महापालिका स्थायी समिती सभापतिपदाचा उमेदवार ठरविण्यासाठी बुधवारी भाजप कोअर कमिटीची बैठक झाली, मात्र नावाबाबत एकमत झाले नाही. त्यामुळे कमिटीतील इतर सदस्यांसोबत चर्चा करून उमेदवाराचा निर्णय घेतला जाणार आहे. पक्षाचे संघटक भाऊराव देशमुख हे इतर सदस्यांशी चर्चा करणार असल्याचे सूत्रांनी सांगितले.
स्थायी समिती सभापतींची निवड ४ जून रोजी होणार असून यंदा ते युतीतील करारानुसार, भाजपला मिळणार आहे. राजू शिंदे यांचे नाव आघाडीवर असून पूनम बमणे यांनी जोमाने तयारी केली आहे, ऐनवेळी जयश्री कुलकर्णी यांचीही वर्णी लागू शकते, अशी परिस्थिती आहे. उस्मानपुरा येथील भाजपच्या विभागीय कार्यालयात झालेल्या बैठकीला संघटक भाऊराव देशमुख, शहराध्यक्ष किशनचंद तनवाणी, आमदार अतुल सावे, प्रदेश कार्यकारणी सदस्य अनिल मकरिये, प्रदेश चिटणीस मनोज पांगारकर, शहर सरचिटणीस कचरू घोडके, माजी शहराध्यक्ष भगवान घडमोडे, बसवराज मंगरुळे आदी उपस्थित होते. बैठकीत उमेदवार म्हणून राजू शिंदे यांच्यासह अन्य नावांवर चर्चा झाली. परंतु, एकमत होऊ शकले नाही.
इतर सदस्यांसोबत चर्चेनंतर निर्णय
भाजप महिला आघाडीच्या राष्ट्रीय अध्यक्षा विजय रहाटकर, प्रदेश उपाध्यक्ष डॉ. भागवत कराड, प्रदेश प्रवक्ते शिरीष बोराळकर हे कोअर कमिटी सदस्य नरेंद्र मोदी यांच्या शपथविधीसाठी दिल्लीला रवाना झाल्याने बैठकीस उपस्थित नव्हते. संघटन मंत्री देशमुख हे त्यांच्यासोबत चर्चा करून उमेदवार ठरवतील, असा निर्णय बैठकीत झाल्याची माहिती तनवाणी यांनी 'मटा'ला दिली. उमेदवारीचा निर्णय सर्वानुमते होईल, असे डॉ. कराड यांनी सांगितले. भाजपच्या उमेदवारास शिवसेनेचा पाठिंबा राहील व सभापती हा युतीचा होईल, असेही त्यांनी नमूद केले.
मोबाइल अॅप डाउनलोड करा आणि राहा अपडेट
