म. टा. प्रतिनिधी, औरंगाबाद

पेठे ज्वेलर्सला गंडा घालणाऱ्या पसार संशयित आरोपी राजेंद्र जैनचे मोबाइल टॉवर लोकशन समर्थनगरचे येत होते. मात्र त्याच्या घराची तीन वेळा झडती घेतल्यानंतरही तो सापडत नव्हता. चक्रावलेल्या पोलिसांनी दवाखाने, लॉज सुद्धा तपासले, मात्र यश येत नव्हते. अखेर पथकाने वेगळा फंडा वापरत त्याच्या पर्यंत पोहचत 'चोरावर मोर' असल्याचे दाखवून दिले.

पेठे ज्वेलर्सची फसवणूक केल्याचे प्रकरण पोलिसात गेल्यानंतर संशयित आरोपी राजेंद्र जैन हा पसार झाला होता. छत्तीसगड येथील रायपूर येथे तो गेल्याची माहिती मिळाली होती. मात्र तो औरंगाबादला पुन्हा परत आल्याचे मंगळवारी आर्थिक गुन्हे शाखेच्या पथकाला समजले. त्याच्या मोबाइलचे टॉवर लोकेशन समर्थनगर येथील येत होते. कोहिनूर प्लाझा हॉटेलच्या मागे बालाजी अपार्टमेंटमध्ये त्याचा फ्लॅट आहे. पोलिसांनी या घराची झडती घेतली, मात्र तो सापडला नाही. समर्थनगर सारख्या मोठ्या परिसरात त्याला कसे शोधावे, हा प्रश्न पोलिसांना पडला. पोलिसांनी त्याच्या शोधासाठी या भागातील प्रत्येक लॉज आणि दवाखाने देखील तपासले. मात्र त्याचे लोकेशन समर्थनगर दाखवत असूनही त्याचा छडा लागत नव्हता. पीएसआय सुभाष खंडागळे यांना जैन याने कोट्यवधी रुपयातून या परिसरात नवीन घर खरेदी केले असेल, अशी शंका आली. त्यांनी परिसरातील नवीन अपार्टमेंट झालेल्या इमारती शोधून काढल्या. त्यांना असे दोन अपार्टमेंट आढळले. यापैकी एका अपार्टमेंटच्या ५० फुटावर जैन याचे लोकेशन तांत्रिक माहितीमध्ये आढळले. दोन्ही अपार्टमेंटच्या बिल्डरशी संपर्क साधण्यात आला. खंडागळे यांचा अंदाज ठरला. एका बिल्डरने आपण राजेंद्र जैन याला नुकताच फ्लॅट विकल्याची माहिती दिली. फ्लॅट क्रमांक सांगितल्यानंतर पोलिसांनी या फ्लॅटबाहेर सापळा रचला. काही वेळाने बाहेर पडलेला राजेंद्र जैन पोलिसांच्या जाळ्यात सापडला.

म. टा. विशेष प्रतिनिधी, औरंगाबाद

निवडणूक लढवताना उमेदवारी अर्जासोबत सादर केलेल्या शपथपत्रात खोटी, चुकीची व दिशाभूल करणारी माहिती नमूद केल्याप्रकरणात बीड लोकसभा मतदार संघाच्या भाजपच्या खासदार डॉ. प्रीतम मुंडे यांच्या निवडीला मुंबई उच्च न्यायालयाच्या औरंगाबाद खंडपीठात आव्हान देण्यात आले आहे.

बीड लोकसभा निवडणुकीतील पराभूत उमेदवार कालिदास आपेट यांनी ही निवडणूक याचिका केली आहे. कालिदास आपेट यांना १५५०मते मिळाली होती. या निवडणुकीत मुंडे या पावणे दोन लाख मतांनी निवडून आल्या आहेत. निवडणूक आयोगाच्या लोकप्रतिनिधीत्व अधिनियम १९५१च्या कलम १२५-अ नुसार खोटी माहिती सादर करणे हा गुन्हा असून त्या अंतर्गत ही याचिका करण्यात आली आहे. याचिकेत प्रीतम मुंडेंकडून शपथपत्रात सादर केलेल्या माहितीवरून एकूण सहा आक्षेप घेण्यात आले आहेत. प्रीतम मुंडे यांचे दक्षिण मुंबई लोकसभा मतदार संघातील ५५व्या मतदार यादीतील ११४० क्रमांकावर मतदार म्हणून नाव आहे. याशिवाय प्रीतम यांचे परळी विधानसभा २३३मध्येही मतदारांच्या नावातील यादीत ४१मध्ये ५८५ वर नाव आहे. एकाच मतदाराचे दोन मतदार संघात नाव असू नये, हा नियम आहे. तसेच प्रीतम मुंडे या त्यांचे कागदोपत्री व्यवहार हे प्रीतम गौरव - खाडे या नावाने करतात. त्याच नावाने त्या एका कंपनीच्या संचालिका असून त्याची माहिती व कंपनीचा परवाना निलंबित केलेला असल्याची माहितीही प्रीतम मुंडे यांनी शपथपत्रात नमूद केलेली नाही, असाही आक्षेप याचिकेत घेण्यात आला आहे

\Bबोगस कर्ज वाटपात गुन्हे

\Bप्रीतम मुंडे यांनी मतदारांना भावनिक मुद्याच्या आधारे आकर्षित करण्यासाठी वडील गोपीनाथराव मुंडे यांचे नाव लावले आहे. प्रीतम मुंडे या वैद्यनाथ अर्बन - को- ऑप. बँकेच्या संचालक असून त्यांच्या विरोधात कोट्यवधींचे बोगस कर्ज वाटप केल्याप्रकरणी परळी वैजनाथ येथील पोलिस ठाण्यात फसवणुकीसह इतर कलमांखाली गुन्हा दाखल आहे. त्याचीही माहिती मुंडे यांनी सादर केलेली नाही, असाही आक्षेप याचिकेत घेण्यात आला आहे. आपेट यांची बाजू अजित बी. काळे हे मांडणार आहेत. या याचिकेवर दहा जुलै रोजी रोजी प्राथमिक सुनावणी होणार आहे.

म. टा. प्रतिनिधी, औरंगाबाद

समतानगर भागातून रिक्षा चोरी करणाऱ्या चोराला क्रांतीचौक गुन्हे प्रकटीकरण पथकाने २४ तासांत अटक केली. याप्रकरणी बुधवारी रात्री गुन्हा दाखल करण्यात आला. आरोपीकडून चोरीची रिक्षा जप्त करण्यात आली.

समतानगर येथील अफरोज फैयाज कुरेशी (वय २४) यांची रिक्षा सोमवारी रात्री आधार हॉस्पिटलसमोरून चोरीस गेली होती. याप्रकरणी कुरेशी यांनी बुधवारी पोलिस ठाण्यात अज्ञात आरोपीविरुद्ध चोरीचा गुन्हा दाखल केला. ही चोरीची रिक्षा घेऊन एक आरोपी कमळापूर फाटा येथे येणार असल्याची माहिती खबऱ्याने एपीआय राहुल सूर्यतळ यांना दिली होती. या माहितीवरून पथकाने सापळा रचून संशयित आरोपी समाधान लिंबाजी जायभाये (वय २५, रा. लोणार, जि. बुलडाणा) याला पाठलाग करून पकडले. ही कारवाई एपीआय सुर्यतळ, पीएसआय संदीप शिंदे, सय्यद सलीम, राजेश फिरंगे, मंगेश मनोरे, राजेश चव्हाण, विनोद नितनवरे, विशाल खुटे आणि हनुमंत चाळणेवाड यांनी केली.

म. टा. प्रतिनिधी, औरंगाबाद

पॉलिटेक्निक अभ्यासक्रमासाठी यंदा साडेतीन हजारांनी अर्जांची संख्या वाढली आहे. गुरुवारी तंत्रशिक्षण संचालनालयातील सूत्रांनी दिलेल्या माहितीनुसार; यंदा ६५ हजार ९२१ अर्ज आलेले आहेत.

विद्यार्थ्यांचा पॉलिटेक्निक अभ्यासक्रमाकडील कल मागील दोन वर्षांपासून कमी झाल्याचे समोर आले होते. यंदाही स्थिती गंभीर असेल असेल असे सांगण्यात येत आहे.

३० मेपासून सुरू झालेल्या प्रवेश प्रक्रियेला दोन वेळा मुदतवाढ देण्यात आली होती. पहिल्या टप्प्यात तर, केवळ २२ हजार अर्जच आल्याने अभ्यासक्रमाबाबत चिंता व्यक्त करण्यात आली होती. मुदतवाढ बुधवारी संपली तेव्हा राज्यातील आकडेवारी समोर आली आहे. राज्यभरात विविध विभागामध्ये आलेल्या अर्जांची संख्या मागील वर्षीच्या तुलनेत काहीशी अधिक आहे. अर्जाच्या संख्येने कॉलेज प्रशासन काहीसे सुखावल्याचे चित्र आहे.

सूत्रांनी दिलेल्या माहितीनुसार; राज्यभरात सुमारे ६८ हजार विद्यार्थ्यांनी ऑनलाइन अर्ज सादर केले. त्यापैकी ६५ हजार ९२१ विद्यार्थ्यांनी अर्ज निश्चितीची प्रक्रिया पूर्ण केली आहे. मागील वर्षीच्या तुलनेत तीन हजार ५९१ अर्ज अधिक आहेत. प्रक्रियेत गुरुवारी सायंकाळी सात वाजता प्रवेशासाठीची पहिली तात्पुरती गुणवत्ता यादी जाहीर होणार होती मात्र, वेबसाइटवर तांत्रिक अडचणीमुळे वेळेत यादी जाहीर होऊ शकली नाही. तासाभराच्या प्रतीक्षेनंतर यादी जाहीर झाली. यादीबात आक्षेप असतील तर, विद्यार्थी, पालकांना आक्षेप नोंदविण्यासाठी दोन दिवसांचा कालावधी देण्यात आला आहे. त्यानंतर आठ जुलै रोजी अंतिम गुणवत्ता यादी जाहीर केली जाणार आहे.

प्रवेशासाठी अर्ज

२०१८-१९ : ६२ हजार ३३०

२०१९-२० : ६५ हजार ९२१

म. टा. प्रतिनिधी, औरंगाबाद जिल्हाधिकारी कार्यालयातील तळमजल्यातील नगररचना विभागाच्या रेकॉर्डरूमला तीन आठवड्यापूर्वी आग लागली होती. या आगीत महत्त्वाचे कागदपत्रे जळाल्याने संबंधित आग कशामुळे लागली याचा अहवाल तीन दिवसांत सादर करण्याचे निर्देश जिल्हाधिकाऱ्यांनी दिले होते. मात्र, अजूनही संबंधित अहवाल देण्यात आला नाही. त्यामुळे नगरभूमापन अधिकाऱ्यांना सदर अहवाल सादर करण्यासंबंधी स्मरणपत्र देण्यात आले आहे. जिल्हाधिकारी कार्यालयातील तळमजल्यावर असलेल्या नगररचना विभागाच्या रेकॉर्डरूमला सहा जून रोजी सकाळीच आग लागली होती. कर्मचाऱ्यांच्या दक्षतेमुळे अवघ्या काही वेळेतच आगीवर नियंत्रण मिळविण्यात आल्यामुळे मोठे नुकसान झाले नाही. आगीमध्ये काही कागदपत्रे पूर्ण तर, काही अर्धवट जळाली होती. सदर आग शॉर्टसर्किटमुळे लागल्याचा प्राथमिक अंदाज अधिकाऱ्यांनी व्यक्त केला. मात्र, जिल्हाधिकाऱ्यांनी आगीचे नेमके कारण तसेच कुठली कागदपत्रे जळाली याचा शोध घेण्यासाठी समितीची नियुक्ती करून तीन दिवसांत मागवला होता. या घटनेस तीन आठवडे उलटूनही अद्याप अहवाल सादर झालेला नाही. त्यामुळे नगरभूमापन अधिकाऱ्यांना अहवाल सादर करण्यासंबंधी नुकतेच स्मरणपत्र देण्यात आले असल्याचे सूत्रांनी सांगितले.

म. टा. प्रतिनिधी, औरंगाबाद

छावणीतील कर्णपुरा भागात जनावरे बेकायदा पाळण्यात येत असून, त्यांच्या मल-मुत्राने नागरिकांचे आरोग्य धोक्‍यात आले आहे. याकडे छावणी परिषदेचे वारंवार लक्ष वेधूनही हेतुपुरस्सर दुर्लक्ष करण्यात येत असल्याचा आरोप करीत कल्पना सुजित राजपूत यांनी छावणी परिषदेसमोर बेमुदत उपोषण सुरू केले आहे. दरम्यान, संबंधितांवर नोटीस बजावून कारवाई करण्यात येत असून उपोषण मागे घ्यावे, असे पत्र परिषदेने राजपूत यांना दिले खरे; पण ज्याला नोटीस बजावलण्यात आल्याचे परिषदेने म्हटले आहे त्या व्यक्तीचा मृत्यू होऊ अनेक वर्षे लोटल्याचे उघड झाले आहे.

कर्णपुरा भागातील जनावरांच्या मलमुत्र व दुर्गंधीने रहिवाशांचे आरोग्य धोक्‍यात आले आहे. हा गोठा हलवण्यात यावा, अशी वारंवार मागणी करुनही त्याकडे दुर्लक्ष करण्यात आले. त्यामुळे कल्पना राजपूत यांनी गुरुवारी (४ जुलै) बेमुदत उपोषणास सुरुवात केली. त्यांच्या उपोषणाला लक्ष्मणराव देशमुख, मयंक पांडे, राजेंद्र कांबळे, सय्यद फेरोज, मिर्झा आजम बेग यांच्यासह विविध सामाजिक कार्यकर्त्यांनी पाठिंबा दर्शवला आहे. या संबंधी जिल्हाधिकाऱ्यांना दिलेल्या निवेदनात सचिन देशमुख, अंबरसिंग कुदाळे, सरला परदेशी, सुजित राजपुत, सपना कहाटे, नंदा राजपूत, श्रावणी देशमुख, सरीता डोंगरजाळ, पूजा राजपूत यांच्या सह्या आहेत.

म. टा. प्रतिनिधी, औरंगाबाद

एमजीएम वैद्यकीय महाविद्यालय व रुग्णालयात पहिल्यांदाच नेत्ररोपणाची शस्त्रक्रिया (कॉर्निया ट्रान्स्प्लान्ट) झाली आणि फुलंब्री परिसरातील ६५ वर्षांच्या व्यक्तीला आठ वर्षानंतर जग पाहता आले. आता रुग्णालयाला नेत्ररोपण केंद्र म्हणून मान्यता मिळाल्याने यापुढे मोठ्या प्रमाणात नेत्ररोपणाच्या शस्त्रक्रिया होणार असल्याचे गुरुवारी (४ जुलै) पत्रकार परिषदेत सांगण्यात आले.

यापूर्वी 'एमजीएम'मध्ये अवयवदानातून उपलब्ध झालेले बुब्बुळ (कॉर्निया) शहरातील कमलनयन बजाज रुग्णालयाच्या नेत्रपेढीकडे सुपूर्द करण्यात येत होते. आता रुग्णालयाला नेत्ररोपणाची मान्यता मिळाल्याने 'एमजीएम'मध्ये नेत्ररोपणाची शस्त्रक्रिया नुकतीच यशस्वी करण्यात आली. यानिमित्ताने, डोळ्यात फुल पडल्याने (कॉर्निअल ओपॅसिटी) दृष्टी अधू झालेल्या फुलंब्री येथील ६५ वर्षाच्या रुग्णाला नेत्ररोपणानंतर दृष्टी मिळाली आहे. मुळात ८० टक्के अंधत्व हे उपचार-शस्त्रक्रिया-नेत्ररोपणानंतर नाहिसे करता येते; परंतु त्यासाठी लवकरात लवकर उपचार सुरू करणे गरजेचे आहे आणि त्याचवेळी नेत्रदान-नेत्ररोपणाचे प्रमाणही वाढणे गरजेचे आहे, असे 'एमजीएम'मधील कॉर्निया स्पेशालिस्ट डॉ़ सारिका गाडेकर, नेत्र विभागप्रमुख ज्योतिका मिश्रीकोटकर यांनी पत्रकार परिषदेत सांगितले. महत्वाचे म्हणजे संबंधित नेत्ररोपणाची शस्त्रक्रिया महात्मा ज्योतिबा फुले जनआरोग्य योजनेत झाल्याने रुग्णाला कोणताही खर्चही लागला नसल्याचेही डॉ़ गाडेकर यांनी सांगितले़ दरम्यान, आठ वर्षानंतर जग पाहता आल्याने रूग्ण तसेच नातेवाईकांनी आनंद व्यक्त केला़

म. टा. प्रतिनिधी, औरंगाबाद

पेठे ज्वेलर्स प्रकरणातील मास्टर माईंड संशयित आरोपी राजेंद्र जैन याचा साड्या विक्रीचा होलसेल व्यवसाय आहे. फसवणुकीचा प्रकार उघडकीस आल्यानंतर पेठे यांची भेट घेतली असता त्याने ईडीने आपला पैसा जप्त केल्याची थाप मारली, तसेच मुंबईच्या टोळीने फसवल्याची थाप पोलिसांना सांगितले. पेठे यांचे सोने त्याने बँकेत तारण ठेवून कर्ज उचलत त्याने समर्थनगरात दोन फ्लॅट, तीन अलीशान कार खरेदी केल्याचे उघड झाले आहे.

संशयित आरोपी राजेंद्र जैन याने सुरुवातील पेठे ज्वेलर्समध्ये ग्राहक म्हणून आल्यानंतर थोडे थोडे सोने घेत त्याचे रोखीने पैसे दिले. यानंतर त्याने व्यवस्थापक राणे याचा विश्वास संपादन केला. रायपूर येथे भाचीचे लग्न असल्याचे सांगत त्याने २० किलोचे दागिने एकदा नेले होते. मात्र राणे आणि जैन या दोघांचा फसवणुकीचा प्रकार मालक पेठे यांच्यापर्यंत पोहचला होता. त्यांनी राणेला सांगून राजेंद्र जैन, भारती जैन आणि लोकेश जैन यांना बोलावून घेतले होते. यावेळी राजेंद्र याने आपण राणेकडून सोने घेतले असून ते परत करतो, असे आश्वासन दिले. रायपूर येथे आपले नातेवाईक लोकसभा निवडणूक लढवत आहेत. त्यांच्या निवडणुकीसाठी वापरण्यात येणारी ३२ कोटींची रक्कम नाकाबंदीमध्ये ईडीच्या पथकाने पकडल्याची थाप त्याने मारली. पेठे यांना विश्वास बसावा म्हणून त्याने कारच्या डिक्कीमध्ये नोटांची बंडले असलेला फोटो पेठे यांना पाठवला. नोटाबंदीच्या काळातील इंटरनेटवरचा हा फोटो त्याने एडिट करून पेठे यांना पाठवला होता. यावर पेठे यांचा विश्वास बसल्याने त्यांनी पोलिसांत सुरुवातीला तक्रार दिली नाही. यानंतर पेठे यांनी पोलिसांशी संपर्क साधल्यानंतर पोलिसांनी ईडी सारख्या संस्था नाकाबंदी करीत नसल्याची माहिती दिली. यानंतर पोलिसांनी राजेंद्र जैन यांच्याशी मोबाइलवर संपर्क साधला. त्यावेळी त्याने मुंबईच्या टोळीने आपल्याला काळा पैसा पांढरा करून देतो असे सांगत १५ कोटी रुपयांची फसवणूक केल्याची थाप पोलिसांनाच मारली. पोलिसांनी त्याला आरोपीची नावे, गाडी क्रमांक, मोबाइल क्रमांकाची माहिती विचारली असता यापैकी कोणतीही माहिती राजेंद्र जैन याला सांगता आली नाही. यावरून राजेंद्र जैन हा थाप मारत असल्याचे स्पष्ट झाले. जैनला पकडल्यानंतर पोलिसांनी चांगलाच पाहुणचार केल्यानंतर आपण या कल्पोकल्पित कथा रचल्याचे कबूल केले.

…

\Bसमर्थनगरमध्ये दोन फ्लॅट \B

राजेंद्र जैन याने अलीकडे समर्थनगर राम मंदिराजवळील जय गोपाल अपार्टमेंटमध्ये दोन फ्लॅट खरेदी केले आहेत. यापैकी एक फ्लॅट एक कोटी पाच लाख रुपयांचा, तर दुसरा फ्लॅट ९५ लाखांचा आहे. तसेच तीन अलीशान कार देखील नुकत्याच खरेदी केल्या आहेत. या कार पोलिसांनी जप्त केल्या आहेत. संशयित आरोपी राणेचे शिक्षण बीएससी पर्यंत झाले असून त्याची पत्नी मुंबईत एका खासगी बँकेत नोकरी करते. राजेंद्र जैन हा देखील पदवधीर असून त्याचा पुतण्या लोकेश महाविद्यालयीन विद्यार्थी आहे.

म. टा. विशेष प्रतिनिधी, औरंगाबाद

विना अनुदानित शाळेवरून अनुदानित शाळेमध्ये बदली केलेल्या शिक्षकांना ते अतिरिक्त शिक्षक असल्याचे कारण दर्शवून त्यांच्या बदलीस वैयक्तिक मान्यता नाकारणाऱ्या शिक्षण अधिकाऱ्यांच्या निर्णयास औरंगाबाद खंडपीठात आव्हान देण्यात आले असता औरंगाबाद खंडपीठाचे न्या. संजय गंगापूरवाला व न्या. ए. एम. ढवळे यांनी याचिकाकर्त्यांच्या बदलीस वैयक्तिक मान्यता नाकारू नये, असा आदेश दिला व या मुद्द्यावर दाखल झालेल्या सुमारे शंभरपेक्षा अधिक याचिका गुरुवारी मंजूर केल्या.

या प्रकरणात औरंगाबाद येथील जयभवानी शाळेच्या कल्पना जाधव व बीड येथील सूर्यकांत मुगे यांच्यासह औरंगाबाद खंडपीठांतर्गत येणाऱ्या जिल्ह्यातील शिक्षकांनी याचिका दाखल केली होती. याचिकेत म्हटल्यानुसार, राज्य शासनाने २८ जून २०१६ रोजी शासन निर्णय जारी केला होता. या निर्णयांनुसार एकाच संस्थेंतर्गत चालणाऱ्या विनाअनुदानित शाळेवरून अनुदानित शाळेवर केलेल्या शिक्षकांच्या बदलीस अतिरिक्त शिक्षकांचे कारण दाखवून शिक्षण अधिकाऱ्यांनी मान्यता नाकारल्या होत्या. या आदेशाच्या नाराजीने शिक्षकांनी १००पेक्षा अधिक याचिका दाखल केल्या होत्या. या सर्व याचिकांवर वारंवार सुनावणी होऊन खंडपीठाने याचिका निकालासाठी दोन मे २०१९ रोजी राखून ठेवली होती. त्यावर गुरुवार रोजी खंडपीठाने शिक्षण अधिकाऱ्यांना उद्देशून याचिककर्त्यांच्या वैयक्तिक बदलीस मान्यता नाकारू नये, असा अंतिम आदेश दिला आणि सर्व याचिका मंजूर केल्या. याचिककर्त्यांच्या वतीने विलास पानपट्टे, विष्णू बी. मदन पाटील, नितीन एल चौधरी, एन. एल. जाधव, डी. जे. चौधरी, योगेश बोलकर, विकास मानवडे, ललित महाजन यांनी काम पाहिले. सरकारची बाजू अर्चना गोंधळेकर यांनी मांडली.

म. टा. प्रतिनिधी, औरंगाबाद

'एमआयएम'चे जिल्हाध्यक्ष व शहराध्यक्ष वगळता जिल्ह्याची पूर्ण कार्यकारिणी बरखास्त करण्यात आली आहे. पक्षाच्या जुन्या व नव्या कार्यकर्त्यांना पदाधिकारी म्हणून काम करण्याची संधी मिळावी यासाठी हा निर्णय घेण्यात आला असून, महिनाभरात नवी कार्यकारिणी निवडू,' अशी माहिती जिल्हाध्यक्ष शेख अहमद यांनी पत्रकार परिषदेत दिली.

पत्रकार परिषदेत विशेष जिल्हाध्यक्ष अरूण बोर्डे, शहराध्यक्ष समीर साजीद बिल्डर, नगरसेवक गंगाधर ढगे, साताऱ्याचे माजी सरपंच फिरोज पटेल, मुन्शी पटेल यांच्यासह अन्य पदाधिकाऱ्यांची उपस्थिती होती. यावेळी शेख अहमद म्हणाले, पक्षाला जिल्ह्यात वाढविण्यासाठी विशेष मोहीम राबविण्यात येईल. लोकसभा निवडणुकीत यश मिळाल्यानंर पक्षप्रमुख असदुद्दीन ओवेसी आणि खासदार इम्तियाज जलील यांनी गावागावात पक्षाची ध्येयधोरणे पोहचविण्याचा निर्धार केला आहे. त्यासाठी प्रत्येक गावात कार्यकारिणी तयार करण्यात येईल. जिल्हा, शहरासह पक्षाची विद्यार्थी कार्यकारिणीही बरखास्त केली आहे. त्यामुळे संबंधित कार्यकर्त्यांनी पद, नाव, लेटरहेडचा वापर करू नये,' अशी ताकीदही यावेळी देण्यात आली.

\Bपक्षांतर्गत नाराजीचे पेव

\Bविधानसभा निवडणुकीपूर्वी अचानक कार्यकारिणी बरखास्त केल्याने निष्ठावंत कार्यकर्ते नाराज आहे. सध्या निवडणुका आल्या असून पक्षात इनकमिंग सुरू आहे. त्यामुळे या नव्या कार्यकर्त्यांमुळे जुन्या निष्ठांवंतांवर अन्याय होणार असल्याची चर्च सुरू आहे. त्यामुळे निवडणुकीपूर्वी पक्षांतर्गत नाराजी वाढण्याचा धोकाही व्यक्त करण्यात येत आहे. विशेष म्हणजे विधानसभेच्या तयारीला लागलेल्या एका नेत्याने त्याच्या मतदार संघातील काही कार्यकर्त्यांना पक्षातील महत्त्वपूर्ण पदे दिली होती. मात्र, जिल्हाध्यक्षांच्या कार्यकारिणी बरखास्तीच्या निर्णयामुळे संबंधित नेत्याला निवडणुकीत मोठा फटका बसण्याची शक्यता आहे. त्यामुळे वरिष्ठ नेतेही नाराज होतील, अशी चर्चा आहे.

…

औरंगाबाद : सहकार खात्याने औरंगाबाद विभागातील हजारो संस्था अवसायनात काढल्या असताना जिल्ह्यात मात्र गेल्यावर्षीच्या तुलनेत सहकारी संस्थांमध्ये लक्षणीय वाढ झाली आहे. विविध प्रकारच्या ५२८ सहकारी संस्था कार्यरत झाल्या आहेत, त्यामुळे जिल्ह्यात एकूण नोंदणीकृत सहकारी संस्थांची संख्या चार हजार ७९३ झाली आहे. सहकाराच्या माध्यमातून सर्व सामान्यांच्या विकासाला हातभार लागावा याच उद्देशाने विविध सहकारी संस्थांची स्थापना केली जाते. गेल्यावर्षीच्या तुलनेत जिल्ह्यात सहकारी संस्थांची संख्या ५२८ ने वाढली आहे. गतवर्षीच्या मार्च २०१८च्या अपेंडिक्स नुसार जिल्ह्यात विविध प्रकारच्या चार हजार २६५ सहकारी संस्था कार्यरत होत्या. यंदा यामध्ये ५२८ची भर पडली आहे. त्यामुळे सहकारी संस्थांची संख्या ४ हजार ७९३ झाली आहे. जिल्ह्यातील नऊ तालुक्यांत कार्यरत असलेल्या संस्थांची ही संख्या आहे. सर्वाधिक संस्था औरंगाबाद तालुक्यात असून सर्वात कमी संस्था या सोयगाव तालुक्यात आहेत.

म. टा. प्रतिनिधी, औरंगाबाद

पैशांचा पाऊस पाडतो, ५ ते ७ कोटी रुपये मिळवून देतो, असे आमीष दाखवून हैदराबाद येथील एका मेकॅनिकला साडेआठ लाखांचा गंडा घालणारा संशयित आरोपी साहेब खान यासीन खान पठाण याला बुधवारी (३ जुलै) रात्री अटक करण्यात आली. त्याला गुरुवारी न्यायालयात हजर करण्यात आले असता, सोमवारपर्यंत (८ जुलै) पोलिस कोठडीत ठेवण्याचे आदेश प्रथम वर्ग न्यायदंडाधिकारी पी. एच. जोशी यांनी दिले.

या प्रकरणी डोडू सत्यनारायण डोडू जंगैयय (४१, रा. हैदराबाद) यांनी फिर्याद दिली होती. त्यानुसार, फिर्यादीचा मित्र हजारी खत्री (रा. हैदराबाद) याने साहेब खान यासीन खान पठाण (५३, रा. नारेगाव) याची ओळख करून दिली होती. त्यावेळी आरोपीने ११ लाख रुपये दे, चमत्कारी विद्येने तुला ५ ते १० कोटी रुपये मिळवून देतो, असे आमीष दाखविले. मात्र फिर्यादीने त्यावर विश्वास ठेवला नाही. त्यानंतर आरोपीने वारंवार आग्रह करून बळी पाडले. त्यामुळे फिर्यादीने आरोपीला वेगवेगळ्या वेळी एकूण आठ लाख ५० हजार रुपये रोख व दोन लाख ५० हजार रुपयांचे धनादेश दिले. त्यानंतर आरोपीने तुमच्या पैशांची तडजोड मी तुमच्या घरी येऊन करतो, असे सांगितले. त्यानुसार ४ मे २०१९ रोजी दुपारी ३ वाजेच्या सुमारास फिर्यादी व त्याचा मित्र सैय्यद जहाँगीर हे आरोपीच्या गाडीत हैदराबादकडे निघाले. लातूर रोडवर पोलिसांनी आरोपीची गाडी थांबवून फिर्यादीसह त्यांच्या मित्राला खाली उतरविले व आरोपीसह गाडी घेऊन गेले. त्यामुळे फिर्यादी व मित्र बसने पुन्हा औरंगाबादला आले. ते आरोपीच्या घरी गेले असता आरोपीचा मुलगा जावेद खान याने त्यांना शिविगाळ करुन धमकी देत हाकलून लावले.

\Bरक्कम, धनादेश जप्त करणे बाकी

\Bफसवणूक झाल्याची खात्री पटल्यानंतर फिर्यादीने तक्रार दिल्यावरुन सिडको पोलिस ठाण्यात गुन्हा दाखल होऊन आरोपीला अटक करुन न्यायालयात हजर केले असता, आरोपीचा साथीदार व मुलगा जावेद व अन्य साथीदारांचा शोध घेऊन त्यांना अटक करणे बाकी, गुन्ह्यातील रक्कम व धनादेश आरोपीकडून हस्तगत करणे, आरोपीला बीड, लातूर व नेकनूर येथे नेऊन पडताळणी करणे बाकी असल्याने आरोपीला पोलिस कोठडी देण्याची विनंती सहाय्यक सरकारी वकील ए. व्ही. घुगे यांनी न्यायालयात केली. ही विनंती मान्य करुन न्यायालयाने आरोपीला सोमवारपर्यंत पोलिस कोठडी सुनावली.

म.टा. प्रतिनिधी, औरंगाबाद

महाराणा सेक्युरेटी सर्व्हिसेस या संस्थेच्या माध्यमातून कंत्राटी पद्धतीने महापालिकेच्या सेवेत घेण्यात आलेल्या दोन अभियंत्यांना आयुक्तांनी मंगळवारी तडकाफडकी कार्यमुक्त केले. मोहम्मद शाहबाज आणि खान अब्दुल मोहीनीन अशी त्यांची नावे आहेत. ड्रेनेज विभागासाठी त्यांची नियुक्ती करण्यात आली होती. कामाकडे दुर्लक्ष करणे, सतत गैरहजर राहणे या कारणांमुळे त्या दोघांना कार्यमुक्त करण्यात आल्याची माहिती सूत्रांनी दिली. वैयक्तिक शौचालये या प्रकल्पावर त्या दोघांची नियुक्ती करण्यात आली होती.

म. टा. प्रतिनिधी, सिल्लोड सिल्लोड तालुक्यात ३८८ जणांना घरकुल मंजूर झाले असून लाभार्थ्यांना योजनेची माहिती देण्यासाठी आयोजित मेळाव्यातच लाचखोरीचा प्रकार उघड झाला. दुसऱ्या हप्त्याची रक्कम देण्यासाठी ग्रामसेवक दहा हजार रुपये मागत असल्याचे हट्टी येथील लाभार्थी किरण उत्तम चौथमल यांनी जाहीरपणे सांगितल्याने खळबळ

उडाली आहे. पंचायत समितीतर्फे आयोजित घरकुल योजनेच्या लाभार्थ्यांसाठी आयोजित या मेळाव्याला आमदार अब्दुल सत्तार, गटविकास अधिकारी प्रकाश दाभाडे, पंचायत समिती सभपती ज्ञानेश्वर तायडे, सहाय्यक गटविकास अधिकारी ज्योती राठोड यांच्यासह तालुक्यातील प्रमुख पदाधिकारी उपस्थित होते. या मेळाव्यात तालुक्यातील हट्टी येथील लाभार्थी किरण चौथमल यांनी घरकुलचा दुसरा हप्ता मिळावा यासाठी संबंधित ग्रामसेवक याने दहा हजार रुपयांची लाच मागितली असल्याचे जाहीरपणे सांगितल्याने आमदारांसह अधिकारी गडबडून गेले. यावर तीव्र नाराजी व्यक्त करत आमदार सत्तार यांनी संबंधित ग्रामसेवक यांची चौकशी करून कारवाई करण्याच्या सूचना दिल्या. यापूर्वी दहा टक्के लाभार्थ्यांनी पहिला हप्ता घेऊनही अद्याप काम सुरू केले नाही. त्यामळे आधी काम सुरू करा, त्यानंतर पहिला हप्ता दिला जाईल, असे घरकुल योजनेच्या समन्वयकांनी

प्रास्ताविकात सांगितले. त्यावर आक्षेप घेत आमदारांनी, काम सुरू केले नसलेल्यांच्या अडचण जाणून घ्या किंवा त्यांच्यावर कारवाई करा. मात्र काहीजणांच्या चुकीमुळे इतरांना वेठीस धरू नका, अशी

सूचना केली.

सातारा : देवळाई रोडवरील ड्रेनेजचे चेंबर १५ दिवसांपासून तुंबल्यामुळे येथील नागरिकांचे आरोग्य धोक्यात आले आहे. शिवाय गाळ साचल्याने ड्रेनेजचे पाणी वाहण्याची वाट बंद झाली आहे.

छत्रपतीनगरलगत हॉटेल प्रशांतचे हे चेंबर असून पावसाचे व मलमिश्रीत घाण पाण्याचा लोंढा सतत वाहत असल्याने पूर्णानंद प्लाझाशेजरील सुशील यांच्या खासगी जागेवर ड्रेनेज मिश्रीत घाण पाण्याचे तळे साचले आहे. त्यावर डास व इतर किटक घोंगावत आहेत. याच ठिकाणी मेनहोल, खाली पाइपलाइन व खासगी बओअरही घेतलेले आहेत. बोअरच्या पाण्यात ही घाण जमा होत आहे. हॉटेल प्रशांतच्या मालकाने एकदा याची दुरुस्ती करत घाण पाणी तसेच सोडून पुन्हा दुरुस्ती केलेली नाही. महापालिकाही याकडे दुर्लक्ष करत असल्याने नागरिक आजारी पडण्याचा धोका वाढला आहे. खासगी जागा मालकाचे पाठीमागे बांधकाम सुरू आहे, घाण पाण्याचा तळ्यात माती, गाळ साचल्याने ड्रेनेज पाणी वाहण्याची वाट बंद झाली आहे.

येथील ड्रेनेज लाइन खराब आहे, मलमिश्रीत घाण पाण्याचा लोंढा वाहत असल्याने प्रचंड दुर्गंधी सुटली असून दुकानात डास चावत आहेत. तत्काळ ड्रेनेज लाइन बदलून घाण पाणी न उपसल्यास डेंगू, मलेरियाची साथ परिसरात पसरणे अटळ आहे.

- अशोक लोहाडे, किराणा दुकानदार

म. टा. प्रतिनिधी, औरंगाबाद

प्राध्यापकांची भरती केंद्रीय पद्धतीने करा या मागणीसाठी अखिल भारतीय विद्यार्थी परिषदेतर्फे सहसंचालक कार्यालयासमोर गुरुवारी निदर्शने करण्यात आली. या मागणीसाठी संघटनेने राज्यातील उच्चशिक्षण संचालकांसह विविध विभागीय उपसंचालक कार्यालयांसमोर निदर्शने केली.

सरकारच्या धोरणांचा निषेध करत, भरती प्रक्रियेबाबत पारदर्शकता आणण्याच्या घोषणा दिल्या. प्राध्यापक भरतीची परवानगी कॉलेज प्रशासनाला मिळाली. त्यात कॉलेज व्यवस्थापनांकडून मोठ्या प्रमाणात भ्रष्टाचार होतो आहे. संस्थाचालकांकडून नेट, सेट, पीएच. डी. धारकांवर अन्याय होतो आहे. सर्वसामान्य कुटुंबातील गुणवंत विद्यार्थ्यांची संधी नाकारली जात असल्याचे निवेदनात म्हटले आहे. प्राध्यापकांची भरती केंद्रीय पद्धतीने करण्यात यावी, शंभर टक्के प्राध्यापक भरतीला राज्यसरकारने परवानगी द्यावी, राज्यातील सर्व विद्यापीठांमधील शंभर टक्के प्राध्यापकांची पदे भरण्यात यावीत, पीएचडी करणाऱ्या विद्यार्थ्यांना राज्यसरकारतर्फे फेलोशीप सुरू करण्यात यावी, सर्व राज्यात एकाचवेळी प्राध्यापक भरती करण्यात यावी अशा विविध मागण्या करण्यात आल्या आहेत. यावेळी विवेक पवार, शिवा देखणे यांची प्रमुख उपस्थिती होती.

प्राध्यापक भरतीमध्ये गुणवंत विद्यार्थ्यांवर अन्याय होतो आहे. त्यामुळे प्रक्रिया केंद्रीय पद्धतीने व्हावी अशी आमची मागणी आहे. त्यादृष्टीकोनातून सरकार, प्रशासनाने पाऊले उचलणे गरजेचे आहे.

विवेक पवार,

जिल्हा संयोजक.

म. टा. प्रतिनिधी, औरंगाबाद

परिवहन विभागाने २९ जून रोजी पाठविलेला रिफलेक्टर्स टेपचा नवीन नियम आरटीओ विभागाने कोणतीही पूर्वसूचना न देता ३ जुलै लागू केला. अचानक लागू झालेल्या नियमामुळे अपॉइंटमेंट घेऊन आलेल्या वाहनधारकांना करोडी येथून वाहनांची पासिंग न करता परतावे लागले. यामुळे दोन दिवसांत दोनशेपेक्षा जास्ता वाहनांची पासिंग झालेली नाही.

अधिकृत विक्रेत्यांकडून वाहनांवर रिफलेक्टर्स लावावेत, रिफलेक्टर्सचा दर्जा चांगला असावा, असा आदेश परिवहन विभागाने २९ जून रोजी काढला आहे. हा आदेश २ जुलै रोजी औरंगाबाद कार्यालयास प्राप्त झाला. त्यावर उपप्रादेशिक परिवहन अधिकाऱ्यांपासून ते मोटार वाहन निरीक्षकांपर्यंत सर्व अधिकाऱ्यांची बैठक घेण्यात आली. अधिकृत विक्रेत्याकडून रिफलेक्टर्स टेप न लावलेली वाहने तपासू नयेत, असे या आदेशात म्हटले आहे. त्याचा आधार घेत ३ जुलै पासून पासिंगसाठी आलेल्या रिक्षा, चारचाकी वाहने, ट्रकची फिटनेस तपासणी बंद करण्यात आली. त्यामुळे विविध भागातून अपॉइंटमेंट घेऊन आलेल्या वाहनधारकांना परत जावे लागले.

अधिकृत विक्रेत्याची माहिती मोटार निरीक्षकांकडे उपलब्ध नव्हती. फक्त अधिकृत विक्रेत्याकडूनच रेडियमची पावती सोबत आणण्याचे तोंडी सांगण्यात आले. या वाहनधारकांना दुसऱ्या दिवशी किंवा त्यानंतरच्या दिवशीची अपॉइंटमेंट मिळेल की नाही याचीही माहिती दिली नाही.

\Bपरिवहन विभागाचा आदेश \B

प्रतिबिंबित करणारे रिफलेक्टर्स, रिफलेक्टिव्ह टेप्स आणि मागील बाजूस रियर मार्किंग प्लेट टेप एआयएस ०८९ व ए आय ०९० मानकांचे पालन करणारे असावेत. हे सर्व रात्री वाहनांवर स्पष्टपणे दृश्यमान असावेत. हे उत्पादने केंद्रीय मोटार वाहन नियम १९८९च्या नियम १२६ मध्ये नमूद चाचणी संस्थांपैकी कोणत्याही एका संस्थेद्वारे तपासणी प्रमाणपत्र तसेच उत्पादनाचे प्रमाणपत्र प्राप्त असावे. उत्पादन आणि अधिकृत विक्रेते वाहनांवर रिफलेक्टर्स, रिफ्लेक्टिव्ही टेप्स आणि मागील बाजुला रिअर मार्किंग प्लेट-टेप लावल्यानंतर वाहनमालकांना इन्स्टॉलेशन प्रमाणपत्र जारी करतील. केवळ क्यूआर कोडसह ऑनलाइन जारी कलेले प्रमाणपत्र वैध मानले जाईल, असे आदेशात म्हटले आहे.

……

\Bअधिकृत विक्रेताच नाही \B

परिवहन विभागाने आदेश काढला पण शहरात क्यूआर कोड असलेला विक्रेता आरटीओ विभागाकडे अधिकृत नाही. बीड, जालना, लातूरसह अन्य भागातही अधिकृत विक्रेते नसल्याचा फटका वाहनधारकांना बसत आहे.

\Bशुक्रवारपासून पासिंग \B

रिफलेक्टर्सच्या नवीन नियमामुळे दोन दिवस वाहनांची पासिंग बंद होती. याची माहिती परिवहन विभागाला दिली आहे. या माहितीवरून हा निर्णय काही दिवसांसाठी स्थगित करण्यात आला आहे. शुक्रवारपासून पुन्हा नियमित पद्धतीने वाहनांची पासिंग केली जाणार आहे, अशी माहिती उपप्रादेशिक परिवहन अधिकारी संजय मैत्रेवार यांनी दिली.

……

म. टा. प्रतिनिधी, औरंगाबाद

शहरातील विविध भागात वृक्षांची छाटणीसह इतर देखभाल दुरुस्तीच्या कामासाठी शुक्रवारी (५ जुलै) विविध भागात चार ते पाच तास वीज पुरवठा खंडित राहणार असल्याचे महावितरणने कळविले आहे.

महावितरणने दिलेल्या माहितीनुसार, १३२ चिकलठाणा सबस्टेशनवरील वोखार्ट फिडरवर सकाळी १० ते ३, चिकलठाण्यातील ११ केव्ही एन १ मध्ये सकाळी १० ते ३, गजानन महाराज मंदिर फिडरवरील १० ते दुपारी १, चाणक्यपुरी फिडरवर सकाळी १० ते दुपारी १, चेतनानगर फिडरवर दुपारी १ ते ४, एकनाथ रंगमंदिर फिडरवर सकाळी १० ते दुपारी ४, चिकलठाणा ११ केव्ही सिडको फिडरवर १० ते दुपारी ३, रामा इंटरनॅशनल फिडर सकाळी १० ते ३, सेन्ट्रॉन फिडर १० ते ३, सिडको एन ७ सबस्टेशनवरील १० एमव्हीए पॉवर ट्रान्सफार्मरवर सकाळी ९ ते दुपारी २, एन ७ च्या ११ केव्ही जालना रोड फिडरवर सकाळी ९ ते १ वाजेच्या दरम्यान वीज पुरवठा खंडित राहणार आहे.

या कामामुळे वोखार्ड, सी. के. डायकिन, एन १चा टाऊन सेंटर, कॅनॉटचा काही भाग, सारंग हौसिंग सोसायटी, अलंकार हौसिंग सोसायटी, विशालनगर, हुसैन कॉलनी, त्रिमूर्ती चौक, देवानगरी, प्रतापनगर, एमएचबी कॉलनी, शाह कॉलनी, कासलीवाल गार्डन, एन ३, एन ४, टाऊन सेंटर, कॅनॉट गार्डन, लेमन ट्री, एन १, एन २, एन ३ सह सिडको बस स्थानक, एन ५, राम मंदिर, एन ६, एन ७, एन ८, महेशनगर, कैलासनगर, संजयनगर, दादा कॉलनी, अहिंसानगर या भागात वीज पुरवठा चार ते पाच तासांसाठी बंद राहणार आहे.

म. टा. प्रतिनिधी, औरंगाबाद

वैद्यकीय विद्यार्थ्यांमध्ये एकसमानता असावी, महाविद्यालय व रुग्णालय परिसरात विद्यार्थी आपल्या मनमर्जीप्रमाणे कोणत्याही कपड्यांमध्ये येऊ नयेत व शिस्तीचे वातावरण राखता यावे, तसेच रुग्णालय परिसरात वैद्यकीय विद्यार्थी घोळक्यातून चटकन ओळखता यावेत आदी विविध दृष्टीकोनातून वैद्यकीय विद्यार्थ्यांना गणवेश लागू करण्यात आला आहे. त्यामुळे यंदाच्या शैक्षणिक वर्षापासून शासकीय वैद्यकीय महाविद्यालयाचे विद्यार्थी गणवेशात दिसणार आहेत. अर्थात, सध्या एमबीबीएस अभ्यासक्रमाच्या पहिल्या वर्षाच्या विद्यार्थ्यांना हा गणवेश लागू करण्यात आला असून, पदव्युत्तर विद्यार्थ्यांनाही भविष्यात गणवेश लागू होण्याची शक्यता आहे.

अनेक शासकीय-खासगी महाविद्यालयांमध्ये विद्यार्थ्यांना गणवेश (युनिफॉर्म) लागू आहे. त्यातही अधिकाधिक अभियांत्रिकी महाविद्यालयांमध्ये गणवेश लागू असल्याचे सहजच दिसून येते. त्याचवेळी अनेक वैद्यकीय महाविद्यालयांना गणवेश लागू नसल्याचेही लक्षात आल्याशिवाय राहात नाही. त्यामुळेच वैद्यकीय महाविद्यालयांमध्ये विद्यार्थ्यांना गणवेश लागू करण्याच्या मागणीने जोर घेतला होता आणि त्याची दखल घेत नाशिकच्या महाराष्ट्र आरोग्य विज्ञान विद्यापीठाने गणवेश लागू करण्याची सूचना केली आहे. अर्थात, कोणत्या रंगाचा गणवेश असावा, हे ठरवण्याचे स्वातंत्र्य महाविद्यालयांना देण्यात आले आहे. त्यानुसार शहरातील शासकीय वैद्यकीय महाविद्यालयात विद्यार्थ्यांना गणवेश लागू करण्यात येत आहे. या संदर्भात अधिष्ठाता डॉ. कानन ये‌ळीकर म्हणाल्या, यंदापासून 'एमबीबीएस'च्या पहिल्या वर्षाच्या विद्यार्थ्यांना गणवेश असणार आहे. सद्यस्थितीत जांभळ्या रंगाचा शर्ट व काळ्या रंगाची पँट, अशा गणवेशाचा विचार सुरू आहे; परंतु त्यावर अंतिम निर्णय झालेला नाही. तसेच विद्यार्थी व विद्यार्थिनींना हाच गणवेश असावा का विद्यार्थिनींना सलवार-कमीज असावी, याविषयीही विचार सुरू आहे. लवकरच त्यावर अंतिम निर्णय होईल. भविष्यात पुढील वर्षांच्या व पदव्युत्तर अभ्यासक्रमाच्या विद्यार्थ्यांना गणवेश लागू होऊ शकतो, असेही डॉ़ ये‌ळीकर म्हणाल्या.

\B'सॉफ्ट स्किल्स' विकसित करण्याचे ध्येय

\Bएमबीबीएसच्या विद्यार्थ्यांमध्ये पहिल्या वर्षापासूनच निरनिराळे 'सॉफ्ट स्किल्स' विकसित करण्याचा प्रयत्न असणार आहे व त्यासाठी पहिल्या वर्षाच्या विद्यार्थ्यांना १ ते ३० ऑगस्ट या कालावघधीत 'फाऊंडेशन कोर्स'द्वारे प्रशिक्षण दिले जाणार आहे. याच 'फाऊंडेशन कोर्स'मध्ये रुग्ण-नातेवाईकांशी आणि पर्यायाने समाजातील वेगवेगळ्या स्तरातील वेगवेगळ्या व्यक्तींशी डॉक्टर म्हणून उत्तम सुसंवाद कसा साधला जाऊ शकतो, जेणेकरुन कोणत्याही समस्या उद्भवणार नाहीत किंवा समस्यांना गंभीर वळण लागणार नाही, याविषयी वैद्यकीय अभ्यासक्रमाच्या विद्यार्थ्यांना सुरुवातीलाच मार्गदर्शन करण्यात येणार आहे. त्याचाच भाग म्हणून विद्यार्थ्यांना नीतीमूल्यांचे धडे दिले जाणार आहेच; शिवाय कोणत्याही स्थितीत-परिस्थितीत मानसिकरित्या स्थिर राहून उत्तम रुग्णसेवा कशी देता येईल, यादृष्टीने विद्यार्थ्यांमध्ये भाषिक कौशल्य विकसित करण्याचा प्रयत्न असेल. त्याचवेळी क्लिष्ट-गुंतागुंतीच्या व गंभीर केसेसमध्ये उपयुक्त ठरणारे कायदेविषयक ज्ञान-माहितीही विद्यार्थ्यांना दिली जाईल. तसेच विद्यार्थी शारीरिक-मानसिकदृष्ट्या स्थिर राहण्यासाठी योग, ध्यान व खेळांबाबतही मार्गदर्शन केले जाणार आहे. तंत्रज्ञानात पुढे राहण्यासाठी विद्यार्थ्यांना संगणकीय ज्ञानाबाबतही अद्ययावत केले जाणार असल्याचे कोर्सच्या प्रमुख डॉ़ रेषाकिरण शेंड्ये यांनी 'मटा'शी बोलताना सांगितले.

म. टा. प्रतिनिधी, औरंगाबाद

छावणीतील कर्णपुरा भागात जनावरांच्या मल-मुत्राने नागरिकांचे आरोग्य धोक्‍यात आले आहे. याकडे छावणी परिषदेने दुर्लक्ष केल्याचा आरोप करीत कल्पना सुजीत राजपूत यांनी छावणी परिषदेसमोर बेमुदत उपोषण सुरू केले होते. उपोषणाची दखल घेत छावणी परिषदेने साफसफाईचे आश्वासन देत प्रत्यक्षात कृती सुरू केल्याने राजपूत यांनी उपोषण मागे घेतले. दरम्यान, परिषदेने कारवाईसंदर्भात ज्या मृत व्यक्तीला नोटीस बजावल्याचे पत्रात म्हटले होते, त्यात घुमजाव करीत 'टंकलेखनाच्या चुकीमुळे मृत व्यक्तीला नोटीस बजावल्याचे कळविले होते; पण मृत व्यक्तीच्या मुलाला नोटीस बजावल्याचे वाचावे', असेही पत्र परिषदेने गुरुवारी (४ जुलै) दिल्याचे उघड झाले आहे. कर्णपुरा भागातील जनावरांच्या मलमुत्र व दुर्गंधीने रहिवाशांचे आरोग्य धोक्‍यात आले असून, गोठा हलवण्यात यावा, अशी परिषदेकडे वारंवार मागणी करुनही त्याकडे दुर्लक्ष करण्यात आल्यामुळे कल्पना राजपूत यांनी गुरुवारी उपोषणास सुरू केले होते. त्याची दखल घेत परिषदेने साफसफाई सुरू केल्यामुळे उपोषण मागे घेण्यात आले. त्यानंतर शुक्रवारी परिसरात साफसफाई करण्यात येत असल्याचे दिसून आले.