १० एप्रिल पासून लोकसभा निवडणुकीची आचारसंहित सुरू झाली आहे. त्यातील तरतुदीनुसार राज्यातील सहकारी संस्थांच्या निवडणुका काही काळासाठी पुढे ढकलणे आवश्यक आहे. सर्व परिस्थितीचा आढावा घेऊन सर्व सहकारी संस्थांच्या तसेच पदाधिकाऱ्यांच्या निवडणुका ३१ मेपर्यंत पुढे ढकलण्यात येत आहेत, असे म्हटले आहे. त्यामुळे निवडणूक कार्यक्रम जूनमध्येच जाहीर होण्याची शक्यता आहे.

\B१८ सदस्यांमधून होणार निवड \B

जिल्हा बँकेच्या विद्यमान संचालक मंडळाची मुदत २० मे २०२० रोजी संपणार आहे. फेब्रुवारी महिन्यात सुरेश पाटील यांचे निधन झाल्यामुळे अध्यक्षपद रिक्त आहे. संचालक मंडळावर २१ पैकी २० सदस्य निवडून आले. वैयक्तिक मतदारसंघातील संचालकाची जागा रिक्त आहे. पाटील यांचे निध व रामकृष्णबाबा पाटील यांना सहकार खात्याने अपात्र ठरविल्याने उर्वरित १८ सदस्यांमधून चेअरमन निवडला जाईल.

म. टा. प्रतिनिधी, औरंगाबाद

'निरपेक्ष मार्गदर्शक, अजातशत्रू आणि विनाभेद पालकत्व स्वीकारलेल्या डॉ. पारसमल बोरा यांच्या परीसस्पर्शाने अनेक विद्यार्थ्यांच्या जीवनाला अर्थ व दिशा मिळाली,' अशा भावना त्यांच्या विद्यार्थ्यांनी व्यक्त केला. डॉ. बाबासाहेब आंबेडकर मराठवाडा विद्यापीठातील लोकप्रशासन विषयाचे माजी प्राध्यापक, माजी कुलसचिव डॉ. बोरा यांच्या अमृतमहोत्सवी वर्षानिमित्त सोमवारी आयोजित एका कार्यक्रमात गुरूगौरव करण्यात आला.

विवेकानंद महाविद्यालयात आयोजित या कार्यक्रमाच्या अध्यक्षस्थानी बलभीम महाविद्यालयाचे प्राचार्य डॉ. वसंत सानप होते, तर प्रसिद्ध उद्योजक चंद्रशेखर राजूरकर, प्राचार्य प्रो. श्याम शिरसाठ यांची प्रमुख उपस्थिती होती. गुरूंचा सत्कार करताना विद्यार्थ्यांनी त्यांच्याबद्दलची कृतज्ञता व्यक्त केली. यावेळी प्रो. डॉ. सतीश दांडगे, प्राचार्य डॉ. अजय पाटील, डॉ. राम जाधव, प्राचार्य डॉ. अशोक वाकोडकर, प्रा. बी. एम. चव्हाण, डॉ. अभिजीत पिलखाने यांनी मनोगत व्यक्त केले. राजूरकर यांनी मनोगतात डॉ. बोरा यांच्या शैक्षणिक, प्रशासकीय व शिक्षकी गुणांचा गौरव केला.

याप्रसंगी डॉ. बोरा यांच्या हस्ते त्यांचे विद्यार्थी प्राचार्य प्रो. श्याम शिरसाट आणि प्रा. जितेंद्र वासनिक संपादित 'विकास प्रशासन' या आंतरराष्ट्रीय प्रकाशनाच्या इंग्रजी पुस्तकाचे प्रकाशन करण्यात आले. हे पुस्तक डॉ. बोरा याना अर्पण करण्यात आले आहे. सत्कारमूर्ती व पाहुण्यांचा परिचय डॉ. जयश्री भांडवलदार यांनी करून दिला. सूत्रसंचालन डॉ. सुनील पाटील यांनी केले, तर डॉ. उत्तम इंगळे यांनी आभार मानले. या कार्यक्रमाला डॉ. बोरा यांचे विद्यार्थी राज्यभरातून आले होते.

\Bशिक्षकाने शिकण्याचा ध्यास ठेवावा: डॉ. बोरा \B

गुरूगौरव सोहळ्याला उत्तर देताना डॉ. बोरा म्हणाले, अत्यंत जाणीवपूर्वक आणि जबाबदारीने, तत्कालीन कौटुंबिक व्यावसायिक प्रवाहाच्या विरुद्ध जात शिक्षकी पेशा स्वीकारला व सर्व नीतिमूल्यांचे पालन करण्याचा प्रयत्न केला. त्यामुळे मी संतुष्ट आणि समाधानी आहे. स्वार्थी आणि संकुचित विचारांना थारा न देता परिपूर्ण व्यक्ती घडविण्यावर भर दिला. सेवानिवृत्तीनंतर आजही सामाजिक कार्यात सक्रिय असून सतत कार्यमग्न राहणे हेच यशस्वी जीवनाचे गमक आहे. शिक्षकाने शिकवण्याबरोबरच सतत शिकण्याचाही ध्यास कायम ठेववा, असा सल्ला त्यांनी त्यांच्या विद्यार्थ्यांना दिला.

म. टा. प्रतिनिधी, औरंगाबाद,

औरंगाबाद लोकसभेसाठी २३ एप्रिल रोजी मतदान होत असून या दिवशी औरंगाबाद जिल्ह्यातील विविध २२ गावांमध्ये भरणारा आठवडी बाजार पुढे ढकलण्यात येऊन अन्य दिवशी हा बाजार भरवण्यासाठी जिल्हाधिकारी उदय चौधरी यांनी परवानगी दिली आहे.

आठवडी बाजारांमुळे संबंधित ठिकाणी मतदानात अडचण येण्याची शक्यता आहे. कन्नड तालुक्यातील हतनूर, शेलगाव, पिशोर, सिल्लोडमधील रेलगाव, हट्टी, पोलोद, पिंपळदरी, मंगरूळ, फुलंब्री तालुका, पैठण तालुक्यातील विहामांडवा, ढोरकीन, आडूळ, लोहगाव, औरंगाबाद तालुक्यातील मिटमिटा, गंगापूर तालुक्यातील कायगाव, सिद्धनाथ वाडगाव, दिघी, टाकळी कदीम, सोयगाव तालुक्यातील सोयगाव, गोदेगाव आणि वैजापूरमधील मनूर, धोंदलगाव या गावांचा समावेश आहे.

या आठवडी बाजारांबाबत प्रशासनाने आठवडी बाजार बंद किंवा पुढे ढकलण्यास अथवा अन्य दिवशी भरवण्याची परवानगी दिली असल्याचे जिल्हाधिकारी उदय चौधरी यांनी कळविले आहे.

…

म.टा. प्रतिनिधी, औरंगाबाद

लोकसभा निवडणुकीच्या मतदानाच्या अनुषंगाने शहरात तीन दिवसांचा ड्रायडे ठेवण्यात आला आहे. या ड्रायडेच्या काळात देखील अवैधरित्या देशी विदेशी दारुची मोठया प्रमाणावर विक्री होत होती. गुन्हे शाखेसहीत पोलिसांनी विविध सतरा ठिकाणी छापे टाकत सव्वा लाख रुपयाची देशी विदेशी दारु जप्त करीत गुन्हे दाखल केले.

या कारवाईमध्ये अवैध दारू विक्रेते आरोपी रंगनाथ पाडूरंग म्हस्के, कलीमखान शब्बीरखान पठाण, दीपक दादाराव तुपे, सोमीनाथ अर्जुन पिंपळे, सुरेश रामराव पंडित, अनिल शंकर काळे, दिलीप नारायण पलाटे, अजय सुरेश रिडलॉन, संदीप प्रकाश बोर्डे, बाळू रामभाऊ विश्वे, निलेश अशोक वाहूळ,किशोर शिवाजी गवते, करण नारायण गोटे, मुकींद कुंडलिक कचकुरे, बबलू तुकाराम काळे, मुन्ना सलीम अन्सारी आणि अरविंद निवृत्ती निकस यांचा समावेश आहे. या आरोपींविरुद्ध सबंधित पोलिस ठाण्यात महाराष्ट्र दारू बंदी अॅक्टनुसार गुन्हे दाखल करण्यात आले.

…

ग्रामीण पोलिसांकडून पावणेआठ लाखांची दारू जप्त

लोकसभा निवडणुकीच्या पार्श्वभूमीवर ग्रामीण पोलिस अधिक्षक कार्यालयाच्या वतीने देखील अवैध दारू विक्रेत्यांविरुद्ध जोरदार मेाहीम राबविण्यात आली. यामध्ये जिल्ह्यात ३०६ अवैध दारू विक्रेत्यांविरुद्ध गुन्हा दाखल करण्यात आले आहेत. यामध्ये ७ लाख ८८ हजार रुपयांची साडेतीन हजार लीटर दारू जप्त करण्यात आली आहे. पोलिस अधिक्षक मोक्षदा पाटील यांच्या मार्गदर्शनाखाली ही कारवाई करण्यात आली.