म. टा. प्रतिनिधी, औरंगाबाद जुनी पेन्शन योजना लागू करणे या मागणीसाठी विविध शिक्षक संघटनेने एकसंघ होऊन आक्रमक पवित्रा घेण्याचा निर्णय घेतला आहे. मागणीसंदर्भात सरकार धोरणात्मक निर्णय घेत नाही तोपर्यंत विविध मार्गाने आंदोलनाचा निर्णय संघटनांनी घेतला आहे. शासनाचे लक्ष वेधण्यासाठी शाळेच्या पहिल्या दिवशी काळ्या फिती लावून शिक्षक, शिक्षकेत्तर कर्मचारी सोमवारी आंदोलन करणार आहेत. जुनी पेन्शन योजना लागू करा, अशी अनेक दिवसांपासून शिक्षकांची मागणी आहे. या मागणीसाठी शैक्षणिक वर्षाच्या पहिल्या दिवशी काळ्या फिती लावून काम करत सरकारचे लक्ष वेधणार असल्याचे संटनांच्या प्रतिनिधींनी सांगितले. आंदोलनात राष्ट्रवादी शिक्षक संघ, पुरोगामी शिक्षक-शिक्षकेत्तर संघटना, नॅशनल टीचर्स युनियन, उर्दू शाळा संघर्ष समिती, विना अनुदानित कृती समिती शिक्षक संघटना आदींचा समावेश आहे. आंदोलनाचा एक भाग सोमवारी आझाद मैदानावर एकदिवशीय धरणे आंदोलनही करण्यात येणार आहे. शिक्षक आमदार विक्रम काळे यांच्या नेतृत्वाखाली हे आंदोलन करण्यात येणार आहे. आंदोलनामध्ये सहभागी होण्याचे आवाहन राष्ट्रवादी शिक्षक संघाचे जिल्हाध्यक्ष प्रदीप विखे, वाहेद शेख, प्रवीण वेताळ, इल्लाउद्दीन फारूकी, सुधाकर पवार, दिलीप कोळी, आर. चव्हाण, शाहुराज मुंगळे, चंद्रकांत चव्हाण, विजय साबळे, विजय चव्हाण, मिर्झा सलीम बेग, प्रा. शेख मनसूद, प्रल्हाद शिंदे, परवेज कादरी, मिर्झा इजाज बेग यांनी केले आहे.
मोबाइल अॅप डाउनलोड करा आणि राहा अपडेट
