म. टा. प्रतिनिधी, औरंगाबाद 'ना खान, ना बाण' ही कॅचलाइन घेऊन आमदार इम्तियाज जलील यांनी प्रचारात शहराचा विकास व विविध प्रश्नांकडे मतदारांचे लक्ष वेधून घेतले. वंचित बहुजन आघाडीने दिलेली साथ आणि 'एमआयएम'वर मुस्लिम मतदारांनी पुन्हा टाकेलेल्या विश्वासामुळे आमदार जलील यांनी लोकसभेत प्रवेश केला आहे. 'वंचित बहुजन आघाडी व काँग्रेसची आघाडी होत असेल, तर औरंगाबादमधून एमआयएम उमेदवार देणार नाही,' असे खासदार असदुद्दीन ओवेसी यांनी लोकसभा निवडणुकीपूर्वी स्षप्ट केले होते. यानंतर जनता दल धर्मनिरपेक्षचे पक्षाध्यक्ष माजी पंतप्रधान एच. डी. देवेगौडा यांनी संपर्क केल्यामुळे अॅड. प्रकाश आंबेडकर यांनी औरंगाबादमधून माजी न्यायमूर्ती बी. जी. कोळसे पाटील यांची उमेदवारी घोषित केली होती. पण, जनता दलाचे शहरात काहीच अस्तित्व राहिले नसताना ही उमेदवारी एमआयएमच्या स्थानिक कार्यकर्त्यांना पचनी पडली नाही. येथे एक आमदार आणि २६ नगरसेवक असल्यामुळे ही जागा एमआयएमने लढवावी, असा आग्रह कार्यकर्त्यांनी खासदार ओवेसी यांच्याकडे धरला. एमआयएमचा उमेदवार द्यावा की नाही, याचा आढावा घेऊन खासदार ओवेसी यांनी अखेर मुंबई येथील एका सभेनंतर आंबेडकर यांची भेट घेऊन एमआयएमला महाराष्ट्रात एक जागा देण्याची गळ घातली. आंबेडकरांनी त्याला संमती दिल्यानंतर आमदार जलील यांना उमेदवारी देण्याचा निर्णय हैदराबाद येथून जाहीर करण्यात आला. आमदार जलील यांनी 'ना खान, ना बाण' या मुद्यावर निवडणूक प्रचार सुरू केला. वंचित बहुजन आघाडीला सोबत घेतल्यामुळे समता सैनिक दलापासून गाव पातळीवरील आंबेडकरी कार्यकर्त्यांनी जलील यांच्या प्रचारासाठी दिवसरात्र एक केला. आंबेडकर यांनी शेवटच्या टप्प्यात जलील यांच्या प्रचारात भाग घेतल्यामुळे, जलील यांना बळ मिळाले. मुस्लिम मतदारांत सुरुवातीला एमआयएमबद्दल काही प्रमाणात नाराजी होती. पण, तीन दिवस शहरात प्रचार करत खासदार ओवेसी यांनी ही नाराजी दूर केली. आमदार जलील यांनी शहर विकासावर प्रचार केंद्रीत केल्याने सर्व धर्मीय मतदारांनी त्यांच्या पारड्यात मत टाकले. …… \Bराजा भैय्यांची सभा एमआयएमच्या पथ्यावर \B एमआयएमला डिवचण्यासाठी, तसेच एका धर्माची मते एकत्रित करण्यासाठी हैदराबादचे आमदार राजा भैय्या यांची सभा सिडकोमध्ये घेण्यात आली. त्यांच्या वादग्रस्त वक्तव्यामुळे शिवसेनेला हिंदूंची मते एकत्र करण्यात यश आले असले तरी, काँग्रेसकडे जाणारी मुस्लिम मते एमआयएमकडे वळली. ही सभा एमआयएमच्या पथ्यावरच पडली. त्याचवेळी काँग्रेसचे नवज्योतसिंग सिद्धू यांच्या आझाद चौकात झालेल्या सभेचा मतदारांवर काहीही परिणाम झाला नाही. … \B'एमआयएम'मध्ये आमदारकीसाठी गर्दी \B 'एमआयएम'चे औरंगाबाद मध्यचे आमदार इम्तियाज जलील यांना लोकसभा निवडणुकीत प्रमोशन मिळाले आहे. यामुळे औरंगाबाद मध्य विधानसभा मतदारसंघ लढवण्यासाठी इच्छुकांची संख्या वाढली आहे. … नाराजांचा गट आणखी नाराज आमदार इम्तियाज जलील यांना उमेदवारी देऊ नये यासाठी काही नेते कार्यरत होते. ते लोकसभेत पराभूत होतील असा त्यांचा विश्वास होता. जलील यांचा विजय झाल्याने नाराजांचा गट अधिक नाराज झाला आहे. …
मोबाइल अॅप डाउनलोड करा आणि राहा अपडेट
