म. टा. प्रतिनिधी, औरंगाबाद, येत्या काही दिवसांत पावसाचे आगमन होणार असून, विभागीय प्रशासनाकडून संभाव्य आपत्ती निवारणासंदर्भात सूचना देण्याचे काम सुरू करण्यात आले आहे, मराठवाड्याच्या आठही जिल्ह्यांत तब्बल ६५५ गावे पूरप्रवण म्हणून घोषित करण्यात आली असून, १४६९ गावे नदीकाठावर असल्याने ही गावांनाही पुराचा धोका राहणार आहे. पूरप्रवण गावांमध्ये सर्वाधिक १७४ नांदेड जिल्ह्यातील आहेत. मराठवाड्यात प्रामुख्याने गोदावरी, दुधना, सिंदफणा, पूर्णा, मांजरा आणि तेरणा या प्रमुख नद्या असून, पावसाळ्यात अतिवृष्टीनंतर या नद्यांना पूर येण्याचा इतिहास आहे. अतिवृष्टीनंतर; तसेच जायकवाडी धरणात ऊर्ध्व भागातून पाणी सोडल्यानंतर अनेक गावांना पुराचा वेढा असतो. २७ जुलै २००५ रोजी अतिवृष्टीनंतर जालना, परभणी, हिंगोली, नांदेड जिल्ह्यांमध्ये गोदावरी व दुधना नद्यांना पूर आला होता त्यावेळी १०८ गावे बाधित झाली होती, पाच आणि सात ऑगस्ट २००६ रोजी झालेल्या अतिवृष्टीनंतर आलेल्या पुरामुळे औरंगाबाद, जालना व नांदेड जिल्ह्यातील ११३ गावे बाधित झाली होती. १९ आणि २२ सप्टेंबर २००८ रोजी अतिवृष्टी झाली होती. जायकवाडी धरणातील पाणी सोडल्यामुळे गोदावरी नदीस पूर आला होता यावेळीही जिल्ह्यातील २३ गावे बाधित झाली होती; तसेच २०१३मध्येही जालना, परभणी, हिंगोली आणि नांदेड जिल्ह्यांमध्ये पूर आला होता. २०१६मध्ये जायकवाडी धरणाच्या ऊर्ध्व भागातील प्रकल्पातील पाणी सोडण्यात आल्यामुळे औरंगाबाद जिल्ह्यातील वैजापूर तालुक्यातील १७ तर, गंगापूर तालुक्यातील नऊ गावांना पुराने वेढले होते. यंदाही मराठवाड्यातील ६५५ गावांना पुराचा धोका असून, नदीकाठच्या ब्लू आणि रेडलाइनमध्ये समाविष्ट करण्यात आलेली अन्य १४६९ गावांनाही पुराच्या दृष्टीकोणातून धोक्याचा इशारा देण्यात आला आहे. मराठवाड्यातील सर्व जिल्हा प्रशासनांनी मान्सूनपूर्व तयारी बैठक घेतल्यानंतर विभागीय प्रशासनाकडून नुकतीच बैठक घेण्यात आली. यामध्ये जिल्हा प्रशासनाला सतर्क राहण्याचे निर्देश देण्यात आले आहेत. जिल्हानिहाय पूरप्रवण गावे जिल्हा............ गावांची संख्या........ नदीकाठची गावे औरंगाबाद.........४३..........................१६५ जालना.............४७..........................१७६ परभणी.............१०३.........................११८ हिंगोली.............७१...........................७० नांदेड..............१७४.........................३३७ बीड...................५३........................३९६ लातूर...............७८...........................१५९ उस्मानाबाद.......८६..........................१३८ एकूण.................६५५.....................१४६९
मोबाइल अॅप डाउनलोड करा आणि राहा अपडेट