म. टा. प्रतिनिधी, औरंगाबाद

बनावट दंतरोग तज्ज्ञांसह बनावट दंत तंत्रज्ञांचा राज्यभर सुळसुळाट असून, रुग्णांच्या मुख आरोग्याशी खेळ सुरू असल्याचेही दिसून येत आहे. त्यातही ग्रामीण भागात ही बनवेगिरी मोठ्या प्रमाणावर व सर्रास सुरू आहे. या दंततज्ज्ञ व दंत तंत्रज्ञांविरुद्ध कारवाई करण्यात यावी, अशी मागणी महाराष्ट्र राज्य दंत परिषदेकडून संबंधित जिल्ह्यातील बनावट डॉक्टरांविरुद्धच्या समितीकडे करण्यात आली आहे. त्याचवेळी राज्यात अधिकृत दंत तंत्रज्ञांची संख्याही अत्यल्प आहे आणि अधिकृत दंत तंत्रज्ञ नसलेले राज्यात अनेक जिल्हे असल्याचेही समोर येत आहे. त्यामुळे प्रत्येक दंत महाविद्यालयामध्ये दंत तंत्रज्ञांचे अभ्यासक्रम सुरू करण्याची मागणी खुद्द दंत परिषदेने केली आहे.

राज्यात सुमारे ४० हजार अधिकृत व नोंदणीकृत दंतज्ज्ञ आहेत. त्यापैकी ३५ हजारांवर दंततज्ज्ञ राज्यात कार्यरत असावेत, असा अंदाज आहे. यातील बहुतांश दंततज्ज्ञ हे जिल्ह्याच्या व तालुक्याच्या ठिकाणी आहेत, मात्र गाव पातळ्यांवर; तसेच अनेक तालुक्यांमध्ये दंततज्ज्ञांची संख्या बरीच कमी आहे. त्यातही गाव-खेड्यांमध्ये दंततज्ज्ञांची संख्या नगण्य अशीच आहे आणि अशा प्रत्येक ठिकाणी रुग्णांना मुख आरोग्याच्या सेवा देणाऱ्या अनधिकृत दंतज्ज्ञांचा सुळसुळाट आहे. यात फिरतीवर असणाऱ्या अनेक बनावट दंततज्ज्ञांकडून तर, गोरगरीब व गाव-खेड्यातील रुग्णांच्या मुख आरोग्याशी खेळ सुरू असल्याचेही सूत्रांनी सांगितले.

अनेकदा पर्याय नसल्यामुळेही गोरगरीबांना अशा बनावट दंत तज्ज्ञांच्या सेवा घ्याव्या लागतात, असेही चित्र आहे. याच बनवेगिरीमुळे अनेकदा अनेकांवर चुकीचे उपचार होतात, अशाही तक्रारी आहेत. त्याचवेळी, दंत तज्ज्ञांइतकीच महत्त्वाची भूमिका निभावणाऱ्या दंत तंत्रज्ञांची संख्या संपूर्ण राज्यात ७००पेक्षा जास्त नाही, असेही समजते. कृत्रिम दात तयार करण्यापासून ते कवळी तयार करण्यापर्यंतची विविध कामे ही दंत तंत्रज्ञांशिवाय होऊ शकत नाहीत व प्रत्येक ठिकाणी अशा तंत्रज्ञांची गरज असते. या पार्श्वभूमीवर अधिकृत तंत्रज्ञांची संख्या अगदी अत्यल्प असल्याने अनधिकृत तंत्रज्ञांचा मोठ्या प्रमाणावर शिरकाव झाला आहे. मुळात अधिकृत तंत्रज्ञांची संख्या कमी असल्यामुळे ही कामे करून घेण्यासाठी अनधिकृत तंत्रज्ञांशिवाय पर्याय नसल्याची स्थिती संपूर्ण राज्यात आहे. या बनावट दंततज्ज्ञ व दंत तंत्रज्ञांचा धोका लक्षात घेऊन त्यांच्यावर कारवाई करण्याचा निर्णय अलीकडेच घेण्यात आला आहे. बनावट डॉक्टरांबरोबरच बोगस दंततज्ज्ञ व बोगस दंत तंत्रतज्ज्ञांवरही कारवाई केली जाणार आहे. यासंदर्भात प्रत्येक जिल्ह्यात स्थापन करण्यात आलेल्या समितीकडे महाराष्ट्र राज्य दंत परिषदेकडून तक्रार करण्यात येत आहेत.

\Bमहाविद्यालयांमध्ये अभ्यासक्रमाचा अभाव

\Bराज्यातील फार कमी दंत महाविद्यालयांमध्ये दंत तंत्रज्ञांसाठीचे अभ्यासक्रम सुरू आहेत. त्यामुळे राज्यात तंत्रज्ञांची निर्मिती फार कमी प्रमाणात होत असून, हेदेखील अनधिकृत तंत्रज्ञांच्या सुळसुळाचे कारण असल्याचे तज्ज्ञांकडून सांगितले जाते. मराठवाड्यातील एकमेव शासकीय दंत महाविद्यालय हे औरंगाबाद शहरात आहे आणि मान्यता मिळूनही दोन अभ्यासक्रम जागेअभावी महाविद्यालयात सुरू होऊ शकलेले नाही.

बनावट दंततज्ज्ञ व बोगस दंत तंत्रज्ञांविषयी जिल्हा पातळीवरील समितीकडे अनेक तक्रारी करण्यात आल्या आहेत. अधिकृत तंत्रज्ञांची संख्या वाढवण्यासाठी प्रत्येक दंत महाविद्यालयामध्ये छोटे-छोटे अभ्यासक्रम, पदविका अभ्यासक्रम सुरू व्हायला पाहिजे. या संदर्भातील मागणी परिषदेकडून राज्य सरकारकडे करण्यात आली आहे.

\B- डॉ. नरेंद्र काळे\B, अध्यक्ष, महाराष्ट्र राज्य दंत परिषद

म. टा. प्रतिनिधी, औरंगाबाद

महापालिकेने उच्चन्यायालयाच्या आदेशानुसार औरंगाबाद शहराच्या विविध वॉर्डांत लावण्यात आलेले पोस्टर्स, बॅनर्स, झेंडे, कटआउट काढून टाकले. ही कारवाई गुरुवार, शुक्रवार असे दोन दिवस करण्यात आली. दोन दिवसांत १४०८ पोस्टर्स, बॅनर्स, झेंडे काढण्यात आले. झोन क्रमांक एक अंतर्गत ९५, झोन क्रमांक दोन अंतर्गत १८१, झोन क्रमांक तीन अंतर्गत १०५, झोन क्रमांक चार अंर्तगत २५, झोन क्रमांक पाच अंतर्गत २१३, झोन क्रमांक सहा अंतर्गत १९७, झोन क्रमांक सात अंतर्गत ६२, झोन क्रमांक आठ अंतर्गत २२२ तर झोन क्रमांक नऊ अंतर्गत ३१२ पोस्टर्स, बॅनर्स, झेंडे काढण्यात आले.

औरंगाबाद : बार कौन्सिल ऑफ महाराष्ट्र अँड गोवाच्या पंचवार्षिक निवडणुकीमध्ये मुंबई उच्च न्यायालयाच्या औरंगाबाद खंडपीठात कार्यरत विधिज्ञ वसंतरावर साळुंके आणि अमोल सावंत विजयी झाले.

या निवडणुकीसाठी २८ मार्च २०१८ रोजी मतदान झाले होते. महाराष्ट्र आणि गोवा कार्यक्षेत्र असलेल्या या बार कौन्सिलसाठी जवळपास दीड लाख मतदार होते. वसंतराव साळुंके हे बार कौन्सिलवर सलग चौथ्यांदा विजयी झाले असून, संपूर्ण राज्यभरातून असा विजय मिळविणारे ते एकमेव आहेत.

याआधीच्या कार्यकारिणीची निवड २०१०मध्ये झाली होती. २०१५मध्ये मतदार वकिलांच्या पदवी पडताळणीसाठी या कार्यकारिणीला सहा महिने मुदतवाढ मिळाली मात्र, हे काम तीन वर्षे रेंगाळले. दरम्यान, तीन सदस्यांची प्रशासकीय समिती नेमण्यात आली. सर्वोच्च न्यायालयाच्या आदेशानंतर या निवडणुका घेण्यात आल्या. या निवडणुकीतून एकंदर २५ सदस्यांनी निवड करण्यात आली. यासाठी राज्यभरातून १३३ उमेदवार उभे होते. यात प्राधान्यक्रमाने मतदान असल्याने मतमोजणी प्रक्रिया अतिशय संथ गतीने होते. यंदाही वारंवार न्यायालयीन दावे-प्रतिदावे आणि इतर अनुषंगिक बाबींमुळे सारी निवडणूक रेंगाळली होती. या साऱ्या प्रक्रिया पूर्ण होऊन सोमवारी निकाल जाहीर करण्यात आला.

म. टा. प्रतिनिधी, फुलंब्री

औरंगाबाद - जळगाव या राष्ट्रीय महामार्गाचे काम करणाऱ्या ऋत्विक कंपनीकडे हँडलोन व डिझेलचे एकूण ४७ लाख सहा हजार रुपये बाकी असून, संबंधित कंपनीच्या प्रकल्प व्यवस्थापकाने येथून पळ काढला आहे. त्यामुळे व्यवस्थापक जय प्रकाश मळपण व ऋत्विक कंपनी या दोघावारही कायदेशीर कारवाई करावी, अशी मागणी फुलंब्री पोलिसांकडे जय पेट्रोल पंप चालक मीरा रवींद्र काथार व रवींद्र विठ्ठल काथार यांनी सोमवारी (१५ जुलै) केली आहे.

याबाबत अधिक माहिती अशी की, औरंगाबाद - जळगाव या राष्ट्रीय महामार्गाचे काम मागील गेल्या वर्षभरापासून सुरू आहे मात्र बेशिस्त कामामुळे या कंपनीचे काम थांबविण्याचा निर्णय घेण्यात आलेला आहे. या कामावर पालफाटा (ता. फुलंब्री) जय पेट्रोलियम या पेट्रोल पंपावरून २९ लाख सहा हजार रुपयाचे डिझेल देण्यात आले आहे; तसेच येथील ऋत्विक कंपनीच्या कर्मचाऱ्यांना हँडलोन म्हणून १८ लाख रुपये जय पेट्रोल पंपावरून देण्यात आलेले आहे. असे एकूण ४७ लाख सहा हजार रुपयांची थकबाकी ऋत्विक कंपनीकडे आहे. या बाकीसंदर्भात वेळोवेळी या कंपनीकडे पाठपुरावा केला मात्र, सतत उडवाउडवीची उत्तरे देण्यात आली. दोन दिवसापूर्वी या ऋत्विक कंपनीच्या कार्यालयात गेलो असता, येथून ऋत्विक कंपनीचे प्रकल्प व्यवस्थापक जयप्रकाश मळपण यांनी पळ काढल्याचे दिसून आले. त्यामुळे ऋत्विक कंपनीचे व्यवस्थापक जय प्रकाश मळपण व ऋत्विक कंपनीच्या विरोधात कायदेशीर कारवाई करावी.

म. टा. प्रतिनिधी, औरंगाबाद

महिलेला ऑनलाइन ४५ हजार रुपयाचा गंडा घालणाऱ्या आरोपीला सायबर पोलिस ठाण्याच्या पथकाने झारखंडमधून अटक केली. हा प्रकार १९ जून रोजी हा प्रकार घडला होता. याप्रकरणी महिलेच्या तक्रारीवरून सायबर पोलिस ठाण्यात माहिती आणि तंत्रज्ञान कायदा आणि फसवणूकीचा गुन्हा दाखल करण्यात आला होता.

१९ जून रोजी या महिलेच्या मोबाइलवर अनोळखी आरोपीने कॉल केला होता. बँकेतून बोलत असल्याचे सांगत त्याने महिलेचे एटीएम कार्ड बंद पडल्याची थाप मारली हेाती. ओटीपी नंबर बदलून घ्या असे म्हणत त्याने महिलेकडून ओटीपी नंबर घेत तीच्या खात्यातून ४५ हजार २०० रुपये ऑनलाईन काढून घेतले होते. या प्रकरणी सायबर सेलचे पथक तपास करीत होते. हा गुन्हा झारखंड राज्यातील जामतारा भागातील एका व्यक्तीने केल्याची माहित पथकाला मिळाली होती. या माहितीवरून सायबर सेलचे जमादार धुडकू खरे, विवेकानंद औटी आणि विनोद परदेशी यांच्या पथकाने झारखंड गाठले होते. संशयित आरोपी धनेश्वर शंकर पोतद्दार (वय २९ रा. बरियापुर,मोहनपुर, जि. जामतारा) याला अटक करून त्याची चौकशी करण्यात आली. यावेळी आरोपी पोतद्दारने गुन्हा केल्याची कबुली दिली. त्याला औरंगाबादला आणत कोर्टापुढे हजर करण्यात आले. ही कारवाई पोलिस आयुक्त चिरंजीवप्रसाद, उपायुक्त मिना मकवाना, एसीपी डॉ. नागनाथ कोडे यांच्या मार्गदर्शनाखाली पोलिस निरीक्षक कैलास देशमाने, हेमंत तोडकर, सुशीला खरात, सविता तांबे, धुडकू खरे, विवेकानंद औटी, विनोद परदेशी, संजय साबळे, रेवनाथ गवळी, सुदर्शन ऐखंडे आदींनी केली.

म. टा. प्रतिनिधी, औरंगाबाद

कचरा संकलन उपभोक्ता कराची (युजर्स चार्जेस) निविदा प्रसिद्ध करण्यासाठी महापालिकेचे प्रशासन आता निवडणूक आयोगाची परवानगी मागणार आहे. बाळासाहेब ठाकरे स्मारकाच्या निविदेची कमर्शियल बीड उघडण्यासाठी देखील आयोगाची परवानगी मागितली जाणार आहे.

पालिकेने कचरा संकलन आणि वाहतुकीचे खासगीकरण केले असून त्यासाठी युजर्स चार्जेस आकारले जाणार आहेत. निवासी क्षेत्रातून दररोज एक रुपया, तर व्यावसायिक क्षेत्रातून दररोज दोन रुपये उपभोक्ता कर वसूल केला जाणार आहे. कचरा प्रक्रिया केंद्र पूर्ण क्षमतेने सुरू झाल्यानंतर हा कर वसूल करण्याचे ठरविण्यात आले होते, परंतु अद्याप एकही केंद्र पूर्ण क्षमतेने सुरू झालेले नसताना नागरिकांकडून तो वसूल करण्याची घाई पालिकेकडून केली जात आहे. हा कर वसूल करण्यासाठी स्वयंसेवी संस्था किंवा कंत्राटदाराच्या नियुक्तीसाठी निविदा तयार करण्यात आली असून तिच्या प्रसिद्धीपूर्वीच विधान परिषद निवडणुकीची आचारसंहिता लागली आहे. त्यामुळे निविदा प्रसिद्धीसाठी निवडणूक आयोगाची परवानगी घेतली जाणार आहे, अशी माहिती महापौर नंदकुमार घोडेले यांनी दिली.

\Bठाकरे स्मारकासाठी दोन निविदा

\B

शिवसेनाप्रमुख बाळासाहेब ठाकरे यांचे स्मारक उभारण्याचे काम करण्यासाठी पालिकेकडे दोन निविदा प्राप्त झाल्या आहेत. या दोन्हीही निविदांचे कमर्शियल बीड उघडण्याची परवानगी निवडणूक आयोगाकडे मागितली जाणार आहे. परवानगी मिळाली, तर आवश्यक प्रक्रिया पूर्ण करून काम सुरू करण्याच्या दृष्टिने प्रयत्न केले जाणार आहेत.

म. टा. प्रतिनिधी, औरंगाबाद

माहिती अधिकार कायद्यात (आरटीआय) बदल करून तो निष्प्रभ करण्याचा प्रयत्न केला जात आहे, असा आरोप करत स्वराज अभियान-स्वराज इंडियाने सोमवारी क्रांती चौकात जोरदार निदर्शने केली.

जन आंदोलनाच्या रेट्यामुळे २००५ मध्ये केंद्र सरकारला माहिती अधिकार कायदा करावा लागला, मात्र या कायद्यात बदल करत मोदी सरकार या कायद्याचा आत्माच काढून घेण्याचा, हा कायदा निष्भ्रप करू पाहात आहेत, असा आरोप यावेळी आंदोलकांनी केला. 'आरटीआय बचाव, देश बचाव' अशी घोषणाबाजी करत आंदोलकांनी संपूर्ण परिसर दणाणून सोडला. महाराष्ट्र राज्य हमाल मापाडी महामंडळाचे सरचिटणीस सुभाष लोमटे, स्वराज इंडियाचे अण्णा खंदारे, ज्येष्ठ कम्युनिस्ट नेते अॅड. मनोहर टाकसाळ, प्रा. विजय दिवाण, प्रा. अजित खोजरे, अॅड. रमेश खंडागळे, भगवान भोजने, जनता दलाचे अजमल खान, रवी रत्नपारखे, सुभेदार मेजर सुखदेव बन, मेराज सिद्दीकी, मराठवाडा लेबर युनियनचे सरचिटणीस देविदास कीर्तीशाही, प्रवीण सरकटे, देवचंद आल्हाट आदी उपस्थित होते. देशातील सर्व पातळीवरील व्यवहार पारदर्शक पद्धतीने चालावेत, भ्रष्ट अधिकाऱ्याना लगाम बसावा, संपूर्ण प्रशासनाने लोकांचीच कामे करावीत, विकास प्रक्रिया भ्रष्टाचारमुक्त व्हावी, या उद्देशाने केलेला कायदा मोडून काढण्याचा कट हाणून पाडण्यासाठी सर्वांनी संघटित लढा द्यावा, असे आवाहन यावेळी करण्यात आले.

म. टा. प्रतिनिधी, औरंगाबाद

मराठवाड्यातील काही भागात गेल्या तीन दिवसांपासून पाऊस होत असला तरी, अद्यापही विभागातील ७६पैकी तब्बल २६ तालुके कोरडेच आहेत. अद्यापही या तालुक्यात निम्माही पाऊस झालेला नाही.

या कालावधीमध्ये मराठवाड्याच्या इतर जिल्ह्यांच्या तुलनेत औरंगाबाद जिल्ह्यात दमदार पाऊस झाला. एकीकडे राज्यभरात वरुणराजा जोरदार हजेरी लावत असताना मराठवाडा मात्र कोरडा आहे.

मराठवाड्यात जूनमध्ये वार्षिक सरासरीच्या तुलनेत केवळ ६७.३४ मिलीमीटर (३६.४ टक्के) पाऊस झाला, तर २२ जुलैपर्यंत पावसाचे प्रमाण १५७.६८ मिलीमीटरपर्यंत (५५.१ टक्के) वाढले. औरंगाबाद जिल्ह्यातील सिल्लोड आणि वैजापूर या दोन तालुक्यांनीच आतापर्यंत अपेक्षित सरासरी ओलांडली आहे. दोन आठवड्यांपूर्वी जालना जिल्ह्यातील भोकरदन तालुक्यानेच अपेक्षित सरासरी गाठली होती मात्र, गेल्या काही दिवसात पावसाच्या खंडामुळे या तालुक्यांमध्येही पावसाची सरासरी घसरली आहे.

निम्माही पाऊस न झालेल्या तालुक्यांमध्ये सर्वाधिक सहा तालुके नांदेड जिल्ह्यातील आहेत. निम्माही पाऊस न झालेल्यांमध्ये औरंगाबाद जिल्ह्यातील पैठण, जालना जिल्ह्यातील घनसावंगी, परभणी जिल्ह्यातील परभणी, पालम, सेलू, पाथरी, आणि जिंतूर, हिंगोली जिल्ह्यातील हिंगोली, सेनगाव, वसमत या तालुक्यांचा समावेश आहे. नांदेड जिल्ह्यात पावसाने मोठी उघडिप दिली असल्याने अनेक महसूली मंडळांमध्ये पाणीटंचाईची परिस्थिती आहे. जिल्ह्यातील लोहा, किनवट, हदगाव, हिमायतनगर, देगलूर, धर्माबाद, बीड जिल्ह्यातील गेवराई, शिरूर कासार, वडवणी, अंबाजोगाई व धारूर, लातूर जिल्ह्यातील लातूर, औसा आणि चाकूर, उस्मानाबाद जिल्ह्यातील उस्मानाबाद व परंडा तालुक्यांत सरासरीच्या निम्माही पाऊस झालेला नाही.

दहा जुलै रोजी झालेल्या पावसाचा अपवाद वगळता २० जुलै रोजी मराठवाड्यात सर्वदूर पाऊस झाला. यापावसामुळे शेतकरी सुखावला असून, खोळंबलेल्या पेरण्यांनीही वेग घेतला आहे. आतापर्यंत विभागात २५४ मिलीमिटर पाऊस होणे अपेक्षित होते. मात्र, प्रत्यक्षात १५७.६८ मिमी इतकाच पाऊस झाला आहे.

धरणे अद्यापही तळाला

प्रकल्पाचे नाव................उपयुक्त पाणीसाठा.......टक्केवारी

मोठे प्रकल्प.........................१८.००...................०.३५

मध्यम प्रकल्प......................२५.२१९.................२.६८

लघु प्रकल्प.........................२२.२५२.................१.३०

गोदावरी नदीवरील बंधारे.......०.१०८...................०.०३

तेरणा, मांजरा वरील बंधारे......०००......................०००

एकूण पाणीसाठा...................६५.५८...................०.८० टक्के

विभागात ७८ टक्के पेरण्या

औरंगाबाद : पावसाने पुन्हा एकवार सर्वदूर हजेरी लावल्याने पेरण्यांना वेग आला असून, आतापर्यंत मराठवाड्यात ७८ टक्के पेरण्या झाल्या आहेत. औरंगाबाद विभागात ८९ तर लातूर विभागात ७२ टक्के पेरण्या झाल्या आहेत. पीक उगवण आणि वाढीच्या स्थितीत असतानाच पावसाचे आगमन झाल्याने त्यांचा मोठा फायदा पिकांना होईल, अशी माहिती लातूर विभागाचे कृषी सहसंचालक टी. एन. जगपात यांनी 'मटा'शी बोलताना दिली.

आधीच मका पीकवरील लष्करी अळीचे संकट असतानाच पीक वाढीच्या अवस्थेत असतानाच गेल्या काही दिवसांपासून पावसानेही ओढ दिल्याने शेतकऱ्यांच्या चिंतेत भर पडली होती. त्यात पावसाने कृपादृष्टी दाखवत सर्वदूर हजेरी लावल्याने शेतकऱ्यांमध्ये आनंदाचे वातावरण आहे. औरंगाबाद कृषी सहसंचालक कार्यालयाच्या कार्यक्षेत्रात औरंगाबाद, जालना व बीड या जिल्ह्याचा समावेश असून, या तिन्ही जिल्ह्याचे एकूण खरिपाचे सर्वसाधारण क्षेत्र २१ लाख १५ हजार आहे. यात प्रामुख्याने कापसाचे पेरा क्षेत्र दहा लाख २० हेक्टर तर, त्यापाठोपाठ सोयाबीन आणि मक्याचे क्षेत्र जास्त प्रमाणात आहे. औरंगाबाद विभागात सर्वसाधारण क्षेत्रापैकी आतापर्यंत ८९ टक्के क्षेत्रावर पेरणी झाली आहे. त्यात पैठण आदी भागात तुलनेते कमी पेरा झाल्याचे कृषी विभागाने दैनदिन पिक पेरणी अहवालात नमूद केले आहे.

लातूर सहसंचालक कार्यालयाच्या कार्यक्षेत्रात लातूर, परभणी, उस्मानाबाद, नांदेड, हिंगोली या पाच जिल्ह्यांचा समावेश आहे. लातूर विभागाचे खरीपचे सर्वसाधारण क्षेत्र ३० लाख हेक्टर असून, आतापर्यंत ७२ टक्के क्षेत्रावर पेरणी झाली आहे, अशी माहिती सहसंचालक टी. एन. जगताप यांनी दिली. नुकत्याच पडलेल्या पावसामुळे पेरणीला वेग आला असून, १०० टक्के पेरण्या होतील, असा विश्वास त्यांनी व्यक्त केला आहे. पिके हे उगवण आणि वाढीच्या स्थितीत असून, पडलेला पाऊस या स्थितीत खूप लाभदायक असल्याचे त्यांनी नमूद केले. लातूर विभागात सोयाबीन व तुरची मिश्र लागवड करा, असे आवाहनही त्यांनी केले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाची प्रशासकीय घडी व्यवस्थित बसवण्यासाठी नवनियुक्त कुलगुरू डॉ. प्रमोद येवले यांनी आढावा घेण्यास सुरुवात केली आहे. येवले यांनी सोमवारी दुपारी खरेदी समितीची बैठक घेतली. तसेच व्यवस्थापन परिषद सदस्यांशी अनौपचारिक चर्चा करून कुलगुरूंनी सहकार्याची अपेक्षा व्यक्त केली. मात्र, प्रभारी कुलसचिव डॉ. साधना पांडे यांना हटवल्यास अवश्य सहकार्य करू अशी भूमिका सदस्यांनी घेतली.

शिस्तशीर कामाची प्रचिती देत कुलगुरू डॉ. प्रमोद येवले यांनी विद्यापीठाच्या प्रशासकीय कामकाज सुरळीत करण्यावर भर दिला आहे. येवले यांनी सोमवारी खरेदी समितीची बैठक घेतली. फेब्रुवारी महिन्यापासून रखडलेल्या निर्णयावर बैठकीत चर्चा झाली. विद्यापीठाच्या कामांची प्राधान्यक्रमानुसार माहिती घेत येवले यांनी सूचना केल्या. या बैठकीला कुलसचिव डॉ. साधना पांडे, लेखा व वित्त अधिकारी राजेंद्र मडके यांच्यासह खरेदी समितीचे सदस्य उपस्थित होते. त्यानंतर कुलगुरूंनी व्यवस्थापन परिषद सदस्यांशी अनौपचारिक चर्चा केली. विद्यापीठातील समस्या आणि उपाय याबाबत मते जाणून घेतली. विद्यार्थी केंद्रबिंदू ठेवून काम करणार असल्याचे येवले यांनी सांगितले. तसेच कामकाजासाठी सहकार्य करण्याची अपेक्षा व्यक्त केली. तर प्रभारी कुलसचिव डॉ. साधना पांडे यांच्यामुळे अनेक नियमबाह्य कामे झाली आहेत. कुलसचिवांना पदावरुन हटवल्यास अवश्य सहकार्य करू अशी भूमिका व्यवस्थापन परिषद सदस्यांनी घेतल्याचे, सूत्रांनी सांगितले. कुलसचिवांच्या कामाचा पाढा वाचल्यामुळे कुलगुरू काय निर्णय घेतात याकडे सर्वांचे लक्ष लागले आहे. पीएच. डी. विभाग आणि शैक्षणिक विभागाच्या सर्वाधिक तक्रारी आहेत. येवले यांनी या विभागांचा आढावा घेतला. परीक्षा विभागाच्या कामकाजाचा आढावा मंगळवारी घेण्यात येणार आहे. लवकरच व्यवस्थापन परिषदेची बैठक घेऊन कामकाज सुरळीत करण्याचे प्रयत्न सुरू आहेत.

म. टा. प्रतिनिधी, औरंगाबाद

झोमॅटो कंपनीच्या कर्मचाऱ्याला जबरदस्तीने जय श्रीराम म्हणायस लावल्याप्रकरणी सिडको पोलिस ठाण्यात चार आरोपींवर गुन्हा दाखल करण्यात आला आहे. हा प्रकार रविवारी रात्री आझाद चौक ते बजरंग चौक मार्गावर घडला होता. याप्रकरणी चार आरोपींचा शोधून पहाटे अटक करण्यात आली.

याप्रकरणी शेख आमेर शेख अकबर (वय २५, रा. कटकटगेट) या तरुणाने तक्रार दाखल केली. आमेर हा झोमॅटो कंपनीमध्ये कर्मचारी आहे. रविवारी रात्री आमेर आणि त्याचा सहकारी शेख नासेर हे एका हॉटेलची ऑर्डर घेऊन ग्राहकाकडे दुचाकी जात होते. यावेळी आझाद चौकाकडून ते बजरंग चौकाकडे जात होते. त्या मार्गावरून एक खासगी बस जात असल्याने आमेर याने दुचाकी बाजूला घेतली. यावेळी एका कारचालकाने साथीदारासह बसच्या चालकासोबत वाद घातला. बस निघून गेल्यानंतर या कारमधील चौघांनी आमेरला अडवले. बसचालकाला काय बोलला, असे म्हणत त्यांनी आमेरसोबत वाद घातला; तसेच त्या दोघांना धमकावत जय श्रीराम म्हणायला भाग पाडले. यानंतर आमेर आणि नासेर दुचाकीवर निघून जात असताना या कारमधील चौघांनी पाठलाग करून अश्लील शेरेबाजी केली.

याप्रकरणी या चार संशयित आरोपींवर सिडको पोलिस ठाण्यात भावना भडकावल्याप्रकरणी गुन्हा दाखल करण्यात आला हेाता. सिडको पोलिस ठाण्याचे पोलिस निरीक्षक अशोक गिरी यांनी तातडीने हालचाल करीत कारच्या क्रमांकावरून आरोपींचा शोध घेतला. संशयित आरोपी संदीप साईनाथ औताडे (वय २५, रा. पिसादेवी रोड), सुनील परमेश्वर घाटूळ (वय २४, रा. नारायणी हॉस्पिटलच्या मागे, सिडको), अक्षय नवनाथ लावंड (वय २३) आणि ऋषिकेश अंकुशराव पोले (वय २१, रा. सिडको एन सहा) यांना अटक करण्यात आली आहे.

\Bहा प्रकार मॉब लिंचिंगचा नाही : खासदार जलील\B

शहरात घडलेल्या घटनेनंतर खासदार इम्तियाज जलील यांनी सोमवारी (२२ जुलै) पोलिस आयुक्त चिरंजिव प्रसाद यांच्याशी भेट घेतली. या भेटीनंतर पत्रकारांशी बोलताना खासदार इम्तियाज जलील यांनी सांगितले की, शनिवारी रात्री घडलेला प्रकार हा 'मॉब लिंचिंग' नाही. हा चार युवक आणि दोन युवकांमध्ये झालेला वाद आहे. या वादाला काही समाजकंटकांकडून वाढविण्यात आले आहे. शहरात एक टक्क्यापेक्षा कमी लोक अशांतता माजविण्याचा प्रयत्न करीत आहेत. ते कोणीही असोत, त्यांच्यावर कठोर कारवाई करा. दोन समाजात तेढ निर्माण करून विधानसभेत राजकीय फायदा घेण्याचा हा प्रकार असण्याची शक्यता आहे. अशा घटना समोर आल्यावर त्यांची शहानिशा करण्याच्या सूचना आमच्या पक्षाच्या नगरसेवकांना दिल्या आहेत. शहराची शांतता बिघडविणाऱ्यांच्या विरोधात कठोर कारवाई करण्यात यावी.

\Bशांतता समितीची बैठक घ्यावी\B

शहरात दोन मॉब लिंचिंगच्या घटना घडलेल्या आहेत. या घटनांच्या प्रकरणात संबंधीत दोषींवर तत्काळ कारवाई करावी. प्रत्येक पोलिस ठाण्यात; तसेच वॉर्डात सर्वधर्म शांतता समितीची बैठक आयोजित करावी. आगामी विधानसभा व महापालिका निवडणूक समोर ठेवून काही जातीवादी संघटना यात सक्रिय असल्याचे दिसत आहे. याबाबत योग्य ती कायदेशीर कारवाई करावी, अशी मागणी जनजागरण समिती महाराष्ट्रचे मोहसीन अहेमद, मीर हिदायत अली, आबेदा बेगम यांनी पोलिस आयुक्तांना दिलेल्या निवेदनाद्वारे केली आहे.

………

म. टा. प्रतिनिधी कन्नड

भारबा (ता. कन्नड) येथून जवळ असलेल्या भारंबा-तांडा नदी नाल्यावरून वाहणाऱ्या पुरात शनिवारी (२० जुलै) वाहून गेलेल्या वनरक्षकांपैकी दुसऱ्या वनरक्षकाचा मृतदेह सोमवारी (२२ जुलै) सापडला.

नदीला सायंकाळी आलेल्या पुरात वनविभागाचे दोन वनरक्षक वाहून गेले होते. त्यात राहुल जाधव आणि अजय भोई हे वनपक्षक वाहून गेले होते. त्यापैकी राहुल जाधव यांचा मृत्यदेह दुसऱ्या दिवशी, रविवारी (२१ जुलै) सकाळी ११च्या सुमारास नाल्याजवल आढळून आला होता. अजय भोई यांचा मृतदेह सोमवारी (२२ जुलै) दुपारी चार वाजता सापडला. जाधव यांचा मृतदेह पिशोर ग्रामीण रुग्णालयात आणून उत्तरीय तपासणी करून नातेवाईकांच्या स्वाधीन केला. दुसऱ्या दिवसी भोई यांना शोधण्यासाठी रविवारी सकाळपासून संध्याकाळपर्यंत वन विभाग, पोलिस प्रशासन, महसूल विभाग, अग्निशामक दल, ग्रामस्थ यांचे प्रयत्न सुरू होते. त्यात त्यांना यश आले नाही. यामुळे सोमवारी 'एनडीआरएफ' पथकाला पाचारण करण्यात आले. सकाळी सातपासून सुरू असलेल्या शोधकार्याला दुपारी चारच्या सुमारास यश आले. भारंबा रोडवरील पुलापासून काही अंतरावर अजय भोई यांचा माती खाली दबलेला मृत्यदेह आढळला. 'एनडीआरएफ' व अग्निशामक दलाच्या जवानांनी भोई यांचा मृत्यदेह बाहेर काढला. पोस्टमार्टेम करून मृत्यदेह नातेवाईकांच्या स्वाधीन करण्यात आला.

म. टा. प्रतिनिधी, सिल्लोड

खुपटा (ता. सिल्लोड) येथील भाऊ हिस्स्याची शेती भावाच्या निधनानंतर त्यांच्या वारसाच्या नावावर झाली. यामुळे भावकी हिस्स्यावरून वारसदार आणि काका यांच्यात वाद सुरू होता. तो सज्जाचे तलाठी विजय शेळके यांनी उपसरपंच, पोलिस पाटील व ग्रामस्थांच्या मदतीने सांमजस्यातून गावातच मिटवून दोन कुटुंबातील सलोखा कायम ठेवला.

खुपटा शिवारात दौलत संपत वाघ यांच्या ताब्यात गट क्रमांक ३३६मध्ये ७८ आर आणि गट क्रमांक ३४२मध्ये ६३ आर अशी एकूण तीन एकर २१ आर शेती होती मात्र, ही शेती त्यांचे भाऊ आनंदा संपत वाघ यांच्या नावावर होती. त्यांचे निधन झाल्याने वारसाने शेती वारसदार नर्मदा देविदास वाघ, पवन देविदास वाघ, सविता देविदास वाघ, कविता देविदास वाघ (सर्व रा. ह. मु. औरंगाबाद) यांच्या नावावर आली. महिनाभरा पूर्वी ही शेती नावे आलेल्या वारसदारांनी पेरली. त्यानंतर ताबेदार दौलत वाघ यांच्या मुलांनी पेरलेले मका पीक तोडून पुन्हा पेरणी केली. यावरून दोघांमध्ये वाद झाला व त्यांनी एकमेकांनी एकमेकांविरोधात पोलिस ठाण्यात तक्रारी दाखल केल्या होत्या. शिवाय वारसदारांनी पेरलेली मका तोडल्याचा पंचनामा करावा व नुकसान भरपाई द्यावी, अशी मागणी तहसीदार यांच्याकडे केली होती.

या अनुषंगाने तहसील प्रशासनाने दोन्ही पक्षांना नोटीस बजावून शनिवारी (२० जुलै) शेतीत हजर राहण्यास सांगितले होते. त्यांच्या समक्ष तलाठी शेळके यांनी पंचनामा केला. त्यानंतर दोन्ही पक्षांकडील मंडळींची पोलिस पाटील शिवाजी काळे, उपसरपंच प्रभाकर काळे, शेणफड नाटुबा आदींनी समजूत काढली व शेती समान (अर्धी- अर्धी) वाटून घेण्याचा प्रस्ताव ठेवला. हा प्रस्ताव दोन्ही पक्षांकडील मंडळींना मान्य केला व वादावर कायमस्वरूपी पडदा टाकत आपपसातील सलोखा कायम ठेवला.

\Bतहसीलदारांकडून सत्कार\B

तलाठी विजय शेळके यांच्या या पुढाकारामुळे भांडणे मिटली. त्यामुळे तहसीलदार रामेश्वर गोरे, नायब तहसीलदार संजय सोनवणे, कार्यालयीन अधिकारी, कर्मचारी व तलाठी यांनी शेळके यांचा सत्कार केला. एरव्ही शेतीच्या छोट्या-छोट्या कारणांवरून हाणामारीच्या घटना घडतात. शिवाय अशा वादाचे अनेक खटले न्यायालयात सुरू आहेत परंतु, गावातच सांमजस्यातून समेट घडवून आणला तर, वादही मिटेल व आपसातील सलोखा ही कायम राहील, हे या प्रसंगावरून समोर आले.

म. टा. प्रतिनिधी, औरंगाबाद

प्रतिकूल परिस्थितीत न डगमगता मेहनतीच्या बळावर दहावीच्या परीक्षेत नेत्रदीपक यश मिळवलेल्या विद्यार्थ्यांना त्यांच्या भावी शिक्षणासाठी समाजाच्या दातृत्वाची साथ हवी आहे. या विद्यार्थ्यांना दहावीच्या वर्गापर्यंत शिकवताना त्यांच्या आई, वडिलांनी कमालीचे परिश्रम घेतले आहेत. वेळप्रसंगी पोटाला चिमटा घेत त्यांनी आपल्या मुलांना यशाच्या शिखरावर पोचवले आहे. यशाच्या शिखरावर फडकणारा त्यांचा झेंडा कायम फडकत रहावा, याची जबाबदारी आता समाजातील तुम्हा-आम्हा सर्वांची आहे.

तन्वी दीपक देशमुख

Tanvi Dipak Deshmukh

९६.२० टक्के

सिडको एन आठ येथील वेणुताई चव्हाण शाळेत तन्वी देशमुखचे दहावीपर्यंत शिक्षण झाले. पहिल्या वर्गापासूनच तिची अभ्यासातली चुणूक शिक्षकांनी ओळखली. त्यांनी तिला प्रोत्साहन दिले. तिच्या आई, बाबांनी देखील हात आखडता घेतला नाही. काबाडकष्ट करून त्यांनी तन्वीला दहावीपर्यंत शिकवले. तिचे वडील खासगी सुरक्षा रक्षक म्हणून कामाला आहेत तर, आई शिवणकाम करून संसाराच्या गाड्याला हातभार लावते. दहावीच्या पुस्तकांच्या खरेदीसाठी तन्वीच्या बाबांकडे पैसे नव्हते, त्यामुळे चार टप्प्यांत तिच्यासाठी पुस्तकांची खरेदी करण्यात आली. शाळेचे शुल्क भरण्यासाठी त्यांना हातउसने पैसे घ्यावे लागले. अशा परिस्थितीत खचून न जाता तन्वीने अभ्यास केला आणि दहावीच्या परीक्षेत ९६.२० टक्के गुण मिळवले. तिला 'सीए' व्हायचे आहे.

प्रेरणा दिलीप थोरात

Prerana Dileep Thorat

९१.२० टक्के

साताऱ्यात (खंडोबा) डोंगराच्या पायथ्याशी भीमशक्तीनगरात दोन खोल्यांचे पत्र्याचे घर प्रेरणाचे आहे. सातारा गावातून रोज दहा-पंधरा किलोमीटरची पायपीट करून जिद्दीने शिक्षण घेत प्रेरणाने दहावीच्या परीक्षेत ९१.२० टक्के गुण मिळवले. सहकारनगरमधील ओम प्राथमिक व माध्यमिक शाळेची ती विद्यार्थिनी. तिची आई, कविता शिपाई आहे. वडील कामगार आहेत. रोज मातीकाम मिळेलच याची खात्री नाही, त्यांना आठवड्यातून चार दिवस काम मिळते. प्रेरणाची शाळा सकाळची. शाळा सुटल्यावर दुपारी ती ट्युशनला जात होती. ट्युशन संपल्यावर ज्योतीनगर भागात एका ब्युटी पार्लरमध्ये साफसफाईचे काम करते. हे करताना तिने शिक्षणाची जिद्द सोडली नाही. दहावीच्या परीक्षेत तिने मोठे यश मिळवले. आता तिला इंजिनीअर व्हायचे आहे.

संतोष किसन शिंदे

Santosh Kisan Shinde

९०.२० टक्के

सिडको एन सात येथील महापालिकेच्या शाळेचा विद्यार्थी असलेल्या संतोष किसन शिंदेला सीए व्हायचे आहे. प्रतिकूल परिस्थितीत न डगमगता त्याने चिकाटीने अभ्यास केला आणि दहावीच्या परीक्षेत ९०.२० टक्के गुण मिळवले. संतोषचे वडील रिसोड तालुक्यातील बिबेवाडीचे. संतोषच्या जन्मानंतर त्यांनी गाव सोडले आणि मुंबई गाठली. कामाच्या शोधात मुंबईत त्यांची काही वर्षे गेली, पण त्यांना म्हणावे तसे काम मिळाले नाही. पत्नी भारती यांचे आई, वडील औरंगाबादेत होते. त्यामुळे मुंबईसोडून त्यांनी औरंगाबाद गाठले. बांधकामाच्या साइटवर काम करीत त्यांनी आपल्या मुलांना शिकवण्याचा विडा उचलला. त्यांच्या परिश्रमला साथ देत संतोषने दहावीच्या परीक्षेत चांगले यश मिळवले. यश टिकवण्यासाठी व वाढवण्यासाठी त्याला दातृत्वाची साथ हवी आहे.

विवेक गणेश जाधव

Vivek Ganesh Jadhav

९२ टक्के

रायझिंग स्टार शाळेचा विद्यार्थी असलेला विवेक गणेश जाधवने दहावीच्या परीक्षेत ९२ टक्के गुण मिळवले. त्याचे वडील रिक्षा चालवून कुटुंबाचा उदरनिर्वाह चालवतात. आई संसाराचा गाडा समर्थपणे ओढते. विवेकचे वडील कन्नड तालुक्यातील कोळंबीचे. दहावीपर्यंत शिक्षण झाल्यावर ते औरंगाबादेत आले. शिक्षणाबरोबरच नोकरीही करू लागले. हंगामी कामगार म्हणून त्यांना काम मिळत असे. त्यांच्यासाठी आर्थिक विवंचना कायमच होती. पदवीपर्यंत शिक्षण जाल्यावर त्यांनी रिक्षा चालवण्याचा निर्णय घेतला. भाड्याने रिक्षा चालवणे त्यांनी सुरू केले. त्यातून मिळणाऱ्या उत्पन्नातून ते संसाराचा गाडा हाकतात. वडिलांचे कष्ट डोळ्यात साठवणाऱ्या विवेकला इंजिनीअर होऊन आपल्या आई, वडिलांना समर्थ साथ द्यायची आहे.

गणेश दामोदर गायकवाड

Ganesh Damodhar Gaikwad

९३ टक्के

गणेश दामोदर गायकवाडला दहावीच्या परीक्षेत ९३ टक्के गुण मिळाले. राजर्षी शाहू विद्यालयाचा तो विद्यार्थी. त्याला कम्प्युरट इंजिनीअर व्हायचे आहे. त्याचे वडील परभणीत एका पेट्रोल पंपावर काम करतात. त्यांना महिन्याकाठी सात-आठ हजार रुपये पगार मिळतो. त्यावर घर चालणे शक्य नसल्यामुळे गणेशची आई देखील कंपनीत कामासाठी जाते. त्यांना रोज २५० रुपये मिळतात. साप्ताहिक सुट्ट्या आणि खाडे वजा जाता त्यांच्या पदरात महिन्याकाठी जेमतेम पाच-सहा हजार रुपये पडतात. कितीही कष्ट पडले तरी आपल्या मुलांना चांगले शिकवायचे आहे असा संकल्प त्यांनी सोडला आहे. विपरित परिस्थितीपुढे हात न टेकता त्याने दहावीच्या परीक्षेत मोठे यश मिळवले. त्याला पुढील शिक्षणासाठी दातृत्वाची साथ हवी आहे.

\Bबळ द्या पंखांना…...\B

बिकट परिस्थितीशी झुंजत दहावीच्या परीक्षेत लखलखीत यश मिळविणाऱ्या, परंतु आर्थिक प्रतिकूलतेमुळे पुढील शिक्षण घेण्यात अडचण असणाऱ्या विद्यार्थांना वाचकांच्या दातृत्वाच्या जोरावर बळ देणारा 'महाराष्ट्र टाइम्स'चा उपक्रम म्हणजे 'मटा हेल्पलाइन'. प्रतिकूलतेवर मात करीत दहावीचे यशोशिखर गाठलेल्या काही गुणवंत मुला-मुलींची संघर्षगाथा आम्ही मांडत आहोत. 'महाराष्ट्र टाइम्स'च्या हेल्पलाइन उपक्रमाद्वारे या विद्यार्थ्यांना पुढील शिक्षणासाठी तुम्ही मदत करू शकता. त्यासाठी या मुलांच्या नावाने चेक आमच्याकडे पाठवावा.

विशेष सूचना : चेक विद्यार्थ्यांच्या नावे 'मटा'च्या कार्यालयात द्यावेत. चेक जमा करण्यासाठी 'मटा'ने अन्य कोणाचीही नेमणूक केलेली नाही.

आमचा पत्ता : महाराष्ट्र टाइम्स, दुसरा मजला, साई स्क्वेअर, उस्मापुरा सर्कल, औरंगाबाद, ४३१००१

म. टा. प्रतिनिधी, औरंगाबाद

कृषी पदवी अभ्यासक्रमाच्या प्रवेश प्रक्रियेतील आक्षेपांनंतर मंगळवारी तक्रारींची यादी जाहीर केली जाणार आहे. अंतिम गुणवत्ता यादी २६ जुलैला जाहीर होणार असून, पहिल्या फेरीसाठीची प्रक्रिया २८ जुलैपासून सुरू होत आहे. या जागांसाठी तब्बल ४० हजारपेक्षा अधिक विद्यार्थी पात्र ठरले आहेत.

व्यावसायिक अभ्यासक्रमाच्या प्रवेश प्रक्रिया एकाच ठिकाहून राबविण्याचा प्रयत्न फसल्यानंतर कृषीसह विविध अभ्यासक्रमांची प्रवेश प्रक्रिया स्वतंत्र राबविण्यात येत आहे. कृषी पदवी अभ्यासक्रमाच्या प्रवेश प्रक्रियेत विद्यार्थ्यांकडून नोंदणीची प्रक्रिया दहा जुलैपर्यंत पूर्ण करण्यात आली. त्यानंतर तात्पुरती गुणवत्ता यादी जाहीर करण्यात आली. आक्षेपही मागविण्यात आले. त्या आक्षेपाची यादी मंगळवारी जाहीर केली जाणार आहे. त्यानंतर अंतिम गुणवत्ता यादी व प्रत्यक्ष प्रवेश प्रक्रियेला सुरुवात होणार आहे. चार कृषी विद्यापीठातील शासकीय, खासगी अशा १७५ कॉलेजांमधील विविध आठ अभ्यासक्रमांना प्रवेश दिला जातो. १४ हजार ५७७ जागांवर हे प्रवेश दिले जाणार आहेत. त्यासाठी प्रवेशाचा कोटा निश्चित करण्यात आला आहे. त्यामध्ये शासकीय कॉलेजांमध्ये प्रवेश क्षमतेच्या पाच टक्के जागा भारतीय कृषी संशोधन परिषदेसाठी, दोन टक्के जागा राज्याबाहेरील उमेदवारांकरिता राखीव ठेवून उर्वरित जागांच्या ३० टक्के जागा राज्यातील उमेदवारांसाठी व ७० टक्के जागा संबंधित कृषी विद्यापीठाच्या कार्यक्षेत्रातून बारावी विज्ञान शाखेतून उत्तीर्ण विद्यार्थ्यांसाठी राखीव (कृषी विद्यापीठ कोटा) आहेत. जम्मू आणि काश्मीर या राज्यातील स्थलांतरित नागरिकांची मुले, लष्कर, लष्करसम व अखिल भारतीय दहशतवादविरोधी सेवा यामधील अधिकारी, कर्मचारी यांची मुले यांना प्रत्येक शासकीय कॉलेजमध्ये प्रवेश क्षमतेव्यतिरिक्त एक जागेवर प्रवेश देण्याची तरतूद आहे. कायमस्वरुपी विना अनुदानित कॉलेजमध्ये २० टक्के जागा संस्थास्तरीय कोट्यासाठी राखीव ठेवून उर्वरित जागांपैकी राखीव ठेवून उर्वरित जागांपैकी ३० टक्के महाराष्ट्र कोटा आणि ७० टक्के कृषी विद्यापीठ कोटा असे जागांचे वाटप केले जाते.

\Bकृषी अभ्यासक्रमांना पात्र विद्यार्थी संख्या

\Bबीएससी ऑनर्स-कृषी ४०५६६

बीएससी ऑनर्स-सामाजिक विज्ञान ४०५६६

बीएससी ऑनर्स-वनविद्या ३५७००

बीएससी ऑनर्स-उद्यानविद्या ४०५६६

बी.टेक. अन्नतंत्रज्ञान २४९९१

बी.टेक. कृषी अभियांत्रिकी ४०५६६

बी.टेक. जैवतंत्रज्ञान ४०५६६

बी.एफ.एससी. मत्स्यशास्त्र ३५६६६

प्रवेश प्रक्रियेतील महत्वाच्या तारखा......

विचारात घेण्यात आलेल्या तक्रारींची यादी..........२३ जुलै

अंतिम गुणवत्ता यादी...................................२७ जुलै

पहिली प्रवेश फेरी प्रक्रिया....................२८ जुलै ते २ ऑगस्ट

दुसरी प्रवेश फेरी...... ६ ऑगस्ट ते ९ ऑगस्ट

तिसरी प्रवेश फेरी.. १२ ते १६ ऑगस्ट

चौथी फेरीची प्रक्रिया १९ ते २२ ऑगस्ट

प्रवेश निश्चितीनंतर शुल्क भरणे.......... २० ते २३ ऑगस्ट

स्पॉट अॅडमिशन................................२४ ते २९ ऑगस्ट

संस्थास्तरीय कोट्यातील प्रवेश प्रक्रिया......२९ ऑगस्ट ते ७ सप्टेंबर

म. टा. प्रतिनिधी, औरंगाबाद

आमदार अब्दुल सत्तार यांनी काँग्रेसला सोडचिठ्ठी दिल्यानंतर सिल्लोड विधानसभा मतदारसंघावर राष्ट्रवादी काँग्रेस पक्ष दावा सांगणार आहे. या बदल्यात काँग्रेसला इतर मतदारसंघ देता येईल का याबद्दल पक्षश्रेष्ठींसमोर मांडणी करण्यात येणार आहे, अशी माहिती आमदार विक्रम काळे यांनी सांगितले.

राष्ट्रवादी भवनात सोमवारी जिल्ह्यात विधानसभा मतदारसंघातून इच्छुक ३७ जणांच्या मुलाखती आमदार काळे, अविनाश आदिक यांनी घेतल्या. यावेळी त्यांनी पत्रकारांशी संवाद साधला. आमदार काळे म्हणाले की, आमची काँग्रेससोबत आघाडी होणार आहे, तरीही पक्षाची पूर्वतयारी, तसेच धोरणाचा भाग म्हणून जिल्ह्यातील सर्व विधानसभा मतदारसंघातील इच्छुकांच्या मुलाखती घेण्यात आल्या. इच्छुकाला मतदारसंघाची संपूर्ण माहिती, एकूण मतदार, बुथ संदर्भात माहिती, पक्षासाठी केलेले काम, जातनिहाय गणित आदींची माहिती विचारण्यात आली. पक्षात प्रामाणिकपणे काम करणाऱ्या कार्यकर्त्याला संधी मिळावी याचा प्रयत्न राहील, असे ते म्हणाले.

अविनाश आदिक म्हणाले की, राज्यात ग्रामीण भागात काँग्रेस आणि राष्ट्रवादी काँग्रेस पक्षाला आधार आहे. यंदा विधानसभा निवडणुकीत दुष्काळाचे आव्हान राहणार आहे. सर्व ठिकाणी भाजप आणि शिवसेनेची सत्ता असून आता तरी त्यांनी विकास कामे करायला पाहिजे. पण, हे सरकार विकासाच्या मुद्द्यावर बोलत नाही. केवळ भावनेचा डोलारा उभा करायचा प्रकार सत्ताधारी करतात, अशी टीका त्यांनी केली. यावेळी जिल्हाध्यक्ष कैलास पाटील, शहराध्यक्ष विजय साळवे, कार्याध्यक्ष अभिषेक देशमुख आदींची उपस्थिती होती.

\Bपैठण मतदारसंघात सर्वाधिक इच्छुक \B

काँग्रेससोबतच्या आघाडीत राष्ट्रवादी काँग्रेसच्या वाट्याला औरंगाबाद जिल्ह्यातील गंगापूर, वैजापूर पैठण व औरंगाबाद मध्य हे मतदारसंघ येतात. मात्र, फुलंब्री, सिल्लोड, कन्नड, औरंगाबाद पश्चिम, औरंगाबाद पूर्व या मतदारसंघासाठीही इच्छुकांनी मुलाखत दिल्या. यामध्ये सर्वाधिक १० इच्छुकांनी पैठण मतदारसंघासाठी मुलाखत दिली, तर सिल्लोड, वैजापूर व फुलंब्रीसाठी प्रत्येकी दोन, कन्नड, औरंगाबाद पश्चिम व औरंगाबाद मध्यसाठी प्रत्येकी तीन, गंगापूरसाठी पाच इच्छुकांनी मुलाखती दिल्या. या संदर्भात

म. टा. प्रतिनिधी, औरंगाबाद

पदवी प्रमाणपत्राचे (सनद) विलंब शुल्क माफ केल्यानंतर तब्बल दहा हजार जुन्या विद्यार्थ्यांनी अर्ज केले आहेत. पण, प्रमाणपत्राचा कागद शिल्लक नसल्यामुळे प्रमाणपत्र वितरण ठप्प आहे. चालू वर्षी दीक्षांत समारंभासाठी एक लाख २५ हजार पदवी प्रमाणपत्राची आवश्यकता आहे. कागद खरेदीच्या निविदेबाबत खरेदी समितीच्या बैठकीत सोमवारी (२२ जुलै) चर्चा झाली. आता व्यवस्थापन परिषदेच्या बैठकीत मान्यता मिळाल्यानंतर कागद खरेदीचा प्रश्न मार्गी लागणार आहे.

डॉ. बाबासाहेब आंबेडकर मराठवाडा विद्यापीठाच्या परीक्षा विभागात गुणपत्रिका आणि प्रमाणपत्राच्या कागदाचा तुटवडा आहे. जानेवारी महिन्यापासून कागद खरेदी प्रक्रिया दुर्लक्षित असल्यामुळे निकालाच्या काळात गुणपत्रिकांचा मुद्दा उपस्थित झाला. त्यानंतर उशिराने निघालेली निविदा प्रक्रिया व कंत्राटदाराच्या पुरवठ्यातील विलंबात निकाल रखडले होते. दोन सत्र परीक्षेच्या गुणपत्रिकांसाठी सात लाख कागदांची आवश्यकता होती. कागद टप्प्याटप्प्याने उपलब्ध झाल्यानंतर निकाल जाहीर करण्यात आले. अजूनही पदवी स्तरावरील गुणपत्रिकांचा गोंधळ कायम आहे. दुष्काळाच्या पार्श्वभूमीवर पदवी प्रमाणपत्राचे विलंब शुल्क माफ करण्याची मागणी व्यवस्थापन परिषद सदस्य डॉ. नरेंद्र काळे यांनी केली होती. त्यानुसार ठराव घेऊन विलंब शुल्क माफ करण्यात आले. विद्यापीठाच्या वर्धापन दिनापर्यंत म्हणजेच २३ ऑगस्टपर्यंत सवलत देण्यात आली. औरंगाबाद, जालना, बीड आणि उस्मानाबाद जिल्ह्यातील विद्यार्थ्यांची अर्जासाठी गर्दी झाली. पदवीला दहा वर्षांपेक्षा जास्त कालावधी झालेल्या विद्यार्थ्यांचा त्यात अधिक भरणा आहे. एका वर्षाचे विलंब शुल्क १०० रुपये असून दोन पदवी प्रमाणपत्र असलेल्या विद्यार्थ्यांना दिलासा मिळाला आहे. या विद्यार्थ्यांनी गर्दी केल्यानंतर परीक्षा विभागाने पहिल्या टप्प्यात दिरंगाई केली. विद्यार्थी संतापल्यानंतर प्रथम अडीच हजार प्रमाणपत्राचे वितरण करण्यात आले. सध्या पदवी प्रमाणपत्र वितरण विभागाकडे दहा हजार अर्ज आले आहेत. पण, कागद नसल्यामुळे वितरण ठप्प असल्याचे वरिष्ठ अधिकाऱ्याने सांगितले. यावर्षी दीक्षांत समारंभ घेतल्यास दोन वर्षांचे प्रमाणपत्र वितरण करावे लागणार आहे. त्यासाठी एक लाख २५ हजार कागदांची गरज आहे. या दिरंगाईत हजारो विद्यार्थ्यांची गैरसोय झाली आहे. विशेषत: बाहेरगावचे विद्यार्थी हेलपाटे घालत आहेत.

\Bबैठकीत फक्त चर्चा

\Bपदवी प्रमाणपत्राच्या कागद खरेदीच्या निविदेवर सोमवारी खरेदी समितीच्या बैठकीत चर्चा झाली. व्यवस्थापन परिषदेच्या बैठकीत मान्यता मिळाल्यानंतर कागद खरेदीची प्रक्रिया होणार आहे. आचारसंहितेच्या अंमलामुळे विद्यापीठाचे निर्णय अधांतरी राहण्याची शक्यता आहे. त्यामुळे वेळेत प्रमाणपत्र मिळेल का, असा प्रश्न विद्यार्थ्यांनी उपस्थित केला आहे.

पदवी प्रमाणपत्रासाठी सव्वा लाख कागदांची आवश्यकता आहे. कुलगुरू मंगळवारी परीक्षा विभागाचा आढावा घेणार आहेत. या मुद्द्यावर चर्चा होऊन तातडीने निर्णय घेण्याचा प्रयत्न करण्यात येईल.

- डॉ. गणेश मंझा, संचालक, परीक्षा व मूल्यमापन

म. टा. प्रतिनिधी, औरंगाबाद

'नोकरीसाठी पीएच.डी., एम.फील.ची सक्ती केली गेली आणि विद्यापीठांमध्ये संशोधनाच्या प्रबंधांचे ढीग उभे राहिले. सक्तीमुळे पदवी मिळविणांऱ्या केवळ आपण फौजा निर्माण केल्या. त्यातून काहीच निष्पन्न करू शकलो नाही,' अशी खंत ज्येष्ठ इतिहास तज्ज्ञ डॉ. आर. एस. मोरवंचीकर यांनी सोमवारी व्यक्त केली.

भारतीय ऐतिहासिक संशोधन परिषद, पश्चिम विभागीय केंद्रातर्फे 'संशोधनातील नवीन पैलू आणि संशोधनाची पद्धती'वर त्यांच्या व्याख्यानाचे आयोजन करण्यात आले होते. सरस्वती भुवन संस्थेच्या गोविंदभाई श्रॉफ ललित कला अकादमी सभागृहात झालेल्या कार्यक्रमाला व्यासपीठावर अध्यक्षस्थानी पारस बोरा, डॉ. अरुणाचंद्र पाठक, डॉ. अशोक वाकोडकर यांची उपस्थिती होती. यावेळी डॉ. मोरवंचीकर म्हणाले, 'पीएच.डी., एम.फील.ची सक्ती कशाला करता. त्या सक्तीच्या नावाखाली कसली तरी पीएच.डी, एफ.फील करायला लावू नका. दोन पैसे कमी द्या परंतु, त्यांचा काम करण्याचा आनंद हिरावून घेवू नका. ज्याला कोणत्या क्षेत्रात संशोधन करायचे आहे, त्याची आवड, त्या क्षेत्रातील काम पाहून त्याला काम करण्याची संधी द्या. आपापले काम तपासून घेऊन त्यात सुधारणेची त्याला संधी द्या. असा नवा विचार, नवीन साधनांचा विचार केला तर संशोधनासारख्या विषयाला अर्थ प्राप्त होईल. नवे विचार स्वीकारतच आपल्याला पुढे जावे लागेल. निरंतर होणारा बदल इतिहास, राज्यशास्त्राचा आत्मा असतो. सर्वसामाजिक शास्त्रांचे हेच मुलभूत आहे,' असे म्हणत पाण्याचा इतिहास लिहलेच्या आठवणींना त्यांनी यावेळी उजाळा दिला. यावेळी पारस बोरा म्हणाले, 'उपलब्ध ज्ञान ते पुरेसे आहे का, चुकीच आहे का हे प्रश्न निर्माण झाले की संशोधनाची कल्पना पुढे येते. संशोधनातूनच ज्ञानाचा विकास होतो, ज्ञान पुढे चालत राहतं. यावेळी कार्यक्रमाला इतिहास, लोकप्रशासन विषयातील शिक्षणतज्ज्ञ, मान्यवरांची उपस्थिती होती.