म. टा. प्रतिनिधी, औरंगाबाद

लीजच्या जागांचे लोढणे वागवणाऱ्या मालमत्ता विभागाला हलगर्जीपणाबद्दल जाब विचारणार असल्याचा इशारा महापौर नंदकुमार घोडेले यांनी दिला. पुढील आठवड्यात याच विषयाच्या संदर्भात मालमत्ता विभागाची स्वतंत्र बैठक घेतली जाईल, असे ते म्हणाले.

'लीजचे लोढणे' ही वृत्तमालिका 'मटा'ने प्रसिद्ध केली. महापालिकेने स्वत:च्या मालकीच्या अनेक जागा नाममात्र भाडे आकारून संस्थांना भाडेपट्ट्यावर दिल्या आहेत. त्यामुळे पालिकेचे मोठ्या प्रमाणावर आर्थिक नुकसान होत आहे. भाडेपट्ट्याचे करार केलेल्या अनेक व्यक्ती आणि संस्थांबरोबरच्या कराराच्या प्रती महापालिकेच्या मालमत्ता विभागात उपलब्ध नाहीत. काहींच्या तर मूळ फाइल गायब झालेल्या आहेत. नाममात्र भाडे असताना देखील अनेकांनी काही वर्षांपासून पालिकेकडे भाडे भरलेले नाही. त्यामुळे लाखो रुपयांची थकबाकी लीजधारकांकडे आहे. ही थकबाकी वसूल करण्यासाठी देखील मालमत्ता विभागाने विशेष परिश्रम घेतले नाहीत, या सर्व बाबींचा भांडाफोड वृत्त मालिकेत करण्यात आला. या मालिकेची दखल महापौर नंदकुमार घोडेले यांनी घेतली. या संदर्भात बोलताना ते म्हणाले, 'मटा' ने अत्यंत महत्त्वाच्या विषयाला हात घातला आहे. लीजवर देण्यात आलेल्या जागांकडे पालिकेच्या मालमत्ता विभागाचे दुर्लक्ष आहे, हे यातून स्पष्ट झाले आहे. त्यामुळे केवळ याच विषयाबद्दल पुढील आठवड्यात मालमत्ता विभागाची बैठक घेण्याचे नियोजन केले आहे.'

मालमत्ता विभागाच्या दुर्लक्षामुळे महापालिकेचे मोठे नुकसान होत आहे ही बाब लक्षात आली आहे. आढावा बैठकीत संबंधितांना जाब विचारला जाईल. त्यांच्याकडून खुलासे मागवले जातील. खुलासे समाधानकारक नसतील तर, संबंधितांवर कारवाई देखील केली जाईल.

- नंदकुमार घोडेले, महापौर

म. टा. प्रतिनिधी, औरंगाबाद

'देशातील सात लाख खेडी स्वयंपूर्ण झाली तरच देशाची प्रगती होईल, अशी महात्मा गांधी यांची 'ग्रामस्वराज्य' संकल्पना होती. स्वातंत्र्यानंतर गाव पातळीवर जातीपातीचा विचार बळकट होऊन ही आदर्श संकल्पना उध्वस्त झाली. गावांना विकसित करण्याचे सामर्थ्य गांधी विचारात आहे', असे प्रतिपादन ज्येष्ठ पत्रकार अरूण खोरे यांनी केले. ते व्याख्यानात बोलत होते.

महात्मा गांधी यांच्या १५०व्या जयंती वर्षानिमित्त महात्मा गांधी मिशन संस्थेच्या वतीने ज्येष्ठ पत्रकार अरूण खोरे यांचे व्याख्यान आयोजित करण्यात आले होते. आइन्स्टाइन सभागृहात शनिवारी दुपारी 'गांधीजींच्या स्वप्नातील ग्रामस्वराज्य' या विषयावर खोरे यांनी विचार मांडले. यावेळी डॉ. सुधीर गव्हाणे, जलतज्ज्ञ या. रा. जाधव, द्वारकाभाऊ पाथ्रीकर, गांधी विचारांचे अभ्यासक देशपांडे यांची प्रमुख उपस्थिती होती. ग्रामस्वराज्य विकासातील टप्प्यांचा आढावा घेत खोरे यांनी भाष्य केले. 'महात्मा गांधी यांनी देशाला व जगाला शेकडो संकल्पना दिल्या. त्यात ग्रामस्वराज्य संकल्पना आहे. दक्षिण आफ्रिकेतून गांधीजी १९१५मध्ये भारतात परतले. नीळ उत्पादक शेतकऱ्यांच्या हक्कांसाठी केलेल्या चंपारण्य सत्याग्रहापासून त्यांचे ग्रामीण प्रश्नांकडे लक्ष वेधले गेले. या सत्याग्रहाच्या निमित्ताने गांधीजींनी खरा भारत पाहिला. खेड्यातील गरिबी, निरक्षरता, अस्वच्छता, अज्ञान यांनी ते व्यथित झाले. शेतकरी व कामगारांचे प्रश्न समजून घेतले. चंपारण्यचा अनुभव, 'हिंदस्वराज्य' पुस्तक यांची सांधेजोड म्हणजे ग्रामस्वराज्य संकल्पना. गांधीजी आणि कस्तुरबा गांधी यांनी गावागावात स्वच्छतेचे धडे दिले. नियमित नखं कापा, रस्ते स्वच्छ ठेवा, शारिरीक स्वच्छता ठेवा, प्रातर्विधी करण्याच्या जागा ठरवा, सांडपाणी व कचऱ्याची योग्य विल्हेवाट लावा याचे धडे ग्रामीण भागात दिले. कस्तुरबांनी महिलांशी संवाद साधत स्वच्छतेचे महत्त्व पटवले. गाव हा घटक गृहीत धरताना जातीपातीचा विचार सोडा आणि अस्पृश्यता पाळू नका असा संदेश दिला. खेड्याकडे चला असा संदेश गांधीजी देत होते. तर खेडी सोडा असा संदेश डॉ. बाबासाहेब आंबेडकर यांनी दिला. दोन्ही नेत्यांचा संदेश योग्य होता. पण, त्या विचारांचा अनुनय करणारे आपण सर्वजण चुकलो असे खेदाने म्हणावे लागेल', असे खोरे म्हणाले. तत्कालीन राजकारण, स्वातंत्र्य चळवळ, गांधी विचार आणि खेड्यांची स्थिती यांचा आढावा घेत खोरे यांनी ग्रामस्वराज्य संकल्पना उलगडली. प्रा. आशा देशपांडे यांनी सूत्रसंचालन केले. यावेळी विद्यार्थी, प्राध्यापक व नागरिक उपस्थित होते.

\Bगांधी विचारांचा अवलंब

\B'पंतप्रधान नरेंद्र मोदी यांनी आपल्या धोरणात खेड्यांसाठी राबवलेल्या दोन योजना अत्यंत चांगल्या आहेत. स्वच्छता अभियान आणि आदर्श ग्रामसंसद योजना. या योजनांनी खेड्यांचा बराच कायापालट होत आहे. या योजना गांधी विचारांना अनुकूल व अनुरूप आहेत. त्यातून खेड्यांची परिस्थिती बदलत असून स्वच्छतेबाबत जागरुकता वाढली आहे,' असे खोरे यांनी सांगितले.

म. टा. प्रतिनिधी, औरंगाबाद

कामाच्या कारणावरून वाद झाल्यानंतर दुसऱ्या ठिकाणाहून आलेल्या कामगारांना डांबून ठेवून त्यांना मारहाण केल्याची घटना सिडकोत घडली. या प्रकरणी मारहाण करणाऱ्यांविरोधात सिडको पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, सुरेश विश्वनाथ कांबळे (वय २८, रा. एमआयडीसी, चिकलठाणा) हे मालकाच्या कामासाठी पुण्यातून औरंगाबादला आले होते. राष्ट्रवादी भवनच्या डाव्या बाजूस असलेल्या नवजीवन कॉलनी एन - ११ हडको येथे हे काम सुरू होते. कामावर कांबळे, कामगार आणि क्रेनचालक नवनाथ कुटे यांचे वाद झाले. त्यानंतर मालकाने सांगितल्याप्रमाणे कांबळे यांनी काम पूर्ण करण्यासाठी दुसरा क्रेन मागवला. हा क्रेन का मागवला, या कारणावरून कांबळे व कुटे यांच्यात पुन्हा वाद झाला. कांबळे यांना बळजबरीने टेम्पोमध्ये बसवून नारेगाव येथील गोदामात २० जून रोजी रात्री ८ ते २१ जूनच्या सकाळी १०.३०पर्यंत डांबून ठेवले. पोलिसात तक्रार केली तर, जीवे मारण्याची धमकीही नवनाथ कुटे (रा. नारेगाव), राऊतराय पाटील या दोघांनी दिली. या दोघांच्याविरोधात सिडको पोलिस ठाण्यात गुन्हा दाखल करण्यात आला आहे.

म. टा. प्रतिनिधी, औरंगाबाद

'भूमिकेची जाण, विलक्षण अभिनयक्षमता आणि शिस्तप्रिय असलेले गिरीश कार्नाड समर्पण वृत्तीचे कलावंत होते. या कलाकाराने प्रत्येक पिढीतील कलाकारांना अचूक मार्गदर्शन केले. त्यांच्या व्यक्तिमत्त्वातील प्रत्येक पैलू अनुकरणीय होता', असे प्रतिपादन दिग्दर्शक शिव कदम यांनी केले. ते 'चित्रपट चावडी' उपक्रमात बोलत होते.

यशवंतराव चव्हाण प्रतिष्ठान आणि एमजीएम फिल्म आर्टस यांच्या वतीने 'चित्रपट चावडी' उपक्रमात जब्बार पटेल दिग्दर्शित 'उंबरठा' चित्रपट दाखवण्यात आला. व्ही. शांताराम प्रेक्षागृहात शनिवारी सायंकाळी हा उपक्रम झाला. दिवंगत अभिनेते गिरीश कार्नाड यांना आदरांजली वाहण्यासाठी 'उंबरठा' चित्रपटाचे प्रदर्शन करण्यात आले. १९८१मध्ये प्रदर्शित झालेल्या 'उंबरठा' चित्रपटाने परित्यक्त्या स्त्रियांचा प्रश्न समाजासमोर आणला होता. स्मिता पाटील व गिरीश कार्नाड यांच्या मुख्य भूमिका असलेल्या चित्रपटाने सामाजिक प्रश्नावर सडेतोड भाष्य केले होते. उत्तम गाणी, कथा आणि दिग्दर्शन असलेल्या 'उंबरठा' पाहताना रसिक मुग्ध झाले. या उपक्रमाला ज्येष्ठ साहित्यिक रा. रं. बोराडे, एमजीएमचे विश्वस्त सचिव अंकुशराव कदम, प्राचार्य रेखा शेळके, प्रतिष्ठानचे नीलेश राऊत, सुबोध जाधव यांची उपस्थिती होती. श्रीकांत देशपांडे यांनी सूत्रसंचालन केले.

\Bकार्नाड यांच्या आठवणी

\B'सरगम' चित्रपटानिमित्त दिग्दर्शक शिव कदम यांना कार्नाड यांचा सहवास लाभला. कलाकार आणि माणूस म्हणून कार्नाड यांचे मोठेपण कदम यांनी सांगितले. नाट्यशास्त्र विभागात शिकत असताना कार्नाड यांच्या 'नागमंडल' नाटकाचा प्रयोग केला होता. तेव्हापासून कार्नाड यांच्याशी भावबंध जुळले होते. 'सरगम' चित्रपटामुळे पुन्हा उजाळा मिळाला अशी आठवण कदम यांनी सांगितली. 'सरगम' चित्रपटाचा काही भाग दाखवून चित्रीकरणाचा अनुभवही त्यांनी कथन केला.

म. टा. प्रतिनिधी, औरंगाबाद

'ऊर्जाक्षेत्रातील बदलामुळे महानिर्मिती कंपनीला वेगवेगळ्या परिवर्तनातून जावे लागत आहे. आधी विजेचा तुटवडा आणि आता मुबलकता अशी परिस्थिती निर्माण झाली आहे. वीज खरेदी ग्राहकांवर अवलंबून आहे. वीज निर्मितीसाठी कोट्यवधी रुपये खर्च करून उभारलेले प्रकल्प बंद पडत आहेत. सध्या बँकेच्या कृपेवर महानिर्मितीचे पगार सुरू आहेत. त्यामुळे आगामी काळात कंपनीचे भविष्य खडतर आहे,' अशी कबुली शनिवारी महानिर्मितीचे संचालक चंद्रकांत थोटवे यांनी दिली.

ऊर्जा दिनानिमित्त शनिवारी भानुदास चव्हाण सभागृहात ऊर्जा सहयोग औरंगाबाद, जायटंस ग्रुप ऑफ औरंगाबाद, दि इन्स्टिट्यूट ऑफ इंजिनिअर्स यांच्या वतीने कार्यक्रमाचे आयोजन करण्यात आले होते. यावेळी महानिर्मितीचे संचालक चंद्रकांत थोटवे, मुख्य अभियंता सुरेश गणेशकर, डॉ. उत्तम काळवणे, सुभाष मांगुळकर, वीरेंद्र सोनी यांची उपस्थिती होती. यावेळी थोटवे म्हणाले, '२००५नंतर महानिर्मिती, महावितरण आणि महापारेषण कंपनी तयार झाली. महानिर्मिती कंपनी झाल्यानंतर ऊर्जा निर्मितीसाठी कामाकडे लक्ष देण्यात आले. महानिर्मिती कंपनीने जेव्हा काम हाती घेतले, तेव्हा राज्याला वीजेची गरज होती. त्यासाठी विविध थर्मल प्रकल्प तयार केले. यानंतरच्या काळात खासगी कंपन्यांनाही वीज निर्मितीचे प्रकल्प सुरू करण्यासाठी परवानगी दिली. जेव्हापर्यंत महानिर्मिती कंपनीचे एकाधिकार होते, तेव्हापर्यंत वीजेचे दर हे कंपनीनुसार होते. मात्र वीज निर्मिती करणारे प्रकल्प वाढल्यानंतर मुबलक वीज निर्मिती सुरू झाली. आज ग्राहकांना ज्या ठिकाणाहून वीजेचे दर कमी मिळतात. ते तेथून वीज खरेदीला प्राधान्य देत आहेत. याचा फटका महानिर्मितीसारख्या कंपन्यांना बसत आहे. सोलार ऊर्जा निर्मितीचे प्रयोग सुरू झाले. वीज साठविण्याची कोणतीही व्यवस्था नसल्याने यामुळे मिनीट टू मिनीट वीज निर्मिती व्यवस्थापन सुरू करण्यात आले. यामुळे आता थर्मल स्टेशनची वीज निर्मिती बंद करावी लागत आहे. सध्या बँकेच्या सहकार्याने महानिर्मितीचे पगार सुरू आहे. आगामी काळात औद्योगिक विकास पुन्हा झाल्याने, हे पगार मिळणार किंवा नाही. यात शंका आहे. सोलार ऊर्जा ही शाश्वत असल्याचे सांगितले जाते. मात्र, ढग आला किंवा पाऊस आला तर, सोलारमध्ये वीज तयार होत नाही. आगामी काळात विदेशातून वीज साठविण्याच्या बॅटऱ्या येतील. या बॅटऱ्याचे गणित देशातील लोकांना जमल्यानंतर या बॅटऱ्याही बंद होतील, असेही भाकित थोटवे यांनी व्यक्त केले.

…………

\Bमुख्य अभियंता बसले अंधारात…

\Bशहरात पाऊस पडताच ऊर्जा दिनासाठी आयोजित कार्यक्रमाच्या सभागृहाचा वीज पुरवठा बंद पडला. इर्न्व्हटर चालू केल्यानंतर पुन्हा कार्यक्रम सुरू झाला. हा वीज पुरवठा सुरळीत होईपर्यंत महावितरणाचे मुख्य अभियंता सुरेश गणेशकर यांनाही अंधारात बसावे लागले. इतके होऊनही वीज गेल्याच्या कारणाबाबत विलास काबरा यांनीही महावितरणाची बाजू घेतली हे विशेष.

…………

म. टा. प्रतिनिधी, औरंगाबाद

उद्योग राज्यमंत्री अतुल सावे हे मंत्रिपदाची शपथ घेतल्यानंतर रविवारी प्रथमच शहरात दाखल होत आहे. त्यानिमित्ताने त्यांच्या स्वागतासाठी भाजपने जोरदार तयारी केली आहे.

सकाळी नऊ वाजता सावे यांचे आगमन होणार असून, नगरनाका येथून वाहनफेरी काढण्यात येणार आहे. क्रांतीचौक येथे छत्रपती शिवाजी महाराज पुतळ्यास अभिवादन करून पैठण गेट, गुलमंडी, सिटी चौक मार्गे फेरी भडकलगेट येथे ही फेरी जाईल. तेथे महामानव डॉ. बाबासाहेब आंबेडकर यांना अभिवादन करण्यात येईल. त्यानंतर राजाबाजार येथील संस्थान गणपती मंदिर येथे फेरीची सांगता होणार आहे. सावे दुपारी १२ ते २ वाजता पुंडलिकनगर तर, संध्याकाळी ५ वाजता बजरंग चौक आणि सायंकाळी ७ वाजता कैलासनगर येथील संपर्क कार्यालयात नागरिकांना भेटणार आहेत. दुष्काळ व पाणीटंचाईमुळे साधेपणाने स्वागत होणार असून पुष्पगुच्छ ऐवजी शालेय वह्या देऊन स्वागत करावे, तसेच भाजप कार्यकर्त्यांनी मोठ्या संख्येने उपस्थित राहावे, असे आवाहन पक्षातर्फे करण्यात आले आहे.

\Bव्यापारी, उद्योजक संघटनेतर्फे सत्कार

\Bमसिआ, सीएमआयए, डब्ल्यू आयए, लघुउद्योग भारती, व्यापारी महासंघ, सीआयआय, सीए संघटना व इतर संघटनेतर्फे राज्यमंत्री सावे यांचा सत्कार करण्यात येणार आहे. चिकलठाणा येथील मसिआ कार्यालयात दुपारी अडीच वाजता या सत्कार सोहळ्याचे आयोजन करण्यात आले आहे.

म. टा. प्रतिनिधी, औरंगाबाद

महापालिकेच्या प्रश्नांबद्दल चर्चा करून निर्णय घेण्यासाठी मुख्यमंत्र्यांच्या उपस्थितीत पुढील आठवड्यात मुबंईत बैठकीचे आयोजन केले जाईल, असे आश्वासन पालकमंत्री एकनाथ शिंदे यांनी महापौर नंदकुमार घोडेले यांच्यासह महापालिका पदाधिकाऱ्यांना दिले आहे.

शिवसेनेचे पक्षप्रमुख उद्धव ठाकरे यांच्या औरंगाबाद दौऱ्याच्या निमित्ताने शिंदे शहरात आले होते. शुक्रवारी सायंकाळी त्यांचे शहरात आगमन झाले. रात्री उशिरा त्यांनी महापालिकेच्या पदाधिकाऱ्यांबरोबर चर्चा केली. महापौरांनी त्यांच्यासमोर काही महत्त्वाचे मुद्दे मांडले. शिवसेनाप्रमुख बाळासाहेब ठाकरे यांच्या स्मारकाच्या कामाला तांत्रिक मंजुरी आवश्यक आहे. सार्वजनिक बांधकाम विभागाकडून ती मिळावी. नवीन पाणीपुरवठा योजनेचे सादरीकरण नगरविकास खात्याच्या प्रधान सचिवांच्या समोर झाले आहे. या योजनेसंदर्भात शासनस्तरावर निर्णय घ्यावा व लवकरात लवकर काम सुरू करावे, क्रांती चौकातील छत्रपती शिवाजी महाराजांच्या पुतळ्याची उंची वाढवण्याच्या कामासाठी शासनाकडून आर्थिक मदत मिळावी, सव्वादोनशे कोटींच्या रस्त्यांच्या यादीला मंजुरी मिळून निधी उपलब्ध व्हावा, अटलबिहारी वाजपेयी यांच्या स्मारकाच्या कामासाठी निधी द्यावा, विविध महापुरुषांच्या नावाने संशोधनकेंद्र उभारण्याचे काम करायचे आहे. त्याला शासनस्तरावर मंजुरी मिळावी या विषयांबद्दल पालकमंत्र्यांशी सकारात्मक चर्चा झाल्याचे महापौरांनी सांगितले. या सर्व प्रश्नांबद्दल चर्चा करण्यासाठी पुढील आठवड्यात मुख्यमंत्र्यांची वेळ घेवून बैठकीचे आयोजन करतो असे पालकमंत्री म्हणाल्याचे महापौरांनी स्पष्ट केले.

\Bपक्षप्रमुखांनाही विनंती\B

चिकलठाणा येथील कचरा प्रक्रिया प्रकल्पाचे लोकार्पण, सरदार वल्लभभाई पटेल यांच्या पुतळ्याचे अनावरण, महात्मा फुले आणि सावित्रीबाई फुले यांच्या पुतळ्याचे अनावरण, रोझगार्डनचे उद्घाटन यासाठी वेळ द्या, अशी विनंती माजी खासदार चंद्रकांत खैरे यांच्या माध्यमातून उद्धव ठाकरे यांना करण्यात आली आहे. लवकरच ते वेळ देतील, असा विश्वास महापौरांनी व्यक्त केला.

म. टा. प्रतिनिधी, औरंगाबाद

'इंडो जर्मन टूल रूम'च्या विविध अभ्यासक्रमांसाठी रविवारी प्रवेशपूर्व परीक्षा घेतली जाणार आहे. राज्यभरात बाराशेपेक्षा अधिक विद्यार्थ्यांनी यंदा परीक्षेला नोंदणी केली आहे. एका जागेसाठी दहापेक्षा अधिक विद्यार्थी रांगेत आहेत.

सुक्ष्म, लघु व मध्यम उद्योग मंत्रालयातंर्गत असलेल्या या संस्थेत दहावी, बारावी, आयटीआय, पदवीसह अभियांत्रिकी पदवी पूर्ण केलेल्या विद्यार्थ्यांसाठी अभ्यासक्रमांचे डिझाइन करण्यात आले आहे. अर्ज भरण्याची प्रक्रिया १६ जूनला संपली. अभ्यासक्रमामध्ये 'अॅडव्हॉन्स डिप्लोमा इन टूल अँड डाय मेकिंग' हा महत्वाचा चार वर्ष कालावधीच्या अभ्यासक्रमासह'डिप्लोमा इन मेकॅट्रॉनिक्स' या तीन वर्ष कालावधीच्या आणि 'सर्टिफिकेट्स कोर्स इन मशिनीस्ट' या दोन वर्ष कालावधीचा समावेश आहे. पहिल्या दोन अभ्यासक्रमासाठी प्रत्येकी साठ प्रवेश क्षमता तर, 'सर्टिफिकेट्स कोर्स इन मशिनीस्ट'साठी २० विद्यार्थ्यांना प्रवेश दिला जातो. हा अभ्यासक्रम नॅशनल स्किल्स क्वालिफिकेशन्स फ्रेमवर्क (एनएसक्यूएफ) अंतर्गत आहे. परीक्षेनंतर गुणवत्ता यादी प्रसिद्ध करीत गुणाणुक्रमे प्रवेश दिला जातो. परीक्षा सकाळी ९ ते ११ या दरम्यान होणार आहे. असे असले तरी, विद्यार्थ्यांना आठ वाजता केंद्रावर उपस्थित रहायचे आहे. अद्ययावत तंत्रज्ञानावार आधारित अभ्यासक्रमांसाठी ओळखल्या जाणाऱ्या या संस्थेतील प्रवेशासाठी राज्यभरातून विद्यार्थी गर्दी करतात. मागील वर्षीच्या तुलनेत यंदा परीक्षार्थींची संख्या वाढली आहे. सर्वाधिक 'अॅडव्हॉन्स डिप्लोमा इन टूल अँड डाय मेकिंग' या अभ्यासक्रमाला विद्यार्थ्यांची मागणी असते.

म. टा. प्रतिनिधी, औरंगाबाद

हज हाउसच्या सभागृहाचे छत टाकताना पिलर कोसळल्याने काही मजूर जखमी झाल्याची घटना शनिवारी सायंकाळी घडली. या घटनेनंतर सिडको अधिकाऱ्यांनी घटनेची पाहणी केली.

सध्या हज हाउसचे काम सुरू असून, ते २०२०पर्यंत पूर्ण करावयाचे आहे. या हज हाउसच्या दर्शनी भागातून आत जाणाऱ्या एका सभागृहाच्या छताचे काम शनिवारी केले जात होते. हे काम करताना या छताला लागून असलेला पिलरमध्ये माल भरताना या पिलला लावलेले लोखंडी आवरण निखळून पडले. यामुळे या पिलरमधील माल आणि इतर भाग खाली कोसळला. या ठिकाणी काही मजूर जखमी झाल्याची माहिती समोर आली आहे. ही घटना घडताच सिडको विभागाचे अधीक्षक अभियंता अनिल बोरसे यांनी भेट देऊन या घटनेची माहिती घेतली. त्यांनी योग्य ते नियोजन करून सुरक्षित काम करण्याबाबत आदेश दिले. हज हाऊसमध्ये झालेल्या या घटनेनंतर तिथे तयार होणारा मुख्य पिलर वाकडा झाला असून, तो पुन्हा तयार करण्याचे काम केले जात असल्याची माहिती या ठिकाणी काम करणाऱ्यांकडून देण्यात आली आहे. हज हाउसमध्ये असा छोट्या-मोठ्या घटना नेहमी घडतात. मात्र, या घटनेची बाहेर जास्त वाच्यता होऊ नये यासाठी कंत्राटदारांकडून हज हाउसचे प्रवेशद्वार बंद करण्यात आले होते. यामुळे हज हाउसमध्ये मोठी घटना घडल्याची चर्चा परिसरात होती.

म. टा. प्रतिनिधी, औरंगाबाद

थकलेला पगार व संशोधक मार्गदर्शकांचे मानधन मिळावे या मागणीसाठी भगवान फार्मसी कॉलेजमधील शिक्षक, शिक्षकेतर कर्मचाऱ्यांनी कॉलेज व्यवस्थापनाविरोधात धरणे आंदोलन सुरू केले आहे.

शिक्षकांच्या वेतनावरून कॉलेज गेल्या अनेक महिन्यांपासून चर्चेत आहे. कोर्टातही दाद मागितल्यानंतर कोर्टाने व्यवस्थापनाला फटकारले तर एआयसीटीईने ही कारवाईचा बडगा उगारला. त्यानंतर पुन्हा प्रश्न निर्माण झाल्याने शिक्षकांनी रस्त्यावर उतरत आंदोलन सुरू केले. थकलेल्या पगारासह मार्गदर्शकांच्या मानधनासाठी कॉलेजसमोरच ठिय्या मांडला. स्वागतकक्षासमोर हाती फलक घेत, घोषणाबाजी करत शिक्षकांनी मागण्या मांडल्या आहेत. 'भ्रष्ट व्यवस्थापनाचा जाहीर निषेध', 'ये मॅनेजमेंट कैसा है, तालिबान जैसा है', 'आमचा पगार, आमचा अधिकार', 'व्यवस्थापन तुपाशी कर्मचारी मात्र उपाशी', 'भगवान शिक्षण प्रसारक मंडळाच्या भ्रष्ट व्यवस्थापनाचा निषेध', 'गली गली मे शोर है, मॅनेजमेंट चोर है', 'आंदोलनाचा मुद्दा काय आमचा नियमित पगार नाय' अशा आशयाचे फलक आंदोलकांनी हाती घेतले होते. यावेळी शिक्षक, शिक्षकेतर कर्मचाऱ्यांची उपस्थिती होती.

\Bआता हटणार नाही...

\Bनिवेदनात म्हटले आहे की, तीन महिन्यांपासून प्रलंबित असलेले आमचे वेतन करण्याची विनंती केली होती. ही विनंती फेटाळून शिक्षकांचे फक्त मार्च व शिक्षकेतर कर्मचाऱ्यांचे एप्रिलचे वेतन केले. त्यामुळे आम्ही कर्मचारी, प्राचार्य व व्यवस्थापनाच्या या आर्थिक, मानसिक छळाविरोधात आणि आमचे वेतन, इतर मागण्या पूर्ण होईपर्यंत आंदोलन करण्यावर ठाम आहोत.

औरंगाबाद : लायन्स क्‍लब मिडटाउन व मिडटाउन मेडिकल सर्व्हिसेस ट्रस्ट, अद्यवत मेडिकल फाउंडेशनतर्फे रविवारी (२३ जून) आयएमए हॉल येथे जागतिक कोड जनजागृती सप्ताहांतर्गत पांढऱ्या डागांवर मोफत निदान शिबिर झाले. एकूण ३५ कोडग्रस्त रुग्णांची मोफत तपासणी करून समुपदेशन करण्यात आले.

२५ जून हा जागतिक कोड दिन म्हणून साजरा केला जातो. यानिमित्त जगभरात कोड या आजाराविषयी जनजागृती सप्ताह साजरा केला जातो. लायन्स क्‍लब मिटडाउन व अद्ययावत मेडिकल फाउंडेशनचे डॉ. अनिरुद्ध गुळाणीकर यांनी कोडग्रस्त, पांढऱ्या डागांची समस्या असलेल्या रुग्णांची मोफत तपासणी केली. शिबिरादरम्यान कोड आजाराने बाधित रुग्णांनी व्यथा मांडल्या. या वेळी रुग्णांचे समुपदेशन करण्यात आले. तपासणीनंतर मोफत औषधी देण्यात आली. या वेळी डॉ. गुळाणीकर म्हणाले की, कोड हा आजार त्वचेच्या रंगात होणाऱ्या बदलामुळे होतो. शंभरातील एका व्यक्‍तीला हा आजार होतो. या आजारात रंगद्रव्य तयार करण्याच्या पेशी नष्ट व्हायला लागतात. त्यामुळे रुग्णांनी घाबरून न जाता यावर योग्य पद्धतीने उपचार घ्यावेत. शिबिरासाठी डॉ. जे. पी. वैद्य, डॉ. ओंकार कुलकर्णी, डॉ. आशिष खरे यांनी पुढाकार घेतला.

म. टा. प्रतिनिधी, औरंगाबाद

मुकुंदवाडीतील देशी दारुचे दुकान बंद करण्यासाठी रविवारी महिलांच्या सह्यांच्या पडताळणी मोहिमेचे आयोजन करण्यात आले होते. या मोहिमेकडे महिलांनी पाठ फिरविल्याचे दिसून आले. या मोहिमेसाठी मोठ्या प्रमाणावर पोलिस बंदोबस्त नेमण्यात आला होता. दरम्यान, या मोहिमेसाठी यापुढेही प्रयत्न सुरूच राहणार असल्याची माहिती येथील नागरिकांनी दिली.

मुकुंदवाडी भागातील भाजीमंडई जवळ देशी दारुचे दुकान आहे. या दुकानात येणाऱ्या मद्यपींचा त्रास महिला आणि व्यापारी वर्गाला मोठ्या प्रमाणात आहे. हे दुकान बंद करण्याची मागणी करीत या वॉर्डातील नागरिकांनी यल्गार पुकारला होता. फेब्रुवारी महिन्यापासून याबाबत नागरिकांकडून जनजागृती करण्यात येत होती. १०३४ महिलांच्या सह्यांचे निवेदन राज्य उत्पादन शुल्क विभागाला देण्यात आले होते. वॉर्डातील एकूण महिलांच्या लोकसंख्येच्या ३२ टक्के ही आकडेवारी भरत होती. या महिलांच्या सह्यांची पडताळणी रविवारी मनपा केंद्रीय शाळेत राज्य उत्पादन शुल्क विभागाच्या वतीने करण्यात येणार होती. या मोहिमेसाठी राज्य उत्पादन शुल्क विभागाचे पथक रविवारी सकाळी मुकुंदवाडीत दाखल झाले. नागरिकांच्या वतीने तीन हजार पत्रके वॉर्डात पडताळणीला हजर राहण्यासाठी वाटण्यात आली होती. तसेच व्हॉटसअप ग्रुपवर देखील महिलांना पडताळणीसाठी उपस्थीत राहण्याबाबत आवाहन करण्यात आले होते. मात्र, या पडताळणीसाठी ज्या महिलांनी निवेदनामध्ये सह्या केल्या होत्या, त्यांनी पाठ फिरवली. त्या पडताळणीसाठी आल्याच नाहीत. १०३४ पैकी केवळ दीडशे महिला या पडताळणीसाठी हजर राहिल्याने गेल्या तीन महिन्यापासून सुरू असलेल्या प्रयत्नांना अपयश आले. दरम्यान, या पडताळणी मोहिमेसाठी मोठा बंदोबस्त तैनात करण्यात आला होता.

…

देशी दारुचे दुकान हटवण्यासाठी घेण्यात आलेल्या पडताळणी मोहिमेमध्ये अपेक्षित महिला आल्या नाहीत. तरीदेखील जिल्हाधिकाऱ्यांना भेटून आणखी एकदा पडताळणी मोहीम घेण्यात यावी, अशी विनंती करण्यात येणार आहे.

सुनील जगताप - नागरिक

म. टा. विशेष प्रतिनिधी, औरंगाबाद

चिकलठाणा औद्योगिक वसाहतीतील इंडस्ट्रिअल फिडर २ अंतर्गत तब्बल १२० उद्योगांचा वीजपुरवठा रविवारी सकाळी खंडित झाला. गेल्या सहा महिन्यांपासून या भागात वीजेचा प्रश्न कायम आहे. महावितरणने अडचण दूर केल्याचा दावा रविवारी पुन्हा फोल ठरला. ट्रान्सफॉर्मर खराब झाल्याने वीजपुरवठा खंडित झाला. सायंकाळी उशिरापर्यंत वीज न आल्याने ७० हून अधिक उद्योगांमध्ये सकाळची शिफ्टच सुरू झाली नाही. यामुळे उद्योजकांचे अंदाजे ३५ कोटींहून अधिकचे नुकसान झाले. विशेष म्हणजे उद्योग राज्यमंत्री अतुल सावे यांच्या सत्कार समारंभासही याचा फटका बसला.

चिकलठाणा औद्योगिक वसाहतीतील वीजप्रश्न महावितरणकडून काही केल्या सुटत नसल्याची चिन्हे आहेत. उद्योजकांनी वारंवार महावितरणला सांगूनही केबलची अडचण, विनाखंड वीजपुरवठा होत नाही. १५ दिवसांपूर्वी दीर्घ काळ वीज बंद ठेवून महावितरणने मेंटेनन्सची कामे केल्याचा दावा केला होता. पण तो फोल ठरला. शनिवारी रात्री झालेल्या पावसानंतर इंडस्ट्रिअल फिडर २ रविवारी सकाळी नादुरुस्त झाले. या फीडरवरून १५० हून अधिक उद्योगांना वीजपुरवठा होतो. थोड्या वेळात वीज येईल या आशेवर उद्योजक होते. सहा तास उलटून गेले तरी वीजपुरवठा सुरळीत झाला नाही. एरव्ही महावितरणकडून 'एसएमएस' पाठविले जातात पण ही यंत्रणाही आता कोलमडली आहे. फ्यूज कॉल सेंटरमध्ये कॉल घेण्यासाठी कर्मचारी नसल्याचे संतापलेल्या उद्योजकांनी सांगितले. कार्यकारी अभियंत्यांकडूनही कुठलाच प्रतिसाद मिळाला नाही. दरम्यान मुख्य अभियंता सुरेश गणेशकर यांच्याकडे उद्योजकांनी धाव घेतली. दुपारी तीन वाजता मासिआ कार्यालयात उद्योग राज्यमंत्री अतुल सावे यांच्या सत्काराचा कार्यक्रम होता. कशीबशी धावपळ करून एक फेज सुरू करण्यात आला. पण उद्योगांना मात्र वीज मिळाली नाही. सकाळच्या सत्रात बहुतांश उद्योग बंद होते. त्यामुळे ३५ कोटींचे नुकसान झाल्याचे उद्योजकांनी सांगितले. महावितरणने केलेला अंडर ग्राउंड केबलचा प्रयोग पुरता फसल्याचे रविवारी स्पष्ट झाले.

चिकलठाणा औद्योगिक वसाहतीतील वीजप्रश्न सोडविण्यासाठी येत्या एक-दोन दिवसात ठोस निर्णय घेतला जाईल. उद्योजकांची अडचण होणार नाही, याची काळजी घेऊ.

-सुरेश गणेशकर, मुख्य अभियंता, महावितरण

म. टा. प्रतिनिधी, औरंगाबाद

शनिवार रात्री व रविवार सकाळी झालेल्या पावसाने शहराच्या अनेक भागात दाणादाण उडाली. अनेक भागातील घरांमध्ये पाणी शिरल्यामुळे अग्नीशमन दलाला पाचारण करावे लागले. दरम्यान, शनिवारी रात्री साचलेल्या पाण्याचा अनेक ठिकाणी रविवारीही निचरा झाला नाही. पावसाने बहुतांश नाल्यांमधील कचरा, गाळ पाण्याच्या प्रवाहासोबत वाहून गेला. दीड कोटी रुपये खर्च करून पालिकेकडून होणारी नालेसफाई केवळ फार्स ठरल्याचे चित्र आहे.

शहरात शनिवारसह रविवारी सकाळी पावसाने हजेरी लावली. शनिवारी रात्री पावसाचा जोर होता. अनेक भागात पाणी घरात घुसल्याच्या घटना घडल्या. घरात पाणी घुसल्याचे फोन अनेक ठिकाणाहून अग्नीशमन दल, महापालिकेच्या अतिदक्षता विभागाला आले. जयभवानीनगर, सिडकोतील एन-४मधील राठी कॉर्नर, बायजीपुरा, आझाद चौक, उल्कानगरीमधील महाराष्ट्र बँकेजवळील अपार्टमेंटमध्ये पाणी शिरल्याचे फोन आले. त्यानंतर मदतीसाठी अग्नीशमन दलाचे अधिकारी, कर्मचाऱ्यांनी घटनास्थळी धाव घेऊन पाणी उपसण्यास सुरुवता केली. शहरातील अनेक रस्ते खराब असल्याचा फटका नागरिकांना ठिकठिकाणी बसला. बहुतांश रस्त्यावर पाणी साचले आहे. त्यासह नाल्यांमधील पाणी रस्त्यावर आल्याने घाण पाण्यातून जाण्याची वेळ नागरिकांवर आली. सांडपाणी रस्त्यावर आल्याने दुर्गंधी ही सुटली आहे. महापालिकेने नालेसफाईवर लाखों रुपयांचा खर्च केला. मागील आठवड्यातच ७० टक्के कामे पूर्ण झाल्याचे पालिकेकडून सांगण्यात आले. असे असले तरी, शनिवारच्या पावसाने नाल्यांच्या साफसफाईवर करण्यात आलेला खर्च कागदावरच असल्याचे समोर आले. मान्सूनपूर्व काम पावसाळा सुरू होण्यापूर्वी अपेक्षित असताना अद्याप सुरूच आहे. नालेसफाईसाठी एक कोटी ६८ लाख रुपयांची यंत्रसामग्री भाड्याने घेण्याची प्रक्रिया झाली. हा खर्च पाण्यात जाण्याची शक्यता आहे. मागील वर्षी पावसाळ्यात नाल्याच्या प्रवाहात पडून दोन जणांना जीव गमवावा लागला. अशा घटनांमूधनही महापालिका काही शिकलेली नसल्याचे समोर आले.

\Bनाले कचऱ्यांनी भरलेलेच\B

शहरातील नाल्यांमधील कचरा, गाळ काढल्याचे पालिका प्रशासनाकडून सांगण्यात आले. मात्र, शनिवारी रात्री व रविवारी सकाळी झालेल्या पावसाने शहरातील नाल्यांची साफसफाई झाली नसल्याचे समोर आले आहे. कंत्राटदारांकडून कामे करून काढलेला गाळ, कचरा अनेक ठिकाणी काठावरच आहे. त्यामुळे पावसात हा कचरा पुन्हा नाल्यात आल्याने नाले पुन्हा तुंबलेल्या अवस्थेत आहेत. गाळ, कचरा तात्काळ उचलणे अपेक्षित असताना तो तसाच राहतो. पाऊस झाला की, नाले तुंबून हे पाणी नाल्या जवळच्या वसाहतींमध्ये जाते अनेकांच्या घरांमध्ये जाते.

\B'सिग्मा'समोर पुन्हा साचले डबके \B

शहानूरवाडी दर्गा रोडवरील युनायटेड सिग्मा हॉस्पिटलसमोरच्या रस्त्यावर पुन्हा एकदा पाण्याचे भलेमोठे डबके साचले आहे. अनेक वर्षांपासून हेच चित्र आहे, आणि आता रस्त्याची स्थिती भयंकर झाली आहे. थोडा पाऊस पडला तरी डबके हमखास साचते. मुळात 'सिग्मा' ते रामतारा हाउसिंग सोसायटीपर्यंतच्या संपूर्ण रस्त्याची स्थिती भयंकर झाली असून, गेल्या कित्येक वर्षात या रस्त्यावर कधीतरी मुरूम टाकण्याशिवाय काहीही झालेले नाही. पाणी साचलेले नसतानाही या रस्त्यावरून दुचाकी किंवा चारचाकी वाहन चालवणे तितकेच त्रासदायक झालेले आहे. याच रस्त्यापासून अगदी हाकेच्या अंतरावर नगरसेविकेचे निवासस्थान आहे; परंतु या रस्त्याच्या मागणीची हाक त्यांच्यापर्यंत पोहोचतच नाही, यापेक्षा आणखी काय असू शकते, असा प्रश्न परिसरातील नागरिकांकडून उपस्थित होत आहे.

म. टा. विशेष प्रतिनिधी, औरंगाबाद

आगामी विधानसभा निवडणुकीसाठी काँग्रेसने विधानसभानिहाय उमेदवारांची चाचपणी सुरू केली आहे. ३० जूनपर्यंत जिल्ह्यातील नऊही मतदारसंघात काँग्रेसच्या आढावा बैठकांतून इच्छुकांची चाचपणी केली जाईल. सहा जुलैपर्यंत प्रदेश काँग्रेसकडे इच्छुकांना अर्ज करावे लागणार आहेत.

लोकसभा निवडणुकीत झालेल्या पराभवानंतर नव्या जोमाने विधानसभा निवडणुकीच्या तयारीला लागण्याचे आवाहन ज्येष्ठ काँग्रेस नेत्यांनी मुंबईतील बैठकीत केले होते. जिल्हा काँग्रेसने सिल्लोड विधानसभा मतदारसंघातून मेळावे व चाचपणीला सुरुवात केली. आमदार अब्दुल सत्तार यांनी काँग्रेसचा त्याग केल्यानंतर या ठिकाणाहून निवडणूक लढविण्यास दहापेक्षा जास्त नेते इच्छुक असल्याचे समोर आले. त्यानंतर फुलंब्री, औरंगाबाद पूर्व मतदारसंघाचा मेळावा झाला. ३० जूनपर्यंत सर्व नऊ विधानसभा मतदारसंघात मेळावे घेऊन इच्छुक उमेदवारांची चाचपणी केली जाणार आहे. जिल्हा काँग्रेस समिती याचा स्वतंत्र अहवाल श्रेष्ठींकडे पाठविणार आहे. दरम्यान, राज्यभरातून इच्छुक उमेदवारांना सहा जुलैपर्यंत प्रदेश काँग्रेसकडे अर्ज करावयाचे आहेत. त्यात छाननी होऊन इच्छुकांच्या मुलाखती ऑगस्ट महिन्यात घेतली जाण्याची शक्यता आहे.

\Bविधान परिषदेसाठी दोन इच्छुक\B

औरंगाबाद-जालना स्थानिक स्वराज्य संस्था निवडणुकीसाठी काँग्रेसकडून दोन उमेदवार इच्छुक असल्याचे सूत्रांनी सांगितले. त्यात एक जण जालना येथील आहे. अन्य उमेदवाराकडून विरोधी पक्षांमधील नाराजांची जुळवाजुळव सुरू आहे. आकडेवारीच्या गणितात ८० मतांची तोडफोड करावी लागणार आहे. ते कौशल्य ज्या उमेदवाराकडे असेल त्यालाच उमेदवारी मिळणार आहे.

म. टा. प्रतिनिधी, औरंगाबाद

अभियांत्रिकी, फार्मसी, हॉटेल मॅनेजमेंट, आर्किटेक्चर पदवी अभ्यासक्रम प्रवेशासाठी नोंदणीची प्रक्रिया मध्यरात्रीपासून सुरू करण्यात आली. सर्व कॉलेजांना सुविधा केंद्र देण्यात आले असून विद्यार्थ्यांना 'mahacet.org' या वेबसाइटवर नव्याने ऑनलाइन अर्ज भरावे लागणार आहेत.

राज्य सामाईक प्रवेश परीक्षा कक्षातर्फे 'सेतू असिस्टेड अॅडमिशन रजिस्ट्रेशन' या पोर्टलवरून प्रक्रिया सुरू केली होती. १७ ते २१ जूनदरम्यान ही प्रक्रिया राबविणार होती. २० जूनपर्यंत तांत्रिक बिघाडामुळे पोर्टल बंद पडले. राज्यातील लाखो विद्यार्थ्यांना मनस्ताप सहन करावा लागला. त्यानंतर 'सेल'ने ही प्रक्रिया थांबवित नव्याने प्रक्रिया राबविणार असल्याचे जाहीर केले. तंत्रशिक्षण अभ्यासक्रमाची प्रवेश प्रक्रिया पूर्वीप्रमाणे तंत्रशिक्षण विभागातर्फे राबविण्यात येणार आहे. त्यासाठीची तयारी पूर्ण झाली आहे. अभियांत्रिकी, फार्मसी, हॉटेल मॅनेजमेंट, आर्किटेक्चर अशा सर्व कॉलेजांना सुविधा केंद्र देत प्रत्येक कॉलेजला लॉगइन आयडी कार्यान्वित करण्यात आला असून मध्यरात्री बारा वाजेपासून प्रक्रिया सुरू करण्यात आली.

\Bप्रशासकीय गोंधळ…\B

सीईटी कक्षाकडून २४जून पासून प्रक्रिया नव्याने होईल, असे जाहीर करण्यात आले. सर्व्हरवरील ताण वाढल्याने प्रक्रिया बंद पडल्यानंतर सदोष माहितीअधारे अंतरिम गुणवत्ता यादी प्रसिद्ध करणे धोकादायक असल्याचे लक्षात येताच प्रक्रिया २० जून रोजी थांबविण्यात आली. चार दिवसांपूर्वी निर्णय घेतल्यानंतर ही रविवारी रात्री उशिरापर्यंत प्रक्रिया कशी असेल याबाबतचे वेळापत्रक रविवारपर्यंत निश्चित करण्यात आले नव्हते. रविवारी रात्री उशिरापर्यंत त्याची प्रक्रियाच सुरू होती. प्रशासकीय गोंधळामुळे आधीच पूर्वीच्या प्रक्रियेचा बोजवारा उडाला असताना हा गोंधळ पुन्हा समोर आला आहे.

\Bमहिनाभराचा कालावधी वाया\B

विद्यार्थ्यांनी यापूर्वी केलेली नोंदणी, कागदपत्र तपासणीची प्रक्रिया पुरती वाया गेली आहे. विद्यार्थ्यांनी सेतू सुविधा केंद्रावर तासनतास ताटकळत उभे राहून अर्ज नोंदणीची प्रक्रिया पूर्ण केली. पालकांनी ही हजेरी लावली होती. विद्यार्थ्यांचा वेळ, पैसा, श्रम वाया गेले आहेत. बारावी परीक्षेचा निकाल २८ मे रोजी जाहीर झाला. जूनच्या पहिल्या आठवड्यापासून सेतू सुविधा केंद्र सुरू झाले. ज्या पोर्टलवरून प्रक्रिया झाली त्याची क्षमता नसल्याने सगळा गोंधळ उडाला आणि जूनच्या शेवटच्या आठवड्यात नोंदणीची प्रक्रिया होत आहे.

- अभियांत्रिकी : २७६ कॉलेजांत १११३०८ जागा

- औषध निर्माणशास्त्र : २३४ कॉलेजांत १७६९० जागा

- वास्तूशास्त्र : ९६ कॉलेजांत ६२६७ जागा

म. टा. प्रतिनिधी, औरंगाबाद

पावसाने हजेरी लावताच शहरात वीजपुरवठा खंडित होत आहे. मात्र, रविवारी शहरात पाऊस नसतानाही अनेक भागात वीजपुरवठा तीन ते पाच तासांसाठी बंद राहिला. अनेक तास वीज गायब झाल्याने नागरिकांचे हाल झाले.

शहरात शनिवारी (२२ जून) सायंकाळी पावसाने जोरदार हजेरी लावली. हा पाऊस रात्री नऊ ते दहा वाजेपर्यंत पडत होता. रात्री दहानंतर पावसाचा जोर कमी झाला. सायंकाळी सहापासून सुरू झालेल्या पावसामुळे शहराच्या अनेक भागातील वीजपुरवठा बंद झाला. काही ठिकाणी कंडक्टर उडाले, तर काही ठिकाणी विजेच्या तारांचा स्पर्श एकमेकांना झाल्याने, वीजपुरवठा खंडित झाला. रात्री उशिरापर्यंत राबून वीजपुरवठा सुरळीत करण्यासाठी महावितरणाचे अधिकारी आणि कर्मचाऱ्यांनी मेहनत घेतली.

रविवारी (२३ जून) सकाळी पावसाने हजेरी लावली. त्यानंतर दिवसभर ढगाळ वातावरण राहिले, मात्र पाऊस पडला नाही. मात्र, अनेक भागात वीजपुरवठा खंडित झाला. पन्नालालनगर परिसरातील अनेक भागात सहा ते सात तासांसाठी वीजपुरवठा खंडित झाला. क्रांतीचौक उपकेंद्रांतर्गत असलेल्या कैलासनगर, दादा कॉलनी, मोंढ्यासह इतर भागात चार ते पाच तास वीजपुरवठा बंद राहिला. छावणी उपकेंद्रांतंर्गत पडेगाव, भावसिंगपुरा आणि इतर भागात वीज गायब झाली. शहागंज, नवाबपुरा, हर्सूल, मिलकॉर्नर, सिडकोतही वीजपुरवठा वारंवार खंडित झाला. विजेच्या लंपडावामुळे नागरिकांची गैरसोय झाली. शहागंज, छावणी आणि हर्सूल येथे वीजपुरवठ्यातील बिघाड शोधण्यासाठी महावितरणाच्या कर्मचाऱ्यांना कसरत करावी लागली.

…

\Bपाणी भरण्यात अडचण \B

सध्या शहरात अनेक भागात सात दिवसानंतर पाणीपुरवठा केला जातो. वेळापत्रकानुसार, रविवारी नळाला पाणी आले, पण वीज बंद असल्याने पाणी भरण्याची अडचण झाली. अनेकांनी महावितरणच्या अभियंत्यांना फोन केले, पण त्यांच्याकडून प्रतिसाद मिळाला नाही.

…

\Bदुरुस्ती न झाल्याचा फटका

\Bमहावितरणकडून दरवर्षी देखभाल दुरुस्तीची मान्सूनपूर्व कामे केली जातात. यंदा या कामांसाठी आतापर्यंत कोणत्याही एजन्सीची नेमणूक केलेली नाही. अगदी किरकोळ कामेही केलेली नाहीत. यामुळे त्याचा फटका पहिल्या पावसातच बसला.

…

\Bचिकलठाणा एमआयडीसीत त्रास \B

पावसामुळे सतत वीजपुरवठा खंडित होण्याचे प्रकार चिकलठाणा एमआयडीसीमध्ये जास्त प्रमाणात राहिले. रविवारी, अनेक उद्योगांच्या तीन फेजपैकी एक फेजमधून वीजपुरवठा होत नव्हता. त्यामुळे अनेक तास उद्योग बंद पडले.

………

म. टा. प्रतिनिधी, औरंगाबाद

साडेबारा लाखांचा गुटखा, सुंगधित तंबाखू व सिगारेटचा साठा करुन तो विक्री केल्याच्या प्रकरणात व्यापारी श्रेणिक सुरेशचंद्र सुराणा व त्याचा नोकर शेख आसिफ लाला शेख बाबा लाला याने सादर केलेला नियमित जामीन अर्ज प्रथम वर्ग न्यायदंडाधिकारी डी. एस. वमने यांनी फेटाळला.

या प्रकरणी अन्न व औषध प्रशासनाचे अधिकारी मोहम्मद फरीद अब्दुल रशिद सिद्दीकी (३२) यांनी फिर्याद दिली होती. फिर्यादीनुसार, पानदरिबा परिसरातील चौधरी कॉम्प्लेक्समध्ये गुटखा, तंबाखुजन्य पदार्थांचा साठा असल्याची माहिती सिटीचौक पोलिस ठाण्याचे निरीक्षक दादाराव शिनगारे यांना मिळाली होती. ही माहिती त्यांनी अन्न व औषधी प्रशासनाच्या अधिकाऱ्यांना दिली. त्यानंतर पोलिस व अन्न औषध प्रशासनाने संयुक्तपणे कारवाई करत आरोपी श्रेणिक सुराणा याच्या दुकानावर छापा मारुन १० लाख २ हजार ६०० रुपयांचा गुटखा व २ लाखाचे विदेशी बनावटीचे (वैधानिक इशाऱ्याचे लेबल नसलेले) सिगारेट, असा सुमारे १२ लाख ६७ हजार ६०० रुपयांचा मुद्देमाल जप्त केला. त्यानंतर आरोपी व्यापारी श्रेणीक सुरेशचंद सुराणा (३५, रा. गौहर हाईट्स, मोतीकारंजा) व शेख आसीफ लाला शेख बाबा लाला (२८, रा. बुढीलेन) यांना अटक करण्यात आली. त्यांच्या विरोधात सिटीचौक पोलिस ठाण्यात गुन्हा दाखल करण्यात आला होता. प्रकरणात सहाय्यक सरकारी वकील बालाजी गवळी यांनी काम पाहिले.

म. टा. प्रतिनिधी, औरंगाबाद

दारू पिण्यासाठी पैसे देण्याची मागणी करीत तरुणाचे हजार रुपये लुबाडण्यात आले. संजयनगर आणि एन सात भागात हे प्रकार घडले. या प्रकरणी संशयित आरोपीविरुद्ध सबंधित पोलिस ठाण्यात जबरी चोरीचे गुन्हे दाखल करण्यात आले आहेत.

जबरी चोरीचा पहिला प्रकार शुक्रवारी रात्री नऊ वाजता संजयनगर गल्ली क्रमांक सी १४ येथे घडला. शेख सईद शेख सलीम (वय २४, रा. संजयनगर) हा मजूर मोबाइलवर बोलत जात होता. यावेळी मुश्ताक नावाच्या आरोपीने त्याला अडवत मोबाइल हिसकावून घेतला. तसेच सईदला मारहाण करीत त्याच्या खिशातील हजार रुपये देखील जबरदस्तीने हिसकावून घेतले. या प्रकरणी सईदच्या तक्रारीवरून जिन्सी पोलिस ठाण्यात आरोपी मुश्ताकविरुद्ध जबरी चोरीचा गुन्हा दाखल करण्यात आला आहे.

दारुसाठी तरुणाला मारहाण करण्याचा दुसरा प्रकार शनिवारी रात्री साडेबारा वाजता अयोध्यानगर एन सात येथे घडला. वैभव भीमराव आढे (रा. एन सात) हा तरुण दुचाकीवर बळीराम पाटील हायस्कूलकडून घराकडे जात होता. यावेळी संशयित आरोपी धम्मा खेत्रे (रा. त्रिवेणीनगर, एन सात) याने साथीदारासह त्याला अडवले. वैभवला दारुसाठी त्याने १०० रुपयांची मागणी केली. वैभवने नकार दिला असता या दोघांनी त्याला मारहाण करीत दुचाकीचे नुकसान केले. याप्रकरणी वैभवच्या तक्रारीवरून सिडको पोलिस ठाण्यात मारहाणीचा गुन्हा दाखल करण्यात आला आहे.