म. टा. प्रतिनिधी, औरंगाबाद

गोदावरी मराठवाडा पाटबंधारे विकास महामंडळाच्या लेखी आश्वासनानंतर अखिल भारतीय किसान सभेच्या कार्यकर्त्यांनी गुरुवारी सायंकाळी आंदोलन स्थगित केले आहे, अशी माहिती सीटूचे नेते उद्धव भवलकर यांनी दिली.

दुष्काळात होरपळणाऱ्या परभणी जिल्ह्यातील नागरिकांना, जनावरांना पिण्यासाठी व जनावराच्या चाऱ्यासाठी जायकवाडी धरणातून डाव्या कालव्याला पाणी सोडण्यात यावे, या मागणीसाठी संघटनेने मंगळवारपासून गोदावरी मराठवाडा पाटबंधारे विकास महामंडळाच्या कार्यालयासमोर ठिय्या आंदोलन सुरू केले होते. दरम्यान, महामंडळाचे अधिकाऱ्यांनी पिण्यासाठी व जनावरांच्या चाऱ्यासाठी लागणारी संभाव्य पाणी मागणी परभणी व जालना, औरंगाबाद, बीड जिल्हाधिकारी कार्यालयाकडून मागविण्याची कार्यवाही करण्यात येत आहे. या मागणीनुसार मान्यतेसाठी सकारात्मक प्रस्ताव तात्काळ १३ मेपर्यंत शासनाकडे मंजुरीसाठी सादर करण्यात येईल, असे लेखी आश्वासन किसान सभेला दिले.

या आश्वासनानंतर तूर्तास आंदोलन स्थगित करण्यात आले असून, मागणीनुसार पुढील कार्यवाही न झाल्यास तीव्र आंदोलनाशिवाय पर्याय राहणार नाही, असा इशाराही त्यांनी दिला. समितीचे नेते विलास बाबर, मदनराव वाघ, कामगार नेते उद्धव भवलकर, शिवाजी सोनवणे, दत्तात्रय सुक्रे, दीपकराव बिडगर, नारायण वाघ, विनायक गवळी. तुकाराम कानडे, अरुण गवळी, भास्कर गवळी, दयानंद सुक्रे यांच्यासह परभणी येथील शेतकरी, कार्यकर्ते उपस्थित होते.

म. टा. प्रतिनिधी, औरंगाबाद

हिंदू क्रांतीसूर्य महाराणा प्रताप सिंह यांची जयंती गुरुवारी मोठ्या उत्साहात साजरी करण्यात आली. यानिमित्ताने वाहनफेरी, दुग्धाभिषेक आदी भरगच्च कार्यक्रमाचे आयोजन करण्यात आले होते. सायंकाळी संस्थान गणपती येथून मिरवणूक काढण्यात आली.

महाराणा प्रताप जयंती निमित्त सिडको परिसरातील बजरंग चौक येथील महाराणा प्रताप यांच्या पुतळ्यास सकाळी दुग्धाभिषेक घालून पूजन करून अभिवादन करण्यात आले. आमदार अतुल सावे, महापौर नंदकुमार घोडले, माजी खासदार उत्तमसिंह पवार, नगरसेवक मकरंद कुलकर्णी, शिवाजी दांडगे, नितीन खरात, उत्सव समितीचे अध्यक्ष दिलीपसिंग घुणावत, स्वागताध्यक्ष कवरसिंह बैनाडे, सुभाष महेर यांच्यासह उत्सव समितीचे पदाधिकाऱ्यासह नागरिक मोठ्या संख्येने उपस्थित होते.

वाहनफेरीत युवकांचा लक्षणीय सहभाग :

आमदार सावे, महापौर घोडले, माजी खासदार पवार यांच्या प्रमुख उपस्थितीत सकाळी सिडको परिसरातील बजरंग चौकातून वाहनफेरी काढण्यात आली. टीव्ही सेंटर, जिल्हाधिकारी कार्यालय, भडकलगेट, सीबीएस, महावीर चौक, अदालत रोड, क्रांतीचौक, चेतक घोड़ा, सेव्हनहिल, सिडको बसस्थानक मार्गे काढण्यात आलेल्या या फेरीची सांगता महाराणा प्रताप उद्यान कॅनॉट गार्डन येथे झाली. वाहनफेरीत युवक मोठ्या संख्येने सहभागी झाला होता. हिंदू क्रांतीसूर्य महाराणा प्रतापसिंह की जय या जयघोषाने संपूर्ण वाहनफेरी मार्ग दणाणून गेला होता.

मुख्य मिरवणूक उत्साहात

सायंकाळी सातच्या सुमारास श्री संस्थान गणपती येथून श्रींची आरती झाल्यानंतर मुख्य मिरवणूक काढण्यात आली. नगरसेवक राजेंद्र जंजाळ, किशोर नागरे, कीर्ती शिंदे, जिल्हा परिषदेचे अर्थ व बांधकाम सभापती विलास भुमरे, दयाराम बसैये, उत्सव समितीचे अध्यक्ष दिलीपसिंग घुनावात, कवरसिंह बैनाडे, पद्मसिंह राजपूत, विश्वनाथ राजपूत, नारायणसिंह होलिये जगतसिंह परिहार, प्रा. भीमसिंह कहाटे यांच्यासह नागरिक मोठ्या संख्येने उपस्थित होते. दरम्यान, मिरवणुकीत सजविलेल्या रथात महाराणा प्रतापसिंह यांची प्रतिमा ठेवण्यात आली. मान्यवरांच्या हस्ते प्रतिमेचे पूजन करण्यात आले. त्यानंरत हिंदू क्रांतीसूर्य महाराणा प्रतापसिंह यांचा जयघोष करत मिरवणूक मार्गस्थ झाली. याप्रसंगी युवकांनी शौर्यपर प्रदर्शन केले. तर पवन नामक घोड्याने संगीताच्या तालावर सादरीकरण करत व कर्तब दाखवत सर्वांचे लक्ष वेधून घेतले होते. शहागंज, गांधी पुतळा, सराफा, सिटी चौक मार्गे काढण्यात आलेल्या या मिरवणूकीची सांगता गुलमंडी येथे करण्यात आली. शूरवीर महाराणा प्रताप की जय या जयघोषाने संपूर्ण मिरवणूक मार्ग दणाणून गेला होता.

म. टा. प्रतिनिधी, औरंगाबाद

बीड बायपास परिसरातील एका शाळेत सुरू असलेल्या उन्हाळी शिबिरात मोबाइल चोरीच्या आरोपावरून एका १५ वर्षांच्या मुलाला बेदम मारहाण करण्यात आली. हा प्रकार बुधवारी सायंकाळी घडला. याप्रकरणी चार जणांविरुद्ध सातारा पोलिस ठाण्यात गुन्हा दाखल करण्यात आला आहे.

याप्रकरणी मुलाचे वडील संदीप विश्वनाथ महाजन (वय ४५, रा. एमआयडीसी सिडको अविष्कार कॉलनी) यांनी तक्रार दाखल केली. महाजन यांचा मुलगा अर्थव याने बीड बायपासवरील एका इंग्रजी शाळेत सुरू असलेल्या उन्हाळी निवासी शिबिरामध्ये सहभाग घेतला होता. हे शिबिरी ५ मे सुरू झाले आहे. अथर्व बुधवारी दुपारी शिकवणीचे काम असल्याचे सांगत शिबिराबाहेर गेला होता. यानंतर काही वेळाने त्याला शिबिर चालवणाऱ्या तरुणांनी मोबाइलवर कॉल करून बोलावून घेतले. यानंतर त्याच्यावर मोबाइल चोरीचा आरोप करण्यात आला. अर्थवने माझ्या बॅगमध्ये मोबाइल कोणी ठेवला माहित नाही, मी मोबाइल परत करणारच होतो, असे सांगितले. त्यानंतर देखील त्याला खोलीत डांबून बेदम मारहाण करण्यात आली. या मारहाणीत त्याच्या डोळ्याला मार लागला असून पाठीवर वळ उमटले आहेत. मारहाणीनंतर अर्थवला कारमधून कॅनाट गार्डन येथे सोडण्यात आले. अर्थवने हा प्रकार घरी येऊन सांगितल्यानतर त्याच्या वडिलांनी तक्रार दिली. त्यावरून संशयित आरोपी सुमित शिवारे, कृष्णा जाधव, गजानन जाधव आणि वैभव कऱ्हाळे (सर्व रा. पुष्पनगरी, सिद्धार्थ उद्यानाजवळ) या चौघांविरुद्ध मारहाण, तसेच धमकी दिल्याप्रकरणी गुन्हा दाखल करण्यात आला. याप्रकरणी सहायक फौजदार भोसले तपास करीत आहेत.

…

\Bमुलाला इमारतीवरून ढकलण्याची धमकी\B

अर्थवला चौघांनी बेदम मारहाण केली. यानंतर त्याला संशयित आरोपी कृष्णा जाधव याने तुला शाळेच्या इमारतीच्या छतावरून ढकलून देऊन मारून टाकेन, अशी धमकी दिली. या धमकीचा तक्रारीत उल्लेख करण्यात आला आहे.

…

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांचा कार्यकाळ येत्या चार जून रोजी संपणार आहे. कुलगुरू निवड प्रक्रिया सुरू झाली असून जुलै महिन्यापर्यंत नवीन कुलगुरू रूजू होण्याची शक्यता आहे. कार्यकाळ संपला तरी दुसरीकडे पुन्हा कुलगुरूच राहणार आहे. मात्र, राष्ट्रीय विद्यापीठ की अभिमत विद्यापीठ ही माहिती लवकरच देईल, असे चोपडे यांनी सांगितले.

कुलगुरू डॉ. बी. ए. चोपडे यांचा कार्यकाळ येत्या चार जून रोजी संपणार आहे. 'बामू'चे नवीन कुलगुरू कोण राहणार याची उत्सुकता वाढली आहे. कुलगुरू पदासाठी येत्या २१ मे पर्यंत अर्ज स्वीकारण्यात येणार आहेत. मुलाखत प्रक्रिया होऊन जुलैपर्यंत नवे कुलगुरू रूजू होणे अपेक्षित आहे. किमान महिनाभरासाठी प्रभारीपद प्र-कुलगुरू यांच्याकडे राहण्याची शक्यता आहे. हा कार्यकाळ संपल्यानंतर कुलगुरू चोपडे राष्ट्रीय विद्यापीठात रूजू होणार असल्याची चर्चा आहे. मात्र, आपण दुसऱ्या ठिकाणीही कुलगुरूच राहणार आहोत. राष्ट्रीय विद्यापीठात की अभिमत विद्यापीठात हे लवकरच जाहीर करील असे चोपडे यांनी पत्रकारांशी बोलताना स्पष्ट केले. राष्ट्रीय स्तरावर शैक्षणिक काम करण्याची मोठी संधी आहे. त्यामुळे सतत कार्यरत राहण्याचा प्रयत्न असतो. या विद्यापीठात काम करताना काही अडचणी आल्या. पण, त्यावर मात करुन चांगले काम केल्याचा आनंद आहे, असे चोपडे म्हणाले. कार्यकाळ संपण्यापूर्वीच चोपडे अन्यत्र रुजू होणार असल्याची चर्चा आहे. कार्यकाळ पूर्ण केल्यानंतर दुसरीकडे जाईल. हे विद्यापीठ माझे घर असून नियमानुसार कार्यकाळ पूर्ण करणे कर्तव्य आहे, असे चोपडे यांनी सांगितले.

कुलगुरू निवड प्रक्रिया

कुलगुरू निवड प्रक्रिया सुरू झाली असून विद्यापीठातील आणि विद्यापीठाबाहेरील इच्छुक उमेदवारांनी अर्ज दाखल केले आहेत. राजकीय 'वजन' वापरुन गुणवत्तेच्या बळावर नियुक्त होण्यासाठी काही उमेदवारांचे प्रयत्न सुरू आहेत. कुलगुरू मराठवाड्यातील असावा आणि स्थानिक शैक्षणिक प्रश्नांची जाण असावी अशी मागणी आहे. या मागणीवर भर देत काही राजकीय पदाधिकारी मराठवाड्यातील उमेदवारासाठी आग्रही राहण्याची शक्यता आहे.

म. टा. प्रतिनिधी, औरंगाबाद

डॉ. नानासाहेब धर्माधिकारी प्रतिष्ठानतर्फे रविवारी शहरात स्वच्छता मोहीम राबविण्यात येणार आहे. उपक्रमात राज्यभरातील ३० हजार सेवार्थी सहभागी होणार आहेत. शहरातील ३३ मार्गांवर हा उपक्रम राबविण्यात येणार आहे. यामध्ये सेवार्थींसोबत महापालिकेचे पदाधिकारी, अधिकारी, कर्मचारीही मदतीला असणार आहेत.

प्रतिष्ठानतर्फे राज्यात औरंगाबादसह आणखी दोन शहरांत अशा प्रकाचा उपक्रम राबविण्यात येणार आहे. १२ मे रोजी सात वाजता अभियानाला सुरुवात होणार आहे. शुभारंभाचा कार्यक्रम क्रांतीचौक येथे होणार आहे. शहरातील विविध भागांतील १६५ किलोमीटरच्या दुर्तफा रस्त्याची सफाई करण्यात येणार आहे. यामध्ये शासकीय कार्यालयाचा परिसर, उच्च न्यायालय परिसर, आकाशवाणी केंद्र, दूरदर्शन केंद्र, शासकीय तंत्रनिकेतन, दर्गा चौक, शिवाजी नगर, सिटी चौक, उस्मानपुरा पोलिस स्टेशन परिसर, पोलिस अधीक्षक ग्रामीण, वाळूज पोलिस स्टेशन परिसर, पीईएस कॉलेज, देवगिरी कॉलेज, हायटेक कॉलेज, मौलाना आझाद कॉलेज, आयएचएम कॉलेज, वसंतराव नाईक कॉलेज, निराला बाजार, एम. पी. लॉ, विवेकानंद कॉलेज, एस. टी. विभागीय कार्यालय, मध्यवर्ती बसस्थानक, गुलमंडी बाजारपेठ, गजानन महाराज मंदिर, बीबी का मकबरा, पाणचक्की परिसर, परी बाजार, गुरूद्वारा परिसर, घाटी रुग्णालय, एमजीएम हॉस्पिटल आदी ठिकांणी ही मोहीम राबविण्यात येणार आहे. याचदरम्यान दफनभूमी, प्रतापनगर स्मशानभूमी, मुकुंदवाडी स्मशानभूमी अशा एकूण १२ स्मशानभूमी, दफनभूमीच्या परिसरातही साफसफाई केली जाणार आहे. जमा झालेला कचरा पालिकेच्या त्यासह खासगी वाहनातून डम्पिंग ग्राउंडपर्यंत पोचविण्यात येणार आहे. या उपक्रमात ३० हजार सदस्य यात सहभागी होणार आहे. या मोहिमेत महापालिकाही सहकार्य करणार असल्याचे महापौर नंदकुमार घोडेले यांनी सेवार्थींच्या शिष्टमंडळाला आश्वासन दिले. यावेळी नेताजी भोसले, सुभाष पाटील, डी. एम. शिंदे यांची उपस्थिती होती.

म. टा. प्रतिनिधी, औरंगाबाद

शहरातील कचऱ्याची शास्त्रीय प्रद्धतीने विल्हेवाट लावण्यासाठी कचरा प्रक्रिया प्रकल्पाचे नियोजन करण्यात आले. मार्च २०१८मध्ये तीन महिन्यात प्रकल्प सुरू होतील असे, नियोजन कोर्टात सांगणाऱ्या महापालिकेने अद्याप एकही केंद्र पूर्ण क्षमतेने सुरू नाही. आता, नव्याने १५ जूनचे नियोजन प्रशासनाकडून करण्यात आल्याचे सांगण्यात आले.

शहरात कचऱ्याचा प्रश्न १६ फेब्रुवारी २०१८पासून गंभीर बनला. दीड वर्षानंतरही शहरातील कचऱ्यावर महापालिकेला तोडगा काढता आलेला नाही. कचरा पीट तयार करण्यात आले मात्र, हा उपक्रम कचऱ्यात गेला. त्यानंतर कचऱ्यावर शास्त्रीय पद्धतीने प्रक्रिया करण्यासाठी प्रक्रिया केंद्र उभारण्याचे निश्चित करण्यात आले. जागा निश्चित करण्यात आल्या. मार्च २०१८मध्ये कोर्टाला,'तीन महिन्यात हे प्रकल्प सुरू करून हा प्रश्न निकाली काढला जाईल,' असे महापालिकेने सांगितले होते. त्यानंतरही हा प्रश्न शहरवासीयांना सतावत आहे. चिकलठाणा, पडेगाव, हर्सूल आणि कांचनवाडी अशा चार ठिकाणी हे प्रकल्प सुरू होणार आहेत. त्याचे उद्घाटनाचे दिलेले नियोजन महापालिकेला पाळता आलेले नाही. आता १५ जून रोजी चिकलठाणा कचरा प्रक्रिया केंद्र सुरू होईल, असे सांगण्यात येत आहे. या केंद्रावरील बांधकाम पूर्ण झाली असून, दीडशे टन क्षमतेची मोठे प्रक्रिया यंत्रही बसविण्यात आसल्याचे सांगून १५ जूनला सुरू होईल, असा दावा करण्यात आला आहे.

\B९१ कोटीचा निधीचे काय\B

शहरातील कचराकोंडी राज्यभर गाजली. प्रकरण न्यायालयातही पोचले. तिजोरीत खडखडाट असलेल्या महापालिकेला शासनाने तातडीने वर्षभरापूर्वी ९१ कोटी रुपयांचा निधी दिला. या निधीतूनच शहरात चार प्रक्रिया प्रकल्प उभारण्याचे काम करण्यात येणार आहेत, मात्र अद्याप प्रकल्प सुरू झालेले नाहीत. मागील वर्षी ऑक्टोबर, डिसेंबरसह यंदा जानेवारी, मार्च, मेमध्ये प्रकल्प सुरू होतील असे वेगवेगळे दावे करण्यात येत होते. हे नियोजन होऊ शकले नाही. जूनमध्ये चिकलठाण्यातील प्रकल्प निश्चित सुरू होईल, असे महापौर नंदकुमार घोडेले यांनी सांगितले. त्याबाबतची चाचणी आठ व नऊ जून रोजी करण्यात येणार आहे.

\Bपडेगाव केंद्राचे भूमिपूजन\B

चिकलठाण प्रक्रिया केंद्राचे १५ जून रोजी लोकार्पण यासह त्याच दिवशी पडेगाव येथील प्रक्रिया केंद्राचे भूमिपूजन करण्यात येणार आहे. तेथील बांधकामे सुरू असून, यंत्रसामुग्री ही आलेली आहे. यासह हर्सूल प्रक्रिया केंद्राची निविदा येत्या सर्वसाधारण सभेत मांडली जाणार आहे. त्यासह चिकलठाणा केंद्राबाबतही प्रक्रिया लागेच सुरू होणार असल्याचे सूत्रांनी सांगितले.

म. टा. प्रतिनिधी, वाळूज महानगर

वाळूज एमआयडीसीतील कामगार चौकाजवळ चार वाहने एकमेकांवर धडकून गुरुवारी (९ मे) सकाळी नऊ वाजता झालेल्या अपघातात दोन जण जखमी झाले. पाण्याचा टँकर, ट्रक, छोटा हत्ती व एक स्कुटी, अशा चार वाहनांचा विचित्र अपघात झाला. यामध्ये टँकरचालक आणि स्कुटीवरील एक जण किरकोळ जखमी झाले. वाहनांचा वेग कमी असल्याने जीवितहानी झाली नाही. चारही वाहनाचे मोठे नुकसान झाले आहे.

रामभाऊ साळवे (रा. सूर्यवंशीनगर तिसगाव, ता. औरंगाबाद) हे पाण्याचा टँकर (एम एच ४३ वाय ७९५३) घेऊन कामगार चौकाकडून एमईडीसीकडे जात होते. राठी ट्रेडिंग कंपनीसमोरील चौकात टँकर आला त्यावेळी हा अपघात झाला. २५ टन वजनाच्या लोखंडी पत्र्याच्या पेट्या घेऊन जाणारा ट्रक (एम एच ०४ ई बी २८३६) येत होता त्याचवेळी समोरून येणाऱ्या 'छोटा हत्ती' (एम एच २०, सी टी ३१५३) या वाहनाने अचानक वळण घेतले. तेव्हा ट्रकचालक अल्ताफ पठाण (रा. उत्तर प्रदेश) याने ब्रेक लावण्याचा प्रयत्न केला. याचवेळी पाण्याचा टँकर, ट्रक, छोटा हत्ती आणि मागून येणारी स्कुटी (एम एच २० ई डब्ल्यू ४७०५) ही चार वाहने एकमेकांवर आदळली. या अपघातात टँकरचालक रामभाऊ साळवे व स्कुटीस्वार प्रवीण तुकाराम हारदे हे दोघे किरकोळ जखमी झाले. याप्रकरणी वाळूज एमआयडीसी पोलीस ठाण्यात नोंद नसल्याचे पोलिसांनी सांगितले.

\Bक्रेनने टँकर हलवला \B

या अपघातामुळे वाहनांच्या रांगा लागल्याने काही काळ वाहतूक कोंडी झाली होती. एकदाच चार वाहनांचा अपघात झाल्याने नागरिकांची घटनास्थळी धाव घेतली. अपघाताची माहिती मिळाल्यानंतर वाळूज वाहतूक शाखेचे सहायक पोलिस निरीक्षक भारत राठोड, पोहेकॉ रामेश्वर कवडे, संतोष मादनकर व वाळूज एमआयडीसी पोलिस ठाण्याचे सहायक फौजदार आर. डी. वडगांवकर, अशोक दाभाडे, पोहेकॉ काकासाहेब जगदाळे, भीमराव शेवगे आदींनी घटनास्थळी धाव घेतली. त्यांनी अपघातग्रस्त वाहने रस्त्याच्या बाजूला घेऊन वाहतूक सुरळीत केली. खासगी टँकर हा पाण्याने भरलेला असल्याने तो बाजूला करणे शक्य नसल्याने दुसरा टँकर मागवून तो रिकामा करण्यात आला. त्यानंतर क्रेनने टँकर रस्त्याच्या बाजूला हलविण्यात आला.

म. टा. प्रतिनिधी,औरंगाबाद

काळी-पिवळी जीपमधून प्रवास करणाऱ्या ६४ वर्षीय वृद्ध महिलेच्या पर्समधून रोख एक लाख रुपये चोरणाऱ्या दोन महिलांना पोलिसांनी बुधवारी अटक केली. त्यांना न्यायालयात हजर केले असता १३ मेपर्यंत पोलिस कोठडीत ठेवण्याचे आदेश मुख्य न्यायदंडाधिकारी एम. एस. काकडे यांनी गुरुवारी दिले. दीपा व्यंकटेश कडबन्सी (वय २५) व बाफनी कृष्णा कडबन्सी (वय २३, दोघी रा. मनमाड रेल्वेस्थानकाजवळ, जि. नाशिक), अशी त्यांची नावे आहेत.

याप्रकरणात फातेमा शेख रज्जाक (रा.जामंडी, ता. पैठण) यांनी तक्रार दिली होती. त्या ६ मे रोजी सकाळी १० वाजता रेल्वे स्टेशन येथून काळी-पिवळीमध्ये बसून बिडकीनकडे जात होत्या. जीप साडेदहा वाजता चितेगाव येथे थांबली असता त्यांच्याजवळ व मागे बसलेल्या दोन महिला उतरल्या. त्यावेळी फातेमा यांनी पर्स तपासली असता मुलाने दिलेले एक लाख रुपये त्यांना दिसले नाहीत. याप्रकरणात वेदांतनगर पोलिस ठाण्यात गुन्हा दाखल करण्यात आला. पोलिसांनी दोन महिलांना अटक करून चोरी झालेल्या रकमेतील साडे चार हजार रुपये जप्त केले. एक लाखापैकी ९५ हजार ५०० रुपये जप्त करायाचे आहेत, इतर साथीदारांचा तपास करायचा असल्याने दोघींना पोलिस कोठडी देण्याची विनंती न्यायायलात केली. ही विनंती मान्य करून पोलिस कोठडीचे आदेश देण्यात आले.

म. टा. प्रतिनिधी, औंरगाबाद

शहरातील पाणीपुरवठ्याचे नियोजन कोलमडल्याने भारतीय जनता पक्षाच्या नगरसेवकांसह पदाधिकाऱ्यांनी ठिय्या आंदोलन केल्याचा प्रकार ताजा असताना आता भाजप आमदार अतुल सावे यांनीही पुढाकार घेतला आहे. आपल्या पूर्व मतदारसंघात असलेले सिडकोतील वॉर्डासाठी विशेष बैठक शुक्रवारी बोलावण्याच्या सूचना महापौरांना दिल्या. त्यानुसार बैठकीचे आयोजन करण्यात आले आहे.

पाणीपुरवठ्यातील अनियमिततेवरून सिडकोतील नगरसेवक नितीन चित्ते यांच्यासह भाजप पदाधिकाऱ्यांनी आंदोलन केले. सिडको-हडकोतील परिसरातील वॉर्डात पाणीपुरवठा सहा दिवसांआड होतो आहे. मागणीपेक्षा कमी पाठपुरवठा, त्यासह वेळापत्रक निश्चित नसणे यामुळे नागरिकांमध्ये संताप आहे. त्यावर आयुक्तांनी आठ दिवसांत परिस्थिती सुधारण्याचे आश्वासन दिले. आता भाजप आमदार अतुल सावे यांनी या प्रकरणाची दखल घेत शुक्रवारी बैठक बोलावण्याच्या सूचना दिल्या आहेत. त्यानुसार पुन्हा या प्रश्नावर बैठक बोलावण्यात आली आहे. आयुक्तांच्या दालनात ही बैठक बोलावण्यात आल्याचे सूत्रांनी सांगितले.

यामध्ये आमदार अतुल सावे, आयुक्त डॉ. निपुण विनायक, पाणीपुरठवठा विभागाचे अधिकारी, नगरसेवक यांची उपस्थिती असणार आहे. यामध्ये एन-पाच, एन-तीन, चार, एन-नऊ, एन-११ अशा विविध वॉर्डांतील पाण्याची टंचाई, तेथील प्रश्नाबाबत चर्चा करण्यात येणार असल्याचे सूत्रांनी सांगितले.

\Bपाणी मुरते कुठे...?\B

सिडको-हडको परिसरातील विविध भागांना ५० एमएलडी (दशलक्ष लिटर रोज) पाण्याची गरज आहे. त्यावेळी दोन, तीन दिवसांआड पाणीपुरवठा केला जात होता. दर दिवशी एवढा पाणीपुरवठा होणे अपेक्षित असताना, सध्या केवळ ३६ एमएलडी पाणी येते. त्यातही गळतीचे प्रमाण मोठे आहे. अशावेळी नेमके नियोजनात कोठे चुकत आहे, याबाबत आयुक्तांकडून आढावा घेतला जात आहे. त्यात टँकरद्वारे होत असलेल्या पाणीपुरवठ्यात सुसूत्रता नसल्याचेही समोर आले होते.

म. टा. प्रतिनिधी, औरंगाबाद

फेथ, फॅमिली आणि फ्रेंड या 'थ्री एफ' व हेल्थ, हायजिन आणि हॉबी या 'थ्री एच'वर भर देत जर चोवीस तासांच्या दिवसाची आखणी केली तर ताणतणाव राहणार नाही व हेच जीवनाचे यशस्वी सूत्र असेल, असे प्रतिपादन अक्षरधाम येथील स्वामी नारायण मंदिर व बीएपीएस संस्थेचे स्वामी ज्ञानवत्सल यांनी केले. सातारा परिसरातील आयसीएआय भवनात बुधवारी सांयकाळी आयोजित कार्यक्रमात 'द स्कील ऑफ वर्क- लाईफ बॅलन्स' या विषयावर ते बोलत होते. व्यासपीठावर सीएचे अध्यक्ष रोहन अचलिया, सीए उमेश शर्मा, संघटनेचे सचिव गणेश भालेराव आणि विद्यार्थी संघटनेचे उपाध्यक्ष विपुल उपाध्याय उपस्थित होते.

स्वामी ज्ञानवत्सल म्हणाले, 'जीवनात येणाऱ्या अपयशांना घाबरू नका, हे अपयशच तुम्हाला जीवनात यशाचा मार्ग दाखविल, पण यश मिळवताना नैतिकता प्रामाणिकणा आणि कठोर परिश्रमाच्या माध्यमातून जीवनात यश संपादन करता येते. त्यासाठी मेहनत करून पुरूषार्थ दाखवा, नशीबात नसेल तेही तुम्हाला मेहनतीने मिळवता येते. यासाठी दिवसभर प्रामाणिक मेहनत आणि कठोर मेहनतीशिवाय पर्याय नाही. तुमच्या २४ तासांचे तुम्ही नियोजन करा. यामध्ये आठ तास प्रामाणिकपणे कठोर मेहनत, आठ आठ तास फॅमिली, मित्र परिवार, छंद आणि आठ तास झोप व वैयक्तिक शारीरिक व्यायाम, ध्यानधारणा करा, असे नियोजन करा ज्यामुळे यशाचा मार्ग सुकर होईल, असे त्यांनी नमूद केले.

आठ तासात त्यांनी 'थ्री एफ आणि थ्री एच' यावर भर देण्याची सूचना केली. कठोर मेहनतीला कुठलाही पर्याय नाही. त्यामुळे मेहनतीशी तडजोड करू नका, हे सांगतांना त्यांनी सचिन तेंडुलकर, थॉमस एडिसन यासह विविध क्षेत्रातील मान्यवरांच्या मेहनतीचे दाखले दिले. आजच्या पिढीमध्ये अपयश पचवण्याची इच्छाशक्ती नाही. डिजिटल युगात वावरलेल्या व २१ शतकातील युवकांना 'हवे ते मिळालेच पाहिजे अशी सवय बालपणापासून लागली आहे. त्यामुळे त्यांना अपयश पचवणे अवघड जाते. मात्र, हेच टाळण्यासाठी अपयश स्वीकारण्याची वृत्ती निर्माण करणे आवश्यक आहे. हे आत्मसात करताना मेहनत, प्रामाणिकता या बाबी अंगीकारणे आवश्यक आहे, असेही त्यांनी नमूद केले. कार्यक्रमाचे प्रास्ताविक सीए उमेश शर्मा यांनी केले.

म. टा. प्रतिनिधी, औरंगाबाद

स्वातंत्र्य सैनिकांचे पाल्य म्हणून सरकारी सेवेत आलेल्यांचा स्वातंत्र्य सैनिकांशी कुठलेही नातेसंबंध नाही. असे असताना शासनाची दिशाभूल करून बनावट वारसापत्र तयार करून घेतलेले मंडळ अधिकारी आणि अव्वल कारकून यांना बडतर्फ करण्याचे आदेश जिल्हाधिकारी उदय चौधरी यांनी काढले आहेत.

औरंगाबाद येथील स्वातंत्रसैनिक आणि त्यांनी वारसापत्र दिलेले पाल्य यांच्यात शासन निर्णयानुसार कोणतेही नातेसंबंध नाहीत, अशा इतर जिल्ह्यात शासकीय सेवेत कार्यरत असलेल्या ३५ कर्मचाऱ्यांवर कारवाईसाठी जिल्हा प्रशासनाने पत्र पाठवले आहे. त्यांनाही सेवतून कमी करण्याबाबत संबंधित विभाग निर्णय घेतील, अशी माहिती प्रशासनाने दिली.

यासंदर्भात जिल्हाधिकारी उदय चौधरी यांनी उच्च न्यायालयाच्या औरंगाबाद खंडपीठाच्या आदेशानुसार काढलेल्या आदेशात म्हटले आहे की, तक्रारदार पी. एन. मोने यांनी स्वातंत्र्य सैनिक यांनी दिलेले व स्वातंत्र्यसैनिक वारसदार पाल्य म्हणून शासकीय सेवेसाठी घेतलेले वारसान पत्र हे स्वातंत्र सैनिक व वारसदार पाल्य यांच्यात शासन निर्णयानुसार कोणतेही नातेसंबंध नसताना शासनाची दिशाभूल करून बनावट पत्र तयार केले. त्यामुळे त्यांची चौकशी करून ते रद्द करण्याची विनंती केली होती. त्यानुसार जिल्हा प्रशासनाकडून समिती स्थापन करण्यात आली होती.

याप्रकरणी खंडपीठाने दिलेल्या आदेशानुसार सहा आठवड्यांत निर्णय घेऊन त्याचा अहवाल न्यायालयासमोर सादर करण्याची मुदत होती. या प्रकरणात आस्थापनेवर असलेल्या संबंधित कर्मचाऱ्यांवर कारवाई होणे क्रमप्राप्त होते. त्यानुसार दोन कर्मचाऱ्यांना बडतर्फ करण्यात आले असल्याचे निवासी उपजिल्हाधिकारी संजीव जाधवर यांनी सांगितले. यामध्ये मंडळ अधिकारी गणेश देवकाते व अव्वल कारकून कैलास थोरात यांचा समोवश आहे. जिल्ह्यातील एकूण ३७ कर्मचारी स्वातंत्र्य सैनिकांचे पाल्य म्हणून सेवेत आहेत. ते राज्यातील वेगवेगळ्या शासकीय विभागात कार्यरत आहेत. त्या सर्व शासकीय विभागांना या प्रकरणी पत्र देऊन कारवाई करण्याबाबत सुचविण्यात आले आहे. औरंगाबाद प्रशासनातील दोघांवर बडतर्फीची कारवाई करण्यात आली आहे.

\Bविविध विभागांत ३५ कर्मचारी\B

समितीच्या चौकशीअंती राज्याच्या विविध शासकीय विभागात कार्यरत असलेले ३५ कर्मचारी औरंगाबादेचे असून, ते वेगवेगळ्या ठिकाणी सेवेत आहेत. त्यांनी अशाच प्रकारे स्वातंत्र्यसैनिकांचे पाल्य म्हणून शासकीय सेवा मिळविली आहे, अशी माहिती जिल्हा प्रशासनाकडून मिळाली.

म. टा. प्रतिनिधी, औरंगाबाद

सातारा-देवाळाईसह वेगवेगळ्या तुकड्यांमध्ये पाठविलेला प्रस्ताव फेटाळत एकत्रित शहराचा नवीन प्रस्ताव पाठवा, अशा स्पष्ट शब्दात पालिकेला राज्य सरकाने फटकारले आहे. त्यामुळे समांतर जलवाहिनी प्रकल्पाला पर्याय सुचिवणारा औरंगाबाद शहराच्या पाणी पुरवठ्याबद्दलचा स्वतंत्र प्रस्ताव महापालिकेला आता राज्य सरकारकडे पाठवावा लागणार आहे.

शहरातील पाणी पुरवठ्याच्या प्रस्तावाला शासनाने निधी देण्याचे मान्य केले. त्यानुसार सत्तेत असलेल्या युतीच्या पदाधिकाऱ्यांना प्रस्ताव पाठविण्याच्या सूचना देण्यात आल्या होत्या. हा प्रस्ताव पाठविताना पालिकेने शहरासाठी वेगळा, सातारा-देवळाई वेगळा, गुंठेवारी असे विविध भाग करून वेगवेगळे प्रस्ताव पाठविले होते. यामध्ये शहरासाठी १०२३ कोटी रुपये निधीचा प्रस्ताव होता. यासह सातारा-देवळाईसाठी ४०० कोटींचा स्वतंत्र प्रस्तावही सादर करण्यात आला. त्याशिवाय गुंठेवारी, जायकवाडी ते नक्षत्रवाडीपर्यंत मुख्य जलवाहिनी टाकण्यासाठी ५७३ कोटी रुपयांचा प्रस्ताव होता आणि शहरात अंतर्गत जवाहिन्यांसाठी ४५० कोटी रुपयांचा खर्च प्रस्तावित करण्यात आला होता. त्यात पहिल्या टप्प्यात मुख्य जलवाहिनी टाकण्यासाठी ५७३ कोटी रुपयांच्या कामाचे नियोजनही करण्यात आले होते. अशा वेगवेगळ्या टप्प्यावर प्रस्तावांची यादी वाढली. त्यावर राज्य सरकाने पालिकेला फटकारत हे सगळे तुकड्यांमधील प्रस्ताव रद्द ठरवित अशाप्रकारे निधी मंजूर करता येणार नाही, असे स्पष्ट शब्दात सांगितले. एकाच शहरात पाणी पुरवठा योजना राबविण्याचे नियोजन असताना अशा तुकड्यांमध्ये प्रस्ताव का, असा प्रश्न करीत एकत्रित नवीन स्वतंत्र प्रस्ताव पाठविण्याबाबत सूचना प्रशासनाला देण्यात आली. त्यानुसार आता सुधारित डीपीआर व प्रस्ताव तयार करण्याच्या कामाला पालिका प्रशासन लागले आहे.

प्रस्तावाबाबत बैठक

राज्यसरकारकडून ही प्रकारची सूचना आल्यानंतर गुरुवारी आयुक्त डॉ. निपुण विनायक यांनी पालिकेतील अधिकाऱ्यांची बैठक घेत प्रस्ताव कशाप्रकारे तयार करायचा याबाबत चर्चा केली. सुधारित विकास आराखडा तयार करण्याबाबत चर्चा करण्यात आली. यामध्ये नो नेटवर्क एरिया, सातारा-देवळाई परिसर, गुंठेवारी, जायकवाडी ते नक्षत्रवाडी जलवाहिनीसाठी लागणारा संभाव्य खर्च, अंतर्गत जलवाहिनी असा एकत्रित प्रस्ताव तयार करण्याच्या सुचना देण्यात आल्या. मागील वर्षभर पालिका सत्ताधाऱ्यांनी, सोबत राज्यसरकारने समांतर जलवाहिनी योजनेच्या कंत्राटदार एसपीएमएल कंपनीसोबत न्यायालयाबाहेर तडजोड करून पुन्हा त्याच कंपनीकडून समांतर योजनेचे काम करून घेण्याचा घाट घालण्याचा प्रयत्न केला. मात्र, ही तडजोड शक्य झाली नसल्याचे बोलले जात आहे.

शहरासाठी नवीन स्वतंत्र पाणी पुरवठ्याबाबतचा प्रस्ताव सादर करा, असे पत्र आले आहे. त्यानुसार तयारी सुरू असून लवकरच प्रस्ताव सादर केला जाईल. आचारसंहिता शिथिल झाल्यानंतर हा प्रश्न मार्गी लागण्याची शक्यता आहे.

नंदकुमार घोडेले,

महापौर

म. टा. प्रतिनिधी, औरंगाबाद

रमानगर भागात असलेल्या महापालिकेच्या कचरा डेपोला गुरुवारी सायंकाळी आग लागल्याची घटना घडली. या आगीचे नेमके कारण समजू शकले नाही. या ठिकाणी आग लागण्याची ही पाचवी घटना आहे. अग्निशमन दलाच्या जवानांनी ही आग आटोक्यात आणली.

रमानगर भागातील स्मशानभूमीजवळी महापालिकेच्या जागेत गेल्या वर्षभरापासून कचरा डेपो तयार करण्यात आला आहे. या डेपोतील कचऱ्याने गुरुवारी सायंकाळी साडेपाचच्या सुमारास अचानक पेट घेतला. काही वेळातच या आगीने रौद्ररुप धारण केले. अग्निशमन दलाला ही माहिती कळवण्यात आली. अग्निशमन दलाच्या बंबानी पाण्याचा मारा केल्याने ही आग आटोक्यात आली. या आगीच्या विळख्यात सापडल्याने दोन मोठे वृक्ष जळाले. या स्मशानभूमीपासून काही अंतरावर लाकडाची वखार आणि सॉ मील आहे. सुदैवाने ही आग वेळीच आटोक्यात आल्याने मोठी दुर्घटना टळली. आतापर्यंत या कचऱ्याच्या ठिकाणी आग लागल्याची ही पाचवी घटना आहे. या आगीचे कारण समजू शकले नसून, ही आग लागली अथवा जाणीवपूर्वक लावण्यात आली, असा प्रश्न निर्माण झाला आहे.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाने नवीन अध्यासन केंद्राच्या संचालकांची नियुक्ती केली. ही प्रक्रिया आचारसंहितेचा भंग करणारी आहे. त्यामुळे कुलगुरू आणि कुलसचिव यांच्याविरुद्ध कारवाई करा, अशी तक्रार व्यवस्थापन परिषद सदस्य संजय निंबाळकर यांनी केली आहे. याबाबत निंबाळकर यांनी निवडणूक आयुक्तांकडे लेखी तक्रार दिली.

विद्यापीठ प्रशासनाने विलासराव देशमुख अध्यासन केंद्राच्या संचालकपदी डॉ. राम चव्हाण आणि लोककवी वामनदादा कर्डक अध्यासन केंद्राच्या संचालकपदी डॉ. युवराज धबडगे यांची नियुक्ती केली आहे. याबाबत दोन दिवसांपूर्वी प्रभारी कुलसचिव डॉ. साधना पांडे यांनी नियुक्तीपत्र काढले. मात्र, नियुक्ती प्रक्रियेवर व्यवस्थापन परिषद सदस्य संजय निंबाळकर यांनी आक्षेप घेतला आहे. राजकीय विषयाशी संबंधित या दोन्ही नियुक्त्या आचारसंहितेच्या काळात झाल्या आहेत. हा आचारसंहितेचा भंग असून कुलगुरू डॉ. बी. ए. चोपडे आणि कुलसचिव पांडे यांच्याविरुद्ध कारवाई करावी, अशी तक्रार निंबाळकर यांनी निवडणूक आयुक्तांकडे केली आहे. आचारसंहितेच्या कालावधीत नियमावलीचे पालन करण्याबाबत कुलगुरू व कुलसचिव यांना वेळोवेळी लेखी पत्रव्यवहार केला होता. त्यानंतरही नियुक्त्या करण्यात आल्या, असे निंबाळकर यांनी लेखी तक्रारीत म्हटले आहे. मागील काही दिवसांपासून कुलसचिव कार्यालयाचे निर्णय वादग्रस्त ठरत आहेत. अध्यासन केंद्र तातडीने सुरू करण्याची मागणी करण्यात आली होती. मात्र, संचालकपदाची नियुक्ती काही कालावधीनंतर करण्याचा प्रस्ताव होता. प्रत्यक्षात कुलगुरूंच्या सहमतीनंतर नियुक्त्या करण्यात आल्या. या कार्यवाहीवर बोट ठेवत निंबाळकर यांनी तक्रार दाखल केली आहे.

दरम्यान, आचारसंहितेचा भंग होईल असा प्रकार नाही. शैक्षणिक कामकाज विस्कळीत होऊ नये म्हणून तात्काळ नियुक्त्या करण्यात आल्या. येत्या २५ मे रोजी विलासराव देशमुख अध्यासन केंद्राची सुरुवात होणार आहे. त्यामुळे ही प्रक्रिया नियमानुसार केल्याचे कुलगुरू डॉ. बी. ए. चोपडे यांनी स्पष्ट केले.

आजच्या बैठकीवर आक्षेप

विद्यापीठात शुक्रवारी व्यवस्थापन परिषदेची बैठक होणार आहे. ही बैठकसुद्धा आचारसंहितेचा भंग करणारी आहे. त्यामुळे बैठक घेऊ नये अशी मागणी संजय निंबाळकर यांनी केली आहे. या बैठकीत महत्त्वाच्या विषयांवर चर्चा होईल. मात्र, धोरणात्मक निर्णय घेतला जाणार नाही असे कुलगुरू चोपडे यांनी सांगितले. निंबाळकर आणि विद्यापीठ प्रशासनाने आपापली भूमिका स्पष्ट केली आहे. या पार्श्वभूमीवर बैठक वादग्रस्त ठरण्याची शक्यता आहे.

पांडे यांची नियुक्ती अवैध?

विधि विभागात अधिव्याख्यातापदी डॉ. साधना पांडे यांची नियुक्ती करण्यात आली होती. तीन नोव्हेंबर २००३ रोजी दिलेल्या विधि विभागातील पदाच्या जाहिरातीनुसार त्यांच्याकडे अध्यापनाचा अनुभव नव्हता. विधि विषयात त्या सेट-नेट नाहीत. त्यांची पीएच. डी. २००२ मध्ये झालेली असल्याने त्यापूर्वी सहाय्यक प्राध्यापक होण्यासाठी पात्र नव्हत्या. पदासाठी आवश्यक पात्रता नसल्यामुळे त्यांची नियुक्ती तात्काळ रद्द करावी, अशी मागणी डॉ. शोभना जोशी यांनी केली. याबाबत जोशी यांनी कुलगुरूंकडे तक्रार केली आहे.

म. टा. प्रतिनिधी, औरंगाबाद

एलइडी, व्हेंडिंग, इआरपी सिस्टीम असो की, टूल व्हेंडिंग मशीनशी निगडित छोट्या-मोठ्या अडचणींवर प्रकल्पांच्या माध्यमातून विद्यार्थ्यांनी उपाय मांडले. उद्योगांनी या प्रकल्पांवर काम करण्याची दिलेली संधी अन् त्या संधीतून विद्यार्थ्यांनी घेतलेली मेहनत जवाहरलाल नेहरू अभियांत्रिकी महाविद्यालयात भरविण्यात आलेल्या 'इनोव्हेशन कॅम्प'च्या माध्यमातून समोर आली.

जीआयझेड आणि मासिआतर्फे या प्रकल्प स्पर्धेचे आयोजन करण्यात आले. रुख्मिणी सभागृहात आयोजित या स्पर्धेत २० अभियांत्रिकी महाविद्यालयांतील ७०० विद्यर्थ्यांनी सहभाग घेतला. ९० उद्योगातील २१२ प्रकल्पावर काम करण्याची संधी या स्पर्धेतून विद्यार्थ्यांना देण्यात आली होती. १५० प्राध्यापकांच्या मार्गदर्शनाखाली विध्यार्थ्यांनी हे सर्व प्रकल्प ७ महिन्याच्या कालावधीत यशस्वीरित्या पूर्ण केले. प्रकल्पांमध्ये विद्यार्थ्यांनी कंपन्यांमध्ये उपयोगात असलेल्या मशीनमध्ये निर्माण होणाऱ्या अडचणी आपल्या कल्पकतेतून दूर करायच्या होत्या. त्यासाठी त्यांना निश्चित प्रकल्प देण्यात आले. प्रकल्प स्पर्धेत २० कॉलेजांमधील एक हजारपेक्षा अधिक विद्यार्थ्यांनी सहभाग नोंदविला.

त्या सर्व प्रकल्पांचे प्रदर्शन कॉलेजच्या प्रांगणात भरविण्यात आले. प्रारंभी उद्घाटन सोहळ्याला 'जीआयझेड'चे चमनलाल धांडा, 'मासिआ'चे अध्यक्ष ज्ञानदेव राजाळे, लघू तसे मध्यम उद्योगाचे उपसंचालक बी. एस. जोशी, प्राचार्य डॉ. हरिरंग शिंदे यांची प्रमुख उपस्थिती होती. विद्यार्थ्यांना मार्गदर्शन करताना धांडा म्हणाले, उत्पादनाची गुणवत्ता सुधारण्यासाठी आणि जागतिक स्पर्धेत टिकून राहण्यासाठी प्रगत तंत्रज्ञान वापरावे लागेल. हे तंत्रज्ञान विकसीत करतांना अभियांत्रिकी महाविद्यालये तसेच उद्योगांनी परस्पर सहकार्यासाठी एकत्र कारणे गरजेचे आहे. जगातील क्रमांक दोनची अर्थव्यवस्था असलेल्या जर्मनी या देशाच्या पुढाकाराने जीआयझेड हा उपक्रम भारतात राबवित आहोत. उपक्रमाद्वारे उद्योग आणि महाविद्यालये यांची परस्पर सहकार्य वाढवत नवनवीन तंत्रज्ञानाचा विकसीत करावे, असे आवाहान त्यांनी केले. कार्यक्रमाचे प्रास्ताविक प्राचार्य डॉ. हरिरंग शिंदे यांनी केले. कार्यक्रमाचे सूत्रसंचालन प्रा. सरफराज कादरी यांनी केले. यावेळी दीप्ती नायर, तसवर आली यांची उपस्थिती होती. आभार प्रदर्शन डॉ. एम. एस. कदम यांनी मानले. स्पर्धा यशस्वीतेसाठी डॉ. एम. एस. कदम, प्रा. दीलीप खेडेकर, प्रा. प्रिया शिंदे, प्रा. कोमल जाहगीरदार, डॉ. धनंजय डोळस, डॉ. नितीन फाफर, डॉ. सहदेव उबाळे, डॉ. राजेश काथार, डॉ. रविंद्र देशमुख, डॉ. अभय देशमुख, डॉ. अभय कुलकर्णी, डॉ. अरविंद चेल, प्रा. सुदर्शन धारुरकर, प्रा. एस. बी. पवार, प्रा. पंकज ढोबळे, प्रा. किरण जगताप, प्रा. संदीप ठेंगडे, प्रा. अरिफ पठाण,

प्रा. आर. बी. पाटील, संजय भाजीपाले आदींनी परिश्रम घेतले.

उत्कृष्ठ ठरलेले प्रकल्प

- ओइइ मेजरमेंट बाय आयओटी(आयसीइइम)

- टूल व्हेंडिंग मशीन (जेएनइसी)

- अॅटोमॅटिक एलइडी पॅनल टेस्टर (एमआयटी बीटेक)

- रिंग स्पॅनर टू माऊंट सीएनसी (एसजीजीएस)

- इमेज प्रोसेसिंग टू अॅडंटिफाय डिफेक्टस् (डीआयइएमएस)

- कस्टमाइज्ड इआरपी सीस्टीम (सीएसएमएसएस)

म. टा. प्रतिनिधी, औरंगाबाद

शिवरातील पाणी शिवारात जिरवून मराठवाडा दुष्काळमुक्त करण्यासाठी युती शासनाने डिसेंबर २०१४ मध्ये जलयुक्त शिवार अभियान सुरू केले आहे. गेल्या साडेचार वर्षात मराठवाड्यातील सर्व गावांमध्ये टप्प्या टप्प्याने जलयुक्त शिवार योजनेचे काम होणार होते, मात्र नवीन गावे निवड प्रक्रियेदरम्यान विभागातील शिल्लक २५०८ गावांपैकी पात्र ७२५ गावांमध्ये जलसंधारणास वाव नसल्यामुळे जिल्हा प्रशासनाने विभागीय प्रशासनाला कळवले होते. त्यामुळे पात्र असतानाही या गावांमध्ये 'जलयुक्त'च्या कामांना ब्रेक लागला आहे.

जलयुक्त शिवार अभियानांतर्गत दरवर्षी जानेवारी-फेब्रुवारी महिन्यात गावांची निवड करून तेथे सिमेंट बंधारा, नालाबांध, कंपार्टमेंट बंडिंग, नाला खोलीकरण व रुंदीकरण, गाळ काढणे आदी सिंचनाची कामे करण्याचे नियोजन करण्यात आले. यंदा विभागातील जलयुक्त शिवार अभियानाचे गावांचे उद्दिष्ट पूर्ण झाले असल्यामुळे आगामी वर्षासाठी गावांची निवड होणार नाही, मात्र पात्र असतानाही केवळ जलसंधारणास वाव नसल्यामुळे मराठवाड्यातील ७२५ गावांमध्ये कामे होणार नसल्याने या गावांचे मात्र नुकसान होणार आहे. २०१९ पर्यंत मराठवाडा 'जलयुक्त'च्या माध्यमातून दुष्काळमुक्त करण्याचे शासनाचे स्वप्न होते. मात्र अत्यल्प पावसामुळे सद्यस्थितीत अनेक जलयुक्त शिवारात निवड केलेल्या गावांमध्ये टँकर धावत आहेत.

जलयुक्त शिवार अभियानांतर्गत मराठवाडा विभागामध्ये २०१५ ते २०१९ पर्यंत एकूण ६०२३ गावांची निवड करण्यात आली असून यातील २०१८-१९ या वर्षांमध्ये निवड करण्यात आलेल्या १५७५ गावांमधील कामे अद्याप सुरू आहेत. अभियानामध्ये २०१९ अखेरपर्यंतच मराठवाड्यातील सर्व गावांची निवड करून जलसंधारणाची कामे करून गावे पाणीदार करण्याचे नियोजन होते. दरम्यानच्या काळामध्ये कृषी विकासाकरिता कृषी विभागांतर्गत पोक्रा (प्रोजेक्ट ऑन क्लायमॅट रिसिलिंट अॅग्रीकल्चर) हवामान अनुकूल कृषी प्रकल्प मराठवाड्यातील १०२४ गावांची निवड करण्यात आली. त्यामुळे या गावांना जलयुक्त शिवार अभियानातून वगळण्यात आले होते. यासह लाभक्षेत्रातील गावांनाही जलयुक्तमधून वगळण्यात आले होते. त्यामुळे नव्याने गावे निवड करण्याच्या प्रक्रियेदरम्यान उर्वरित पात्र गावांची यादी जिल्हा प्रशासनाकडून मागवण्यात आली होती. यामध्ये मराठवाड्यात पात्र असलेली ७२५ गावांमध्ये जलसंधारणाला वाव नसल्याचे सांगत जिल्हाप्रशासनाने या गावांमध्ये जलयुक्त शिवार अभियानातून ही गावे वगळली. आता आगामी वर्षात 'जलयुक्त'साठी नव्याने गावे निवडण्यात येणार नसल्यामुळे या गावांमध्ये जलसंधारण कधी होणार, असा प्रश्न आहे.

\Bजिल्हानिहाय शिल्लक पात्र गावे\B

जिल्हा............... शिल्लक गावे............. पात्र गावे

औरंगाबाद..............४०५....................१७२

जालना..................२१५....................००

परभणी..................२६६....................७७

हिंगोली..................२८८.....................७६

नांदेड..................६३१......................१५२

लातूर....................२४३......................९८

उस्मानाबाद............७३..........................००

एकूण...................२५०८...................७२५

म. टा. प्रतिनिधी, औरंगाबाद

पुर्णा (जि. परभणी) येथे शाळकरी मुलीला कारचा धक्का लागल्याच्या कारणावरून २० ते २१ जणांनी कार चालकासह मालकाला मारहाण केल्या प्रकरणात संशयित आरोपी प्रदीप शिवचरण पारवे याला पोलिसांनी बुधवारी रात्री अटक केली. त्याला न्यायालयात हजर करण्यात आले असता १६ मेपर्यंत पोलिस कोठडीत ठेवण्याचे आदेश विशेष न्यायाधीश के. आर. चौधरी यांनी गुरुवारी दिले.

या प्रकरणात आरोपी प्रदीप पारवे (वय २१, रा. गौर, ता. पूर्णा, जि. परभणी) याच्यासह २१ जणांविरोधात दंगल व संघटीत गुन्हेगारी केल्याप्रकरणात 'मकोका' अंतर्गत गुन्हा दाखल करण्यात होता. या प्रकरणात यापूर्वी पोलिसांनी अंगद लोखंडे याला अटक केली होती. पोलिस व न्यायालयीन कोठडीनंतर त्याने दाखल केलेला नियमित जामीन अर्ज न्यायालयाने फेटाळला होता. या प्रकरणात हाजी खलील कुरेशी (रा. शास्त्रीनगर, ता. पुर्णा) यांनी तक्रार दिली. २५ ऑगस्ट २०१८ रोजी कुरेशी यांच्या पत्नीची तब्येत बरी नसल्याने ते नांदेडला औषध आणण्यासाठी कारचालक सुलेमानसह निघाले होते. त्यावेळी शाळकरी मुलीला धक्का दिल्याच्या कारणावरून हाजी कुरेशी यांना प्रदीप पारवे व इतरांनी शिवीगाळ करून मारहाण केली. त्यानंतर कुरेशी हे जाब विचारण्यासाठी गेले असता लोखंडी रॉडने बेदम मारहाण करून कुरेशी यांना गंभीर जखमी केले. या प्रकरणात पुर्णा पोलिस ठाण्यात आरोपींविरोधात कलम ३२६, १४३,१४७,१४८,१४९ व भादंवी कलम १३५ मुंबई पोलिस कायद्यानुसार गुन्हा दाखल करण्यात आला. दरम्यान, गुन्ह्याचे गांभीर्य ओळखून नांदेडच्या विशेष पोलिस महानिरीक्षकांच्या आदेशान्वये आरोपींविरोधात 'मकोका' अंतर्गत गुन्हा दाखल करण्यात आला.

\Bयासाठी पोलिस कोठडी \B

दरम्यान, संशयित आरोपी प्रदीप पारवे याला गुरुवारी न्यायालयात हजर करण्यात आले असता सहाय्यक लोकाभियोक्ता सुदेश शिरसाठ यांनी आरोपीच्या साथीदारांचा शोध घेवून त्यांना अटक करायचे आहे. आरोपीचा जबाब 'मकोका' अधिनियम कलम १८ प्रमाणे नोंदवायचा असल्याने पोलिस कोठडी देण्याची विनंती न्यायालयाकडे केली. ही विनंती मान्य करून न्यायालयाने आरोपीला १६ मेपर्यंत पोलिस कोठडी सुनावली.

म. टा. प्रतिनिधी, औरंगाबाद

ट्रायल घेण्याचा बहाणा करून कार लंपास करणाऱ्या आरोपीला सहा महिने सक्तमजुरी व एक हजार रुपये दंडाची शिक्षा प्रथम वर्ग न्यायदंडाधिकारी के. के. कुरंदळे यांनी ठोठाविली. मोहम्मद अमीर मोहम्मद अमीन (वय ३२, रा. अंजनगाव ता. सुर्जी जि. अमरावती), असे आरोपीचे नाव आहे.

प्रकरणात अझहर शेख गणी शेख (वय ३३, रा. गारखेडा परिसर) यांनी तक्रार दिली होती. अजहर शेख यांचा प्लॉटिंग खरेदी विक्रीचा व्यवयास आहे. २३ ऑक्टोबर २०१६ रोजी सायंकाळी अजहर शेख स्वत:ची कार चालवत सुतगिरणी चौकातून जात होते. त्यावेळी त्यांना ओळखीचा व्यक्ती तथा आरोपी मोहम्मद अमीरचा फोन आला. त्याने मला कार खरेदी करायची आहे, तुम्ही कुठे आहात?, अशी विचारणा केली. त्यावर अजहर शेख यांनी मला माझी कार विकायची आहे, तू घेतोस का, मी सध्या सुतगिरणी चौकात असल्याचे सांगितले. आरोपीने कार विकत घेण्यास होकार देत, मी माझ्या भावाकडे काबरानगर येथे असून लगेच सुतगिरणी चौकात येतो, असे सांगितले. त्यानुसार आरोपी मोहम्मद अमीर तेथे आला त्याने कारची ट्रायल घेतो असे सांगत कार घेऊन गेला, मात्र तो परतलाच नाही. अजहर शेख यांनी त्याला फोन केला असता त्याचा मोबाइलही बंद होता. फसवणूक झाल्याचे लक्षात आल्यानंतर अजहर शेख यांनी दिलेल्या तक्रारीवरून आरोपी विरुद्ध गुन्हा दाखल करण्यात आला.

\Bदोघांची निर्दोष मुक्तता \B

खटल्याच्या सुनावणीवेळी सहाय्यक सरकारी वकील सुनील जोंधळे यांनी पाच साक्षीदारांचे जबाब नोंदवले. दोन्ही बाजुंच्या युक्तिवादानंतर व साक्ष-पुराव्यांवरून न्यायालयाने आरोपीला शिक्षा ठोठाविली. मोहम्मद शोएब मोहम्मद युसूफ व फिरोज शहा रौफ शहा या दोघांची निर्दोष मुक्तता केली. या प्रकरणात पैरवी अधिकारी पोलिस शिपाई मंजूर हुसेन यांनी काम पाहिले.

म. टा. प्रतिनिधी, औरंगाबाद

आंबेडकरनगर येथील रहिवासी विवाहितेच्या संशयास्पद मृत्युप्रकरणी संशयित आरोपी पती सय्यद रईस सय्यद कालू याला बुधवारी रात्री पोलिसांनी अटक केली. त्याला न्यायालयात हजर केले असता १२ मेपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. ए. ए. खतीब यांनी गुरुवारी दिले.

या प्रकरणात मृत शाईन सय्यद (वय २५) यांचे वडील शेख ईस्माईल शेख इमाम (रा. हिनानगर, चिकलठाणा) यांनी तक्रार दिली. मे २०१४ मध्ये शाईनचे लग्न सय्यद रईस (वय ३०, रा. आंबेडकरनगर) याच्याशी झाले होते. शाईनला पाच महिने चांगले नांदविल्यानंतर पतीसह सासरच्यांनी एलपीजी रिक्षा खरेदीसाठी माहेरातून ३५ हजार रुपये आण अशी मागणी करत शारीरिक व मानसिक छळ सुरू केला होता. याप्रकरणी सहा महिन्यांपूर्वी शाईनने सासरच्या मंडळींविरुद्ध पोलिस ठाण्यात तक्रारही दिली होती.

दरम्यान, मंगळवारी रात्री साडे दहा वाजता शाईनच्या चुलत सासऱ्याने शेख ईस्माईल यांना फोन करून शाईन ही जिन्यावरून पाय घसरून पडल्याने घाटीत दाखल केल्याचे सांगितले. त्यांनी जावयाला फोन केला असता शाईन मेल्याचे सांगितले. या घटनेच्या आठ दिवसांपूर्वी शाईनचा गर्भपात झाल्याचे शाईनने शेख ईस्माईल यांना सांगितल्याचे तक्रारीत नमूद केले आहे. याप्रकरणी पती सय्यद रईस यांच्यासह सासू, दीर, नणंद, चुलत सासू-सासरे यांच्या विरूद्ध सिडको पोलिस ठाण्यात गुन्हा दाखल करण्यात आला आहे. या प्रकरणात सहाय्यक सरकारी वकील सूर्यकांत सोनटक्के यांनी काम पाहिले.