म. टा. प्रतिनिधी, औरंगाबाद तीन महिन्यांपासून पगार झाला नसल्यामुळे रेड्डी कंपनीच्या कर्मचाऱ्यांनी सोमवारी सकाळी दोन तास काम बंद आंदोलन केले. अखेर महापौरांनी मध्यस्थी केल्यामुळे त्यांनी आंदोलन मागे घेतले. कर्मचाऱ्यांच्या पगाराची तरतूद करा व भविष्यात अशी समस्या निर्माण होऊ देऊ नका, अशी सूचना त्यांनी रेड्डी कंपनीचे स्थानिक अधिकारी व पालिका प्रशासनाला केली. कचरा संकलन व वाहतुकीच्या कामाचे महापालिकेने खासगीकरण केले आहे. बेंगरुळू येथील पी. गोपीनाथ रेड्डी या कंपनीला कचरा संकलन व वाहतुकीचे काम देण्यात आले आहे. ४ फेब्रुवारीपासून या कंपनीने काम सुरू केले. टप्प्या टप्प्याने कंपनीच्या कामाची व्याप्ती वाढू लागली आहे. कंपनीने कचरा संकलन व वाहतुकीसाठी सुमारे ३०० कर्मचाऱ्यांची नियुक्ती केली आहे. नियुक्ती केल्यापासून कंपनीने कर्मचाऱ्यांचे पगार केले नाहीत. कर्मचाऱ्यांच्या भविष्य निर्वाह निधीबद्दल देखील कंपनीने आपली भूमिका स्पष्ट केली नाही. कर्मचाऱ्यांच्या कामाच्या वेळा निश्चित करण्यात आलेल्या नाहीत. सर्वसाधारणपणे आठ तास काम करण्याची पद्धत असते, पण या कंपनीच्या कर्मचाऱ्यांना दहा-१२ तास काम करावे लागते. पगार नाहीत, कामाचे तास ठरलेले नाहीत म्हणून सोमवारी सकाळी कर्मचाऱ्यांनी काम बंद आंदोलनचा मार्ग स्वीकारला. त्यांनी सुमारे दोन तास काम बंद केले. या आंदोलनाची माहिती मिळताच महापौर नंदकुमार घोडेले मध्यवर्ती जकात नाका येथे दाखल झाले. त्यांनी कंपनीचे अधिकारी, कर्मचारी व पालिकेचे अधिकारी यांच्याशी चर्चा केली. कर्मचाऱ्यांचे पगार का करण्यात आले नाहीत, याची माहिती त्यांनी जाणून घेतली तेव्हा महापालिकेनेच कंपनीला अद्याप पेमेंट केले नसल्याचे स्पष्ट झाले. महापालिकाच आम्हाला पेमेंट करीत नाही, मग आम्ही कर्मचाऱ्यांना पेमेंट कसे करायचे असा सवाल कंपनीच्या अधिकाऱ्यांनी महापौरांना विचारला. कंपनीला पेमेंट का केले नाही, असे महापौरांनी पालिकेच्या अधिकाऱ्यांना विचारले असता युजर्स चार्जेसच्या वसुलीतून कंपनीला पेमेंट करण्याचे ठरले होते, पण अद्याप युजर्स चार्जेस वसूल करण्याबद्दल धोरण ठरले नाही, असे उत्तर अधिकाऱ्यांनी दिले. युजर्स चार्जेस वसूल करण्याबद्दल धोरण निश्चित होईपर्यंत पालिकेने कंपनीला पेमेंट करावे. कंपनीने देखील कर्मचाऱ्यांचे पेमेंट वेळेवर द्यावे, अशी सूचना महापौरांनी केले. पेमेंटबद्दल नियोजन करा, असे त्यांनी संबंधितांना सांगितले. थकलेले पगार लवकरच मिळतील, असे आश्वासन त्यांनी कर्मचाऱ्यांना दिले. त्यानंतर कर्मचाऱ्यांनी काम बंद आंदोलन मागे घेतले.

म. टा. प्रतिनिधी, औरंगाबाद

पाणीपट्टी कमी करण्याचा प्रस्ताव महापालिकेच्या नियमित सर्वसाधारण सभेत मांडला जाणार आहे. विशेष म्हणजे अशा प्रकारचा प्रस्ताव मांडण्याची तयारी प्रशासनाने केली आहे. कचऱ्याच्या संकलन व वाहतुकीसाठी नागरिकांकडून युजर्स चार्जेस गोळा केले जाणार आहेत. त्याच्या वसुलीसाठी खासगी संस्था नियुक्त करण्याचा प्रस्ताव देखील सर्वसाधारण सभेत मांडला जाणार आहे.

लोकसभा निवडणुकीची आचारसंहिता संपल्यावर महापालिकेची नियमित सर्वसाधारण सभा होणार आहे. या सभेत पाणीपट्टी कमी करण्याचा प्रस्ताव प्रशासनाकडून मांडला जाणार असल्याची माहिती महापौर नंदकुमार घोडेले यांनी पत्रकारांना दिली. ते म्हणाले, 'शहरातील नागरिकांना महापालिका नियमित पाणी देऊ शकत नाही. वर्षातून ५० ते ६० दिवसच पाणीपुरवठा होतो. पाणीपट्टी मात्र संपूर्ण वर्षाची वसूल केली जाते. त्यातच पाणीपट्टीत दरवर्षी दहा टक्के वाढ करण्याच्या निर्णयामुळे पाणीपट्टीत भरमसाठ वाढ होत आहे. २०११ यावर्षी पाणीपट्टी १८०० रुपये होती. त्यात वाढ होत आता पाणीपट्टी ४०५० रुपये झाली आहे. नियमित पाणीपुरवठा होत नसल्यामुळे पाणीपट्टीतील वाढ अन्यायकारक आहे. त्यामुळे पाणीपट्टी कमी करण्याबद्दल आयुक्तांशी चर्चा झाली आहे.'

पाणीपट्टी कमी करण्याबद्दल आयुक्तांनी अनुकूलता दाखवली आहे. तसा प्रस्ताव सर्वसाधारण सभेत प्रशासनातर्फे ठेवण्याची तयारी देखील त्यांनी दाखवली आहे. त्यामुळे आचारसंहितेनंतर होणाऱ्या सर्वसाधारण सभेत पाणीपट्टी कमी करण्याचा निर्णय घेतला जाईल. पाणीपट्टी किती कमी करायची हे सर्वानुमते सर्वसाधारण सभेतच ठरवले जाईल.

\Bयुजर्स चार्जेस वसुलीचे खासगीकरण\B

कचरा संकलन व वाहतुकीसाठी नागरिकांकडून युजर्स चार्जेस वसूल केले जाणार आहेत. निवासी क्षेत्रातून रोज एक रुपया तर व्यावसायिक क्षेत्रातून रोज दोन रुपये वसूल केले जाणार आहेत. या वसुलीसाठी स्वयंसेवी संस्था किंवा खासगी संस्था नियुक्तीचा प्रस्ताव देखील प्रशासन ठेवणार आहे. स्वयंसेवी संस्थेला प्राधान्य दिले जाणार आहे, असे महापौरांनी स्पष्ट केले.

म. टा. प्रतिनिधी, औरंगाबाद

कॉपीमुक्तीला धाब्यावर बसवत विद्यापीठ कॅम्पसमध्ये परीक्षा केंद्र बदलत कॉप्या करण्याचा धक्कादायक प्रकार घडला. नाट्यशास्त्र विभागात परीक्षेसाठी हॉल उपलब्ध असूनही योगशास्त्र विषयाची परीक्षा फाइन आर्ट विभागात घेण्यात आली. हा विभाग विद्यापीठात शेवटच्या कोपऱ्यात असल्यामुळे विद्यार्थ्यांनी कॉपीचा 'योगायोग' साधला. प्रामाणिकपणे परीक्षा देणाऱ्या विद्यार्थ्यांनीच ही माहिती प्रसारमाध्यमांना कळवली.

दरवर्षी विद्यापीठात नियोजनाचा गाजावाजा करूनही परीक्षा आणि निकालाचा सावळागोंधळ सुरू असतो. सध्या योगशास्त्र विभागाची परीक्षा फाइन आर्ट विभागात सुरू आहे. बहुतांशी विद्यार्थी कॉपी करूनच पेपर लिहित असल्यामुळे परीक्षेचे ठिकाण बदलण्याचा उद्देश उघडकीस आला. दोन वर्गांत ८० परीक्षार्थी परीक्षा देत असून, एका बेंचवर दोन विद्यार्थी बसवण्यात आले. बहुतेक विद्यार्थी कॉपी समोर ठेवून उत्तरे लिहिण्याचा प्रकार घडला. काही विद्यार्थ्यांनीच ही माहिती उघडकीस आणली. नाट्यशास्त्र विभागप्रमुख डॉ. जयंत शेवतेकर योगशास्त्राचे परीक्षार्थी असून, त्यांच्यासमोरच हा प्रकार घडला, असे सूत्रांनी सांगितले. नाट्यशास्त्र विभागात पुरेसे वर्ग असताना फाइन आर्ट विभागात योगशास्त्राची परीक्षा घेण्याचे गौडबंगाल कॉपीच्या योगामुळे उघड झाले.

योगशास्त्राच्या तासिका नाट्यशास्त्र विभागात झाल्या असून नाट्यशास्त्र विभागप्रमुख डॉ. जयंत शेवतेकर हेच योगशास्त्र विभागप्रमुखसुद्धा होते मात्र, योगशास्त्रात एम. ए. करीत असलेले शेवतेकर त्याच विभागाचे प्रमुख कसे राहू शकता, असा प्रश्न उपस्थित झाला होता. त्यामुळे हा कार्यभार प्र-कुलगुरू डॉ. अशोक तेजनकर यांनी डॉ. स्मिता साबळे यांच्याकडे सोपवला आहे. नाट्यशास्त्र विभागात परीक्षा सुरू असल्याने वर्ग उपलब्ध नसल्याने तुमच्या विभागात परीक्षा घेऊ द्या, अशी विनंती केल्यामुळे परीक्षेसाठी हॉल उपलब्ध करून दिला, अशी माहिती फाइन आर्ट विभागप्रमुख डॉ. शिरीष अंबेकर यांनी दिली.

दरम्यान, नाट्यशास्त्र विभागातील फक्त एका वर्गात अनुत्तीर्ण विद्यार्थ्यांचा पेपर सुरू होता तर, चार हॉल रिकामे होते. हॉल असूनही परीक्षेचे केंद्र इतरत्र हलवण्याचा प्रकार कॉपीसाठीच झाल्याची विद्यापीठात चर्चा आहे. फाइन आर्ट विभाग विद्यापीठात दूर असून नाट्यशास्त्र विभाग विद्यापीठात प्रवेश केल्यानंतर पहिलाच विभाग आहे. परीक्षेतील कॉप्या पाहिल्यानंतर परीक्षेचे ठिकाण बदलण्याचा उद्देश उघड झाला. योगशास्त्र विभागप्रमुख डॉ. साबळे यांनी परीक्षेची पाहणी केली नाही. परीक्षेचे नियमांना फाटा देत घडलेले कॉपीचे प्रकार चिंताजनक असून आमच्या गुणांवर परिणाम होत असल्याचे विद्यार्थ्यांनी सांगितले.

\Bसीसीटीव्ही चित्रिकरण तपासा\B

फाइन आर्ट विभागात योगशास्त्राचे विद्यार्थी कॉपी करीत असल्याचा प्रकार सीसीटीव्हीमध्ये चित्रित झाला आहे. कॉपीचे प्रकार अडवण्याचा कुणी प्रयत्न केला नाही. कम्युटर लॅब हॉलमध्ये सुरू असलेल्या परीक्षेतील कॉपीचे गैरप्रकार आठ क्रमांकाच्या सीसीटीव्हीत चित्रित आहेत. या चित्रिकरणाची तपासणी करून योग्य कारवाई करा, अशी मागणी विद्यार्थ्यांनी केली आहे.

माझ्याकडे नाट्यशास्त्राच्या परीक्षेची जबाबदारी असल्याने योगशास्त्राच्या परीक्षेकडे गेले नाही. ही परीक्षा फाइन आर्ट विभागात का घेत आहेत, ते मला सांगता येणार नाही.

- डॉ. स्मिता साबळे, विभागप्रमुख, योगशास्त्र

म. टा. प्रतिनिधी, औरंगाबाद

शेतकऱ्यांचा माल थेट ग्राहकांपर्यंत या संकल्पनेतून जाधववाडी आयोजित आंबा महोत्सवाला ग्राहकांचा उदंड प्रतिसाद मिळत आहे. महोत्सवाच्या पहिल्याच दिवशी तब्बल ७१५ हापूसच्या पेट्याची विक्री झाली, अशी माहिती संयोजकांनी दिली.

राज्य कृषी पणन मंडळ व कृषी उत्पन्न बाजार समिती यांच्या संयुक्त विद्यमाने जाधववाडी येथील बाजार समिती आ‌वारातील फूल मार्केटमध्ये आंबा महोत्सवाचे आयोजन करण्यात आले. महोत्सवाचे हे दुसरे वर्ष असून विधानसभा अध्यक्ष हरिभाऊ बागडे यांच्या प्रमुख उपस्थितीत विभागीय सहनिबंधक (सहकारी संस्था) सतीष क्षीरसागर यांच्या हस्ते सोमवारी उद्घाटन झाले. बाजार समितीचे सभापती राधाकिसन पठाडे, उपसभापती भागचंद ठोंबरे, राम शेळके, रघुनाथ काळे, दामोदर नवपुते, जिल्हा उप निबंधक अनिलकुमार दाबशेडे, सचिव विजय शिरसाठ, कृषी पणन मंडळाचे उपसरव्यवस्थापक जी. सी. वाघ, विठ्ठल पतंगे, केशव चव्हाण यांच्यासह बाजार समितीचे संचालक उपस्थित होते.

शेतकऱ्यांच्या शेतमालाला योग्य भाव मिळावा व ग्राहकांना वाजवी दरात शेतमाल मिळावा यासाठी महाराष्ट्र राज्य कृषी उत्पन्न पणन शेतकऱ्यांचा माल थेट ग्राहकांपर्यंत ही योजना हाती घेतली आहे. आंब्याचा मोसम लक्षात घेत आंबा उत्पादक व ग्राहकांना एकाच छताखाली आणण्यासाठी घेतलेला हा आंबा महोत्सव यंदा १७ मेपर्यंत असणार आहे, असे यावेळी संयोजकांनी सांगितले.

ग्राहकांचा उदंड प्रतिसाद

गेल्यावर्षी सुमारे १२ टन आंब्याची विक्री अवघ्या तीन दिवसांत झाली होती. यंदाही ग्राहकांचा मोठा प्रतिसाद मिळ‌त आहे. महोत्सवात रत्नागिरी, चिपळूण, बेनी यासह कोकण परिसरातील १६ हापूस उत्पादकासह स्थानिक दोन केशर उत्पादक शेतकऱ्यांनी सहभाग नोंदविला आहे. या महोत्सवानिमित्ताने नैसर्गिक पद्धतीने पिकविलेला केशर, हापूस आंब्याची चव यानिमित्ताने औरंगाबादकरांना चाखायला मिळणार असून पहिल्याच दिवशी हापूसच्या ७१४ पेट्याची विक्री झाली, अशी माहिती बाजार समितीचे सचिव शिरसाठ यांनी दिली. एका पेटीत चार डसन आंबे असून ४००, ६०० आणि ८०० रुपये डझन या दराने हापूसची विक्री होत असल्याचे शेतकऱ्यांनी सांगितले.

नैसर्गिकरित्या पिकविलेला हापूस तोही वाजवी दरात येथे उपलब्ध असल्याने पालकांसह खरेदीसाठी आलो. गतवर्षीप्रमाणे यंदाही आम्ही हापूसची एक पेटी खरेदी केली.

प्रशांत जाधव, ग्राहक

गेल्यावर्षी आम्ही हापूस येथे कमी प्रमाणात आणला होता, पण ग्राहकांच्या प्रतिसादामुळे नंतर माल मागवून घ्यावा लागला. यंदाही ग्राहकांचा उदंड प्रतिसाद लाभत आहे. मध्यस्थ कोणीही नसल्याने ग्राहकांना वाजवी दरात दर्जेदार असा रत्नागिरी हापूस मिळत आहे.

गणेश मोरे, हापूस उत्पादक शेतकरी, रा. वैजी, रत्नागिरी

म. टा. प्रतिनिधी, औरंगाबाद

पूर्णा (जि. परभणी) येथे शाळकरी मुलीला कारचा धक्का लागल्याच्या कारणावरुन सुमारे २१ जणांनी कारचालकासह मालकाला मारहाण केल्याच्या प्रकरणात आरोपी सोमनाथ नरहरी सोलव व कैलास सुरेश पडोळे यांना रविवारी (१२ मे) रात्री अटक करून सोमवारी न्यायालयात हजर करण्यात आले असता, त्यांना गुरुवारपर्यंत (१६ मे) पोलिस कोठडीत ठेवण्याचे आदेश विशेष न्यायाधीश व्ही. व्ही. पाटील यांनी दिले.

या प्रकरणात आरोपी सोमनाथ सोलव (वय २८) व कैलास पडोळे (वय १९, दोघे रा. बरबडी, ता. पूर्णा, जि. परभणी) यांच्यासह २१ जणांविरोधात दंगलीचा व संघटीत गुन्हेगारी केल्याच्या प्रकरणात मोक्काअंतर्गत गुन्हा दाखल करण्यात आहे. यापूर्वी आरोपी अंगत लोखंडे व प्रदीप पारवे यांना अटक करण्यात आली होती. प्रकरणामध्ये शास्त्रीनगर (ता. पूर्णा) येथील हाजी खलील कुरेशी (वय ४९) यांनी फिर्याद दिली होती. फिर्यादीनुसार, २५ ऑगस्ट २०१८ रोजी कुरेशी यांच्या पत्नीची प्रकृती ठीक नसल्याने ते पूर्णा येथून कारने नांदेडला औषधी आणण्यासाठी कारचालक सुलेमानसह निघाले होते. त्यावेळी शाळकरी मुलीला धक्का दिल्याच्या कारणावरून हाजी कुरेशी यांना आरोपी सोमनाथ सोलव, कैलास पडोळे व इतरांनी शिविगाळ करून मारहाण केली होती. त्यानंतर कुरेशी हे आरोपींना जाब विचारण्यासाठी गेले असता, आरोपींनी लोखंडी रॉडने कुरेशी यांना बेदम मारहाण करुन गंभीर जखमी केले होते. दरम्यान, पूर्णा पोलिस ठाण्यात आरोपींविरोधात नांदेडच्या विशेष पोलिस महानिरीक्षकांच्या आदेशान्वये आरोपींविरोधात मोक्काअंतर्गत गुन्हा दाखल करण्यात आला होता. प्रकरणात सोमनाथ व कैलास या आरोपींना सोमवारी न्यायालयात हजर करण्यात आले असता, दोन्ही अटक आरोपी गुंड प्रवृत्तीचे असून त्यांचा गुन्ह्यात सक्रिय सहभाग असल्याचे तपासात निष्पन्न झाले आहे. तसेच आरोपींच्या साथीदारांचा शोध घेऊन त्यांना अटक करणे बाकी आहे व आरोपींचा जबाब मोक्का अधिनियम कलम १८ प्रमाणे नोंदविणे गरजेचे असल्याने आरोपींना पोलिस कोठडी देण्याची विनंती सहाय्यक सरकारी वकील राजू पहाडिया यांनी न्यायालयात केली. ही विनंती मान्य करुन न्यायालयाने आरोपींना गुरुवारपर्यंत पोलिस कोठडी सुनावली.

म. टा. प्रतिनिधी, औरंगाबाद

विवेकानंद केंद्र, कन्याकुमारीच्या औरंगाबाद शाखेतर्फे घेण्यात आलेल्या व्यक्तीमत्व विकास शिबिराचा समारोप नुकताच झाला. यावेळी विवेकानंद केंद्र नाशिकचे सहसंचालक विश्वास देवकर प्रमुख पाहुणे म्हणून उपस्थित होते. ७ ते १२ मे दरम्यान घेण्यात आलेल्या या शिबिरात २३७ मुले-मुली सहभागी झाले होते.

विश्वास देवकर म्हणाले, 'विवेकानंद केंद्राचे संस्काराच्या क्षेत्रात मोठे काम आहे. आपल्या घरात जन्माला आलेले बाळ राष्ट्र कार्यासाठी अर्पण करण्याच्या भावनेने केंद्राची स्थापना झाली आहे. प्रत्येकात प्रज्ञावंत दडलेला असतो, तो आपल्याला शोधायचा आहे.' परीक्षेत किती गुण मिळाले ही स्पर्धा सर्वत्र सुरू आहे, असा उल्लेख करून देवकर म्हणाले, 'आपल्या मुलांवर अपेक्षांचे ओझे लादू नका. त्याला झेपेनासे होईल असे वागू नका.' देवकर यांनी पालकांशी संवाद केल्यावर शिबिरातील मुलांनी सादरीकरण केले. त्याचे सूत्रसंचालन अर्णव कौशिके, अनुष्का इनामदार यांनी केले. यावेळी योगासने, लाठीकाठी, ज्युदो-कराटेची प्रात्यक्षिके सादर करण्यात आली. शिबिराच्या यशस्वीतेसाठी ६१ युवक-युवतींनी दोन महिन्यांपासून परिश्रम घेतले. उपस्थितांचे स्वागत नगर संचालक संजय जाधव यांनी केले. कार्यक्रमाचे सूत्रसंचालक कार्तिक भराड यांनी केले. शिबिरप्रमुख गोकुळ राजपूत यांनी प्रास्ताविक केले.

म. टा. प्रतिनिधी, औरंगाबाद

डॉ. नानासाहेब धर्माधिकारी प्रतिष्ठाणच्या स्वंयसेवकांनी शहरात राबविलेले महास्वच्छता अभियान खऱ्याअर्थाने कौतुकास्पद असून महापालिकेसह येथील नागरिकांना अंतर्मुख करायला लावणारे आहे, असे प्रतिपादन विधानसभा अध्यक्ष हरिभाऊ बागडे यांनी केले. कचराप्रश्नी महापालिकेने अधिक गतीने काम करणे अपेक्षित असल्याचेही सांगतानाच त्यांनी सिडकोसह शहरात पाण्याचे समन्यायी वाटप व्हावे, असे नमूद केले.

आंबा महोत्सव उद्घाटन कार्यक्रमानिमित्ताने विधानसभा अध्यक्ष बागडे जाधववाडी येथील बाजार समिती आवारात सोमवारी आले असता ते पत्रकारांशी बोलत होते. डॉ़. नानासाहेब धर्माधिकारी प्रतिष्ठानतर्फे शहरात रविवारी शहरात महास्वच्छता अभियान राबविण्यात आले. यासंदर्भात पत्रकारांनी विचारले असता विधानसभा अध्यक्ष बागडे यांनी या उपक्रमात मोठ्या संख्येने सेवार्थी सहभागी झाले होते. हा उपक्रम खऱ्याअर्थाने कौतुकास्पद आहे. महापालिकेसह येथील नागरिकांना अंतर्मुख करायला लावणारा असा हा उपक्रम आहे. शहर व परिसरात करण्यात आलेली ही स्वच्छता महापालिकेने कायम ठेवावी, असा टोलाही त्यांनी यावेळी मारला.

शहरातील कचराप्रश्नी बोलताना विधानसभा अध्यक्ष म्हणाले की, नवी मुंबई येथील प्रकल्प पाहून आलो. तेथील अधिकाऱ्यांनाही येथे बोलविले होते, पण तरीही पाहिजे, त्याप्रमाणात कचराप्रश्नी निकाली काढण्यासाठी गती मिळाली नाही. गती आली तरच काम होईल. प्रशासन व पदाधिकाऱ्यांनी मनावर घेऊन काम करावे, असा सल्लाही त्यांनी यावेळी दिला.

अनाधिकृत नळ कनेक्शनकडे लक्ष द्या :

सिडकोतील पाणी प्रश्नी होणाऱ्या ओरडबाबत विधानसभा अध्यक्षांना विचारले असता त्यांनी सिडको व शहर परिसरात सर्वत्र पाण्याचे योग्य व समन्यायी वाटप व्हायला पाहिजे, असे मत व्यक्त केले. अनधिकृत नळजोडण्या मोठ्या प्रमाणात आहेत. यात महापालिकेचे छोटेमोठे ठेकेदार असे प्रकार करून देतात, असेही सांगत त्यांनी अनाधिकृत नळ कनेक्शनकडे गांभीर्याने घ्यावे, असा सल्ला दिला.

म. टा. प्रतिनिधी, औरंगाबाद

लोकसभा निवडणूक शांततेत पार पाडण्याची जबाबदारी शहर पोलिसांवर होती. ती पार पडलीही. आता मात्र, गेल्या वर्षभरात पोलिस ठाण्यात दाखल झालेल्या अनेक प्रकरणांचा तपास रखडला आहे. तो लवकरात लवकर पूर्ण करा, असे आदेश पोलिस आयुक्त चिरंजीव प्रसाद यांनी संबंधित पोलिस ठाणे प्रमुखांना दिले आहेत.

पोलिस आयुक्त म्हणून प्रसाद रुजू झाल्यानंतर त्यांनी प्रशासनात अनेक बदल केले. या बदलामुळे पोलिसांचे कामकाज अधिक गतिमान झाले आहे. प्रसाद यांनी प्रलंबित गुन्हे निकाली काढण्यावर भर दिला. शिक्षेचे प्रमाण वाढावे यासाठी पोलिस आयुक्तालयात कोर्ट सेल सुरू करण्यात आले. यामुळे शिक्षेच्या प्रमाणात वाढ झाली. मार्च महिन्यात लोकसभा निवडणुकीची आचारसंहिता लागू झाली. दंगलीच्या पार्श्वभूमीवर लोकसभेची निवडणूक होत असल्याने पोलिस प्रशासन डोळ्यात तेल घालून प्रत्येक घटनेकडे लक्ष ठेवून होते. राजकीय नेत्यांच्या प्रत्येक सभेला तगडा पोलिस बंदोबस्त ठेवून परिस्थितीवर नियंत्रण मिळविले. तब्बल दोन महिने नेत्यांच्या सभा आणि मतदान प्रक्रिया शांततेत पार पाडण्यावर लक्ष दिले गेले. हे सर्व करत असताना दाखल गुन्ह्यांचा तपास करण्यास पोलिस अधिकाऱ्यांना फारसा वेळच मिळाला नाही. लोकसभा निवडणूक संपली आहे. पोलिस अधिकाऱ्यांवरील निवडणुकीचा ताणही कमी झालेला आहे. त्यामुळे प्रलंबित गुन्ह्यांचा आधी निपटारा करण्याच्या सूचना पोलिस आयुक्तांनी दिल्या आहेत.

\Bदररोज अपडेट आवश्यक

\Bमागील एक वर्षांपूर्वीच्या प्रलंबित गुन्ह्यांची यादी तयार करण्याचे आदेश पोलिस आयुक्तांनी दिले आहेत. ही यादी तयार झाल्यानंतर प्रलंबित गुन्ह्यांबाबत तपास अधिकाऱ्यांनी कोणती कारवाई केली आहे. याबाबतचे अपडेट दररोज पोलिस आयुक्तांना पाठविण्याचेही आदेश दिले आहेत.

\Bअसे केले बदल...

\B- प्रसाद यांच्या काळात अनेक बदल

- पोलिसांचे कामकाज केले गतिमान

- प्रकरणे निकाली काढण्यावर भर

- शिक्षेचे प्रमाण वाढविण्यासाठी प्रयत्न

- पोलिस आयुक्तालयात कोर्ट सेल

म. टा. प्रतिनिधी, औरंगाबाद

घराचे बांधकाम करून देतो असे आमिष दाखवून शहरातील दोन बिल्डरांनी नवाबपुरा भागातील एका महिलेला पावणे दोन लाखांचा गंडा घातला. याप्रकरणी विजय सुरेश कंडारे आणि हरीशचंद्र जावळे (रा. प्रगती कॉलनी) यांच्यावर सिडको पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, नवाबपूरा भागात राहणाऱ्या एका २४ वर्षीय महिलेने १० जून २०१५ रोजी प्रगती व सूर्या कन्स्ट्रक्शनचा मालक विजय सुरेश कंडारे तसेच असिस्टंट हरिश्चंद्र जावळे यांच्याशी घराचे बांधकाम करण्यासाठी संपर्क साधला. या दोघांनी महिलेला शेंद्रा एमआयडीसीतील गट क्र. १४४मध्ये वन रूम किचनचे घर बांधून देण्याचे आमिष दाखवले. त्यांनी महिलेकडून सुरुवातीला वेगवेगळ्या तारखेला दोन लाख ७० हजार रुपये घेतले. घर तयार होत असल्याचेही सांगितले. कालांतराने घराचा ताबा द्यावा, अशी मागणी महिलेने केली. तेव्हा या दोघांनी टोलवाटोलवी केली. अखेरीस घराचा ताबा देत नाही तर पैसे परत करा, असा तगादा महिलेने लावला. तेव्हा त्यांनी दोन टप्प्यात महिलेला एक लाख रुपये दिले. मात्र, उर्वरित एक लाख ७० हजार रुपये देण्यासाठी टाळाटाळ केली. त्यामुळे महिलेने सिडको पोलिसांकडे धाव घेतली. प्रगती कन्स्ट्रक्शनचा विजय कंडारे व सूर्या कन्स्ट्रक्शनचा हरीशचंद्र जावळे याच्याविरोधात पोलिस ठाणे गाठून फसवणुकीची तक्रार दिली. या प्रकरणाचा पुढील तपास महिला उपनिरीक्षक पी. जी. आबूज करत आहेत.

म. टा. प्रतिनिधी, खुलताबाद

तालुक्यात ऐन दुष्काळात निरगुडी प्रकल्पातून सुरू असणारा अवैध पाणी उपसा महसूल विभागाने जोरदार कारवाई करत मंगळवारी बंद केला.

तालुक्यातील ग्रामीण भागांत यंदा तीव्र पाणीटंचाई निर्माण झाली आहे. गिरिजा मध्यम प्रकल्प कोरडेठाक पडला आहे. गंधेश्वर प्रकल्पात अवघे आठ टक्के पेक्षा कमी पाणीसाठा शिल्लक आहे. निरगुडी प्रकल्पाची पातळीही झपाट्याने घटत आहे. त्यामुळे तालुक्यातील नागरिकांना पाणीटंचाईचा सामना करावा लागत आहे. तहसीलदार राहुल गायकवाड यांनी अवैध पाणी उपसा रोखण्यासाठी पथक तयार केले असून, या पथकातील नायब तहसीलदार मोहनलाल हारने, तलाठी आप्पासाहेब सोनवणे, ग्रामसेविका बबिता मेश्राम यांच्या पथकाने निगुरडी प्रकल्पात सुरू असलेल्या अवैध पाणी उपसा बंद केला.

म. टा. प्रतिनिधी, औरंगाबाद

लोकसभा निवडणुकीची रणधुमाळी संपल्यानंतर आता सर्वसामान्यांना निवडणूक निकालाची उत्सुकता लागली आहे. प्रशासनानेही निवडणूक निकालासाठी संपूर्ण नियोजन केले असून मंगळवारी (१४ मे) २६५ कर्मचाऱ्यांचे मतमोजणीचे प्रशिक्षण घेण्यात आले. यावेळी जिल्हाधिकारी उदय चौधरी, अपर जिल्हाधिकारी भानुदास पालवे, मास्टर ट्रेनर हनुमंत आरगुडे, निवडणुक उपजिल्हाधिकारी नीलेश श्रींगी तसेच सर्व सहाय्यक निवडणुक निर्णय अधिकाऱ्यांची उपस्थिती होती.

यंदा सर्वच मतदान केंद्रांवर व्हीव्हीपॅटचा वापर करण्यात आला असून नियमाप्रमाणे प्रत्येक विधानसभा मतदारसंघातील पाच केंद्रांवरील व्हीव्हीपॅटच्या चिठ्ठ्यांचेही मतमोजणी होणार असल्याने प्रशिक्षणामध्ये व्हीव्हीपॅट संदर्भात संबंधितांना सूचना देण्यात आल्या.

मेल्ट्रॉन कंपनी परिसरामध्ये मतमोजणी करण्यात येणार असून मतमोजणीसाठी सर्वाधिक फेऱ्या कन्नड तसेच औरंगाबाद पश्चिम विधानसभा मतदारसंघासाठी होणार आहेत. प्रत्येक मतदारसंघाला मतमोजणीसाठी प्रत्येकी १४ असे एकुण ८४ टेबल राहणार असून प्रत्येक मतमोजणीच्या टेबलावर मतमोजणी पर्यवेक्षक, मतमोजणी सहाय्यक तसेच सुक्ष्म निरीक्षक असे तीन कर्मचारी राहणार आहेत.

निवडणूक आयोगाच्या निर्देशांचे पालन करून अचूकपणे मतमोजणी करण्यात यावी, असे जिल्हाधिकारी उदय चौधरी यांनी मार्गदर्शन करताना सांगितले. यावेळी मतमोजणी कर्मचाऱ्यांच्या अडचणींचे निराकरण, मानधन आदींबाबत मार्गदर्शन केले.

२२ रोजी रंगीत तालीम

निवडणूक मतमोजणीसाठी राखीवसह एकूण २६५ कर्मचाऱ्यांची आवश्यकता आहे. मंगळवारी प्रशिक्षणानंतर प्रत्यक्ष मतमोजणीपूर्वी २२ मे रोजी मतमोजणीचे रंगीत तालीम आयोजित करण्यात येणार आहे.

म. टा. प्रतिनिधी, औरंगाबाद

पाणीप्रश्नावरून एमआयएमच्या नगरसेविकांच्या पतींनी मंगळवारी पाणी पुरवठा विभागाच्या कार्यकारी अभियंत्यांना धक्काबुक्की केली. ही घटना सायंकाळी पाच वाजेच्या सुमारास घडली. धक्काबुक्कीबाबत महापालिकेतर्फे पोलिसांत तक्रार दाखल केली जाणार असल्याची माहिती मिळाली आहे.

पालिकेचे विरोधीपक्षनेते जमीर कादरी यांनी आपल्या दालनात मंगळवारी पाणी पुरवठा अधिकाऱ्यांची बैठक घेतली. रमजान महिन्याच्या काळात जुन्या शहरात नियमित पाणी पुरवठा करण्यात यावा, असा या बैठकीचा विषय होता. कादरी यांच्या दालनातील बैठक संपल्यावर एमआयएमच्या दोन नगरसेविकांच्या पतींनी कार्यकारी अभियंता हेमंत कोल्हे यांचे दालन गाठले आणि पाणी पुरवठ्याबद्दल त्यांच्याशी हुज्जत घालणे सुरू केले. आमच्या वॉर्डात पाचव्या, सहाव्या दिवशी पाणी पुरवठा होतो अशी तक्रार करण्यास त्यांनी सुरुवात केली. सूत्रांनी दिलेल्या माहितीनुसार कोल्हे यांनी पाणी पुरवठ्याचे नियोजन करणे सुरू असल्याचे पतीराजांना सांगितले, पण पतीराज ऐकण्याच्या तयारीत नव्हते. पाणी पुरवठ्याचे नियोजन झाल्यावर तुमच्या वॉर्डात तिसऱ्या किंवा चौथ्या दिवशी पाणी येईल, असे कोल्हे म्हणाले. तिसऱ्या दिवशी पाणी मिळेल असे लिहून द्या, असे म्हणत पतीराजांनी कोल्हे यांना धक्काबुक्की करण्यास सुरुवात केली. उपस्थित असलेल्या काही जणांनी हस्तक्षेप करीत पतीराजांना बाजूला केले. त्यानंतर हे प्रकरण आयुक्तांपर्यंत गेले. धक्काबुक्की करणाऱ्या पतीराजांच्या विरोधात पोलिसांत तक्रार देण्याचा निर्णय घेण्यात आला, रात्री उशीरापर्यंत तक्रार देण्याचे काम सुरू होते.

गेल्या काही महिन्यांपासून महापालिकेत नगरसेविकांच्या पतींचा, मुलांचा हस्तक्षेप वाढला आहे. त्याचा त्रास अधिकारी व कर्मचाऱ्यांना होऊ लागला आहे. ओम प्रकाश बकोरिया जेव्हा पालिकेचे आयुक्त होते. तेव्हा त्यांनी पतीराजांना किंवा मुलांना प्रवेश बंदी केली होती. नगरसेविकांनी स्वत: त्यांच्या वॉर्डातील प्रश्न संबंधित अधिकाऱ्याकडे मांडावेत, अधिकाऱ्यांनी ते प्रश्न तात्काळ सोडवावेत. अधिकारी जर नगरसेविकांचे ऐकणार नसतील तर त्यांच्यावर कारवाई केली जाईल, असा इशाराही बकोरिया यांनी दिला होता. त्यामुळे पतींचा हस्तक्षेप संपुष्टात आला होता. बकोरिया यांच्या बदलीनंतर पालिकेत पतीराज अधिकाऱ्यांसाठी त्रासदायक ठरू लागल्याचे बोलले जात आहे.

म. टा. प्रतिनिधी, औरंगाबाद

नवी चारचाकी वाहने घेऊन जाणारा कंटेनर मंगळवारी चिकलठाणा येथे उच्च दाबाच्या वीज तारांना धडकला. त्यामुळे कंटेनरचे टायर जळून खाक झाले आणि वीजप्रवाह खंडित झाला.

चिकलठाणा एमआयडीसी परिसरात रत्नप्रभा फोर्ड यांचे चारचाकी वाहनाच्या शोरूमचे गोदाम आहे. मंगळवारी सकाळी कंटेनर (एनएल ०२ जी ९००६) नवीन वाहने घेवून एपीआय कार्नरमार्गे रत्नप्रभा मोटर्सकडे आला. तेव्हा कंटेनरच्या वरचा भाग ११ केव्हीच्या विद्युत ओव्हेड वायरला स्पर्श झाला. यामुळे कंटेनरमधून वीज प्रवाह सुरू झाला. या वीज प्रवाहामुळे कंटेनरचे चाक आग लागून जोरात फुटले. त्याचा मोठा आवाज आला. घटनेची माहिती मिळताच चिकलठाणा अग्निशमन दलाच्या कर्मचाऱ्यांनी घटनास्थळी धाव घेवून आग नियंत्रणात आणली. दरम्यान, कंटेनर विद्युत वाहिनीला धडकताच लाइन ट्रीप झाल्याने एमआयडीसी चिकलठाणा, सिडको एन-१ परिसराचा विद्युत पुरवठा खंडित झाला. या घटनेची नोंद एमआयडीसी सिडको पोलिस ठाण्यात करण्यात आली.………………………

म. टा. प्रतिनिधी, औरंगाबाद

चिकलठाणा गावाजवळ जालना रोडवर असलेल्या वाहन गॅरेजला सोमवारी मध्यरात्री आग लागून तीन तासांत तब्बल आठ गॅरेज आणि २४ कार जळून खाक झाल्या. ही आग नेमकी कशामुळे लागली याचे कारण अजूनही समजू शकलेले नाही.

गॅरेज मालकांनी दिलेल्या माहितीनुसार, सोमवारी रात्री दहा वाजेपर्यंत आपापले गॅरेज बंद करून सर्वजण घरी केले. मध्यरात्री पावणेबाराच्या सुमारास या गॅरेजच्या रांगेतील भूमी गॅरेजच्या मागील बाजूस आग लागली. काही क्षणातच आगीने रौद्ररूप धारण केले. बघता बघता आजूबाजूचे तीन ते चार गॅरेज आगीच्या विळख्यात आले. या ठिकाणी असलेला स्थानिक तरुण आसिफ शेख याने तत्काळ पोलिस विभागाला घटनेची माहिती दिली. अग्निशमन विभागाचे जवान बंबासह घटनास्थळी दाखल झाले. तोपर्यंत एमआयडीसी सिडको पोलिस ठाण्याचे निरीक्षक सुरेंद्र माळाळे, सिडको पोलिस ठाण्याचे निरीक्षक अशोक गिरी हे देखील कर्मचाऱ्यांसह घटनास्थळी दाखल झाले. आग विझवण्यासाठी शर्थीचे प्रयत्न सुरू होते. रात्री अडीचच्या सुमारास आग नियंत्रणात आली. मात्र, तोपर्यंत एका रांगेत असलेले एकूण आठ गॅरेज व २४ कार जळून खाक झाल्या. आगीमुळे अंदाजे पन्नास लाखांपेक्षा अधिक रकमेचे नुकसान झाल्याची माहिती समोर आली आहे. दरम्यान, ……

मंगळवारी महसूल विभागाकडून तलाठी विशाल मगरे, मंडळ अधिकारी आप्पासाहेब गोराडे यांनी घटनास्थळाचा पंचनामा केला. यात कुठलीही जीवितहाणी झाली नाही. मात्र, घटनेत जवळपास एकूण एक कोटी ४० लाख रुपयांपर्यंत नुकसान झाल्याचा अंदाज आहे, अशी माहिती तलाठी विशाल मगरे यांनी दिली. मंगळवारी विधानसभा अध्यक्ष हरिभाऊ बागडे, माजी आमदार कल्याण काळे यांनी घटनास्थळी जाऊन गॅरेजचालकांची पाहणी केली.

…

\Bअग्निशमन दलाला उशीर

\Bसोमवारी मध्यरात्री चिकलठाणा जवळील गॅरेजला आग लागल्यानंतर ही आग विझविण्यासाठी अग्निशमन विभागाला कॉल करण्यात आला. पहिल्या काही प्रयत्नात फोन लागला नाही. फोन लागल्यानंतर त्यांना घटना सांगण्यात आली. या घटनेच्या ३० ते ४० मिनिटानंतर बंब दाखल झाले. तो पर्यंत आग वाढलेली होती. ही आग विझविण्यासाठी खासगी टँकरची मदत घ्यावी लागली.

\B...हे जळून खाक

\B- सय्यद फैज कलंदर अली यांचे तारा मोटार्स

- शेख अलीम उस्मान यांचे न्यू महाराष्ट्र रिपेअर्स

- शेख हलियास इस्माइल यांचे समीर न्यू अर्थ मुव्हिंग गॅरेज

- शेख मोहसीन शेख रहिम यांच्या मिरॅकल मोटर्समधील सात गाड्या

- शेख उमर शेख अकबर यांच्या सहारा मोटर्समधील पाच गाड्या

- मोहम्मद फहीम मोहम्मद सलीम यांच्या मनोज मोटर्समधील सात गाड्या

- नदीम हाश्मी बरकत उल्ला यांच्या गुडलक शॉकअप दुकानातील गाड्यांचे पार्ट

- भूमी गॅरेज मधील पाच वाहने, इतर गॅरेज बाहेरील गाड्या

म. टा. प्रतिनिधी, औरंगाबाद

पावसाळ्याच्या सुमारास राज्य शासनाने महापालिकेला २५ हजार झाडे लावण्याचे टार्गेट दिले आहे. झाडे लावण्याच्या कामाचा शुभारंभ पाच जून या जागतिक पर्यावरण दिनाच्या दिवशी केला जाणार आहे.

पावसाळ्यात वृक्षारोपणासाठी महापालिकेला शासनाकडून दरवर्षी विशिष्ट उद्दीष्ट दिले जाते. गतवर्षी सुमारे दोन लाख झाडांचे उद्दीष्ट देण्यात आले होते, परंतु एवढी झाले लावणे शक्य नसल्याचे राज्यभरातील महापालिकांनी राज्य शासनाच्या निदर्शनास आणून दिल्यानंतर शासनाने महापालिकेच्या वर्गवारीनुसार वृक्षारोपणाचे उद्दीष्ट दिले आहे. औरंगाबाद महापालिका 'ड' वर्गात असल्यामुळे या महापालिकेला २५ हजार झाडे लावण्याचे उद्दीष्ट मिळाले आहे. २५ हजारांपैकी साडेआठ हजार झाले चिकलठाणा येथील कचरा प्रक्रिया केंद्राच्या परिसरात लावण्यात येणार आहेत. अमृत योजनेच्या माध्यमातून १२५०० झाडांचे नियोजन करण्यात आले आहे. उर्वरित झाडे देखील आवश्यकतेनुसार लावली जाणार आहेत. वृक्षारोपणाचे २५ हजारांचे उद्दीष्ट साध्य करण्यासाठी महापालिका वन विभागाकडून १५ हजार रोपे घेणार आहे. महापालिकेच्या रोप वाटिकेत देखील काही रोपांची लागवड करण्यात आली आहे.

म. टा. प्रतिनिधी, औरंगाबाद

रामकृष्ण गोदावरी उपसा जलसिंचन योजना पुनरुजीवित करण्यासाठी युद्धपातळीवर प्रयत्न सुरू असून, येत्या पाच महिन्यात ही योजना पुन्हा कार्यान्वित होईल, अशी माहिती विधानसभा अध्यक्ष, जिल्हा सहकारी बँकेचे संचालक हरिभाऊ बागडे यांनी दिली.

जाधववाडी येथील कृषी उत्पन्न बाजार समिती आवारात आयोजित आंबा महोत्सवानिमित्ताने ते आले असता पत्रकारांशी बोलत होते. रामकृष्ण गोदावरी उपसा जलसिंचन योजनेबाबत विचारले असता त्यांनी, ही योजना कार्यान्वित करण्यासाठी प्रयत्न सुरू असल्याचे सांगितले. गोदावरी नदीच्या बॅक वॉटरचा वापर करून वैजापूर तालुक्यातील गावांना सिंचनासाठी पाणीपुरवठा करण्यासाठी दहेगाव येथे सहकारी तत्त्वावर ही योजना सुरू करण्यात आली होती. योजनेमुळे तालुक्यातील २३ गावांतील मोठ्या प्रमाणात जमीन सिंचनाखाली आली, परंतु काही काळातच योजना बंद पडली. ही योजना ३५ कोटी रुपयांची होती. नाबार्डाकडून औरंगाबाद जिल्हा मध्यवर्ती सहकारी बँकेमार्फत योजनेला कर्जपुरवठा त्यावेळी झाला होता. हे योजना २० वर्षांहून अधिक काळापासून बंद अवस्थेत आहे. त्यात कर्ज, त्यावरील व्याज वाढत गेले. कर्ज फेडण्याची जबाबदारी बँकेवर आली. त्यामुळे कर्ज फेडत जिल्हा सहकारी बँकेने योजना ताब्यात घेतल्याचे बागडे यांनी सांगितले.

ही रक्कम वसूल करण्यासाठी योजनेला लिलाव करण्याचा पर्याय होता पण, जुने पाइप व भंगारातून दोन ते चार कोटी रुपयांपेक्षा अधिक रक्कम जमा होणे शख्य नसल्याने ही योजना पुन्हा कशी कार्यान्वित होईल, याकडे बँकेने लक्ष दिले. त्यात शासनाची मोठी मदत झाली. योजना कार्यान्वित करण्यासाठी पाच कोटी ७१ लाख रुपयांचा निधी जिल्हा मध्यवर्ती सहकारी बँकेला एक वर्षापूर्वी प्राप्त झाला आणि त्यामुळ‌े योजनेला अधिक गती मि‌ळाली. सहकार विभागाच्या नियमानूसार योजनेच्या दुरुस्तीसाठी आवश्यक कामाचे निविदा काढण्यात आल्या. पंपची ऑर्डरही देण्यात आली असून, येत्या दोन महिन्यात पंप येईल. जलवाहिनी देखभाल दुरुस्ती, स्वच्छ करणे विहिरीची स्वच्छता आदी कामे जोमाने सुरू असून, लवकरच चाचणी घेऊन येत्या पाच महिन्यांत ही योजना पुन्हा कार्यान्वित होईल, असा विश्वासही विधानसभा अध्यक्ष बागडे यांनी व्यक्त केला.

\B२५हून अधिक गावांना फायदा\B

ही योजना कार्यान्वित झाल्यावर वैजापूर व परिसरातील सुमारे २५हून अधिक गावांना फायदा होईल. दोन हजार हेक्टरहून अधिक जमीन सिंचनाखाली येईल, असा विश्वास बागडे यांनी व्यक्त केला.

म. टा. प्रतिनिधी, औरंगाबाद

छत्रपती संभाजी महाराज यांची जयंती (१४ मे) शहरात मोठ्या उत्साही वातावरणात साजरी करण्यात आली. टीव्ही सेंटर चौकातील छत्रपती संभाजी महाराज यांच्या पुतळ्यास अभिवादन करण्यासाठी दिवसभर शिवप्रेमींची रीघ लागली होती. जयंतीनमित्त काढण्यात आलेल्या मिरवणुकीत 'छत्रपती शिवाजी महाराज की जय', 'संभा की जय बोलो, शिवा की जय बोलो' अशा गगनभेदी घोषणांनी टीव्ही सेंटर परिसर दुमदुमून गेला होता.

छत्रपती संभाजी महाराज जयंतीनिमित्त संपूर्ण चौकात आकर्षक रोषणाई करण्यात आली होती. मंगळवारी सकाळी साडेआठ वाजता बुलंद छावाच्या कार्यालय ते टीव्ही सेंटर चौकापर्यंत मिरवणूक काढण्यात आली. यामध्ये मोठ्या प्रमाणावर महिलांनी सहभाग नोंदवला.

मिरवणुकीचे उद्घाटन विधानसभा अध्यक्ष हरिभाऊ बागडे यांच्या हस्ते करण्यात आले. यावेळी महापौर नंदकुमार घोडेले, आमदार अतुल सावे, संजय शिरसाट, अभिजीत देशमुख, नामदेव पवार, सुरेश वाकडे, मोहन मेघावाले, सुदाम मामा सोनवणे, जगन्नाथ काळे, राजगौरव वानखेडे, विजय औताडे, किशोर नागरे, सतीश वेताळ, मनोज गायके, संदीप सपकाळ आदींची उपस्थिती होती. मिरवणूक चौकामध्ये आल्यानंतर मान्यवरांनी छत्रपती संभाजी महाराज यांच्या पुतळ्यास अभिवादन केले. सकाळपासूनच तरुणांनी शहराच्या विविध भागातून काढलेल्या वाहन फेऱ्या चौकामध्ये येत होत्या. बुलंद छावा मराठा युवा परिषदेतर्फे १३ मेपासून कार्यक्रम घेण्यात आले होते.

कार्यक्रम यशस्वीतेसाठी शिवाजी पळसकर, गणेश तुपे, संदीप जाधव, धृपत निकम, योगेश देशमुख, प्रदीप हारदे, दिलीप जाधव, रामेश्वर राजगुरे, विलास पवार, किशोर विटेकर, सुरेश बोर्डे, बाबू चौधरी, रतन काळे, महेश पाटील, गिरीश झाल्टे, योगेश औताडे, संदीप शेळके यांनी प्रयत्न केले.

म.टा.विशेष प्रतिनिधी ,औरंगाबाद

निवडणूक काळातील बदलीविरोधात दाखल अर्ज महाराष्ट्र प्रशासकीय न्यायाधिकरणाने (मॅट) नामंजूर केला. चाळीसगाव येथील उपविभागीय पोलिस अधिकारी शेख नजीर यांची बदली औरंगाबाद ग्रामीण पोलिस दलात करण्यात आली होती.

लोकसभा निवडणुकीच्या तोंडावर निवडणूक आयोगाच्या निर्देशानुसार बदली करण्यात आली होती. मात्र ही बदली मध्यवधीत करण्यात आली. महाराष्ट्र पोलीस कायदा कलम २२-एन-(१) नुसार ती करण्यात आली नाही. त्यांचा तीन वर्षांचा कालावधी पूर्ण नसल्याचा दावा करत त्यांनी प्रशासकीय न्यायाधीकरणात आदेशाला आव्हान दिले. दरम्यान २० फेब्रुवारी रोजी गृहविभागाने प्रतिवादी उत्तम कडलग यांची बदली नाशिक उपविभागातून चाळीसगाव उपविभागात केली. मात्र, न्यायाधीकरणाने शेख नजीर यांच्याप्रकरणात जैसे थे परिस्थिती ठेवण्याचे आदेश दिल्याने त्यांना रुजू होता आले नाही. त्यांनी शेख यांच्या प्रकरणात प्रतिवादी करण्याची विनंती केली. अर्जदार शेख हे २००८ ते २०१८ या कालावधीत जळगाव येथे सेवेत होते. तसेच त्यांची बदली निवडणूक आयोगाच्या निर्देशानुसारच करणात आल्याचे त्यांनी निदर्शनास आणून दिले. शेख यांचा अर्ज नामंजूर करण्याची विनंतीही करण्यात आली. सुनावणीअंती न्या. ए. एच. जोशी यांनी शेख यांचा अर्ज नामंजूर केला. शेख यांच्यावतीने हनुमंत जाधव यांनी काम पाहिले.

म. टा. प्रतिनिधी, औरंगाबाद

औरंगाबाद-सिल्लोड रस्त्याचे काम रखडल्याचा दुष्परिणाम पर्यटन व्यवसायावर झाला आहे. खराब रस्त्यामुळे टूर संयोजक अजिंठ्याला जाण्यास नकार देत आहेत. परिणामी, अजिंठ्यात पर्यटकांची गर्दी कमी झाली आहे. रस्त्याचे काम लवकर करण्यासाठी टुरिझम प्रमोटर्स गिल्ड पर्यटन मंत्रालयाकडे पाठपुरावा करीत आहे. त्यानंतरही कामाला गती मिळाली नसल्यामुळे पर्यटक व व्यावसायिक हतबल झाले आहेत.

दरवर्षी देश-विदेशातील चार लाख पर्यटक वेरूळ-अजिंठा लेणीला भेट देतात. पर्यटकांशिवाय जळगावला जाणाऱ्या प्रवाशांची संख्यासुद्धा मोठी आहे. औरंगाबाद-जळगाव महामार्गाचे रुंदीकरण व काँक्रीटीकरण करण्यात येणार आहे. सध्या औरंगाबाद ते सिल्लोड रस्ता पूर्ण खोदण्यात आला आहे. पहिल्या टप्प्यात वेगाने काम झाले. रस्ता सपाटीकरण करुन पाच किलोमीटर रस्त्याचे काँक्रीटीकरण करण्यात आले. त्यानंतर निधी संपल्यामुळे काम बंद पडले. पूर्ण खोदलेल्या व खडी अंथरलेल्या रस्त्यावरुन प्रवास करणे वाहनचालकांसाठी जिकिरीचे ठरले आहे. खराब रस्त्याचा सर्वाधिक फटका पर्यटन व्यावसायिकांना बसला आहे. रस्ता सुस्थितीत असताना औरंगाबाद ते अजिंठा अंतरासाठी दोन ते अडीच तास लागत होते. सध्या हा प्रवास साडेचार तासांपर्यंत गेला आहे. त्यामुळे पर्यटकांनी अजिंठ्याकडे पाठ फिरवली असून वेरूळ लेणी पाहून ते परतत आहेत. खराब रस्त्यामुळे भाडोत्री वाहनेही अजिंठ्याचे भाडे नाकारत आहेत. दरवर्षी उन्हाळ्याच्या सुटीत असणारी गर्दी यावर्षी घटली आहे. किमान ४० टक्के पर्यटक कमी झाल्याचे स्थानिक व्यावसायिकांनी सांगितले.

दरम्यान, औरंगाबाद ते फर्दापूर या ९९ किलोमीटर अंतरासाठी चार तासांपेक्षा जास्त वेळ लागत आहे. रस्त्याचे काम पूर्ण झाल्यानंतर फक्त दीड तास वेळ अपेक्षित आहे. काम रखडल्यामुळे औरंगाबाद शहरातील टुरिझम प्रमोटर्स गिल्ड सातत्याने पर्यटन मंत्रालय, भारत सरकार व यात्रा व्यवसाय विभागाकडे पत्राद्वारे पाठपुरावा करीत आहे. यापूर्वी केंद्रीय दळणवळण मंत्री नितीन गडकरी यांनाही संघटनेने सविस्तर पत्र पाठवले होते. महामार्गाचे काम तातडीने करण्याची संघटनेची मागणी आहे.

दीर्घकालीन काम

औरंगाबाद ते फर्दापूर रस्त्याचे चौपदरीकरण प्रस्तावित असून नवीन पूल आणि पादचारी मार्ग बांधण्यात येणार आहे. राज्य सरकारने २०१२ मध्ये या प्रकल्पाला मंजुरी दिली होती. एकूण ७४६ कोटींच्या प्रकल्पात केंद्र आणि राज्य सरकारचा हिस्सा आहे. भूसंपादन आणि इतर तांत्रिक प्रक्रियेत काम रखडल्यामुळे रस्ता तातडीने पूर्ण झाला नाही. विधानसभा अध्यक्ष हरिभाऊ बागडे आणि जलसंपदा मंत्री गिरीश महाजन यांनी काही महिन्यांपूर्वी रस्त्याचा आढावा घेतला होता. जुलै महिन्यापर्यंत रस्ता पूर्ण होईल असे सरकारने म्हटले आहे. पण, रस्ते कामाला आणखी एक वर्ष लागण्याची शक्यता आहे.

पर्यटनाची नकारात्मक प्रतिमा

अजिंठा लेणी पाहण्यासाठी आलेले जगभरातील पर्यटक खराब रस्त्याबाबत नाराजी व्यक्त करीत आहेत. देशभरात रस्त्यांची कामे सुरू असून काही दिवस गैरसोय होईल. त्यानंतर पर्यटकांना अत्यंत कमी वेळेत लेणीपर्यंत पोहचता येईल, असे टूर संयोजक सांगतात. त्याला मान्यता देत काही पर्यटक लेणीपर्यंत येतात. मात्र, सोशल मीडियातून रस्त्याची आणि पर्यटनाची नकारात्मक प्रतिमा तयार झाली आहे.

सप्टेंबर-ऑक्टोबरनंतर पर्यटन हंगाम सुरू होईल. त्यापूर्वी रस्त्याचे काम पूर्ण करणे गरजेचे आहे. सध्या पर्यटक कमी आहेत. तरीसुद्धा गैरसोय होऊ नये ही काळजी घेणे आपली जबाबदारी आहे.

जसवंतसिंग राजपूत, अध्यक्ष, टुरिझम प्रमोटर्स गिल्ड

म. टा. प्रतिनिधी, औरंगाबाद

महापालिकेने महावितरणच्या विविध सुविधांवर लावलेल्या करातून थकीत बिलाचे पैसे चुकते होतील. शिवाय महावितरणलाच पालिकेकडे अतिरिक्त रक्कम भरावी लागेल, असा दावा मंगळवारी झालेल्या जिल्हा विद्युतीकरण समितीच्या बैठकीत महापौर नंदकुमार घोडेले यांनी केला.

खासदार चंद्रकांत खैरे यांच्या अध्यक्षतेखाली झालेल्या बैठकीला महापौर नंदकुमार घोडेले, जिल्हा परिषद अध्यक्ष देवयानी डोणगावकर, माजी जिल्हा परिषद अध्यक्ष डॉ. अण्णासाहेब शिंदे, मुख्य अभियंता सुरेश गणेशकर, अप्पर जिल्हाधिकारी पी. एन. सोरमारे उपस्थित होते. बैठकीत खासदार खैरे यांनी पालिकेकडे थकलेल्या वीज बिलाचा मुद्दा मांडला. यावेळी महापौर म्हणाले, 'महापालिकेने महावितरणाच्या विविध सुविधांवर कर लावला आहे. अनेक सुविधांवर कर लावायचा आहे.त्यामुळे थकबाकी, खड्डयांपोटी परत करायचे पैसे पालिकेला परत करण्याची गरज पडणार नाही. उलट पालिकेकडेच महावितरणला पैसे भरावे लागतील. या कराबाबत कायदेशीर कारवाईही केली जाईल,' असा इशाराही त्यांनी दिला. यावेळी वीज सेवा खासगीकरणाचा मुद्दा निघाला. याबाबत खैरे म्हणाले, 'ऊर्जामंत्र्यांसह वरिष्ठ अधिकाऱ्यांना पत्र लिहणार आहे. यापूर्वीचा वीज सेवा खासगीकरणाचा प्रयत्न फसला आहे. यामुळे ६०० कोटी रुपयांचा फटका कंपनीला बसला आहे. पुन्हा असे नुकसान करून घेऊ नका,' असा सल्ला देणार असल्याचे सांगितले. वीजेच्या पायाभूत सुविधांच्या विकासासाठी आगामी जिल्हा नियोजन समितीकडे पाच कोटींची मागणी करा, अशी सूचना खैरे यांनी केली. तर मुख्य अभियंता गणेशकर यांनी जालना जिल्हा नियोजन समितीत दहा कोटींची मागणी केल्याचे सांगितले. त्यानुसार दहा कोटींची मागणी करू, असे खैरे म्हणाले.

\Bवीज रिडिंग न घेता बिल

\Bवीजेमुळे शेतकऱ्यांच्या झालेल्या नुकसान भरपाईबाबत लवकरात लवकर निर्णय घ्या, अशी सूचना खासदार चंद्रकांत खैरे यांनी दिली. वीज रिडिंग न घेता वीज बिल दिल्यामुळे अनेक भुर्दंड सोसावा लागत असल्याची माहितीही समोर आली. अशा एजन्सी चालकांवर कारवाई केल्याची माहिती मुख्य अभियंता सुरेश गणेशकर यांनी दिली. सौर कृषिपंप महापालिकेच्या उद्यान विभागाला मिळेल का, असा प्रश्न यावेळी विचारण्यात आला. यावर गणेशकर यांनी ही योजना फक्त शेतकऱ्यांसाठी आहे, असे सांगितले.

……