म. टा. प्रतिनिधी, औरंगाबाद

बुलंद छावा मराठा युवा परिषद प्रणित छत्रपती संभाजी महाराज यांच्या जयंतीनिमित्त १३ मे पासून टीव्ही सेंटर चौकामध्ये विविध कार्यक्रमांचे आयोजन करण्यात आले आहे.

सोमवारी (१३ मे) संध्याकाळी साडेसात वाजता शिवचित्रकार प्रा. यशवंत गोसावी यांचे छत्रपती संभाजी महाराज यांच्या जीवनचरित्रावर व्याख्यान होणार आहे. या कार्यक्रमाच्या अध्यक्षस्थानी ज्येष्ठ साहित्यिक बाबा भांड तसेच निकेश काटमोडे, बी. बी. चव्हाण आदींची उपस्थिती राहणार आहे.

मंगळवारी (१४ मे) रोजी सकाळी ८ वाजता बुलंद छावा विभागीय कार्यालय ते टीव्ही सेंटर चौक दरम्यान शोभायाचेत्रे आयोजन करण्यात आले आहे. विधानसभा अध्यक्ष हरिभाऊ बागडे यांच्या हस्ते या शोभायात्रेचे उद्घाटन होईल. यावेळी अंबादास दानवे, पृथ्वीराज पवार, डॉ. अशोक तेजनकर, कैलास पाटील, संदीप बोरसे, नामदेवराव पवार, विनोद पाटील, सुनील शिसोदिया यांची प्रमुख उपस्थिती राहणार आहे. छत्रपती संभाजी महाराज यांच्या पूर्णाकृती पुतळ्याचे चरणदर्शन व प्रसाद वाटप सकाळी साडेनऊपासून करण्यात येणार आहे.

यावेळी जे.के. जाधव, सुदाम सोनवणे, अभिजित देशमुख, प्रभाकर मते, सुरेश वाकडे, ज्ञानेश्वर बोरुडे, सतीश वेताळ, मनोज गायके, साहेबराव मुळे, राजगौरव वानखेडे, राजेंद्र जंजाळ, शिवाजी दांडगे, विजय औताडे, बाळासाहेब थोरात, किशोर बलांडे, उदयराज पवार, रमेश इधाटे, महेश माळवतकर, नितीन चित्ते, सीमाताई खरात, सिताराम सुरे यांची प्रमुख उपस्थिती राहणार आहे.

या कार्यक्रमासाठी समाजबांधवांनी व छत्रपती संभाजीराजे प्रेमींनी उपस्थित राहण्याचे आवाहन उत्सव समितीचे अध्यक्ष विलास उबाळे, कार्याध्यक्ष शिवाजी पळसकर, स्वागताध्यक्ष गणेश तुपे, सरचिटणीस संदीप जाधव, धृपद निकम, प्रदीप हारदे आदींनी केले आहे.

म. टा. प्रतिनिधी, औरंगाबाद

औरंगाबाद जिल्ह्यामध्ये राजकीय दबावापोटी प्रशासनाने भरमसाठ चारा छावण्यांना मंजुरी दिली असली तरी जिल्ह्यात केवळ नऊ छावण्या सुरू आहेत. शासनाने चार मे रोजी काढलेल्या शासन निर्णयात जाचक अटी असून या अटी शिथिल कराव्यात अन्यथा १६ मे पासून चारा छावण्या बंद करण्यात येणार असल्याचा इशारा चारा छावणी मालकांनी प्रशासनाला दिला आहे.

औरंगाबाद जिल्ह्यात सध्या प्रशासनाने २५ चारा छावण्यांना मंजुरी दिली असून त्यातील नऊ छावण्या सुरू आहेत. चारा छावण्यांबाबत शासनाने चार मे २०१९ रोजी आदेश काढला असून यामध्ये रेशन कार्ड प्रमाणे जनावरांची संख्या असणे, जनावरांना टॅग लावणे आदींचा समावेश असून जनावरांची नोंदणी कॅटल कॅम्पस मॅनेजमेंटद्वारे करावी, असे आदेशित केले आहे, परंतु या अटी अंमलात आणणे अशक्य असल्याने त्या त्वरीत शिथिल कराव्यात, अशी मागणी चारा छावणी चालकांनी केली आहे. ग्रामीण भागात मोबाइल नेटवर्कची गती अत्यंत कमी असल्यामुळे जनावरांची दैनंदिन नोंदणी कॅटल कॅम्पस मॅनेजमेंट सिस्टीमद्वारे करणे शक्य नसल्याचे चालकांचे म्हणणे आहे.

जनावरांना दिले जाणारे अनुदानही अत्यल्प असल्यामुळे या अनुदानात वाढ करण्यात यावी, अशी मागणीही करण्यात आली. जाचक अटी रद्द कराव्या अन्यथा १६ मे पासून चारा छावण्या बंद करण्यात येतील, असा इशारा चारा छावणी चालकांनी दिला. या संदर्भात चारा छावणी चालकांनी जिल्हाधिकाऱ्यांना निवेदन दिले आहे.

नऊ छावण्यात १० हजार जनावरे

औरंगाबाद जिल्ह्यात २५ ठिकाणी चारा छावण्यांना मंजुरी देण्यात आली असून यातील ९ छावण्या सुरू आहेत. सुरू असलेल्या छावण्यांमध्ये नऊ हजार ४८१ मोठी तर एख हजार ४२१ लहान अशी एकूण १० हजार ९०१ जनावरे छावणीमध्ये आहेत.

म. टा. प्रतिनिधी, औरंगाबाद

जुन्या भांडणावरुन चुलत बहिणीच्या हळदीच्या कार्यक्रमात खून केल्याप्रकरणात आरोपी सचिन दशरथ शेळके याला रविवारी (१२ मे) सकाळी अटक करुन न्यायालयात हजर करण्यात आले असता, आरोपीला गुरुवारपर्यंत (१६ मे) पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. एस. दहातोंडे यांनी दिले.

या प्रकरणी मृत आकाश मारोती शेळके (२४, रा. संजयनगर, मुकुंदवाडी) याचे वडील मारोती शंकर शेळके (४५, रा. संजयनगर) यांनी फिर्याद दिली होती. फिर्यादीनुसार, मृत आकाश याची चुलत बहीण ऋतुजा हिच्या हळदीचा कार्यक्रम होता. त्यामुळे फिर्यादीसह सर्व शेळके कुटुंबीय शुक्रवारी (१० मे) चिकलठाणा येथील ऋषिकेशनगर येथे कार्यक्रमासाठी गेले होते. त्यावेळी कार्यक्रमात नाचताना आकाश याचा आरोपी चुलत भाऊ सचिन दशरथ शेळके (१९, रा. संजयनगर) याने जुन्या भांडणावरुन आकाश याच्या छातीत चाकू भोसकला. त्यामुळे आकाश खाली कोसळला आणि आरोपी सचिन तात्काळ पळून गेला. प्रकरणात फिर्यादीच्या तक्रारीवरुन शनिवारी एमआयडीसी सिडको पोलिस ठाण्यात गुन्हा दाखल होऊन आरोपी सचिन याला नवी मुंबई येथून ताब्यात घेऊन रविवारी सकाळी अटक करण्यात आली. आरोपीला न्यायालयात हजर करण्यात आले असता, खुनामागचा नेमका उद्देश काय, गुन्ह्यात आरोपीला आणखी कुणी मदत केली आहे का, आरोपीने गुन्ह्यात वापरलेला चाकू कुठून आणला आदी बाबींचा सखोल तपास करणे बाकी आहे. त्याचवेळी आरोपीचे कपडे जप्त करणे, आरोपीच्या मोबाईल लोकेशनवरुन माहिती घेणे, जुन्या भांडणावरुन मुकुंदवाडी पोलिस ठाण्यात काही तक्रार दाखल आहे किंवा नाही याचीही माहिती घेणे आणि जप्त करण्यात आलेली रक्त मिश्रीत माती, साधी माती, चाकू, कपडे यांची तपासणीदेखील करावयाची आहे. त्यामुळे आरोपीला सात दिवसांची पोलिस कोठडी देण्यात यावी, अशी विनंती सहाय्यक सरकारी वकील एस. डी. वर्पे यांनी कोर्टात केली. ही विनंती मान्य करुन न्यायालयाने आरोपीला गुरुवारपर्यंत पोलिस कोठडी सुनावली.

म. टा. प्रतिनिधी, औरंगाबाद

मेहेरनगरमधील मुक्तानंद सहकारी गृहनिर्माण संस्थेने महापालिकेला दिलेल्या मोकळा भूखंडावरील भिंत व व्यासपीठाच्या मालमत्तेची तोडफोड करुन साहित्य चोरुन नेल्याप्रकरणात अटक आरोपी उमेश भगवान पवार याच्या पोलिस कोठडीत सोमवारपर्यंत (१३ मे) वाढ करण्याचे आदेश प्रथम वर्ग न्यायदंडाधिकारी एस. एस. दहातोंडे यांनी रविवारी दिले.

गारखेडा परिसरातील मेहेरनगरमध्ये मुक्तानंद सहकारी गृहनिर्माण सोसायटीअंतर्गत असलेली मोकळी जागा सोसायटीने हक्कसोड प्रमाणपत्राद्वारे महापालिकेला हस्तांतरीत केली आहे. त्यानुसार पालिकेने त्या ठिकाणी बांधकाम सुरू केले. मात्र काही अतिक्रमणधारकांनी ६० ते ७० नागरिकांच्या सहकार्याने २७ एप्रिल रोजी रात्री पालिकेने बांधलेल्या व्यासपीठावरील पत्रे काढून टाकली व उद्यानाचा लावलेला फलक उखडून फेकला. तसेच अतिक्रमणधारकांनी सोसायटीतील नागरिकांना शिविगाळ करत व्यासपीठाचे लोखंडी अँगल चोरून नेले. या प्रकरणी महापालिकेच्या अतिक्रमण विभागाचे पदनिर्देशीत अधिकारी प्रभाकर पाठक, वामन कांबळे यांनी दिलेल्या तक्रारीवरुन पुंडलिकनगर पोलिस ठाण्यात गुन्हा दाखल होऊन आरोपी उमेश भगवान पवार (२४, रा. विजयनगर, गारखेडा परिसर) याला शनिवारी (११ मे) सकाळी अटक करण्यात आली होती. त्याला न्यायालयाने रविवारपर्यंत पोलिस कोठडी सुनावली होती. पोलिस कोठडीची मुदत संपल्याने आरोपीला रविवारी न्यायालयात हजर करण्यात आले असता, गुन्ह्यावेळी आरोपीसोबत अनेकजण होते, त्यांचा अटक करणे बाकी आहे. तसेच अटक आरोपींपैकी एका आरोपीकडून चोरी केलेल्या मुद्देमालापैकी ७ हजारांचा ऐवज जप्त केला असून, उर्वरित ऐवज हस्तगत करणे बाकी असल्याने आरोपीला पोलिस कोठडी देण्याची विनंती सहाय्यक सरकारी वकील एस. डी. वर्पे यांनी न्यायालयात केली. ही विनंती मान्य करुन न्यायालयाने आरोपीला सोमवारपर्यंत पोलिस कोठडी सुनावली.

म. टा. प्रतिनिधी, औरंगाबाद

शाळेतील लिपिकाने अॅडमिशनच्या फीमध्ये परस्पर अपहार करीत सहा लाख ५२ हजार रुपयांची फसवणूक केली. विशालनगर येथील शाळेत ऑगस्ट २०१५ ते मार्च २०१९ या कालावधीत हा प्रकार घडला. याप्रकरणी संशयित आरोपीविरुद्ध पुंडलिकनगर पोलिस ठाण्यात गुन्हा दाखल करण्यात आला आहे.

या प्रकरणी ३८ वर्षाच्या महीलेने तक्रार दाखल केली आहे. न्यू विशालनगर येथील वंडर गार्टन मराठी प्राथमिक शाळेत विजय परभतराव नलावडे (रा. बाजार सावंगी, ता. फुलंब्री) हा लिपिक म्हणून कार्यरत होता. १८ ऑगस्ट २०१५ ते ११ मार्च २०१९ या कालावधीत त्याने हा घोटाळा केला. विद्यार्थ्यांच्या अॅडमिशन फी घेऊन त्याची नोंद त्याने प्राथमिक रजिस्टरला केली, मात्र मुख्य रजिस्टरमध्ये या रक्कमेची नोंद न करता फेरफार केला. एकूण सहा लाख ५२ हजार ७०० रुपयाची ही रक्कम आहे. नुकताच हा प्रकार शाळेच्या लक्षात आला. या प्रकरणी महिलेच्या तक्रारीवरून संशयित आरोपी विजय नलावडे विरुद्ध पोलिस ठाण्यात फसवणूक, अपहार केल्याप्रकरणी गुन्हा दाखल करण्यात आला आहे. पुढील तपास जमादार फरताळे करीत आहेत.

म. टा. प्रतिनिधी, औरंगाबाद

इमारतीचे बांधकाम करताना पालकावरून खाली पडून मजूर विजेच्या तारेवर कोसळल्याने गंभीर जखमी झाला. रविवारी दुपारी टिळकपथवरील श्रीमान श्रीमती या वस्त्रदालनाबाहेर हा प्रकार घडला. या जखमी मजुराला खासगी हॉस्पिटलमध्ये उपचारासाठी दाखल करण्यात आले असून याची उशिरापर्यंत क्रांतीचौक पोलिस ठाण्यात नोंद नव्हती.

टिळकपथवरील या इमारतीचे डागडुजीचे काम सध्या सुरू आहे. या बांधकामासाठी विजेच्या पोलजवळ लाकडाचे पालक उभारण्यात आले आहेत. पंडित (रा. राहुलनगर, पूर्ण नाव समजू शकले नाही.) हा तिसऱ्या मजल्यावर काम करीत असताना खाली कोसळला. पंडित वीज पुरवठा करणाऱ्या हायटेंशन तारेवरच कोसळल्याने गंभीररित्या भाजला. खाली पडल्यानंतर त्याला तातडीने हॉस्पिटलमध्ये हलविण्यात आले. यावेळी शॉर्टसर्किट होऊन किरकोळ आग लागली. अग्निशमन दलाच्या जवानांनी ही आग आटोक्यात आणली. भर दुपारी गर्दीच्या वेळी हा प्रकार घडल्यामुळे बघ्यांनी या ठिकाणी गर्दी केली होती. या घटनेसंदर्भात माहिती देण्याबाबत यावेळी उपस्थितांकडून टाळाटाळ करण्यात आली.

म. टा. प्रतिनिधी, औरंगाबाद

सातव्या वेतन आयोगात वरिष्ठ महाविद्यालयातील प्राध्यापकांच्या त्रुटी शुद्धीपत्रक काढूनही राज्य सरकारने कायम ठेवल्या आहेत. त्यामुळे राज्यभरातील प्राध्यापकांवर अन्याय झाला असून, असंतोष वाढला आहे. या त्रुटी दूर करण्याची मागणी वेतनवाढ महाराष्ट्र राज्य कृती समितीने केली आहे. याबाबत लोकप्रतिनिधींना निवेदन देण्यात आले.

सातवा वेतन आयोग लागू करताना राज्य सरकारने वरिष्ठ महाविद्यालयातील प्राध्यापकांच्या त्रुटी कायम ठेवल्या आहेत. या त्रुटी दूर करण्याची मागणी वेतनवाढ महाराष्ट्र राज्य कृती समितीने केली आहे. याबाबत समितीने आमदार सतीश चव्हाण व आमदार विक्रम काळे यांना निवेदन दिले. विधान मंडळ अधिवेशनात लक्षवेधी मांडून हा प्रश्न सोडवण्याचा प्रयत्न करू असे चव्हाण आणि काळे यांनी सांगितले. सातव्या वेतन आयोगात एम.फिल. व पीएच.डी. वेतनवाढी व कॅससंबंधी अन्यायकारी नियम आहेत. त्यामुळे प्राध्यापकांवर अन्याय होत असल्याचे समितीने निदर्शनास आणून दिले. यावेळी डॉ. राम चव्हाण, डॉ. राजेश करपे, डॉ. फुलचंद सलामपुरे, डॉ. महेश रोटे, डॉ. संतोष काकडे, डॉ. युलीसिस भालेराव, डॉ. विकास चौधरी, प्रा. बंडू सोमवंशी आदी उपस्थित होते. या मागण्यांबाबत सोमवारी उच्च शिक्षण विभागाच्या सहसंचालकांना निवेदन देण्यात येणार आहे.

म. टा. प्रतिनिधी, औरंगाबाद

शहरातील पाणी पुरवठ्यात नियमितता आणण्यात प्रशासनाला यश आले नाही. त्याचवेळी आपत्कालीन पंपही पूर्ण क्षमतेने चालत नसल्याने पाणी उपस्यावर परिणाम झाला. मृतसाठ्यातून उपसा सुरू असल्याने पंपामध्ये गवत अडकल्याने पंप दोन-दोन तास ठप्प पडतो आहे. त्याचा फटका पाणी पुरवठ्याला बसला आहे.

धरणातील पाणी पातळी कमी झाल्यामुळे आता मृत जलसाठ्यातून पाणी उपसा करावा लागत आहे. त्यासाठी आपत्कालीन पंप बसविण्यात आले आहेत. त्यामुळे आधीच उपसा कमी झाला आहे. त्यात आपत्कालीन पंपामध्ये गवत अडकत असल्याने वारंवार पंप बंद पडत आहे. सध्या भीषण पाणी टंचाईचा सामना शहराला करावा लागतो आहे. त्यात अनेक भागात पाण्याचे वेळापत्रक कोलमडले. सहा दिवसांआड पाणी पुरवठा होतो आहे. पाणी टंचाईत नियोजन ही कारणीभूत असल्याने प्रशासनाने आठ दिवसांचा कालावधी मागितला होता. चार दिवसानंतर प्रशासकीय बदल्यांपलीकडे ठोस उपाययोजना अद्याप दिसून आल्या नाहीत. त्यात आता तांत्रिक अडचणीही वाढल्या आहेत. मृत जलसाठ्यातून पाणी उपसा करण्यासाठी पालिकेने कॅनॉलजवळ पंपगृह उभारले. तसेच कॅनॉलमध्ये बंधारा बांधून पाणी पातळी स्थिर ठेवली आहे. पंपामध्ये गवत, काडी, केरकचरा अडकल्यास तो काढण्यासाठी पानबुड्या तैनात करण्यात आल्या आहेत. पाणी पुरवठ्यात गाळातून आलेले गवत, केच-कचरा अडकत आहे. त्यामुळे वारंवार पंप साफ करण्यासाठी कसरत करावी लागत असल्याचे सूत्रांनी सांगितले. त्यामुळेही पाणी पुरवठा बंद करावा लागतो. ज्याचा परिणाम पाणी पुरवठ्यावर होतो आहे.

तूट वाढणार…

शहराला दररोज २४० दशलक्ष लिटर (एमएलडी) पाणी लागते. सध्या जायकवाडीतून १४५ ते १५५ एमएलडीच पाणी पुरवठा होत असल्याचे अधिकारी सांगत आहेत. त्यात आधीच तूट आहे. त्यात गळतीमुळे प्रत्यक्षात जलकुंभांपर्यंत १३५ एमएलडी पर्यंत पाणी येते. आता पंप हाऊसमधील तांत्रिक अडचणीमुळे यात येत्या काही दिवसांत आणखी तूट होईल, असे सांगण्यात येत आहे. त्यामुळे शहरातील पाणी टंचाईची तीव्रता अधिक वाढण्याची शक्यता आहे.

म. टा. प्रतिनिधी, औरंगाबाद

तंत्रनिकेतनच्या (पॉलिटेक्निक) विद्यार्थ्यांना अभ्यासक्रम पूर्ण करत असताना थेट कंपनीत काम करण्याची संधी मिळणार आहे. द्वितीय वर्षाच्या विद्यार्थ्यांना ही संधी असून, त्याची अंमलबजावणी येत्या १५ मेपासून राज्यभरात होत आहे. औरंगाबाद जिल्ह्यात एक हजार ६९८ विद्यार्थ्यांना २४४ कंपनीत थेट काम करण्याचा प्रत्यक्ष अनुभव घेता येणार आहे.

पॉलिटेक्निक अभ्यासक्रमाला लागलेली उतरती कळा लक्षात घेऊन अखिल भारतीय तंत्रशिक्षण मंडळाने उद्योग क्षेत्राशी निगडित व अधिकाधिक प्रात्यक्षिकांवर आधारित अभ्यासक्रम तयार केला. द्वितीय वर्ष संपल्यानंतर प्रत्येक विद्यार्थ्याला कंपनीत सहा आठवड्यांचे प्रशिक्षण उपलब्ध करून देण्यात आले आहे. त्याची अंमलबजावणी यावर्षीपासून होते आहे. परीक्षा संपल्यानंतर १५ मेपासून विद्यार्थ्यांना स्थानिक पातळीवर, जिल्हास्तरावर उद्योगांमध्ये संबंधित शाखेची सुसंगत असे ज्ञान आत्मसात करून घेता येणार आहे. त्यासाठी उद्योग व कॉलेजस्तरावर जिल्हास्तरावर एक समन्वयक निश्चित करण्यात आला आहे. प्रत्येक विद्यार्थ्याला हे प्रशिक्षण बंधनकारक करण्यात आले आहे. राज्यात एकाच वेळी बुधवारपासून प्रक्रियेला सुरुवात होत आहे. मराठवाड्यात मराठवाडा असोसिएशन फॉर स्मॉल स्केल इंडस्ट्री अँड अॅग्रिकल्चर (मसिआ) समन्वयक असणार आहे. अभ्यासक्रमातील या इंडस्ट्री टेनिंग प्रोग्राममुळे विद्यार्थ्यांमध्ये उद्योगांना आवश्यक ते कौशल्य विकसित होण्यासाठी किंवा स्वत:चा उद्योग सुरू करण्यासाठी त्याचा फायदा होईल असे तज्ज्ञांना वाटते आहे.

\Bसहा आठवड्यांचे प्रशिक्षण\B

पॉलिटेक्निकच्या कम्प्युटर इंजिनीअरिंग, इलेक्ट्रिकल, इलेक्ट्रॉनिक्स अँड टेलिकम्युनिकेशन, मेकॅनिकल अशा विविध शाखांच्या विद्यार्थ्यांनुसार त्या-त्या उद्योगांची निवड करण्यात आलेली आहे. प्रशिक्षणाचा कालावधी १५ मे ते २५ जूनदरम्यान असणार आहे. यामध्ये विद्यार्थ्यांना उद्योगक्षेत्राची ओळख होणार असून, त्या ठिकाणचे काम करण्याच्या पद्धती, सॉफ्ट स्किल्स, अहवाल लेखन, प्रेझेंटेशन कसे द्यावे अशा विविध विषयांचे थेट ज्ञान संपादन करता येणार आहे. त्यांना प्रत्यक्ष कामाचा अनुभव मिळेल. त्यासह प्रत्येक कंपनीत प्रशिक्षणासाठी कंपनीचा एक समन्वयक व कॉलेजचा एक प्रतिनिधी असणार आहे. यशस्वी प्रशिक्षण विद्यार्थ्यांना दीडशे गुणांसह सहा क्रेडिट मिळणार आहेत.

शहरातील कॉलेज….......................विद्यार्थी संख्या

सीएसएमएसएस……...........................२७८

एमजीएम………………....................................३६३

एमआयटी, औरंगाबाद...................१९६

श्रीयश.......................................११३

इन्स्टिट्यूट ऑफ पॉलिटेक्निक कन्नड.. ८८

पीईएस........................................७६

श्रीसाई........................................१४७

एमआयटी, रोटेगाव........................१६२

एसबीएनएम.................................११९

शरदचंद्र पवार पॉलिटेक्निक..............५१

नाथ पॉलिटेक्निक...........................१०५

...

विद्यार्थ्यांना अशा प्रकारे थेट कंपनीत काम करण्याची संधी प्रथमच मिळते आहे. याचा निश्चित फायदा विद्यार्थ्यांना होणार आहे. मराठवाड्यासारख्या विभागातही त्याची तयारी पूर्ण झाली आहे. एक हजार ७०० विद्यार्थ्यांचे नियोजन शहरात केले आहे.

- डॉ. गणेश डोंगरे, प्राचार्य, सीएसएमएसएस पॉलिटेक्निक कॉलेज.

म. टा. प्रतिनिधी, औरंगाबाद

शहरात विविध दोन घटनेत दोघांनी गळफास घेत आत्महत्या केली. यामध्ये फायनान्स कंपनीत काम करणाऱ्या तरुणासह ट्रकचालकाचा समावेश आहे. हडको आणि जवाहरनगर भागात हे प्रकार घडले असून आत्महत्येचे कारण समजू शकले नाही. या प्रकरणी सबंधित पोलिस ठाण्यात अकस्मात मृत्यूची नोंद करण्यात आली आहे.

हडको एन ९, श्रीकृष्णनगर भागात विजय सुनील चव्हाण (वय २८) या तरुणाने गळफास घेत आत्महत्या केली. चव्हाण हा एका खाजगी फायनान्स कंपनीमध्ये कामाला होता. नुकतेच त्याच्या लग्नाला एक वर्ष पूर्ण झाले होते. शनिवारी रात्री चव्हाणने खोलीमध्ये छताच्या अँगलला दोरीने गळफास घेत आत्महत्या केली. चव्हाणच्या आत्महत्येचे कारण समजू शकले नसून या प्रकरणी सिडको पोलिस ठाण्यात अकस्मात मृत्युची नोंद करण्यात आली आहे. या प्रकरणी जमादार रमेश जाधव तपास करीत आहेत.

दुसरी आत्महत्येची घटना भानुदासनगर, जवाहरनगर भागात घडली. येथील एकनाथ गोविंदराव राऊत (वय ४५) यांनी शनिवारी रात्री अकरा वाजता पंख्याला साडीच्या मदतीने गळफास घेतला. राऊत यांनी सिल्लोड तालुक्यातील शिवना येथे शेती आहे. या शेतीवर त्यांनी ट्रक फायनान्सवर घेतला होता. मात्र, काही हप्ते थकल्यामुळे फायनान्स कंपनीच्या कर्मचाऱ्यांनी त्यांच्या शेतावर जाऊन चौकशी केली. या घटनेनंतर ते नैराष्यात होते. राऊत यांच्या आत्महत्येप्रकरणी जवाहरनगर पोलिस ठाण्यात अकस्मात मृत्यूची नोंद करण्यात आली असून जमादार सुदाम दाभाडे तपास करीत आहेत.

म. टा. प्रतिनिधी, औरंगाबाद

वेगवेगळ्या कारणांमुळे इराकमध्ये नेत्रदान होत नाही आणि नेत्रदान होत नसल्यामुळेच नेत्ररोपण शस्त्रक्रिया करण्यासाठी इराकमध्ये डॉक्टरदेखील उपलब्ध नाहीत. ही मोठी अडचण असल्याने इराकमध्ये नेत्ररोपण शस्त्रक्रियेअभावी रुग्णांचे हाल होतात. ही अडचण लक्षात घेऊन आणि मानवतेच्या दृष्टिकोनातून शहरातील नेत्ररोगतज्ज्ञ डॉ. रोहित बंग हे दोन वर्षांपासून बगदादमध्ये नेत्ररोपण शस्त्रक्रिया करण्यासाठी जात आहेत. भारत व इराक या दोन देशांतील आरोग्य मंत्रालयाअंतर्गत चालणाऱ्या उपक्रमामध्ये डॉ. बंग यांनी आतापर्यंत ८३६ नेत्ररोपण शस्त्रक्रिया केल्या आहेत आणि त्याही कुठल्याही मोबदल्याशिवाय, हे विशेष.

अस्थिर असलेल्या इराकमध्ये अनेक प्रश्न आहे आणि त्याचाच फटका म्हणून इराकमधील वैद्यकीय सेवा-सुविधांवरही खूप मोठा प्रतिकुल परिणाम झाला आहे. त्यामुळेच इराकमध्ये अत्याधुनिक वैद्यकीय सेवांचा प्रकर्षाने अभाव दिसून येतो आणि याच कारणामु‌ळे दरवर्षी अनेक इराकी नागरिक हृदयरोगांवरील उपचारांपासून ते निरनिराळ्या उपचार-शस्त्रक्रियांसाठी भारतामध्ये येतात. एवढेच नव्हे तर शहरातील एमजीएम वैद्यकीय महाविद्यालय व रुग्णालयासह इतर रुग्णालयांमध्येही अनेक इराकी नागरिक उपचारासाठी हमखास येतात. मात्र केवळ डोळ्यांच्या उपचारांसाठी आणि विशेषत: नेत्ररोपणासाठी (कॉर्निया ट्रान्स्प्लान्ट) शहरात येणाऱ्यांची संख्या अत्यंत कमी; किंबहुना नगण्य अशीच आहे. ही परिस्थिती लक्षात घेऊन इराक व भारताच्या आरोग्य मंत्रालयामार्फत आणि चेन्नईच्या शंकर नेत्रालयाच्या माध्यमातून डॉ. बंग यांना नेत्ररोपणाच्या सेवेची संधी चालून आली. अर्थातच, या संधीचे त्यांनी सोने केले आणि दोन वर्षांत त्यांनी बगदादच्या अल-हैथम नेत्र रुग्णालयामध्ये तब्बल ८३६ नेत्ररोपणाच्या सेवा दिल्या. यातील बहुतांश नेत्ररोपणाच्या शस्त्रक्रिया या इराकी नागरिकांवर झाल्या, तर काही शस्त्रक्रिया लगतच्या देशातील नागरिकांवरही झाल्या. या उपक्रमाअंतर्गत डॉ. बंग हे अधून-मधून जसे जमेल तसे आठवडाभरासाठी जातात आणि एका आठवड्यात सुमारे ४० ते ६० नेत्ररोपणाच्या शस्त्रक्रिया करतात. त्याशिवाय पूर्वी ज्यांच्यावर या शस्त्रक्रिया करण्यात आल्या आहेत, त्यांची तपासणी व फॉलोअपही त्या त्या आठवड्याच्या कालावधीमध्ये डॉ. बंग हे आवर्जून घेतात. त्यासोबत नवीन शस्त्रक्रिया नियोजित पद्धतीने केल्या जातात.

\Bश्रीलंका, नेपाळहून येतात कॉर्निया

\Bमुळात इराकमध्ये नेत्रदान होत नसल्यामुळेच श्रीलंका, नेपाळ, अमेरिका आदी देशांमधून बगदादच्या अल-हैथम रुग्णालयामध्ये कॉर्निया मागवले जातात. अर्थात, ९० टक्क्यांपेक्षा जास्त कॉर्निया हे श्रीलंकेहून येतात आणि त्यानंतर नेपाळ व इतर देशांमधून येतात. याच कॉर्नियांचे रोपण महिला व पुरुष इराकी नागरिकांवर केले जाते. या नेत्ररोपणासाठी लागणी वैद्यकीय उपकरणे, यंत्र-सामुग्री ही रुग्णालयामध्ये उपलब्ध करण्यात आली आहे. एवढेच नव्हे, तर डॉ. बंग यांनी नेत्ररोपणाच्या शस्त्रक्रियेसाठी बगदादमधील काही डॉक्टरांना प्रशिक्षण दिले आहे, जेणेकरून शस्त्रक्रियेदरम्यान त्यांना इराकी डॉक्टरांची मदत होऊ शकेल.

इराकींना भारतीय डॉक्टरांविषयी आदर असून, आम्हाला सन्मानपूर्वक वागणूक दिली जाते. राजकीय अस्थिरतेचा कुठलाही त्रास होत नाही व त्यांना सेवा देण्याची संधी मिळाल्याबद्दल नक्कीच समाधान वाटते. या उपक्रमात जाण्या-येण्याचा-राहण्याचा खर्च इराककडून केला जातो. त्याशिवाय मी कुठलेही मानधन घेत नाही.

\Bडॉ. रोहित बंग\B, नेत्ररोगतज्ज्ञ

म. टा. प्रतिनिधी, औरंगाबाद

चिकलठाणा एमआयडीसी स्वच्छ, सुंदर आणि हरित करण्यासाठी सिडको एमआयडीसी पोलिसांनी पुढाकार घेतला आहे. हा उपक्रम राबवण्याच्या दृष्टीने लोकप्रतिनिधी, उद्योजक, महापालिका अधिकारी आणि छोट्या व्यापाऱ्यांची उपस्थिती होती. मांस विक्रेत्यांना या बैठकीत सूचना करण्यात आल्या असून त्यांच्या अडचणी जाणून घेण्यात आल्या.

स्मार्ट सिटी प्रोजेक्टअंतर्गत शहराची निवड करण्यात आली आहे. मात्र, चिकलठाणा एमआयडीसी गेल्या अनेक वर्षांपासून बकाल झाली आहे. हे लक्षात घेता सिडको एमआयडीसी पोलिस ठाण्याचे निरीक्षक सुरेंद्र माळाळे यांनी स्वच्छता, वृक्षारोपण आणि संगोपन याबाबत विशेष उपक्रम राबवण्याचे निश्चित केले. या अनुषंगाने पोलिस ठाण्यात एका बैठकीचे आयोजन करण्यात आले. या भागात चिकन, मटण आणि मासे विक्री करणारी दुकाने मोठ्या प्रमाणावर आहेत. ही मंडळी त्यांच्या दुकानातील मासांचे उर्वरित टाकाऊ अवशेष मोकळ्या किंवा ओसाड मैदानात फेकून देतात. याचा नागरिकांना जास्त त्रास होतो. हे लक्षात घेऊन या मांस विक्रेत्यांना देखील बैठकीसाठी बोलावण्यात आले होते. यावेळी एमआयडीसी स्वच्छ आणि हरित ठेवण्यासाठी विविध सूचना उपस्थितांनी मांडल्या. या बैठकीला नगरसेवक राजू शिंदे, मनोज गांगवे, उद्योजक मानसिंग पवार, प्रशांत देशपांडे, महापालिकेचे वॉर्ड अधिकारी के. एस. ज्ञाते, सफाई निरीक्षक तसेच इतर कर्मचाऱ्यांसह मांस विक्रेते मल्कीम कुरेशी, रिजवान कुरेशी, मुस्तफा शेख युनूस साजीद अहेमद कुरेशी आदींची उपस्थिती होती. पोलिस निरीक्षक सुरेंद्र माळाळे, जमादार अशोक जाधव, पुंडलिक मानकापे यांनी या बैठकीचे आयेाजन केले.

…

स्वच्छ आणि सुंदर एमआयडीसी ठेवणे ही आपल्या सर्वांची जबाबदारी आहे. या हेतूने स्वच्छता आणि वृक्षारोपण तसेच संगोपनाचा उपक्रम राबवण्याचे या बैठकीत निश्चित करण्यात आले. तसेच स्वच्छतेला बाधा पोहचविणाऱ्या मांस विक्रेत्यांच्या देखील अडचणी जाणून घेण्यात आल्या असून त्यांना सूचना करण्यात आल्या आहेत.

-सुरेंद्र माळाळे, पोलिस निरीक्षक, सिडको एमआयडीसी

म. टा. प्रतिनिधी, औरंगाबाद

महापालिकेने महावितरणच्या विविध सुविधांवर लावलेल्या करातून थकीत बिलाचे पैसे चुकते होतील. शिवाय महावितरणलाच पालिकेकडे अतिरिक्त रक्कम भरावी लागेल, असा दावा मंगळवारी झालेल्या जिल्हा विद्युतीकरण समितीच्या बैठकीत महापौर नंदकुमार घोडेले यांनी केला.

खासदार चंद्रकांत खैरे यांच्या अध्यक्षतेखाली झालेल्या बैठकीला महापौर नंदकुमार घोडेले, जिल्हा परिषद अध्यक्ष देवयानी डोणगावकर, माजी जिल्हा परिषद अध्यक्ष डॉ. अण्णासाहेब शिंदे, मुख्य अभियंता सुरेश गणेशकर, अप्पर जिल्हाधिकारी पी. एन. सोरमारे उपस्थित होते. बैठकीत खासदार खैरे यांनी पालिकेकडे थकलेल्या वीज बिलाचा मुद्दा मांडला. यावेळी महापौर म्हणाले, 'महापालिकेने महावितरणाच्या विविध सुविधांवर कर लावला आहे. अनेक सुविधांवर कर लावायचा आहे.त्यामुळे थकबाकी, खड्डयांपोटी परत करायचे पैसे पालिकेला परत करण्याची गरज पडणार नाही. उलट पालिकेकडेच महावितरणला पैसे भरावे लागतील. या कराबाबत कायदेशीर कारवाईही केली जाईल,' असा इशाराही त्यांनी दिला. यावेळी वीज सेवा खासगीकरणाचा मुद्दा निघाला. याबाबत खैरे म्हणाले, 'ऊर्जामंत्र्यांसह वरिष्ठ अधिकाऱ्यांना पत्र लिहणार आहे. यापूर्वीचा वीज सेवा खासगीकरणाचा प्रयत्न फसला आहे. यामुळे ६०० कोटी रुपयांचा फटका कंपनीला बसला आहे. पुन्हा असे नुकसान करून घेऊ नका,' असा सल्ला देणार असल्याचे सांगितले. वीजेच्या पायाभूत सुविधांच्या विकासासाठी आगामी जिल्हा नियोजन समितीकडे पाच कोटींची मागणी करा, अशी सूचना खैरे यांनी केली. तर मुख्य अभियंता गणेशकर यांनी जालना जिल्हा नियोजन समितीत दहा कोटींची मागणी केल्याचे सांगितले. त्यानुसार दहा कोटींची मागणी करू, असे खैरे म्हणाले.

\Bवीज रिडिंग न घेता बिल

\Bवीजेमुळे शेतकऱ्यांच्या झालेल्या नुकसान भरपाईबाबत लवकरात लवकर निर्णय घ्या, अशी सूचना खासदार चंद्रकांत खैरे यांनी दिली. वीज रिडिंग न घेता वीज बिल दिल्यामुळे अनेक भुर्दंड सोसावा लागत असल्याची माहितीही समोर आली. अशा एजन्सी चालकांवर कारवाई केल्याची माहिती मुख्य अभियंता सुरेश गणेशकर यांनी दिली. सौर कृषिपंप महापालिकेच्या उद्यान विभागाला मिळेल का, असा प्रश्न यावेळी विचारण्यात आला. यावर गणेशकर यांनी ही योजना फक्त शेतकऱ्यांसाठी आहे, असे सांगितले.

……

म. टा. प्रतिनिधी, औरंगाबाद

जागतिक परिचारिका दिनानिमित्त स्नेहसावली केअर सेंटरमध्ये आयोजित कार्यक्रमात परिचारिकांविषयी मन:पूर्वक कृतज्ञता व्यक्त करण्यात आली. रुग्णसेवेमध्ये परिचारिकांची भूमिका ही अतिशय महत्वाची असते. रुग्णांची सुश्रूषा करतानाच त्यांचे व्यवसायाप्रती असणारे समर्पण हे नक्कीच वंदनीय आहे, अशा शब्दांत वैद्यकीय क्षेत्रातील मान्यवरांनी परिचारिकांविषयी कृतज्ञता व्यक्त केली.

आधुनिक सुश्रुषाशास्त्राच्या संस्थापिका व आद्य परिचारिका फ्लोरेन्स नाइटिंगल यांच्या स्मरणार्थ त्यांचा जन्मदिन जगभरात परिचारिका दिन म्हणून साजरा केला जातो. यानिमित्त स्नेहसावली केयर सेन्टरमध्ये कृतज्ञता समारंभ घेण्यात आला. तसेच उपस्थित परिचरिकांना गौरव प्रमाणपत्रेही देण्यात आली. या प्रसंगी उपायुक्त वर्षा ठाकूर, घाटीचे उपअधिष्ठाता डॉ. शिवाजी सुक्रे, ज्येष्ठ कान-नाक-घसातज्ज्ञ डॉ. अशोक रेगे यांची प्रमुख उपस्थिती होती. या वेळी ठाकूर यांनी परिचारिकांबद्दल आदर व्यक्त करीत त्यांच्या आई या स्वतः परिचारिका असल्याने या व्यवसायातील आव्हाने त्यांनी जवळून बघितल्याचे सांगितले. तर, परिचरिकांनी उत्कृष्ट कामाद्वारे व्यवसायातील उच्च जागी पोहचावे व एक आदर्श निर्माण करावा, असे आवाहन डॉ. सुक्रे यांनी केले. तसेच वैद्यकीय क्षेत्रातील विविध प्रकारचे तांत्रिक ज्ञान हे अनेकवेळा ज्येष्ठ परिचारिकांकडून मिळाल्याचे डॉ. रेगे यांनी नमूद केले. या कार्यक्रमाला कोल्हापूर सावलीचे संस्थापक किशोर देशपांडे उपस्थित होते. त्यांनी वैद्यकीय क्षेत्रात परिचारिकांचे महत्व, त्यांचे कार्य व योगदानाबद्दल माहिती देत सर्वांना शुभेच्छा दिल्या. डॉ. बालाजी असेगावकर यांनी उपस्थितांचे आभार मानले. कार्यक्रमासाठी डॉ. शिल्पा असेगावकर, डॉ. उज्ज्वला खाडे, डॉ. छाया दौडे, डॉ. रामदास खोडवे, डॉ. प्रमोद अपसिंगेकर, डॉ. अनुराधा अपसिंगेकर, माया नरवाडे, परिचारिका व स्नेहसावली कर्मचारी उपस्थित होते. या कार्यक्रमाचे सूत्रसंचालन डॉ. शिल्पा असेगावकर यांनी केले.

म. टा. प्रतिनिधी, औरंगाबाद

पादचाऱ्याचा मोबाइल हिसकाविणाऱ्या दुचाकीवरील दोघांपैकी एक आरोपी अहमद खान अजहर खान याला रविवारी (१२ मे) दुपारी अटक करुन न्यायालयात हजर करण्यात आले असता, आरोपीला मंगळवारपर्यंत (१४ मे) पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. एस. दहातोंडे यांनी दिले. दरम्यान, मोबाईल चोरल्यानंतर आरोपींची दुचाकी एका घराच्या ओट्याला धडकून दोघे जखमी झाले. त्यानंतर दोघांना उपचारासाठी घाटीत दाखल केले होते. पैकी आरोपी अहमद खान याची सुटी झाल्याने त्याला अटक करण्यात आली, तर दुसरा आरोपी रणजित गोठवाल याच्यावर उपचार सुरू आहेत.

या प्रकरणी बालाजी सुनील जाटवे (२६, रा. पद्मपुरा) यांनी फिर्याद दिली होती. फिर्यादीनुसार, फिर्यादी हा जीएसटी भवन येथे कंत्राटीतत्वावर कम करतो. तो शनिवारी (११ मे) रात्री साडेअकराला संत रविदास चौक येथून मोबाइलवर बोलत घरी जात होता. त्यावेळी पाठीमागून दुचाकीवर आलेल्या दोघा आरोपींनी त्यांचा मोबाइल हिसकावून पळ काढला. फिर्यादीने ही घटना मित्र अविनाश रिचवाल व हेमंत जिवनवाल यांना तात्काळ सांगितली. त्यानंतर तिघांनी आरोपी दुचाकीस्वारांचा पाठलाग करणे सुरू केले. पळ काढण्याच्या प्रयत्नात आरोपींची दुचाकी एका घराच्या ओट्याला धडकली व दोघे आरोपी खाली पडून जखमी झाले. फिर्यादीने मित्र व इतर नागरिकांच्या मदतीने आरोपींना पकडले व घटनेची माहिती पोलिसांना दिली. प्रकरणात वेदांतनगर पोलिस ठाण्यात गुन्हा दाखल करण्यात आला होता. उपचारानंतर आरोपी अहमद खान अजहर खान (१८, रा. पद्मपुरा) याला अटक करून न्यायालयात हजर केले असता, न्यायालयाने आरोपीला मंगळवारपर्यंत (१४ मे) पोलिस कोठडीत सुनावली. प्रकरणात सहाय्यक सरकारी वकील एस. डी. वर्पे यांनी काम पाहिले.

म. टा. प्रतिनिधी, औरंगाबाद

डॉक्टर मैत्रीणीने बोलणे बंद केल्यानंतर 'तुझ्यामुळे नापास झालो' असे म्हणत पैशाची मागणी करीत त्याने ब्लॅकमेल केले. एवढेच नाही तर फेसबुक तसेच इन्स्टाग्रामवर या मैत्रीणीच्या वडिलांविषयी अपमानास्पद पोस्ट अपलोड केली. या प्रकरणी बेगमपुरा पोलिस ठाण्यात गुन्हा दाखल करण्यात आला असून संशयित आरोपीला रविवारी बेगमपुरा पोलिसांनी अटक केली आहे.

या प्रकरणी २१ वर्षीय तरुणीने बेगमपुरा पोलिस ठाण्यात गुन्हा दाखल केला होता. ही तरुणी मूळची गंगापूर तालुक्यातील असून बेगमपुरा परिसरातील एका महाविद्यालयात वैद्यकीय शिक्षण घेत आहे. डिसेंबर २०१६ मध्ये या तरुणीची संशयित आरोपी ओमकार त्र्यंबक पवार (वय २१, रा. श्रीकृष्ण मंदिराजवळ, बीड) याच्यासोबत ओळख झाली होती. दरम्यान, काही कारणास्तव या तरुणीने ओमकारशी बोलणे बंद केले होते. काही महिन्यानंतर ओमकारने तिचा पाठलाग करीत त्रास देण्यास सुरुवात केली होती. दुसऱ्या मुलाशी बोलायचे नाही, मी जे म्हणेल तसे वागायचे नाहीतर तुझ्या वडिलांना सांगून बदनामी करण्याची धमकी ओमकार देत होता. या दरम्यान ओमकार प्रथम वर्षात नापास झाला. ऑक्टोबर १०१८ मध्ये त्याने या तरुणीला कॉलेजबाहेर अडवित तुझ्यामुळे नापास झालो आहे, मला कॉलेजची फी भरण्यासाठी पैसे हवे आहेत. तुझे फोटो व्हायरल करून बदनामी करेन, अशी धमकी त्याने पुन्हा दिली होती. तसेच ४ मे २०१९ रोजी या मुलीच्या वडिलांची त्याने फेसबुकवर बदनामी करणारा मजकूर पोस्ट करीत तिच्या वडिलांच्या मित्रांना टॅग केला होता. या प्रकरणी पीडित तरुणीने बेगमपुरा पोलिस ठाणे गाठून तक्रार दाखल केली होती. या प्रकरणी बेगमपुरा पोलिसांनी संशयित आरोपी ओमकार पवारला रविवारी बीड येथून अटक केली आहे.

…

इन्स्टाग्रामचे अकाऊंट केले हॅक

गेल्या आठ दिवसांपासून ही तरुणी गावाकडे गेली होती. यावेळी या तरुणीच्या बहिणीने तिला तुझ्या इन्स्टाग्राम अकाऊंटवरून मॅसेज आल्याची माहिती दिली. आरोपी ओमकारने या डॉक्टर तरुणीच्या इन्स्टाग्राम अकाऊंटचा आयडी तसेच पासवर्ड चोरून त्यावरून मेसेज केल्याचे यावेळी तिला समजले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाचे कुलगुरू डॉ. बी. ए. चोपडे यांचा कार्यकाळ चार जून रोजी संपणार आहे. नवीन कुलगुरू रुजू होण्यापूर्वी स्थायी कुलसचिव, परीक्षा संचालक आणि अधिष्ठाता यांची नियुक्ती करण्याची मागणी आहे. विद्यापीठात प्रभारी अधिकाऱ्यांनी कामकाजात दिरंगाई केल्याचा आरोप करीत संघटनांनी राज्यपाल कार्यालयाकडे निवेदन पाठवले आहे.

विद्यापीठात प्रभारी अधिकारी असल्यामुळे दैनंदिन कामकाजात अडचणी आल्याचा विद्यार्थी व कर्मचाऱ्यांचा अनुभव आहे. प्रभारी कुलसचिवपदावर डॉ. साधना पांडे मागील एक वर्षांपासून कार्यरत आहेत. विद्यापीठ कायद्यानुसार प्रभारी अधिकारी कमाल सहा महिने कार्यरत राहू शकतो. त्यानंतर दुसऱ्या अधिकाऱ्याकडे कार्यभार सोपवणे बंधनकारक आहे मात्र, पांडे कायम राहिल्यामुळे शैक्षणिक संघटनांनी राज्यपाल कार्यालयाकडे तक्रार केली आहे. कोणत्या नियमानुसार पांडे यांची नियुक्ती वैध ठरते असा प्रश्न करीत त्यांना पदमुक्त करण्याची मागणी आहे. कुलगुरूंच्या मर्जीने परीक्षा संचालक बदलण्याची खेळी अद्याप सुरू आहे. सध्या डॉ. जी. आर. मंझा यांच्याकडे परीक्षा संचालकाचा पदभार आहे. चोपडे यांच्या पाच वर्षांच्या कार्यकाळात अशोक चव्हाण यांच्यानंतर तब्बल अकरा प्रभारी संचालक नेमण्यात आले. डॉ. सुरेश गायकवाड, डॉ. प्रल्हाद लुलेकर, डॉ. वाल्मीक सरवदे, डॉ. राजेश रगडे, डॉ. सतीश दांडगे, डॉ. दिगंबर नेटके, डॉ. साधना पांडे, डॉ. जयश्री सूर्यवंशी यांनी प्रभारी संचालकपद सांभाळले. नेटके यांनी तीन वेळेस पद सांभाळले होते. परीक्षा आणि निकालाचा सावळागोंधळ होऊनही स्थायी संचालकांची नियुक्ती करण्यात आली नाही. प्रभारी अधिष्ठातांचा कारभारही नेहमीच वादात सापडला आहे. पीएच. डी. याद्या जाहीर करण्यात नियमबाह्य काम केल्याचा काही अधिष्ठातांवर आरोप आहे. जबाबदारी निश्चित होत नसल्यामुळे प्रभारी अधिकारी किती दिवस राहणार असा सवाल विद्यार्थ्यांनी केला आहे. कुलगुरू डॉ. बी. ए. चोपडे यांनी कार्यकाळ प्रभारी अधिकाऱ्यांच्या जोरावर निभावला. येत्या चार जून रोजी चोपडे यांचा कार्यकाळ पूर्ण होणार आहे. नवीन कुलगुरूंसोबतच नवीन कुलसचिव, परीक्षा संचालक आणि अधिष्ठाता नियुक्त करण्याची मागणी वाढली आहे. त्यामुळे राज्यपाल कार्यालयाच्या निर्देशानुसार नियुक्त्या तात्काळ होण्याची शक्यता आहे, असे वरिष्ठ अधिकाऱ्याने सांगितले.

\Bमुलाखतींना लावला ब्रेक\B

कार्यकाळाच्या शेवटच्या टप्प्यात कुलसचिव आणि परीक्षा संचालकांची नियुक्ती करण्याचा कुलगुरू चोपडे यांचा प्रयत्न होता. त्यानुसार अर्ज प्रक्रिया पूर्ण होऊन मुलाखतीचे वेळापत्रत जाहीर करण्यात येणार होते मात्र, व्यवस्थापन परिषद सदस्य किशोर शितोळे यांनी आक्षेप घेत राज्यपाल कार्यालयाकडे तक्रार केली. नवीन कुलगुरूंनी आपली टीम नेमणे शिरस्त्यानुसार योग्य ठरेल. जुन्या कुलगुरूंनी केवळ दोन महिन्यांसाठी नव्या नियुक्त्या करणे योग्य नाही, असे शितोळे यांनी पत्रात म्हटले होते. त्यानंतर मुलाखती स्थगित करण्यात आल्या.

औरंगाबाद : शिवाई संस्थेतर्फे आयोजित छत्रपती संभाजी महाराज जयंतीनिमित्त मुकुंदवाडी येथे मंगळवारी (१४ मे) संध्याकाळी सहा वाजता अमोलदादा मिटकरी यांच्या व्याख्यानाचे, शाहीर अजिंक्य लिंगायत यांच्या पोवाड्याचा कार्यक्रमाचे आयोजन करण्यात आले आहे. मुकुंदवाडी बसस्टॉप येथे व्याख्यान व पोवाड्याच्या कार्यक्रम होईल.

मुकुंâदवाडी येथील शिवाई संस्थेचे संस्थापक अध्यक्ष शिवाजी जगताप यांच्या पुढाकारातून छत्रपती संभाजी महाराज यांच्या जयंतीनिमित्त विविध कार्यक्रमांचे आयोजन केले जाते. प्रतिवर्षीप्रमाणे याहीवर्षी १४ मे रोजी सायंकाळी सहा वाजता मुकुंâदवाडी बसस्टॉप येथे अमोलदादा मिटकरी यांचे व्याख्यान आयोजित करण्यात आले आहे. तत्पूर्वी शाहीर अजिंक्य लिंगायत यांच्या पोवाड्याचा कार्यक्रम होणार आहे. या कार्यक्रमाचा नागरिकांनी लाभ घ्यावा, असे आवाहन उत्सव समितीचे अध्यक्ष संतोष पाटील लाखे, कार्याध्यक्ष सुशील बकाल, किसनराव मोरे, कोषाध्यक्ष दीपक गांगुर्डे, अख्तर पटेल, सचिन पवार, स्वागताध्यक्ष तय्यब सय्यद, गणेश खंडागळे, उपाध्यक्ष प्रशांत भालेराव, शफिक शेख, शाकेर सय्यद, सीताराम मोरे, रंजित राऊत, हेमंत कर्डीले, पेâरोझ मिर्झा यांनी केले आहे.

म. टा. प्रतिनिधी, औरंगाबाद

अजिंठा चित्र, निसर्गचित्र, वारली चित्रांचा अस्सल आविष्कार घडवणारे 'हेरिटेज अँड नेचर आर्ट' प्रदर्शन रसिकांना सुखावणारे ठरले आहे. चार चित्रकारांच्या कलाकृती प्रदर्शनात मांडल्या आहेत. या कलाकृती लक्षवेधी रंगसंगतीने उठावदार ठरल्या आहेत.

वैविध्यपूर्ण विषयांचे दर्शन घडवणारे 'हेरिटेज अँड नेचर आर्ट' चित्र-शिल्प प्रदर्शन सुरू झाले आहे. महापौर नंदकुमार घोडेले यांनी रविवारी सकाळी मालती आर्ट गॅलरीत प्रदर्शनाचे उद्घाटन केले. यावेळी डॉ. विनायक पाटील व गॅलरीच्या संचालिका प्रा. विजया पातूरकर यांची प्रमुख उपस्थिती होती. चार महिला चित्रकारांनी रेखाटलेल्या चित्राकृतींचा प्रदर्शनात समावेश आहे. मोहिनी यन्नावार यांनी अजिंठ्याचे मनमोहक दर्शन चित्रातून घडवले. अजिंठा चित्रांची जगभर मोहिनी आहे. हाच अनुभव प्रदर्शनातूनही येतो. चित्रकार मनिषा कुलकर्णी यांनी पारंपरिक व मॉडर्न वारली कला चितारली आहे. चित्रांसाठी अॅक्रॅलिक रंगांचा उत्तम वापर करण्यात आला आहे. प्रा. विजया पातूरकर यांनी गुलाबपुष्प मालिकेतून गुलाबाच्या विविध छटा साकारल्या आहेत. ऋतुजा अष्टुरे यांनी लँडस्केप आणि प्राण्यांची चित्रे वास्तववादी शैलीत रेखाटली आहेत. रेखाटन आणि रंगसंगतीचा अचूक मेळ साधल्याने प्रदर्शन लक्षवेधी ठरले आहे.

चारचौघींच्या संकल्पनेतून साकारलेल्या प्रदर्शनातून स्वतंत्र अभिव्यक्तीची प्रचिती येते. 'कलाकृतींच्या निर्मितीत आशय आणि माध्यम यांचे स्थान महत्त्वाचे असते. कलावंताच्या मनात फक्त जीवनाशय निर्माण होऊन कलाकृती घडत नाही. चित्रकाराने चित्रकारांसाठी निर्माण केलेली कलाकृती म्हणून चित्र-शिल्प अस्तित्वात येत नाही. यात कलावंतांइतकेच रसिकांनाही महत्त्व आहे', असे प्रा. पातुरकर यांनी सांगितले. कला क्षेत्रातील नवीन बदल रसिकांना समजावणे आणि जागतिक दर्जाचा कलेचा वारसा जतन करण्याच्या उद्देशाने प्रदर्शन आयोजित करण्यात आले आहे. येत्या १७ मेपर्यंत प्रदर्शन खुले असून, रसिकांनी अवश्य भेट द्यावी, असे आवाहन संयोजकांनी केले आहे.

म. टा. प्रतिनिधी, औरंगाबाद

डॉ़. नानासाहेब धर्माधिकारी प्रतिष्ठानतर्फे शहरात रविवारी (१२ मे) महास्वच्छता अभियान राबविण्यात आले. शहरातील नागरिकांसह विविध शहरातून आलेल्या एकूण ३० हजार सेवार्थिंनी अभियानात सहभागी होत शहराच्या विविध भागांत साफसफाई केली. या मोहिते दोन हजार टनापेक्षा जास्त कचरा एकत्रित करण्यात आला.

स्वच्छता अभियानाचे उद्‌घाटन सकाळी क्रांती चौकात करण्यात आले. त्यापूर्वी शहरातील विविध प्रमुख ३३ प्रमुख रस्त्यावर सेवार्थी स्वच्छता मोहिमेसाठी सज्ज होते. अभियानात शहरातील ३३ प्रमुख मार्ग, तसेच अंतर्गत मार्गावर साफसफाईला सुरुवात करण्यात आली. या मोहिमेत एकूण १६५ किलोमीटर रस्त्यांची स्वच्छता करण्यात आली. टीव्ही सेंटर परिसरात छत्रपती संभाजी महाराज चौकापासून आझाद चौक, जकात नाका, हर्सूल टी पॉइंट ते जळगावर रोड, जालना रोड, गजानन महाराज चौक, गोदावरी जीवन प्राधिकरण ते सिडको बसस्थानक, आकाशवाणी, उच्च न्यायालय, वसंतराव नाईक कॉलेज, कैलासनगर स्मशानभूमी, तानाजीनगर, बालाजीनगर, चेतक घोडा चौक, जवाहर कॉलनी, गजानन महाराज मंदिर परिसर, पुंडलिकनगर, शहानूरमिया दर्गा चौक, शिवाजीनगर, सिटी चौक, उस्मानपुरा पोलिस स्टेशन परिसर, पोलिस अधीक्षक कार्यालय आदी भागात स्वच्छता मोहीम राबविण्यात आली. रस्त्याच्या दुर्तफा, दुभाजकांमध्ये वाढलेली झाडे-झुडपे, प्लास्टिक, केर-कचरा जमा करण्यात आला. हा कचरा शासकीय, खासगी वाहनातून डम्पिंग ग्राउंडपर्यंत पोचविण्यात येत होता. सेवार्थींना पिण्याच्या पाण्याची व्यवस्था करण्यात आली होती. समारोप सोहळा श्रीहरी पॅव्हेलीयन येथे पार पडला. यावेळी खासदार चंद्रकांत खैरे, आमदार अतुल सावे, महापौर नंदकुमार घोडेले यांच्यासह प्रतिष्ठानचे अॅड्. उमेष भोजने, अॅड्. सोपान शिंदे, नेताजी भोसले, अरुण कानडे, योगेश सोनवणे यांची प्रमुख उपस्थिती होती. यावेळी खासदार खैरे यांनी उपस्थितांना दंडवत घालत उपक्रमांचे कौतुक केले. आमदार सावे यांनी शहराच्या स्वच्छतेसाठी सहकार्य केल्याबद्दल इतर शहरातून आलेल्यांचे आभार मानतो, असे उद्गार काढले. महापौर घोडेले म्हणाले, उपक्रमातून प्रतिष्ठानची नियोजन, शिस्त पहायला मिळाली, त्यामुळे आमचीही जबाबदारी वाढल्याचे सांगितले. सोपान सुरे यांनी आभार मानले.

\Bमहापालिकेचा सहभाग\B

महापालिकेने या अभियानात आपला महत्त्वपूर्ण सहभाग नोंदविला. महापालिकेच्या स्वच्छता विभागाचे कर्मचारी, वाहनचालक अभियानात सहभागी झाले. साफसफाईत मदत करत, कचरा उचलून वाहनात टाकून दिलेल्या ठिकाणी वेळेत वाहन घेऊन हजर राहत होते. छोट्या घंटागाडीतून जमा होणारा कचरा एका ठिकाणी मोठ्या ट्रकमध्ये टाकून परत या घंटागाड्या साफसफाईच्या ठिकाणी पोहचत होत्या. ४०० पेक्षा अधिक घंटागाड्या, ट्रक वाहनांद्वारे कचरा वाहतूक करण्यात आली.

\Bइतर शहरातील सेवार्थी मुक्कामी \B

मोहिमेत विविध जिल्ह्यातील जवळपास ३० हजारपेक्षा अधिक सेवार्थी सहभागी झाले. यामध्ये जळगाव, सोळापूर, धुळे, नंदुरबार, बुलडाणा, अहमदनगर, भुसावळ, उस्मानाबाद, लातूर आदी जिल्हे व शहरांतील सेवार्थींचा समावेश होता. सकाळी सात वाजता अभियान सुरू होणार असल्याने अनेक सेवार्थी रात्रीच शहरात मुक्कामाला आले होते. हे सेवार्थी स्वखर्चाने येत अभियानात सहभागी झाल्याचे प्रतिष्ठानच्या सदस्यांनी सांगितले. बाहेरगावाहून रात्री आलेल्या सेवार्थींसाठी शहरातील नऊ ठिकाणी निवासाची व्यवस्था करण्यात आली.

\Bप्लाटिक कचरा मोठ्याप्रमाणात \B

शहरात कचऱ्याचा प्रश्न वर्षभरापासून गंभीर आहे. त्यात रविवारी सेवार्थिंनी केलेल्या साफसफाईत मोठ्या प्रमाणात कचरा जमा करण्यात आला. केरकचऱ्यांमध्ये प्लास्टिक कॅरिबॅग, पाण्याच्या बाटल्या मोठ्या प्रमाणात आढळल्या. तीन-चार तासांच्या अभियानात दोन हजार टन कचरा जमा करण्यात आला. महापालिकेचे कर्मचारी एका दिवसात सरासरी ४५० टन कचरा गोळा करतात. रविवारी काही तासांत दोन हजार टन जमा करण्यात आला.

प्रतिष्ठानतर्फे औरंगाबादसह पुणे, मुंबईत हा उपक्रम राबविला जात आहे. स्वच्छतेचा जागर आणि जाणीव लोकांमध्ये निर्माण व्हावी, हा या अभिमानाचा हेतू आहे. एक दिवसात पूर्णपणे स्वच्छता होवू शकत नाही, याची जाणीव आम्हाला आहे. मात्र, आपलेही समाजाप्रती देणे लागते याची जाणीव करून देण्यासाठी हा उपक्रम हाती घेतला. दोन हजार टन कचरा जमा झाला त्यात महापालिकेनेही मदत केली. ते कचऱ्याची योग्यरितीने विल्हेवाट लावतील.

-अॅड्. उमेष भोजने, सेवार्थी, प्रतिष्ठान

\Bक्षणचित्रे\B

\B- १०५ विविध सरकारी कार्यालयांत स्वच्छता

- ३५ पेक्षा जास्त स्मशानभूमी, दफनभूमीत सफाई

- ९ ठिकाणी सेवार्थिंची निवास व्यवस्था

- ३३ मुख्य पथके

- ५५० ते ८०० सदस्य प्रत्येक पथकात

- ३० हजार सेवार्थी

- २ हजार टन एकूण उचललेला कचरा \B