म. टा. प्रतिनिधी, औरंगाबाद

नवीन शैक्षणिक धोरण विद्यार्थी विरोधी असल्याचा आरोप करत 'स्टुडंटस् फेडरेशन ऑफ इंडिया'ने मंगळवारी धोरणाची प्रतिकात्मक होळी करत निषेध व्यक्त केला. धारेण तयार करताना प्राध्यापक, शिक्षक, विद्यार्थ्यांचे मत विचारात घेतले नूतन धोरण तयार झाल्यानंतर सूचना मागविण्यात आल्या. त्यालाही पुरेसा वेळ दिलेला नाही, असे संघटनेचे मत आहे.

संघटनेतर्फे धोरणाच्या विरोधात पैठण गेट येथे आंदोलन करण्यात आले. यावेळी धोरणाविरोधात उपस्थितांनी घोषणाबाजी करत, धोरणाबाबत मत व्यक्त केले. संघटनेने म्हटले आहे की, नवीन शैक्षणिक धोरण लागू करण्याची सरकारला इतकी घाई का झाली आहे. नवीन शैक्षणिक धोरण शिक्षणाचे अजून खाजगीकरण करण्याचे साधन आहे. याद्वारे खाजगी कॉलेजांना खुली मोकळीक देत आहे. ज्यामुळे कॉलेजांची मनमानी वाढेल, हवे तेवढे शुल्क वसूल करायला मोकळे होतील. नवीन शैक्षणिक धोरण हे राज्य सरकारकडून शैक्षणिक संस्थांना देण्यात येणारे आर्थिक सहाय्य कमी करत आहे. शिक्षण संस्थांनी त्यांच्यासाठी लागणारा पैसा स्वतः निर्माण करावा, असे हे धोरण सांगते. परिणामी, विद्यार्थ्यांची शैक्षणिक शुल्क वाढ, शिष्यवृत्ती कपात करणे, शिक्षण संस्थांमधील मुलभूत गोष्टींचा अभाव, शिक्षणाचा दर्जा घसरण्यावर होईल. त्यासह सामाजिक, आर्थिकदृष्ट्या मागास विद्यार्थ्यांना कोणतीही सवलत देत नाही. सर्व प्रकारच्या प्रवेश परीक्षा एनटीएद्वारा घेतल्या जातील. ज्यामधून विद्यार्थ्यांचे खासगी कोचिंग क्लासेसच्या माध्यमातून आर्थिक शोषण वाढेल. तसेच पेपर फुटीच्या घटना वाढतील आणि त्यात बेकायदेशीर कामाला प्रोत्साहन मिळेल, अशी टीका यावेळी करण्यात आली. यावेळी स्टॅलिन आडे, लोकेश कांबळे, पल्लवी बोराडकर, सत्यजित मस्के, समाधान बारगळ, रवी खंदारे, भाग्यश्री मरळकर, बाबाराय भोसले, रवी मोताळे, गणेश शिंदे, ओंकार पाटील, आकाश जगताप, मिलिंद वावळे, रामेश्वर घिटरे, प्रमोद घुगे, श्रीनिवास लांटगे, माऊली वाघ यांची प्रमुख उपस्थिती होती.

म. टा. प्रतिनिधी, औरंगाबाद

लग्नाचे आमिष दाखवून ३० वर्षांच्या महिलेवर बलात्कार करण्यात आला. हा प्रकार रविवारी दुपारी दौलताबाद येथे घडला. याप्रकरणी संशयित आरोपीविरुद्ध छावणी पोलिस ठाण्यात बलात्काराचा गुन्हा दाखल करण्यात आला आहे. याप्रकरणी पीडित महिलेने सोमवारी दुपारी तक्रार दाखल केली. या महिलेचा संशयित आरोपी जुनेद रशीद सय्यद हा परिचयाचा होता. जुनेद याने महिलेला लग्नाचे आमिष दाखवले. यानंतर तिला पडेगाव परिसरातील हॉटेल मिडोज आणि दौलताबाद येथील हॉटेल ओयो या ठिकाणी नेऊन बलात्कार केला. यानंतर आरोपीने लग्नास नकार देत फसवणूक केली. याप्रकरणी आरोपीविरुद्ध बलात्काराचा गुन्हा दाखल झाला असून, पोलिस उपनिरीक्षक सुरवसे तपास करीत आहेत.

म. टा. प्रतिनिधी, औरंगाबाद

लिंग निदान चाचणी करणाऱ्या सोनोग्राफी केंद्राची माहिती देणाऱ्या खबऱ्याला बक्षीस देण्याची योजना महापौर नंदकुमार घोडेले यांनी मंगळवारी जाहीर केली. माहिती देणाऱ्याचे नाव गुप्त ठेवले जाईल, असे त्यांनी स्पष्ट केले.

मुलींच्या जन्माचे प्रमाण वाढावे म्हणून शासनाच्या स्तरावर विविध प्रकारच्या उपाययोजना केल्या जातात. मुलीच्या जन्माचे स्वागत करण्यासाठी देखील शासनाने योजना जाहीर केली आहे. मुलींचा जन्मदर वाढावा म्हणून शासकीय पातळीवर प्रयत्न होत असताना छुप्या पद्धतीने लिंग निदान चाचणी करून शासनाच्या योजनेला सुरुंग लावण्याचे काम काही सोनोग्राफी केंद्रांच्या माध्यमातून केले जाते हे वारंवार उघड झाले आहे. या पार्श्वभूमीवर मुलींचा जन्मदर वाढण्याची भूमिका घेत महापौरांनी लिंग निदान चाचणी करणाऱ्या सोनोग्राफी केंद्राची माहिती देणाऱ्या खबऱ्याला महापालिकेतर्फे बक्षीस देण्याची योजना जाहीर केली. बक्षिसाची रक्कम सन्मानजनक असेल, शिवाय खबऱ्याचे नाव देखील गुप्त ठेवले जाईल, असे ते म्हणाले. सध्या औंरगाबाद शहरात मुलींच्या जन्माचे प्रमाण एक हजार मुलांमागे नऊशे इतके आहे, गतवर्षी ते ८२० होते. गतवर्षीच्या तुलनेत हे प्रमाण वाढले असले तरी ते समाधानकारक नाही, असे मत त्यांनी व्यक्त केले.

पावसाळ्यात साथीचे आजार बळावू नयेत म्हणून महापौरांनी आरोग्य विभागाची आढावा बैठक घेतली. आरोग्य विभागाची तयारी समाधानकारक आहे, असे ते म्हणाले. हॉटेलांमधून पिण्यासाठी देण्यात येत असलेल्या पाण्याची तपासणी करण्याचे आदेश त्यांनी दिले. अन्न औषध प्रशासन विभागाकडे या कामासाठी पुरेसा कर्मचारी नाही, त्यामुळे महापालिकेच्या आरोग्य विभागाने हे काम करावे, असे ते म्हणाले.

म. टा. विशेष प्रतिनिधी ,औरंगाबाद

अनुसूचित जमातीच्या विद्यार्थ्यांना बारावी नंतरच्या वैद्यकीय प्रवेशपूर्व परीक्षेच्या अनुषंगाने आवश्‍यक असलेल्या जात वैधता प्रमाणपत्रांचे दावे निकाली काढण्याचे आदेश जात पडताळणी समित्यांना मुंबई उच्च न्यायालयाच्या औरंगाबाद खंडपीठाचे न्यायमूर्ती संजय गंगापूरवाला व न्यायमूर्ती मंगेश पाटील यांनी दिले.

सध्या बारावी उत्तीर्ण विद्यार्थ्यांची वैद्यकीय प्रवेश प्रक्रिया सुरू आहे, विद्यार्थ्यांना प्रवेश मिळण्यासाठी जात पडताळणी समितीकडील जात वैधता प्रमाणपत्र जोडणे आवश्‍यक आहे, मात्र जात पडताळणी समित्यांकडे मागील अनेक दिवसांपासून अनुसूचित जाती जमातीतील विद्यार्थ्यांचे जात वैधता प्रमाणपत्र हे संबंधित समित्यांकडे प्रलंबित आहेत, त्यामुळे विद्यार्थ्यांच्या वैद्यकीय प्रवेश पूर्व प्रक्रियेत अडचणी निर्माण झाल्या आहेत. यापूर्वी जात पडताळणी समितीकडे प्रलंबित दाव्यांमुळे अनुसूचित विद्यार्थ्यांना प्रवेश नाकारल्याची नाकारल्याचे अनुभव आलेले आहेत. यासारख्या समस्या न्यायालयाच्या निदर्शनास आणून देण्यात आल्या. यापूर्वी आयुक्त अनुसूचित जमाती संशोधन व विकास विभाग यांनी न्यायालयासमोर प्रवेश प्रक्रिया सुरू होण्यापूर्वी बारावीच्या विद्यार्थ्यांचे जमातीचे दावे सर्व समितीतर्फे निकाली काढण्यात येतील असे आश्‍वासन दिले. होते सर्व समित्यांमध्ये बारावीच्या विद्यार्थ्यांसाठी स्पेशल सेल करण्यात येईल असेही सांगण्यात आले होते. मात्र त्यानंतरही समित्यांकडे सर्व प्रकरण प्रलंबित असल्याचे अर्जदारांतर्फे न्यायालयाच्या निदर्शनास आणून देण्यात आले, त्यावर सरकारी वकील लखोटिया यांनी समित्या प्राधान्याने बारावीच्या विद्यार्थ्यांचे जमातीचे दावे निकाली काढतील व सध्या सर्व प्रकरणे निर्णय प्रक्रियेत असल्याचे सांगितले. त्यावर न्यायालयाने प्रकरणाचे गांभीर्य लक्षात घेऊन सर्व जात पडताळणी समित्यांना तसेच नीट परीक्षेच्या प्रवेश प्रक्रियेतील पहिल्या फेरी पूर्वी दावे निकाली काढण्याचे आदेश दिले; तसेच विद्यार्थ्यांनी त्यांना या प्रक्रियेत पूर्ण सहकार्य करण्याचे आदेश देत याचिका निकाली काढली. याचिकाकर्त्यातर्फे अनिल गोलेगावकर, मधुर गोलेगावकर यांनी काम पाहिले.

विजय चौधरी, खुलताबाद

दुष्काळाला हरवण्यासाठी पाणी फांउडेशन आयोजित 'सत्यमेव जयते वॉटर कप स्पर्धा २०१९'मध्ये खुलताबाद तालुक्यात राबविण्यात आली. वॉटर कप स्पर्धेत सहभागी झालेल्या दहा गावे पहिल्याच पावसात पाणीदार झाली आहेत. या स्पर्धेत तालुक्यांतील ७३पैकी ७१ गावांनी सहभाग नोंदवला होता. त्यापैकी ६९ गावांनी प्रशिक्षणासाठी पुढाकार घेतला. प्रत्यक्षात ३७ गावांनी प्रशिक्षण घेतले. २७ गावांनी स्पर्धेत सहभागी होऊन शेवटपर्यंत १० गावांनी उल्लेखनीय कामगिरी केली होती.

स्पर्धेदरम्यान गावकऱ्यांना श्रमदानातून गाव दुष्काळ मुक्त करण्याचा संकल्प करत आठ एप्रिल ते २७ मे या ४५ दिवसांत रणरणत्या उन्हात जलसंधारणाची कामे श्रमदानाच्या माध्यमातून केली. या कामाचे फलीत व्हावे म्हणून पावसाची प्रतीक्षा होती. पावसाने गेल्या दोन दिवसांपासून दमदार हजेरी लावली. त्यामुळे या गावांच्या परिसरात पाणी साठले आहे.

तालुक्यातील ममुराबाद, गोळेगाव, खांडी पिंपळगाव, वडोद खुर्द , कनकशीळ , कानडगाव, महमदपूर या गावांत जलसंधारणाची कामे यंत्राच्या साहाय्याने व श्रमदानाच्या माध्यमातून मोठ्या प्रमाणात करण्यात आली. स्पर्धेदरम्यान गावकऱ्यांनी श्रमदान करून आपल्या गावात सीसीटी, डीप सीसीटी, नाला खोलीकरण, शेततळे, गॉबियन बंधारा, एलबीएस आदी जलसंधारणाची कामे केली. गावात पाणीसाठा निर्माण करण्यासाठी तयार केलेल्या या जलपात्रांना फक्त प्रतीक्षा होती पावसाची. गेल्या दोन दिवसांपासून पावसाने जोरदार हजेरी लावली. श्रमातून तयार केलेल्या पात्रांमध्ये मोठ्या प्रमाणात पाणीसाठा निर्माण झाला. या दहा गावांतील पाणी वाहून गेले नाही. गावात साचलेले पाणी पाहून गावकरी आनंद व्यक्त करीत आहे. त्या पाण्यासोबत सेल्फी काढून श्रमाचे पाणी त्यांच्या डोळयात पाणी दिसत आहे. विशेष म्हणजे तांत्रिकदृष्ट्या जलसंधारणाचे उपचार करण्यात आल्याने पहिल्या पावसात एकही उपचार फुटला नाही. जलसंधारणाच्या कामासाठी तालुका प्रशासनाचे सहकार्य मिळाले असल्याची माहिती तालुका समन्वयक सुनीता साळुंके यांनी दिली.

पावसाची दमदार हजेरी

शनिवार आणि रविवारी तालुक्यात पावसाने हजेरी लावल्याने ममुराबाद येथे ९० मिलिमीटर, गोळेगाव ४०, खांडी पिंपळगाव ७५, वडोद खुर्द ३५, कनकशीळ ३०, कानडगाव, महमदपूर ७० मिलिमीटर इतका पाऊस पडल्याची नोंद ग्रामस्थांनी केली आहे. एकूण सरासरी तालुक्यांमध्ये ६५ मिलीमीटर पावसाची नोंद करण्यात आली. पावसाची नोंद हे गावकऱ्यांनी बनवलेल्या पर्जन्यमापकाद्वारे घेण्यात आली आहे. खांडी पिंपळगाव येथे ७५ मिलिमीटर व ममुराबाद येथे ९० मिलिमीटर पाऊस पडून सर्व पाणी गावांमध्येच थांबलेले असून, जलसंधारणाच्या स्पर्धा कालावधीमध्ये तयार करण्यात आलेल्या रचना तुडुंब भरल्या आहेत.

खुलताबाद तालुक्यातील वर्षी दोन वर्षांत झालेल्या कामाचे फलित अनेक गावांत पाहायला मिळाले. सर्वच गावांत आनंदी, उत्साही वातावरण निर्माण झाले आहेत. ममुराबाद येथील सर्व रचनांची व्हिडिओ शूटिंग ड्रोन कॅमेराद्वारे घेतली असून, त्याचा अहवाल पाणी फाउंडेशनच्या मुंबई कार्यालयात पाठवण्यात आला आहे.

- गजेंद्र येळेकर, तालुका समन्वयक

म. टा. प्रतिनिधी, खुलताबाद

बीएचएमएसच्या अंतिम वर्षाचे शिक्षण घेत असलेली , अवघ्या २१ वर्षांची तरुणी गावच्या विकासासाठी सरपंचपदावर विराजमान झाली. माजी पंचायत समिती सदस्य प्रतिस्पर्धी उमेदवार गुलशनबी पटेल यांचा पराभव करून गावकऱ्यांनी उच्च शिक्षित तरुणीच्या हाती गाव कारभाराची धुरा सोपवली आहे. तबस्सुम शकील पटेल असे तिचे नाव आहे. खुलताबाद तालुक्यातील लोणी ग्रामपंचायतीच्या सरपंचपदी सोमवारी ती विजयी झाली.

तबस्सुम शकील पटेल या महत्त्वाकांक्षी तरुणीने डॉक्टर होऊन रुग्णसेवा करण्याचे तिने ठरवले मात्र, सरपंचपदाची सूत्र सोपवण्यासाठी गावकऱ्यांनी हाक दिली, तेव्हा तिने करिअरचा विचार करत बसण्यापेक्षा गावाच्या विकासाला प्राधान्य दिले. गावाचा नावलौकिक वाढवणाऱ्या तबस्सुम शकील पटेलने आता राजकारणात उडी घेतली आहे. सरपंदपदाच्या निवडणुकीत तबस्सुम शकील पटेल हिला ८६३ आणि विरोधी गुलशनबी पटेल यांना ६३६ मते मिळाली.

खुलताबाद तालुक्यातील लोणी ग्रामपंचायतीच्या सरपंचपदी सोमवारी ती विजयी झाली. घरातूनच राजकीय वारसा असलेल्या तबस्सुम शकील पटेल आई सुलतानबी शकील पटेल यापूर्वी सरपंच राहिल्या. वडीलही समाजकारण करत आहे. बीएचएमएसचे शिक्षण घेत असलेल्या तबस्सुम शकील पटेल हिचे वडील शकील पटेल यांनी लोणी गावच्या विकासासाठी काम केले. त्यामुळे गावकऱ्यांनीही तिला भरघोस मतांनी विजयी करत वयाच्या अवघ्या २१व्या वर्षी गावच्या सरपंचपदी विराजमान होण्याची संधी दिली. तिची आई सुलतानाबी शकील पटेल यांनीही लग्नानंतर त्यांनी पतीसोबत समाजकारण, राजकारणात सक्रिय सहभाग नोंदवला. त्यांनीही लोणी गावचे सरपंचपद भूषवले आहे.

तबस्सुम शकील पटेल ही खुलताबाद तालुक्यातील सर्वात तरुण सरपंच ठरली आहे. तिच्या विजयाने गावात आनंदाचे वातावरण असून, उच्चविद्याविभूषित तरुणाईचा ग्रामीण राजकारणातील प्रवेश आशादायी मानले जात आहे.

विकासासाठी प्रयत्न करणार

विजयानंतर प्रतिक्रिया देताना तबस्सुम शकील पटेल म्हणाली, 'गावाच्या विकासाचा माझा अजेंडा होता. तो मतदारांनी स्वीकारला आहे. आता जबाबदारी वाढली असून, गावाचा सर्वांगीण विकास करण्यासाठी प्रयत्न करणार आहे.'

म. टा. प्रतिनिधी, औरंगाबाद

अल्पवयीन मुलीच्या अपहरण प्रकरणात शहरातून भारतीय जनता पक्षाचा कार्यकर्ता आणि पोलिसांच्या रेकॉर्डवरील गुन्हेगार राहुल साहेबराव चाबुकस्वार (वय ४०, रा. हुसेन कॉलनी) याला अटक करण्यात आली. ही कारवाई बुधवारी स्थानिक गुन्हे शाखेच्या पथकाने केली. याप्रकरणी पैठण पोलिस ठाण्यात चार जून रोजी आरोपीविरुद्ध अपहरणाचा गुन्हा दाखल आहे.

चार जून रोजी मायगाव (ता. पैठण) येथून १७ वर्षांच्या मुलीला घरातून पळवून नेण्यात आले होते. याप्रकरणी तिच्या पालकांनी पैठण पोलिस ठाण्यात अपहरणाचा गुन्हा दाखल केला होता. यामध्ये राहुल चाबुकस्वार, आशिष जाधव यांनी विना क्रमांकाच्या दुचाकीवर येऊन या मुलीला पळवून नेल्याचा आरोप केला होता. याप्रकरणी चाबुकस्वार, जाधव यांच्यासोबत तुषार राठोड, सुरेश रजनी, सुधीर साबळे यांच्यावर अपहरणाचा गुन्हा दाखल करण्यात आला होता.

दरम्यान, या प्रकरणातील आरोपी चाबुकस्वार हा सिडको एन चार भागात आला असल्याची माहिती स्थानिक गुन्हे शाखेचे पोलिस निरीक्षक भागवत फुंदे यांना मिळाली होती. या माहितीवरून पोलिसांनी त्याला ताब्यात घेत अटक केली. आरोपी चाबुकस्वार याला पैठण पोलिसांच्या स्वाधीन करण्यात आले आहे. ही कारवाई पोलिस अधीक्षक मोक्षदा पाटील, अप्पर अधिक्षक गणेश गावडे यांच्या मार्गदर्शनाखाली पोलिस निरीक्षक भागवत फुंदे, कर्मचारी नवले, झरेकर यांनी केली.

…

\Bकोर्टाच्या आवारातून घेतले ताब्यात\B

आरोपी राहुल चाबुकस्वार हा हायकोर्टात एका खटल्याच्या तारखेसाठी आला होता. स्थानिक गुन्हेशाखेला ही माहिती मिळाली. या माहितीवरून कोर्टाच्या आवारातून केवळ दोन कर्मचाऱ्यांनी त्याला ताब्यात घेतले. त्याचा मोबाइल काढून घेऊन त्याला गुन्हे शाखेत आणण्यात आले.

म. टा. प्रतिनिधी, औरंगाबाद

'पंतप्रधान नरेंद्र मोदी यांनी पर्यटन क्षेत्राचा विकास करण्याची योजना जाहीर केली आहे. या योजनेची सुरुवात ऐतिहासिक महत्त्व असलेल्या औरंगाबाद शहरापासून करावी, औरंगाबाद विमानतळावरून लवकरात लवकर दिल्ली आणि मुंबईसाठी विमान सेवा सुरू करावे,' असी मागणी खासदार इम्तियाज जलील यांनी बुधवारी लोकसभेत चर्चेदरम्यान केली.

खासदार जलील यांनी औरंगाबाद येथील विमान सेवेचा प्रश्न शू्न्य प्रहरात उपस्थित केला. ते म्हणाले की, पंतप्रधान मोदी यांनी संसदेत दिलेल्या त्यांच्या भाषणात पर्यटनाला चालना देण्यासाठी विशेष योजना तयार करण्याची घोषणा केली आहे. या योजनेची सुरुवात औरंगाबादेतून करावी. जेट एअरवेज बंद पडल्याचा सर्वाधिक फटका महाराष्ट्राची पर्यटन राजधानी औरंगाबादला बसला आहे. औरंगाबादहून दिल्ली आणि मुंबईला जाणारी दोन विमाने बंद झाल्याने जगभरातून येणारे पर्यटक, तसेच उद्योजकांची गैरसोय होत आहे. पर्यटन, उद्योग, हॉटेल, ट्रान्सपोर्ट व्यवसायावर याचा प्रतिकुल परिणाम झाल्याचे सांगत त्यांनी या विमान सेवेच्या प्रश्नाकडे लक्ष वेधले. जागतिक वारसा स्थळाचा दर्जा असलेली दोन पर्यटनस्थळे औरंगाबादपासून शंभर किलोमीटरच्या आत आहे, हे औद्योगिक शहर असल्याने विमान सेवेबाबत विचार करावा, अशी विनंती त्यांनी केली.

पूर्वी दिल्ली-जयपूर-उदयपूर-औरंगाबाद-मुंबई शहरे जोडणारी विमान सेवा सुरू होती, त्यामुळे जगभराचे पर्यटक येत असत. त्यामुळे शहराची भरभराट झाली. कालांतराने हे विमान बंद पडल्याने पर्यटन व्यवसायाला घरघर लागली. त्यामुळे या मार्गावर एअर इंडियामार्फत सेवा द्यावी, असे ते म्हणाले.

…

\Bउड्डाण योजनेत समावेश करा

\B

खासदार जलील यांनी मंगळवारी केंद्रीय नागरी हवाई वाहतूक मंत्री हरप्रित पुरी यांची भेट घेऊन औरंगाबाद विमानतळाचा समावेश उड्डाण योजनेत करावा, अशी मागणी केली. शिवाय नागरी हवाई वाहतूक संचालनालयाच्या सचिव उषा पाधी यांच्याशीही चर्चा केली. शिर्डी विमानतळ सुरू झाल्यानंतर शिर्डीसाठीचे विमान बंद केले असून संबंधित कंपन्यांशी चर्चा करून ते औरंगाबादेतून सुरू करावे, अशी मागणी केली. विमान कंपन्या, टुर्स ऑपरेटर आणि उद्योजकांची लवकरच संयुक्त बैठक घेणार असल्याची माहिती पाधी यांनी खासदारांना दिली.

म.टा. प्रतिनिधी, औरंगाबाद -

वैद्यकीय कचरा महापालिकेच्या घंटागाडीत टाकल्याबद्दल महापालिकेने अमृत बाल रुग्णालयाला पाच हजारांचा दंड ठोठावला. विश्वभारती कॉलनी मधील या रुग्णालयाने वैद्यकीय कचरा संबंधित एजन्सीला न देता कचरा संकलन करणाऱ्या घंटागाडीत टाकला, ही बाब नागरिक मित्र पथकाच्या निदर्शनास आली. या पथकाने रुग्णालयास पाच हजारांचा दंड ठोठावला. यावेळी नागरिक मित्र पथकाचे प्रमोद जाधव व अन्य कर्मचारी उपस्थित होते.

-

म. टा. प्रतिनिधी, फुलंब्री

शिक्षकच शाळेत न आल्यामुळे तालुक्यातील तळेगाव येथील जिल्हा परिषदेची शाळा बंद ठेवल्याचा संतापजनक प्रकार बुधवारी (२६ जून) घडला. या शाळेत त्वरित शिक्षकांची नेमणूक करावी व बुधवारी शाळा बंद ठेवणाऱ्या संबंधितांवर कारवायी करण्याची मागणी पालकांनी केली आहे.

याबाबत माहिती अशी की, तालुक्यातील तळेगाव येथे इयत्ता पहिली ते इयत्ता आठवी वर्गापर्यंत शाळा आहे. या शाळेत १७८ विद्यार्थी शिक्षण घेतात. काही दिवसांपूर्वीच तळेगाव हे जालना जिल्ह्यातून औरंगाबाद जिल्ह्यात समाविष्ट झाले. जालना जिल्ह्याच्या भोकरदन तालुक्यातून औरंगाबाद जिल्ह्याच्या फुलंब्री तालुक्यात घेण्यात आले. शैक्षणिक वर्ष सुरू होऊन आठवडा उलटला मात्र या आठ वर्गांसाठी पूर्णवेळ शिक्षक नाहीत. त्यामुळे विद्यार्थ्यांचे शैक्षणिक नुकसान होत आहे. जालना जिल्हा परिषदेतून शाळा ही औरंगाबाद जिल्हा परिषदेकडे वर्ग करण्यात आली. शाळा वर्ग होऊनही नवीन शैक्षणिक वर्ष सुरू झाले. औरंगाबाद जिल्हा परिषद शिक्षण विभागाने शाळेस शिक्षक दिले नाहीत. ग्रामस्थांनी मागणी केल्यानंतर तात्पुरत्या स्वरुपात चार-पाच दिवस चार शिक्षकांना शाळेवर पाठविले. बुधवारी औरंगाबाद जिल्हा परिषदेत शिक्षकांचे समुपदेशन असल्याने जिल्हा परिषदेने पाठविल्या चारही शिक्षकांनी दांडी मारली. एकही शिक्षक शाळेवर हजर राहिला नाही. त्यामुळे शाळा उघडलीच नाही. विद्यार्थी ठरल्यावेळेवर शाळेत आले. अनेक विद्यार्थी शेतवस्त्यांवरून शाळेत दाखल झाले. बराच वेळ विद्यार्थी प्रांगणातच थांबले शाळा उघडण्याची वाट पाहीली मात्र, एकही शिक्षक शाळेत न आल्याने बराच वेळ वाट पाहून अखेर विद्यार्थ्यांनी घरची वाट धरली. मुले घरी लवकर का आली, याची विचारणा पालकांनी केल्यानंतर हा प्रकार उघडकीस आला. या प्रकाराने ग्रामस्थ संतप्त झाले. त्यांनी संबंधितावर कार्यवाही करण्याची मागणी केली असून विद्यार्थी संख्येनुसार तात्काळ नऊ शिक्षकांची नियुक्ती करावी अन्यथा शाळेला कुलुप ठोकण्याचा इशारा ग्रामस्थ, पालक व शालेय समितीने दिला आहे.

दरम्यान, जिल्हा परिषदेत शिक्षकांचे समुपदेशन सुरू आहे. मी मुख्याधिकारी यांच्यासमोर बसलो आहे. मी नंतर बोलतो, असे गट शिक्षणाधिकारी अशोक पाटील यांनी सांगितले.

\Bइमारतीची दुरवस्था\B

तळेगाव येथील जिल्हा परिषद शाळेची इमारतीची अत्यंत दुरावस्था झालेली असून, विद्यार्थ्यांना आपला जीव मुठीत घेऊनच वर्गात बसावे लागते. शाळेला नवीन वर्ग खोल्या मंजूर करण्याचीही मागणी पालक वर्गातून होत आहे.

बुधवारी शाळेत एकही शिक्षक आले नाहीत. त्यामुळे शाळा दिवसभर बंदच होती. विद्यार्थ्यांचे; तसेच माझ्या पाल्यांचे भविष्य धोक्यात येत आहे. संबंधित अधिकाऱ्यांनी शिक्षकांची त्वरित नियुक्ती करून विद्यार्थ्यांची हेळसांड थांबवावी.

- शांताराम गव्हाड, पालक

कर्मचाऱ्यांची निदर्शने; मुख्यमंत्र्यांकडेही निवेदन

म. टा. प्रतिनिधी, औरंगाबाद

बँक कर्मचाऱ्यांवर होत असलेले हल्ले, एटीएम लुटमारीचे प्रकार वाढत आहेत. त्याचवेळी बँकांची सुरक्षा व्यवस्था कमी करण्यात येत आहे. बँकांची सुरक्षा व्यवस्था वाढवा, कर्मचाऱ्यांना सुरक्षा द्या, अशी मागणी करत ऑल इंडिया बँक ऑफ महाराष्ट्र एम्प्लॉईज फेडरेशनतर्फे निदर्शने करण्यात आली.

सिडकोतील एन-वन येथील बँक ऑफ महाराष्ट्रच्या विभागीय कार्यालयासमोर सायंकाळी ही निदर्शने करण्यात आली. बँक कर्मचाऱ्यांवर होत असलेले हल्ले, एटीएम लुटमारीचे राज्यासह, देशभरात वाढत आहेत, बदनापूरच्या शाखा व्यवस्थापकास लोकप्रतिनिधींनी धमकावले. अन्य एका शाखेच्या व्यवस्थपकास मारहाण झाली. असे प्रकार वाढत असताना सुरक्षा कमी करण्याचे धोरण राबविण्यात येत आहे, असे कर्मचाऱ्यांनी सांगितले. औरंगाबाद, जालना दोन जिल्ह्यातील सत्तर सुरक्षा रक्षक कमी करण्यात आले. हा निर्णय मागे घ्यावा, सुरक्षा पुरविण्यात यावी अशा मागणी करत सुरक्षा रक्षक वाचवा, बँक वाचवा अशा घोषणा देण्यात आल्या. कर्मचारी संघटनेतर्फे बँकेचे विभागीय व्यवस्थापक जी. जी. वाकडे यांना निवेदन देण्यात देण्यात आले. यावेळी राजेंद्र देवळे, मनिंदरसिंग कानसा, वृंदा कुलकर्णी, जयश्री जोशी, व्यंकटेश पुराणिक, मनोज वानखेडे, पियुश बिऱ्हाडे यांची प्रमुख उपस्थिती होती.

मुख्यमंत्र्यांना निवेदन

बँक ऑफ बडोद्याच्या यावल येथील शाखा व्यवस्थापकाची झालेली हत्या, बँक कर्मचाऱ्यावर हल्ले, एटीएम फोडीच्या घटनांमध्ये वाढ झाली असून बँक कर्मचाऱ्यांची सुरक्षेचा प्रश्न ऐरणीवर आला आहे. सरकारने या बाबी लक्षात घेत, बँक कर्मचाऱ्यांना सुरक्षा पुरवावी, अशी मागणी महाराष्ट्र स्टेट बँक कर्मचारी महांसघातर्फे करण्यात आली आहे. मुख्यमंत्री देवेंद्र फडणवीस यांना याबाबत संघटनेचे सरचिटणीस देविदास तुळजापूरकर यांनी निवेदन दिले आहे. निवेदनात म्हटले आहे की, महिन्यांमध्ये कर्मचाऱ्यांवर हल्ले, एटीएम फोडीच्या घटनाही समोर आल्या आहेत. दरोडे आणि एटीएम फोडीत बॅँकांनी स्वत:ची रक्‍कम गमावली आहे. तर अनेक कर्मचाऱ्यांना जीव गमवावा लागला. ज्या पद्धतीने या घटना घडत आहे. त्यामुळे कायदा आणि सुव्यवस्थेचा प्रश्‍न निर्माण झाला आहे. रिर्झव्ह बँकेने याबाबत घटनांचा लेखजोखा मांडला आहे. बँकांच्या सुरक्षेच्या प्रश्नावर राज्य सरकारने वित्तीय संस्थांची बैठक घ्यावी. सुरक्षेबाबत उपाय करावेत, अशी मागणी करण्यात आली आहे.

औरंगाबाद: पॉलिटेक्निक अभ्यासक्रमासाठी ऑनलाइन अर्ज करण्याच्या प्रक्रियेस पुन्हा एकदा मुदतवाढ देण्यात आली आहे. नवीन वेळापत्रकानुसार विद्यार्थ्यांना तीन जुलैपर्यंत ऑनलाइन अर्ज भरता येणार आहेत. त्याच दरम्यान अर्ज निश्चिती करता येणार आहे. प्रथम वर्ष प्रवेशासह थेट द्वितीय वर्ष अभ्यासक्रम प्रवेशासही मुदतवाढ देण्यात आली आहे.

पॉलिटेक्निक अभ्यासक्रमासाठी ऑनलाइन अर्ज भरण्याची प्रक्रिया ३० मेपासून सुरू झाली आहे. तंत्रशिक्षणमार्फत सुरू असलेल्या या प्रक्रियेत अर्ज भरण्यास बुधवारी मुदतवाढ देण्यात आली. सुरुवातीला १८ जून रोजी २६ जूनपर्यंत मुदतवाढ देण्यात आली होती. त्यानुसार बुधवारी मुदत संपत होती. सायंकाळी संचालक कार्यालयाने परित्रक काढत तीन जुलैपर्यंत मुदतवाढ देण्याचा निर्णय घेण्यात आला. नव्या वेळापत्रकानुसार चार जुलै रोजी तात्पुरती गुणवत्ता यादी जाहीर होईल. पाच व सहा जुलै असे दोन दिवस आक्षेप नोंदविण्यासाठी तर आठ जुलै रोजी अंतिम गुणवत्ता यादी जाहीर केली जाणार आहे.

म.टा. प्रतिनिधी, औरंगाबाद :

एसटी कामगार संघटना आणि एसटी प्रशासन यांच्यात वेतन करारासाठी केलेल्या घोषणेवरून वाद सुरू आहेत. हा वाद औद्योगिक न्यायलयातही सुरू आहे. एसटीच्या कामगारांना घोषित करण्यात आलेल्या ४८४९ कोटी रुपयांच्या पॅकेजमध्ये तडजोड करून वेतन करारावरील वाद संपुष्टात आणण्याचा प्रस्ताव एसटी विभागाला देण्यात आला असल्याची माहिती मान्यताप्राप्त कामगार संघटनेचे जनरल सेक्रेटरी हनुमंत ताठे यांनी पत्रकार परिषदेत दिली.

एसटीच्या वेतन करारावरून एसटी कामगार संघटनेसह अन्य संघटनांचा वाद एसटी महामंडळासोबत सुरू आहे. परिवहन मंत्री तथा एसटी महामंडळाचे अध्यक्ष दिवाकर रावते यांनी एसटीच्या कामगारांसाठी एकतर्फी वेतन वाढीची घोषणा एक जून २०१८ रोजी वर्ष २०१६ ते २०२० या चार वर्षासाठी केली होती. या घोषणेनंतर एसटीच्या कामगारांनी आंदोलनही पुकारले होते. या आंदोलनाबाबत काही प्रवासी संघटनांनी न्यायलयात धाव घेतली होती. कोर्टाने हस्तक्षेपानंतर हे आंदोलन मागे घेण्यात आले. यानंतर एसटी कामगार संघटना आणि प्रशासना दरम्यान झालेल्या चर्चेत प्रशासनाच्या तयार केलेल्या फॉर्म्युल्यात १५०० कोटी रुपयांचा खर्चाबाबत प्रश्न उपस्थितीत करण्यात आला होता. कर्मचारी संघटनेकडून देण्यात आलेल्या प्रस्तावानुसार एसटीच्या कर्मचाऱ्यांना वेतन वाढवून मिळणार असल्याचा दावा करण्यात आला होता. हे प्रकरण औद्योगिक न्यायलयात दाखल करण्यात आले आहे.

या प्रकरणात १६ ते १७ जून रोजी पुण्यात एसटी कामगार संघटनेची बैठक घेण्यात आली होती. या बैठकीत संघटनेच्या पदाधिकाऱ्यांसोबत चर्चा करण्यात आली. या चर्चेनंतर एसटी कामगार संघटनेने परिवहन मंत्र्यांनी वेतन वाढीसाठी दिलेल्या ४८४९ कोटींच्या पॅकेजमध्ये तडजोड करण्याचा प्रस्ताव एसटी महामंडळासमोर २० जून रोजी मांडला. एसटी प्रशासनाने एसटी कामगार संघटनेला चर्चेसाठी बोलविले तर निश्चित वेतन कराराचा वाद मिटेल अशी अपेक्षा हनुमंत ताटे यांनी व्यक्त केली. यावेळी पत्रकार परिषदेत एसटी कामगार संघटनेचे अध्यक्ष संदीप शिंदे, एसटी बँकेचे संचालक राजेंद्र मोटे यांच्यासह अन्य पदाधिकाऱ्यांची उपस्थिती होती.

…

परिवहन मंत्र्यांनी शब्द पाळावा

नऊ जून २०१८ च्या बैठकीत राज्य शासकीय कर्मचाऱ्यांना सातवा वेतन आयोग लागू करताना वार्षिक वेतन वाढीचा व घरभाडे भत्याचा जो दर लागू होईल त्या दराने जाहीर केलेल्या तारखेपासून एसटी कर्मचाऱ्यांनाही लागू करण्याचा निर्णय परिवहन मंत्र्यांनी घेतला होता. तसे पत्र दिले आहे. तसेच कनिष्ठ वेतनश्रेणीवर तीन वर्षापेक्षा जास्त व पाच वर्षांपेक्षा कमी सेवा झालेली आहे. अशा कर्मचाऱ्यांना दोन ऐवजी चार अतिरिक्त वेतनवाढ देण्यात यावी हा निर्णय घेण्यात आला आहे. ही दोन्ही मागणी प्रशासनाने मान्य करावी, अशीही मागणी कामगार संघटनेनं केली आहे.

……

कन्नड : शासनाचे अनुदान उचलूनही वैयक्तिक शौचालयाचे बांधकाम न करणाऱ्या कन्नड शहरातील सहा लाभार्थींविरुद्ध नगर पालिकेने शहर पोलिस ठाण्यात गुन्हा दाखल केला आहे. विलास जाधव, रमेश गायकवाड, अंबादास गायकवाड, ज्ञानेश्वर गंगवाल, कलीम शेख व फरजाना शेख अशी गुन्हा दाखल झालेल्या आरोपींची नावे आहेत. गेल्या आठवड्यात पालिकेकडून शौचालयासाठी अनुदान घेतलेल्या ११० लाभार्थींना याबाबत सूचित करून बांधकामाची मुदत देण्यात आली होती. त्यापैकी १०४ लाभार्थींनी शौचालय बांधकाम पूर्ण केले, परंतु सहा जणांनी स्वच्छ भारत अभियानांतर्गत वैयक्तिक शौचालय बांधकाम करण्यासाठी प्रत्येकी १७ हजार रुपये शासकीय अनुदान घेतले पण, शौचालयाचे बांधकाम केले नाही. या सहा लाभार्थींविरोधात मुख्याधिकारी नंदा गायकवाड यांच्या फिर्यादीवरून गुन्हा दाखल करण्यात आला आहे. कन्नड शहरातील एक हजार ५५८ लाभार्थींना केंद्र शासनाचे १२ हजार रुपये दोन समान टप्प्यांत व पालिकेचे पाच हजार रुपये तिसरा हप्ता म्हणून देण्यात आले होते. याप्रकरणी तपास पोलिस उपनिरीक्ष सतीश दिंडे हे करत आहे.

खुलताबाद : पोलिस ठाण्यात पोलिस निरीक्षक चंदन इमले यांनी बुधवारी पदाची सूत्रे हाती घेतले. पोलिस निरीक्षक हरिष खेडकर यांची लाचलुचपत प्रतिबंधक विभागात बदली झाल्यानंतर सहाय्यक पोलीस निरीक्षक अतुल येरमे यांच्याकडे प्रभारी पदभार देण्यात आला होता. येरमे यांची पाचोड पोलिस ठाण्यात बदली झाल्याने पोलिस उपनिरीक्षक भगवान झरेकर यांच्याकडे अतिरिक्त कार्यभार होता. पोलिस निरीक्षक चंदन इमले रुजू होताच पोलिस कर्मचाऱ्यांनी त्यांचे स्वागत केले.

म. टा. प्रतिनिधी, फुलंब्री

औरंगाबाद-जळगाव महामार्गवरील हर्सूल सावंगी शिवारात ट्रक व दुचाकी अपघातात एक ठार तर, दोन जण जखमी झाल्याची घटना मंगळवारी रात्री घडली. या अपघातात परमेश्वर लहू पवार (वय १८ रा. सरफगव्हाण, ता. घनसावंगी, जि. जालना) हा तरुण ठार झाला आहे. या अपघाताची बुधवारी (२६ जून) रोजी फुलंब्री पोलिसांत नोंद करण्यात आली.

याबाबत अधिक माहिती अशी की, औरंगाबाद-जळगाव महामार्गावरून ट्रक (एमएच २० ईजी ८७०१) औरंगाबादकडून फुलंब्रीकडे येत होता. त्याचवेळी ट्रकच्या पाठीमागून दुचाकी (एमएच २० ईएच १५९८) येत होती. सावंगी बस थांब्यावर ओहरटेक करीत असताना ट्रकला दुचाकीच्या हँडलचा धक्का लागल्याने दुचाकी चालक खाली पडला. त्याचवेळी ट्रकचे मागील चाक दुचाकीस्वार परमेश्वर पवार याच्या अंगावरून गेल्याने तो जागीच ठार झाला.

याचदरम्यान फुलंब्रीकडून औरंगाबादकडे जाणारी दुचाकी (क्रमांक माहिती नाही) ट्रक व दुचाकीच्या झालेल्या अपघातातील रस्त्यावर पडलेल्या दुचाकीला धडकल्याने अंकुश सोनवणे, अमोल कजने हे दोन जण जखमी झाले आहे. अपघाताची माहिती मिळताच पोलिस निरीक्षक सम्राटसिंह राजपूत यांच्यासह रुग्णवाहिका चालक विजय देवमाळी यांनी घटनास्थळी धाव घेतली. या अपघातात मृतास व जखमी उपचारासाठी घाटी रुग्णालयात दाखल केले आहे. या अपघाताची फुलंब्री पोलिसांत नोंद करण्यात आली असून, पुढील तपास पोलिस निरीक्षक सम्राटसिंह राजपूत यांच्या मार्गदर्शनाखाली जमादार जनार्धन मुरमे हे करीत आहे.

औरंगाबाद : पॉवरग्रीडच्या माध्यमातून वीजवितरण व्यवस्थेचे जाळे उभे करण्यात येत असून, यात सुमारे ४० हजारांपेक्षा जास्त शेतकऱ्यांच्या शेतजमिनीमध्ये विद्युत टॉवर उभारण्यात आले आहे. अशा पॉवरग्रीड बाधित शेतकऱ्यांना तातडीने नुकसान भरपाई देण्यात यावी; तसेत जमिनीचे भाडे देण्यात यावे, अशी मागणी अन्नदाता शेतकरी संघटनेने केली आहे.

यासंदर्भात ऊर्जा मंत्री चंद्रशेखर बावनकुळे यांना मागण्याचे निवेदन सादर करण्यात आले आहे, अशी माहिती संघटनेचे नेते जयाजी सूर्यवंशी यांनी दिली. पॉवरग्रीड बाधित शेतकऱ्यांना न्याय मिळावा, यासाठी २०१५पासून पाठपुरावा सुरू आहे, परंतु त्यावर शासनाने अद्यापही कोणताही सकारात्मक निर्णय घेतला नाही. कंपनी प्रमुखासह संयुक्त बैठक लावण्याचे आश्वासन मंत्र्यांनी दिले होते पण, चार वर्षांत बैठक झाली नाही, असा आरोपही सूर्यवंशी यांनी करून त्वरित न्याय द्यावा, अन्यथा राज्यव्यापी आंदोलनाशिवाय पर्याय राहणार नाही, असा इशारा दिला आहे.

म. टा. प्रतिनिधी, औरंगाबाद

आमखास मैदानासमोरील जिल्हा सामान्य रुग्णालयाच्या नेत्र विभागाचे चिकलठाणा परिसरातील जिल्हा रुग्णालयाच्या इमारतीमध्ये स्थलांतर सुरू झाले आहे. मात्र, परिसरातील नागरिकांनी बुधवारी (२६ जून) स्थलांतराला विरोध केल्यामुळे स्थलांतराची प्रक्रिया थांबवावी लगली. तथापि, राज्य कर्करोग संस्थेला ३० जूनपर्यंत जागा हस्तांतरीत करावी लागणार असल्याने स्थलांतराची प्रक्रिया सुरुच राहणार असल्याचे जिल्हा रुग्णालयाने स्पष्ट केले आहे. दरम्यान, तीन आठवड्यात रुग्णालयाच्या चिकलठाणा येथील इमारतीत शस्त्रक्रिया सुरू होतील व तोपर्यंत सर्व शस्त्रक्रिया घाटीच्या नेत्र विभागात होतील. त्यामुळे रुग्णांची परवड होणार नाही, असेही रुग्णालय प्रशासनाने स्पष्ट केले आहे.

शासकीय कर्करुग्णालयाला राज्य कर्करोग संस्थेचा दर्जा घोषित झाला आहे. त्यामुळेच कर्करोग संस्थेच्या विस्तारासाठी नेत्र विभागाची जागा संस्थेला हस्तांतरीत करण्याचा अधिकृत निर्णय होऊन तसे आदेश जिल्हाधिकारी यांनी मागेच काढले होते. वस्तुत: ३१ मार्चपर्यंतच स्थलांतर अपेक्षित होते; परंतु जिल्हा रुग्णालयाच्या चिकलठाणा परिसरातील नव्या इमारतीत शस्त्रक्रियागृहाचे काम न झाल्याने जिल्हा रुग्णालयाच्या विनंतीवरुन स्थलांतराला मुदतवाढ देण्यात आली होती. मात्र सद्यस्थितीत चिकलठाणा येथील रुग्णालयाच्या शस्त्रक्रियागृहाचे काम अद्याप सुरुच झालेले नाही. त्यामुळे रुग्णांची परवड होईल, या भूमिकेतून जसा विरोध होत आहे, तसाच तो परिसरात अतिक्रमण केलेल्यांकडूनही होत आहे. नेत्र विभागाची जागा हस्तांतरीत झाली तर अतिक्रमणधारकांच्या ताब्यातूनही जागा जाईल, या भीतीतूनही हा विरोध केला जात असल्याचे सूत्रांनी सांगितले. या पार्श्वभूमीवर बुधवारी काही स्थानिकांनी शहरातील स्थलांतराच्या प्रक्रियेला विरोध दर्शविला. या ठिकाणी काही नागरिकांनी बुधवारी ठिय्या दिला होता. त्यामुळे अर्धे साहित्य स्थलांतरीत झाल्यानंतर प्रशासनाने उर्वरीत साहित्य नेण्याचे थांबविले. तरीही ३० जूनपर्यंत जागा हस्तांतरीत करावी लागणार असल्याने उर्वरित साहित्याची हलवाहलवी उर्वरित दोन दिवसांत केली जाईल व त्यानंतर जागा हस्तांतरीत केली जाईल, असे जिल्हा रुग्णालयाच्या प्रशासनाने स्पष्ट केले आहे.

\Bदिलेल्या तारखांचे काय?

\Bयाच जिल्हा रुग्णालयाच्या नेत्र विभागाने यापूर्वीच शस्त्रक्रियांच्या तारखा ग्रामीण भागातील रुग्णांना दिल्या आहेत. त्याचे काय होणार, का रुग्ण वाऱ्यावर जाणार, हाही प्रश्न यानिमित्ताने उपस्थित झाला आहे. मात्र सध्या तरी त्याकडे दुर्लक्ष केले जात असल्याचा आरोप होत आहे.

रुग्णालयाच्या चिकलठाणा येथील शस्त्रक्रियागृहाच्या कामासाठी निधी प्राप्त झाला आहे व त्याची वर्कऑर्डर निघाली असून, गुरुवारपासूनच (२७ जून) या कामाला प्रारंभ होण्याची शक्यता आहे. येत्या तीन आठवड्यात हे काम कुठल्याही स्थितीत पूर्ण होईल व तोपर्यंत घाटीच्या नेत्र विभागात शस्त्रक्रिया होतील.

\Bडॉ. सुंदर कुलकर्णी, \Bजिल्हा शल्यचिकीत्सक

जिल्हा रुग्णालयाची नेत्रविभाग स्थलांतरीत केला जात आहे. त्यामुळे रुग्णांची गैरसोय होऊ नये म्हणून घाटीत आठवड्यातून दोन दिवस स्वतंत्र ओपीडी सुरू करण्याची मागणी जिल्हा रुग्णालयाने केली व अधिष्ठातांनी ही मागणी मंजूर केलीआहे. त्यामुळे जोपर्यंत नेत्र विभाग सुरळीत होत नाही तोपर्यंत घाटीत पर्यायी व्यवस्था केली जाणार आहे.

\Bडॉ. कैलास झिने\B, वैद्यकीय अधिक्षक, घाटी

म. टा. प्रतिनिधी, औरंगाबाद :

औरंगाबाद विमानतळावरून नवीन विमान सेवा सुरू करणाऱ्या कंपनीकडून विमानतळावरील एअर फ्युलवरील पाच टक्के व्हॅट कमी करण्याचा प्रस्ताव शासनासमोर आल्यास निश्चितच विमान सेवा वाढीसाठी हा कर कमी करण्यात येईल, असे आश्वासन राज्याचे अर्थमंत्री सुधीर मुंनगटीवार यांनी मराठवाडा विकास मंडळाचे अध्यक्ष डॉ. भागवत कराड यांना दिले.

औरंगाबाद विमानतळावरून विमान सेवा वाढावी म्हणून विमान कंपन्याना आकर्षित करण्यासाठी एअर फ्युलवरील पाच टक्के व्हॅट कमी करण्याची मागणी विमानतळ प्राधिकरणाकडून मराठवाडा विकास मंडळासोबत झालेल्या बैठकीत करण्यात आली होती. या मागणीच्या अनुषंगाने डॉ. भागवत कराड, भारतीय जनता पक्षाचे प्रवक्ते शिरिष बोराळकर, दिलीप थोरात, श्रीनिवास कुलकर्णी यांनी मुंबईत मंत्रालयात राज्याचे अर्थमंत्री सुधीर मुनगंटीवार यांची भेट घेतली. या भेटीत डॉ. भागवत कराड यांनी औरंगाबाद विमानतळावरून विमान सेवेची सद्यस्थिती मुनगंटीवार यांच्यासमोर मांडली. नवीन विमान सेवा सुरू करण्यासाठी मध्यप्रदेश तसेच अन्य राज्यात एअर फ्युलवरील व्हॅट कमी करण्याचा निर्णय घेण्यात आला आहे. तसाच निर्णय राज्याने घ्यावा, अशी मागणी डॉ. कराड यांनी केली.

या विषयावर राज्याचे अर्थमंत्री सुधीर मुनगंटीवार यांनी विमान सेवेत वाढ व्हावी, यासाठी राज्य शासनाचेही प्रयत्न सुरू आहेत, असे सांगितले. व्हॅट कमी करण्याचा प्रस्ताव विमान कंपन्यांकडून शासनाकडे सादर करण्यात आल्यास पाच टक्के व्हॅट शून्य करण्याचा निर्णय घेण्यात येईल, असे आश्वासन मुनगंटीवार यांनी दिले.