म. टा. प्रतिनिधी, औरंगाबाद

अल्पवयीन मुलीचा विनयभंग करून तिच्या कुटुंबीयांना जातीवाचक शिवीगाळ करणाऱ्या सरपंचासह तिघांविरुद्ध गुन्हा दाखल करण्यात आला आहे. या प्रकरणात पोलिसांनी आरोपी राहुल जनार्धन मुरमे याला सोमवारी रात्री अटक करून न्यायालयात हजर करण्यात आले असता, त्याला दोन मेपर्यंत पोलिस कोठडीत ठेवण्याचे आदेश जिल्हा व सत्र न्यायाधीश ए. डी. साळुंके यांनी मंगळवारी दिले.

या प्रकरणात ३२ वर्षांच्या पीडितेने तक्रार दिली. पीडितेच्या पतीचा सरपंच भास्कर मुरमे याच्याशी जुना वाद होता. यावरून वारंवार त्यांच्यात वादावादी होत होती. दोन एप्रिल रोजी रात्री साडेअकरा ते बाराच्या सुमारास भास्कर मुरमे याने राहुल मुरमे व आकाश शिरसाठ या मुलांना सांगून पीडितेच्या ११ वर्षांच्या मुलीच्या तोंडाला रुमाला लावून ओढत नेले मात्र, मुलीच्या आरडा-ओरडा ऐकून पीडितेचे कुटुंबीय जागे झाले. पीडितेच्या पतीने पाठलाग करीत दोघा आरोंपीपैकी राहुल मुरमे याला पकडले. आकाश शिरसाठ पसार झाला. राहुलची चौकशी केली असता भास्कर मुरमे याने हे कृत्य करण्यास सांगितल्याची माहिती त्याने दिली तर, दुसरा आरोपी शिरसाठ याच्याकडे पीडितेच्या मुलीचे व्हिडीओ असल्याचे समजल्याने पीडितेचे कुटुंबीय शांत बसले.

दरम्यान, २५ एप्रिल रोजी पीडितेच्या दीराला शिरसाठ दिसला असता त्याने शिरसाठकडील फोटो व व्हिडिओ डिलिट करण्यास फोन मागितला, मात्र शिरसाठ याने नकार दिला. त्यामुळे दीराने त्याला मारहाण केली. त्यात शिरसाठचे डोके फुटले. याची माहिती होताच सरपंच, त्याचा मुलगा व शिरसाठचे आई, वडील चाकू व लाठ्या घेऊन पीडितेच्या घरासमोर आले. तेथे त्यांनी पीडितेला जातीवाचक शिवीगाळ करून सरपंच मुरमे याने,'तुझी पहिली मुलगी उचलून नेली तशी दुसरीही मुलगी उचलून नेण्याची आमच्यात ताकद असून, तुम्ही आमचे काही करू शकत नाही,' असे म्हणत व्हिडिओची धमकी दिली. याप्रकरणात करमाड पोलिस ठाण्यात आरोपींविरुद्ध अन्य कलमांसह अ‍ॅट्रॉसिटीचा गुन्हा दाखल करण्यात आला.

\B'साथीदारांना अटक बाकी'\B

पोलिसांनी आरोपी राहुलला अटक करून न्यायालयात हजर केले असता सहाय्यक सरकारी वकील कैलास पवार (खंडाळकर) यांनी आरोपीच्या पसार साथीदारांना अटक करणे आहे. आरोपींनी पीडितेच्या मुलीचे चित्रिकरण केले असून, ते आणखी कोणाला पाठविले आहे का याबाबत तपास करणे बाकी असल्याने आरोपीला पोलिस कोठडी देण्याची विनंती न्यायालयाकडे केली. ही विनंती मान्य करुन न्यायालयाने आरोपीला दोन मेपर्यंत पोलिस कोठडीत ठेवण्याचे आदेश दिले.

Tushar.bodkhe@timesgroup.com

औरंगाबाद : कमी पर्जन्यमान, आधुनिक तंत्राचा तुटवडा आणि प्रक्रिया उद्योगांचा अभाव मराठवाड्यातील शेतीच्या दुर्दशेचे प्रमुख कारण ठरले आहे. हिंगोली, परभणी, बीड, उस्मानाबाद जिल्ह्यांचा काही भाग पूर्णत: अवर्षणप्रवण आहे. शेतकरी रोजगारासाठी इतरत्र स्थलांतरित होण्याचे प्रमाण वाढत आहे. प्रक्रिया उद्योग आणि सिंचन सुविधा वाढल्यास मराठवाड्यातील शेती समृद्ध होईल असे कृषी तज्ज्ञांनी सांगितले.

संयुक्त महाराष्ट्रात मराठवाडा प्रांत विनाशर्त सामील झाल्यानंतर एक मे १९६० रोजी महाराष्ट्र राज्य आकारास आले. राज्य स्थापनेनंतर प्रादेशिक विकासाचा समतोल राखण्याचा हेतू दुर्लक्षित राहून मराठवाडा विकासाला पारखा झाला. शेतीची बकाल अवस्था त्याचे उत्तम उदाहरण आहे. पारंपरिक शेती ते आधुनिक शेती अशी वाटचाल राज्याच्या इतर विभागात सुरू झाली मात्र, सिंचन सुविधा आणि आधुनिक तंत्रज्ञानाचा अभाव मराठवाड्यातील शेतीला पिछाडीवर घेऊन गेला. सध्या मराठवाड्यात शेतीची परवड झाली असून, रोजगारासाठी बाहेर पडलेल्या शेतकऱ्यांची लक्षणीय संख्या आहे. कापूस, ज्वारी, तूर, हरभरा, बाजरी या विभागातील अनुकूल पिकांची जागा मका, सोयाबीन, ऊस या नगदी पिकांनी घेतली आहे. भीषण पाणी टंचाई असूनही विभागात दोन लाख हेक्टरवर ऊस उभा आहे. पाण्याची पुरेशी उपलब्धता नसतानाही ऊस लागवड वाढत आहे. राज्यातील इतर भागात ऊस उत्पाकदता प्रतिहेक्टर ९२ टन असताना मराठवाड्यात फक्त ७१ टन आहे. विभागातील वातावरणाला अनुकूल पिकांना योग्य हमीभाव मिळत नाही. त्यामुळे शेतकरी हमखास दराच्या उसाकडे वळले आहेत. फळबागांची अवस्था पाण्याअभावी बिकट झाली आहे. या स्थितीत शेतीतून मिळणारे अपेक्षित उत्पन्न दिवसेंदिवस घटत आहे. सोयाबीन, मका, कापूस यांचे लक्षणीय उत्पादन होऊनही प्रक्रिया उद्योग नाही. परभणी-हिंगोली भागात टेक्सटाइल पार्क, सिल्लोडला स्टार्च प्रक्रिया उद्योग, लातूरला सोयाबीन प्रक्रिया उद्योग हे घोषणेच्या पातळीवर अडकले आहेत. या पार्श्वभूमीवर कृषी तज्ज्ञ मराठवाड्यातील शेती क्षेत्राबाबत चिंताग्रस्त आहेत.

\Bकेळकर समितीची शिफारस\B

मराठवाड्यातील शेतीचा अभ्यास करून विजय केळकर समितीने डिसेंबर २०१४मध्ये राज्य शासनाला महत्त्वाच्या शिफारशी केल्या होत्या. भारतीय कृषी संशोधन परिषदेच्या धर्तीवर राज्यात औरंगाबाद येथे महाराष्ट्र कृषी संशोधन परिषद स्थापन करावी. त्यासाठी ५०० कोटी रुपये अनुदान द्यावे. या परिषदेने आधुनिक शेतीचे घटक आणि पद्धती यावर आधारभूत संशोधन करावे, असे समितीने सुचवले होते. राज्य शासनाने शिफारशीवर कोणतीही उपाययोजना केली नाही.

अवर्षणग्रस्त भागात कोरडवाहू फळझाडे शेतकऱ्यांसाठी वरदान ठरू शकतील. जांभूळ, सीताफळ, रामफळ, कवठ, चिंच, बोर या फळपिकांसाठी मराठवाड्यातील हवामान अनुकूल आहे. जिल्हानिहाय प्रक्रिया उद्योग सुरू झाल्यास मूल्यसंवर्धन होईल.

- डॉ. संजय पाटील, शास्त्रज्ञ, हिमायतबाग फळसंशोधन केंद्र

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या वसतिगृहात दूषित पाण्यामुळे ३० ते ३५ विद्यार्थिनींची प्रकृती बिघडली. या घटनेनंतरही दुसऱ्या दिवशी (३० एप्रिल) प्रभारी कुलसचिव डॉ. साधना पांडे यांनी संबंधित विद्यार्थिनींची भेट घेतली नाही. पाणी दूषित नसल्याचा दावा प्रशासन करीत आहे. तर, औरंगपुरा परिसरातील दूषित विहिरीतून पाणी आणल्याचे टँकरचालकाने म्हटले आहे. याबाबत संतप्त विद्यार्थ्यांनी सायंकाळी प्र-कुलगुरूंना घेराव घालून मागण्या मांडल्या.

विद्यापीठातील विद्यार्थिनींच्या वसतिगृहात दूषित पाणी पुरवठा झाल्यामुळे विद्यार्थ्यांनी आजारी पडल्या आहेत. तब्बल ३५पेक्षा जास्त विद्यार्थिनींवर खासगी आणि शासकीय रुग्णालयात उपचार सुरू आहेत. सध्या सात विद्यार्थिनी उपचार घेत आहेत. काही विद्यार्थिनींना प्राथमिक उपचार करून सोडण्यात आले. या गंभीर घटनेनंतरही पाण्यामुळे प्रकृती बिघडली नसून, उन्हामुळे विद्यार्थिनी आजारी पडल्याचा दावा प्रशासनाने केला. विद्यापीठात महापालिकेच्या पाण्याचा नियमित पुरवठा होतो. मात्र, औरंगपुरा परिसरातील दूषित विहिरीतून टँकरची खेप वसतिगृहात टाकण्यात आली. हे पाणी प्यायल्यामुळे आजारी पडल्याचे विद्यार्थिनींनी सांगितले. तसेच टँकरचालकानेही कबुली दिली आहे. प्रशासनाची टोलवाटोलवी कायम असल्यामुळे भारतीय विद्यार्थी सेनेने प्र-कुलगुरू डॉ. अशोक तेजनकर यांना निवेदन दिले. नॅकसाठी कोट्यवधी रुपये खर्च करून विद्यार्थ्यांना कायमस्वरुपी सुविधा मिळतील असे वाटले होते. प्रत्यक्षात विद्यार्थ्यांची हाल सुरू आहेत. दूषित पाणीपुरवठा केल्यामुळे विद्यार्थिनींना त्रासाला सामोरे जावे लागले. या प्रकाराची चौकशी करुन दोषींवर कारवाई करावी, अशी मागणी 'भाविसे'ने केली. यावेळी शिवसेना उपशहरप्रमुख हिरा सलामपुरे, तुकाराम सराफ, पूनमचंद सलामपुरे, दत्ता साळुंके, पूनम पाटील, उत्कर्षा सदावर्ते, पूनम बनसोडे, अजिंक्य वाघमारे, अजय बिडला, अतुल पाटील उपस्थित होते. स्टुडंटस फेडरेशन ऑफ इंडियाच्या विद्यार्थ्यांनी प्र-कुलगुरू डॉ. अशोक तेजनकर यांना सायंकाळी घेराव घातला. विद्यार्थिनींच्या प्रकृतीची जबाबदारी कोण स्वीकाणार, असा सवाल विद्यार्थ्यांनी केला. यावेळी स्टॅलिन आडे, लोकेश कांबळे, सत्यजित म्हस्के यांच्यासह विद्यार्थी उपस्थित होते. दरम्यान, या प्रकाराची माहिती घेण्यात आली आहे. विद्यार्थिनींच्या आजाराचे नेमके कारण कळल्यानंतर कारवाई करण्याचा निर्णय घेण्यात येईल, असे तेजनकर यांनी स्पष्ट केले.

\Bपरीक्षा पुढे ढकला

\Bदूषित पाण्यामुळे आजारी पडलेल्या रसायनशास्त्र विभागातील विद्यार्थिनींनी परीक्षा पुढे ढकलण्याची मागणी केली. याबाबत २५ विद्यार्थिनींनी विभागप्रमुख डॉ. सुरेश गायकवाड यांची भेट घेऊन तक्रार केली. पदव्युत्तर परीक्षा त्या विभागापुरती मर्यादित आहे. त्यामुळे परिस्थिती लक्षात घेऊन दोन-तीन दिवस परीक्षा पुढे ढकलण्यात येईल. याबाबत विभागप्रमुखांशी चर्चा करतो, असे तेजनकर यांनी सांगितले.

\B'अभाविप'चे सहआयुक्तांना निवेदन

\Bविद्यापीठातील दूषित पाणी प्रकरणी अखिल भारतीय विद्यार्थी परिषदेने अन्न व औषध प्रशासन विभागाच्या सहआयुक्तांना निवेदन दिले. दूषित पाण्यातून संसर्ग झाल्यामुळे विद्यार्थिनींचे आरोग्य धोक्यात आले आहे. वसतिगृहातील दूषित पाण्याची तपासणी करून दोषींवर कारवाई करावी, अशी मागणी अधिसभा सदस्य डॉ. योगिता होके पाटील यांनी केली. यावेळी 'अभाविप' महानगरमंत्री शिवा देखणे, रामेश्वर काळे, डिंपल भोजवानी, महेंद्र मुंडे आदी उपस्थित होते.

म. टा. प्रतिनिधी, औरंगाबाद

'सेवेत दीर्घकाळ प्रामाणिकपणे काम केल्यानंतर सेवानिवृत्त होताना चेहऱ्यावर निश्चित समाधान असते. आपल्या आयुष्याची हीच खरी शिदोरी असते', असे प्रतिपादन प्र-कुलगुरू डॉ. अशोक तेजनकर यांनी केले. ते विद्यापीठात बोलत होते.

डॉ. बाबासाहेब आंबेडकर मराठवाडा विद्यापीठातील महात्मा फुले सभागृहात मंगळवारी सेवागौरव समारंभ पार पडला. समाजशास्त्र विभागातील डॉ. शुभांगी गोटे-गव्हाणे, ग्रंथालय वरिष्ठ सहाय्यक अनिल खडतरे, इंग्रजी विभागातील वरिष्ठ सहायक साधना कुलकर्णी आणि पाली व बुद्धिझम विभागातील शिपाई गयाबाई मोरे सेवानिवृत्त झाले. यानिमित्त सत्कार करून त्यांना निरोप देण्यात आला. या कार्यक्रमाला प्र-कुलगुरू डॉ. अशोक तेजनकर, प्रभारी अधिष्ठाता डॉ. वाल्मिक सरवदे, शिक्षकेतर कर्मचारी संघटनेचे अध्यक्ष डॉ. कैलास पाथ्रीकर, डॉ. सुधीर गव्हाणे उपस्थित होते. सन्मानचिन्ह आणि सन्मानपत्र देऊन सेवानिवृत्त कर्मचाऱ्यांचा सत्कार करण्यात आला. विद्यापीठातील कारकिर्दीला कर्मचाऱ्यांनी भाषणातून उजाळा दिला. डॉ. आनंद वाघ यांनी सूत्रसंचालन केले. यावेळी प्राध्यापक, कर्मचारी व विद्यार्थी उपस्थित होते.

म. टा. प्रतिनिधी, औरंगाबाद

गजानननगर भागातून दुचाकी चोरणाऱ्या आरोपीला अवघ्या ४८ तासांत पुंडलिकनगर पोलिसांनी अटक केली. ही दुचाकी मंगळवारी दुपारी चोरण्यात आली होती. महादेव परमेश्वर राईत (रा. रुई, ता. अंबड) असे या आरोपीचे नाव आहे.

गजाननगर भागातील भगवती साउंड सर्व्हिसेससमोरून नंदू भीमराव सोनवणे यांची दुचाकी चोरीस गेली होती. याप्रकरणी पुंडलिकनगर पोलिस ठाण्यात चोरीचा गुन्हा दाखल करण्यात आला होता. या चोरीमध्ये महादेवचा हात असल्याची माहिती पोलिसांना मिळाली होती. या माहितीवरून पथकाने अंबड गाठून आरोपी महादेवला दुचाकीसह ताब्यात घेतले. ही कारवाई पोलिस आयुक्त चिरंजीवप्रसाद, उपायुक्त डॉ. राहुल खाडे, सहायक आयुक्त रामचंद्र गायकवाड यांच्या मार्गदर्शनाखाली सहायक निरीक्षक घनश्याम सोनवणे, उपनिरीक्षक पुरी, विकास खटके, बाळाचौरे, मच्छिंद्र शेळके, जालिंदर मांटे, शिवाजी गायकवाड, राजेश यदमळ, कोमल तारे यांनी केली.

म. टा. प्रतिनिधी, औरंगाबाद

औरंगाबाद शहराच्या पाणी पुरवठ्यासाठी खासदार चंद्रकांत खैरे गुरुवारी मुख्यमंत्री देवेंद्र फडणवीस यांच्या दारी गेले आहेत. मुंबईत मुख्यमंत्र्यांची भेट घेऊन ते चर्चा करणार आहेत. पाणी पुरवठ्याच्या मुद्यासह अन्य काही प्रमुख विषयांचे निवेदन देखील ते मुख्यमंत्र्यांना सादर करणार आहेत.

शहराचा पाणीप्रश्न काही महिन्यांपासून बिकट बनला आहे. त्यामुळे समांतर जलवाहिनीची निकड प्रकर्षाने जाणवू लागली आहे. त्यामुळे महापालिकेने समांतर जलवाहिनीबद्दलचा सुधारित प्रस्ताव राज्य शासनाकडे तीन महिन्यांपूर्वी पाठवला आहे, पण अद्याप त्यावर काहीच निर्णय झाला नाही. सुधारित प्रस्तावाबद्दल तातडीने निर्णय घ्यावा, समांतर जलवाहिनीचे काम स्मार्ट सिटी प्रकल्पाच्या निधीतून करण्याबद्दल स्मार्ट सिटी प्रकल्पाचे केंद्र सरकारचे उपसचिव कुणालकुमार यांनी अनुकुलता दाखवली आहे. राज्य शासनाने त्यांच्याकडे शिफारस केल्यास स्मार्ट सिटी प्रकल्पाच्या माध्यमातून पाणी पुरवठा योजना करणे शक्य होईल, असे खैरे यांनी महापौर नंदकुमार घोडेले यांच्या माध्यमातून तयार केलेल्या निवेदनात नमूद केले आहे. पाणी पुरवठा योजनेवरील अत्यावश्यक कामे करण्यासाठी दहा कोटींचा आणि टँकरद्वारे पाणी पुरवठा करण्यासाठी दहा कोटींचा विशेष निधी देण्याची मागणी देखील केली जाणार आहे. पाणी पुरवठा विभागासाठी राज्य शासनाने स्वतंत्र अधिकारी द्यावा, कचरा प्रक्रिया प्रकल्पांबद्दलचा सुधारित डीपीआर सादर करण्यात आला आहे, त्याला मंजुरी देण्यात यावी, सव्वाशे कोटी रुपयांच्या अनुदानातून करावयाच्या रस्त्यांच्या कामांची यादी पालिका प्रशासनाकडून शासनाने मागून घ्यावी. सातारा-देवळाई भागात पाणी पुरवठा व ड्रेनेजची कामे करण्यासाठीचा डीपीआर महापालिकेने सादर केला आहे. हा डीपीआर नगरपालिका संचालकांकडे पडून आहे. या डीपीआरला मान्यता द्यावी. डीपीआर मध्ये पाणी पुरवठा योजनेसाठी ४०० कोटी रुपये, ड्रेनेज व्यवस्थेसाठी १८० कोटींचा उल्लेख करण्यात आला आहे. याच भागातील रस्ते विकासासाठी तिनशे कोटी रुपये जास्त द्यावेत, असे मुख्यमंत्र्यांना साकडे घातले जाणार आहे.

औरंगाबाद शहराच्या पाणी पुरवठा योजनेसह अन्य काही मुद्यांबद्दल चर्चा करण्यासाठी मुख्यमंत्र्यांना भेटायला मी मुंबईत आलो आहे, पण मुख्यमंत्री गडचिरोलीकडे तातडीने रवाना झाल्यामुळे माझी व त्यांची भेट होऊ शकली नाही. मुख्यमंत्री भेटेपर्यंत मी मुंबईत थांबणार आहे. ते भेटल्यानंतर त्यांच्यासमोर शहराचे विविध प्रश्न मांडणार आहे आणि त्यानंतर लोकसभा निवडणुकीत सहकार्य केल्याबद्दल आभारही मानणार आहे.

चंद्रकांत खैरे,

खासदार

म. टा. प्रतिनिधी, औरंगाबाद

मालमत्ता कर वसुलीचे प्रमाण अपेक्षेपेक्षा फारच कमी आहे. त्यामुळे महापालिकेचे उत्पन्न घटले आहे. यास जबाबदार असलेल्या संबंधित अधिकाऱ्यांसह वॉर्ड अधिकाऱ्यांकडून खुलासे मागवा, असे पत्र महापौर नंदकुमार घोडेले यांनी जिल्हाधिकारी तथा महापालिकेचे प्रभारी आयुक्त उदय चौधरी यांना दिले आहे.

मालमत्ता कराची वसुली यंदा १०९ कोटी ८५ लाख रुपयांच्या घरात झाली आहे. त्यात अभय योजनेच्या माध्यमातून झालेल्या २५ कोटी रुपयांच्या वसुलीचा देखील समावेश आहे. मालमत्ता कर वसुलीची आकडेवारी सांगताना कर वसुली विभआग नेहमी गतवर्षीच्या वसुलीची तुलना करतो. कर वसुलीच्या उद्दीष्टाशी कधीच तुलना केली जात नाही. पाणीपट्टीची वसुली २६ कोटी ६६ लाख रुपये झाली आहे. समांतर जलवाहिनीचे काम करणाऱ्या कंपनीने त्यावेळी पाणी पट्टीची वसुली ५५ कोटी रुपयांपर्यंत नेली होती. या तुलनेत यंदा पाणीपट्टीची वसुली देखील कमी झाल्याचे स्पष्ट झाले आहे. त्यामुळे पालिकेचे एकूणच उत्पन्न कमी झाले आहे. त्याचा परिणाम शहरातील विकास कामांवर होण्याची शक्यता आहे. ही बाब लक्षात घेवून महापौरांनी प्रभारी आयुक्तांना पत्र दिले. कमी वसुलीस जबाबदार असलेल्या सर्व अधिकाऱ्यांकडून खुलासे मागवा, खुलासे तपासून त्यांच्यावर कारवाई करा असे महापौरांनी पत्रात नमूद केले आहे.

नवीन आर्थिक वर्ष सुरू होऊन एक महिना झाला पण अद्याप कर वसुलीचे नियोजन प्रशासनाने केले नाही, असे महापौर पत्रकारांशी बोलताना म्हणाले. कर वसुलीच्या कामाला आचारसंहितेचा अडसर असण्याचे कारण नाही, पण आचारसंहितेचे कारण पुढे करून अधिकारी काम करीत नाहीत, असे मतही त्यांनी व्यक्त केले.

म. टा. प्रतिनिधी, औरंगाबाद

महापालिकेने महावितरणच्या विविध सुविधांवर लावलेल्या करातून थकीत बिलाचे पैसे चुकते होतील. शिवाय महावितरणलाच पालिकेकडे अतिरिक्त रक्कम भरावी लागेल, असा दावा मंगळवारी झालेल्या जिल्हा विद्युतीकरण समितीच्या बैठकीत महापौर नंदकुमार घोडेले यांनी केला.

खासदार चंद्रकांत खैरे यांच्या अध्यक्षतेखाली झालेल्या बैठकीला महापौर नंदकुमार घोडेले, जिल्हा परिषद अध्यक्ष देवयानी डोणगावकर, माजी जिल्हा परिषद अध्यक्ष डॉ. अण्णासाहेब शिंदे, मुख्य अभियंता सुरेश गणेशकर, अप्पर जिल्हाधिकारी पी. एन. सोरमारे उपस्थित होते. बैठकीत खासदार खैरे यांनी पालिकेकडे थकलेल्या वीज बिलाचा मुद्दा मांडला. यावेळी महापौर म्हणाले, 'महापालिकेने महावितरणाच्या विविध सुविधांवर कर लावला आहे. अनेक सुविधांवर कर लावायचा आहे.त्यामुळे थकबाकी, खड्डयांपोटी परत करायचे पैसे पालिकेला परत करण्याची गरज पडणार नाही. उलट पालिकेकडेच महावितरणला पैसे भरावे लागतील. या कराबाबत कायदेशीर कारवाईही केली जाईल,' असा इशाराही त्यांनी दिला. यावेळी वीज सेवा खासगीकरणाचा मुद्दा निघाला. याबाबत खैरे म्हणाले, 'ऊर्जामंत्र्यांसह वरिष्ठ अधिकाऱ्यांना पत्र लिहणार आहे. यापूर्वीचा वीज सेवा खासगीकरणाचा प्रयत्न फसला आहे. यामुळे ६०० कोटी रुपयांचा फटका कंपनीला बसला आहे. पुन्हा असे नुकसान करून घेऊ नका,' असा सल्ला देणार असल्याचे सांगितले. वीजेच्या पायाभूत सुविधांच्या विकासासाठी आगामी जिल्हा नियोजन समितीकडे पाच कोटींची मागणी करा, अशी सूचना खैरे यांनी केली. तर मुख्य अभियंता गणेशकर यांनी जालना जिल्हा नियोजन समितीत दहा कोटींची मागणी केल्याचे सांगितले. त्यानुसार दहा कोटींची मागणी करू, असे खैरे म्हणाले.

\Bवीज रिडिंग न घेता बिल

\Bवीजेमुळे शेतकऱ्यांच्या झालेल्या नुकसान भरपाईबाबत लवकरात लवकर निर्णय घ्या, अशी सूचना खासदार चंद्रकांत खैरे यांनी दिली. वीज रिडिंग न घेता वीज बिल दिल्यामुळे अनेक भुर्दंड सोसावा लागत असल्याची माहितीही समोर आली. अशा एजन्सी चालकांवर कारवाई केल्याची माहिती मुख्य अभियंता सुरेश गणेशकर यांनी दिली. सौर कृषिपंप महापालिकेच्या उद्यान विभागाला मिळेल का, असा प्रश्न यावेळी विचारण्यात आला. यावर गणेशकर यांनी ही योजना फक्त शेतकऱ्यांसाठी आहे, असे सांगितले.

……

औरंगाबाद : पाणी टंचाई, दुष्काळ यामुळे खरीप पिके हातून गेली असतानाही जिल्ह्यातील शेतकऱ्यांच्या पिकांचे केवळ आठ टक्केच नुकसान झाल्याचे दाखवत विमा कंपनीने मोठा अन्याय केला आहे, असा आरोप अन्नदाता शेतकरी संघटनेने केला आहे. याप्रकरणी शेतकऱ्यांना त्वरित न्याय देण्यात यावा, अशी मागणी संघटनेने विभागीय आयुक्तांकडे निवेदनाद्वारे केली आहे. राज्य सरकारने इफको टोकिओ या कंपनीला जिल्ह्यातील पीक विम्याचे काम दिले. या वर्षी खरीपातील पिके १०० टक्के शेतकऱ्यांच्या हातून गेली. तरी सुद्धा या विमा कंपनीने पिकांचे केवळ आठ टक्केच नुकसान दाखविले आहे, असा आरोप संघटनेचा आहे. शेतकऱ्यावर झालेला हा अन्याय तातडीने दूर करत न्याय द्यावा, अशी मागणीही संघटनेचे नेते जयाजी सुर्यवंशी यांनी केली. ज्ञानेश्वर गोरे, विलास लिपाणे, अमोल गोरे, राजु ढगे यांच्यासह शेतकरी मोठ्या संख्येने उपस्थित होते.

म. टा. प्रतिनिधी, औरंगाबाद

जर्मन शेफर्ड जातीच्या कुत्र्याची चोरी केल्याच्या प्रकरणात आरोपी अकबर खान रऊफ खान याला गुरुवारी (दोन मे) अटक करून कोर्टात हजर केले असता, आरोपीला शनिवारपर्यंत (चार मे) पोलिस कोठडीत ठेवण्याचे आदेश मुख्य न्यायदंडाधिकारी एम. एस. काकडे यांनी दिले.

याप्रकरणी मतीन अरमान पिरजादे (३२, रा. मिलकॉर्नर, नागेश्वरवाडी, औरंगाबाद) यांनी फिर्याद दिली होती. फिर्यादीनुसार, फिर्यादी हा मध्यवर्ती बसस्थानकासमोर असलेल्या एका हॉटेलमध्ये व्यवस्थापक म्हणून काम करतो. त्याच्याकडे जर्मन शेफर्ड जातीचा कुत्रा असून, तो हॉटेलच्या दरवाजाबाहेर कुत्र्याला बांधून ठेवत होता. सात सप्टेंबर २०१८ रोजी कुत्र्याला हॉटेलच्या दरवाजाबाहेर बांधले असताना त्याची चोरी झाली होती. हॉटेलसमोरच्या एका वसतिगृहाचे सीसीटीव्ही चित्रिकरण फिर्यादीने तपासले असता, एका रिक्षात बसून आलेल्या तिघांनी कुत्र्याला बिस्किट खायला घालून त्याची साखळी काढून त्याची चोरी केल्याचे दिसून आले. कुत्र्याची किंमत दहा हजार रुपये होती. दरम्यान, एक मे २०१९ रोजी रात्री आठच्या सुमारास कुत्रा चोरून नेणाऱ्या तिघांपैकी एक आरोपी अकबर खान रऊफ खान (४५, रा. बायजीपुरा) हा खडकेश्वर परिसरात आढळून आला असता, फिर्यादीने त्याला पोलिस ठाण्यात आणले. पोलिसांनी त्याला अटक करून कोर्टात हजर केले असता, चोरी केलेल्या कुत्र्याला ताब्यात घेणे व इतर दोन आरोपींना अटक करणे बाकी आहे. त्यामुळे आरोपीला पोलिस कोठडी देण्याची विनंती कोर्टात करण्यात आली. ही विनंती मान्य करून कोर्टाने आरोपीला शनिवारपर्यंत पोलिस कोठडी सुनावली.

म. टा. प्रतिनिधी, औरंगाबाद

बाहेरगावी गेलेल्या नागरिकांच्या घरांना लक्ष्य करीत चोरट्यांनी दोन घरफोडीच्या घटनांत दोन लाखांचा ऐवज लांबवला. रहीमनगर आणि वेदांतनगर भागात या घटना घडल्या. याप्रकरणी जिन्सी आणि वेदांतनगर पोलिस ठाण्यात गुन्हे दाखल करण्यात आले आहेत.

घरफोडीची पहिली घटना २८ एप्रिल ते २९ एप्रिल यादरम्यान रहीमनगर भागात घडली. येथील आवेजखान रइसखान (वय २६, रा. रहीमनगर) हे कुटुंबासह बाहेरगावी लग्नाला गेले होते. यावेळी चोरट्यांनी त्यांच्या घराच्या टेरेसवरून डक्टमधून घरात प्रवेश केला. बेडरुमची काच फोडून त्यांनी आत प्रवेश केला. कपाटातील रोख २५ हजार रुपये आणि सोन्याच्या अंगठ्या, लॉकेट, चेन, मोरणी, रिंग असा एकूण ७३ हजारांचा ऐवज चोरत चोरटे पसार झाले. याप्रकरणी जिन्सी पोलिस ठाण्यात अज्ञात आरोपीविरुद्ध चोरीचा गुन्हा दाखल करण्यात आला असून, उपनिरीक्षक दत्ता शेळके तपास करीत आहेत.

घरफोडीची दुसरी घटना २९ एप्रिल ते ३० एप्रिल यादरम्यान भगीरथनगर येथे घडली. येथील निवृत्ती भिकनराव पिंपळे (वय ३०, रा. गिरजाई निवास) यांच्या घरात चोरट्यांनी प्रवेश केला. हॉलच्या दरवाजाला बाहेरून कडी लावत त्यांनी रोख रक्कम, सोन्याचे दागीने, सॅमसंग कंपनीचा मोबाइल असा एकूण एक लाख २२ हजारांचा ऐवज लंपास केला. पहाटे हा प्रकार पिंपळे यांच्या निदर्शनास आला. याप्रकरणी वेदांतनगर पोलिस ठाण्यात गुन्हा दाखल करण्यात आला असून, जमादार अहिरे तपास करीत आहेत.

म. टा. प्रतिनिधी, औरंगाबाद

महापालिकेच्या सेमी इंग्रजी माध्यमाच्या शाळांना शिक्षकांची प्रतीक्षा आहे. इंग्रजीतून शिकवणारे शिक्षक फारच कमी असल्यामुळे तात्पुरत्या स्वरुपात किंवा तासिकातत्वावर इंग्रजी जाणणाऱ्या शिक्षकांची भरती करण्याचे पालिकेने ठरविले आहे. नवीन शैक्षणिक वर्ष सुरू होण्यापूर्वी ही भरती केली जाण्याची शक्यता आहे.

महापालिकेच्या सध्या ७२ शाळा सुरू आहेत. त्यापैकी दहा शाळांमध्ये सेमी इंग्रजी माध्यमाचे वर्ग चालतात. पालिकेच्या शाळा खासगी शाळांच्या स्पर्धेत राहिल्या पाहिजेत म्हणून पालिका शाळांमध्ये नवनवीन प्रयोग केले जात आहेत. हे प्रयोग सुरू असले तरी इंग्रजी किंवा सेमी इंग्रजी माध्यमाच्या शाळा सुरू केल्या शिवाय आपले विद्यार्थी स्पर्धेत टिकाव धरू शकणार नाहीत ही बाब लक्षात आल्यावर सेमी इंग्रजी माध्यमाच्या शाळा सुरू करण्यात आल्या. दहा शाळांमधून सेमी इंग्रजी माध्यमाचे वर्ग घेतले जातात. नवीन वर्षापासून आणखीन दहा शाळा सेमी इंग्रजीच्या करण्याचा निर्णय पालिकेने घेतला आहे, परंतु यासाठी शिक्षक उपलब्ध नाहीत. विद्यार्थ्यांना गणित, विज्ञान हे विषय इंग्रजीतून शिकविण्यासाठी जाणकार शिक्षकांची गरज आहे. सध्या कार्यरत असलेल्या शिक्षकांमधून काही शिक्षक यासाठी प्राप्त होऊ शकतात, पण त्याच्यावर विसंबून राहून वीस शाळा सेमी इंग्रजी माध्यमातून चालवणे शक्य नसल्याचे देखील प्रशासनाच्या लक्षात आले आहे. त्यामुळे तीस शिक्षकांची नियुक्ती करण्याचा निर्णय घेतला आहे, असे शिक्षणाधिकारी श्रींकात कुलकर्णी यांनी उन्हाळी शिबिराच्या बद्दल माहिती देताना सांगितले. नवीन शैक्षणिक वर्ष सुरू होण्यापूर्वी या शिक्षकांच्या नियुक्त्या व्हाव्यात असा प्रयत्न आहे, असे ते म्हणाले. नवीन तीस शिक्षक मिळाल्यास सेमी इंग्रजी माध्यमाच्या शाळा पूर्ण क्षमतेने चालविता येतील, विद्यार्थ्यांना देखील त्याचा लाभ होईल, असे ते म्हणाले.

म. टा. प्रतिनिधी, औरंगाबाद

कंपनीच्या जमिनीच्या मालकीच्या वादातून सुरक्षारक्षकावर प्राणघातक हल्ला करून त्याचा खून करण्यात आला. हा प्रकार बुधवारी रात्री साडेआठ वाजता शेंद्रा एमआयडीसीतील बंद पडलेल्या नूर इंटरप्रायजेस या कंपनीत घडला. या घटनेत एकजण गंभीर जखमी झाला आहे. रिजवान रशीदखान (वय ३६ रा. कोकणवाडी) असे मृत सुरक्षारक्षकाचे नाव आहे. याप्रकरणी चिकलठाणा पोलिसांनी तात्काळ कारवाईत करीत चार आरोपींना अटक केली.

सिल्लेखाना येथील अब्दुल गनी कुरेशी यांच्या मालकीची शेंद्रा येथे नूर इंटरप्रायजेस नावाने मटनाची कंपनी होती. गेल्या पाच वर्षांपासून ही कंपनी बंद आहे. या कंपनीच्या मालकीहक्कावरून कुरेशी आणि त्यांचे भागीदार साजीद कुरेशी, खालेद अबू तुराब यांच्यात वाद सुरू आहे. या कंपनीवर सध्या अब्दुल गनी कुरेशी यांचा मालकी हक्क आहे. रिजवान हा सुरक्षारक्षक म्हणून नऊ वर्षांपासून काम पाहत होता; तसेच त्याचा भाऊ मेहराज देखील तीन वर्षांपूर्वी सुरक्षारक्षक म्हणून कामावर होता. बुधवारी रात्री दोघेही भाऊ कंपनीत कर्तव्य बजावत होते. यावेळी संशयित आरोपी खालेद अबू तुराब, आवेशखान दोस्त महमदखान, आदिलखान नासीरखान, माजिद आणि कैसर कुरेशी हे कारने कंपनीत आले. रिजवान याने त्यांना प्रवेश देण्यास नकार दिला. या कारणावरून त्यांच्यात वाद झाला. यावेळी खालेद तुराबने रिजवानच्या पोटात चाकूने वार केला. भावाला वाचवण्यासाठी मध्ये पडलेल्या मेहराजवर देखील कैसर कुरेशी याने चाकुने वार केला. यावेळी दोन्ही गटात तुंबळ हाणामारी झाली. पोलिसांना घटनेची माहिती मिळाल्यानंतर पोलिस घटनास्थळी दाखल झाले. तोपर्यंत आरोपी पसार झाले होते. सहायक पोलिस निरीक्षक सत्यजित ताईतवाले यांनी जखमी मेहराजला उपचारासाठी घाटी हॉस्पिटलमध्ये दाखल केले. याप्रकरणी मेहराजच्या तक्रारीवरून चिकलठाणा पोलिस ठाण्यात आरोपींविरुद्ध खुनाचा गुन्हा दाखल करण्यात आला आहे.

…

आरोपी २४ तासांत अटक

दरम्यान, गुरुवारी मृत रिजवानच्या नातेवाईकांनी, आरोपींना अटक करीत नाही तोपर्यंत मृतदेह ताब्यात घेणार नाही, असा पवित्रा घेतला होता. पोलिसांनी त्यांची समजूत काढली. दोन आरोपींना रात्रीच अटक केल्याची माहिती दिली; तसेच उर्वरित दोन आरोपींना गुरुवारी नारेगाव परिसरातून ताब्यात घेण्यात आले. दरम्यान, याप्रकरणी दुसऱ्या गटातर्फे आदीलखान नासेरखान याच्या तक्रारीवरून आरोपी मेहराज तसेच इतरांविरुद्ध खुनाचा प्रयत्न केल्याप्रकरणी चिकलठाणा पोलिस ठाण्यात गुन्हा दाखल करण्यात आला आहे.

\B

अटक आरोपींना पोलिस कोठडी\B

आरोपी खालेद अबू व शेख अब्दुल माजिद यांना गुरुवारी (दोन मे) अटक करून न्यायालयात हजर करण्यात आले असता, आरोपींनी गुन्ह्यात वापरलेला चाकू जप्त करणे; तसेच आरोपींच्या साथीदारांचा शोध घेऊन त्यांना अटक करणे बाकी आहे. गुन्ह्याचा नेमका काय उद्देश होता, याचा तपास करावयाचा असल्याने आरोपींना पोलिस कोठडी देण्याची विनंती सहाय्यक सरकारी वकील जरिना दुर्राणी यांनी कोर्टात केली. ही विनंती मान्य करून प्रथम वर्ग न्यायदंडाधिकारी यू. पी. देवर्षी यांनी आरोपींना रविवारपर्यंत (पाच मे) पोलिस कोठडी सुनावली.

म. टा. प्रतिनिधी, औरंगाबाद

अभियांत्रिकी, औषधनिर्माणशास्त्र व कृषी अभ्यासक्रमाच्या प्रथमवर्ष प्रवेशासाठी राज्य सामायिक प्रवेश परीक्षा कक्षातर्फे (सीईटी सेल) ऑनलाइन प्रवेश पूर्व परीक्षेला गुरुवारपासून सुरुवात झाली. शहरात पहिल्या दिवशी एका केंद्रावरून परीक्षा झाली. सकाळी आणि दुपारच्या टप्प्यात १८०० विद्यार्थ्यांनी परीक्षा दिली.

प्रथमच ऑनलाइन घेण्यात येणाऱ्या परीक्षेसाठी सीईटी सेलतर्फे २ ते १३ मे दरम्यान परीक्षेचे नियोजन करण्यात आले आहे. पीसीबी, पीसीएम आणि पीसीएमबीसाठी वेळापत्रक विद्यार्थ्यांना देण्यात आले. परीक्षेच्या दीड तास आधी केंद्रावर पोचणे आवश्यक असल्याने आणि परीक्षेचा पहिला दिवस असल्याने विद्यार्थ्यांत त्सुकता होती. औरंगाबादमधून ३३ हजार ५५८ विद्यार्थ्यांनी परीक्षेला नोंदणी केली आहे. पहिल्या दोन दिवसात औरंगाबादमध्ये विद्यार्थी संख्या कमी आहे. २ व ३ दरम्यान शहरातील २८३६ विद्यार्थी परीक्षा देणार आहेत. ४ व ५ मे असे दोन दिवस सुटी राहणार असून पुन्हा ६ ते १३ पर्यंत परीक्षा होणार आहे. सात केंद्राहून परीक्षा घेतली जात असून जिल्हा समन्वय अधिकारी म्हणून डॉ. मोहन नेरकर हे काम पाहत आहेत.

म. टा. प्रतिनिधी, औरंगाबाद

किमान एक ते दोन वर्षांपर्यंतच्या चिमुकल्यांना स्मार्ट फोन, टॅब्लेट, टीव्ही व तत्सम उपकरणांपासून दूर ठेवण्याचा इशारा जागतिक आरोग्य संघटनेने (डब्ल्यूएचओ) दिला आहे. या उपकरणांच्या अतिरिक्त 'स्क्रीन टाइम'मुळे भाषिक तसेच सामाजिक कौशल्यांचा घात होऊ शकतो. तसेच चिमुकल्यांच्या सर्जनशीलतेवर गंभीर परिणाम होऊ शकतात, असेही 'डब्ल्यूएचओ'चे म्हणणे आहे.

आठ वयोवर्षांखाली मूल असलेल्या ९५ टक्के कुटुंबियांकडे सद्यस्थितीत स्मार्ट मोबाइल असल्याचे 'डब्ल्यूएचओ'ने म्हटले आहे. तसेच त्यातील ४२ टक्के मुले म्हणजेच जवळजवळ निम्मी मुले ही स्मार्ट मोबाइल किंवा टॅब्लेट किंवा लॅपटॉप किंवा इतर उपकरणांचा सर्रास वापर करतात, ज्यामुळे मुलांचा 'स्क्रीन टाइम' वाढत जातो, असेही संघटनेने म्हटले आहे. याच वाढत्या 'स्क्रीम टाइम'मुळे अनेक समस्या उद्भवल्या आहेत आणि त्या समस्या दिवसेंदिवस अधिकाधिक तीव्रतेने भेडसावत असल्याचे संघटनेचे निरीक्षण आहे. या सगळ्या बाबींचा विचार करून पहिल्या एक ते दोन वर्षांपर्यंतच्या चिमुकल्यांना ही उपकरणे अजिबात देऊ नये, ज्यामुळे भाषिक किंवा सामाजिक कौशल्य विकासावर गंभीर परिणाम होऊ शकतो, असेही मत 'डब्ल्यूएचओ'ने नोंदवले आहे. याबाबत बालरोग मेंदुविकारतज्ज्ञ डॉ. वर्षा वैद्य म्हणाल्या, तब्बल ५० टक्के मेंदुचा विकास हा जन्मल्यानंतर केवळ पहिल्या वर्षांत होत असतो, तर उर्वरित ५० टक्के मेंदुचा विकास हा पाच वर्षांपर्यंतच्या वयामध्ये होत असतो. त्यामुळेच मेंदुच्या विकासाच्या दृष्टीने पहिल्या वर्षाला अनन्यसाधारण महत्व आहे. याच वयात मुलावर 'स्क्रीन टाइम'चा मारा होत असेल तर मेंदुला चालना मिळण्याची गती नक्कीच कमी होते आणि ही गती उल्लेखनीयरित्या कमी होते, ज्याला 'ब्रेन नेटवर्किंग रेट' असेही म्हटले जाते. यामुळे सर्जनशीलतेला संधी मिळत नाही आणि त्यामुळे भाषिक तसेच सामाजिक कौशल्य विकासावर गंभीर परिणाम होण्याची शक्यता नाकारता येत नाही. यातूनच 'सोशल कम्युनिकेशन डिसॉर्डर'ची समस्या उद्भवू शकते किंवा या मूळच्या समस्येला खतपाणी मिळू शकते. 'ऑटिझम'प्रमाणेच ही समस्या भासते; परंतु ही समस्या म्हणजे ऑटिझम नव्हे. या समस्येमुळे मूल दुसऱ्यांमध्ये मिसळत नाही आणि त्याला 'स्क्रीन'समोरच चांगले वाटू लागते. त्याशिवाय मुलांमध्ये अतिचंचलता निर्माण होण्याची शक्यता असते किंवा या समस्येलाही खतपाणी मिळू शकते, ज्यामुळे असे मूल दहा मिनिटेदेखील एका जागेवर बसू शकत नाही. लक्ष देऊन एखादा विषय समजून घेऊ शकत नाही. अतिचंचलतेमुळे संबंधित मुलाच्या किंवा मुलीच्या अभ्यासावर व पर्यायाने शैक्षणिक प्रगतीवर दीर्घकालीन प्रतिकुल परिणाम होऊ शकतात, असेही डॉ. वैद्य म्हणाल्या.

\Bमानवी चेहऱ्याला 'स्क्रीन' पर्याय नाही

\Bमूल जन्मल्यावर सर्वांत पहिल्यांदा काही पाहात असेल तर मानवी चेहरा. याच मानवी चेहऱ्याचा स्पर्श, ओठांच्या हालचाली, गंध, आवाज, प्रकाश, संवाद, सहवास आदींमधून शिशुचा सर्वांगीण विकास होत असतो. याच विकासाचा भाग म्हणून भाषिक कौशल्ये तसेच सामाजिक कौशल्यांचाही विकास होत असतो. मात्र, अलीकडे विभक्त कुटुंब पद्धती, आजी-आजोबा व इतर मंडळींचा अभाव, आई-वडिलांची व्यस्तता, यामुळे माणसांपेक्षा शिशुंना स्क्रीन जवळचा वाटू लागतो; किंबहुना अजाणतेपणी शिशुला खेळणे म्हणून मोबाईल किंवा इतर उपकरणे हातात दिली जातात आणि त्यातच शिशू रमत जाते. मात्र, अधिकाधिक 'स्क्रीन टाइम'मुळे मेंदुला अपेक्षेप्रमाणे चालना मिळत नाही व अपेक्षित विकासाला खिळ बसते. मुळात 'स्क्रीन' हा चेहरा, स्पर्श, गंध किंवा इतर कोणत्याच मूलभूत नैसर्गिक उर्मींना पर्यायी ठरू शकत नाही, हे पालकांनी लक्षात घेतले पाहिजे, असे प्रसिद्ध नवजात शिशुतज्ज्ञ व घाटीच्या निओनॅटॉलॉजी विभागाचे प्रमुख डॉ. एल. एस. देशमुख म्हणाले.

शिशुंसह अनेक हार्मोनल बदल होणाऱ्या किशोरवयीन मुलांवरही तासापेक्षा जास्त 'स्क्रीन टाइम'चे नकारात्मक परिणाम होऊ शकतात. तसेच 'बॉर्डर लाईन डिसॉर्डर' ही समस्या उद्भवू शकते, ज्यामुळे सदोष व्यक्तिमत्व विकसित होऊ शकते. त्यामुळे पालकांनीच 'स्क्रीन टाइम' मर्यादित ठेवणे व तसे संस्कार करणे गरजेचे आहे.

\Bडॉ. वर्षा वैद्य\B, बालरोग मेंदुविकारतज्ज्ञ

मुलांनी 'स्क्रीन'वर जास्त वेळ घालवण्याऐवजी पालकांनी मुलांसोबत जास्तीत जास्त वेळ घालवणे, त्यांच्यासोबत खेळणे, संवाद साधणे हे जास्त महत्वाचे आहे. एका मर्यादेपर्यंत मुलांना 'स्क्रीन टाइम'ची मुभा दिली जाऊ शकते, पण या मर्यादेचे भान पालकांनी व मुलांनीदेखील बाळगणे गरजेचे आहे.

\Bडॉ. एल. एस. देशमुख\B, नवजात शिशुतज्ज्ञ

म. टा. प्रतिनिधी, औरंगाबाद

शेतातील दारू-मटनच्या पार्टीत झालेल्या क्षुल्लक वादातून तरुणाच्या डोक्यात गंभीर वार करुन त्याचा खून करणारे सोमिनाथ बाळू तांबे व शिरू उर्फ श्रीराम दत्ता तांबे यांना जन्मठेप व प्रत्येकी दहा हजार रुपये दंडाची शिक्षा जिल्हा व अतिरिक्त सत्र न्यायाधीश एच. के. भालेराव यांनी गुरुवारी (दोन मे) ठोठावली.

या प्रकरणी मृत आबासाहेब देवराव तांबे (३२) याची पत्नी सत्यभामा आबासाहेब तांबे (३०, रा. डोणगाव तांबे, ता. पैठण, जि. औरंगाबाद) यांनी फिर्याद दिली होती. फिर्यादीनुसार, सहा नोव्हेंबर २०१४ रोजी सोमिनाथ बाळू तांबे (२३) व शिरू उर्फ श्रीराम दत्ता तांबे (२२) हे आबासाहेब याच्याकडे आले व म्हणाले, 'आपल्याला शेतात मटन पार्टी करायची आहे, त्यामुळे घरातून पातेले, पळी, भाकरी सोबत घे.' त्यावेळी फिर्यादी आबासाहेब याला म्हणाली, 'घरी पिठले-भाकरी केली आहे ती खाऊन घ्या, आरोपींसोबत जाऊ नका.' तरीही आबासाहेब याने घरातून चार भाकऱ्या, प‌ळी, पातेले घेतले व दोघांसोबत पार्टी करायला निघून गेला. दुसऱ्या दिवशी आरोपी तुकाराम बापुराव तांबे (३०, सर्व रा. डोणगाव तांबे) याच्या शेतातील विहिरीत आबासाहेबचा मृतदेह आढळून आला होता. त्यावरून पैठण एमआयडीसी पोलिस ठाण्यात अकस्मात मृत्युची नोंद करण्यात आली होती मात्र, पोर्ट मार्टेम अहवालात डोक्याला मार लागल्याने मृत्यू झाल्याची नोंद झाली होती व त्यामुळे प्रकरणात खुनाचा गुन्हा दाखल करण्यात आला होता. घटनेनंतर आरोपींनी याची कुणाला वाच्यता केली नव्हती. दरम्यान, पार्टीत दारू पिऊन क्षुल्लक कारणावरून वाद झाल्यानंतर आरोपींनी केलेल्या मारहाणीत आबासाहेबचा मृत्यू झाल्याचे तपासात निष्पन्न झाले.

\Bपरिस्थितीजन्य पुरावे ठरले महत्त्वाचे\B

खटल्यावेळी, सहाय्यक सरकारी वकील अरविंद बागूल यांनी १२ साक्षीदारांचे जबाब नोंदवले. यातील आठ साक्षीदार फितूर झाले तर, सुनावणीत फिर्यादीसह डॉक्टरची साक्ष आणि परिस्थितीजन्य पुरावे महत्त्वाचे ठरले. दोन्ही बाजुंच्या युक्तिवादानंतर व साक्ष-पुराव्यांवरुन कोर्टाने सोमनाथ बाळू तांबे व शिरू उर्फ श्रीराम दत्ता तांबे यांना कोर्टाने भारतीय दंड संहितेच्या ३०२ कलमान्वये जन्मठेप व प्रत्येकी दहा हजार रुपये व दंड न भरल्यास एक महिना अतिरिक्त सक्तमजुरीची शिक्षा ठोठावली. पुराव्याअभावी कोर्टाने तुकारामला निर्दोष सोडले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांच्या चौकशीसाठी राज्य शासनाने डॉ. एस. एफ. पाटील समिती नेमली होती. या समितीचा अहवाल सार्वजनिक करुन कारवाई करावी या मागणीसाठी मराठवाडा विकास कृती समितीने बेमुदत उपोषण सुरू केले आहे. तसेच, राज्यपाल कार्यालयाकडे रितसर तक्रार करण्यात आली आहे.

कुलगुरू डॉ. बी. ए. चोपडे यांच्यावर कामकाजातील अनियमितता, नियमबाह्य नियुक्त्या आणि खरेदी गैरव्यवहाराचे आरोप आहेत. या गैरव्यवहारांची चौकशी करण्यासाठी राज्य शासनाने माजी कुलगुरू डॉ. एस. एफ. पाटील समिती नेमली होती. या तीन सदस्यांच्या समितीने विद्यापीठात चौकशी करुन ऑगस्ट २०१८ मध्ये सरकारला अहवाल सादर केला. या अहवालानुसार तात्काळ कारवाई अपेक्षित होती. मात्र, अहवाल गोपनीय राहिल्यामुळे चोपडे यांच्यावरील आरोपांवर सरकारची भूमिकी काय, असा प्रश्न उपस्थित झाला आहे. पाटील समितीच्या चौकशी अहवालाकडे उच्च शिक्षणमंत्री विनोद तावडे यांनी दुर्लक्ष केल्याचा आरोप मराठवाडा विकास कृती समितीने केला आहे. तसेच चौकशी अहवाल सार्वजनिक करुन दोषींवर कारवाई करा, अशी मागणी समितीने केली. या मागणीसाठी मराठवाडा विकास कृती समितीच्या सदस्यांनी बुधवारपासून (१ मे) विभागीय आयुक्त कार्यालयासमोर बेमुदत उपोषण सुरू केले आहे. या आंदोलनात अॅड. मनोज सरीन, अमोल दांडगे, प्रा. दिगंबर गंगावणे, अॅड. सतीशकुमार साळवे, सुनील उबाळे, हनुमंत गुट्टे, प्रवीण मुधलवाडकर सहभागी झाले आहेत. येत्या चार जून रोजी कुलगुरू चोपडे यांचा कार्यकाळ संपत आहे. त्यापूर्वी समितीच्या अहवालानुसार कारवाई करावी आणि तोपर्यंत ना हरकत देऊ नये असे समितीने राज्यपाल कार्यालयाला पाठवलेल्या निवेदनात म्हटले आहे. याबाबत सखोल चौकशी न झाल्यास बेमुदत उपोषण सुरू राहील असे समितीने स्पष्ट केले आहे.

दरम्यान, पाटील समितीच्या चौकशीनंतर अहवाल सादर केला. पण, राजकीय हस्तक्षेपानंतर चोपडे यांच्यावरील कारवाई तूर्तास स्थगित झाल्याची चर्चा विद्यापीठ वर्तुळात आहे. वरिष्ठ राजकीय नेत्यामुळे चौकशी समितीचा अहवाल अडगळीत पडल्याचा आरोप आहे.

चौकशी अहवाल गुंडाळला ?

कुलगुरू चोपडे यांच्यावर कारवाई करण्याच्या मागणीसाठी मराठवाडा विकास कृती समितीने २९ मार्च २०१८ रोजी राजभवन कार्यालयाकडे तक्रार केली होती. तसेच विभागीय आयुक्तालयासमोर उपोषण केले होते. डॉ. एस. एफ. पाटील समितीचा अहवाल प्राप्त झाल्यानंतर कारवाई करण्यात येईल. तूर्तास, उपोषण स्थगित करावे असे राजभवन कार्यालयाने उपोषणार्थी कार्यकर्त्यांना कळवले होते. समितीच्या अहवाल प्राप्त झाल्यानंतरही कारवाई करण्यात आली नाही. त्यामुळे समितीच्या अहवालाचे गूढ वाढले आहे. या विरोधात कृती समितीने पुन्हा उपोषण सुरू केले आहे.

म. टा. प्रतिनिधी, औरंगाबाद

कामगार दिन बुध‌वारी मोठ्या उत्साहात साजरा करण्यात आला. यानिमित्ताने वाहनफेरी, व्याख्यान यासह विविध कार्यक्रमाचे आयोजन कामगार संघटनांनी केले होते.

\Bमराठवाडा लेबर युनियन \B

महाराष्ट्र दिन व कामगार दिनानिमित्ताने युनियनने वाहनफेरी काढली. क्रांती चौकातून सकाळी आठ वाजता वाहनफेरीला सुरुवात झाली. छत्रपती शिवाजी महाराज यांच्या पुतळ्यास कामगारांनी अभिवादन केल्यानंतर पैठण गेट, मिल कॉर्नर, भडकल गेट, शहागंज, कटकट गेट, सिडको मार्गे फेरी जाधववाडीत गेल्यानंतर शेतकरी भवन परिसरात सांगता करण्यात आली. शेतकरी भवनात आयोजित मेळाव्यात सामाजिक कार्यकर्ते प्रा. विजय दिवाण यांनी मार्गदर्शन केले. अंगमेहनत कष्टकऱ्यांचे सर्व जगण्याचे प्रश्न सोडविले गेले पाहिजे. हक्क म्हणून सोडविले पाहिजे, मेहेरबानी म्हणून नव्हे, अशी भूमिका त्यांनी मांडली. मेळाव्याच्या अध्यक्षस्थानी महाराष्ट्र राज्य हमाल मापाडी महामंडळाचे सरचिटणीस सुभाष लोमटे होते. लेबर युनियनचे अध्यक्ष डॉ. सुधीर देशमुख, अॅड. सुभाष सावंगीकर, रंजन दाणी, तन्जिमे इन्साफचे एस. जी. शुत्तारी, कासमभाई, छगन गवळी, प्रवीण सरकटे, अरविंद बोरकर उपस्थित होते. युनियनचे सरचिटणीस देविदास कीर्तीशाही यांनी प्रास्ताविक केले, तर देवचंद आल्हाट यांनी आभार मानाले.

\Bबीएसएनएल, बँक, एलआयसी कर्मचाऱ्यांची वाहनफेरी \B

बीएसएनएल, बँक आणि एलआयसी कर्मचाऱ्यांनी एकत्र येऊन क्रांती चौकातून वाहनफेरी काढली. कामगार नेते उद्धव भवलकर यांच्या हस्ते फेरीचे उद्घाटन झाले. बीएसएनएल कर्मचारी संघटनेचे रंजन दाणी, शिवाजी चव्हाण, ए. आर. वाघचौरे, विमा कामगार संघटनेचे उमेश कुलकर्णी, बँक कर्मचारी संघटनेचे राजेंद्र मुंगीकर यांच्यासह कर्मचारी मोठ्या संख्येने उपस्थित होता. जिल्हा कोर्ट मार्ग काढलेल्या फेरीची सांगता 'एलआयसी'च्या विभागीय कार्यालयात करण्यात आली. त्यानंतर कामगार चळवळीसमोरील आव्हाने या विषयावर देविदास तुळजापूर यांचे व्याख्यान झाले. सार्वजनिक क्षेत्राचे खासगीकरण थांबविण्यासाठी कार्य संस्कृतीत आम्रुलाग्र बदल करावा लागले, असे मत त्यांनी व्यक्त केले. बीएसएनएल मधील स्वेच्छा निवृत्तीची योजना फसवी योजना आहे, अशी टीका त्यांनी केली. पैसे देऊन घरी पाठविणे, यातून कामगाराचे कधीही भले होत नाही, असे सांगत त्यांनी यास बळी पडू नका, असे आवाहन केले.

\Bचिकलठाण्यात वाहनफेरी

\B

कामगार दिन व महाराष्ट्र दिनानिमित्ताने कामगारांनी चिकलठाणा परिसरातील कोहलर कंपनी चौक येथून वाहनफेरी काढण्यात आली. आंबेडकर नगर, जळगाव रोड, सिडको, कामगार चौक, क्रांती चौक मार्गे काढण्यात आलेल्या या फेरीची सांगता पैठण गेट येथे झाली. तेथे फेरीचे रुपातंर सभेत करण्यात आले. सीटूचे जिल्हा महासचिव लक्ष्मण साक्रुडकर, बसवराज पटणे यांचे यावेळी भाषण झाले. गोरखनाथ राठोड, बाबा काळे, शिवाजी पवार, सुनील काळे, दयानंद भिसे, संतोष जाधव, रावसाहेब बोरसे, गणेश पवार, विशाल डोंगरकर, राजू शिंदे, बापू हजारे, जयदीप पवार, रामेश्वर टेकाळे यांच्यासह कामगार मोठ्या संख्येने उपस्थित होता.