म. टा. प्रतिनिधी, औरंगाबाद

गुटखा बाळगणे किंवा विकण्यास बंदी असताना गुटख्याचा साठा करून तो विकणारा संशयित आरोपी उल्हास वामन शिरोडे याला याला पोलिसांनी अटक केली. न्यायालयात हजर करण्यात आले असता शुक्रवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. ए. ए. खतीब यांनी दिले.

या प्रकरणात अन्न व औषध प्रशासनाचे प्रशांत सुरेश अजिंठेकर यांनी तक्रार दिली. सिडको पोलिसांनी अयोध्यानगर येथे छापा मारून आरोपी उल्हास शिरोडे (वय ५७) याच्या घरातून १२ हजार ९६० रुपयांचा गुटखा व सुगंधी तंबाखू जप्त केली. त्यानंतर अन्न व औषध प्रशासनाला कारवाईची माहिती दिली. त्यानुसार प्रशांत अजिंठेकर यांनी तपासणी केली. या प्रकरणात सिडको पोलिस ठाण्यात शिरोडे याच्या विरोधात गुन्हा दाखल करण्यात आला. पोलिसांनी शिरोडे याला सोमवारी रात्री अटक करून न्यायालयात हजर केले. गुटखा पुरविणारा पुरवठादार व उत्पादकांबाबत चौकशी, गुटखा कोणाला पुरवठा करणार होते, आरोपींचे आणखी कोण साथीदार आहेत आदींचा तपास करायचा असल्याने पोलिस कोठडी देण्याची विनंती सहायक सरकारी वकील सूर्यकांत सोनटक्के यांनी केली. ही विनंती मान्य करून न्यायालयाने आरोपीला १० मेपर्यंत पोलिस कोठडी सुनावली.

म. टा. प्रतिनिधी ,औरंगाबाद

कौटुंबिक कारणावरून पोलिसांच्या दोन कुटुंबांमध्ये तुंबळ हाणामारी प्रकरणात दोन तरुणांना पोलिसांनी बुधवारी अटक केली. बंदेश हिरालाल राठोड (वय २३, रा. शिवगड तांडा, ता. पैठण) व रवी ओंकार चव्हाण (वय २६, चित्तेगाव तांडा, चित्तेपिंपळगाव ता. जि. औरंगाबाद), अशी त्यांची नावे आहेत. न्यायालयाने त्यांची न्यायालयीन कोठडीत रवागनी केली. या प्रकरणात सहाय्यक सरकारी वकील बालाजी गवळी यांनी काम पाहिले.

या प्रकरणात यापूर्वी पोलिसांनी संशयित आरोपी हिरालाल दगडू राठोड याला अटक केली होती. त्याच्याकडून गुन्ह्यात वापरलेले फायटर व कपडे पालिसांनी जप्त केले आहेत. या प्रकरणात गणेश संपत चव्हाण (वय ३०, रा. बोकुड जळगांव तांडा, ता. पैठण) यांनी तक्रार दिली होती. गणेश यांचा लहान भाऊ रवी हा पुण्यात पोलिस शिपाई आहे. गणेश यांच्या पत्नीला चार फेब्रुवारी रोजी बाळांतपणासाठी रुग्णालयात दाखल केले होते. त्यावेळी आई शशिकला, वडील संपत, आणि सासू हे सोबत होते. रात्री ११ वाजता छाया राठोड, सरला माने, संदीप राठोड, बंदेश राठोड, सचिन राठोड हे रुग्णालयात आले आणि रवी संपत राठोड कुठे आहे?, अशी विचारणा करून शिवीगाळ केली. तसेच, जीवे मारण्याची धमकी देऊन ते निघून गेले.

पाच फेब्रुवारी रोजी सकाळी गणेश यांचा भाऊ रवी रुग्णालयात आला. ११ वाजता रुग्णाला सुटी मिळाल्यानंतर आरोपींसह आठ ते दहा जणांनी त्यांच्यावर हल्ला चढविला. यात गणेश चव्हाण यांच्या कुटुंबियांना बेदम मारहाण करण्यात आली. हा सगळा प्रकार रुग्णालयातील सीसीटीव्ही मध्ये कैद झाला. या प्रकरणात पुंडलिकनगर पोलिस ठाण्यात गुन्हा दाखल करण्यात आला होता.

वाळूज महानगर: औरंगाबाद-पुणे महामार्गावरील जिकठाण फाट्याजवळ दुचाकीवरून आलेल्या चार सशस्त्र दरोडेखोरांनी चाकुचा धाक दाखवून कारमधील चार प्रवाशांना बुधवारी पहाटे तीनच्या सुमारास लुटले. शिवाय दरोडेखोर हे कार घेऊन निघून गेले.

पोलिसांनी दिलेल्या माहितीनुसार, अक्षय वायचार (रा. वाशीम) हे त्यांचे दोन भाऊ आणि एका मित्रासह पूणे येथून वाशिमकडे कारने (एम एच १४, सी एक्स ९२४०) जात होते. त्यांनी जिकठाण फाट्याजवळ लघुशंकेसाठी कार थांबवली असता सीबीझेड दुचाकीवरून आलेल्या चार सशस्त्र दरोडेखोरांनी कारमधील चौघांना चाकुचा धाक दाखवून मारहाण करत मोबाइल, रोख रक्कम हिसकावली व त्यांना खाली उतरवून कार पळवली. दरोडेखोरांना विरोध करणाऱ्या एकाच्या चेहऱ्यावर चाकुने वार केला.

दरोडेखोरांनी कारमधील बॅगा घटनास्थळापासून काही अंतरावर फेकून देत टेंभापुरी धरणाकडे जाणाऱ्या रस्त्याने अंधारात पळ काढला. कारसह साहित्य पळवल्याने चारही प्रवाशांनी वाळूज पोलिस ठाण्यात धाव घेऊन सुमारे दोन लाख १४ हजार रुपयांचा ऐवज पळवल्याची तक्रार दिली आहे.

\Bएसीपींची भेट \B

याप्रकरणी चार अज्ञात दरोडेखोराविरुद्ध वाळूज पोलिस ठाण्यात गुन्हा दाखल करण्यात आला असून पोलिस दरोडेखोरांचा शोध घेत आहेत. सहायक पोलीस आयुक्त हनुमंत भापकर, वाळूज पोलिस ठाण्याच्या उपनिरीक्षक प्रीती फड आदींनी बुधवारी दुपारी घटनास्थळी भेट देऊन पाहणी केली.

म. टा. प्रतिनिधी, फुलंब्री तीव्र दुष्काळ असताना तालुक्यातील चिंचोली बुद्रुक येथे वन विभाग व सामाजिक वनीकरण विभागाने खडकाळ माळ रानावर रोजगार हमी योजनेतून रोपवाटिकेत सात लाख रोप वाढवले आहेत. दुष्काळामुळे अनेक गावे स्थलांतर करत असताना चिंचोलीच्या १५० जणांनी नोंदणी केली असून त्यापैकी सुमारे ९० जणांना या रोपवाटिकेतून रोजगार मिळाला आहे. त्यांच्या कुटुंबांचा दोन वर्षांपासून उदरनिर्वाह रोपवाटिकेवरच अवलंबून आहे. ही रोपवाटिका चिंचोली येथील सांजूळ लघु तलावाशेजारी संपूर्ण खडकाळ डोंगरावर सुरू करण्यात आली आहे. या डोंगरातून बिल्डा, धामनगाव रस्ता गेला असून एका बाजुला वन विभागाने, तर दुसऱ्या बाजुला सामाजिक वनीकरण विभागाची रोपवाटिका आहे. रस्त्याच्या दुतर्फा लांबच-लांब ग्रीन नेटशेड उभारले असून त्या हिरवीगार रोप डोलत असल्याचे आकर्षण प्रवाशांना वाटते. येथे निर्माण झालेल्या रोपांचे वितरण जुलैमध्ये करण्यात येणार आहे. चिंचोलीची लोकवस्ती जवळपास १२०० असून मीना विलास मते या सरपंच, तर सखाहरी बिनोरकर हे ग्राम रोजगार सेवक आहेत. रोपवाटिकेकरिता ग्रामसभेची मान्यता लागते. अंदाजे खर्च ग्रामसभेलाच सांगावा लागतो, शिवाय रोजगार पुरविणे व अडचणींची जबाबदारी ग्रामपंचायतला घ्यावी लागते. रोपवाटिकेला लघु तलावातून पाणी उपलब्ध करून घेण्यात आले असून स्प्रिंक्लर व ठिबकचा वापर केला जातो. पाण्याचा काटेकोर वापर केला जातो. गेल्या वर्षी जुलैमध्ये येथून तालुक्यातील ७१ ग्रामपंचायतीला प्रत्येकी ११९१ असे एकूण ८४ हजार ५६१ रोपांचे वाटप करण्यात आले होते. मात्र, त्या ग्रामपंचायतींनी रोपे वाढवण्याकडे काम जबाबदारीने केले नाही. यामुळे यावरील लाखो रुपयांचा खर्च वाया गेला. यंदा रोपे जळणार नाहीत, याची काळजी घेण्याची गरज आहे.

म. टा. प्रतिनिधी, औरंगाबाद

शिवारातील पाणी शिवारात जिरवण्यासाठी युती सरकारने राबवलेल्या जलयुक्त शिवार अभियानांतर्गत दरवर्षी फेब्रुवारी-मार्च महिन्यांमध्ये आगामी वर्षासाठी नवीन गावांची निवड करण्यात येते. यंदा मात्र गावे निवडण्यासंदर्भात शासनाने आदेश दिले नसल्याने मराठवाड्यातील 'जलयुक्त'चे अकाउंट क्लोज झाले आहे. गेल्या साडेचार वर्षांत सहा हजार २३ गावे अभियानांतर्गत निवडण्यात आली, यावर सुमारे दोन हजार कोटी रुपये खर्च करण्यात आला.

मराठवाडा दुष्काळमुक्त करण्यासाठी सरकारने डिसेंबर २०१४ मध्ये जलयुक्त शिवार अभियानाची सुरुवात केली. २०१९पर्यंत निवडण्यात आलेली गावे पाणीदार करण्याचे उद्दिष्ट शासनाचे होते. या कालावधीमध्ये मराठवाड्यात अभिसरण व लोकसहभाग, असे मिळून कोट्यवधी रुपये खर्च करण्यात आले तरी यंदा मराठवाडा दुष्काळाच्या दावणीला बांधला गेला आहे. औरंगाबाद विभागात २०१५-१६ या वर्षात १६८२, २०१६-१७ मध्ये १५१८, २०१७-१८ मध्ये १२४८, तर वर्ष २०१८-१९ मध्ये १५७५, अशी एकूण ६०२३ गावांची निवड करण्यात आली. यातील गेल्यावर्षी निवडलेल्या काही गावांमध्ये अद्याप जलयुक्त शिवार अभियानाचे काम सुरू आहे. उर्वरित गावांमध्ये शंभर टक्के काम पूर्ण झाल्याचा दावा प्रशासनाकडून केला जात आहे.

\B७०० गावे शिल्लक \B

जलयुक्त शिवार अभियानांतर्गत मराठवाड्यातील सर्व गावांमध्ये योजना राबवण्याचा निर्णय घेण्यात आला असला तरी 'पोक्रा' योजनेतील गावे वगळता अद्याप मराठवाड्यातील ७०० पेक्षा अधिक गावे शिल्लक आहेत. राज्य सरकारने दुष्काळमुक्तीची फिरवलेली दवंडी पाण्याबाबत जनजागृती करण्यात यशस्वी झाली, मात्र या योजनेसाठी कोट्यवधी रुपये खर्च केल्यानंतरही दुष्काळाच्या झळा सहन कराव्या लागत आहेत.

म. टा. प्रतिनिधी, औरंगाबाद

रेल्वे हुकल्यामुळे पायी जात असलेल्या पती-पत्नीला चाकुचा धाक दाखवत एक लाख ४० हजारांचे दागिने लुबाडण्यात आले. हा प्रकार चार मे रोजी सायंकाळी पावणेसहा वाजता चिकलठाणा शिवारात घडला. याप्रकरणी चार अनोळखी आरोपीविरुद्ध जबरी चोरीचा गुन्हा दाखल करण्यात आला आहे.

याप्रकरणी बाबुराव अप्पाराव सोनवणे (वय ५८, रा. कौसडी ता. जिंतूर, जि. परभणी) यांनी तक्रार दाखल केली. सोनवणे आणि त्यांची पत्नी रे चार मे रोजी शहरात आले होते. त्यांची रेल्वे हुकल्यामुळे ते पायी चिकलठाणा गावाकडे जुन्या बायपासमार्गे रेल्वे गेटकडून जात होते. रेल्वे स्टेशनपासून ते अर्धा किलोमीटर अंतरावर आले होते. यावेळी तोंडाला रुमाल बांधून चार अनोळखी आरोपी त्यांच्याजवळ आले. त्यांनी चाकूने मारण्याचा धाक दाखवत पैसे आणि दागिन्याची मागणी केली. यावेळी चोरट्यांनी सोनसाखळी, अंगठी, कानातले, वेलजोड, लॉकेट आदी एक लाख ४० हजारांचा ऐवज लुबाडला. यानंतर कोणाला काही न सांगण्याची धमकी देत पळून गेले. या प्रकरणी सोनवणे यांच्या तक्रारीवरून सिडको एमआयडीसी पोलिस ठाण्यात चारही आरोपीविरुद्ध जबरी चोरीचा गुन्हा दाखल करण्यात आला आहे. याप्रकरमी उपनिरीक्षक के. पी. अन्नलदास हे तपास करीत आहेत.

म. टा. प्रतिनिधी, औरंगाबाद

महापालिकेच्या जलकुंभावरून मोफत दिले जाणारे टँकर आता बंद करण्यात येणार आहे. पैसे भरूनही नागरिकांना टँकरसाठी महिनाभर प्रतीक्षा करावी लागते. त्याचवेळी दादागिरी करून, राजकीय वजन वापरून फुकट टँकर घेऊन जाणाऱ्यांचे प्रमाण अधिक आहे.

शहरात सध्या अनेक भागांमध्ये पाण्याची टंचाई निर्माण झाली आहे. पाण्याचे वेळापत्रक कोलमडले आहे. त्याचबरोबर शहरातील जलकुंभावरून टँकर भरून देण्यावरही प्रशासनाचे नियंत्रण नाही. एन-पाच व एन-सात येथील जलकुंभांवरून नेण्यात येणाऱ्या टँकरबाबतही गोंधळाची स्थिती आहे. नागरिकांना टँकरचे पैसे भरूनही १५ दिवस, महिनाभर प्रतीक्षा करावी लागते आहे. अनेकवेळा नागरिक जलकुंभावर चकरा मारतात तरी, त्यांना टँकर मिळत नाही. असे असताना टँकरद्वारे पाणी वाटप सुरूच आहे. काही वेळा दादागिरी करून टँकरची पळवाफळवी केली जाते. हे सगळे प्रकार लक्षात घेत महापालिका प्रशासनाकडून अशा प्रकारचे टँकर यापुढे न देण्याचा निर्णय घेण्यात आला आहे. आवश्यकच असेल, शिफारस आवश्यक असेल तरच टँकर दिले जाईल, असे प्रशासनाकडून सांगण्यात आले.

\B'एमआयडीसी'चे पाणी टँकरसाठी\B

विविध जलकुंभावरून टँकरद्वारे पाणी दिले जाते. ते आता, एकाच ठिकाणी केंद्रीत करण्यात येणार आहे. सर्व टँकर एमआयडीसीच्या पाण्यातूनच भरले जाणार आहेत. या ठिकाणाहून महापालिका २.५ एमएलडी (दशलक्ष लिटर रोज) पाणी घेऊ शकते. त्यातून सध्या केवळ अर्धा एमएलडी एवढेच पाणी घेतले जात आहे. त्यामुळे यापुढे सर्व टँकर एमआयडीसीमध्येच भरले जातील अशा उपाययोजना केल्या जात आहेत.

म. टा. प्रतिनिधी, औरंगाबाद

आर्थ्क चणचणीला कंटाळून मजुराने गळफास घेत आत्महत्या केली. हा प्रकार मंगळवारी सकाळी ११ वाजता संजयनगर, मुकुंदवाडी भागात उघडकीस आला. रवी विश्वनाथ पाचुंदे (वय ३०), असे या मजुराचे नाव आहे. याप्रकरणी मुकुंदवाडी पोलिस ठाण्यात अकस्मात मृत्युची नोंद करण्यात आली आहे.

रवी हा महापालिकेतर्फे कचरा उचलणाऱ्या कंपनीत मजूर होता. त्याचे वेतन दोन महिन्यांपासून झालेले नव्हते. मुलगा आजारी असल्याने त्याने कंपनीकडे अॅडव्हान्स मागितला होता, मात्र तो देखील त्याला मिळाला नव्हता. या प्रकारामुळे निराश झालेल्या रवीने मंगळवारी घरी कोणी नसताना दोरीने गळफास घेत आत्महत्या केली. घरातील मंडळी घरी परतल्यानंतर हा प्रकार लक्षात आला. मुकुंदवाडी पोलिसांना घटनेची माहिती मिळाल्यानंतर त्यांनी घटनास्थळ गाठले. रवीचा मृतदेह खाली उतरवून घाटी हॉस्पिटलमध्ये हलवण्यात आला. याप्रकरणी पोलिस ठाण्यात अकस्मात मृत्युची नोंद करण्यात आली असून जमादार शेख हनीफ तपास करीत आहेत.

म. टा. प्रतिनिधी, औरंगाबाद

चालत्या रेल्वेमध्ये दरवाजाजवळ उभ्या असलेल्या प्रवाशांचे मोबाइल पळवण्याचे प्रकार अद्यापही सुरूच आहे. मंगळवारी सायंकाळी छोटा मुरलीधरनगर भागात पुन्हा एक प्रकार घडला. २६ एप्रिल रोजी सकाळी मोबाइल हिसकावतांना स्वप्नील राठोड या तरुणाचा रेल्वेतून पडून मृत्यू झाल्याची घटना मिलिंदनगर भागात घडली होती. यानंतरही पोलिसांचे या प्रकाराकडे दुर्लक्ष होत असल्याचे दिसत आहे.

संतोष रघुनाथ लेंडाळे (वय ३८, रा. कुरगाव, ता. नांदेड) हे कामानिमित्ताने औरंगाबादला आले होते. मंगळवारी सायंकाळी ते रेल्वेने पुन्हा नांदेडला परत जात होते. यावेळी संतोष डब्याच्या दरवाजाजवळ उभा होता. छोटा मुरलीधरनगर भागातील रेल्वेगेट क्रमांक ५३ रेल्वे आली असता खाली उभ्या असलेल्या एका मुलाने अचानक संतोषच्या हातावर फटका मारला. यावेळी संतोषच्या हातातील मोबाइल खाली पडला. हा मुलगा मोबाइल उचलून घेत पसार झाला. याप्रकरणी संतोषच्या तक्रारीवरून अज्ञात आरोपीविरुद्ध उस्मानपुरा पोलिस ठाण्यात गुन्हा दाखल करण्यात आला आहे.

…

\Bस्वप्नीलच्या मृत्यूनंतरही गुन्हे सुरूच\B

स्वप्नील राठोड (वय १९, रा. मालकोंडी, मंठा) हा तरुण २६ एप्रिल रोजी मामाच्या लग्नासाठी रेल्वेने परतूरला निघाला होता. यावेळी रेल्वेगेट क्रमांक ५६ जवळ तीन अनोळखी तरुणांनी त्याच्या हाताला फटका मारत मोबाइल पळवला होता. यावेळी स्वप्नील तोल गेल्याने खाली कोसळला होता. या प्रकरणी उस्मानपुरा पोलिस ठाण्यात तिन्ही आरोपीविरुद्ध गुन्हा देखील दाखल करण्यात आला होता. मात्र हे तिन्ही आरोपी अल्पवयीन असल्याने त्यांना ताब्यात घेण्यात आले होते. स्वप्नीलच्या मृत्यूनंतरही रेल्वे प्रवाशांचे मोबाइल हिसकावण्याचे प्रकार सुरूच असल्याचे दिसत आहे.

म. टा. प्रतिनिधी, कन्नड

शहरातील १५ वीज ग्राहकांची वीज चोरी पकडून महावितरणच्या तीन पथकांनी १५ लाख ७३ हजार ४२० रुपयांचा दंड ठोठावला. महावितरणचे प्रादेशिक संचालक ओमप्रकाश बकोरिया यांनी औरंगाबाद शहर व ग्रामीण भागासाठी नियुक्त केलेल्या तीन भरारी पथकांकडून तीन दिवसांपासून शहरात वीज चोरीविरुद्ध मोहीम सुरू आहे.

पथकाने केलेल्या तपासात मंगल कार्यालय, दारू दुकान, आइस्क्रिमचे दुकान, मोठे घरघुती वीज ग्राहक, पाणी फिल्टर प्लांट, अद्रक धुण्याची जागा यासह काही व्यापाऱ्यांनी वीज चोरी केल्याचे स्पष्ट झाले. प्रामुख्याने मीटरचे सी. टी. वायर कापणे, रिमोटचा वापर, मीटरमध्ये फेरफार करण्यात आल्याचे स्पष्ट झाले. ही कारवाई मुख्य अभियंता सुरेश गणेशकर, अधीक्षक अभियंता संजय आकोडे, कन्नडचे कार्यकारी अभियंता अभिजित सिकनीस यांच्या मार्गदर्शनाखाली कारवाई केल्याची माहिती उपकार्यकारी अभियंता विजय दुसाने यांनी दिली.

\B११ लाख ५६ हजार ८६० रुपये वसूल \B

या १५ ग्राहकांना १५ लाख ७३ हजार ४२० रुपयांची दंडाची बिले देण्यात आली आहेत. यापैकी ११ ग्राहकांकडून ११ लाख ५६ हजार ८६० रुपये दंड वसूल करण्यात आला. उर्वरित चार ग्राहकांकडून ४ लाख १७ हजार रुपये वसूल करण्यात येणार आहेत. दंडाची रक्कम न भरल्यास गुन्हे दाखल करण्यात येणार आहेत.

म. टा. प्रतिनिधी, पैठण

शहराला पाणीपुरवठा करणाऱ्या मुख्य जलवाहिनीमधून चोरून घेण्यात आलेले जवळपास शंभर नळ कनेक्शन खंडित करण्याची कार्यवाही नगर पालिकेच्या पथकाने बुधवारी केली. विनापरवाना नळ कनेक्शन बंद करण्याची कार्यवाही एक आठवडा सुरू राहणार असल्याची माहिती मुख्याधिकारी सोमनाथ जाधव यांनी दिली आहे.

जायकवाडी धरणाजवळील उत्तर जायकवाडी येथील पंप हाउस येथून शहराला पाणी पुरवठा करण्यात येतो. जवळपास सहा किलोमीटर लांब असलेल्या या जलवाहिनीमधून पैठण-औरंगाबाद रस्त्यावर असलेले अनेक हॉटेलचालक व शेतकऱ्यांनी चोरून नळ कनेक्शन घेतले होते. यामुळे, शहराच्या पाणी पुरवठ्यावर विपरित परिणाम होत होता. मुख्याधिकारी सोमनाथ जाधव यांनी या विषयी पाणी पुरवठा विभागाची बैठक घेऊन विनापरवाना नळांवर कार्यवाही करण्याचे आदेश दिले.

यानुसार, बुधवारी पाणी पुरवठा विभाग प्रमुख व्यंकटी पापुलवार यांच्या नेतृत्वाखाली पथकाने पैठण-औरंगाबाद रस्त्यावरील पावन गणपती ते सह्याद्री हॉटेल दरम्यान जवळपास शंभर बेकायदा नळ कनेक्शन तोडले.

\Bएक आठवडा कारवाई \B

या कारवाईमुळे शहराचा पाणी पुरवठा सुरळीत होण्यास मदत होणार आहे. एक आठवडाभर विनापरवाना घेण्यात आलेल्या नळ कनेक्शनविरोधात कारवाई सुरूच राहणार असल्याची माहिती मुख्याधिकारी सोमनाथ जाधव यांनी दिली.

म. टा. प्रतिनिधी, औरंगाबाद

शहरातील पाणीपुरवठ्याचा बिघडलेला ताळमेळ बुधवारी झालेल्या बैठकीत गाजला. पाणी वाटपातील समानता केव्हा येणार? असा सवाल नगरसेवकांनी प्रशासनाला केला. त्यावर आता, आठ दिवसांचा कालावधी द्यावा, असे आयुक्त म्हणाले. त्यानंतर त्यांनी लगेच उपाययोजनांना सुरुवात केली. सायंकाळी जलकुंभांना भेट देऊन आढावा घेण्यात येत होता. त्याचवेळी नवीन सहा कनिष्ठ अभियंते पाणीपुरवठा विभागात काम करणार आहेत.

शहरात काही भागात तीन दिवसांआड पाणीपुरवठा होतो काही. ठिकाणी चार दिवसांआड तर, सिडको-हडकोसारख्या मोठा भागाला सहा दिवसांनंतर पाणीपुरवठा केला जात आहे. नियोजनाचा हा गोंधळ विविध पातळीवर गाजत असल्याने बुधवारी विभागाच्या अधिकाऱ्यांची महापौर नंदकुमार घोडेले, आयुक्त डॉ. निपुण विनायक यांच्या उपस्थितीत बैठक झाली. यावेळी नगरसेवक नितीन चित्ते, दिलीप थोरात, कीर्ती शिंदे, ज्योती अभंग, प्रदीप बुरांडे, राहुल रोजतकर, भाजपचे शहराध्यक्ष किशनचंद तनवाणी, कार्यकारी अभियंता हेमंत कोल्हे आदींची उपस्थिती होती. समान प्रमाणात पाणीपुरवठा का होऊ शकत नाही, हा मुद्दा प्रामुख्याने गाजला. समान प्रमाणात पाणीपुरवठा करा, दोषींवर कारवाई करा, नियोजनातील त्रुटी दूर करण्याची मागणी नगरसेवकांनी केली. टँकर, गळती, शहरात येणारा पाणीसाठा, जलकुंभावरून होणारे वितरण याबाबत अनेकांनी आक्षेप घेत प्रशासनाने कणखर भूमिका घेण्याची मागणी केली. त्यावर आठ दिवसांचा कालावधी द्या, समान प्रमाणात पाणीपुरवठा करून दाखवू, असे आश्वासन आयुक्तांनी दिले. बैठकीत सहा कनिष्ठ अभियंत्यांच्या बदल्या पाणीपुरवठा विभागात करण्याचा निर्णयही घेण्यात आला. उपअभियंता अशोक पद्मे व शेख खाजा यांना प्रत्येकी तीन अभियंते मदतीस देण्यात आले. यासह सेवनिवृत्त झालेले अभियंता गिरी यांना तातडीने पुन्हा नियुक्त करण्याचे आदेशही देण्यात आले.

\Bआयुक्तांची जलकुंभांना भेट\B

आयुक्त डॉ. विनायक जलकुंभांना भेट देऊन तेथील आढावा घेत आहेत. बुधवारी सायंकाळी त्यांनी सिडको एन-पाचमधील जलकुंभाला भेट देत पाहणी केली. त्यावेळी तेथील उपलब्ध पाणीसाठा, मागणी, टँकरची संख्या याचा आढावा घेतल्याचे सूत्रांनी सांगितले. यानंतर संबंधित अधिकाऱ्यांना सूचना ही करण्यात आल्या. शहरातील इतर जलकुंभांचाही आढावा आयुक्त घेणार असल्याचे सांगण्यात आले.

शहराला होत असलेला पाणीपुरवठा

१४०० मिलिमीटर व्यासाची जलवाहिनी : ७० एमएलडी

१२०० मिलिमीटर व्यासाची जलवाहिनी : ५० एमएलडी

शहराची पाण्याची गरज : २४० एमएलडी

(एमएलडी : दशलक्ष लिटर रोज)

शहरात तीव्र पाणी टंचाई निर्माण झाली. त्याचे कारण नियोजनात आहे. नियोजनातील त्रुटी दूर करून समान पातळीवर नियोजन होणे अपेक्षित आहे. त्यासाठी बैठक बोलावण्यात आली.

नंदकुमार घोडेले

महापौर.

..

म. टा. प्रतिनिधी, सिल्लोड

सिल्लोड शहरात तातडीने टँकर सुरू करण्याच्या मागणीचे निवेदन उपविभागीय अधिकारी यांना शहर भाजपने दिले असून दहा दिवसांत टँकर सुरू न केल्यास हंडा मोर्चा काढण्याचा इशारा दिला आहे.

निवेदनात म्हटले आहे की, मे महिन्यात पाण्यासाठी भटकावे लागत असून ९० टक्के खासगी बोअरवेल आटले आहेत. आसपासच्या काही विहिरींना बऱ्यापैकी पाणी आहे. नगर पालिका दहा दिवसाआड नळाला पाणी देत आहे. खेळणा प्रकल्पात अत्यल्प जलसाठा आहे. पालिकेकडून कमी दाबाने पाणी पुरवठा होत असल्याने वाघवाडी, समतानगर, शिक्षक कॉलनी, बालाजीनगर, जयभवानीनगर, मिर्झा कॉलनी आदी भागात पाणी येता नाही. रमजान महिना सुरू झाल्याने पाण्याची मागणी वाढत आहे. नगरसेविका आश्विनी पवार, रुपाली मोरेल्लू यांनी नगर पालिकेला टँकर सुरू करण्याचे निवेदन दिल्यानंतर प्रशासनाने जाफराबाद येथून रोज 30 टँकर पाणी आणण्याचा प्रस्ताव पाठवला होता. त्यावर अद्याप निर्णय झालेला नाही. एका आठवड्यात टँकर सुरू करावेत, आसपासच्या विहिरी अधिग्रहण कराव्यात, अन्यथा नगर पालिका कार्यालयावर महिलांचा हंडा मोर्चा काढण्यात येईल, असा इशारा देण्यात आला आहे. या निवेदनावर नगरसेविका आश्विनी पवार, रुपाली मोरेल्लू, किरण पवार, अशोक तायडे, मनोज मोरेल्लू, वसीम बागवान, शेख सद्दाम, शेख जाकेर, विजय चव्हाण यांच्या सह्या आहेत.

म. टा. प्रतिनिधी, औरंगाबाद

बारावीच्या विद्यार्थ्याने झाडाला गळफास घेत आत्महत्या केली. हा प्रकार गुरुवारी सकाळी वळदगाव शिवारातील परदेशीवाडी येथे घडला. शुभम शुपडूसिंग मेहर (वय २०), असे या विद्यार्थाचे नाव असून आत्महत्येचे कारण समजू शकले नाही. याप्रकरणी सातारा पोलिस ठाण्यात अकस्मात मृत्युची नोंद करण्यात आली आहे.

शुभम हा श्रीरामपूर येथील एका कॉलेजमध्ये बारावीचे शिक्षण घेत होता. परीक्षा संपल्यामुळे तो घरी परतला होता. त्याला त्याच्या वडिलांनी गुरुवारी पहाटे पाच वाजता झोपेतून उठवले. विहिरीवर मोटार सुरू करण्यासाठी जातो, असे सांगून तो घराबाहेर गेला. शुभम बराच वेळ घरी परतला नसल्याने वडील शेतात गेले. यावेळी शुभमने आंब्याच्या झाडाला गळफास घेऊन आत्महत्या केल्याचे दिसले. शुभमचा मृतदेह खाली उतरवून घाटी हॉस्पिटलमध्ये पाठवण्यात आला. याप्रकरणी पोलिस ठाण्यात नोंद करण्यात आली असून जमादार अर्जुन ढोले हे तपास करीत आहेत.

म. टा. प्रतिनिधी, औरंगाबाद

परीक्षेच्या घाईत टेबलाच्या खणात पैशाचे पाकीट विसरल्याने तणावात सापडलेल्या विद्यार्थ्याला परीक्षा केंद्रावरील कर्मचाऱ्याच्या प्रामाणिकपणाचा अनुभव आला. विद्यार्थ्याने वडीलांच्या उपचाराचे २२ हजार रुपये दवाखान्यात भरण्यासाठी जवळ ठेवले होते. मात्र, पाकीट हरवल्याचे पेपर सुटल्यानंतर लक्षात येताच विद्यार्थी प्रचंड तणावात सापडला होता. स. भु. महाविद्यालयाच्या परीक्षा केंद्रात हा प्रकार घडला.

स. भु. महाविद्यालय परीक्षा केंद्रावर एमबीए अभ्यासक्रमाची परीक्षा सुरू आहे. एमआयटी महाविद्यालयाचा प्रथम वर्षाचा विद्यार्थी राजेंद्र मस्के या केंद्रावर परीक्षा देत आहे. 'स्टॅटीस्टीकल मेथडस' विषयाची गुरुवारी सकाळी परीक्षा होती. पेपर सुरू होण्यापूर्वी टेबलाच्या खणात राजेंद्रने आपले पाकीट ठेवले होते. या पाकीटात रोख २२ हजार ३०० रुपये आणि ओळखपत्रे होती. पेपर संपल्यानंतर घाईत वर्गाबाहेर पडलेल्या राजेंद्रला पाकीट वर्गातच विसरल्याचे लक्षात आले. तोपर्यंत महाविद्यालयाचे कर्मचारी राजेंद्र पंडीत यांनी पाकीट परीक्षा विभागात जमा केले होते. यावेळी तणावात सापडलेल्या विद्यार्थ्याने विचारणा केली असता त्याला पंडीत उपप्राचार्यांकडे घेऊन गेले. पाकीटातील रक्कम आणि ओळखपत्रांची खात्री पटवल्यानंतर पाकीट परत करण्यात आले. कर्मचारी राजेंद्र पंडीत यांचा प्रामाणिकपणा पाहून सर्वजण हरखून गेले. पाकीट पाहिल्यानंतर विद्यार्थ्याचा जीव भांड्यात पडला. वडीलांच्या उपचाराचे पैसे असून दवाखान्यात भरण्यासाठी जवळ ठेवले होते. पाकीट हरवल्यानंतर घाबरलो होतो. पण, पाकीट काळजीपूर्वक जपून ठेवत कर्मचाऱ्याने परत केल्याने आनंद झाला, असे विद्यार्थी राजेंद्रने सांगितले. स. भु. महाविद्यालयात कर्मचारी राजेंद्र पंडीत हे विनाअनुदानित तत्त्वावर कार्यरत आहेत. पेपर संपल्यानंतर पुढील परीक्षेची तयारी करण्यासाठी वर्गात गेलो होतो. पाकीट सापडल्यानंतर तात्काळ वरिष्ठांकडे जमा केले. ज्याचे पाकीट होते, त्याच्याकडे परत गेल्याचे समाधान आहे, असे पंडीत यांनी सांगितले.

पाकिटात रोख रकमेशिवाय आधार कार्ड, कॉलेज ओळकपत्र, वसतिगृह ओळखपत्र, एटीएम कार्ड आणि इतर महत्त्वाची कागदपत्रे होती. ही कागदपत्रे परत मिळाल्यामुळे विद्यार्थ्याने महाविद्यालय प्रशासन व राजेंद्र पंडीत यांचे आभार मानले.

वरिष्ठांकडून कौतुकाची थाप

हल्ली सार्वजनिक जीवनात प्रामाणिकपणा अभावानेच पहायला मिळतो. मोठी रक्कम पाहिल्यानंतरही संबंधितांकडे परत करण्याचा प्रामाणिकपणा कर्मचारी राजेंद्र पंडीत यांनी दाखवला. या माध्यमातून त्यांनी चांगला पायंडा रुजवला. पंडीत यांच्या कामाची दखल घेत स. भु. महाविद्यालयाचे प्राचार्य आणि वरिष्ठांनी त्यांचे कौतुक केले. विद्यार्थ्यांला मोठी रक्कम जवळ बाळगताना काळजी घेण्याबाबत सूचना करण्यात आली.

म. टा. प्रतिनिधी, औरंगाबाद डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांचा कार्यकाळ येत्या चार जून रोजी संपणार आहे. कुलगुरू निवड प्रक्रिया सुरू झाली असून जुलै महिन्यापर्यंत नवीन कुलगुरू रूजू होण्याची शक्यता आहे. कार्यकाळ संपला तरी दुसरीकडे पुन्हा कुलगुरूच राहणार आहे. मात्र, राष्ट्रीय विद्यापीठ की अभिमत विद्यापीठ ही माहिती लवकरच देईल, असे चोपडे यांनी सांगितले. कुलगुरू डॉ. बी. ए. चोपडे यांचा कार्यकाळ येत्या चार जून रोजी संपणार आहे. 'बामू'चे नवीन कुलगुरू कोण राहणार याची उत्सुकता वाढली आहे. कुलगुरू पदासाठी येत्या २१ मे पर्यंत अर्ज स्वीकारण्यात येणार आहेत. मुलाखत प्रक्रिया होऊन जुलैपर्यंत नवे कुलगुरू रूजू होणे अपेक्षित आहे. किमान महिनाभरासाठी प्रभारीपद प्र-कुलगुरू यांच्याकडे राहण्याची शक्यता आहे. हा कार्यकाळ संपल्यानंतर कुलगुरू चोपडे राष्ट्रीय विद्यापीठात रूजू होणार असल्याची चर्चा आहे. मात्र, आपण दुसऱ्या ठिकाणीही कुलगुरूच राहणार आहोत. राष्ट्रीय विद्यापीठात की अभिमत विद्यापीठात हे लवकरच जाहीर करील असे चोपडे यांनी पत्रकारांशी बोलताना स्पष्ट केले. राष्ट्रीय स्तरावर शैक्षणिक काम करण्याची मोठी संधी आहे. त्यामुळे सतत कार्यरत राहण्याचा प्रयत्न असतो. या विद्यापीठात काम करताना काही अडचणी आल्या. पण, त्यावर मात करुन चांगले काम केल्याचा आनंद आहे, असे चोपडे म्हणाले. कार्यकाळ संपण्यापूर्वीच चोपडे अन्यत्र रुजू होणार असल्याची चर्चा आहे. कार्यकाळ पूर्ण केल्यानंतर दुसरीकडे जाईल. हे विद्यापीठ माझे घर असून नियमानुसार कार्यकाळ पूर्ण करणे कर्तव्य आहे, असे चोपडे यांनी सांगितले.

म. टा. प्रतिनिधी, औरंगाबाद

सातत्याने दुष्काळाचा सामना करत असलेल्या मराठवाड्यातील शहरी भागामध्ये शासनाने कोट्यवधी रुपये खर्च करून विविध योजनेअंतर्गत २३ पाणीपुरवठा योजनेची कामे सुरू केली. मात्र, या योजनेची कामे अपूर्ण आहेत. यातील औरंगाबाद जिल्ह्यातील सिल्लोड तसेच जालना जिल्ह्यातील भोकरदन शहरासाठी योजना वेळेत पूर्ण झाली असती तरी यंदाच्या दुष्काळात शहरांना पाणीपुरवठा करणे शक्य झाले असते. यातील अनेक योजना चार ते पाच वर्षांपासून मंजूर आहेत. मात्र, कामांमध्ये वेग नसल्यामुळे रखडल्या आहेत.

मराठवाड्यातील चार महानगरपालिका ५० नगरपालिका आणि २५ नगरपंचायतींपैकी बहुतांश शहरे तहानलेली असून विभागातील ३३ शहरांना भीषण पाणीटंचाईचा सामना करावा लागत आहे. यापैकी १३ शहरांना पाणीपुरवठा करणाऱ्या प्रकल्पातील संपूर्ण पाणी संपल्यामुळे येथे अती तीव्र तर मे महिन्याअखेरपर्यंत पुरेल इतकेच पाणी शिल्लक असलेल्या २० शहरांत तीव्र पाणीटंचाईची स्थिती आहे. मराठवाड्यातील बहुतांश शहरांमध्ये दहा ते बारा दिवसांतून एकदा पाणीपुरवठा करण्यात येतो. काही प्रकल्पांमध्ये पाणी उपलब्ध आहे. मात्र, केवळ वितरण व्यवस्थेच्या ढिसाळ कारभारामुळे नागरिकांना पाणी देणे शक्य होत नाही. दरम्यान, मराठवाड्यातील नगरपालिका व नगरपंचायतींमध्ये सध्या पाणीपुरवठ्याच्या २३ योजना राखडलेल्या अवस्थेत असून यातील ज्या योजना तत्काळ पूर्ण होतील अशांवर प्रशासनाने लक्ष केंद्रित केले आहे.

अपूर्ण योजनांमध्ये सिल्लोड, जालना शहर, भोकरदन, घनसावंगी, सेनगाव, कंधार, धर्माबाद, लोहा, हदगाव, मुखेड, अर्धापूर, माहूर, हिमायतनगर, बीड शहर, परळी वैजनाथ, माजलगाव, गेवराई, धारुर, वडवणी, उदगीर, अहमदपूर, निलंगा, उस्मानाबाद शहराचा समावेश आहे. यातील सिल्लोडचे काम येत्या तीन महिन्यात तर जालना जिल्ह्यातील योजनांचे काम सप्टेबर २०१९ पर्यंत पूर्ण होणे अपेक्षित आहे तर घनसावंगी १५ महिने, सेनगाव येथील कामे जुलै २०१९ अखेर, बीड शहर व परळी वैजिनाथ नोव्हेंबर २०१९ अखेर, गेवराई, धारुर एक वर्ष, उदगीरची योजना ऑक्टोबर २०१९ तर उस्मानाबाद येथे अमृत अभियानांतर्गतर्गत सुरू असलेल्या पाणीपुरवठा योजनेची कामे येत्या पाच महिन्यात पूर्ण होण्याची अपेक्षा आहे. यातल धर्माबाद, माजलगाव या शहरातील कामे जवळपास पूर्ण झाली आहेत. यातील सिल्लोड, जालना शहर या शहरांसाठी २०१५ मध्ये योजना मंजूर करण्यात आली आहे. कंधार योजनेला २०१४ मध्ये, लोहा येथील कामांना २०१२ तर माहूर येथील कामाला २०१४ मध्ये मंजुरी मिळून अद्यापही कामे पूर्ण झाली नाही. बीड जिल्ह्यातील परळी वैजिनाथ येथे २०१२ तर धारूर शहरासाठी २०१४ मध्ये कामांना मंजुरी मिळाली होती.

मराठवाड्यातील या शहरांमध्ये महाराष्ट्र सुवर्ण जयंती नगरोत्थान महा अभियान, महाराष्ट्र सुजल निर्मल अभियान योजना, अमृत पाणीपुरवठा योजनेअंतर्गत शहरांमध्ये ही कामे सुरू आहेत.

ही आहेत विलंबाची कारणे

विभायगीय आयुक्त कार्यालयात पाणीपुरवठा संदर्भात झालेल्या बैठकांमध्ये या अपूर्ण योजना तत्काळ पूर्ण करण्यावर भर देण्यात आला. यामध्ये विलंबाची कारणांवर चर्चा केली असता जलशुद्धीकरणाची जागा उशिराने उपलब्ध होणे, योजनेचा तपशील उपलब्ध नाही, कार्यारंभ आदेश असतानाही काम सुरू नाही, फेरअंदाजपत्रक तसेच निवदासंदर्भात अडचणी, लोकप्रतिनीधींनी अडकवलेले काम, कंत्राटदारांकडून कामाचा वेग कमी अशा प्रकारची कारणे देण्यात आली आहेत. तर काही योजनांसाठी कोणतेही कारण नसताना कामे अपूर्ण आहेत.